IMEANDIKWA NA : ARISTABLUS ELVIS MUSIBA (A.E MUSIBA)
*********************************************************************************
Simulizi : Kikomo
Sehemu Ya Kwanza (1)
CHANZO: https://deusdeditmahunda.blogspot.com/
KIDOKEZO
Si kazi yangu kujishughulisha na makosa ya jinai. Nilishangaa kidogo Chifu aliponiamru nifuatilie tatizo la upungufu wa Almasi. Isingekuwa kwa sura aliyoonyesha, nilitaka kumwambia apeleke malalamiko yake kwa Kamishna wa Polisi au anipe uhamisho kwenda huko kama alikuwa hanihitaji katika idara yake. Siku hiyo alivaa sura ya kutisha na sikuwa na la kufanya ila kukubali.
Kulikuwa na ushahidi kwamba Almasi zilizouzwa katika masoko ya nje zilikuwa chache sana kulingana na kiasi kilichokuwa kimechimbwa kwa nini?.
Askari Polisi Joel amegusa chanzo cha uhalifu; akafa katika ajali ya ndege siku chache kabla ya kufunga ndoa na mchumba wake Amanda, na uhalifu ukaendelea.
Chifu alimtuma Jack Mbusile, mpelelezi wa kawaida. Lakini maiti yake iliokotwa ikielea katika Ziwa Victoria na uzito wa jambo zima ukawa umetambuliwa. Ndipo nikatumwa mimi Willy Gamba.
La hasha! Kama ungetumwa wewe nina hakika ungekimbia na kupotea kabisa! Lakini mimi sio wewe. Safari yangu ilinichukua katika miji ya Mwanza, Shinyanga, Maganzo na Songwa; na uvundo niliofichua ulisababisha umwagaji mkubwa wa damu na kuteketeza maisha ya watu wengi.
Yalikuwa mapambano makali na kila mmoja wetu alishangaa kuona ni nani alikuwa anaongoza uhalifu huu.
Ama kweli kikulacho ki nguoni mwako.
SEHEMU YA KWANZA
Nilifika ofisini kwangu yapata saa mbili unusu. Gari langu lilikuwa limeniletea matatizo kidogo njiani. Katibu wangu nilimkuta tayari keshafika saa nyingi kama kawaida yake.
"Habari ya leo. Mbona umechelewa hivi?"
"Salama tu. Gari langu binti nafikiri niliuze maana siku hizi linanihunia sana".
"Lazima likuhunie, nalo unafikiri halichoki, maana linakata mitaa ya Dar es Salaam yote kila siku". Tukacheka.
"Kuna habari zozote?"
"Katibu wa Chifu alipiga simu na kuacha maagizo kuwa uende ukamuone Chifu mnamo saa tano na nusu, habari nyingine ndiyo mpigie Didi simu".
"Asante Luiza", nikaingia ofisi kwangu. Niliangalia majalada yaliyokuwa yakisubiri niyashughulikie kabla sijaenda kumuona Chifu hapo saa tano na nusu. Kufika saa nne nilikuwa nimeishayapitia majalada yote muhimu na kulikuwa na mawili kati yake ambayo ilinibidi niende nayo kwa Chifu kusudi niweze kuyazungumzia kabla sijaendelea mbele na matatizo yake.
Nilikumbuka kuwa ilikuwa inanibidi nimpigie simu Didi. Nilibonyeza simu kumuita Katibu wangu.
"Luiza nipigie simu kwa Didi".
"Sawa".
Muda si mrefu simu yangu ikalia.
"Huyo yuko kwenye simu".
"Halo, habari?"
"Nzuri, hujambo?"
"Sijambo".
"Nimekupigia simu asubuhi lakini ulikuwa bado hujafika, maana nyiye wazee hamchelewi".
"We, acha kunikoga nchi hii haina wazee wanaofanya hivyo. Ukifanya hivyo utaachishwa kazi".
Alicheka nami nikacheka.
"Je wasemaje?"
"Nina shida kidogo nilitaka kukueleza kuwa utokapo ofisini saa nane na nusu nipitie. Kuna jambo la maana sana ninalotaka kukueleza na kulifanya".
"Sawa mama. Hapana taabu. Mimi saa nane na dakika thelathini na tano juu ya alama napiga breki hapo".
CHANZO: https://deusdeditmahunda.blogspot.com/
"Nitashukru sana, kwaheri".
Nikakata simu. Nilikaa nikifikiria jinsi ya kumwelezea Chifu matatizo yaliyokuwa katika majalada haya mawili niliyokuwa nimeyaweka pembeni. Niliona nichukue notisi kidogo maana Chifu yeye huhitaji maelezo kamili. Saa tano na dakika ishirini na tano nilimwendea katibu wangu.
"Naenda kwa Chifu, chukua habari yoyote".
"saa sita na nusu naomba kwenda kumpeleka mdogo wangu hospitali, anaumwa".
"Kama nitakuwa nimerudi, lakini kama sijarudi usiondoke, kama kawaida Luiza".
"Najua bosi, usiwe na wasiwasi".
Ofisi ya Chifu haikuwa mbali sana na yangu kwani tulikuwa kwenye ghorofa moja. Nilipofika nilifungua mlango wa chumba cha Katibu wa Mkurugenzi wa upelelezi.
"Halo Maselina, hujambo".
"Sijambo, Willy siku hizi hatugongani?"
"Kazi nyingi, na vile vile wewe unaadimika kama shilingi ya mwambo!"
"Nhuu, usinitanie wewe ndiwe..." Kabla hajamaliza hiyo sentesi yake mlango wa Chifu ulifunguliwa na Chifu mwenyewe akatoa uso ulioonekana wa ukali sana.
"Waheshimiwa wamo ndani wanakusubiri wewe, na wewe unacheza hapa".
"Samahani Chifu", nilijibu kwa aibu.
"Maselina, hatutaki simu mpaka iwe ya lazima sana. Chifu alisema kwa sauti nzito.
Nilipoingia kwenye ofisi ya Chifu nilishangaa sana. Mimi nilitegemea huu kuwa moja ya mikutano yetu ya kawaida, lakini nilishangaa kuwaona Mkuu wa Polisi na maafisa wa kizungu ambao sikuwafahamu. Pamoja na hao walikuwepo maofisa kadhaa wa polisi. Kwenye meza ya mkutano kulikuwa kumebaki kiti kimoja ambacho nilihisi ni changu. Baada ya kuwasalimia wote nilienda nikaa kwenye kiti hicho.
"Nafikiri wote tunafahamiana?" Chifu aliuliza.
Wote tulitingisha vichwa.
"Nasikitika kukueleza kuwa huu si kama mikutano yetu ya kawaida, mkutano huu una jambo lake la pekee na ndiyo sababu unawaona maafisa hawa wageni wanaotoka katika Shirika la polisi Duniani (Interpol) Wote wamekuja kutusaidia kutatua matatizo ya uhalifu ambayo yanatushinda na ambayo kwa kweli yanahusu dunia nzima".
Nikaweka majalada yangu pembeni.
"Unamkumbuka Jack Mbwile?"
"Ndiyo namkumbuka. Nimewahi kufanya naye kazi, wakati nilipokuwa nimetumwa kwenye kazi moja huko Ziwa Tanganyika. Katika Idara yetu ya upelelezi ndiye alikuwa nambari moja katika kuogelea. Aliweza kuogelea kutoka Visiwa vya Unguja hadi pwani ya Tanzania Bara".
CHANZO: https://deusdeditmahunda.blogspot.com/
"Basi Jack amekutwa amekufa huko Mwanza kando kando ya Ziwa Victoria mahali paitwapo Mwanza South", Chifu alieleza.
"Loo! Alikuwa anafanya nini huko?" Nilimuuliza haraka.
"Marehemu miezi miwili iliyopita tulimshirikisha katika Idara ya Polisi kusaidia upelelezi wa wizi na uuzaji wa magendo ya almasi. Yapata miezi kama minne hivi tuliombwa na polisi kushughulikia jambo hili ambalo sasa lilikuwa limefikia kiwango kibaya, kwani ripoti iliyotoka kwenye machimbo ya almasi ya Mwadui inasema ya kwamba kwa muda wa miezi sita iliyopita madini yaliyo tayari kusafirishwa yamepungua kwa asilimia arobaini na tano kuliko kawaida. Hii haitokani na kupungua kwa madini, ila inatokana na wizi.
"Idara ya polisi imejishughulisha sana na upelelezi wa wizi huu, lakini wameweza kushika wezi wadogo wadogo ambao hawawezi kuleta tofauti yote hii. Kwa hiyo wametuomba msaada juu ya jambo hili. Papo hapo tulimtaka Jack akiwa huko Mwanza atusaidie. Kwa bahati mbaya habari nilizozipata asubuhi hii ni kwamba Jack amekutwa amekufa. Polisi wameeleza kwamba amekufa maji. Upelelezi zaidi bado unaendelea juu ya kifo hiki. Mimi naamini kuwa Jack hakufa maji, atakuwa ameuawa na pengine amehusika na habari hizi za wizi wa almasi."
"Tokea aende Mwanza ni muda gani sasa?" Nilihoji.
"Yapata mwezi unusu".
"Alikuwa bado hajatoa ripoti yoyote?"
"Bado. Kwa jinsi mambo yalivyo ndiyo sababu Waziri pamoja na maafisa hawa wa Usalama wamefika hapa. Wamekuja kutafuta mbinu zaidi za kulitatua jambo hili. Waziri anaitaka Idara hii itoe msaada wa hali ya juu ili kulitatua jambo hili ambalo linagusa uchumi wa Taifa letu. Nimekuita hapa uelewe uzito wa jambo hili na uchukue dhima ya Taifa katika kupeleleza.
"Idara yetu imelipa tatizo hili nafasi ya mbele katika kazi zote na wewe utaziacha kazi zako zote zingine na kuchukua kazi hii. Utafanya kazi bega kwa bega na Polisi na kwa sababu wao wamekuwa wakishughulika na jambo hili kwa muda mrefu watakupa kila msaada wa maelezo yatakayokusaidia katika jambo hili. Tumekata shauri kukomesha kabisa wizi huu.
"Mpaka sasa kuna fununu ya watu fulani fulani ambao wamesambaa Afrika Mashariki nzima ambao wanaweza kuwa shina la tatizo hili. Lakini namna ya kuweza kuhakikisha na kuwatia mbaroni imekuwa inatushinda. Jambo ninalotaka kuongeza kidogo tu ni kwamba serikali inaamua kila njia ifanyike jambo hili likomeshwe. Kwa wakati huu ambao nchi yetu inahitaji pesa za kigeni sana, ni dhahiri kuwa serikali hairidhiki kuona jambo hili linaendelea. Kwa hiyo, kijana, umetwishwa mzigo mkubwa na nchi yako na ni imani yangu kuwa utafanikiwa. Hatutavumilia kuona watu wachache wanadhoofisha uchumi wa nchi nzima. Mungu akusaidie".
Maneno haya yalinichoma mno maini. Neno moja tu ndilo niliweza kujibu.
"Amina".
"Habari za maendeleo yako nitazipata kutoka kwa Mkurugenzi wako", Waziri alimalizia.
"Kama nikirudi hai", nilijibu huku nikitabasamu.
Tuliagana naye kisha mie nikaondoka.
Ofisini kwa katibu wa Chifu nilimkuta katibu wangu.
CHANZO: https://deusdeditmahunda.blogspot.com/
"Unafanya nini huku nami nimekwambia ukae ofisini?"
"Kuna mtu anakuhitaji kwa haraka eti ni mvuvi kutoka Mwanza".
"Mvuvi ananitafutia nini mimi?"
"Nitajuaje, yeye anasema ni lazima akuone".
Twende basi."
"Ndiyo hata kwaheri hamna?" Maselina alilalamika.
"Loo, kichwa changu kimevurugika, kwaheri, ngoja nikimbie. Chifu akifungua mlango na kuniona hapa tena atanifukuza kazi. Wote tulicheka na kuondoka. Tulipofika ofisini kwangu nilimkuta huyo aliyeitwa mvuvi amekaa kwenye viti vya wageni.
"Karibu ndani".
Akaingia.
"Keti chini".
"Asante".
"Habari za Mwanza".
"Nzuri tu".
"Nikusaidie nini?"
"Mimi naitwa Matayo Buluba, kazi yangu ni mvuvi". Kisha akatoa picha mfukoni mwake akanipa. Katika picha hiyoalionekana yeye akiwa na marehemu Jack Mbwile.
"Unamfahamu huyo?"
"Ndiyo, ni Jack Mbwile".
"Sawa, wewe ni Willy Gamba, siyo?"
"Ndiyo, umenifahamu wapi?"
"Ndugu huyu nasikitika kusema sasa ni marehemu!"
"Nimesikia".
Nilipojibu tu hivi akaonyesha sura ya kushangaa!.
"Nimepata habari, usijali nimejuaje, wewe endelea na maelezo yako.
"Marehemu tulionana yapata kama mwezi hivi, na alikuwa mtu mzuri sijapata kuona. Nilikuwa nakaa naye huko Kirumba. Tulionana siku moja Ziwani, na katika mazungumzo tukaelewana. Yeye alikuwa anapenda sana kuogelea na mimi ni mwogeleaji mashuhuri Mwanza . Tumewahi kufanya mashindano ya kuogelea na kwa mara mbili hivi ameshinda. Kisha katika mazungumzo na kutaka kujua anakaa wapi ndipo aliponieleza kuwa alikuwa amefika siku chache tu zilizopita na kwamba alifikia Hoteli ya Mwanza. Mwanza alijia shughuli za kibiashara.
"Wewe wakati huo ulikuwa unaishi wapi?"
"Nilikuwa naishi Kirumba, na nilikuwa naishi katika nyumba yangu mwenyewe, yenye vyumba vinne".
"Ulikuwa umeoa wakati huo?"
"Nilikuwa nimetaliki na nilikuwa bado sijazaa na huyo mke. Na kwa vile nilikuwa sina mpangaji nyumbani mwangu nikakata shauri Jack Mbwile aje tuketi wote, naye akakubali. Alikuwa mtu ambaye unaweza kumzoea mara moja tu".
Alinyamaza kidogo na kuniangalia. Alipoona sina la kusema akaendelea.
"Kila siku alikuwa anaodoka kufanya shughuli zake na miye nikienda zangu kwenye shghuli za uvuvi. Tukionana jioni alikuwa akinichukua na kwenda kutembea kidogo kwenye moja baridi moja moto". Alitabasamu kidogo kisha akaendelea. "Ila siku zingine alikuwa harudi mpaka asubuhi. Leo ni Ijumaa siyo?"
CHANZO: https://deusdeditmahunda.blogspot.com/
"Ndiyo".
"Sasa. Jumatatu tangu atoke asubuhi hakurudi mpaka tulipoonana Jumanne saa kumi wakati aliponifuata ziwani nilipokuwa nikisuka mitego yangu. Baada ya kusalimiana aliniomba niache kazi hiyo kidogo twende nyumbani. Tulipofika nyumbani aliniambia kuwa usiku wa Jumane hiyo alikuwa na mkutano mkubwa sana ila ulikuwa na hatari. Pia akanieleza kuwa jambo lolote likimpata nije Dar es Salaam. Aliniandikia jina la mtaa na jengo na nije nimuone mtu aitwaye Willy Gamba. Alisema kuwa nikimuonyesha huyo mtu picha tuliyopiga wote atanipokea vizuri kwani ni ndugu yake. Kisha alinipa na bahasha hii".
Alitoa hiyo bahasha na kunipa. Kisha akaendelea.
"Bahasha hii ilikuwa nikupe kama jambo limemtokea, kama angerudi angeichukua mwenyewe. aliniachia shilingi elfu moja za kusafiria ikibidi",
"Wewe ulimshauri nini?"
"Mimi nilimshauri asiende ikiwa ameona kuna hatari katika mkutano huo. Lakini aliniambia ni lazima aende kulikuwa na jambo la lazima sana katika mkutano huo. Nilimweleza kuwa ingefaa twende wote, lakini vile vile alikataa. Kisha tuliagana akaondoka. Usiku mzima sikulala kwa kumsubiri na hakurudi Jumatano yote hakuonekana, Usiku wa Jumatano pia sikuweza kulala.
"Jana mnamo saa nne hivi nilikwenda ziwani kuwangoja wavuvi wenzangu waliokuwa wamekwenda kuvua. Huko ndiko nilikopata habari hizi za huzuni. Wavuvi wa huko Mwanza South walinieleza kuwa wamemkuta rafiki yangu amekufa maji mnamo saa kumi na mbili na nusu asubuhi. Nilishangazwa sana nikakumbuka maneno yake. Badala ya kwenda polisi nikakata shauri kuja kwako moja kwa moja".
"Wavuvi walinieleza kuwa polisi walikuwa wameishachukua mwili na kuupeleka hospitali na upelelezi wa kifo umeanza. Saa nane nikakodi taksi na kuja huku, nimefika leo asubuhi." Alinyamaza huku machozi yakimtoka.
"Loo, jambo la kuhuzunisha sana! Huyu ni rafiki yangu sana. Asante sana kwa habari zote, mimi nitakuja Mwanza na nitakuja kukuona".
Niliandika taarifa yote na nikamshukru sana. Nilimpa kiasi cha fedha kumsaidia nauli na masumbufu ya njiani.
"Sawa, unatarajia kurudi lini?" nilimuuliza.
"Narudi leo kwa basi".
"Mimi nitafika kesho".
"Njoo kesho kutwa Kirumba Na. 32 ndiko nyumbani kwangu. Haya kwaheri, nataka nirudi mapema huenda Polisi wananitafuta".
"Wakati unafika Mwanza na mimi nitakuwa nimefika, usiseme lolote kwa polisi mpaka tumeonana. Vitu vyake unavyo?"
"Nimeviacha Mwanza. Akili yangu ilikuwa imevurugika kwa hiyo nilikuwa tu nataka nikuone kwanza ndipo roho yangu itulie".
"Basi viweke mpaka nifike. Kwaheri".
Tulishikana mikono tukaagana. Alipoondoka nikafungua hiyo bahasha, na ndani mlikuwa na karatasi kubwa lakini imeandikwa neno moja tu. ELUNGATA.
CHANZO: https://deusdeditmahunda.blogspot.com/
Niliinua simu kumuita Katibu Wangu.
"Luiza, njoo.
Luiza alikuja mara na kuuliza.
"Niende sasa? Saa saba unusu sasa ingawa nimechelewa naweza kuwabembeleza wakamtibu."
"Mimi sikukuita kukupa ruhusa ila kukueleza kuwa leo hatutoki kwa saa za kawaida, ipo kazi kubwa sana ambayo inanikabiri. Kuanzia kesho, huenda sitakuwa ofisini kwa muda usiojulikana kwa hivi utakuwa na muda mrefu wa kuweza kumaliza shughuli zako binafsi maana sitaacha kazi nyingi".
"Kumetokea nini?"
"Nitakueleza nitakaporudi, sasa hivi hata nikikueleza hutaelewa. Mtume tarishi akuletee chakula chochote utakacho, mimi aniletee soda moja na sambusa nne".
"Asante".
Luiza aliondoka nilianza kupanga mawazo ya namna ya kulitatua tatizo hili nililokuwa limepewa. Akili yangu ilizunguka huku na huku kutafuta ufumbuzi, na kila wazo nililopata nililiandika mara. Niliandika na kufuta na kusahihisha mara kadhaa wa kadha. Hata hivyo mwishowe nilifikia wazo moja maalumu la kuzingatia.
"Soda yako hii".
Nilistuka.
"Asante binti, siku nikibadilishiwa katibu, mimi nitaacha kazi".
"Ahaa, ama kweli utaacha kwani ulimwengu wote katibu akufaae ni Luiza tu? Nafikiri mimi nitakuwa wa kwanza kuacha. hakuna msichana asiyenichukia hapa ofisini".
"Usijali. Sasa saa ngapi?"
"Saa tisa kasoro robo".
"Nitakuletea kazi baada ya dakika kumi na tano hivi. Kazi utakayopata jitahidi kuimaliza kabla ya saa tisa na nusu maana nina mkutano na Chifu saa kumi".
"Ama kweli leo iko kazi, kuna mkutano mwingine saa kumi?"
Alifungua mlango na kwenda ofisini kwake. Niliendelea kuanika mpango wangu kwa makini. Nilipofika hatua ya mwisho simu yangu ikalia.
"Hallo nani?" Niliuliza kwa ukali.
"Kuna bibi kwenye simu" Luiza alijibu kwa woga, maana alijua nimeudhika.
"Hallo nani?"
"Ndiyo saa nane na dakika thelathini na tano juu ya alama ya kikwenu hii! Una maana gani ya kuniweka mpaka dakika hii huku ukijua huji!" Didi alijidai kufoka katika simu.
"Didi mpenzi samahani sana. Nimepata kazi muhimu sana ya haraka sana hata nimeshindwa kutimiza ahadi yangu."
CHANZO: https://deusdeditmahunda.blogspot.com/
"Mimi najua hunijali hata kidogo, ungekuwa unanijali ungeweza hata kunipigia simu kunieleza yote hayo ili nisikungoje".
"Si hivyo Didi. Wewe wajua kabisa kuwa nakupenda sana. Ni kazi iliyonitinga hata nisipate wasaa wa kukuona. Hata hivyo nitafika, ningoje mnamo saa moja hivi, tafadhali kwaheri".
Nilikata simu kabla hajaaga. Hii kazi yangu inamfanya mtu kuwa kama mtumwa, hata wakikwambia baba yako kafa yakupasa umalize kazi kwanza ndipo uende kwenye kilio. Niliendelea na kazi na baada ya kumaliza nilimpelekea Luiza.
"Piga nakala tano".
Mnamo saa kumi na dakika tano niliingia ofisini kwa Chifu. Maselina alikuwa anapiga chapa.
"Wamo ndani?"
"Wamo wanakusubiri".
Nilifungua mlango na kuingia ndani. Niliwakuta Chifu, Mkuu wa Polisi na wageni wengine.
"Habari za mchana?" Niliwaamkia.
"Nzuri", walijibu kwa pamoja.
Niliwagawia nakala za mawazo yangu ya awali. Katika taarifa yangu hiyo kitu kilichosisitizwa ni misaada maalumu niliyohitaji na ushirikiano wao wakati nikifanya upelelezi. Wote waliafiki na nikaachwa niendelee na shughuli hiyo. Ilikuwa sasa yapata saa kumi na mbili nilipowaaga.
Chifu aliita nilipofika mlangoni.
"Gamba".
"Naam".
"Tafadhali ujihadhari sana", alisema kwa huzuni.
"Bila ya shaka".
Chifu alikuwa akinipenda sana na kila nilipokuwa nikienda safari za hatari roho yake huhuzunika mpaka nirudipo. Nilimkuta Maselina akisoma gazeti. Aliponiona akatabasamu.
"Vipi? Safari tena?"
"Ndiyo binti".
"Safari salama urudi na zawadi".
"Kama nikirudi".
"Bila ya shaka utarudi. Tutakuombea kwa mola".
"Kwaheri ya kuonana".
Nilipofika ofisini kwangu, nilimkuta Luiza anapiga simu.
CHANZO: https://deusdeditmahunda.blogspot.com/
"Vipi unapiga simu?"
"Nampigia rafiki yangu huko Kurasini".
"Sasa binti mimi sintakuweapo nitaondoka saa tano kwenda Mwanza kama ulivyoona kwenye ripoti. Shughuli za hapa shughulikia kama kawaida. Tatizo lolote peleka kwa Chifu".
"Unategemea kurudi lini?"
"Siwezi kujua, naweza kuchukua muda mrefu sana au mfupi sana. Na huenda nisirudi kabisa".
Akijidai kusikitika.
Ukisema hivyo basi utatufanya wenzio tukonde bure kwa wasiwasi".
Baada ya kuagana na Luiza nikaondoka kwenda kumuona Didi. Didi ni mpenzi wangu wa muda wa miezi sita akiishi katika ghorofa za huko Ilala. Ni mzuri kwa umbo na pia mawazo na mwenendo wetu unapatana. Amehitimu na kupata shahada ya digrii katika Chuo Kikuu cha Dar es Salaam wakati huo alikuwa akifanyakazi katika Shirika la Bima la Taifa kama Afisa Maslahi na ulikuwa ndio mwaka wake wa kwanza wa kazi. Nilipofika huko nilisimamisha gari langu la kikazi nje, kisha nikapanda ngazi kwenda kwenye ghorofa yake kumbe Didi alikuwa ameniona nikija na kabla sijabisha alifungua mlango.
"Karibu, wa ubani."
"Asante".
"Ndiyo ukanifanyaje leo?"
"Haya basi yamekwisha!".
"Binti nasikitika kukueleza kuwa nitakwenda safari usiku huu. Na safari yenyewe ni ya kikazi na ya lazima."
"Safari zako haziishi mimi bado sijakaa nawe safari! Utajuaje mapendo yangu? Maneno yangu? Wasiwasi wangu! Mbona hivi Willy?"
"Tuliza roho yako ya Mungu mengi siku moja utapata muda mrefu mpaka utachoka."
"Nilikuwa na mambo ya kukueleza lakini sasa naona huna nafasi hata kidogo, ukirudi nitakueleza. Utarudi lini?"
"Inategemea na kazi itakapokwisha."
"Unaenda wapi?"
"Mwanza".
"Willy, nitapungukiwa na mtu! Sijui itakuwaje wakati huu ambao hutakuwapo. Mazoea kweli ni adhabu."
"Uwe na moyo mgumu, nitarudi karibuni."
"Nasikia wivu pia, huenda ukaonana na wasichana wengine huko."
"Huniamini, Didi? Unanisikitisha sana!"
"Si hivyo Willy, nakupenda mno ndiyo sababu nakuonea wivu."
CHANZO: https://deusdeditmahunda.blogspot.com/
Didi alinishika mkono na kunivuta na kunikumbatia. Damu yangu ilikimbia upesi upesi lakini nikajikaza roho na kumsukuma. Didi alikuwa ameng'ang'ania shingoni mwangu.
"Nenda binti, nitachelewa!"
"Haya baba kwaheri." Alisema na huku machozi yakimtoka.
"Hunitoi hata nje!"
"Hata"
Akilia.
Kwa uchungu nikatoka. Nikafunga mlango wake kwa nguvu nikaondoka. Nilikwenda kwanza kwa daktari anipe mahitaji yangu muhimu kwa kazi kubwa ya upelelezi wa wizi wa almasi.
Safari yangu ilikuwa safi sana. Nilitumia saa kumi na mbili tu mpaka Mwanza. Ilikuwa saa tano asubuhi nilipoingia Mwanza. Nilikwenda moja kwa moja hadi Hoteli ya Mwanza katika mtaa wa Posta. Niliegesha gari nje na kuchukua mizigo yangu madi Mapokezi ya wageni.
"Habari ya leo ndugu!"
"Nzuri, tukusaidie nini?"
"Naweza kupata chumba?"
"Bila shaka, vyumba vipo chungu nzima".
Alileta kitabu na kunipa.
"Jaza humo ndani".
Nikajaza Jina Mark Buhulula. Kazi Mfanyabiashara. Anuani S.L.P 3300 Shinyanga: muda wa kukaa siku kama kumi hivi. Nitokako Shinyanga, kwenda Mwanza, nikamaliza kujaza yote haya.
"Nitakupa chumba namba 230 ghorofa ya pili".
Kisha akamwita mtumishi mmoja.
"Juma njoo hapa".
Juma akafika.
"Mpeleke huyu ndugu chumba namba 230".
Juma akabeba mzigo wangu tukafuatana. Chumba kilikuwa kizuri sana.
"Unataka nini? Aliuliza.
"Hiyo ni asante yako".
"Loo asante sana ndugu. Ukitaka msaada wa aina yoyote ile niambie nitakusaidia".
"Ikibidi nitafanya hivyo".
Nilifungua mizigo yangu na kuiweka vizuri. Chupa aliyonipa Chifu niliifungua. Loo Mlikuwa na vipande vya almasi vinne vizuri sijapata kuona. Hata miye mwenyewe moyo wangu ulipiga haraka haraka. Hivi vipande vinne tu vingeweza kunifanya tajiri maisha yangu yote. Kisha nikapunguza mawazo yangu, nikavirudisha ndani ya chupa na kuviweka mahali pa usalama nikainua simu ya humo chumbani.
"Naweza kupata Dar es Salaam?"
"Namba gani?" Aliuliza Opereta wa kike kwenye simu.
"Dar es Salaam 08381".
"Nitakwita".
Nilijilaza kidogo kitandani. Zilipita dakika kama kumi hivi, kisha simu ikalia. Nikainyanyua haraka.
"09351 Dar es Salaam hapa, nikusaidie nini?"
"Willy hapa, hujambo Maselina?"
CHANZO: https://deusdeditmahunda.blogspot.com/
"Sijambo, vipi huko?"
"Niko MWanza Hoteli".
"Vizuri, nitakupigia simu baadae ndugu", akakata simu.
Nilionelea nioge kisha nipate chakula cha mchana, halafu nije nilale kidogo, maana nilikuwa bado sijalala. Baada ya chakula nilirudi chumbani na kulala. Niliamshwa na simu mnamo saa kumi hivi.
"Hallo nani?"
"Simu yako", alijibu opereta.
"Hallo Mark hapa".
"Subiri, zungumza na Chifu".
"Mark habari za saa hizi?"
"Nzuri, nilikuwa nimelala".
Mnamo saa moja hivi nenda forodhani, kuna boti moja inawasili toka Ukerewe. Ndani ya boti hiyo kuna mtu mmoja aitwaye Makungu Majula ana habari za maana sana ambazo huenda zikafumbua tatizo letu bila matatizo makubwa. Atakuwa amevaa jamba-koti moja la kaki na kofia nyeusi. Umwonapo nenda mpokee halafu taja neno Inter na yeye atajibu Inter halafu mtazungumza.
"Nitafanya hivyo, asante", nilijibu.
Nilipiga simu mapokezi kuwaomba waniletee chupa moja ya Dimple pamoja na sprite kama tano hivi na barafu. Hiki kinywaji kingeweza kunisukuma hadi wakati wa kwenda forodhani kumpokea Makungu.
Mnamo saa kumi na mbili unusu niliondoka kuelekea ziwani. Mwendo wa kutoka Mwanza Hoteli mpaka forodhani ni kama dakika kumi tu hivi. Saa moja kasorobo ilinikuta tayari niko forodhani, kulikuwa na watu wengi ambao nao walikuwa wamekuja kuwalaki wageni wao. Nilipoangalia ziwani niliona boti ikija kwa mbali kidogo.
"Bana jambo?" Mhindi mmoja alinisalimia.
"Sijambo ndugu".
"Hii boti toka Kerewe? Mimi iko kuja goja toto yangu, toka kwa rafiki yake Nansio."
"Na mimi nasubiri rafiki yangu kutoka huko huko".
Boti sasa ilikuwa imekaribia mita mia tano hivi. Mara tu tukashtukia kishindo kikubwa mno, na watu wote kuanza kukimbia huku na huku. Mara hiyo boti ikashika moto na vipande kurushwa huku na huku. Watu wengi walikuwa bado na mshtuko na walikuwa hata bado hawajaelewa nini kimetokea. Polisi wanamaji waliingia mara moja ndani ya boti yao na kuelekea huko kwenye boti kuokoa maisha ya wote ambao walikuwa wangali hai. Mimi nilikata shauri kutulia na kuangalia mwisho wake.
"Toto yangu, toto yangu", huyo Mhindi aliyekuwa anazungumza nami alilia. Kisha akachomoka kuelekea ziwani. Bahati nilimwahi nikamshika.
"Tulia kwanza huoni watu wanashughulika kuokoa abiria waliopata ajali? Ukijitosa na wewe majini utakuwa umefanya nini".
CHANZO: https://deusdeditmahunda.blogspot.com/
"Toto yangu peke yake, kama iko kufa na mimi iko kufa tu potelea mbali Mungu iko".
Wakati huo Polisi wengi walikuwa wamefika na kusaidia kutuliza watu waliokuwa wamekuja kupokea wageni wao kwani vilio vilikuwa vimevuma kote forodhani-kwa jinsi boti ilivyokuwa imeteketea hata mimi niliamini kwamba hakuna mtu hata mmoja aliyekuwa amepona.
Mara moyo wangu ukashituka na kuanza kuhisi kuwa hii hakikuwa ajali. Ajali imetokea kwa sababu Majula alikuwa ndani ya boti na alikuwa na habari za maana za kunieleza mdomo kwa mdomo. Kama mambo ni hayo basi tayari walikuwa wameishanijua.
Niliangaza macho huku na huku ili niweze kuona kama kuna mtu yeyote anayeniangalia. Nikakuta hakuna nilimtoroka huyo Mhindi aliyekuwa sasa amekaa chini huku akilia na kujiingiza katika kundi kubwa, ambalo lilikuwa limeshafika kushuhudia ajali hii mbaya.
Boti za polisi na mashua za wananchi zilikuwa bado zinaokota Maiti za abiria. Mara tuliona boti ya polisi ikija na mtu mmoja, ambaye walikuwa wamemlaza ndani ya boti. Walipofika ufukoni nilisogea kuangalia na nikaona ni msichana ambaye naye alikuwa abiria ndani ya boti ya ajali. Alikuwa bado hai. Polisi Inspekta aliyekuwa karibu yangu aliwauliza ndani ya boti, "Wangapi wamepona?"
"Mpaka sasa nafikiri ni huyu tu".
"Mfanyieni huduma ya kwanza".
"Ndiyo, Afande".
"Sajenti Kibonye?" Inspekta aliita.
"Afande".
"Rudisha watu nyuma, huyu mtu aweze kufanyiwa huduma. Tulianza kusukumwa huku na huku. Sura ya huyu msichana ilikuwa tayari kichwani mwangu. Sikuwa na haja ya kukaa zaidi, nikaonelea niondoke maana giza lilikuwa linazidi. Nilikata shauri kurudi moja kwa moja mpaka hotelini kwangu. Niliingia ndani ya chumba cha chakula kwa ajili ya mlo wa jioni.
"Habari za jioni?" nilimsalimia mmoja wa watumishi wa hapo ndani.
"Nzuri tu, sijui utakula nini?"
"Samaki wapo?"
"Wapo ngege, ningu na hata kambale wapo ukiwataka".
"Nipe ngege na viazi".
"Asante".
"Niletee na CocaCola".
Wakati nangoja chakula nikaanza kuwa na mawazo chungu nzima. Majula alikuwa ameishauawa. Bila shaka alifahamika kuwa angekuja kuleta habari ambazo ningemtia mtu hatiani. Nilikua sijaelewa huyu Majula alikuwa anafanya kazi gani na wala uhusiano wake na kazi yetu nilikuwa sijui. Nikakata shauri kumuuliza Chifu.
"Mtu mmoja kafanya watu chungu nzima kufa, kweli binadamu ni katili, nilifikiri sana. Hawa watu walikuwa wameamua kuzima wasifahamike ili waweze kuendelea na shughuli zao za kudhorotesha uchumi wa nchi. Lakini siku za mwizi ni arobaini. Waswahili husema.
CHANZO: https://deusdeditmahunda.blogspot.com/
Bado nikiwa na mawazo mengi nililetewa chakula. Nilikula kwa kujilazimisha, maana chakula kilikuwa hakiendi kabisa. baada ya hapo nilipanda chumbani kwangu. Nilipofungua mlango na kuwasha taa, mara nikajua mliwahi kuwa na mtu. Sehemu yote ilikuwa imechunguzwa kifundi sana. Hakuna kitu hata kimoja kilichokuwa kimechukuliwa: Hii inathibitisha kuwa tayari waliwakuwa wameshanifahamu, kwa hiyo ilikuwa hatari kubwa sana kwangu. Nilifungua chumba changu nikatelemka chini. Nilienda moja kwa moja mpaka Posta ambako niliingia katika kibanda cha simu.
"Halo, Opereta, naomba Dar es Salaam nambari 07911."
"Nambari yako ngapi?"
"Nambari yangu ni Mwanza 0233".
"Subiri nitakuita".
Nilisubiri kiasi cha dakika tano hivi halafu simu ikaita.
"Halo, wewe ndiye uliyeita Dar es Salaam?"
"Ndiyo".
"Haya weka shilingi sita".
Nikaweka shilingi sita.
"Sasa zungumza".
"Halo, mzee yupo?"
"Ndiyo, yupo nani wewe?" Sauti nyororo ya kisichana iliuliza.
"Mwambie Mark"
"Halo kijana vipi?"
Sauti ya Chifu ilikuwa na mshtuko kidogo.
"Mambo si mazuri. Yule mtu wetu kapata ajali kabla sijaonana naye. Boti aliyokuwa akisafiri nayo nafikiri imetegewa bomu imelipuka na kupasuka ovyo ovyo. Watu wote wamekufa ila msichana mmoja tu. Mambo naona sasa yanaanza kufurahisha".
CHANZO: https://deusdeditmahunda.blogspot.com/
"Sasa unasemaje?"
Nilihisi kwamba yote niliyomwelezea hakuyajali.
ITAENDELEA
0 comments:
Post a Comment