JINAMIZI - 2

 

Simulizi : Jinamizi

Sehemu Ya Pili (2)

CHANZO:  https://deusdeditmahunda.blogspot.com/

Gari aina ya suzuki iliegeshwa katika ghorofa moja

lililopo maeneo ya Ilala mtaa wa Lindi katika wilaya

ya Ilala, milango yake ilifunguliwa kisha miguu ya

watumiaji wa gari hiyo ikifuata kugusa ardhi ya maegesho

iliyisakafiwa kwa ruva ndogondogo jirani na ghorofa

hilo. Hawakuwa wengine bali ni Norbert na Hilda na

sasa walikuwa wanaingia ndani ya ghorofa hilo

linalojulikana kama hoteli. Baada ya kufunga milango

ya gari hilo, walipitia mapokezi kisha wakapanda lifti

ambayo haitumiki na watu wa kawaida isipokuwa

wakubwa wa hoteli hiyo. Lifti hiyo ilishuka chini kwa

mwendo wa wastani kwa umbali wa takribani

ghorofa mbili kama ingekuwa inaelekea juu,

milango ilifunguka baada ya kufika mwisho wa safari

na taa zikawa zinawalaki. Norbert alitoka ndani ya

lifti hiyo na kufuata ukumbi mrefu wa sehemu hiyo

akiwa sambamba na Hilda, walitembea hadi kwenye

mlango uliopo mwisho wa ukumbi huo kisha

Norbert akaweka kidole gumba kwenye duara dogo

lililopo pembeni ya mlango. Mlio wa kengele

ulisikika kisha ikasikika sauti ikisema "welcome

N001(karibu N001)" kisha mlango ukajifungua

wenyewe, waliingia ndani moja kwa moja huku

mlango ukijifunga. Walitembea na kupita vyumba

mbalimbali huku wakipishana na watu mbalimbali

hadi kwenye mlango wenye maandishi yaliandikwa

CE, hapo walifungua mlango huo kisha wakaingia

ndani hadi kwa katibu mukhtasi aliyepo katika

chumba hicho.



"we mwanamke hicho kibabu kipo humo ndani"

aliongea Norbert kumwambia katibu Mukhtasi wa

ofisi hiyo huku akimpiga kibao cha uchokozi



"naona leo ndio unanikumbuka we dungadunga

ukiwa na bibi yako wa maigizo, yupo humo ndani

tena anawangoja nyinyi" aliongea Katibu mukhtasi



"we mke mwenzangu nikitoka huko

ninakuja kwako, jiandae kwani nina yako mazito, jiandae bibi"

aliongea Hilda na kupelekea Katibu mukhtasi wa

ofisi acheke kicheko kikubwa.



"bibu wewe tena nakungoja kwa hamu hapa ingia

huko kwa kibabu chako" aliongea Katibu mukhtasi

akiwa anacheka.



"nyie wanawake hebu kaeni kimya, hamjui kama

mume wenu hapa alaa sihitaji kelele" aliongea

Norbert na kusababisha Hilda ampige kibao cha

mgongo huiu akimwambia "looh kazi uhuni tu, una

mke hapa?". Norbert hakutilia maanani swali Hilda

ambalo lipokiutani zaidi, alifungua mlango wa ofisi

uliopo mbele yake huku akimwambia katibu

mukhtasi, " Norene jiandae mama nikitoka huko

maana nina hamu na wewe" kisha akingia ndani

akifutiwa na Hilda.







"ketini kwenye viti tafadhali" ilisikika sauti kutoka

kwenye kiti cha kuzunguka kilichokuwa kimegeuziwa

upande wenye kabati lenye makabrasha mengi.

Norbert na Hilda waliketi katika viti viwili vyenye

kutazama kisha wote kwa pamoja wakasema "ndiyo

mkuu", kauli yao ilisababisha kile kiti cha

kizungushwe na mtu aliyekuwa amekikalia

na kupelekea kiwe kimeelekea usawa wa mlango wa

kutokea. Mzee wa takribani miaka sabini mwenye

mwili mkakamavu ndiye aliyekuwa amekalia kiti

hicho, akiwa ni mwenye uso uliojaa umakini

aliwuliza, " kwanza nilitaka kujua ni wapi mmefikia

katika kaz yenu?". Baada ya kusikia swali hilo

Norbert na Hilda walitazamana kisha Hilda akasema,

"mkuu tumefanikiwa kupiga hatua katika kazi hii

ingawa kuna vikwazo vingi sana kutoka kwa kundi

lisilojulikana".

Mzee huyo ambaye ndiye CE

alimkatisha Hilda kisha akasema "najua wewe HI002

ni mwanamke shupavu na makini na wewe N001 ni

kijana mwenye uwezo wa hali ya juu, sasa

mnatakiwa mnisikilize kwa umakini maana hili suala

lina sura tofauti ndio maana nikawaita sasa

kutokana na taarifa niliyoipokea kutoka kwa Al005

wa Burundi. Huyu ni mpelelezi makini sana wa tawi

letu ambalo lipo Buruni ambaye yupo Tanzania kwa

siri , kijana huyu ameweza kubaini ujio wa wafuasi

wawili wa mr Eagle wa Marekani hivi karibuni

pamoja na uwepo wa mmoja wa wafuasi hao kwa

kipindi cha miaka mitatu hadi sasa. Pia amebaini

uhusiano uliopo kati ya vigogo wa nchini na Mr

Eagle wa marekani" CE alimeza mate kidogo kisha

akawasisitizia "inabidi muwe makini sana vinginevyo

tutawapoteza maana hawa wafuasi wa Eagle

wameshafahamu ujio wenu kwa mujibu wa

mwanausalama wetu tuliyempandikiza katika kikosi

cha usalama wa taifa".

CHANZO:  https://deusdeditmahunda.blogspot.com/

"sawa mkuu tumekuelewa, lakini nilikuwa nina ombi

moja tu kama itawezekana" aliongea Norbert na

kupelekea CE amtazame kwa umakini kisha

akamuashiria aseme.



"mkuu ningependa kama inawezekana tuwajue

AL005 na huyo aliyepo usalama wa taifa ili tuweze

kuwa nao pamoja katika kazi hii" Norbert alitoa rai

kwa CE kulingana mawazo yake .



"hapana huu si muda wake muafaka wa kuwa

pamoja, fanyeni kazi nyinyi kama nyinyi halafu

tutawajumuisha pamoja baadaye ikiwa makao

makuu watatoa amri" aliongea CE kupingana na rai

ya Noebrt kisha akamaliza kwa kuwaambia

"maelezo mengine mtayapata kwa Norene ikiwa

pamoja na vitendea kazi , sasa mnaweza mkaenda".



Norbert na Hilda waliinuka kwenye viti kisha kisha

wakasema "sawa mkuu" halafu wakaelekea ulipo

mlango wa kutokea, walifungua wakatoka kuelekea

kwa katibh mukhtasi.



Norbert na Hilda ni wapeleleziwa kampuni ya EASA

(East Africa Security Agency) yenye makao makuu

yake jijini Nairobi nchini Kenya na Dodoma nchini

Tanzania, walikutana kwa mara ya kwanza katika

chuo cha uninja jijini Yokohama nchini Japan

walipopelekwa kwa ajili ya kuchukua mafunzo ya

uninja. Wamefanya kazi mbalimbali pamoja katika

nchi za Afrika ya mashariki na kuipa sifa kampuni

hiyo iliyoanzishwa na viongozi wa nchi za ukanda

huu miaka kumi iliyopita, wapelelezi hawa kwa

kushirikiana na Moses Gawaza wa usalama wa taifa

waliweza kumkamata gaidi aitwae Brian miaka minne

iliyopita. Ukaribu wao umesababisha waonekane

wapenzi ingawa walikuwa kikazi zaidi kwa muda

mrefu hadi mwaka ulipita walipojikuta wakivunja

amri ya sita kutokana na utundu wa Norbert kwa

wasichana. Kijana huyu mwenye mvuto kwa

wasichana na mwenye uhusiano na wasichana

mbalimbali alimuwinda binti huyu na hatimaye

akamnasa, hadi hapo hawakuwa wapenzi rasmi

ingawa wamevunja amri ya sita kwa nyingi sana.



Walipoingia ofisini kwa katibu mukhtasi walimkuta

akiwa anaendelea kufanya kazi kwa kutumia

Tarakilishi iliyo mezani, Norbert alizunguka hadi

nyuma yake kisha akampiga busu la shavu lenye

kila aina ya ucbokozi katika mwili wa binti huyo.

Alimuachia kisha akavuta kitu kilicho jirani halafu

akakaa, Hilda aliendelea kusimama huku

akimtazama Norbert kwa jicho la husuda kisha

akasema, " we mwanaume sikuwezi kabisa".



"mama tulia kidogo basi vumilia tu" Norbert

aliongea kwa masihara kisha akashika kiuno cha

Norene kwa uchokozi na kupelekea Norene ampige

kibao kisichoumiza kisha akakisukuma kiti cha Norbert nyuma.



"yaani hapo umemuweza kweli maana anajifanya

kidume cha mbuzi sana, muone vile" Hilda aliongea

huku akimtazama Norbert kwa jicho la kumsuta.

Norene aliinuka kwenye kiti alichokuwa amekalia

kisha akawaambia "nifuateni", aliingia katika mlango

mmoja ulio pembeni ya ofisi yake huku Norbert na

Hilda wakiwa wapo nyuma yake mithili ya mkia kwa

mnyama. Ukumbi mpana wenye ubao tambarare wenye rangi nyeupe

ndio uliowakaribisha humo ndani, vifaa vya

kiupelelezi vya kila aina pamoja na silaha za kisasa

nazo ziliwalaki. Norene aliwasha tarakilishi

iliyounganishwa na kifaa maaluma cha kurushia

picha katika ubao maalum unaofanana na ule uliopo

katika kumbi za sinema. Tarakilishi hiyo iliwaka

baada ya muda mfupi tu kutokana na uwezo wake kuwa

mkubwa, kisha Norene akawa anafungua vikunja

mafaili vya Tarakilishi hiyo na kupelekea zionekane

picha zilizo ndani ya mafaili hayo. Aliifungua moja

ya picha hizo na kupelekea ionekane kwa ukubwa

wa kutosha katika ubao unaopokea mwanga kutoka

kwenye kirusha picha.



"Jim ndio jina lake na anajulikana kama muwekezaji

binafsi ndani ya nchi hii, ni muuaji wa kuaminika wa

kundi la Three devil na anatafutwa na shirika la

upelelzi la KGB la jijini Moscow nchini Urusi kwa

tuhuma za mauaji ya bilianea wa nchini humo. Kwa

mujibu wa taarifa tulizipata kutoka kampuni ya

kipelelezi ya Mossad ya dola ya Israel, huyu mtu

tayari alishawatoroka na kusababisha maafa makubwa

huko Yerusalemu. Sasa umakini katika kazi hii

inahitajika kwani sio mtu wa kawaida" Norene alisita

kwa muda akiwa mbele ya ubao mkubwa kisha

akawazama wasikilizaji wake kama wapo pamoja

nae, wote walitikisa vichwa kuashiria wamemuelewa

kisha Norene akafungua picha ya pili.

CHANZO:  https://deusdeditmahunda.blogspot.com/

"Anaitwa Michael na kibaraka wa Mr Eagle

aliyepandikizwa katika shirika la upelelezi M16 la

nchini Uingereza, huyu ni mtu hatari sana kwa

ulengaji wa shabaha pindi awapo na silaha pia ni

mkufunzi wa mafunzo ya mapigano ya nchini China.

Kijana huyu kwa sasa yupo hapa nchini kwa mujibu

wa mtu wetu aliyepo kitengo cha kamera katika

uwanja wa mwalimu Nyerere baada ya kunasa picha

zake , sasa basi pia umakini wenu unahitajika kwa

usalama wenu nadhani tupo pamoja" alisita kuongea

kwa mara ya pili kisha akawataza tena na kupelekea

hadhira yake imuashirie kuwa imemuelewa,

alifungua tena picha nyingine kisha akaanza kutoa

maelezo.



"huyu ndio wa tatu kati ya hawa vijana wanaounda

kundi la Three devil, Morris ndio jina lake na ndio

anavyojulikana. Huyu pia ni kibaraka wa Mr Eagle

katika shirika la FBI la nchini Marekani, uwezo wake

wa kupigana na kutumia visu ndio umefanya shirika

hilo la kijasusi lumuamini na kumpa nafasi wakijua

atakuwa msaada kwao kumbe ni kinyume chake.

Sasa basi hivi sasa yupo nchini na ushahidi

tumeupata kupitia kamera za ulinzi zilizopo uwanja

wa ndege wa mwalimu Nyerere. Pia napenda mjue

kuwa watu hawa wanafadhiliwa na vigogo wawili

wakubwa hapa Tanzania, mmoja akiwa ni tajiri

mkubwa hapa nchini na mwingine akiwa ni kiongozi

katika nchi hii" Norene aliwaeleza akiwa makini sana

na huo muda tayari alishaweka fimbo chini aliyoitumia

kuwaelekeza kisha akawaambia "kuwajua hao vigogo

ambao wanajiita FI na KL ni jukumu lenu kuanzia

sasa, pia kuhakikisha hao watu wanatiwa nguvuni ni

jambo la muhimu. Inahitajika wapatikane wakiwa

wazima au wawe maiti pia ni lazima, kwa msaada

zaidi mtaupata kwa Moses Gawaza na vitendea kazi

vipo ofisini kwangu nadhani mmenielewa. Alizima

Tarakilishi kisha akazima kirushapicha ukutani

halafu akatoka kuelekea nje, Norbert na Hilda nao

walimfuata kama ilivyokuwa awali. Norene alienda

hadi ofisini kwake kisha akainama chini ya meza

akawa anavuta kitu kilichokuwa hakionekani na

wenzake, alipotoa begi kubwa la kuburuza lenye

rangi nyeusi ambalo limetengenezwa kwa plastiki

ngumu kisha akawaambia "vitendea kazi ni hivi

hapa kwa ajili ya kazi yenu, nadhani nimemaliza na

sina la ziada". Norbert alilipokea begi hilo huku

akitikisa kichwa kuashiria yupo pamoja naye huku

Hilda akisema, "shosti sasa ukitoka hapa nitafute

nikupe mchapo".



"khaa yaani mshaanza umbea wenu hapahapa"

aliongea Norbert huku akivuta begi hilo kuelekea

ulipo mlango wa kutokea katika ofisi ya Katibh

mukhtasi.



"huyu mwanume naye kwa kudandia, lione kwanza"

aliongea Norene kumuumbua Norbert ambaye

alikuwa anafungua mlango ili atoke nje



"Hil utanikuta ofisini" Norbert alisema kisha akatoka

nje na kuufunga mlango pasipo kusikiliza jibu

kutoka kwa Hilda ambaye alikuwa amezama katika

maongezi na Norene.



*********************************************

**********************



Muda huo huo FI na KL walikuwa wapo ndani ya

kambi yao ya siri wakijadiliana na kijana na wao wa

kuaminika aitwae Kitoza, meza ya plastiki pamoja na

viti vitatu ndiyo vitu pekee vilivyokuwa vipo humo

ndani katika ofisi ya Kitoza.



"vipi Kitoza mmefikia wapi katika mambo yenu?"

aliuliza FI



"bosi mipango inakwenda vizuri hadi sasa ingawa

bado kuna mmoja wa mbwa wako muhimu si

msikivu na yuoo upande wa EASA " Kitoza aliongea

kwa kujiamini



"Bado hamjafanikiwa kumjua huyo mbwa wakati

wewe ndio msimamizi wa hao mbwa wote, hapo

inakuwaje?" aliongea KL akionesha kutomuelewa

Kitoza.



"mkuu nahisi huyo si mbwa wa kawaida maana

hajajulikana zaidi ya kupata taarifa kutoka kwa

kibaraka wetu aliyeko EASA tawi kuu la Dodoma"

alisema Kitoza



"hebu elezea vizuri tukuelewe" aliongea KL



" bosi katika EASA tawi la Dodoma tulimpandikiza

kibaraka wetu pasipo wao wenyewe kujua ambaye

ndiye anyetupatia taarifa zote za zinazoingia zikifika

katika usawa wake, pia huyu jamaa ametueleza kuna

mbwa mmoja ndani ya banda si muaminifu baada

ya baadhi ya taarifa zenu kufika ofisini kwao" Kitoza

alitoa maelezo kwa wakubwa zake.

CHANZO:  https://deusdeditmahunda.blogspot.com/

"sasa napenda nikupatie kazi ya kumtafuta mpaka

umjue la si hivyo mambo yataharibika" aliongea FI

kumpa wajibu mwingine



"sawa bosi nitafanya kila niwezalo huyu mbwa

apatikane" Kitoza alikubali wajibu mpya

aliokabidhiwa.

KL na FI waliinuka kwenye viti walivyokuwa

wamekalia kisha wakatoka ndani ya ofisi hiyo

wakimuacha Kitoza akiendelea na kazi zake

nyingine.



*********************************************

***************



Baada ya kumaliza kuelekezana kila kitu katika kazi

yao waliamua kuchukua begi lenye vitendea kazi na

kuondoka nalo, Norbert na Hilda waliamua kutumia

mlango maalum wa kutokea uliopo sehemu nyingine

tofauti na ule walioutumia kuingilia. Mlango huo

uliwapeleka hadi ilipo lifti nyingine tofauti na ile

waliyoitumia wakati wanashuka chini, walipanda lifti

hiyo kisha Hilda akabonyeza kitufe chenye herufi G

baada ya kuingia humo ndani. Lifti hiyo ilianza

kupanda juu hadi ilipo alama ya G kisha ikapiga

kengele na kufunguka, walishuka humo ndani

wakatokea katika lifti nyingine iliyo jirani na

mapokezi kisha wakatoka nje kuelekea kwenye

maegesho magari. Walipofika wakaingia ndani ya

gari yao waliyoitumia wakati wanakuja kisha

wakaondoka eneo hilo. Muda huo Hilda alikuwa

ndiyo dereva wa gari hiyo na Norbert akiwa

ameamua kujilaza katika kiti kilicho pembeni mwa

Hilda.



Hilda alitoka akifuata njia ya iendayo karia kotoka mtaa

aliokuwepo katika. eneo hilo la Ilala, allipofika kariakoo

alishika barabara iendayo yalipo makutano ya

barabara ya kariakoo gerezani jirani na kituo cha

mafuta kwa upande wa kulia. Mataa ya eneo hilo

yalikuwa yamewaka rangi nyekundu katika upande

aliokuwepo kuashiria magari na vyombo vingine vya

barabarani visimame, hapo alisubiri hadi taa zilipowaka

kijani kisha akafuata barabara iendayo makutano ya

barabara yanayotenganisha njia iendayo kariakoo na

iendayo maeneo ya posta. Hapo akafuata barabara

iendayo bandari hadi katika mzunguko uliopo

mwanzoni mwa barabara ya kilwa, aliingia katika

barabara ya Kilwa kwa

mwendo wa kasi kuelekea upande wa kusini hadi

maeneo ya Mtoni kwa Aziz Ali kisha akakata kona

kuelekea upande wa kushoto . Alienda hadi kwenye

nyumba yenye geti kubwa la rangi nyekundu iliyopo

mtaa wa Bank club kurasini, hapo alipiga honi na

kupelekea geti dogo lifunguliwe kisha kijana wa

makamo akatoka humo ndani na kuja hadi kwenye gari lao. Hapo

Norbert alishuka kisha akaelekea mlango wa nyuma

wa gari hiyo na kuufungua, alitoa begi jeusi lenye vitendea na

kumpatia huyo kijana kisha akarudi ndani ya gari katika

sehemu aliyokuwa amekaa awali. Waliagana na yule

kijana kisha Hilda akaondoa gari hilo kuelekea

nyumbani wanapoishi.



***-*****************************************

**************



Mnamo saa kumi na moja alfajiri hali ilikuwa shwari

sana katikati ya jiji la Dar es salaam, mtu mwenye

mavazi meusi alionekana maeneo ya jirani na ofisi za

WAHANGA. Mtu huyu alionekana kuangalia kila

upande wa eneo hilo kwa zaidi ya mara nne kama

aliyekuwa anayemtafuta mtu, aliporidhika na ukimya

wa eneo hilo alizunguka nyuma ya jengo lenye ofisi

za WAHANGA. Alivaa glovu ngumu mkononi ambazo

hutumiwa kupanda ukuta kisha akapanda ukuta

huo mithili ya mtu anayekwea mti hadi ghorofa ya

kwanza ya jengo hilo. Alitembea kwenye kingo za

ghorofa hadi jirani na dirisha la vioo, alitoa kifaa cha

kukatia vioo kisha akakata kipande kidogo cha kioo.

Alipohakikisha sehemu aliyokata inamfaa

alitumbukiza mkono ndani kisha akafungua dirisha

hilo, dirisha lilipotii amri ya kufunguka yeye aliingia

ndani kisha akalirudishia. Eneo lenye makabati ya

kuhifadhia mafaili ndio lilimlaki, meza za ofisi

zipatazo tatu ndizo zilishuhudia ujio wa kijana huyo

pamoja na kushuhudiwa na yeye pia kama wenyeji

aliowakuta. Alipita katika kila meza huku akishika

pembeni mwa kila meza na kupelekea aibuke na

vinasa sauti vitatu, alienda hadi sehemu iliyofungwa

kiyoyozi ofisini hapo kisha akachomoa kamera

ndogo iliyochomekwa kwa ustadi wa hali ya juu.

Baada ya kuchukua vitu hivyo alikuwa anatafuta kitu

kimoja ambacho alikijua yeye na nafsi yake,

alifungua makabati tofauti ya ofisini humo pasipo

kuonesha dalili zozote za kukipata akitafutacho. Mtu

huyu alisimama kisha akajifikiria kisha akasogelea

kabati kubwa lililopo ofisini humo ambalo

hakulifungua, pasipo hofu ya aina yoyote akashika

kishikizo cha kabati hilo na kukivuta. Kabati

lilifunguka na ukaribisho wa aina yake aliupokea

kutoka ndani ya kabati hilo, hakika ni ngumi nzito

asiyoitarajia ilimpata puani. Akiwa hajakaa sawa

alipokea kichwa kikali kisha ngumi mfululizo

zikauvamia uso wake, mtu huyo alianguka chini

huku damu ikimvuja puani. Kijana mwenye mwili wa

kimazoezi na mwenye kimo

CHANZO:  https://deusdeditmahunda.blogspot.com/

cha wastani akiwa amevaa suti ndiye mtu pekee

aliweza kumuona akiwa amesimama mbele yake,

hakika ni pigo ambalo lilimpata pasipo yeye

mwenyewe kutarajia. Alijizoa pale chini alipoanguka

kisha akasimama kiukakamavu huku pua zake

zikiwa zinavuja damu, alikuja na mapigo mawili ya

karate ambayo yaliishia hewani pasipo kumpata

aliyemkusudia baada ya yule kijana kuyakwepa yote.

Hasira zilimzidi maradufu baada ya lengo

lake la kumpiga kijana huyo kutotimia, alileta mateke

matatu mfululizo ambayo mawili yalipanguliwa na

moja likampata yule kijana la kifua na kusababisha

arudi nyuma, hapo alitabasamu kisha akakaa sawa

kumsubiri mpinzani. Yule kijana aliifuta suti yake

iliyochafuka kwa teke lililompata kisha akajiweka

sawa halafu akamfuata mpinzani wake na mapigo

mfululizo ambayo yalimsambaratisha adui yake hadi

sakafuni.



"you can call me AI005(unaweza kuniita AI005)"

aliongea yule kijana akamuongeza yule mtu teke la

kifua na kumfanya aishie kutoa mguno wa

maumivu.



AI005 alimpiga yule mtu teke la kisogoni na

kusababisha apoteze fahamu kisha akambeba yule mtu na kumuweka katika bega lake la kulia. Alielekea ulipo mlango wa kutokea nje, alipofika alitoa funguo

mfukoni na

kuufungua mlango huo. Alimtoa yule mtu hadi nje

kisha akaufunga mlango wa ofisi hiya ufunguo,

alimshusha na kukokota hadi kando ya barabara kwenye gari

ndogo iliyokuwa imeegeshwa pembezoni mwa

barabara, hapo alifungua mlango na kumuweka yule

mtu ndani ya gari kisha na yeye akaingia.



"kazi imeisha tuondoke" alimwambia dereva.



Dereva akaliondoa gari kwa mwendo wa kasi.



*********************************************

******************



Asubuhi iliyofuata Kitoza alijawa na wasiwasi juu ya

kutorudi kijana wake aliyemtuma kukusanya vitu

vyao walivyovitega katika jengo la wahanga, hadi

jua linachomoza alikuwa tayari ameshakata tamaa

ya kurudi kwa kijana huyo.



"huenda ameingia kwenye mtego bila ya kujujia"

alijisemea huku akinyanyua mkonga wa simu yake

iliyopo mezani katika ofisi yake kisha akauweka

sikioni mwake.



"Briton njoo mara moja ofisini kwangu" kisha

akashusha mkonga wa simu hiyo mahala pake.

Hazikupita dakika tano mlango wa ofisini kwake

ukafunguliwa kisha kijana mwenye kimo kirefu na mwili

uliojengeka kimazoezi akaingia humo ndani.



"mkuu" aliongea kijana huyo



"keti tafadhali" Kitoza

alimwambia kijana huyo kisha

akaendelea baada ya kijana huyo kuketi kwenye kiti,



"Briton napenda nikupatie wajibu wa kuutekeleza

maana naona kuna mtu anatuzunguka hadi muda

huu, saa nane usiku ya jana nilimtuma Tasu

akachukue vifaa vyetu katika ofisi ya wale wambea"

alisita kwa muda huku akimtazama Briton kuona

umakini katika jambo analomweleza.



"sas basi hadi muda huu Tasu hajarejea na si

kawaida hii, hivyo nakupa kazi ya kuwafuatilia hawa

wambea maana nina wasiwasi huenda wakawa sio

watu wa kawaida kama tunavyowachukulia" Kitoza

aliendelea kuongea tena akasisitiza "nataka ujue

hadi mahali wanapoishi na ikiwezekana tumtie

nguvuni mmoja wao na ikiwezekana tuwapoteze".



"sawa mkuu" aliitikia Briton

huku akijiweka sawa

katika kiti alichokikalia.



"kuanzia sasa hakikisha hajui mtu kuhusu kazi hii

hasa huyo swaiba wako ambaye anajifanya

mzalendo, unaweza ukaenda sina la ziada zaidi ya

hilo" Kitoza alimaliza na kupelekea Briton

anyanyuke kwenye kiti chake na kuondoka ofisini

hapo baada ya kupokea maagizo hayo.



*******************************************************



Baada ya siku tano toka ajali iliyoondoa maisha ya

waziri wa maliasili na utalii kutokea, mwili wa waziri

huyo ulikuwa umeshasafirishwa kulekea mkoani

Tanga alipozaliwa katika wilaya ya Korogwe kwa ajili

ya maziko. Hadi muda huo umati wa watu ulikuwa

umefurika katika shamba lililopo jirani na nyumba

ya kisasa katika kijiji cha Mazinde wilayani Korogwe.

Kundi kubwa la wanaume walikuwa wakihudhuria maziko hayo huku wanawake wakiwa wamebaki ndani

ya nyumba iliyo jirani na eneo, hadi muda huo

tayari turubai kubwa lilikuwa limefungwa kuzunguka

eneo la maziko na shimo la kaburi lilikuwa

limechimbwa. Jeneza lenye mwili lilikuwa pembeni

likiwa limefunikwa shuka nyeupe, taratibu za

kuushusha mwili wa marehemu zilianza baada ya

watu watano kuingia ndani ya kaburi na shuka jeupe

kufunika juu yao.

CHANZO:  https://deusdeditmahunda.blogspot.com/

"leta dongo" ilisikika sauti kutoka ndani ya kaburi

baada ya taratibu za kuushusha mwili kutoka ndani

ya jeneza kukamilika. Baada ya muda ubao

uliagizwa kisha majani yafuata ili kukamilisha

taratibu za kumfunika marehemu katika

mwanandani, utupaji wa udongo katika kaburi

ulifuatia kwa kuanza viongozi mbalimbali wa serikali

waliokuwepo eneo hilo wakiongozwa na makamu wa

rais Dk Ismail Hafidh. Baada ya hapo kaburi

lilimaliza kufukiwa kisha sheikh mkuu wa Tanzania

Muft Juma Shehoza akatoa nasaha kwa ufupi kisha

akaongoza dua ya kumuombea marehemu ili

kukamilisha maziko. Baada ya hapo watu wote

walitawanyika huku Norbert akiwa ni mmojawapo wa

watu walioshuhudia maziko hayo akiwa mwandishi

wa habari wa kawaida, hadi muda huo ilikuwa ni saa

nane za mchana . Norbert hakutaka kupoteza muda baada ya maziko kukamilika, alikodi

pikipiki iliyompeleka hadi Korogwe mjini kisha

akapanda basi la linaloenda Tanga mjini, alikaa

ndani ya basi kusubiri safari ianze huku akiwa

anawaangalia watu waliomo humo ndani ya gari

mmoja baada ya mmoja kwa ajili ya kujihadhari.

Baada ya muda safari ilianza akiwa hana wasiwasi

wowote baada ya kuhakikisha mazngira yapo

salama.



*********************************************

***********************.



Hadi maziko yanaisha Briton alikuwa ameshamuona

Norbert akiwa katikati ya kundi la waandishi wa

habari akipiga picha mbalimbali, baada ya mazishi

kuisha aliamua kumfuatilia kila anapoelekea bila

kugunduliwa na mtu yoyote. Norbert alipopanda

pikipiki yeye alikuwa anamfuatilia kwa kutumia gari

yake aina ya Nissan xtrail ya rangi nyeusi, Norbert

alipofika Korogwe mjini yeye alimfuatilia vilevile.

Baada ya Norbert kupanda basi liondalo Tanga yeye

alitoa simu yake kisha akaiweka sikioni,



"Luxury

express inayotoka Arusha inaelekea Tanga mjini

ndiyo asusa yetu ilipo, sasa ikifika hapo nyinyi

fanyeni kazi yenu" aliongea baada ya simu

kupokelewa kisha akakata bila kuusikiliza upande wa

pili wa mtu aliyempigia simu. Aliondoa gari kwa

mwendo wa kasi kueleka njia

iendayo Tanga baada ya basi la Luxury express

kuondoka, alilipita basi hilo kwa mwendo wa

kasi usio wa kawaida. Safari yake iliishia mwanzoni

mwa mji mdogo wa Segera kwenye pori lisilo rasmi,

hapo aliingiza gari kando kisha kisha akaifunuka majani,

alikaa sehemu ambayo barabara inaonekana vizuri.

Baada ya muda basi la Luxury ilikuwa inaonekana

vizuri likija kwa mwendo wa kasi sana, hapo Briton

alinyanyua kidole chake juu huku simu ikiwa

sikioni mwake kisha akasema, "shoot".

Sauti ya kupasuka matairi ilisikika kisha basi la

Luxury express likapinduka mara saba kuelekea

katika bonde lililopo jirani, Briton alitoka kwa kasi

kuelekea bondeni kuliangalia basi hilo. Alipofika

bondeni alikuta basi hilo likiwa limepondeka vibaya

sana na damu zikiwa zimetapakaa katika mabati ya

gari hilo, hali hiyo ilimfanya aachie tabasamu la

kifedhuli kisha akapiga mbinja kwa nguvu na

kupelekea mwenzake aje eneo hilo .



"shabaha nzuri kabisa hiyo" Briton alimwambia

mwenzake.

Alimpigapiga mgongoni kwa kumpongeza huku

akitabasamu kisha akamwambia "hakika shabaha

yako umeitumia ipasavyo.



"lakini si kuitumia kwa malengo bali ni nje ya

malengo" ilisikika sauti kutoka nyuma yao

iliwashtua sana. Briton alipogeuka alisalimiana na

soli ngumu ya kiatu huku mwenzake akikumbana

ngumi ya kisogo iliyosababisha apoteze fahamu



Soli hiyo ya kiatu ilimpata mdomoni na puani na damu ianze

kumtoka puani huku akiwa amepagawa kwa pigo

hilo, hadi muda huo alikuwa yupo chini akijianda

kuinuka. Alijiinua kwa namna ya kifyatuka mithili ya

mtego wa panya wa springi kisha akafyatua teke la

kuzunguka lililomkosa adui yake , hadi muda huo

tayari Briton alitambua anapigana na Norbert Kaila

mwandishi pasipo kutambua kuwa anapigana na

mtu mwenye uwezo wa juu. Norbert aliamua kuja na

ngumi mfululizo ambazo zilitolewa na kisha

akapigwa teke zito la kifua hadi akahisi kitu

kikivunjika kifuani mwake, Norbert hakujali mvunjiko

huo zaidi ya kukaa kimapigano zaidi. Briton alipiga

teke jingine la kuzunguka na kupelekea ajikute

akipigiza mgongo wake chini baada ya kuzolewa

mguu aliosimamia na Norbert, Norbert alimfuata ili

amshindilie na kiatu chake lakini alisita baada ya

kusikia ving'ora vya gati la polisi katika éneo hilo,

hapo akahisi kuna jambo litatokea iwapo atakaa

eneo hilo. Hakutaka jambo analohisi litokee kwake

ndani ya muda huo, hivyo aliamua kukimbia eneo

haraka sana kabla polisi hawajafika na kumkuta.

Baada ya Norbert kuondoka Briton alijiinua kivivu

kisha akaanza kuelekea lilipo gari la polisi ambalo

lilikuwa limeshawasili hadi muda huo, akiwa

anakaribia lilipo gari la polisi aligeuka nyuma kwa

lengo la kumuangalia mwenzake aliyezirai na

kupelekea aone miale ya jua ikigonga kwenye kitu

kidogo chenye umbo la mstatili. Briton alisitisha

safari yake kisha akarudi nyuma hadi kwenye kitu

alichokiona halafu akainamana kukiokota, hakika

kilikuwa kitambulisho cha Norbert ambacho

kilidondoka pasipo mwenyewe kujua.

CHANZO:  https://deusdeditmahunda.blogspot.com/

"Norbert Kailaaa umekwisha" alikiweka mfukoni

kitambulisho hicho kisha akageuka nyuma ili

aondoke.



"tulia hivyo hivyo" ilisikika sauti ya mmoja wa

maaskri polisi waliomnyooshea bunduki aina ya

SMG baada ya Briton kugeuka, Briton aliwatazama kwa dharau kisha akaachia

tabasamu la kifedhuli halafu akanyoosha mikono

yake. Mmoja wa maaskari alikuja kumpekua

mifukoni mwake huku wengine wakimnyooshea

bunduki zao kwa tahdhari, askari aliyempekua alitoa

pochi ya Briton ya mfukoni akiwa na macho ya

tamaa. Aliifungua kwa papara akijua kuna pesa

baada ya pochi hiyo kuonekana imetuna, kitu

alichokutanaa nacho katika pochi hiyo kilimfanya

atoe saluti kwa Briton. Hakika hazikuwa pesa

zilizomfanya atoe saluti bali ni kitambulisho cha

usalama wa taifa kilichokuwa ndani ya pochi,

kitambulisho hicho kilimtambulisha Briton kuwa ni

usalama wa taifa.



"sajenti Kilanto kutoka kituo cha polisi Segera"

alionge askari huyohuki akimpatia Briton pochi yake

kisha



"iteni gari la wagonjwa upesi sana ili muweze

kuokoa majeruhi kama wapo humo kwenye basi, pia

mnaweza kuendelea taratibu zingine" aliongea

Briton huku akimnyanyua mwenzake aliyepoteza

fahamu . Briton aliondoka eneo la tukio hadi

alipoificha gari yake kisha akamuingiza mwennzake

kwenye gari baada ya kufungua mlango wa ulio

nyuma ya kiti cha dereva, aliondoa miti

iliyolizunguka gari lake kisha akaingia ndani na

kutekenya ufunguona kupelekea gari liwake. Aliingia

barabarani taratibu kisha akaongeza mwendo

kuelekea Segera.



******************************

*************************



MUDA MFUPI ULIOITA

Baada ya Norbert kupanda basi la Luxury alikuwa

yupo kiamani sana, amani yake ilikuja kutoweka

baada ya kukaribia pori lililopo jirani na mji wa

Segera . Kila akijaribu kuituliza nafsi yake alishindwa na kumpelekea afanye uamuzi wa haraka. Alijifanya amechafukwa na tumbo la

kuendesha wakati akiwa amekaa kwenye kiti chake,

hali hii ilipelekea dereva wa basi asimamaishe basi

eneo lisilo rasmi ili abiria wake aweze kujisaidia.

Hapo Norbert alienda hadi mlangoni kisha

akawaomba radhi abiria wote halafu akaanza

kuteremka, aliteremka ndani ya gari akiwa na begi

lake dogo alilowekea kamera . Aliteremka kwa

mwendo wa kasi hadi maporini kisha akatulia

kwenye kichaka bila hata kuonesha dalili ya

kujisaidia, hapo alitoa simu kisha akabonyeza

baadhi ya namba halafu akaongea "nyie nendeni tu

mimi suruali imeharibikiwa, nimeshampigia simu

ndugu aliyepo segera"



"mkubwa tutakuachaje porini peke yako" ilisikika

ikimuuliza



"usiwe na shaka konda mimi nitakuwa salama na ni

ndani ya dakika ishirini tu ndugu yangu anakuja

kunifuata hapa" aliwafafanulia kisha akakata simu na kupelekea mlio wa

basi hilo usikike kuashiria linaanza safari. Muda mfupi baada ya

hapo Norbert alishtuka simu yake ikitoa kitetemeshi

mfukoni mwake kuashiria kuna simu inaingia,

alipoitoa simu yake aliangalia jina la mpigaji lakini

aliambulia patupu.



"Gawaza hapa, hilo basi ulilopanda jua linaandaliwa

ajali na mtu aliyetumwa na mkuu Kitoza. Sasa fanya

haraka iwezekanavyo ushuke ili usalimike na usiwe

katika mikono yao iwapo utapona katika ajali hiyo"

ilisikika sauti ikimsisitiza baada ya kuipokea simu

hiyo.



"nimeteremka tayari" alijibu na kupelekea simu

ikatwe.

Alianza kukimbia kwa kasi kuelekea barabarani

alipokuwa awali kisha akabonyeza namba kwenye

simu yake halafu akaiweka simu sikioni.



"John nipo jirani na segera katika pori baada ya

kushuka kwenye basi, njoo haraka unifuate

maana.." alishindwa kuendelea baada ya kusikia

kishindo kikubwa cha gari kuanguka, alianza

kukimbia kuelekea mahali aliposikia kishindo hiko

pasipo kujua umbali wake. Alikimbia umbali mfupi

kisha akasimama baada ya kusikia mlio wa pikipiki

ikija upande wa nyuma yake, aliisimamisha bila ya

kujali kama ya abiria au siyo ya abiria.



"twende nitakuambia ninaposhuka" alimwambia

dereva kisha akapanda pikipiki hiyo baada ya

kusimama alipoisimaisha. Dereva naye alikubali

akijua ni mteja kama wateja wengine, aliondoa

pikipiki kwa mwendo mkali kwa umbali wa nusu

kilomita wakafanikiwa kumuona mtu akivuka

barabara kwa kasi.

CHANZO:  https://deusdeditmahunda.blogspot.com/

"simama hapo" aliongea na kupelekea dereva

aponguze mwendo kisha akasimama, alimpa noti ya

shilingi elfu kumi huku akimwambia "unaweza

kuendelea na itakayobaki chukua". Dereva wa

pikipiki aliondoka kisha Norbert akaingia kwa kasi

katika kichaka kilicho jirani yake kama ameshtuka

jambo na anatazama barabarani, hapo alimuona mtu

wa awali aliyevuka akirudi upande wa barabani

akiangalia upande aliopo Norbert baada ya pikipiki

kuondoka. Yule mtu alirudi alipokuwa ameenda

mwanzo baada ya kuvuka barabarani, muda huohuo

ikasikika mbinja kisha mtu mwingine akaonekana

akivuka barabara kuelekea upande alioenda

mwenzake. Norbert alisubiria kwa muda kisha

akatoka kuelekea upande wale watu wameelekea kwa

mwendo wa tahadhari, alienda kwa mwendo

kukazana usiomshtua mtu kuwafuata watu hao.

Baada ya mwendo mfupi aliwakuta wakiwa

wanapongezana huku basi la Luxury likiwa lipo

mbele yao katika bonde likiwa limepondeka vibaya.

Hapo ndipo alipotamka kauli iliwastua kisha

akawaletea mapigo mawili ya kushtukiza na

kupelekea mmojawapo apoteze fahamu, alipigana na

yule wa pili kwa muda mfupi kisha akakimbia baada

ya kusikia king'ora cha polisi. Alielekea bondeni

kwa umbali mrefu kisha akaingia kwenye vichaka

akiwa katika mwendo wa kasi Mbio zake zote

zilikwama kwenye mti mdogo wenye

kivuli mbali kidogo na barabara, hapo alianza

kujipekua kwa papara kuashiria amepoteza kitu

chake. Alitoa vitu vyote muhimu kwenye kazi ya

uandishi ikiwemo kamera ndogo ya kupigia picha,

alitoa na pochi yake ya kutunzia pesa pamoja na

kitambulisho cha EASA lakini aliambulia patupu.

Aliendea kujipekua sehemu mbalimbali za mwili

wake kisha akasita huku akivuta kumbukumbu kisha

akajisemea "nilikuwa nimekivaa shingoni katika

kamba yake", hapo alijitazama shingoni akaona

kamba tupu kitambulisho hakuna. Kila alipoitazama

ile kamba ilionesha kuna kipande cha plastiki

kilikuwa kimevunjika na ndicho kinachoshikilia

kitambulisho.



"nimejikaanga mwenyewe na mpira unanigeukia

mimi kama wanacho kitambulisho, aah ku.....!"

aliishia kuwatukania mam zao wale watu kwa hasira

kisha akatoa simu yake iliyokuwa inaita kwa muda

huo.



"upo wapi mimi nipo eneo la ajali sasa?" Ilisikika

sauti ikilamika.



"John hapo kimenuka tayari na siwezi kutokea hapo,

kama vipi wewe vuka eneo hilo kama unaelekea Segera na

mimi nitapandisha huko barabarani nikifikia eneo

hilo ulilosimama" aliongea Norbert kisha akakata

simu halafu akaanza kukimbia kuelekea maporini ,

huku akichukua usawa barabara ya Lami hadi

alipohakikisha ameliacha eneo la ajali kwa umbali

mrefu. Hapo alianza kupandisha juu ilipo barabara

kwa mbio sana kutokana na mteremko, barabarani

aliiona gari aina ya toyota hiace nyeusi yenye vioo

vya giza ikiwa imeegeshwa pembezoni mwa

barabara. Alienda hadi ulipo mlango wa gari hiyo halafu

akaufungua kisha akaingia ndani.



"tuondoke haraka maana hapafai" aliamuamuru

dereva wa gari hiyo.



"Nor kuna nini mbona hivyo?" aliuliza yule dereva



"huu si muda wa maswali John tuondoke eneo hili na

tusifikie kwako Segera bali nyoosha Tanga moja

kwa moja" aliongea Norbert huku akitoa kitambaa

cha kufutia jasho. John aliweka gia kisha akanyaga

kikanyagio cha mwendo na kupelekea gari liondoke

kwa kasi eneo hilo, safari yao ilienda hadi walipofika

Segera jirani na makutano ya barabara iendayo

mkoa wa pwani na iendayo Tanga. Barabara ya

eneo hilo ilikuwa imewekwa kizuizi na magari yote

yalikuwa yakipekuliwa na ilionekana ilikuwa ni

msako mkali, gari alilokuwemo Norbert nalo

likapewa ishara ya kusimama na kupelekea John

apunguze mwendo kisha akakanyaga breki na

kusimamisha gari.CHANZO:  https://deusdeditmahunda.blogspot.com/



"jilaze kwenye kiti na utulie kwani hatujajua ni nani

anaetafutwa" John alimwambia Norbert baada ya

kusimamisha gari. Mbele ya gari lao kulikuwa na

Briton pamoja na baadhi ya maaskari wakiwa

wameshika picha kubwa ambayo haikuonekana

dhahiri, mmoja wa wale maaskari alisogea hadi

katika mlango wa dereva kisha akagonga kioo na

kupelekea John ashushe kioo chake nusu.



"vipi kuna tatizo koplo" John aliuliza na kupelekea

yule askari atoe saluti ya heshima huku akisema,

"mkuu tunapekua magari yote yanayopita hapa

kwani kuna mhalifu amepiga risasi matairi ya basi la

Luxury na kupelekea ajali ambayo imeua wengi, pia

amesababisha mmoja wa wanausalama apoteze

fahamu kwa kumpiga kisha akamjeruhi

mwanausalama mwingine ambaye ni yule pale".

John alipoyasikia maelezo hayo aliafiki kwa kichwa

kisha akauliza , "je una mashaka na mimi na

unataka kupekua gari yangu?"



"aah hapana mkuu unaweza ukaendelea na safari" alijibu

yule askari huku akiwa amenyooka kiheshima.



"hebu leta niiangalie hiyo picha ya huyo mhalifu"

John alimwambia yule askari na kupelekea askari

ampe picha ya mhalifu anaetafutwa.



"mmh si mwandishi wa habari huyu"



"ndiyo ni mwandishi wa habari na mhalifu

aliyesababisha ajali"



"mbona nimepishana akiwepakizwa kwenye pikipiki anaelekea Korogwe wakati

nakuja huku, inamaana hamjamuona na wenzenu

waliopo eneo la ajali hawana taarifa juu ya hili"



"bado hatujawapa taarifa mkuu"



"pumbavu nyinyi yaani mnaweka kizuizi sehemu

moja" aliongea John kisha akafungua mlango wa

gari huku akipandisha kioo. Askari wengine wa eneo

hilo walipomuona John

walitoa saluti huku wakisema "jambo afande".



"sihitaji jambo yenu hivi kwanini mnakuwa wazembe

namna hii hadi mnafikia hatua ya kuweka kizuizi

sehemu moja, mmeona sasa mhalifu keshakimbia.

Sasa nahitaji muwasiliane na wenzenu wa Same na

Korogwe wafunge barabara kwa kizuizi ili wamuwahi

na wamkamate tunaelewana?!" alifoka John kwa

hasira za maigizo.



"ndio afande" askri wote waliitikia

Hadi muda huo Briton alikuwa amesogea karibu na

eneo alilopo John huku akimsikiliza.



"Briton Massawe kutoka usalama wa taifa,

mwenzangu nani" Briton alimuuliza John ambaye

amevaa kiraia.



"Asp John kutoka kituo cha polisi cha mkwakwani"

alijibu John huku akielekea katika gari lake.



"nimekuja kuangalia utendaji wenu wa kazi hapa na

inaonekana ni wazembe sana, sasa ninaenda ofisini

nimeitwa mara moja na nikirudi nimkute" John

aliongea kwa hasira kisha mlango wa gari halafu

akaingia sehemu ya dereva, aliwasha gari kisha

akaondoka eneo hilo.



John Faustin ndiyo jina lake, ni askari polisi kutoka

Tanga na jasusi wa siri wa EASA aliyewekwa jijini

Tanga . Asp huyu wa polisi aliamua kuja katika moja

ya nyumba zake iliyopo Segera, akiwa ndani ya

nyumba yake hiyo ndipo Norbert alimpigia simu na

kumuomba amfuate Segera. Asp John alimfuata

Norbert na kumkomboa katika balaa hilo na sasa

yupo njiani akirudi jijini Tanga.



*******************************************************



Huku nyuma Briton alikuwa ameuma meno yake

kwa hasira kisha akaingia kwenye gari yake halafu

akafuata barabara iendayo Korogwe, aliendesha gari

kwa mwendo wa kas akiwa ana shauku ya kumpata

kwa kuwatumia polisi.



"mwandishi aliyejifunza ngumi ni cha mtoto tu kwa

polisi hawa" alijisemea huku mkono mmoja

ukichezea kitufe cha breki ya mkononi baada ya gari

kuonekana zito kwake.



Aliongeza mwendo hadi akafika mwendo wa kilomita mia

ishirini kwa saa ili awahi kufika, akiwa anakaribia

korogwe aliona kundi la maaskari likiwa limeweka

kizuizi njiani. Hapo alisimamisha gari na kupelekea

askari mmoja aje kwenye gari lake huku wengine

wanne wakiwa wapo nyuma yake, Briton alitoa

kitambulisho na kumuonesha askari huyo kisha

akamuuliza,"mkuu wenu yup wapi?"

CHANZO:  https://deusdeditmahunda.blogspot.com/

"ametoka sasa hivi na hakusema anaelekea wapi baada

ya kutuachia maagizo"alifafanua askari huyona

kupelekea Briton aingie kwenye gari kisha

akaliondoa kuelekea Korogwe, alialitumia dakika

chache akawa amefika kituo kikuu cha polisi

Korogwe. Alipofika kituoni hapo alipitiliza moja kwa

moja hadi ulipo mlango wa chumba cha mkuu wa

kituo akiwa amewapita maaskari waliopo eneo

la mapokezi maarufu kama kaunta, askari wa kituo

hicho ambao walikuwa mapokezi waliamua

waliamua wamfuate hadi hapo mlangoni kutokana

na dharau alioionesha.



"aloo wewe hata chooni kuna utaratibu ndiyo kituoni

napo pako hivyohivyo, ukija siku nyingine uje

kiadabu sio kukimbilia mlangoni kwa mkuu wa kituo

wakati sisi tupo hii ni dharau" aliongea mmoja wa

maaskari huku akiwa amekamata nguo ya Briton ili amvute

amtoa nje baada ya Briton kuwapita bila salamu.



"ni sheria gani inakuruhusu wewe kama askari

unikunje nguo yangu" Briton aliuliza huku akiwa

amekunja sura yake kwa ghadhabu.



"kimya wewe si usijifanye mjuaji hapa" aliongea

askari mwingine mwenye mwili mkubwa kwa lafudhi

ya kisambaa baada ya kumchapa kibao Briton.

Kibao hicho kilizua tafrani hapo baada ya Briton

kupandwa na hasira, aliwapa kipigo kikali maaskari

hadi huku akiwaambia "naona nidhamu yenu imefika

ukingoni sasa". Hadi muda huo alikuwa tayari

amemkamata askari aliyempiga kibao akimburuza

kumpeleka nje ya kituo huku akimwamuru yule

mwingine amfuate, alipofika nje alichuma bakora

kisha akawachapa kama watoto na kupelekea watu

wa kawaida wawe wengi eneo hilo.



"mkuu wa kituo yupo wapi?" aliwauliza



"ametoka kidogo, tusamehe baba " alijibu askari

aliyempiga huku akihema kwa nguvu kutokana na

kipigo alichokipata. Hadi mkuu wa kituo anawasili

kituoni hapo aliwakuta askari wake wamechafuka

nguo zao huku wakiwa wameweka miguu ukutani

kisha mikono wamepiga ngumi ardhini.



"kuna nini hapa" aliuliza mkuu wa kituo kwa

mshangao



"waulize askari wako wasio na adabu wala heshima

watakujibu" Briton alijibu kwa dharau yenye

mchanganyiko wa hasira.



"wewe kama nani uwafanye hivi hawa askari?" mkuu

wa kituo aliuliza kwa jazba



"Briton kutoka usalama wa taifa" alijibu huku akitoa

kitambulisho na kupelekea jazba za mkuu huyo wa

kituo ziishe ghafla.



"sawa wasamehe tukaongee ofisini tuyamalize"

mkuu wa kituo aliongea kwa sauti ya upole tofauti na

awali na kupelekea Briton awaamrishe askari hao

warudi huku akiwa na hasira. Hakika hasira za

kupigwa na Norbeet hadi akavuja damu puani na hasira za

kumkosa ndizo zilizosababisha awaangushia

kichapo hao maaskari baada ya mmojawapo

kumpiga kibao.



"ndiyo mr Briton" aliongea mkuu wa kituo huku

akimkiribisha Briton kwenye kiti.



"sina muda wa kuketi kwa sasa nilitaka nijue

mlipofikia katika kumtafuta mhalifu aliyesababisha

ajali ya basi la Luxury" Briton aliongea akiwa

amesimama wima na mikono yake akiwa

ameifumbata kifuani mwake.

CHANZO:  https://deusdeditmahunda.blogspot.com/

"baada ya kupokea taarifa niliamuru kundi la

maaskri liende huko kuweka kizuizi huku kituoni

nikiwaacha wawili tu, hadi mimi nimetoka huko

kwenye kizuizi sasa hivi na hakuna dalili zozote za

kuonekana mtu huyo ingawa pikipiki zote pamoja na

magari yamepekuliwa kabla hayajafika korogwe

mjini" alifafanua mkuu wa kituo juu ya jambo hilo.





ITAENDELEA