BARUA KUTOKA JELA - 4

 

Simulizi : Barua Kutoka Jela

Sehemu Ya Nne (4)



CHANZO:  https://deusdeditmahunda.blogspot.com/

Eshe sasa alikuwa hajitambui kwa kilio, kwani alikuwa anagalagala chini kama mtoto mdogo!

Mwanae analilia huku na yeye analia kule, kukawa kati ya mama na mtoto hakuna wakumnyamazisha mwenzie, tafrani moja kwa moja!



Masudi alikuwa haamini macho yake kwa kitu kilichotokea, kwani rafiki yake ameshaachiliwa huru na mahakama,sasa anakamatwa tena kwa kosa gani?!



Eshe akajizoazoa pale chini akamwambia shemeji yake masudi;



“Shemeji kama simu yako ina pesa tafadhali naiomba ili nimpigie simu Inspekta Jamila.”



Masudi akampa simu yake iliyokuwa na pesa yakuweza kuongea, na Eshe akampigia simu Inspekta Jamila huku akiwa analia kwa kwikwi.



Inspekta Jamila aliipokea ile simu ,Eshe alijitambulisha kwake na kumpa tukio lililotokea muda mfupi uliopita.



majibu aliyoyapata kutoka kwa yule askari wa kike yalimshangaza. Kwani Inspekta Jamila alimjibu kwa mkato kwamba.



“MBWA HAFI MAJI, AKIUONA UFUKWE.” Kisha akamtaka aende ofisini kwake anamsubiri!







*******



Mwaduga Dingo alipelekwa kituo cha polisi cha kati, akaingizwa ndani huku akiwa ametaharuki kwa kiasi kikubwa, akiwa haamini na haelewi kipi kilichomsibu! Akawauliza wale askari waliomkamata.



“Mnanikamata kwa kosa lipi, wakati kesi mlionibambikizia, nimeshaachiwa huru?!”



Wale askari wakamwambia.



“Hapa hatuna shitaka na wewe, ila tumetumwa tukukamate na sisi tumetekeleza amri, hivyo subiri mpaka tupate maelekezo mengine!”



Mwaduga alichoka choko kwa kauli ile ya wale wana usalama, alichofanya ni kumuachia mungu, akapiga moyo konde akangoja kitakachotokea ili akabiliane nacho.



Dakika ishirini baadae aliingia Afande Kubuta nakumchukua Mwaduga.

Kitu kilichompa tofauti Mwaduga, ni kwamba askari huyu alimtesa sana siku alipokuwa anamuhoji ili amtajie wahalifu aliodhaniwa kuwa ni wenzie, ila sasa anamchukua kama rafiki yake!



Alitoka nae nje ya kituo kisha akapandishwa ndani ya gari ileile iliyokwenda kumchukua Dokta Masawe, Toyota Soluna yenye vioo vya kiza.{Tinted}



Huku akiwa anapulizwa na kiyoyozi ndani ya gari ile, Mwaduga alipelekwa ofisini kwa Inspekta Jamila, bila ya kufungwa pingu mikononi!



Alipofika katika ofisi ile Mwaduga alishangaa kumkuta mkewe na mtoto wake, rafiki yake Masudi na mkewe wakiwa na Inspekta Jamila wote kwa pamoja wakiwa wanapata vinywaji vya soda huku nyuso zao zikiwa zimekunjuka, zenye bashasha na tabasamu tele!



Na bila yakujifahamu, Mwaduga nae alijikuta akitabasamu.



“Pole sana Mwaduga, Karibu tena uraiani na sahau yaliyopita kwani, yaliyopita si ndwele, tugange yaliyopo, na yajayo.”



Maneno hayo alikuwa anayasema Afande Kubuta, huku akimfungulia soda Mwaduga!

CHANZO:  https://deusdeditmahunda.blogspot.com/

Kitendo kile kilikuwa kimepangwa na Inspekta Jamila ili Mwaduga asiweke chuki kwa Afande Kubuta katika yale yaliotokea siku za nyuma.



Mwaduga alitingisha kichwa kwa kukubali yale anayoambiwa huku akiipokea chupa yenye soda akasema;



“Kidonda kinapopona, lisalialo ni kovu

Kila unapoliona, ijapo liwe chakavu

Kumbukumbu huja tena, hata kama yakivivu

Yoye nimeyasamehe, ila sitoyasahau!”



Mwaduga aliposema maneno haya akamkumbatia Afande Kubuta, kisha akamkumbatia Inspekta Jamila, alipomkumbatia mkewe na mwanae, machozi ya furaha, yakachukua nafasi yake.



Mwisho akamkumbatia Masudi na mkewe, wote kwa pamoja akawaambia.



“Ndugu zangu nashukuru, kwa kuwa nasi pamoja

Kwani mlijikusuru, mkaacha yenye tija

Atawalipa ghafuru, moja kwa kumi na moja

Sina kubwa la kuwapa, zaidi ya shukurani.”



Alipokwisha kuwashukuru wote kwa pamoja akambeba mwanae akakaa nae kitini, na Inspekta Jamila akamwambia Mwaduga.



“Kwanza pole kwa kizaazaa ulichokipata leo mahakamani, ila halikuwa jambo la bahati mbaya hata kidogo, bali ni mpango wetu jeshi la polisi kwa sababu ya usalama wako ilibidi tufanye vile! Kwani tuna hakika kuwa vyombo vya habari vingetangaza kuwa umeachiwa huru, ni dhahiri maisha yako yangekuwa katika hatihati, kwani wale majambazi wangesikia au kuona kupitia vyombo hivyo wangefanya Ima fa ima wakahakikisha wanakudhuru, au kukuondosha duniani ili usije kuwatambua, ikitokezea kuitwa kufanya hivyo!

Kwani kutoka sasa vyombo vya habari bila shaka vitatangaza kwamba umechiwa huru na kukamatwa tena!

Ingawa najua kwamba utajiuliza kuwa si bado watu watakuona ukiwa nyumbani kwako na labda kazini kwako pale Kituo cha Taxi cha magomeni usalama?!

Hilo tumejipanga nalo na tutakupa mikakati nini cha kufanya, pia wapo watu ambao tutataka uwatambue na baada ya hapo utaambiwa kitakachoendelea.”



Inspekta Jamila akawageukia Masudi na mkewe, nao akawapa mikakati, mambo ya kuzingatia kwa kipindi hiki.

Baada ya hapo Masudi na mkewe wakaaga na kuondoka wakimuacha Mwaduga na Familia yake na wale askari wawili.



Huku nyuma Mwaduga alipewa mikakati ya jeshi la polisi linavyotaka afanye katika kipindi hiki.



Inspekta Jamila alizitoa zile picha alizokuwa amezichukua kwa njia ya video pale Friends Coner Hotel akaziweka mbele ya macho ya mwaduga Dingo, kisha akamwambia.



“Kuna yeyote unaemtambua katika picha hizi?”



Mwaduga alizitazama zile picha kwa makini, na wakati huohuo Inspekta Jamila na Afande Kubuta, wao walikuwa wakimtazama usoni Mwaduga.



“Hapa nawakumbuka hawa jamaa wawili.”



Mwaduga alisema vile huku, akionyeshea kidole zile picha alizozikumbuka.



“Unawakumbukaje hawa jamaa, uliwahi kukutana nao wapi?”



Afande Kubuta alimtupia swali la haraka Mwaduga.



“Hawa jamaa, hakika ndiyo walionikodi siku ile kule Sinza, na huyu bwana huyu, ndiyo alienambia kuwa wanazo elfu tatu, niwapeleke kwa Macheni. Tena huyu bwana anaongea kwa kithethe huyu.”



Mwaduga kama mtu aliepagawa, alikuwa ana hasira na wale watu kwelikweli.



“Na huyo mwengine?”



Afande Kubuta alimrudisha Mwaduga katika utambuzi, kwani tayari alikuwa keshapandwa na hasira.



“Huyu mwingine, alikuwa amepanda nyuma namkumbuka pia, tena huyu jamaa mwepesi kweli, kwani ndiye alieshuka mwanzo pale kwa macheni. Huku gari ikiwa bado haijasimama sawasawa!”



Mwaduga Dingo alikuwa anaichambua picha ya Jeradi Mwaipopo.



Baada ya utambuzi ule, Mwaduga Dingo pamoja na familia yake, walihamishiwa nje ya mji kwa muda, mpaka itakavyoamriwa vinginevyo, huku gharama za chakula, malazi na matibabu ikibidi, jeshi la polisi limechukua jukumu hilo!



*******



Siku ya Alhamisi saa nne ya asubuhi, ofisini kwa “IGP” kulikuwa na kikao cha dharula kujadili namna kesi ile ilipofikia, na inavyo endelea.



Miongoni mwa waliokuwemo katika kikao kile ni “IGP” mwenyewe, Kamanda wa kanda maalum, Kamanda wa mkoa wa kipolisi wa kinondoni, Mkurugenzi wa makosa ya jinai nchini “DCI”, Inspekta Jamila na Afande Kubuta.



Kikao kile kilikaliwa kiasi ya saa nzima wakubwa wale walitoa uzoefu wao, kwa vijana wao ilimradi mambo yaende sawa.



Mikakati ikakamilika mipango ikawekwa ili ndani ya wiki moja waweze kumaliza swala lile ili washughulike na mambo mengine!



“IGP” alikifunga kikao kile huku akiwa na matumaini makubwa kwa jinsi vijana wake wanavyochapa kazi kwa mwendo kasi.



Ruhusa ilitolewa na kila mmoja akarudi katika eneo lake la kazi.



Inspekta Jamila akiwa na Afande Kubuta wakiwa ofisini kwao, mara aliingia Mke wa Dokta Masawe na akataka kuongea na Afande Kubuta.



Yule Mwanamke jeuri wa Kichaga, tofauti na siku alipokuwa nyumbani kwake, wakati Afande kubuta akiwa na maaskari wenzake walipokwenda kwa minajili yakumkamata Dokta Masawe, leo alikuwa mpole na mwenye heshima kubwa!



Afande Kubuta na Inspekta Jamila walitazamana kisha, Afande Kubuta akamkaribisha mwanamke yule.



Baada ya kuketi akamuuliza.



“Nikusaidie nini Mrs Masawe?”



Mke wa Dokta Masawe akasema.



“Aksante nimekaribia, nimepigiwa simu na Mume wangu akiwa kituo cha polisi cha kati, nakuniambia kwamba amekamatwa, hivyo akanielekeza mahali hapa kwenu ili tuje kuongea ili tuyamalize!”



Maaskari wale wawili wakatazamana tena na safari hii akajibu Inspekta Jamila.



“Ndiyo mumeo amekamatwa jana kwa makosa ya mauaji, na kula njama kwa kushirikiana na majambazi katika kufanya uhalifu nchini, hivyo tumemkamata na baada ya kumuhoji mumeo amekili shutuma hizo, hivyo ni kweli yupo kituo cha kati, baada ya kuwatia mbaloni washirika wenzake, itabidi wakasimame mahakamani, kujibu mashitaka.”



Mke wa Dokta Masawe katika kitu alichosisitiziwa na mumewe, katika simu aliyoomba kwa askari pale kituoni, na akiongea katika lugha ya kichaga pekee ni kwamba,

Swala lile ahakikishe linaishia polisi, kwani kwa ushahidi uliopo akipanda mahakamani, hanusuriki na kifungo cha maisha, au kunyongwa kabisa hadi kufa!



Mke wa Dokta Masawe kwa majibu aliyoyapata kutoka kwa yule Askari wa kike yalimtisha na kumkatisha tamaa sana, hivyo akawaambia askari wale.



“Ndugu zangu naomba msaada wenu, yaliyotokea ndiyo yashatokea, hivyo nipo tayari kujisaidia naomba na nyie mnisaidie!”



Kwa mara ya tatu askari wale walitazamana katika siku ile, ikiwa kama hawaelewi alichokikusudia mke wa Dokta Masawe, wote kwa kauli moja wakasema.



“Tukusaidieje?!”



Na mke wa Dokta Masawe akasema huku akifungua mkoba wake.



“Nimekuja na Milioni mbili, naomba mchukue ili mnisaidie kulimaliza jambo hili likiwa polisi. Baada ya mume wangu kutoka tutawapa pesa nyingine!”



Mke wa Dokta Masawe alisema maneno yale na kutoa bulungutu la Fedha akaliweka juu ya meza ile, huku akiwatizama wale maaskari usoni mmoja baada ya mwingine.



Kilichotokea Mke wa Dokta Masawe hakukitegemea kabisa katika mawazo yake kama kingeweza kutokea!



Inspekta Jamila aliangaliwa na Afande Kubuta usoni, na Inspekta Jamila akakilaza kichwa chake kidogo pembeni ikiwa ni ishara ya kuruhusu jambo fulani kutendeka, hivyo kufumba na kufumbua Mke wa Dokta Masawe alikuwa ana Pingu mikononi mwake, huku Afande Kubuta akimwambia.

CHANZO:  https://deusdeditmahunda.blogspot.com/

“Nakufungulia shitaka la kutoa Rushwa, ili kutaka kupindisha sheria huku ukiwa unafahamu kuwa ni kosa la Jinai katika Serikali ya jamuhuri ya muungano wa Tanzania!”



“Ama kwa hakika huu ni mtego wa panya.”



Inspekta Jamila alijisemea kimoyomoyo huku akiihakiki kama simu yake yenye Video Camera kama ilikuwa inafanya kazi yake sawasawa, na akathibitisha kuwa kweli alichokuwa akikirecodi kimeingia barabara.



Mke wa Dokta Masawe alipokuja kutanabahi, alikuwa yumo ndani ya gari ya polisi akiwa na pingu mikononi, akipelekwa kituo cha Polisi cha Daraja la Salenda akawekwe Rumande.



Inspekta Jamila na Afande Kubuta walikuwa hawana Msalie mtume, katika kufanya kazi yao.



*******

-.



*******

Kijana mrefu wa wastani aliejengeka kimazoezi, mweye misuli imara iliyotokeza anapotembea.

Alikuwa pahala ambapo mwenyewe hupendelea kupaita Chimbo, akimaanisha ni sehemu iliyojificha.

Alikuwa yupo katika himaya yake kule maeneo ya Vingunguti nyuma ya kiwanda cha kutengeneza kandambili cha Fida Hussein, akiwa anatafakari namna alivyowaacha wale maaskari kule maeneo ya Tabata Baracuda.



Alijipongeza kwa kitendo chake cha kuchelewa kufika katika eneo alilopanga kukutana na Dokta Masawe kwa dakika takribani kumi tu, lau kama angewahi kufika kama kawaida yake anapokuwa na ahadi na mtu, pengine siku ile angekuwa “Amelosti” (angekamatwa) kama watu wa Jamii yake wanavyopenda kulitamka neno lile!

Lakini kilichokuwa kinamuumiza kichwa zaidi ni pale kila anapoipiga simu ya Dokta Masawe, ilikuwa haipatikani kitu ambacho kilimtia mashaka zaidi.



Kupitia simu maalum ya Dokta Masawe ilikuwa haikosekani kwa siku zote zinazokwenda kwa Mungu.



Lakini leo nayo kila anapoipigia simu ile, ikawa pia haipatikani!



Akafikiri mambo mengi, yakiingia na kutoka, mara akasikia simu yake ikiita,na alipoitazama namba ya mpigaji alipatwa na kihoro, na wahka wa hali ya juu sana.



Akaipokea simu ile, ilikuwa ni simu ya Dokta Masawe!



Kwa sauti ya kunong’ona, Dokta Masawe alisema.

“Haloo JM, njoo ‘faster’ tukutane pale bar ya Y2K Buguruni ili tufanye mpango wa kuondoka leo hii hii, kabla ya kesho!”



Jm akamuuliza kwa makini Dokta Masawe.



“Nije ‘faster’, au nisije?!”



Dokta Masawe akasisitiza.



“Njoo faster bwana, fanya faster!”



Na Jeradi Mwaipopo au kwa kifupi JM, alijibu kwa maneno yasiyozidi matatu kisha akakata simu, alijibu;



“Itabidi iwe hivyo!”



Jeradi Mwaipopo baada ya kukata simu, alitingisha kichwa kwa masikitiko kisha akachomoa Bastola yake na kuibusu, na alipofanya kitendo kile macho yake yalikuwa yamemuiva kwa huzuni, na sekunde chache baadae machozi yalianza kumlengalenga!



Ama ukiona mtu mzima analia, basi ujue kuna jambo ni kweli.



Jeradi Mwaipopo ingawa aliambiwa maneno yale na alietokea kuwa Swahiba wake mpenzi, kwa siku za hivi karibuni Dokta Masawe, alipatwa na simanzi siyo kwa maneno yale laa hasha!



Bali kwa wito wa Dokta Masawe anapomtaka aende faster!







“Ama kwa yakini mimi sipajui, anapokaa Mwaipopo, ila kama mnataka apatikane, nipeni simu yangu ili nimpigie, kwangu yule kama pipa na mfuniko vile, atakuja tu kama Ng’ombe na zizi lake vile kisha nanyi mtamkamata!”



Wale askari wawili wakaona lile ni wazo lililokwenda shule, na bila ajizi Inspekta Jamila akawasha simu ya Dokta Masawe aliyokuwa nayo katika droo za ofisi yake, kisha akaitafuta namba ya Mwaipopo na kuipiga na baada ya sekunde chache simu ile ikawa inaita akaiweka katika ‘Loud speker’, ndipo alipompa Dokta Masawe ili amvute Jerdi Mwaipopo.



Na Dokta Masawe hakufanya makosa, akaenda hewani na kumtaka JM aende pale Y2K Bar Buguruni.



Hiyo ikiwa ni saa nne asubuhi siku ya Ijumaa.



Wingu zito jeusi lilitanda angani, kuashiria mvua inaweza kunyesha muda si mrefu.



Maafande wale walishauriana namna ya mtego wao jinsi utakavyokuwa, wakajipanga nani ake wapi, na afanye nini.



kisha akapakiwa Dokta Masawe, ndani ya gari ya polisi yenye namba za kiraia, isiyoonyesha vioo vyake kwa mtu alie nje kumuona wa ndani, bali wa ndani anaweza kumsanifu mtu wa nje kwa namna anavyotaka!



Safari ya kwenda Buguruni Y2K, ikaanza bila kuchelewa, kwani chelewa chelewa, utamkuta mwana si wako!



Inspekta Jamila, Afande Kubuta na Dokta Masawe, walikuwa ndani ya gari moja, na nyuma ya gari yao, kama gari ya tatu hivi kutoka katika gari yao, kulikuwa kuna gari nyingine ikiwafata!



Walitoka katika jengo la Wizara ya mambo ya ndani, wakachukua mtaa wa Azikiwe hadi Sokoine Drive wakapinda kulia, na kuendelea hadi yalipokutana maungio ya Mtaa wa Sokoine Drive na Barabara ya Uhuru, wakakata kulia kushika njia ya Barabara ya Uhuru waliyonyoosha nayo moja kwa moja hadi Buguruni, na kabla ya kituo cha mafuta cha Buguruni wakapinda kulia, na baada ya mwendo kidogo, wakawa katika Baa ya Y2K Buguruni, na kila mmoja akachukua nafasi yake, kama walivyokubaliana.



Katika kiti cha peke yake pale nje, Dokta Masawe aliletewa Bia aina ya Ndovu akapewa ajiburudishe nayo.



jamaa watatu waliokuwa wanaifatilia kwa nyuma gari aliyopandiswa Dokta Masawe, walishuka pale pia na moja kwa moja wakaenda katika meza ya mchezo wa Pool, wakawa wanajiburudisha kwa mchezo ule, wakiwa hawapo mbali sana na meza aliyokaa Dokta Masawe!



Afande Kubuta alikaa upande wa kaskazini, akiangalia upande wa kusini, walipotokea na gari yao.



Inspekta Jamila hakuwepo kabisa katika Baa ile ingawa alikuja pamoja wakiwa katika gari moja na Dokta masawe na Afande Kubuta, kwani kukaa pale kungeweza kuharibu mtego wao, kwa kuwa Jeradi Mwaipopo, alishamuona na anamfahamu!



*******



Jeradi Mwaipopo baada kuongea na simu ya Dokta Masawe, aliingia chumbani kwake huku bastola yake akiwa sasa ameichomeka kiunoni kwakwe, alitumia kiasi ya dakika ishirini hivi mle ndani, kisha akatoka huku akiwa anatabasamu!



Aliziendea Taxi zinazoegesha pale kiwandani kwa Fida Hussein akapanda katika gari moja iliyo makini, na kumwambia Dereva wa Taxi.



“Nipeleke Buguruni Sheli haraka iwezekanavyo”.



Yule dereva wa taxi, hakutaka kupatana, aliwasha gari na safari ya Buguruni ikaanza.



Na walipofika Pale Buguruni Sheli, JM akamlipa pesa zake dereva yule na wakaagana.

Akaanza kupiga hatua kuelekea katika Baa ya Y2K pale Buguruni.



Watu wachache waliokuwa katika Baa ile kulipafanya eneo lile kuwe na utulivu wa namna yake, Afande Kubuta akiwa na chupa yake ya soda ya Coca Cola, alikuwa ametulia kimya akinywa funda mojamoja, huku akiwa hana raha hata kidogo.



kwani muda unakwenda na Mwaipopo hakuwa na dalili kama angetokea!



Huku akiwa makini na kila anaeingia na kutoka katika Baa ile. Mara alimuona mzee mmoja mwenye kibyongo alievaa kanzu iliyochakaa na kofia chakavu miguuni mwake akiwa amevaa viatu vya kubazi,akiwa anaombaomba pesa.



Afande Kubuta akakumbuka kumbe leo ni siku ya Ijumaa, hivyo akayaondosha macho na mawazo yake kwa yule mzee masikini wa kutupwa. Nakuendelea kuangalia watu ambao anaweza kumuona mtu anaemuhitaji.



Muda ukawa unakatika dalili za kumuona Mwaipopo zilikuwa finyu sana.



Yule mzee ombaomba alikuwa katika meza ya Dokta Masawe, akiendelea kuombaomba kwa watu waliokuwa katika eneo lile.



Dokta Masawe alitazamana na yule mzee uso kwa uso na kisha yule mzee akaelekea uani kwenye Baa ile, akashika njia inayokwenda msalani.

CHANZO:  https://deusdeditmahunda.blogspot.com/

Dokta Masawe kwa ishara maalum aliyoelekezwa na Afande Kubuta akaifanya, na mara moja Afande Kubuta akang’amua kwamba Dokta Masawe anataka kwenda chooni, akanyanyuka pale alipo kisha akakaa!



Hiyo ilikuwa ni ishara kwamba imetolewa ruhusa ya Dokta Masawe aende msalani.



Dokta Masawe akainuka,

na kuelekea katika vyoo vya wanaume.



Huku nyuma yake akiwa na mtu aliekuwa anamsubiri nje ya mlango wa vyoo vile, akiwa anaongea na simu yake!



Nyuma nje ya choo kile, pia alikuwapo mtu mmoja akiwa na sigara yake mdomoni akichukua doria!

Kiasi eneo lile lilikuwa na ulinzi wa kutosha.



Kiasi cha kama dakika mbili hivi yule mzee ombaomba alitoka chooni mle akatoka nje ya Baa ile na kuondoka zake.



Zikapita kiasi ya Dakika tano Dokta Masawe alikuwa bado hajatoka chooni, yule askari aliekuwa akiongea na simu, akamgongea mlango atoke kwani muda umekwenda sana na wao hawakwenda kwenye Baa ile kwaajili ya kustarehe, bali walikuwa na kazi maalum,



Lakini hata alipoendelea kugonga na kugonga, hakupata jibu lolote kutoka kule chooni alikokuwa Dokta Masawe!

Akaamua kuusukuma ule mlango wa choo ili amtoe Dokta Masawe chooni mle akaendelee kuwa chambo kule nje, katika mtego wao wa kumnasa Jeradi Mwaipopo.



Yule askari aliusukuma mlango kwa nguvu na kuingia mle chooni, Hamadi?!



Hakuyaamini macho yake kwani alimkuta Dokta Masawe alikuwa amelala mle ndani chooni akiwa hana dalili za uhai, macho yamemtoka pima, huku damu zikiwa zinamvuja pembeni ya sikio lake!



“Shit” Yule askari alisema maneno hayo kisha akasonya na kutoka nje mbio huku akiwa hakuugusa popote mwili wa marehemu Dokta Masawe!



Afande Kubuta alipomuona yule askari ametoka mbio kule uani huku akiangaza huku na kule kwa fadhaa, yeye akakimbilia kule uani,akapitiliza hadi chooni nakumshuhudia Dokta Masawe akiwa sasa ameshabadilika jina kwa kuongezewa jina la Marehemu Dokta Masawe!



Afande Kubuta alipatwa na mshangao usiosemeka, kwani wamezidiwa maarifa ingawa hakuelewa ni nani aliefanya vile!



Dokta Masawe hakuwa na silaha hivyo isingekuwa rahisi kujiuwa! Kwa kuwa shimo lililokuwa linaonekana chini ya sikio la Dokta Masawe, au Marehemu Dokta Masawe, lilikuwa ni tundu la risasi!



Kitu kilichomuumiza kichwa zaidi ni kuwa, silaha iliyotumika katika mauaji yale haikusikika mlio, kwa hiyo ilikuwa imewekwa kiwambo chakuzuia sauti isitoke!



Jasho likamtoka Afande Kubuta nae akatoka nje kwa haraka na kumfata askari ambae alipewa jukumu la kumlinda Dokta Masawe akiwa chooni, nakutaka maelezo ya kina ya nani aliefanya mauaji yale, na namna yalivyotokea!



“Mimi kama mpango ulivyokuwa, nilimsindikiza hadi chooni huku nikiwa sionyeshi kama nipo nae, alipoingia chooni mimi nilibaki nje ya choo kile nikijifanya naongea na simu, huku macho na masikio yangu nikiyaelekeza katika kazi iliyonileta.

mara akatoka mzee mmoja ombaomba mle chooni, mimi nikaendelea kumsubiri Dokta Masawe nikaona muda unakwenda nikaanza kumuhimiza Dokta Masawe atoke ili tuendelee na zoezi letu, lakini hakunipatiliza kwa chochote, nikaamua kuusukuma mlango ambao kumbe ulikuwa haujafungwa.

Ndipo nilipomkuta Dokta Masawe katika hali ile, na mle chooni zaidi ya yule babu ombaomba, hakuwemo mtu mwingine!”



Yule askari aliekuwa na jukumu la kumlinda Dokta Masawe alikuwa anaeleza vile ilivyotokea.



Wale jamaa waliokuwa wanacheza Pool, mara moja wakaungana na Afande Kubuta, na wakapewa maelezo ya kumtafuta yule ombaomba maeneo yale haraka iwezekanavyo!



Na mara moja kazi ikaanza huku yeye na yule askari wakirudi tena kule chooni kufanya upekuzi, na katika kutafuta tafuta mle chooni wakiwa wamevaa “gloves” mikononi mwao, Afande Kubuta akaokota ganda la risasi iliyotumika kumuua Dokta Masawe.

Na alipoliangalia vyema lile ganda, Afande Kubuta akatingisha kichwa kwa masikitiko.



Afande Kubuta, alibaini kuwa silaha iliyotumika kumuua Dokta Masawe, kwa mujibu wa ganda lake la risasi, ndiyo silaha ileile iliyotumika siku moja nyuma kule maeneo ya Tabata Baracuda!

-



Mara moja akang”amua kwamba Jeradi Mwaipopo alikuwa pale muda si mrefu, huku akijibadilisha na kujifanya ni ombaomba!



Afande Kubuta, akakumbuka jinsi Yule mtu, aliemdhania kuwa ni ombaomba, alivyokwenda katika meza ya Dokta Masawe akijifanya kuomba hela, kumbe ilikuwa ni geresha kwani alipotoka tu na kwenda chooni, haikupita hata dakika mbili, na Dokta Masawe akainua mikono yake juu huku akivifunganisha vidole vyake kule juu, ikiwa ni ishara aliyopewa na yeye mwenyewe Afande Kubuta, ikiwa kama atabanwa na mkojo.



kufikia hapo akaamini kwamba kweli Geradi Mwaipopo au JM alikuwa ni askari mwenye mbinu za kujihami[MK]na mbinu za medani[MM].



Watu waliokuwa wanataka kwenda chooni kwa wakati ule, walizuiliwa kuingia chooni mle huku wakielezwa kuna mtu amekufa chooni mle!



Mara muda si mrefu Afande Kubuta alitoka nje na kumuacha askari mwenzake kushika doria ili kuhakikisha haingii mtu yeyote chooni mle.



Afande Kubuta haraka alikwenda pale walipoiegesha gari yao na Inspekta Jamila, alipofika pale sehemu walipokuwa wameegesha gari yao, akakuta papo peupe!



Siyo gari wala Inspekta Jamila aliekuwa katika eneo lile, na Afande Kubuta akashika kiuno kwa kuchoka na mambo yaliyokuwa yanamuumiza kichwa kwa siku ile.



Akatoa simu yake ya mkononi, na kumpigia Inspekta Jamila ili ajue alipo,lakini pia ampe kilichojiri.



kitendo kilichozidi kumchosha kwani simu yake ilimwambia;



“Namba unayoipigia haipatikani kwa sasa, tafadhali jaribu tena baadae.”



Afande Kubuta sasa akawa kama mtu aliepagawa vile, akaangalia maeneo yote ya jirani na Baa ile lakini mambo yalikuwa kama anavyoyaona, hakuna gari ya Inspekta Jamila, wala yeye mwenyewe! ikambidi akate shauri.



Mara akaona kundi la watu wanawake kwa wanaume, wakikimbia katika barabara ya Uhuru kuelekea upande wa kulia kule kwenye taa za kuongozea magari pale Buguruni sheli.



Afande Kubuta akiwa anatafakari, ukasikika mlio wa Risasi! Na sasa akaona watu wengi zaidi wakikimbilia kule kulikosikika mlio wa Risasi.





******



Inspekta Jamila akiwa ametulia ndani ya gari pale nje kwenye Baa ile ya Y2K pale Buguruni, alivutiwa sana na yule Ombaomba!



Kwani alipokwenda kwenye meza iliyokuwa na kinywaji cha Dokta Masawe, hakuonyesha mkono kama ishara ya kuomba pesa, aliyokuwa anaifanya katika meza za watu wengine!



Inspekta Jamila alimuona yule Ombaomba akimtazama kwa makini Dokta Masawe, na kisha kichwa cha yule Ombaomba kililazwa upande kidogo sana, kikielekeza upande wa uwani wa Baa ile!



Baada ya kufanya vile, yule Ombaomba akaelekea uwani mwa Baa ile, na katika muda usiozidi dakika mbili Dokta Masawe alifanya ishara iliyoashiria kwamba anataka kwenda chooni.

Inspekta Jamila moyo ulimripuka Ripu na damu yake ikaanza kuchemka! Huku mapigo ya moyo yakiongeza kasi katika mapigo yake!



Inspekta Jamila akiwa mle ndani ya gari alimshuhudia Afande Kubuta, akimruhusu Dokta Masawe aende chooni. Na Dokta Masawe akaelekea uwani mwa Baa ile ambapo vyoo vyake ndipo vilipokuwa.



Inspekta Jamila akaongeza umakini mara dufu, na hapo akamuona Afande Michael Chazza aliekuwa ameshika mti maalum wa kuchezea mchezo wa pool Table, akiuweka ule mti pale juu ya meza na kuelekea uwani sanjari na Dokta Masawe.

Na baada ya kama dakika nne hivi, Inspekta Jamila alimuona yule Ombaomba akitoka na kuondoka zake eneo lile akiifata ile barabara ya Uhuru kwa mwendo wa haraka kidogo.



Inspekta Jamila alimshuhudia yule Ombaomba akiipita gari aliyokuwemo yeye mle ndani, na aliporudisha macho yake kule kwenye Baa ya Y2K Dokta Masawe alikuwa bado hajarudi katika meza yake!



Kitendo bila kuchelewa, Inspekta Jamila aliwasha gari nakumfatilia yule Ombaomba kwa mwendo wa taratibu.



yule Ombaomba alikuwa ameshachanganya mwendo, na sasa alikuwa ameshaikaribia ile barabara ya Uhuru, akageuka nyuma kutazama kule kwenye Baa ya Y2K, huku akiwa anatembea kwa mwendo wa haraka, akaiona gari ndogo yenye vioo vya kiza ikija taratibu.



Hamadi! Yule ombaomba akagongana na Dada mmoja hivi aliekuwa anaelekea kule wenye bar ya Y2K.



Yule Ombaomba akakutanisha viganja vyake vya mikono kifuani kwake, na kuinama kidogo kama ishara yakumtaka radhi yule dada aliegongana nae. Lakini yule dada badala yakupokea samahani ile, alitoa msonyo mrefu kisha akashika Hamsini zake.



yule Ombaomba akapinda kulia kuelekea Buguruni Sheli.



Inspekta Jamila alipofika pale kwenye barabara ya Uhuru alisimama na kumfatilia kwa macho yule Ombaomba aliekuwa anazidisha hatua.



Inspekta Jamila akaiingiza gari katika barabara ya Uhuru akapinda kulia katika ile barabara inayoelekea Buguruni Sheli, huku macho yake yakiwa hayampotezi yule Ombaomba.



Yule Ombaomba alikuwa nae akiitazama ile gari ya Inspekta Jamila kwa makini na kituo, ambayo sasa alikuwa nayo sanjari yeye akiwa upande wa kulia katika njia ya watembea kwa miguu, na ile gari ikiwa upande wa kushoto katika njia ya gari kwenye ile barabara ya Uhuru.



Yule Ombaomba mara akasimama ghafla na kuingia katika duka moja la kuuza Vipuri vya magari, lakini pia akitaka kuthibitisha kwamba ile gari ilikuwa inamfata yeye au ilikuwa na safari zake!

CHANZO:  https://deusdeditmahunda.blogspot.com/

Akiwa pale dukani aliishuhudia ile gari ikiegeshwa pembeni, na hata baada ya kuegeshwa kulikuwa hakuna mtu alietelemka kutoka katika gari ile, wala aliepanda!



Yule Ombaomba akiwa anabawabu muelekeo, mara akaja Bwana mmoja akiwa na pikipiki aina ya Honda 750 GL, akashuka na kutaka kuingia dukani mle.



kilifanywa kitendo ambacho hata Inspekta Jamila hakukitarajia kama kingeweza kufanyika, tena kwa wepesi wa ajabu namna ile!



Yule Ombaomba aliingiza mikono mifukoni mwake, alipoitoa mikono ile ilikuwa imekamata bastola iliyofungwa kiwambo cha kuzuia sauti, na kuifanya bastola ile ionekane ndefu kiasi!



Akamnyooshea bastola ile yule bwana aliekuja na pikipiki, huku akimtaka ampe funguo za pikipiki ile bila ya kuchelewa, na yule bwana aliekuja na pikipiki huku akigwaya kwa kitendo cha kuonyeshewa silaha ya moto namna ile, alimrushia zile funguo yule Ombaomba ambae kwake yule bwana mwenye ile pikipiki alimuona kama mtu mzima aliechanganyikiwa, Lakini pia dhalili na masikini wa kutupwa!



Yule Ombaomba alizidaka zile funguo na kuirukia ile pikipiki iliyokuwa inaangalia mjini, akaipiga stati na ile pikipiki bila hiyana, ikawaka ikisubiri safari!



Yule Ombaomba bila kufanya ajizi, kitendo bila kuchelewa akaigeuza kwa kupiga msele pikipiki ile. ikawa inatazama Buguruni Sheli!



Kila mtu ambae ameiona ile pikipiki ilipogeuzwa angeamini kuwa ni pikipiki yake yule mzee namna alivyoimiliki.



Aliingiza barabarani kiufundi katika barabara ile ya Uhuru akawa anatembelea barabara inayoruhusu kupita magari yanayotoka buguruni kwenda mjini! yaani alikuwa anatembelea barabara “NO ENTRY”



Bahati njema kwake ni kwamba, kulikuwa hakuna magari yanayokuja upande ule kwani taa za pale katika makutano ya barabara ya Uhuru na Mandela ilikuwa imeziruhusu gari kutoka Ilala kwenda Tabata, na usawa wa Tazara na hakukuwa na gari ilyokuwa inakata kuelekea Ilala.



Inspekta Jamila alipoona kitendo kile nae akaiingiza gari barabarani katika mwendo uliowaacha hoi watu wote walioiona namna gari ile ikichimba huku ikitoa mlio wa tairi zilizokuwa zikisuguana na barabara, na kusababisha vumbi kubwa sana sehemu ile.



Ikawa sasa upande wa kulia kulikuwa na pikipiki aina ya Honda 750 GL, na upande wa kushoto kulikuwa na gari aina ya Toyota Soluna XL zote kwa pamoja zikiiwahi sehemu ya maungio ya barabara ile pale kwenye kituo cha mafuta pale Buguruni.



Pikipiki iliongwezwa mwendo kwa mkono, na gari iliongezwa mwendo kwa mguu!

Kiasi kulikuwa hapatoshi eneo lile la Buguruni, kwani watu waliokuwa wanatokea Buguruni upande wa sokoni, na wale waliokuwa wanatokea upande wa Buguruni chama na kwa Mnyamani na kule upande wa sheli wote walikuwa wanakimbilia upande ule kulipotokea kizazaa cha pikipiki kelele zake lilipogeuzwa uelekeo, na kule kulipotokea kelele za gari alilokuwa anaendesha Inspekta Jamila.



Kwa kweli ilikuwa ni hatari tupu kukimbilia jambo kama lile.



Pikipiki ndiyo iliyowahi kufika katika maungio yale ikaingia, huku Inspekta Jamila akiwa amezuiliwa na gari iliyokuwa ikisuasua mbele yake, akaipita gari ile mkweche aina ya Datsun Nissan Old Model yakubebea mizigo, na sasa akawa yeye nyuma ya Pikipiki iliyokuwa imeibiwa na yule Ombaomba wa ajabu!

Mara Inspekta Jamila akamshuhudia yule Ombaomba akigeuza uso wake kumtazama, huku mkono wake wa kushoto ukiwa na bastola iliyofungwa kiwambo cha kuzuia sauti isisikike {Silence} akimnyooshea pale upande wake usawa wa dereva.



Mara akaona kidole kikigusa kile kifyatulio cha risasi {Trigger}

-



Inspekta Jamila kitendo bila kuchelewa aliipeleka gari upande mwingine wa barabara ile kule kwa watembea kwa miguu ‘Service Road’ kwa haraka huku akibonyea mle ndani ya gari na kukanyaga Breki.



Na wakati huohuo ikasikika mlio wa kuvunjika kioo cha gari iliyokuwa inasuasua iliyokuwa nyuma yake! na vipande vidogovidogo vikimwagika chini kwa kuwa chenga tupu!



yule Ombaomba alirusha risasi,aliyokuwa amemkusudia Inspekta Jamila, ila kwa kitendo cha yeye kukata kona ya ghafla na kutoka barabarani, risasi ile ikaipiga ile gari mkweche kwa bahati mbaya.



Gari aliyokuwa anaendesha Inspekta Jamila ilikipanda kikuta cha barabara ya watembea kwa miguu, huku ikiwa inasota kwa sababu ya Breki za ghafla alizokanyaga, na gari iliposimama akafungua mlango haraka na kutoa bastola mgongoni mwake usawa wa kiuno.



Huku mlango ule ukiwa umefunguliwa akaipitisha mikono yake katika uwazi wa mlango pale baina ya Flem ya mlango ule na mlango wenyewe, huku akiwa ameushusha mguu mmoja nje, na kuuacha mguu wake wa kushoto ndani ya gari ile, mikono yake miwili iliyoshika bastola ya kipolisi aina ya Rivolver akalenga shabaha kwa tabu kumlenga yule Ombaomba aliekuwa anakaribia kabisa kuingia katika barabara ile ya Mandela na kufyatua risasi moja.



Mlio wa risasi ya silaha ya Inspekta Jamila ulisikika sehemu kubwa kwani bastola yake ilikuwa haina kiwambo cha kuzuia sauti.



Yule Ombaomba ilimkosa risasi ile sentimita chache na ikaenda kupiga katika chuma cha ngao ya gari ya mizigo iliyokuwa inaelekea Ubungo na kutoa cheche za moto!



Kwa ustadi mkubwa yule Ombaomba akaanza kuiendesha pikipiki ile katika mtindo wa Zigzaga na kuingia katika barabara ya Mandela, akakata kushoto kuelekea Tazara, na kumuacha Inspekta Jamila katika mataa ya Barabara ya Mandela na Uhuru!



Inspekta Jamila sasa akiwa ameshuka chini nje ya gari, alilipiga teke tairi la gari kwa hasira! Huku akilaani msongamano wa watu na magari uliyokuwa katika eneo lile, kwani ndiyo uliomfanya asiendelee kurusha risasi nyingine akihofia kuuwa au kujeruhi raia wasiokuwa na hatia, lau kungelikuwa hakuna msongamano wa watu angeliendelea kumrushia risasi yule Zabania mpaka angemdondosha chini!



Inspekta Jamila akakumbuka kwa kina Afande Kubuta, na akafikiri kuwa kwa vyovyote vile, kutakuwa kumetokea Zahma kubwa, kwani yule ombaomba alikuwa ni mtu hatari kuliko anavyoonekana!



Inspekta Jamila akaingiza mkono wake mfukoni mwa suruali yake aina ya Kadeti na kutoa simu ili ampigie Afande Kubuta kumwambia kilichoendelea, akaiona simu yake imezimika!



“Shit jana sikuichaji simu, kwani umeme ulikatika na kurudi asubuhi.”



Inspector Jamila alijisemea kimoyomoyo baada ya kugundua kuwa simu yake imezimika kwa kukosa chaji ya kutosha.



Alijaribu kuiwasha na simu ikawa kama haikubonyezwa kitufe chochote, unaweza kuifananisha na ‘Toy!’ akakata shauri kurudi kule alipowaacha askari wenzake wakiwa na mualifu wao Dokta Masawe ili akajue kilichotokea.



Inspekta Jamila akaingia ndani ya ile gari, na kabla hajaufunga mlango wa gari ile, alisikia sauti ya chuma aliyokuwa ameizoea masikioni mwake.



Ilikuwa ni sauti ya chuma cha Bunduki aina ya SMG ‘Sub Mashene Gun’ ikikokiwa katika harakati za kupeleka risasi chemba tayari kwa kufyatuliwa wakati wowote!



Na namna kilivyolia chuma kile, wakati silaha ile ilipokuwa inavuta risasi, akatambua kuwa silaha iliyokokiwa, imekokiwa katika mfumo wa kutoa risasi mfululizo {Basta / Rapid}na sio ule mfumo wa kutoa risasi mojamoja ‘Single Systim’ na mara akasikia sauti ya mtu ikimwambia



“Upo chini ya ulinzi,shuka chini na usalimishe silaha yako!”



Inspekta Jamila akashuka kutoka katika ile gari huku akitii amri ile kwa kuiweka chini silaha yake.



Aliposhuka chini akawaona askari polisi wawili, waliokuwa wapo katika sare zao za jeshi la polisi.



Askari mmoja akiwa ameshika Bunduki aina ya SMG, na askari wa pili alikuwa amekamata simu ya upepo ‘Radio call’.



Eneo lile lililotokea kizaazaa, walikuwa wamejaa watu wengi sana.

Yaani lilikuwa jambo la hatari sana sehemu iliyolia Bunduki watu badala ya kukimbia, kinyume chake wao wanakimbilia! Wakiwa hawawazi kwamba risasi inaweza kumkosa mlengwa ikampata raia asiekuwa na hatia, kwa sababu ya kiherehere na kimbelembele kilichowajaa!



Ama kweli jambo usilo lijuwa ni kama usiku wa kiza!



“Afande mimi ni askari, nilikuwa napambana na Jambazi”



Inspekta Jamila alikuwa anajitambulisha kwa wale askari, huku akiwaangalia usoni moja kwa moja.



“Wewe ni askari kutoka katika kituo gani”

Yule askari alieshika “Radio Call” alimuuliza Inspekta Jamila.



Kabla Inspekta Jamila hajajibu swali lile, Afande kubuta alitokea na alikuwa anawatambua askari wale!



“Afande Majuto huyu ni askari mwenzetu, mwenye cheo cha Inspekta, anaitwa Inspekta Jamila, kutoka makao kakuu.”



Afande Kubuta aliyasema maneno yale huku akiiokota ile silaha ya Inspekta Jamila pale chini, iliyokuwa imesalimishwa na kumkabidhi Inspekta Jamila.

CHANZO:  https://deusdeditmahunda.blogspot.com/

Wale askari wawili wakakakamaa na kutoa heshima ya utii kwa Inspekta Jamila.



Inspekta Jamila alipokea heshima ile kwa moyo mkunjufu, kutoka kwa wale askari waliokuwa katika ulinzi wa kawaida wa jeshi la polisi, katika kila kwenye makutano ya barabara kubwa na kwenye taa za kuongozea magari.



“Vipi Dokta Masawe ana hali gani huko aliko, kwani yule Ombaomba ni zaidi ya Jamba……”



“Yule ni Gaidi mkubwa!”



Afande kubuta alimkatisha kauli Inspekta Jamila, aliekuwa anataka kujuwa kilichotokea kule nyuma alipowaacha na kutaka kumuelezea yule Ombaomba.



“Yule ni Jeradi Mwaipopo au Gaidi, na Dokta Masawe hivi tunavyozungumza ni marehemu!”



Maneno ya Afande Kubuta yalimkata maini Inspekta Jamila na kumfanya kutingisha kichwa kwa masikitiko makubwa.



Inspekta Jamila sasa hakuwa na shaka kuwa Dokta Masawe ameuwawa na yule aliekuwa akimuona kama Ombaomba, kumbe ni Jeradi Mwaipopo mtu aliowafanya wawe maeneo yale kwa siku ile ili wamtie mikononi, badala yake amekuja na kuwaachia maafa, yasiyofikirika kabisa kutokea, hasa kukiwa na ulinzi kama ule!



Mara ikasikika sauti ya King’ora cha gari ya wagonjwa, ikija kwa kasi kuelekea kule kwenye Baa ya Y2K Buguruni kwenda kuchukua mwili wa Hayati Dokta Masawe.



Ilikuwa ni simu ya Afande Kubuta alipokata shauri, la kuwapigia simu pale katika Hospitali ya Amana Ilala, ili kwenda kuuchukua mwili wa Marehemu Dokta Masawe ili ukaifadhiwe katika chumba cha maiti pale Hospitalini Amana, na uchunguzi zaidi wa mwili ule, uweze kufanyika kwa kina.



Inspekta Jamila akawageukia wale askari wawili wa Doria, waliomuweka chini ya ulinzi muda mfupi uliopita, akawapa maelezo kwa harakaharaka, na alipomaliza akageukia upande wa pili wa gari ile na kupanda, huku Afande Kubuta akiingia upande wa Dereva wa gari ile na kuwasha gari na kuiingiza barabarani kuelekea katika barabara ya Mandela.



Afande Kubuta alipofika pale katika makutano ya barabara ya Uhuru na Mandela, akakata upande wa kushoto wa barabara ya Mandela, na kuelekea Tazara.



Wale askari wawili Afande Majuto na Mwenzie, walioachiwa maagizo na Inspekta Jamila, waliiendea ile gari iliyopata ajali ya kuvunjwa kioo cha mbele kwa risasi na Jambazi aliepanda cheo na kuwa Gaidi, Jerard Mwaipopo.



Gari aina ya Datsun Nissan Old Model, huku dereva wa gari ile akiwa haonekani eneo la tukio.





Wale askari walipoona kimya kila walipokuwa wanamuuliza dereva wa gari ile, yule askari aliekuwa na kifaa cha mawasiliano, Afande Majuto aliongea kupitia kifaa kile na muda wa kama dakika tano hivi gari mbili aina ya Land Rover 109, zilikuja kwa mwendo wa kasi katika eneo lile, na kuifunga mnyororo gari ile na kuivuta kuipeleka katika kituo cha polisi cha Buguruni. Pale mkabala na soko na kituo cha Basi cha Buguruni.



watu waliokuwa katika kushangaashangaa katika eneo lile, ilibidi wasambae na kuondoka kwani hakukuwa na jambo la kushangaa tena. Na kiasi ya dakika kama kumi baadae eneo lile lilirudi katika hali yake ya kawaida, kukawa kama halikutokea tukio lolote la hatari hapo kabla.



*******



Jeradi Mwaipopo aliendesha ile Pikipiki kwa kasi ya ajabu, kama aliekuwa katika mashindano ya kuendesha Pikipiki!



Alipofika katika eneo la Tazara akazikuta Taa za kuongozea magari, zimeruhusu gari za kutoka upande wa Buguruni kupita.



Hivyo akiwa bado katika mwendo kasi, alilala nayo ile Pikipiki upande wa kulia, akishika njia kuelekea upande wa uwanja wa ndege.



Kila alieiona Pikipiki ile namna ilivyolazwa pale kwenye kona ikienda sanjari na taa ya kijani iliyoruhusu vyombo vya moto kupita, alishika kichwa kwa masikitiko, kwani mwendo ule ukianguka tu, huwi majeruhi abadani ila kifo kitakutembelea!



Hususan dereva wa Pikipiki ile hakuwa na ile kofia maalum ya kuendeshea Pikipiki ‘Elementi’

lakini hata mavazi ya dereva yule, na Pikipiki ile, vilikuwa havifanani kabisa, ilikuwa tofauti kama maji na mafuta!



Lakini kila kwenye Welevu, na Wajinga hawakosi.

Wapo watu wachache waliokishangilia kitendo kile cha mwendo kasi, huku wakipayuka kuwa;



“Siku hizi wazee nao wamechoka, kwani wanaendesha Pikipiki kama hawana akili nzuri!”



Mwendo kasi aliopita nao Jeradi Mwaipopo kwenye taa zile za kuongozea magari pale Tazara, kuliwagutusha askari wa usalama Barabarani na askari wa doria wa Pikipiki waliokuwa wamebarizi pale kwenye kivuli cha mti kwenye kona ya Barabara ile.



Waliitilia mashaka pikipiki ile, wakawasiliana na askari wenzao waliokuwa doria pale katika eneo la Vingunguti, kwenye kona ya kwenda Vingunguti kiembe Mbuzi, kwa upande wa kulia na ile kona ya Bombom Kijiwe samli kwa upande wa kushoto, kwenye Njia ya Viwandani.



Huku askari wa doria wenye Pikipiki waliokuwa pale tazara, wakiifatilia Pikipiki ile kwa mwendo wa kasi vilevile.



Askari wale waliokuwa pale kwenye kona ya Vingunguti, na Viwandani walikuwa wamejiandaa na bunduki mikononi!



Lakini hadi wale askari waliokuwa wana Pikipiki waliotoka Tazara, walipofika pale kwenye ile kona ya Vingunguti na Bombom, bado waliwakuta askari wenzao, wakiwa na bunduki mikononi wakisubiri mtu aliepita na Pikipiki kwa mwendo wa kasi bila mafanikio!



Wote kwa pamoja walikuwa wamepigwa chenga ya Mwili.

Baadae wakapata taarifa zilizowafanya wakunje uso kwa ghadhabu, kwani taarifa ile kupitia Radio Call zao ilisema;



“Jambazi Sugu Geradi Mwaipopo anaetafutwa na Polisi, kwa makosa ya mauwaji na uhalifu wa kutumia silaha, amepora Pikipiki aina ya Honda 750 GL ya Ndugu Majidi Ndosho katika maeneo ya Buguruni, na kuelekea Maeneo ya Tazara.

Hivyo askari wote watakaoiona Pikipiki au mtu anaeiendesha, anaeonekana kama mtu mzima, mtu huyo, awekwe chini ya Ulinzi mara moja Ova”



-



Ilipomaliza taarifa ile, wale askari wakasambaa kuanza msako mkali wa kumtafuta Jambazi yule.



Eneo lote la Tazara kuanzia mchicha, hadi katika maeneo ya Viwandani, yalikuwa katika mshikemshike wa hali ya juu kabisa, akitafutwa Jeradi Mwaipopo.



Katika kona ile ya mchicha kwenda Kiwalani kabla ya kufika ile pacha ya Vingunguti na Viwandani, ilitiliwa mashaka kuwa huenda Jeradi Mwaipopo, akawa amechepukia pale, kwa kuwa Pikipiki ile haikuonekana kupita katika njia panda ya Vingunguti, Bombom!



Hivyo nguvu kubwa ikaelekezwa pale, askari wa doria kenda, pamoja na askari wa pikipiki, walilizunguka eneo lile, wakawa wanamsaka Jeradi Mwaipopo!



Wacheza kamari wa maeneo yale, hawakuwa na raha kabisa siku ile, wala walevi wa Pombe ya Gongo, kwani kila walipowaona askari Wakitayaya, wao walikuwa nusura wavunje miguu yao kwa mbio!



Msako ule uliendelea katika eneo lote la Kiwalani lakini muda ulikuwa unakwenda, Jeradi Mwaipopo alikuwa haonekani hata vumbi lake!



Wale askari waliotoka tazara wakiwa na pikipiki walifanikiwa kuziona alama za Tairi za Pikipiki ile, wakaanza kuifata taratibu.CHANZO:  https://deusdeditmahunda.blogspot.com/



Walifanikiwa kuzifata alama zile za Tairi kwa robo kilometa!



Lile wingu zito jeusi lilokuwa limetanda angani, likaanza kunyesha Mvua kubwa, ikaharibu mwenendo mzima wa kuzifatilia alama za tairi za Pikipiki aliyokuwa akiiendesha Jeradi Mwaipopo, kiasi wale askari walimuhusisha Jeradi Mwaipopo na kutumia pia, nguvu za Kiza!



Dakika ishirini baadae, ilipatikana taarifa kupitia Radio Call ,kwamba Pikipiki aina ya Honda 750 GL, iliyokuwa inaendeshwa na Jambazi Jeradi Mwaipopo, imekutwa imetelekezwa katika eneo la makazi ya Walemavu kule Kiwalani!



*******

Afande Kubuta, akiwa na Inspekta Jamila akaendesha gari ile huku akiwa hajui wanakwenda wapi, akamuuliza Inspekta Jamila aliekuwa ameinama kwa mawazo, yaliokuwa yanatembea kichwani mwake.



“Sasa afande tunaelekea wapi?”



Inspekta Jamila aliinua kichwa chake akatazama nje, akaona walikuwa katika Taa za kuongozea magari za Tazara, zinapokutana barabara zenye majina ya viongozi mashuhuri Barani Africa, Barabara ya Mandela, na Barabara ya Mwalimu Juliasi Kambarage Nyerere.



Inspekta Jamila akasema;



“Turudi ofisini tukajipange upya, mradi taarifa ya kutafutwa yule Gaidi tumeshaitoa askari wa doria watamtafuta.”



Afande Kubuta akapinda kushoto gari ile na chombo kikawa kinatazama mjini, huku askari wale wakiwa wamelowana ndembendembe kwa namna Jambazi Jeradi Mwaipopo alivyowafanza!



Inspekta Jamila mara baada ya kufika ofisini kwao, akamwambia Afande Kubuta kwamba;



“Kuna mtu mmoja yupo Kijitonyama, tunatakiwa tumfikie na tumuhoji ili tubaini kama nae anahusika, kwa namna moja au nyingine katika kadhia hii!”



Afande Kubuta akiwa bado hajamuelewa Inspekta Jamila akamuuliza;



“Ni mtu gani huyo Afande unaemaanisha ambae kwamba, atakuwa anaweza akawa anahusika na kesi hii?!”



Inspekta Jamila alivuta mtoto wa meza yake nakutoa picha, aliyokuwa ameihifadhi mle, picha ambayo ameichukua katika Albam ya Marehemu Hamida, katika zile picha tatu ambazo mbili tayari ameshazifanyia kazi na tayari majibu yake yameshapatikana!



.





Ilikuwa ni Picha ya Bitozi, ambayo bado hajajuwa kama itampa jibu gani.

Akaichukua picha ile na kumpa Afande Kubuta.



Afande Kubuta aliipokea picha ile na kuitazama kwa makini, kisha akaipindua upande wa pili akaona maandishi yalioandikwa kwa mkono katika picha ile kwa kalamu ya wino yaliokuwa yakisomeka BITOZI.



Afande Kubuta alimtazama usoni Inspekta Jamila, akamuona nae anamtazama kwa makini sana! Afande Kubuta akasema;



“Huyu Predeshee namfahamu huyu mie, ni muuza magari maarufu sana, na ni mgonjwa kwa wanawake huyu!”



Inspekta Jamila huku akiwa anatabasamu akamuuliza Afande Kubuta;



“Wewe unamfahamu kivipi huyo Bitozi, au Predeshee kama ulivyomwita?”



“Nina jamaa zangu kama wawili hivi, wamenunua magari kwake na mara zote mbili nilionana nae, sidhani kama anaweza kuwa na mahusiano yoyote na Genge lile!”

Afande Kubuta alikuwa anamjibu kiongozi wake huku akiondosha kabisa Dhana kama jamaa anaweza kuwa na uhusiano na kesi ile.



Inspekta Jamila alicheka huku akionyesha mshangao kwa majibu ya Afande Kubuta, akamwambia;



“Kwani Afande unataka kuniambia kwamba, ukimtazama mtu tu unaweza kumjuwa matendo anayofanya? Hivi uliwahi kufikiri kuwa Dokta Masawe anaweza kuhusika na kesi hii?, Na akawa ndiyo chanzo cha Mauwaji yaliyotokea?!”



Afande Kubuta aligwaya kwelikweli, na Inspekta Jamila akaendelea kwa kusema;



“Mimi sijasema kama huyo Predeshee anahusika hata kidogo, bali ninachotaka kujuwa alikuwa na mahusiano gani na Marehemu Hamida, hadi akapiga nae picha! Na hakuna mtu mwingine anaeweza kutupa ukweli wa jambo hili bali ni Bitozi mwenyewe, lakini pia kuchunguza ndiyo kazi yetu!”



Afande kubuta akatikisa kichwa chini juu, kuonyesha kuwa ameelewa. Kisha akasema;

“Kwa kuwa huyu jamaa ni Mkwale, nashauri bora uwende wewe kiongozi, kwani jamaa lazima atatoa ushirikiano unaopaswa! Lakini pia Bosi wangu nasema kidhati kuwa Mungu amekupa upendeleo maalum, kiasi hata mwanaume angekuwa mgumu kiasi gani, basi kwako atakuwa laini kama Pamba!”



Inspekta Jamila alimtazama Afande Kubuta kwa macho ya aina yake kisha huku akimwemwesa akasema;



“Nashukuru kwa Mungu kunipa huo upendeleo kama upo, pia asante kwa kunisifia.”

Alipokuwa anamwemwesa mashavu ya Inspekta Jamila yalikuwa yana vishimo maalum vilivyokuwa vinabonyea kwa kuingia ndani.

Mashaallah Inspekta Jamila alikuwa ni mrembo sana, kitu kilichokuwa kinampa tabu Afande Kubuta ni kule kuona kuwa, pamoja na uzuri wa sura, umbo, na tabia, lakini bado alikuwa hajaolewa!



Akawa hajuwi kama wanaume walikuwa wanamuogopa kumtokea, au mwanamke yule hana bahati ya kuolewa, au alikuwa hataki kuolewa!



Ilimradi Afande Kubuta alikuwa amehemewa kwa uchu wa mapenzi kwa bosi wake, lakini pia nayeye alikuwa anamuogopa kumwambia!



Akawa anaishia kusema kimoyomoyo, kuchukua mwanamke kama yule ni kujipa presha za bure!

Ama kweli hakuna kizuri kikakosa kasoro.



Inspekta Jamila akasema;



“Sawa sasa tuweke masihara pembeni na turudi katika kazi, hivi sasa ni saa saba za mchana, itabidi tukapate chakula cha mchana, na ikifika saa nane kamili tukutane hapa ofisini, kwa kuendelea na zoezi letu ili tuone leo tunaimaliza siku kwa jibu gani.”



Alipokwisha kusema hayo Inspekta Jamila aliichukua ile picha ya Bitozi na kuirudisha ndani ya mtoto wa meza, na kutoa chaja ya simu, na kuichaji simu yake.



Afande Kubuta aliinuka nakutoka nje kwenda kupata chakula cha mchana.



Inspekta Jamila alipotaka kufunga yule mtoto wa meza, akaiona simu ya Marehemu Dokta Masawe aliyokuwa ameihifadhi mle ndani, na hapo akawa kama mtu aliekumbuka jambo fulani!



Aliitoa simu ile mle ndani nakuiwasha, na baada ya kuwaka aliibonyeza namba ya mwisho kuipiga simu ile na kuipiga.



Akasubiri kwa muda kidogo huku moyo ukimuenda mbio kama saa mbovu, na kwa mastaajabu makubwa simu ile ikawa inaita upande wa pili!



Kwani hakutarajia kuisikia simu ile ikiita katika muda ule, matarajio yake nikusikia kwamba simu ile imezimwa.



“Halow Jm mambo vipi?”



Inspekta Jamila alitamka kifupi cha jina la Jerard Mwipopo baada ya simu ile kupokelewa.

CHANZO:  https://deusdeditmahunda.blogspot.com/

Kwa mshangao wa ajabu, alisikia upande wa pili ukimjibu tena bila ya wasiwasi wala kutetemeka!



ITAENDELEA