NJAMA - 4

 

Simulizi : Njama

Sehemu Ya Nne (4)



CHANZO:  https://deusdeditmahunda.blogspot.com/

"Sijui mna maswali zaidi maana nahitajiwa ofisi za Ubalozi wa Botswana kwani kesho kutwa nina safari ya kwenda huko kuonana na wanachama na wanajeshi wangu walioko huko".



Tulitazamana tukaona hakuna zaidi.



"Nafikiri inatosha, tukikuhitaji naamini utakuwa tayari kutuona kabla hujaondoka".



"Bila shaka".



Tulisimama, tukapeana mikono na tukaagana. Tulitoka na kuingia ndani ya ofisi ya mwandishi wake.



"Hujambo mrembo, maana hatukusalimiana wakati tunaingia kwani tulikuwa katika haraka", nilimsalimu.



"Mimi sijambo", alijibu huku bado anatuangalia kwa macho ya kushangaa.



Tulimwacha ashangae tukatoka nje ya ofisi na kuelekea mapokezi. Hapo tulimkuta yule msichana.



"Siku nyingine ukitukatalia utafukuzwa kazi. Angalia vizuri sana sura hizi maana sidhani utapata kazi mahali pengine wanakochukua muda kujirembua wakati wa kazi. Hivyo chunga kazi yako", nilimshauri.



"Si nikikosa kazi kwa sababu yako nitakutafuta".



"Nani atataka msichana wa kujirembua huku chungu jikoni kinaungua nyumbani kwake?".



Msichana yule alivimba, tukaona tuondoke kabla hajapasuka. Tulipotoka nje tulielekea moja kwa moja kwenye gari letu tayari kwa safari ya mjini. Ghafla nikasikia sauti.



"Bosi, rukeni ua".



Kama umeme tuliruka na kuanguka chini upande mwingine wa ua wakati ambapo risasi zilimiminika pale pale tulipokuwa tumesimama.



"Nenda ofisini", tulisikia sauti ya Eddy ikiamru.



Kama umeme tuliruka na kuangukia mapokezi wakati tuliposikia mlipuko mkubwa wa bomu uliotingisha hata ofisi za SANP.



Baada ya dakika-mbili hivi Eddy alisimamisha gari lake mbele ya mlango na kuamru twende. Kama risasi tuliingia ndani ya gari na kuondoka kasi na kuacha gari langu likiwa limesambazwa vipande vipande.



BINTI TANZANIA



"Lo, hiyo ilkuwa alimanusura", veronika alisema huku jasho likimtoka na akihema.



"Nakuambia", Sherriff naye huku akihema.



"Eddy, moja kwa moja nyumbani kwangu, akili yangu imevurugika", nilimwambia Eddy aliyekuwa akiendesha kwa kasi sana.



"Huyu Eddy ni nani na katokea wapi?, maana bila yeye sasa hivi sote tungekuwa maiti", aliuliza Sherriff.



"Katika kazi hizi Komred Sherriff lazima uwe na plani bila plani huenda mimi ningekuwa nimeuawa siku nyingi. Huyu kijana ni mfanyakazi mwenzetu, na toka asubuhi yuko pamoja nasi lakini kazi yake ilikuwa ni kutulinda sisi. Na kwa jumla ndivyo hivyo tunavyofanya kazi".



Eddy alisimamisha gari mbele ya nyumba yangu. Tulitelemka ndani ya gari, nikafungua mlango tukaingia sebuleni wote na kuketi. Nilikwenda katika barafu na kutoa chupa ya whiski na chupa za soda kali. Nilitenga glasi, wote wanne tukaanza kunywa. Nilipoangalia saa ilikuwa saa tisa kasoro robo.



"Eddy nafikiri hatuna muda wa kupika hapa nyumbani, hivyo nenda Palm Beach Hoteli wakakufungie chakula cha watu wanne", nilimwambia Eddy".



"Sawa".



Eddy aliondoka kwenda kutafuta chakula.



"Willy, watu hawa wamepania sana", Sherriff alisema kwa sauti nzito.



"Mimi nilijua watapania, ndio sababu nikaweka tahadhari yote hii. Ngoja Eddy arudi atueleze ilikuwaje mpaka wakaweza kutufuata mpaka pale walipotushambulia. Ni bahati nzuri sana kwamba wote mna mafunzo ya kijeshi hivi mlitii amri za Eddy bila hata kufikiri. Jambo hili limenifurahisha sana maana kama mtu angesita, sasa hivi tungekuwa tunamuombolezea".

CHANZO:  https://deusdeditmahunda.blogspot.com/

"Naona wote tumejenga silika ya hali ya juu kwa wakati wa namna hii", Sherriff alijibu.



"Tukimsubiri Eddy, sijui mmewaonaje hawa Maraisi wa vyama hivi vile vile", Veronika aliuliza.



"Mimi moja kwa moja nimempenda Chimalamo maana ni mtu aliye wazi. Nafikiri ni kiongozi mwenye busara. Kutokana na maelezo aliyotupa nafikiri anajua anafanya nini, na mtu kama huyu anaweza kabisa kuendesha harakati za ukombozi dhidi ya Makaburu maana anawajua nje na ndani. Ukikumbuka mazungumzo yetu siku ile huko Freetown juu ya Afrika Kusini sasa ukiongeza haya aliyotupasha ndugu Chimalamo hata wewe unazidi kupata mwanga mkubwa juu ya Afrika Kusini. Kwa ujumla nafikiri Chimalamo ni kiongozi mzuri na halisi. Juu ya Sikazwe nina dukuduku nae moyoni, maana sikumwelewa sawasawa sababu si mtu wazi. Hata nidhamu ya ofisi yake ilivyo kabla hujaonana naye, inaonyesha kasoro fulani. Nafikiri bila Willy kuwa mtu anayejua mbinu nyingi tusingemwona maana mbinu aliyotumia mimi mwenyewe mkufu. Halafu kuna kitu fulani ndani ya Ndugu Sikazwe ambacho sijui ni nini lakini kinanidundadunda sijui wenzangu mmemuonaje?", Sherriff alieleza.



"Nafikiri mawazo yako na ya kwangu hayako mbali. Nakubaliana na wewe kuwa Ndugu Chimalamo ni kiongozi mzuri. Na vile vile kuhusu Sikazwe hata mimi kuna kitu fulani ambacho sikukielewa ni nini kilicho ndani yake, lakini huenda nitakijua nikipata muda mrefu kufikiri. Lakini huenda ni mtu wa tabia ya namna hiyo, na kwa namna yake hiyo anaweza kuwa ni kiongozi mzuri zaidi kuliko hata Chimalamo. Huenda kila kitu kilicho ndani yake ni uongozi bora", nilieleza.



"Mimi sina la kuongeza, naona mawazo yetu yameoana", Veronika alijibu.



"Kusema kweli jamani sijastuka kama leo, kweli tumeponea chupu chupu, asante sana Willy kwa kuweka tahadhari".



"Bila asante Vero, maana ni kazi yangu kuhakikisha usalama wenu na wangu, hivyo uwe na amani kuwa nitafanya kila jitihada kuhakikisha usalama wetu, kama nikishindwa itakuwa nje tu ya uwezo wangu".



"Naomba sigara", Sherriff aliniambia.



"Hapa mimi nina aina ya sigara iitwayo Tropicana, sijui kama itakufaa".



"Wewe nipe tu, sigara zangu ziko hotelini. Baada ya kashikashi nahitaji sigara kama kufa".



"Nilitoa pakiti ya Tropicana nikaiweka mezani tukaanza kuivuta.



"Lo, mbona sigara safi kabisa, ni sawa sawa tu na 555, zinatengenezwa wapi?", Sherriff aliuliza.



"Hapa hapa nchini kwetu".



"Lo, mmeendelea sana, mnaziuza na nje?", aliuliza Veronika ambaye naye alichukua moja akavuta ingawaje hakuwa mvutaji sana.



"Sijui maana wameanza kuzitengeneza hivi karibuni, lakini naamini watafanya hivyo".



Mara Eddy akawa amerudi tukapata chakula ambacho tulikishambulia vizuri sana maana njaa zilituuma vibaya.



Baada ya kula chakula cha mchana tulikaa kitako kumsikiliza Eddy, akitusimulia jinsi mambo yalivyotokea pale SANP.



"Baada ya nyinyi kuondoka kwenye ofisi za PLF, nilingoja hadi nikaona gari Peogeot 504 namba TZ 311251 likijitokeza kwa upande mwingine na dereva wake akichungulia kwenye kioo cha kuendeshea baada nafikiri ya kuona hakuna gari zaidi lililokuwa nyuma yake; liliongoza kufuata njia mliyofuata. Mimi nililitilia mashaka nikalifuata nyuma baada ya magari kama mawili hivi kuwa kati yangu na gari hilo. Gari hilo pia lilikuwa limeacha magari matatu kati yake na gari lenu. Tulifuatana hivyo hivyo mpaka kwenye taa za usalama barabarani za Jangwani.



"Hapo ndipo nilihakikisha kuwa huenda gari hili lilikuwa na jambo. Mlipoingia barabara ya Umoja wa Mataifa gari hili lilisita kidogo mpaka gari zingine zikalipigia honi kwani taa zingebadili kabla hatujapita. Inaonekana kulikuwa na ubishi. Baada ya hapo gari hili liliingia barabara ya Umoja wa Mataifa nami nikalifuata. Niliona nyinyi mnasimamisha gari kwenye ofisi za SANP. Nilitelemka na kufungua boneti ya gari langu kwamba limeharibika, huku nikifikilia kuwa lile gari litarudi.

CHANZO:  https://deusdeditmahunda.blogspot.com/

"Nilichukua spana na kuanza kujifanya ninalishughulikia gari langu. Gari lile halikurudi. Mimi niliendelea kujishughulisha hivi kiasi cha nusu saa, wakati nyinyi bado mko ndani ya ofisi. Mara nilistukia gari moja linaingia pale gereji, kwa bahati lilisimama karibu tu na mimi. Ndani ya lile gari mlikuwa na watu wanne. Dereva wa gari hili alitoka na kuingia ndani ya ofisi ya gereji hii. Alikuwa amevalia vizuri sana. Nilimwangalia kwani alikwenda akazungumza na mfanyakazi aliyekuwa amekaa mezani akiandika risti na simu iko upande wake. Alizungumza na mtu huyu wakabishana kidogo kisha nikaona anatoa kitu kama shilingi moja akampa yule mfanyakazi. Halafu yule mfanyakazi akachukua funguo na kufungua kufuli la kwenye simu. Yule mtu akapewa simu akaanza kupiga. Mambo yote haya niliyaangalia kwa chati huku nikiendelea kujishughulisha na gari langu".



Eddy alitua akachukua sigara nikamwashia, akavuta kidogo kisha akaendelea.



"Sura za wale watu wengine ndani ya gari hazikuwa za kawaidana vile vile walikuwa na wasiwasi. Kila mara walikuwa wakigeuka kuangalia upande wa SANP. Yule mwingine alipomaliza kuzungumza na simu alikuja moja kwa moja akaingia ndani ya gari na kulizungusha. Mimi pale pale nikafunga boneti ya gari langu, maana tayari akili yangu ilikuwa imeshakuwa katika hali ya tahadhari nami nikageuza gari langu kuangalia barabarani. Hapo ndipo niliona mnatoka nje ya ofisi. Nikaona mmoja wa watu wale katika gari anainua "machine gun" kutoka chini na kabla hajaweka sawa nyinyi mlikuwa mmefika kwenye gari. Niliruka toka ndani langu na kuwapigia kelele. Nashukru kuwa mlinitii mara moja, kwani wakati ule ule mliporuka alimimina risasi pale pale mliposimama nikajua alikuwa mtu mwenye shabaha ya hali ya juu kwani gari lilikuwa likienda polepole.



"Mliporuka tu niliona mtu mwingine anatoa bomu la mkono na kuuma kifungo chake. Hapo ndipo nilipopiga kelele ya pili kisha nikarukia ndani ya gari wakati yule mtu anatupa hilo bomu na gari lao linaondoka kwa kasi. Ndipo na mimi nikaja na kusimamisha gari langu pale mlangoni baada ya ule mlipuko wa lile bomu. Pole sana bosi gari lako zuri sana limeteketea".



"Siku Eddy, nitapata jingine aina hiyo hiyo, nimetokea kupenda sana aina hiyo ya magari.



"Lo, inaonekana watu hawa wamejitayarisha vizuri sana", Veronika alisema kwa mshangao.



"Toka niliposikia jinsi walivyoiba zile silaha sikuwa na hamu nao tena. Nilijua ni watu wanaojua wanafanya nini. Ndio sababu niliwaasa hatari zitakazotokea toka mwanzo. Nafikiri sasa mnaamini mawazo yangu", hakuna aliyejibu; wote walinyamaza tu. Nafikiri walikuwa wakijutia kwa nini wamejiingiza katika janga hili.



"Vipi Eddy umepata habari zozote juu ya Kiki?", nilimwuliza.



"Kama nilivyokuahidi nimepata habari za kutosha".



Sisi wote tukawa tena tayari kumsikiliza huyu kijana na kusahau yote yaliyopita.



"Ehee hebu lete habari", nilimwambia.



"Nitaanzia toka ripoti nilizopata toka kwa makomredi wetu wa Soweto. Makomredi wetu huko wanakataa katakata kuwa hakukuwa na mtu mwenye jina au wa sura kama nilivyowaeleza huko Soweto. Wanasema mtu aliyetoroka gerezani kati ya wale waliokamatwa na kutiwa ndani, yuko huko huko Soweto na wanaye sasa hivi. Hivyo ni uongo mkubwa kuwa huyu mtu alihusika na matatizo ya Soweto. Inasemekana kuwa mara ya kwanza mtu huyu kuonekana Tanzania ni wakati alipofika Mbeya akiwa na hiyo hadithi yake kuwa ametoroka gerezani huko Afrika Kusini baada ya kutiwa ndani kutokana na machafuko ya Soweto. Habari hii aliitoa kwa ofisi ya Chama huko Mbeya na ofisi hiyo ndiyo iliyomleta Dar es Salaam baada ya kusema kuwa yeye ni mwanachama wa SANP. Hivyo alipofikishwa hapa alipelekwa kwenye ofisi za SANP ambako inasemekana aliwaonyesha kadi yake, hivyo katika hali ya kumsaidia wakampeleka kwenye Kamati ya Ukombozi ya OAU.



"Je umepata habari zozote kuhusu maisha yake hapa mjini".



"Ndiyo, vijana wetu wamefanya kazi nzuri sana. Wameweza kupata habari kuwa Kiki alikuwa mtu asiye na rafiki. Ila alikuwa na rafiki mmoja wa kike Mtanzania anayeitwa Zabibu Abeid. Wanasema msichana huyu aliingia hapa mjini toka Tanga miezi minne iliyopita kwani alikuwa amepatiwa kazi na Meneja wa Kampuni iitwayo Twiga Safari ambayo inashughulikia mambo ya watalii. Msichana huyu amesoma mpaka kidato cha Nne alichomaliza mwaka jana. Anasemekana kuwa na uuzuri wa pekee. Katika ripoti yao wanasema kuwa kama hujamwona msichana huyo basi hujamwona binti Tanzania. Hivyo baada ya Kiki kufanya urafiki na msichana huyu mrembo, muda wake na maisha yake aliyatoa kwa msichana huyu.



"Zababu anakaa mtaa wa Jamhuri, kwenye orofa karibu ya mzunguko wa mtaa wa Zanaki na Jamhuri. Yuko mwenye nyumba ya orofa ya Msajili wa Majumba. Jengo Nambari K orofa ya tatu, nyumba nambari 7a. Nyumba hii amepewa na waajiri wake. Inasemekana kuwa fanicha yote ya mle ndani imenunuliwa na Kiki pamoja na gari moja zuri aina ya Ford Mustang"



"Na huku Kiki alikuwa tarishi tu... nilimkata kauli Eddy.



"Ofisini alikuwa tarishi, lakini nje alikuwa na fedha nyingi za kutosha. Hivyo kwa nje alikuwa ofisa wa mkubwa katika Kamati ya Ukombozi ya OAU".



"Na ndio sababu aliweza kumpata msichana mrembo kiasi hicho?", Sherriff aliuliza.



"Bila shaka maana sura ya Kiki ilikuwa ya kupendeza sana hivyo sioni ajabu kumpata msichana mrembo kiasi hicho".



"Kwa hivyo zaidi ya msichana huyu maisha ya Kiki hapa mjini hayaeleweki".



"Ndiyo, Kiki hakuwa na rafiki mwingine zaidi ya Zabaibu, lakini muda mwingi alikuwa kwa Zabibu. Tumejaribu sana kupata habari nyingine zozote juu yake lakini tunashindwa. Huenda Zabibu anaweza kujua".

CHANZO:  https://deusdeditmahunda.blogspot.com/

"Okejamani nafikiri nyinyi mnaweza kurudi matotelini kwenu. Ila mjihadhari sana maana hali ya sasa ni ya hatari, nitakuja kuwaona baadaye msitoke mpaka nimekuja. Eddy atawapeleka mkapumzike. Mimi nitakwenda kumwona Zabibu sasa hivi, nafikiri atakuwa ametoka kazini", niliwaeleza.



"Nafikiri atakuwa amerudi maana anatoka kazini saa kumi kamili", Eddy alinieleza.



"Twende wote", Veronika alinieleza huku akiniangalia kwa macho ya wizi.



"Hapana wewe nenda ukapumzike, kazi uliyofanya mpaka sasa inatosha. Usiwe na wasiwasi nitajiangalia".



Veronika alikuwa haamini kwenda kuonana na msichana mrembo namna hiyo peke yangu. Hiyo ndiyo ya kazi na dawa.



Waliondoka wakaniacha mimi nikienda maliwatoni. Baada ya kukoga na kubadili nguo, niliangalia saa yangu nikaona ni saa kumi na moja na nusu. Nilichukua bastola yangu nikaiweka ndani ya jaketi nililovaa, nikajiona nilikuwa tayari kupita kiasi kuonana na Binti Tanzania. Nilitoka nje nikafungua mlango, nikaenda mpaka Palm Beach ambako nilichukua teksi kunipeleka kwa Binti Tanzania.





Ilikuwa yapata saa kumi na mbili wakati dereva wa teksi aliponishusha hatua chache kabla ya kufika kwenye mzunguko wa Mtaa wa Jamhuri na Zanaki.



"Hapo hapo pananitosha", nilimweleza huku nikimpa shilingi ishirini kisha nikatelemka. Niliangalia kwenye maegesho ya mtaa huu wa Jamhuri nikaiona gari ya Zabibu. Ilikuwa gari ya rangi ya kijani ambayo haikuiva sana, na ilikuwa ni aina ya Ford Mustang muundo wa kisasa. Kama umeshaiona Ford Mustang zilizoundwa vizuri basi hii ilikuwa mojawapo. Hata mimi niliipenda kwa umbo lake maana ilikuwa na milango miwili. Yaani 'Ford Mustang Sports Car', kama wanavyoiita wenyewe walioitengeneza.



Kule kuona gari hii kulinihakikishia kuwa Zabibu alikuwepo nyumbani, niliangalia jengo, nikaangaza huku na huku kuona kama kuna mtu ananifuata, nikaona hakuna. Kila mtu alionekana kuwa na hamsini zake. Basi mimi Willy nilijipenyeza kwenye lango linaloelekea kwenye ngazi za jengo hili. Nilipofikia ngazi nilianza kupanda taratibu kama mtu anayejua anapokwenda. Nilipanda mpaka orofa ya tatu, na nyumba iliyokuwa inatazamana na ngazi hizi ilikuwa namba 1a na nikajua 7a itakuwa mkono wa kulia hivyo nikafuatia taratibu.



Kwa sababu giza lilikuwa linaingia nyumba zingine zilikuwa zimewasha taa na zingine zikiwa giza kuonyesha wenye nyumba walikuwa bado hawajafika. Nyumba namba 5a na 6a zilikuwa giza ila 7a ilikuwa inawaka taa sebuleni. Nilitembea taratibu bila kupiga kelele mpaka kwenye mwisho wa namba 6a, niliposikia sauti ya msichana inapiga kelele ndani ya namba 7a. Harafu nikasikia sauti ya mwanaume.



"Mimi nisingependa kukuua Zabibu maana mimi nafurahia uumbaji wa Mungu mzuri aliokuumba lakini mimi nimeamriwa nikuue hivyo sina njia. Nisipokuua wewe, mimi nitauawa. Hivyo huna haja ya kupiga kelele, kufa hakika utakufa".



"Kwani mimi nimekosa nini masikini?", msichana aliuliza.



"Hata mimi sijui, haya kwa...".



Mimi nilikuwa nimejivuta na kuwa sawasawa na mlango wa hii nyumba, hivyo nilisikia mazungumzo haya. Niliona nikichelewa msichana huyu anaweza kuuawa. Basi nilitudi nyuma, bastola mkononi, niliurukia ule mlango na kuupiga teke ukafunguka. Hapo hapo mimi nikatumbukia ndani nikitanguliza kichwa chini lakini nikafyatua bastola na kumpata yule kijana niliyemuona ameshika kisu chenye mpini mwekundu. Ile risasi ilikuwa haikumpata vizuri hivi alisimama wakati na mimi nimeshasimama yakaanza masumbwi. Alitupa konde moja likanikosa mimi nikampa shoto langu lililompata shingoni akaenda chini na hakusimama tena.



Mambo haya yalitokea kwa muda mfupi sana. Zabibu alikuwa amepigwa na butwaa kiasi cha kwamba yule mtu alipoanguka chini na yeye akaanguka juu ya kochi na kuzirai. Nilienda kumwangalia yule mtu pale chini, sikuwa na haja hata ya kumgusa ili nijue kama amekufa. Niliona kulikuwa na barafu pale sebuleni, nikaifungua nikatoa chupa ya maji baridi nikammiminia Zabibu naye akashituka.



"Kweli huyu Zazibu alikuwa ndiye Binti Tanzania. Mimi nimeona warembo katika nchi hii, lakini huyu alikuwa ni zaidi. Ukiwa unaamini kuwa kuna binadamu wengine hushushwa moja kwa moja toka mbinguni, basi Zabibu alikuwa mmoja wao, kwani mpaka sasa siamini kama msichana huyu alizaliwa na binadamu. Ingawaje haiwezekani kuamini kuwa mtu anaweza kutelemshwa toka mbinguni, lakini ukimwona Zabibu wewe mwenyewe utaona uwezekano. Maana hata mimi niliona inawezekana kwa huyu kiumbe wa binadamu alikuwa ameumbwa bila kasoro. Palipo ukweli lazima tuseme; mwenzetu alikuwa na uzuri sio kifani. Mcho yake manene ya mviringo yaliyozungukwa na nyusi zenye rutuba yalifunguka na kuniangalia mimi.

CHANZO:  https://deusdeditmahunda.blogspot.com/

"Umetoka wapi?", aliuliza kwa sauti nyororo iliyotoboa rohoni mwangu kama miali ya moto.



"Nimekuja kukuokoa".



"Kama wewe si mmoja wao umejuaje kuwa amekuja kuniua?".



"Kama mimi ni mmoja wao kwa nini nimwue wakati anataka kukuua?".



"Ndicho kinachonishangaza".



"Basi mimi si mmoja wao, mimi ni rafiki yako. Kama una akili timamu tuondoke hapa chumbani kwako maana kinanuka mauti".



"Sijui kwa nini naona kama ninakuamini".



"Kwa sababu ndio jambo la busara".



"Haya nichukue, nitoe hapa, yule mtu kweli angeniua. Huenda lazima nikushukuru, asante sana?".



"Bila asante, msichana kama wewe una haki ya kuokolewa, huna haja ya kushukuru, hiyo ni haki yako".



"Na huyu mtu tutamwacha humu?".



"Nitafanya mipango aondolewe, simu iko wapi?".



"Chumbani".



Aliniongoza chumbani, nikapigaa simu ofisini nikamkuta Eddy nikamweleza kwa kifupi, kisha nikamwambia afanye mpango mtu huyu aondolewe hapa. Eddy akasema atatekeleza.



"Wewe ni polisi?", Zabibu aliuliza.



"Hapana".



'Sasa wewe ni nani?".



"Mimi ni mtu ninayesaidia warembo kama wewe".



Nilimjengea tabasamu babu kubwa kisha nilimshika mkono tukazima taa, nakurudisha mlango, halafu tukaondoka. Nilipata teksi pale chini, tukapanda na kumwelekeza dereva nyumbani kwangu.



"Tunakwenda wapi?", Zabibu aliuliza.



"Nyumbani kwangu, unaonaje?".



"Nakuona wewe ni mtu wa ajabu ajabu tu, usingekuwa umeniokoa nisingekuamini hata chembe!.



Nilikuwa nimeingia na mashaka makubwa kwenda moja kwa moja nyumbani kwangu. Nilikuwa sijui kwa nini, hivyo nikabadili mawazo na kumwelekeza teksi dereva twende Ocean Road ambako ndiko Eddy alikuwa akikaa. Nilikuwa nina ufunguo mmoja wa nyumba yake kwa ajili ya nyakati kama hizi.



Tulikwenda moja kwa moja mpaka nyumbani kwa Eddy baada ya kumwelekeza dereva nyumba. Nilimlipa dereva teksi pesa zake, halafu tukatelemka. Nilifungua mlango kisha nikawasha taa.



"Karibu ndani bibie".



Asante sana".



Nilikwenda kwenye barafu nikaifungua.



"Sijui utakunywa nini?".



"Baada ya vituko vilivyotokea nafikiri whiski na soda kali vitanifaa".

CHANZO:  https://deusdeditmahunda.blogspot.com/

Nilichukua chupa ya whiski na soda kali halafu nikaendea glasi na kumimina kwenye glasi mbili ya Zabibu na ya kwangu halafu tukainua glasi zetu.



"Na tunywe kwa maisha yako marefu mrembo", nilisema.



"Na tunywe", alijibu kisha akanywa whiski ile haraka haraka.



Mimi nilikwenda kwenye simu nikapiga tena ofisini nikampata Eddy. Nilimpasha habari kuwa mimi na huyu mrembo Zabibu tulikuwa nyumbani kwake. Na yeye vile vile akanieleza juu ya kazi niliyokuwa nimemuagiza; vijana walikuwa wamempigia simu kuwa tayari walikuwa wameshaifanya. Nilimpongeza kwa jinsi kazi yake alivyokuwa anaifanya haraka kwa juhudi na maarifa.



"Nafikiri kwanza itabidi tufahamiane", nilimweleza Zabibu.



"Hasa ndilo litakuwa jambo la maana", alijibu.



"Mimi naitwa Willya Gamba, sijui wewe mwenzangu unaitwa nani?".



"Mimi naitwa Zabibu Abeid".



"Lo kweli aliyekuwa jina la Zabibu alijua kweli, kwani mimi naamini umtamu kama Zabibu".



"Ndio unataka kusemaje?".



"Nataka kusema wewe ni msichana mrembo ambaye sijawahi kumwona, na bila shaka aliyekuwa jina la Zabibu alijua utakuwa mtamu kama Zabibu".



"Usinivike kilemba cha ukoka. Kijana nadhifu mwenye sura nzuri na vituko vingi namna hii, haiwezekani kuwa haujamwona msichana mrembo kunizidi".



"Amini usiamini".



"Asante, lakini hata mimi leo nimemwona mvulana wa kipimo changu, sijui ulikuwa umejificha wapi mji huu hata nisikuone?".



"Mimi nilikuwepo nimejaa tele hapa mjini, lakini najua ingekuwa vigumu kuniona maana George Kiki alikuwa amekuganda kama kupe".



Pale pale sura yake iligeuka akainua macho yake marembo kunitazama machoni. Mimi nikamjengea tabasamu la sheria yake, Zabibu alionekana alikuwa amechanganyikiwa mawazo.



"Unajua nini juu ya George?".



"Hakuna haja ya kuzungushana sana, nafikiri inabidi sasa tuelezane ukweli. Na kabla hatujaendelea mbali ningependa kukuuliza lini umeonana na Kiki kwa mara ya mwisho".



Kwa kutokana na uzito wa sura yangu, Zabibu alilegeza sura yake kisha akajibu kwa sauti nyororo.



"Siku nne zilizopita, alisema atakwenda safari Botswana na atarudi baada ya wiki tatu".



"Na hauna habari nyingine yoyote kuhusu yeye?".



"Sina, kwani kumetokea nini?".



"Kwani yule mtu aliyetaka kukuua alikuwa amekueleza nini?".



"Hata, alinieleza tu kuwa alikuwa ametumwa kuja kuniua ingawaje yeye hakutaka lakini alikuwa amelazimishwa. Hakunieleza kabisa sababu.



"Nakuomba uwe na roho ngumu, rafiki yako George Kiki ameuawa jana. Maiti yake ilikutwa chumbani mwake ikiwa imechomwa kisu chenye mpini mwekundu".



Nilitoa kisu nilichokuwa nimekiokota nyumbani kwa Zabibu kabla hatujaondoka.



"Na watu wale wale waliomwua ndio walikuwa wanakuja kukumalizia wewe".



Zabibu alibubujikwa machozi na kidogo azirai tena.



"Lazima ujitulize kwa sababu mimi niko hapa kupeleleza mauaji ya mpenzi wako".



"Mimi nilijua tu wewe ni Polisi. Sura yako na namna ulivyoingia chumbani kwangu sijapata kuona kwa macho ila ndani ya sinema tu. Zile sinema za kijasusi".



"Mimi si polisi bali ni mpelelezi. Huenda polisi nao wakaja kufanya upelelezi wao, lakini mimi bahati nimewahi na kukuokoa huenda wao wangefika wakati wewe umekwisha kuwa maiti".



"Una maana gani kusema wewe ni mpelelezi wala si polisi?".



"Mimi ni mpelelezi wa siri kama umewahi kusikia watu kama hao".



Macho ya Zabibu yakapanuka.



"Usije ukawa wewe ndiye mtu ambaye huwa tunasoma habari zake kwenye magazeti akipambana na majasusi mbali mbali wanaofanya maovu dhidi ya Afrika".

CHANZO:  https://deusdeditmahunda.blogspot.com/

"Ndio mimi".



Zabibu aliruka pale alipokaa akaja katibu na mimi.



"Ooh! Mungu ni bahati gani kuonana na mtu kama wewe maana mimi nilikuwa nafikiri ni maneno ya uzushi tu ya magazeti maana walikuwa hata hawatoi jina. Kila mara ukisoma unaona tu vijana wa Afrika wakiongozwa na mpelelezi mashuhuri kutoka Tanzania wamefaulu katika kuwateketeza majasusi ya mabeberu yaliyokuwa yanatenda mambo maovu dhidi ya Afrika. Nitawaeleza rafiki zangu kuwa ni kweli huyu mtu yupo na mimi nimeonana naye".



"Halitakuwa jambo la busara, tafadhali fanya hii iwe siri kati yangu na wewe, nimekueleza tu kwa sababu unaweza kunisaidia katika upelelezi wangu juu ya tukio la kutisha lililotokea hapa mjini siku chache zilizopita".



"Ahaa nimeelewa tumesikia kwenye maredio ya nchi za nje, kuwa silaha kali za wapigania uhuru zimeibiwa kwenye bandari ya Dar es Salaam".



"Basi umebashiri sawa".



"Sasa George ana uhusiano gani na tukio hili?".



"Ndio sababu tumekuja kukuona, huenda ukajibu maswali yangu nitaweza kuambulia jambo lolote linalomwunganisha Kiki na tukio hili".



"Niko tayari kukusadia, kwanza kwa sababu umeniokoa, pili kwa sababu unapeleleza kifo cha mpenzi wangu na tatu nafikiri wewe ni kijana mwenye kupendeka".



"Asante, swali langu la kwanza nilitaka kujua kama ulikuwa unajua Kiki ni mtu wa Afrika Kusini?".



"Nilikuwa najua".



"Alikwambia alikuwa akifanya kazi gani?".



"Alisema yeye ni mwakilishi wa chama cha SANP katika Kamati ya Ukombozi ya OAU".



Nilishangazwa na jibu hili lakini sikuonyesha.



"Kwa hiyo mara nyingi alipokuwa anakuja kwako alikuwa akiandamana na wanachama wenzake wa SANP?".



"Hapana, George alikuwa mtu wa pekee, huenda ndio sababu nilimpenda. Alikuwa kila siku ananiambia kama ninataka kuepukana na matatizo nisizoeane na watu wengi. Na yeye kweli alikuwa hakuzoeana na watu. ila alikuwa na marafiki wawili tu. Ndugu Ray Sikazwe, rais wa SANP na Patlako Shuta ambaye ni ofisa mkubwa katika SANP. Sikumwona na mtu mwingine. Oh, kidogo nisahau, vile vile walikuwa na rafikio yao mwingine Mzungu ambaye George alifahamishwa kwake na Sembuche na mwenzake Shuta. Na hata gari nililo nalo, George aliuziwa na Mzungu huyu. Kwa vile yeye alikuwa hapendelei gari kwani alikuwa anatumia gari la ofisini alinipa mimi".



Kwa mara ya kwanza niliona mwanga kwa mbali, na nikajua kwa nini msichana huyu alitakiwa auawe. Nilijivunia bahati yangu kuwahi kabla hajauawa.



"Unaweza kujua Mzungu huyu anafanya kazi gani?".



"Lo! hawa ndio wenye lile kampuni kubwa lililo na makampuni kadha wa kadha katika nchi nyingi za kiafrika yaani EUROAFRO Limited. Na huyu Mzungu ndiye mwakilishi wa kampuni hilo hapa akiangalia akiangalia makampuni yake madogomadogo yaliyoko hapa".



Kapuni hili EUROAFRO Limited lilikuwa kampuni kubwa la kibepari lililokuwa na hisa nyingi katika makampuni katika nchi nyingi za Afrika. Kirefu chake kilikuwa EUROPE - AFRIKA COMPANY. Uhusiano huu kati ya wanachama wa chahama cha wapigania uhuru na kampuni ya kibepari ulinishinda kuelewa.



"Kwa hiyo unasema huyu Sikazwe na Shuta walikuwa marafiki wa karibu sana wa Kiki

CHANZO:  https://deusdeditmahunda.blogspot.com/

"Ndiyo, hao ndio alikuwa anatembea nao mara kwa mara na vile vile walikuwa wanajuja kumwona au kumchukua pale kwangu mara kwa mara. Lakini zaidi ya watu hawa wawili na yule Mzungu, George hakuwa na rafiki mwingine".



"Huyu Mzungu unaweza kumkumbuka jina?".



"Ndiyo anaitwa Tony Harrison".



"Hawa marafiki wa Kiki uliweza kuzoeana nao?".



"Kusema kweli, Shuta na yule Mzungu walikuwa wananiheshimu kiasi cha kutosha lakini Sikazwe alikuwa wa ovyo sana. Amewahi kunitongoza mara nyingi na kunitaka nimwache George. Kwanza alikuwa anajivuna kuwa yeye ni Rais wa Chama na George alikuwa mtu mdogo tu, na kwamba msichana kama mimi sikufaa kutembea na George ila mtu kama yeye. Mimi nilimponda na kumwambia cheo na pesa havileti mapenzi, ila mtu anampenda mtu kwa vile alivyo, maana mtu na mtu ndio wanapendana".



Lakini nakwambia uso wa msichana huyu unapoonyesha sura ya haya ndipo uzuri wake unapozidi. Ingekuwa wewe usingevumilia lakini mie nilipiga moyo konde na kuendelea na kazi. Nilifikiria swali jingine nikaona nimepata maelezo ya kutosha ila nikaamua nimweke zabibu chini ya ulinzi wangu mpaka hapo baadaye.



Nilikuwa bado nafikiri hivi wakati tuliposikia gari linapiga breki mbele ya nyumba. Nilitoa bastola yangu tayari. Mlango ulipofunguliwa na Eddy akakingia.



"Bosi, twende haraka Veronika amenipigia simu anasema yuko katika matatizo. Nimekuja sababu nilijua huna gari", Eddy alisema huku akitweta.



"Oke Zabibu, subiri hapa tutarudi sasa hivi".



Nilifungua mlango kabla Zabibu hajasema neno lolote.



USIKU WA HEKAHEKA



Tulipofika Kilimanjaro Hoteli ilikuwa yapata saa tatu kamili. Tulipokuwa njiani kuelekea Kilimanjaro nilimweleza Eddy mambo yote niliyokuwa nimepata toka kwa Zabibu, mambo ambayo hata yeye alisema yalionyesha ufumbuzi wa jambo hili kwa mtu mwenye kufikiri. Tuliingia hotelini tukapanda lifti iliyotushusha orofa ya pili. Tulipotoka ndani ya lifti mara ile hali ya tahadhari ilituingia. Mimi nilitoa bastola yangu nikaiweka tayari na Eddy akafanya vile vile.



Tulipofika mlango wa chumba namba 206 tulikuta umefungwa, niligonga nikiwa nimesimama upande kabisa. Niligonga mlango mara mbili haraka haraka, halafu nikatulia kidogo kisha nikagonga tena, kwani hivi ndivyo Veronika alikuwa amenielekeza namna ya kujitambulisha lakini sikusikia kitu. Nilimonyesha ishara Eddy abane ukutani wakati mimi nafungua.



Nilifungua mlango ghafla. Tishio nililolikuta sijawahi kulipata tena, kwani Veronika alikuwa amelala kwenye sofa na kisu chenye mpini mwekundu kikiwa kimemwingia juu kidogo ya titi la kushoto. Kidogo ningezimia lakini nilijikaza nikakimbia pale kwenye sofa huku nikikanyaga maiti za watu wengine hapo chumbani.



Veronika alikuwa bado ameshikilia mkono wa simu mikononi mwake. Nilipomfikia nilimkuta bado yuko hai. Wakati huo Eddy nae alikuwa ameingia akanipa glasi ya whiski.



"Bosi jikaze, mnyweshe hii whiski mimi naita gari la hospitali"'



Nilimnywesha Veronika kisha nikamtingisha akafunua macho akapata fahamu kidogo.



"Vero, Willy hapa, niambie nani amefanya hivi".



"Walikuja.... watatu... nikapam...bana ...nikawaua nikakupigia simu.... ku...ku...kumbe walikuwepo... wengine ...wawili ... mmoja ... akamwita ... Shu... Shu...Shuta muue.... mimi kugeuka ... akanichoma... ki... kisu... nikawahi ...kumpiga yule mwingine ...kwa... akafa... Shuta... akakimbia ...nika...



Hakuweza kusema tena. Nikamwongeza whiski na kumtingisha.



"Oh Vero, nimeita gari la wagonjwa na mganga anakuja sasa hivi utapona tu.

CHANZO:  https://deusdeditmahunda.blogspot.com/

"Si...siwezi...nitakufa...nimekufa...ame...moyo...Willy na...nakufa...na...ku...penda ...hakuna  tena... mwanamume... niliye... mpenda...kama wewe. Ni...nimefurahi...kukuona ...ma...mara... ya...mwisho...nikifa ...kwa ajili ya Afrika... siogopi...kufa...kwani nimekufa ...kwa sa...sabab...bu...nzuri. Ende...le..za ...ma...pa...mba...no... Willy ...Mungu...a...ku...sai...die...uni...ku...pi...zie...kisasi Afrika. Ni...busu...na... ku...



Nilijua Veronika hawezi kuchukua dakika moja zaidi, niliweka midomo yangu kwenye midomo yake na kulamba damu yake ambayo sasa ilikuwa inatoka mdomoni.Alitabasamu na macho yake yakang'ara kiasi ambacho sikuwahi kuyaona yanang'ara vile halafu akayapepesa akafariki. Alikufa huku akitabasamu.



Sikuwahi kulia na kupata uchungu kama wakati wa kifo cha Veronika. Nilijilaumu. Kama ningekwenda nae kwa Zabibu asingekufa.



Eddy alinikuta nabubujika machozi kama mama anayemlilia mtoto wake wa pekee.



"Bosi jikaze", Eddy alinishauri.



"Washenzi hawa, nduli hawa, watanitambua. Kwanini Mungu anaruhusu mtu kama Veronika kufa mikononi mwangu?. Eee Mungu nisaidie nilipize kisasi kwa ajili ya mwanamapinduzi huyu wa Afrika nzima", niliomba kwa sauti huku machozi yananitoka. Vero alikuwa amekufa kishujaa. Alikuwa amewaua maadui wanne pale pale chumbani.



Niling'oa kile kisu nikasafisha damu yake kwenye nguo zake.



"Kisu hiki hiki kitawauwa kama walivyomwua Veronika", nilisema.



"Bosi ninataka toka sasa tuwe pamoja".



"Hapana sasa hivi, fanya mpango wa kuondoa maiti hizi humu ndani. Na umwarifu Chifu, polisi wala wakuu wa hoteli wasiingilie. Na halafu kampashe Sherriff habari hizi za huzuni. Muushughulikie mwili wa Veronika uweze kupelekwa kwao. Mwambie Sherriff ashughulike na habari hiyo tu mambo mengine aniachie. Mwambie Chifu mambo yote yalivyo mpaka sasa mimi namfuata Shuta lazima alipe. Fanya hayo kwanza halafu nitakapokuhitaji nitakujulisha".



Niliondoka na kumwacha Eddy mle ndani ya chumba nikakimbia kwenye lifti iliyonitelemsha chini. Nilipita pale mapokezi huku nikikimbia kiasi cha watu wote kunishangaa.



Niliingia ndani ya gari Eddy alilokuwa amekodi na kuliacha Kilimanjaro Hoteli nikaondoka kwenda kumtafuta Shuta.



II



Niliondoka na kuelekea nyumbani kwa Eddy nilikomwacha Zabibu. Njiani nilifikiria uhusiano wangu na Veronika tokea siku tuliyoonana mwenye ndege mpaka kifo chake kilipotokea mikononi mwangu dakika chache zilizopita. Nilisikia uchungu usio kifani. Hasira na chuki yangu kwa makaburu, mabeberu na vibaraka wao ilizidi kiwango chake cha kila siku.



"Kifo peke yake ndicho kitaniachisha kuwawinda hawa wadhalimu maishani mwangu", niliapa.



Nilipofika nyumbani kwa Eddy nilimkuta Zabibu amekaa kwenye sofa pale tulipomwacha.



"Kumetokea nini, mbona ulikuwa unalia?", Zabibu aliniuliza baada ya kuniangalia kwa muda mfupi.



Nilimweleza yaliyompata Veronika, na jinsi urafiki wetu na Veronika ulivyokuwa umekomaa tangu kuonana mwenye ndege wakati tukielekea Freetown. Hakika nilijuta kumfahamu Veronika afadhali nisingeonana nae.



"Usisikitike sana, sasa tunakuwa watu wawili tuliopoteza marafiki zetu. Lililopo sasa ni sisi kutiana moyo na kusaidiana kuwatafuta hawa waliofanya matendo haya.



Nilijisikia vizuri kidogo Zabibu kuwa pamoja nami.



"Unajua Shuta anapokaa?", niliuliza.



"Ndio, anakaa Oysterbay, Kaunda Drive No. 11230".

CHANZO:  https://deusdeditmahunda.blogspot.com/

"Basi, sasa wewe tulia hapa mimi nitarudi muda si mrefu".



"Twende sote".



"Hapana. Kazi hii huijui niachie mimi, wewe pumzika hapa. Ukiona usingizi chumba hicho hapo kalale. Tutaonana baadaye".



"Lakini jihadhari inaonekana watu hawa ni hatari kabisa, sitapenda kusikia umeuawa, nikisikia tu na mimi nitajiua", aliniambia Zazibu akionyesha hali ya mapenzi kama kwamba tumekuwa marafiki siku nyingi.



Mimi huwa sielewi kwa nini binadamu hawa hutokea kunipenda mara tu nionyeshapo uso wangu. Niliondoka na kuelekea Oysterbay. Niliingia Kaunda Drive na kuanza kuangalia namba za nyumba. Niliendesha polepole mpaka nikaona nyumba. Nilipokuwa napita mbele ya lango la nyumba hiyo mlango wa mbele ulifunguliwa mimi nikaendelea mbele kidogo nikaegesha gari langu, halafu nikarudi kwa miguu.



Nilipofika kwenye ua wa jengo hili nikabana, maana watu wanne walikuwa wanazungumza hapo nje na kulikuwa na magari mawili.



Niliposogea nilisikia mtu mmoja anazungumza.



"Hay Shuta, zungumza na mzee halafu utatukuta Sliver Sands marquuis Du Zaire wanapiga huko mpaka saa kumi. Baada ya kazi ngumi namna hii mtu inambidi astarehe kidogo".



"Sawa Mlambo, ngoja nizungumze na mzee nimpe taarifa yote ilivyo halafu nitampitia msichana wangu na mnamo saa tano hivi nitakuwa huko", alijibu Shuta.



"Oke tutaonana", alijibu Mlambo.



Kisha Mlambo na wenzake wakaingia ndani ya gari aina ya Peugeot 504 na walipotokeza kwenye mlango nikaona namba zao TZ 66500. Shuta alirudi na kuingia nyumbani. Mimi niliruka kama paka nikatua ndani ya ua. Baada ya kutua nikasikia viatu vinatembea kwa nje. nikarudi haraka haraka nikabana ndani ya ua wa michongoma. Nilipoangalia nikaona alikuwa ni askari wa usiku aliyekuwa analinda ile nyumba. Bila kuniona alizunguka kunipita kwenye upande huu wa kulia wa nyumba. Nyumba yenyewe iliwa kushoto mwa barabara kama unatoka mjini.



Alipotangulia tu mimi nilimnyemelea bila yeye kunisikia. Nilipokuwa karibu nae nilimrukia na kumtia kabali, taratibu na bila kupiga kelele nilimnyonga na kuhakikisha amekufa kisha nilimsogeza pembeni kwenye giza la michongoma. Kisha nilizunguka nyumba kuangalia hali ilivyo. Nyumba yenyewe ilikuwa na vyumba vitatu vya kulala. Kulikuwa na chumba kimoja kikubwa nikajua hiki ndicho mwenye nyumba alikuwa akilala. Madirisha yalikuwa yamefungwa. Nikatoa pete yangu yenye jiwe la almasi, nikakata tundu katika kioo kisha nikaingia mkono karibu na mahali pa kufungulia dirisha. Baada ya kufungua dirisha la kioo, kulikuwa na dirisha jingine la wavu wa kuzuia mbu. Nilichukua mkasi nikakata sehemu kiasi cha kupitisha mkono karibu na mahali pa kufungulia nikalifungua.



Nilipanda na kutumbukia ndani ya chumba cha kulala kilichokuwa na bafu ndani yake. Nilifunga madirisha vizuri nikaacha mapazia kama yalivyokuwa yamekunjwa. Nilinyata mpaka kwenye mlango nikasikia mtu anasema kwenye simu.



"Hallo naomba mzee. nimepiga karibu dakika tano nzima sipati namba hiyo. Mimi Shuta hapa.



Nilisubiri pale kwenye mlango wa kutokea sebuleni.



"Hallo, Shuta hapa".



Mambo hayakwenda vizuri sana yule msichana ni mpiganaji wa karate na judo sijawahi kuona. Ameua vijana wetu wanne, watatu aliwaua kabla ya kuchomwa kisu, lakini hata wakati amekwisha kuchomwa kisu alimwua Shilonda kwa kumvunja shingo. Lakini hata hivyo nimemwua.



"Nina uhakika kabisa amekufa palepale maana nilimchoma kisu kwenye moyo hasa".



"Ndio sasa tumebakiza wawili ndipo tunaweza kuanza kupakia".



"Haya asante mzee".

CHANZO:  https://deusdeditmahunda.blogspot.com/

Kisha nilisikia anapiga simu tena. "Hallo Sakina yupo. Shuta hapa".



"Aha kisura jitayarishe nakuja kukupitia twende kamanyola nasikia siku hizi wana mtindo mpya wa 79 Scania LBT III... tutakwenda ukauone".



"Dakika kumi na tano nitakuwa hapo".



"Haya kwaheri".



Akarudisha simu.



Nilijua atakuja chumbani hivyo mimi nilijibanza kwenye ukuta karibu na mlango nikamsubiri maana nilisikia viatu vinakuja. Mkono wa kushoto nilishika bastola na mkono wa kulia kisu kile kilichomwua Veronika.



Alifungua mlango akawasha taa huku akipiga mluzi kisha alifululiza kwenda kwenye kabati la nguo bila hata kuniona. Mimi nilirudisha mlango kwa mguu, ndipo akageuka kuniona. Sijaona mtu anastuka namna hii maana palepale jasho lilimtoka, akataka kukaa chini akashindwa, akaanza kugwaya. Nilifikiri atazirai.



"Kumbe wewe unaona kuuwa wenzako ni rahisi na kumbe wewe mwenyewe unaogopa kifo namna hii".



"Niache niache, mimi ninakujua wewe ni nani, nisamehe".



Kuomba kwake msamaha kulinifanya mimi nikasirike zaidi.



"Kabla sijafikiria kukusamehe nataka kujua kiongozi wenu ni nani?".



"Mimi simjui; mimi ni mtu mdogo tu".



"Si unasema mimi unanijua?".



"Ndiyo nakujua wewe ni Willy Gamba, mpelelezi mkuu wa Afrika. Mimi niliwaambia waaache kama wewe wamekuingiza katika upelelezi lakini walikataa".



"Wakina nani?".



"Akina Mlambo".



"Mlambo ndiye nani?".



"Ndiye mkuu wetu sisi kwa upande wa kuua wapinzani".



"Na yeye ni mwanachama wa SANP?".



Alitoa macho na kushitushwa sana na swali langu hili, kisha nikaona anaanza kutokuwa na mshituko.



"Sitasema maneno zaidi nifanye unavyotaka".



"Ahaa, mimi huwa napenda watu shujaa kama wewe".



Niliweka bastola yangu ndani ya mkoba wake nikaweka kisu vizuri kwenye mkanda nikamfuata. Aliponiona sina silaha akaona ajaribu bahati yake. Palepale aligeuka mbogo na kuanza kunishambulia kwa makonde. Alitupa konde la kwanza nikaliona. Akatupa la pili nikaliona. Akatupa la tatu nikashika mkono wake nikamchukua judo na kumtupa upande mwingine wa chumba akaanguka kama papai bovu. Haraka haraka nikamfuata pale chini nikampiga teke la mbavuni na lingine la tumboni akalainika. Kisha nikamkunja vizuri sana. Nikatoa kisu nikachana shati lake akabaki tumbo wazi.



"Sasa utanieleza. Usiponieleza nitakutumbua matumbo na Sakina hutamwona tena. Niambie nani mkubwa wenu?".



Macho ya kutisha yalimtoka kwa kukiangalia kisu na kuona kuwa nilikuwa sitanii.



"Niache, niache nitakwambia mkubwa wetu ni...



Kabla hajamaliza kusema mlango ulipigwa teke na mtu mmoja akaingia ndani na kabla hajafyatua risasi pale tulipokuwa nilijirusha upande mwingine risasi zake zikanikosa ila zikamwingia Shuta tumboni, na mimi wakati ule ule nikamtupia kisu kilichompata katikati ya koo akaanguka chini huku risasi zinatoka ovyo.



Nilisikia vurumai nyingine sebuleni nikajua wako wengi. Kama umeme nilitoa bastola yangu tayari kukabiliana na matatizo.



"Mashuka umempata?", nilisikia sauti inauliza kwa woga.



"Ndiyo", nilijibu kwa sauti ya chini.



Kabla sijampa nafasi nilijirusha na kujiviringisha ndani ya sebule ambamo nilikuta watu wawili mmoja akiwa na bastola. Na kwa vile hakutegemea hatua kama ile alishikwa na bumbuwazi palepale nikapata nafasi ya kumpiga risasi ya katikati ya paji la uso akaanguka chini. Kabla sijawahi kusimama yule mwingine alipiga teke bastola yangu ikaanguka chini, palepale akanipa teke la tumboni nikaanguka chini. Wakati ule ule nikaona anaangalia kule bastola ya yule mwenzake niliyempiga risasi ilikoangukia na akaruka kuichukua. Mimi nikitumia ujuzi wangu wa miaka mingi nilimwahi wakati ndipo anafikisha vidole vyake kwenye bastola nikampiga kichwa kimoja cha sisimizi akaona nyota na kujiviringisha mbali na bastola. Kwa vile alikuwa tayari amenitia mori nilimfuata wakati naye anasimama. Nikaona anajikunja tayari kupigana karate, mimi nikaona ndipo ananipeleka nyumbani.

CHANZO:  https://deusdeditmahunda.blogspot.com/

"Aisee mlambo-iiiiji mjukuu wa Chaka mwana Zulu fanya kazi yako", alijitia mori.



"Ungekuwa mjukuu wa Chaka ufanye jambo la aibu kama kuwa kibaraka wa Makaburu - tazama Mwafrika asiye na aibu".



Aliruka na kutupa karate nikaikinga kwa mikono. Akatupa tena nami nikaizuia, halafu akageuza mara moja, akanipata, kisha akanipata tena, nikajua huyu alikuwa na ujuzi wa kutosha hivyo mimi ilinibidi nibadili na kujaribu Kung-fu. Na hapo hapo nikasikia mwili mzima unasisimka nikamwingia. Kwa sababu ya hasira na baada ya kukumbuka mauaji ya Veronika chuki kubwa iliniingia hivyo nilitupa wimbi la kwanza nikatupa la pili likampata

la tatu nilipopeleka kiganja changu kikamtoboa chini kidogo ya kifua na kutoka na vipande vya matumbo na vitu vingine vya ndani. Alipiga kelele



"Eeeeeeeeeeeeenakufa, eeeeeeee.



Akaanguka chini akafa.



Nilirudi chumbani nikamkuta Shuta yu hai, anajaribu kusimama lakini anashindwa sababu ya risasi zilizomwingia tumboni. Nilichomoa kisu kutoka kwenye maiti ya yule mtu niliyekuwa nimemchoma kooni nikamfuata.



"Kama ulivyomwua Veronika na mimi nakuua hivyo hivyo, maana nilimwahidi aliponiomba nimlipizie kisasi"



"Nisamehe, nipeleke hospitali".



Kusikia hivi roho ilinichemka, nikamchoma kisu katikati ya moyo huku analia hovyo.



"Kwa heri Shuta, mtaonana sasa hivi na Veronika mbele ya Mungu, ukajibu vizuri kwanini umemwua".



Niligeuka na kumwacha anakufa.



Nilipofika sebuleni tu nikasikia gari linapiga breki pale nje. Niliruka nikachukua bastola yangu na kuokota nyingine hapo sebuleni nikabana karibu na mlango wa kutokea nje nikasubiri.



Mlango ulipigwa teke na hapo hapo wakaingia watu wawili kama risasi, bastola mkononi, wakajiviringisha mmoja akiwa tayari kupambana na kitu chochote mbele yake na mwingine akajiviringisha na kuegeka nyuma. Mimi nilikuwa tayari kwa lolote.



"Ni mimi usiftatue", nilipiga kelele.



Kumbe hawa walikuwa ni Eddy na Sherriff.



Oh Bosi, samahani", Eddy alisema huku akiruka.



"Siku nyingine kutatokea ajali namna hii", nilimwambia.



"Tunaomba isitokee", Sherriff alijibu naye akisimama.



"Umefanya kazi kubwa sana Bosi", Eddy alinipongeza baada ya wao kuangalia maiti zote ndani ya nyumba hii.



"Ninastahili kazi kama hii", nilijibu.



"Sisi tulipongojea kwa muda mrefu tukaona tukufuate baada ya kujua kutoka kwa Zabibu kuwa umekuja huku. Tulihisi kuwa kuchelewa kwako unaweza ukawa katika matatizo. Tulipokuja tulikuta gari lako na gari jingine hapo mbele yameegeshwa. gari lako lilikuwa limetolewa upepo ndani ya tairi zote, hivyo hii ilituhakikishia kuwa uko msambweni", alieleza Eddy huku tukielekea kwenye gari lao. Ndani ya gari nilimkuta Zabibu.



"Oh Willy mpenzi uko salama?".



Alifungua mlango na kunirukia akiweka mikono shingoni mwangu na kunibusu.



"Na wewe umefuata nini?", nilimwuliza.



Nilimkarisha ndani ya gari kwenye viti vya nyuma mimi nikakaa huku Sherriff na Eddy wakaingia mbele, Eddy akatia gari gea tukaondoka.



"Nilikuja nikuone kama ni kufa tufe wote. Maana sijui nini kimeniingia nakuona wewe ndiye mwenzangu sasa. Nikiwa karibu na wewe nasahau yote yaliyopita".



"Usizoee kutembea na sisi mtoto kama wewe, hufai hata kujeruhiwa kidogo. tuachie sisi hatari ndiyo kazi yetu. Sitaki kupatwa mkasa kama niliopatwa nao kwa Veronika".



Kisha nikamweleza toka mwanzo mpaka mwisho wa mapambano yangu nyumbani kwa Shuta.



"Naona huyu Mlambo na wenzake walitia shaka walipoona gari langu. Hivyo walirudi kuhakikisha. Lazima niseme Mlambo alikuwa na mafunzo ya hali ya juu ya jeshi hata mimi alinitoa jasho".



Tulielekea nyumbani kwa Eddy.



Tulipofika nyumbani kwa Eddy ilikuwa saa tano za usiku. Tuliingia tukaa kwenye viti. Eddy akaleta vinywaji.

CHANZO:  https://deusdeditmahunda.blogspot.com/

"Kifo cha Veronika kimeniuma sana, tokea sasa mimi nimeahidi nitakuwa bega kwa bega na wewe mpaka nione mwisho wa mambo haya", Sherriff aliniambia huku machozi yakimtoka.



"Sijui nikwambie nini Sherriff, maana hali niliyonayo mimi siwezi kuieleza. Afadhali tuiachie hapo hapo".



"Basi, mambo yote tumetengeneza. Chifu amesema mwili wa Veronika hauwezi kusafirishwa mpaka mwisho wa mambo yote ili aweze kupewa heshima zote za kijeshi. Hivyo mwili wake umetunzwa huko kwenye chumba cha maiti katika hospitali ya Muhimbili mpaka hapo tutakapojua mwisho wa mambo haya. Mwili wake utapewa uangalizi wa pekee hivyo hata tukichukua mwezi mzima utakuwa katika hali safi tu", Eddy alieleza.



"Jambo hili haliwezi kuchukua siku mbili zaidi. Nimeshapata mwanga mkubwa wa kutosha. Kuna kitu kidogo tu ambacho bado kinakosekana lakini naamini kesho haiishi bila kukupata kitu hicho", niliwaeleza. Kisha nikawaeleza jinsi nilivyokuwa ninafikiria mambo yalivyo toka mwanzo mpaka mwisho.



"Sasa ninachotafuta ni yale magari waliyapata wapi?.Nguo ni rahisi pamoja na vyeo kama nilivyowaeleza. nikishajua hilo basi jambo hili tutakuwa tumelitatua. Itabaki sasa kufanya shughuli ya mwisho ambayo ni kuzikamata hizi silaha na kuwakamata vibaraka hawa".



Wote walitingisha vichwa kuonyesha wamenielewa.



"Ray Sikazwe anakaa wapi?", nilimwuliza Zabibu.



"Anakaa Oysterbay, Kenyata Drive nyumba Nambari 1000/D.



"Oke, Eddy tokea sasa hivi weka vijana wa kumfuata Ray Sikazwe kila mahali anapokwenda. Ifikapo asubuhi nataka nataka nijue nyendo zake zote na sisi tutawasaidia tokea hapo. Tukiweza kufanya hivyo kazi itakuwa rahisi. Baada ya mambo yote yaliyotokea leo lazima akipata habari atakuwa na wasiwasi, hivyo lazima tu atafanya kitu cha kujinasa. Wote tutalala hapa maana ndiko mahali hapafahamiki.



"Tutaonana asubuhi", niliwaaga.



Nyumba ya Eddy ilikuwa na vyumba vitatu vya kulala. Kwa vile Zabibu alikuwa na huzuni nyingi na kwa vile mimi pia nilikuwa na huzuni tulionelea afadhali tukalala pamoja ili tuweze kuliwazana mioyo.



MAPAMBANO NA VIBARAKA



Ilikuwa saa kumi na mbili na nusu za asubuhi wakati nilipokuwa nakaribia kumaliza kunyoa ndevu. Nilikiangakia kidevu changu kwenye kioo nikaona nilikuwa sijajinyoa vizuri. Kila wakati nilipokuwa na mawazo mengi kitu kama hiki kilikuwa kinanitokea . Lakini hata hivyo nia yangu nionekane nadhifu hivyo nilichukua tena mashine ya ndevu na kuanza kujinyoa. Nilipoona mambo yanakuwa mazuri kwenye kidevu changu, nikaanza kuoga.



Nilitoka maliwatoni na kurudi chumbani nilikokuwa nimelala. Zabibu bado alikuwa hajaamka, hivyo nilivaa taratibu ili nisije nikamshtua toka usingizini. Alikuwa na sura ya mtoto mchanga isiyokuwa na maneno. Nilimwangalia huku nikivaa. Nilipomaliza kuvaa na kuweka kila kitu changu tayari, nilikwenda nikambusu Zabibu usingizini nikaondoka ndani ya chumba na kufunga mlango taratibu.



Niliwakuta Sherriff na Eddy wamekaa sebuleni wanakunywa kahawa.



"Karibu bosi, habari za kuamka?".



"Nzuri", nilijibu, nikaa kwenye kiti cha meza ya kulia nikavuta kikombe cha chai na kujiwekea kahawa ya kutosha.



"Lazima iwe nzuri", Sherriff alijibu huku akitabasamu nikajua alikuwa na maana gani kusema hivyo.



"Usinionee wivu".



"Lazima tukuonee wivu, maana chuma kama hicho si cha kawaida.



"Bosi, vijana wameleta habari kama ulivyoomba", Eddy alisema huku akibadilisha mazungumzo.



"Ndio, wamesemaje.CHANZO:  https://deusdeditmahunda.blogspot.com/



"Wamesema hawakuweza kumwona Sikazwe mpaka saa tisa za usiku. Walimpata akitokea kwenye barabara ya Bagamaoyo na akielekea nyumbani kwake. Hawakuweza kujua alikuwa anatokea wapi. Na mpaka sasa hivi bado yuko nyumbani amelala. Wamenieleza kuwa ofisi za SANP hazifanyi kazi siku za Jumamosi. Na kama unavyojua leo ni Jumamosi".



"Basi waambie waendelee na wahakikishe kuwa hawapotezi hata dakika moja. Atakapoondoka nyumbani nataka kujua anaelekea wapi. Sawa?".



"Hamna taabu".



"Sasa hivi mimi ninakwenda kumwona Chifu maana nilipata habari kuwa anataka ripoti toka kwangu, maana anasumbuliwa sana na Serikali".



"Nafikiri Sherriff anaweza kuendelea kupumzika hapa, mimi nitakujulisha wakati nitakapokuhitaji".



"Sawa", alijibu Sherriff kwa mkato.



"Naomba unipatie 'machine gun' inayoweza kuchukua risasi zaidi ya mia. Niliwahi kuzitumia nilipokuwa jeshini.



"Aina gani".



"Zilizotengenezwa Urusi".



"Zipo".



"Oke niletee moja ya aina hiyo. Ikiwezekana tuma mtu aniletee mapema kusudi niishughulikie".



"Hamna taabu, utapata.



Baada ya kuzungumza na hawa vijana tuliagana kisha nikaondoka. Nilitembea kwa mguu mpaka nyumbani kwangu, ili nikabadilishe nguo. Nilifika nikafungua mlango, nikaangalia saa yangu nikaona ilikuwa yapata saa mbili kasoro robo. Nilipoingia tu ndani, roho yangu ikashtuka lakini nilikuwa nimechelewa, nilipigwa na mfuko wa mchanga kisogoni nikaanguka.



II



Nilisikia sauti ikisema ni saa tisa sasa. Sauti hiyo ndiyo ilikuwa imenizindua. Nilijikuta nimelazwa kwenye kitanda cha chuma bila godoro, na nilijikuta nimefungwa kwenye kitanda mikono na miguu. Kichwa kilikuwa kinaniuma sana, na kwa chati nilifunua nilikuta nimo kwenye chumba kidogo cha giza tupu.



Nikatuliza mawazo nikaanza kufikiri nini kimetokea. Ndipo nikatambua kuwa nilipokuwa nakwenda nyumbani kwangu saa mbili kasorobo nilipigwa na kitu nilichohisi ni mfuko wa mchanga nikaanguka chini. Tokea hapo mpaka sasa sikujua chochote. Hii ina maana kuwa nilizimia. Nikakumbuka yule mtu alisema ilikuwa saa tisa, hii ina maana nilikuwa nimezimia kwa zaidi ya masaa sita.



Nilifikiri jinsi akina Eddy, Sherriff, zabibu na Chifu walivyokuwa wamehangaika huu kujaribu kunitafuta. Hata mimi mwenyewe nilikuwa sijui hapa ni wapi. Ila nilikuwa nasikia kelele nyingi nje ya chumba hiki. Hivyo nilifikiri kuwa huenda ikawa ni sehemu ya viwanda. Sikujua ile sauti iliyosema sasa ni saa tisa ilitokea wapi, maana kulionekana kana kwamba hakukuwa na mtu ndani ya chumba hiki.



"Zaidi ya saa tisa sasa lazima waje kutupokea sisi twende tukapate chochote", nilisikia tena mtu anazungumza.



"Washa taa", sauti nyingine ikajibu.



Hivyo nikajua kuwa nilikuwa nalindwa na watu wawili ila sikuweza kuwaona kwa sababu ya giza. Taa ilipowashwa mimi nikajifanya kana kwamba bado nimezimia kabisa.



"Bado kazimia kabisa", alisema mmoja wao.



"Daktari alisema hawezi kuamka mpaka saa kumi na mbili au baada ya hapo", alijibu mwingine.



"Kama ni hivyo basi twende tukawaambie watupokee njaa inauma sana".



"Oke twende, zima taa".



Walifungua mlango na kuzima taa halafu wakafunga mlango na funguo wakaondoka. Mimi nilijinyanyua ili nione nimefungwa kiasi gani. Nilikuta ni mikono na miguu tu iliyofungwa kwenye kitanda cha chuma kipatacho futi tatu upana. Miguu ilifungwa kwa ustadi sana kiasi kuwa nilisikia kama damu haipiti na sehemu za nyayo zimekufa ganzi. Kwa upande wa mikono, mkono wa upande wa ukutani nilipoujaribu nikaona haukufungwa kwa ustadi sana, ule wa upande mwingine ndio ulifungwa kwa ustadi sana.



Nilinyanyua kichwa changu nikasikia kinauma sana, nikakirudisha chini. nilianza kufikiri namna gani nitajiokoa. Baada ya kufikiri sana nikaona njia pekee ni kujaribu kufungua hizi kamba kabla walinzi hawa hawajarudi. Hivyo nilionelea nijikaze. Ingawaje kichwani nilisikia maumivu makali. Kwa vile sehemu zote tokea tumbo, kifua na kichwa zilikuwa hazikufungwa, na kitanda kilikuwa cha futi tatu nilijikunja ili mdomo wangu ufikie kamba za mkono wa upande wa ukutani ambao haukuwa umefungwa sana.



Nilitulia tena nikamwomba Mungu. Niliupeleka mdomo wangu kwenye fundo la kamba walilokuwa wamenifungia. Kwa bahati mdomo wangu ulifika nikaanza kupitisha meno yangu kwenye kamba ili niweze kujua wamefungaje. Katika hii tafuta tafuta huku maumivu karibu yananitoa fahamu, niliuma ncha moja ya kamba, nikaivuta na fundo lote la kamba likafunguka na mkono wangu wa kulia ukawa huru.

CHANZO:  https://deusdeditmahunda.blogspot.com/

Ilibidi nirudishe kichwa changu kipumzike maana maumivu yangu yangeweza kunifanya nizimie.



Nikiwa na mkono mmoja huru, nilipata tumaini na nguvu mpya. Nilichoomba sasa ni watu hawa wasije upesi. Kwa vile walikuwa wamesema daktari aliwaambia siwezi kuamka kabla ya saa kumi na mbili nilijua watadharau kuja ndani ya chumba hiki cha joto la kuweza kuua kabla haijakaribia saa kumi na mbili wakati wananitegemea kuamka. Nguvu mpya zilizoletwa na mawazo kuwa nimechelewa mambo mengi zilinifanya nisahau kabisa maumivu yangu.



Niliutumia mkono wangu wa kulia kufungua mkono wa kushoto. Nikiwa sasa nimeweza kufikia hatua hii niliingiwa na furaha nikaanza kushambulia kamba nilizofungwa miguuni. Kwa mtu mwenye ujuzi kama wangu hii haikunipa taabu na mara nikawa huru tayari kupambana na wadhalimu hawa.



Nilirudi nikajilaza nikaziweka kamba kijanja kana kwamba bado hazijafunguliwa. Nikawa katika hali ya kusubiri. Nilivyokuwa na bahati haikupita muda mrefu nikasikia funguo zinaingia ndani ya kufuri la mlango. Mara mlango ukafunguliwa na taa zikawashwa. Mimi nilijilaza vile vile na kujifanya bado nimezirai.



"Bado sana huyu, niliwaambia daktari alisema saa kumi na mbili. Angekuwa mtu wa hivi hivi asiye na mazoezi pigo lile lingemuua pale pale", nilisikia sauti ikisema.



"Sawa. Akiamka saa kumi na mbili itakuwa vizuri maana ndipo wakati wazee watakapomhitaji", sauti nyingine ilijibu.



"Haya shika funguo, mwangalie kwa makini akionyesha dalili ya kupata fahamu tupashe habari mara moja. Sisi tuko chumba kingine tukisubiri maelekezo zaidi kutoka kwa wazee.



"Haya asante, lakini naomba asiamke wakati nikiwa peke yangu. Nasikia mtu huyu ni hatari kubwa kabisa'.



"Wewe mwoga sana. Mtu aliyefungwa kiasi hiki unafikiri atafanya nini hata akiamka, labda awe na nguvu za kishetani".



"Huenda anazo".



"Kama anazo basi pole, yatakuwa matatizo yako".



Nikiwa katika kusikiliza mazungumza haya kidogo nicheke. Yule mtu mwingine alitoka, akabaki mlinzi mmoja ambaye alifunga mlango na kuzima taa, halafu akakaa kwenye kiti. Nilisubiri kama dakika kumi hivi nikaanza kukoroma. Yule mlinzi aliinuka na kuwasha taa na kunisogelea kitandani wakati mimi bado nimefumba mamcho. Kule kuhema kwake ndiko kulinifanya nijue yuko karibu.



"Wewe umeamka", aliuliza kwa wasiwasi, nilifungua macho yangu kwa chati nikaona alikuwa ameshika bastola akiwa amelenga kifuani pangu. Nilifanya mahesabu ya namna ya kumwingia mtu huyu nikapata.



"Ndiyo', nilijibu kwa unyonge.



Niliona macho yanamtoka, nikaona mtu huyu ameingiwa na woga na anaweza kunipiga risasi shauri ya woga nisipomwahi. Hivyo kama chui nilimrukia na wakati ule ule nikawa nimepiga bastola yake ikaanguka upande mwingine na nikampiga pigo la mkono la karate katikati ya kichwa akafa bila kujua nini kimemwua. Niliiendea bastola yake, nikamvua joho lake jekundu, nikalivaa, kisha nilifungua bastola nikakuta funguo na risasi za bastola hii. Nilifungua bastola nikakuta ina risasi tatu tu nayo ina uwezo wa kubeba kumi. Hivyo niliijaza risasi, kisha nikachemsha kidogo viungo vyangu tayari kwa kupambana na watu walioko chumba kingine. Kichwa kilikuwa bado kinaniuma lakini hakikuwa tishio kubwa.



Nilizima taa, nikajaribu kufikiri nilipo lakini nikaona bila kwenda nje haingenisaidia. chumba hiki kilionekana kilikuwa ni stoo ya vitu, hivyo nilihisi hapo nje kuna ofisi na nilifikiri kuwa ndicho chumba cha pili alichokuwa amezungjumzia yule mlinzi wa pili. Nilifungua mlango taratibu, niliangalia hali mara moja nikajua hizi zilikuwa sehemu za nyuma za bohari, au ofisi. Maana kulikuwa na chumba kinatazamana na stoo hii, halafu kulikuwa na vyumba vitatu mbele tena kwa upande wa kulia. Upande wa kushoto kulikuwa na mlango wa kutokea uwani.



Nilisikia watu wanazungumza kwenye chumba kilichokuwa kinaangaliana na mahabusu yangu. Nikajua ni hiki chumba alichozungumza yule mlinzi. Nilijiweka tayari kisha nikagonga. Mimi niliamini watajua ni mwenzao hivyo wangekuja bila tahadari kufungua mlango.



"Ngwishe", nilisikia sauti ikiita.



"Ndiyo", nilijibu kwa sauti nzito.



"Ameamka?".



"Bado".



"Funguo tu mlango haukufungwa", nilijibiwa.



Basi bastola yangu ikiwa tayari mkononi, nilifungua mlango na kuingia ndani. Kweli watu wote sita walikuwa wamwezunguka meza wanakula. Waliponiangalia na kunitambua mimi ni nani wengine chakula kiliwadondoka toka midomoni.



"Endeleeni kula, mbona mnaacha", niliwatania.



Mmoja wao alimkonyeza mwenziwe wakifikiri mimi sikuona kumbe hawakujua macho ya Willy yamefundishwa kuangalia kila mahali kwa wakati mmoja utafikiri kinyonga. Yule aliyekonyezwa alitoa bastola haraka sana lakini mimi nilijua anataka kufanya nini na kabla hata sijamtahadhalisha alikuwa tayari kufyatua, lakini mimi nilikuwa mwepesi zaidi nikampata. Wakati yeye alipofyatua risasi alimpiga mwenzake na kumwua. wawili tayari walikuwa wamekufa.

CHANZO:  https://deusdeditmahunda.blogspot.com/

Pale pale wengine wote walisimama kila mtu akitoa bastola. Lakini niliwawahi watatu halafu nikaona yule wa nne macho yake yanaangalia mlango. Mara moja nikaanguka chini na risasi ikanikosa kwa nyuma ikapita na kumpiga yule wa nne na kummaliza, mimi pale pale nikajiviringisha na kumwahi yule wa nje. Lo nilikuwa nimeponea chupu chupu, maana kama nisingewahi kulala chini, vile vile ningekwenda kuonana na Veronika mpenzi wangu kama kweli watu huwa wanaonana tena huko ahera.





ITAENDELEA