MIFUPA 206 - 3

 

Simulizi : Mifupa 206

Sehemu Ya Tatu (3)





Pweza hakupoteza muda haraka bastola yake akailekezea kifuani kwa Zera kisha

akazisukuma risasi mbili ambazo ziliacha matundu mawili makubwa yakivuja damu

kifuani kwa Zera. Zera akapiga yowe kidogo na kulala pale chini huku roho yake ikiwa

mbali na mwili.

Shimo la kuuzikia mwili wake lilikuwa tayari limeshachimbwa kiasi cha umbali wa

hatua ishirini kutoka eneo lile. Shimo lile lilikuwa limechimbwa na Fulgency Kassy

na Kombe wakati ule Pweza alipokuwa ameenda kumchukua Zera kule nyumbani

kwake. Hivyo bila kupoteza muda Kombe akaibeba maiti ya Zera begani halafu wote

wakaanza kutembea wakielekea kwenye lile shimo.

Lilikuwa shimo refu kiasi lililochimbwa kando ya ule ufukwe hivyo walipofika

Kombe akainama na kuitupia maiti ya Zera kwenye lile shimo kisha kwa kutumia lile

chepe ambalo walikuwa wamekuja nalo hapo awali wakaanza kulifukia lile shimo.

Baada ya muda mfupi wakawa wamemaliza zoezi lile hivyo wakachukua lile chepe na

kuelekea kwenye lile gari huku wakiamini kuwa pindi maji ya bahari yatakapojaa jioni

ile yangelifunika kaburi lile vizuri na hivyo kuondoa ushahindi wowote wa kuzikwa

mtu eneo lile.

Muda mfupi uliyofuata walikuwa njiani wakirudi mjini na mkakati mpya wa

kumtafuta Stephen Masika.

_____

SIGARA NYINGI NILIZOZITEKETEZA WAKATI nikiisubiri simu ya Zera

nje ya mgahawa ule zilikuwa zimeyapasha moto mapafu yangu kiasi cha kutosha na

kwa kweli sikuzitamani tena kwa wakati huu. Ingawa ilikuwa ni starehe nzuri kwangu

lakini kila nilipokumbuka athari za uvutaji wa sigara nilijikuta nikiyaonea huruma

mapafu yangu.

Mara kwa mara nilikuwa nimepanga kuonana na kiongozi yeyote wa kiroho ili

anipatie mwarobaini wa kukata kiu ya starehe ile yenye madhara ya aina yake. Lakini

huwenda nikasema kuwa shetani alikuwa ameishtukia mapema dhamira yangu ya

kutaka kuikimbia bidhaa yake na hivyo kuninyima muda huo.

Niliitupia tena macho saa yangu ya mkononi na hapo nikayalaani masaa

yalivyokuwa yakitokomea. Ilikuwa ikielekea kutimia saa kumi na moja kasoro jioni

na matumaini ya kupokea simu ya Zera nayo yalikuwa yakiendelea kufifia. Mara kwa

maara nilijikuta nikishawishika kutaka kumpigia simu lakini nikajikuta nikiachana na

mpango huo pale nilipokumbuka kuwa sikuwa na namba ya Zera kwenye simu yangu.

Mvua kubwa ilikuwa ikiendelea kunyesha na kwa kweli mvua ile ilikuwa ikiendelea

kuleta madhara katika baadhi ya sehemu za jiji la Dar es Salaam. Lakini kwa wakulima

wa mashambani mvua ile ilikuwa ni neema ya aina yake.

Nilikuwa nimeamua kusogea karibu na makazi ya Zera ili pindi atakaponipigia

simu niweze kumfikia kwa haraka. Hivyo katika kufanya utafiti nikajikuta nimevutiwa

na mgahawa huu wa kisasa uliyopo Biafra eneo la Kinondoni B. Sikuwa nikihisi njaa

hivyo nikaagiza kikombe kimoja cha maziwa fresh na kuketi nje ya magahawa ule

sehemu yenye viti na meza inayotazamana na barabara kubwa ya lami.

Niliendelea kukaa eneo lile kwa muda mrefu huku nikisubiri simu ya Zera inifikie.

Mara kwa mara niliichukua simu yangu na kuitazama katika namna ya kutarajia

kuiona namba mpya ikianza kuita lakini hilo halikutokea. Mvua ilinyesha ikaacha

kisha ikanyesha na kuacha tena katika vipindi tofauti lakini simu ya Zera haikunifikia.

Kikombe cha maziwa kilipoisha nikaagiza kingine huku nikiendelea kuununua muda.

Watu walikuja na kuondoka wakiniacha bado nikiwa nimeketi eneo lile hata hivyo

simu ya Zera bado haiukunifikia. Mwishowe nikakata tamaa kabisa na kuamua

kufanya maamuzi ya kuondoka eneo lile.

Maelekezo juu ya wapi yalipokuwa makazi ya Zera nilikuwa bado nikiyakumbuka

vizuri hivyo nilipofika kwenye kituo cha daladala cha Kanisani katika barabara ya

Morocco nikaingia upande wa kulia nikikatisha katika barabara za mitaa. Haikuwa kazi

ngumu kuufikia ule mtaa wa Ukutavuka na baada ya kuchunguza na kuuliza hatimaye

nikaifikia nyumba aliyokuwa akiishi Zera. Nyumba hiyo ilikuwa ikitazamana na duka

kubwa la madawa liitwalo MM Pharmacy kama alivyokuwa ameniambia Zera mara ya

mwisho tulipokutana.

Niliegesha gari langu hatua chache kabla ya kulifikia geti la nyumba ile kisha

nikashuka na kuzitupa hatua zangu kwa utulivu kuiendea nyumba ile. Kulikuwa na

watu wachache waliokuwa wameketi nje ya baraza za nyumba za jirani zilizokuwa

zikitazamana na ile nyumba aliyokuwa akiishi Zera. Watu hao waligeuka wakinitazama

wakati nilipokuwa nikilikaribia geti la ile nyumba hata hivyo sikuwatilia maanani.

Nilipolifikia lile geti nikagundua kuwa mlango mdogo wa lile geti ulikuwa

umefungwa nje kwa komea hivyo nikalifyatua lile komea kisha nikausukuma ule

mlango na kuzama ndani. Kitendo cha kuuona ule mlango wa geti ukiwa umefungwa

kwa nje sikuwa nimetarajia kumuona mtu yeyote akija na kunikaribisha kwenye

nyumba ile kama siyo kuchungulia dirishani na hilo halikutokea. Ile nyumba ilikuwa

kimya bila dalili za uwepo wa mtu yeyote eneo lile.

Ilikuwa nyumba ndogo ambayo ujenzi wake ulikuwa ni wa namna ya kizamani

na usiyo wa gharama kubwa. Nje ya nyumba ile kulikuwa na bustani ndogo ya maua

yaliyopandwa bila kufuata mpangilio mzuri lakini bado yalipendeza. Nilimaliza

kuzipanda ngazi za baraza ya nyuma ile na hapo nikajikuta nikitazama na mlango wa

mbele wa ile nyumba.

Nilisimama kidogo nikiupima utulivu wa eneo lile kisha nikaanza kubisha hodi.

Hata hivyo nilibisha hodi mara kadhaa lakini hakuna mtu aliyeniitikia na hapo nikahisi

kuwa mle ndani ya ile nyumba hapakuwa na mtu. Hivyo nikapachika funguo zangu

malaya kwenye kufuli la mlango wa grill na baada ya muda mfupi kufuli lile likafunguka

hivyo nikaufungua ule mlango wa grill na kujikuta nikitazama na mlango mwingine

wa mbao ambao pia kwa msaada wa zile funguo mlango ule ulifunguka na hapo

nikausukuma na kuingia ndani.

Niliingia ndani ya nyumba ile na kusimama huku nikiyatembeza macho yangu.

Mandhari ya sebule ya nyumba ile yakanitanabaisha kuwa Zera alikuwa ni msichana

aliyekuwa akijipenda.

Kulikuwa na seti moja ya makochi ya sofa za kisasa,jokofu kubwa lililokuwa

kwenye kona ya sebule ile,sistimu nzuri ya muziki,meza fupi ya mbao iliyokuwa

katikati ya makochi yale na ukutani kulikuwa kumetundikwa picha ya Zera. Zaidi ya

pale sikuona kitu chochote cha kunivutia hivyo nikaelekea vyumbani.

Baada ya muda mfupi nikawa nimemaliza uchunguzi wangu mle ndani pasipo

kupata kitu chochote cha maana. Zera pia hakuwepo mle ndani na hapo nikaanza

kuhisi kuwa uchunguzi wangu mle ndani haukuwa na maana yoyote. Nilirudi tena

kule sebuleni huku nikiwa nimekata tamaa juu ya kile nilichokuwa nikikichunguza.

Nilitulia nikifikiri na hapo nikaanza kuhisi kuwa Zera alikuwa msichana tapeli

aliyekuwa akitaka kucheza na akili yangu. Hatimaye nikaketi kwenye kochi moja la

pale sebuleni huku nikitafakari namna ya kufanya. Nilipoitupia macho saa yangu ya

mkononi fikra mpya zikachipuka akilini wangu.

Ulikuwa umesalia muda mfupi kabla ya kutimia saa kumi na mbili jioni na kwa

mujibu wa kumbukumbu zangu ni kuwa ratiba ya Zera kuingia kule Vampire Casino

ilikuwa saa mbili usiku. Kwa dhana ile ni kuwa kulikuwa na muda wa masaa mawili na

ushei kabla ya kutumia saa mbili usiku. Hivyo muda huo wa masaa mawili ungeweza

kumtosha Zera kurudi kutoka huko alikokuwa na kujiandaa tayari kwenye kazini.

Fikra zile zikanirejeshea matumaini moyoni mwangu huku nikiuachia mwili wangu

ustarehe vizuri kwenye lile kochi nililoketi pale sebuleni. Subira ilikuwa silaha kubwa

katika harakati zangu hivyo niliendelea kuketi pale kwenye kochi sebuleni nikisubiri

huku nikiyatembeza macho yangu huku na kule.

Hatimaye macho yangu yakatua juu ya karatasi ndogo iliyokunjwa iliyokuwa chini ya

ile meza ndogo ya mbao pale sebuleni. Nikaichukua karatasi ile na kuanza kuichunguza

na wakati nikifanya hivyo kalamu ndogo ya wino ikaanguka chini. Nikaiokota kalamu

ile na kuanza kuichunguza na kwa kufanya hivyo mikono yangu ikapata muambukizi

wa harufu nzuri ya manukato ya kike. Hali ile ikanitanabaisha kuwa ile kalamu ilikuwa

imetoka kutumika muda mfupi uliyopita. Hatimaye nikaichukua ile karatasi na kuanza

kuipekua katika namna ya kutafuta wino wa kalamu ile ulipotumika.

Ilikuwa karatasi ndogo iliyochanwa kutoka sehemu fulani na mara tu nilipoifunua

karatasi ile nilichokiona lilikuwa ni jina la hoteli moja maarufu iliyopo kwenye ufukwe

wa Coco Beach jijini Dar es Salaam. Nilikuwa nikiifahamu vizuri hoteli ile kwani mara

kwa mara niliwahi kufika kwenye hoteli ile wakati nilipokuwa kwenye harakati zangu

huko nyuma.

Nililitazama jina la hoteli ile kwa uyakinifu huku nikishindwa kuunda hoja yoyote

kichwani mwangu. Hati iliyotumika kuandika jina la hoteli kwenye ile karatasi ilikuwa

mbaya sana kwani huwenda mwandishi alikuwa na haraka sana wakati alipokuwa

akiandika. Nikayapeleka macho yangu nikitazama pale juu ya ile meza na hapo

nikauona waya wa chaja ya simu ukiwa umetelekezwa.

Akili yangu ikaanza kufanya kazi haraka na kuniletea majibu kuwa kulikuwa na

simu iliyokuwa ikichajiwa pale mezani na simu hiyo ilipoanza kuita huwenda mpokeaji

alikuja na kuipokea kisha akatumia kalamu ile kuandika jina la hoteli ile kwenye

ile karatasi akiwa na nia ya kuweka kumbukumbu ya jina la hoteli aliloambiwa na

mpigaji wa simu hiyo. Hisia zangu zikaniambia kuwa sikupaswa kuendelea kukaa pale

sebuleni na kumsubiria Zera arudi mle ndani na badala yake nilipaswa kumfuta huko

alipokuwa.

Nilitoka nje ya nyumba ile na kufunga milango. Nilipotoka nje ya geti la ile nyumba

nikaharakisha kuliendea gari langu na muda mfupi baadaye nilikuwa mbali na mtaa

ule.

Nilikuwa na hisia kuwa endapo ningepita barabara kubwa ningeweza kuchelewa

kule niendako kutokana na foleni kubwa ya magari wakati ule wa jioni. Hivyo mara

baada ya kuingia barabara ya Morocco mbele kidogo upande wa kulia nikaingia barabara

ya mtaa wa Magangamwanza. Barabara ile ikanisafirisha hadi pale nilipokuja kukutana na

barabara ya mtaa wa Ruhinde halafu mbele kidogo nikaingia upande wa kulia nikiifuata

barabara ya Madai crescent. Mara tu nilipoingia kwenye bararabara ile nikapishana na

daladala chache zilizokatisha safari hata hivyo hakukuwa na foleni kubwa hivyo muda

mfupi baadaye nikaja kutokezea kwenye barabara kubwa ya magari ya Ali Hassan

Mwinyi.

Nilipoingia kwenye barabara ya Ali Hassan Mwinyi nikasafiri kidogo kama

ninayeshika uelekeo wa eneo la posta kuu lakini sikwenda mbali hivyo mbele

kidogo nikaingia upande wa kushoto nikiifuata barabara ya Bongo clos. Barabara ile

ikanikutanisha na barabara ya Kenyatta drive ambayo kwa mbele ilikuja kunikutanisha

na ile barabara ya Toure drive. Hivyo bahari ya Hindi nikawa nikiiona kwa upande wa

kulia kwangu.

Kulikuwa na foleni kubwa kiasi katika barabara ya Toure drive wakati huu wa jioni

hata hivyo ilinilazimu kwa mara kadhaa kuvunja sheria za barabarani na hatimaye

nikapata upenyo mzuri na kukanyaga mafuta na kuendelea na safari yangu. Niliendelea

kuendesha gari langu na baada safari fupi nikawa nauona ufukwe wa Coco beach kwa

upande wa kulia.

Usiku ulikuwa umeanza kuingia hivyo wakati huu mandhari ya bahari ya Hindi

yalikuwa ya kupendeza sana. Katika sehemu fulani niliziona taa kubwa za meli

zilizokuwa zikisogea taratibu kutia nanga katika bandari salama jijini Dar es Salaam.

Fikra zangu zilipotulia taswira ya Zera ikaumbika tena kichwani mwangu huku

nikianza kujiuliza maswali chungu mzima kichwani. Barabara ya Toure drive ilikuwa

tulivu kiasi na katika maeneo fulani barabara hiyo ilikatisha katikati ya vichaka vidogo

vya miti ya mikoko huku ikipakana na majumba makubwa na hoteli za kifahari

zilizokuwa zikitazamana na bahari.

Hatimaye nikakiona kibao kikubwa cha barabarani kinachoelekeza mahali

ilipokuwa ile hoteli ambayo jina lake nilikuwa nimeliona kwenye ile karatasi iliyokuwa

juu ya meza sebuleni kwa Zera. Kukiona kibao kile cha barabarani nikapunguza

mwendo na kukata kona nikiufuata uelekeo wa kile kibao upande wa kulia. Baada ya

umbali mfupi mara nikaiona ile hoteli.

Ilikuwa ni hoteli kubwa yenye hadhi ya nyota nne. Hoteli hiyo ilikuwa ikitazamana

na ufukwe wa bahari ya Hindi. Kulikuwa na magari machache yaliyokuwa yameegeshwa

nje ya hoteli ile hivyo nikatafuta sehemu nzuri ya maegesho na kuegesha gari langu.

Kabla ya kushuka nilitulia kidogo ndani ya gari huku nikiyachunguza mandhari

yale na wakati nikifanya hivyo nikaanza kuhisi ni kama niliyekuwa nikiendeshwa zaidi

na hisia zangu kuliko uhalisia wa mambo ulivyokuwa. Nilimkumbuka Zera na hapo

nikaanza kuhisi ugumu wa kumtafuta msichana yule niliyekuwa nikimfahamu kwa

jina moja tu katika hoteli kubwa kama ile kwani sikuwa na namba yake ya simu wala

anwani yake yoyote ambayo ingeniwezesha kumfikia. Kwa kweli nilikuwa nimefanya

makosa makubwa sana kwa kutokuchukua namba yake ya simu mara ya mwisho

tulipokutana kule kwenye kile chumba cha Vampire Casino.

Hatimaye niliyapeleka macho kuitazama saa ya kwenye dashibodi ya gari kisha

nikafungua mlango wa gari na kushuka nikielekea sehemu ya mapokezi ya ile hoteli.

Msichana mzuri mhudumu wa mapokezi yale akanikaribisha kwa bashasha zote

wakati nilipokuwa nikifika eneo lile.

“Karibu kaka”

“Ahsante!” nilimwambia msichana yule mrembo huku usoni nikitengeneza

tabasamu la kirafiki.

“Namuulizia rafiki yangu” nilimwambia msichana yule aliyekuwa ameketi nyuma

ya meza yenye umbo la nusu duara na kompyuta moja ya mezani mbele yake.

“Yupo hapa hotelini?”

“Bila shaka!” nilimwambia kwa kujiamini.

“Nitajie jina lake” yule msichana akaniambia na kwa kuwa sikuwa nikiyafahamu

majina yote ya Zera nikapata kigugumizi kidogo.

“Anaitwa Zera” nilimwambia yule mhudumu wa mapokezi na hapo nikamuona

akianza kushughulika na kompyuta yake pale mezani. Nilitulia huku nikiyatembeza

macho yangu mle ndani ukumbini na wakati huo pia nikiomba uchunguzi wangu

ufanikiwe.

“Alikuambia kuwa angefika hapa saa ngapi?” yule msichana akaniuliza huku

akiendelea kushughulika na kompyuta ya pale mapokezi.

“Kati ya saa nane na saa tisa mchana wa leo” nilimwambia yule msichana huku

nikifikiria na hapo nikamuona yule dada akiyapeleka macho yake tena kwenye kioo

cha ile kompyuta na hapo ukimya ukafuatia. Yule msichana akaendelea kushughulika

na ile kompyuta na baada ya muda akainua macho yake akinitazama.

“Katika orodha ya majina ya watu walioingia leo hotelini hapa hakuna jina hilo”

yule msichana akaniambia na nilipomchunguza nikaona hakika katika maneno

yake na hapo nikajisikia kukata tamaa.

“Anaitwa Zera” nilirudia kumwambia yule dada kwa msisitizo.

“Hatuna mteja mwenye hilo jina na kila mteja anayeingia ndani ya hii hoteli taarifa

zake ni lazima tuwenazo hapa mapokezi. Huna namba yake ya simu?” yule msichana

akaniuliza.

“Hapatikani kwenye simu” nilimwambia yule msichana huku nikifikiria nini cha

kufanya. Mashaka juu ya Zera yalikuwa yameanza kuniingia taratibu na kwa kweli

sikufahamu nilipaswa kufanya nini. Kulikuwa na hoteli nyingine za jirani na eneo lile

hata hivyo wazo la kwenda kwenye hoteli zile na kumuulizia Zera nikaliweka kando

pale nilipohisi kuwa huwenda mambo yangekuwa yaleyale.

“Nashukuru sana dada wacha niende kwani huwenda yeye ndiye aliyekosea

kunipa maelekezo”

“Karibu tena!”

Niliagana na yule msichana wa mapokezi na hapo nikaanza kuondoka eneo lile

nikielekea kwenye yale maegesho sehemu nilipokuwa nimeegesha gari langu. Wazo

la kuelekea Vampire Casino lilikuwa limenijia haraka akilini na sikutaka kujiuliza mara

mbili.

Niliingia kwenye gari langu na hapo nikaanza safari ya kuelekea Vampire Casino

huku mawazo mengi yakipita kichwani mwangu juu ya Zera. Niliendesha gari langu

taratibu huku akili yangu ikisumbuka kufikiria. Muda mfupi uliyofuata nikawa

nimetokezea kwenye barabara kuu ya lami iliyokuwa ikikatisha mbele kidogo ya

hoteli ile. Niliendelea kuendesha gari langu taratibu huku nikiyatembeza macho yangu

huku na kule katika namna ya kutafuta majibu ya maswali mengi yaliyokuwa yakipita

kichwani mwangu.

Niliendelea kuendesha gari langu huku mjadala mzito ukiendelea kupita kichwani

mwangu. Usiku ulikuwa umeingia na mvua kubwa ilikuwa imeanza kunyesha. Nikiwa

naendelea na safari yangu kwenye barabara ile kuu ya lami mara macho yangu

yakajikuta yakivutika na barabara nyingine ya lami ya zamani iliyokuwa ikichepuka

kuingia upande wa kushoto.

Kuiona barabara ile kukanipelekea nipunguze mwendo wa gari na kugeuka

nikiitazama vizuri ile barabara na hatimaye nikajikuta nikishawishika kuifuata barabara

ile. Hivyo nikaingiza gia na kukanyaga mafuta nikikunja kona kuufuata uelekeo wa

barabara ile hafifu ya lami ya zamani.

Ilikuwa ni barabara nyembamba ya lami iliyokuwa ikishuka kuelekea kwenye

fukwe ya bahari. Barabara ile yenye mashimo madogo madogo ilikuwa ikikatisha

katikati ya vichaka vya miti ya mikoko huku ikiwa imesongwa na nyasi ndefu zilizoota

kando yake.

Niliendesha gari langu taratibu huku nikiendelea kuichunguza barabara ile na kwa

kufanya vile haraka nikajua kuwa ilikuwa ni barabara isiyotumika mara kwa mara.

Niliendelea kuifuata barabara ile na mwisho nikakutana na magofu chakavu sana

yaliyotelekezwa miaka mingi.

Nilishuka kwenye gari na bastola yangu mkononi huku nikielekea kwenye yale

magofu. Nilipofika nikaanza kuyachunguza magofu yale chakavu na kwa wakati ule

yalikuwa yakionekana kama kuta mbovu za jengo la kale zilizosimama. Paa la gofu lile

lilikuwa limeezuliwa na milango na madirisha yake yalikuwa yameondolewa na kuacha

matundu makubwa yanayotisha kuyatazama gizani.

Niliingia ndani ya gofu lile na katika sehemu zake za ndani kulikuwa na nyasi

nyingi zilizoota na kutengeneza vichaka vidogovidogo.

Nilimaliza kuyazunguka magofu yale yaliyotelekezwa miaka mingi na matokeo ya

uchunguzi wangu yakanitanabaisha kuwa magofu yale yalikuwa ya Beach resort moja

maarufu iliyotelekezwa miaka mingi iliyopita. Magofu yale yakitazamana na fukwe

kubwa ya bahari ya Hindi yenye upepo mwanana.

Nilisimama mbele ya magofu yake huku nikiutazama ufukwe wa bahari ya Hindi

na kwa kweli hata ufukwe ule ulikuwa umetelekezwa kwani vichaka vya nyasi ndefu

vilikuwa vimeota kila mahali. Nilitazama upande wa kushoto na hapakuwa na njia ya

kuelekea mbele zaidi kwani sehemu ya ufukwe kwa upande ule ilikuwa imemezwa na

mwamba mkubwa wa matumbawe ya baharini hivyo hapakuwa na uelekeo wowote

kwa upande ule.

Upande wa kulia wa fukwe ile kulikuwa na mchanga mwingi hata hivyo baada

ya kuwasha kurunzi yangu na kumulika upande ule nikagundua kuwa hapakuwa na

dalili zozote za uwepo wa kiumbe hai eneo lile. Upepo mkali wa baharini ulikuwa

ukivuma na kwa mbali niliweza kuiona mandhari ya kupendeza ya jiji la Dar es Salaam

iliyotawaliwa na majengo marefu ya ghorofa yaliyokuwa yakiwaka taa usiku ule.

Kwa kweli sikuwa nimeongeza kitu chochote katika uchunguzi wangu eneo lile

na badala yake ni kama niliyekuwa nimeongeza idadi ya vificho vipya vya jiji la Dar

es Salaam nilivyowahi kuvifika. Hivyo hatimaye niliondoka sehemu ile na kurudi kule

nilipokuwa nimeegesha gari langu. Nilipofika nikafungua mlango na kuingia ndani

nikianza safari ya kurudi kule nilipotoka.

Usiku ulikuwa ukiendelea kunawiri na saa ya kwenye dashibodi ya gari mle ndani

ilionesha kuwa dakika chache zilikuwa zimesalia kabla ya kutimia saa mbili usiku.

Muda wa Zera kuingia kule Vampire Casino kama alivyokuwa amenieleza wakati

tulipoonana kwa mara ya mwisho.

Niliendelea kuwaza lakini kamwe sikuiruhusu papara katika harakati zangu. Hivyo

niliendesha gari langu taratibu na wakati nikifanya vile mawazo mengi yalikuwa

yakipita kichwani mwangu na kunifanya nihisi kuwa harakati zangu zilikuwa zikienda

taratibu sana tofauti na nilivyokuwa nikidhani hapo awali.

Niliendelea kuendesha gari langu taratibu na baada ya muda nikawa nimefika

sehemu fulani ambayo nilisimama baada ya kuona kuwa kando yangu upande wa

kushoto wa eneo lile kulikwa na barabara hafifu ya nyasi iliyokuwa ikishuka katikati

ya miti ya mikoko kuelekea chini kwenye ufukwe wa bahari. Nikashusha kioo cha

gari cha ubavuni na kuitazama vizuri barabara ile. Kwa kufanya vile nikagundua kuwa

barabara ile hafifu ya nyasi ilikuwa imepitiwa na gari muda mfupi kama siyo masaaa

machache yaliyopita.

Unapokuwa huna chanzo muhimu cha upelelezi kila kitu mbele yako unaweza

kukishuku hivyo nikaegesha gari langu kando ya barabara ile. Mvua kubwa ilikuwa

ikiendelea kunyesha hivyo nikalichukua koti langu refu na jeusi la mvua nililokuwa

nimeliweka kwenye siti ya nyuma na kulivaa kisha nikavuta droo ya kwenye dashibodi

ya gari na kuchukua bastola yangu mkononi. Hatimaye nikafungua mlango wa gari na

kushuka huku kwa msaada wa ile kurunzi yangu ndogo yenye mwanga mkali nikaanza

kumulika nikishuka kule chini kuifuata ile barabara hafifu ya nyasi ielekeayo ufukweni.

Hisia mbaya zikawa zikiongezeka taratibu kichwani mwangu kwa kadiri niliyokuwa

nikizitupa hatua zangu zilizopwaya kushuka kule chini. Wakati nikiendelea kutembea

nikaanza kuhisi kuwa hata mapigo ya moyo wangu nayo yalikuwa yameanza kwenda

mbio sambamba na baridi nyepesi iliyoanza taratibu kuutafuna mtima wangu. Hali ile

ikanipelekea niikamate vema bastola yangu mkononi.

Niliendelea kushuka kule chini huku nikiwa nimechukua tahadhari zote na baada

ya muda nikawa nimefika sehemu ambayo alama za magurudumu ya lile gari lililoingia

kwenye ile barabara hafifu ya nyasi zilikuwa zimekomea pale kabla ya gari hilo baadaye

kugeuza na kurudi lilipotoka.

Nilisimama eneo lile nikalichunguza kwa hadhari na kwa kweli sikuona viashiria

vyovyote vya sababu ya mtu kuingia na gari eneo lile na kusimama. Au labda ufanyaji

wa ngono ya wizi kwa watu maarufu waliokuwa wakiyakimbia macho ya watu.

Nilijikuta nikiwaza baada ya kukumbuka kuwa mchezo huo wa kishetani ulikuwa

umekithiri sana katika baadhi ya maeneo ya vificho vya jijini Dar es Salaam hususan

sehemu za fukwe ya bahari ya Hindi.

Nilimulika vizuri kwa kurunzi yangu eneo lile na hapo nikaziona alama za

magudurumu ya gari namna yalivyogeuza eneo lile na kurudi yalipotoka. Nikaendelea

kutazama alama ya magurudumu yale huku nikijiuliza kama dereva wa gari lile alikuwa

amekosea njia au lah!. Hata hivyo wazo langu liliyeyuka ghafla baada ya kuona alama za

viatu vya watu zilizoshuka kuelekea chini kwenye ile fukwe ya bahari. Nilipozimulika

alama zile za viatu nikagundua kuwa zilikuwa ni za viatu vya watu tofauti vikiwemo

viatu vya kike kwa namna visigino vyake vilivyochimba mchanga. Alama zile za viatu

ziliendelea kushuka kule chini zikikatisha katika vichaka vya miti ya mikoko.

Tukio lile likanistajaabisha sana na mara ile nikazidi kuwa makini nikizifuatilia

alama za viatu vile vya watu kwa nyuma. Niliendelea kuzifuatilia alama zile nikikatisha

katikati ya vichaka hafifu vya miti na hatimaye nikawa nimetokezea kwenye ufukwe

wa bahari. Kulikuwa na upepo mkali uliokuwa ukivuma eneo lile na matundu ya pua

yangu yalikaribishwa na harufu kali ya chumvi ya maji ya bahari.

Nilisimama kwa utulivu nikiutazama ufukwe ule ingawaje giza zito la eneo lile

halikunipa nafasi nzuri ya kufanya vizuri uchunguzi wangu. Nadharia ya wanajiografia

juu ya kupwa na kujaa kwa maji baharini ilikuwa ikifanya kazi eneo lile kwani wakati

ule wa usiku maji ya bahari yalikuwa yamejaa na kufunika sehemu kubwa ya fukwe ile.

Zile alama za viatu sasa zilionekana zimesimama eneo lile kwa namna mchanga

wake ulivyokuwa ardhini. Nilimulika eneo lile kwa kurunzi yangu mkononi huku

nikiendelea kuchunguza na badala ya kuona viashiria vyovyote vya matendo ya ngono

kama;nguo ya ndani ya kike au boksa ya kiume iliyosahaulika au mipira ya kondomu

iliyotumika nikashangaa kuona kikuku kilichotelekezwa kama siyo kusahaulika eneo

lile.

Niliinama na kukiokota kikuku kile mchangani na mara nilipokichunguza vizuri

koo langu likanikauka kwa mshtuko. Kile kikuku kilifanana na kikuku kilichokuwa

kimevaliwa na Zera mguuni wakati ule nilipoonana naye kule kwenye kile chumba

cha Vampire Casino. Kile kikuku kilikuwa ni kikuku cha aina yake kilichopambwa kwa

madini tofauti yanayometameta na kupendeza sana. Niliendelea kuchunguza eneo

lile na sikuona kitu kingine cha kuyavuta macho yangu hivyo kile kikuku nikakitia

mfukoni na kuendelea kuzifuatilia zile alama za viatu. Katika kuendelea kuzichunguza

alama zile nikashangazwa na kutoweka kwa zile alama za viatu vya kike hata hivyo

tukio lile halikunifanya nisitishe kuendelea na uchunguzi wangu.

Niliendelea kumulika eneo lile huku nikizifuata zile alama za viatu ambazo kwa

wakati huu zilikuwa ni alama tofauti za viatu vya wanaume watatu kwani zile alama za

vile viatu vya kike hazikuonekana tena na katika maeneo fulani niliziona alama zile za

viatu vya kiume zikiwa zinarudi kule zilipotoka.

Hatimaye nikawa nimefika eneo fulani lenye kichaka kikubwa zaidi cha miti ya

mikoko na hapo nikasimama baada ya kuvutiwa na vitu fulani. Mandhari ya eneo lile

yalikuwa yamekosa utulivu kwani nyasi zake hafifu zilikuwa zimekanyagwa ovyo na

zile alama za viatu zilikuwa zimeutibua mchanga wa eneo lile kila mahali.

Niliendelea kuchunguza zaidi eneo lile na mara nikashangazwa kuziona tena zile

alama za viatu vya kike vyenye visigino virefu zikionekana tena eneo lile.

Nilitulia kidogo nikifikiri katika namna ya kuunganisha mlolongo wa matukio

kichwani mwangu na majibu niliyoyapata yakanipelekea nizipanguse taratibu kingo za

mdomo wangu kwa ulimi.

Sasa nilifahamu kuwa yule mwanamke ambaye alama za viatu vyake nilikuwa

nimeziona kule mwanzo kuwa alikuwa amebebwa kutoka kule nilipoziona alama za

viatu vyake hadi sehemu ile niliposimama. Nilipoendelea kuchunguza zaidi nikaona

kuwa kulikuwa na damu katika maeneo fulani ya mchanga wa eneo lile na hali ile

ikazidi kunishangaza.

Hatimaye nikachuchumaa eneo lile na kuanza kuichunguza vizuri ile damu

ambayo sasa nilikuwa na hakika kuwa ilikuwa imetokana na majereha makubwa

mwilini yaliyotokana na shambulizi la risasi au kitu kingine chenye ncha kali kama

kisu. Nilipoendelea kuchunguza vizuri eneo lile mara nikaziona alama za viatu vya

kiume miongoni mwa zile alama tatu za vile viatu vya kiume zikitoka kwenye kile

kichaka na kuelekea mbele ya ule ufukwe.

Nilipozifuatilia kwa karibu alama zile za viatu mara nikaziona kuwa zilikuwa

zimepotelea kwenye yale maji ya bahari huku zikiwa zimechimba zaidi kwenye

mchanga na hapo hisia kamili zikajengeka kichwani mwangu. Hisia zikaniambia kuwa

sehemu fulani katika yale maji ya bahari yaliyojaa na kufunika ile fukwe kulikuwa na

kaburi la kificho. Moyo wangu ukapiga kite kwa nguvu pale nilipojikuta nikimfikiria Zera

Niliyatazama maji yale ya bahari na hapo nikayaona ni kama yaliyokuwa yameficha

siri kubwa sana za tukio lililotokea eneo lile masaa machache yaliyopita.

Usiku huu maji ya bahari yalikuwa yamejaa na hivyo kuimeza sehemu kubwa

ya fukwe ile hata hivyo nilikuwa makini sana kwenye hesabu za makadirio. Kwani

niliwaza kuwa kwa vyovyote vile endapo kungekuwa na kaburi eneo lile basi kaburi

hilo lisingekuwa mbali sana kutoka katika ufukwe ule wa bahari. Nilitaka kulithibitisha

hilo mapema kwani kusubiri hadi kesho kupambazuke huwenda kusingenipa nafasi

nzuri ya kufanya uchunguzi wangu.

Hivyo nikavua nguo zangu na kuziweka kando ya fukwe ile kisha nikaanza kuingia

kwenye yale maji ya bahari nikiufuata uelekeo wa zile alama za viatu. Niliingia kwenye

maji yale taratibu huku nikijaribu kuvuta hisia juu ya kile nilichokuwa nikikikanyaga

chini. Maji yalikuwa mengi na uzito wa mawimbi ya bahari mara kwa mara uliiyumbisha

miguu yangu pale nilipokuwa nikijaribu kukanyaga chini.

Baada ya hangaika ya hapa na pale hisia kutoka kwenye nyayo za miguu yangu

zikanitanabaisha kuwa nilikuwa nimekanyaga tuta dogo la mchanga sehemu ambayo

yale maji ya bahari yalikuwa yamenifikia kiunoni. Nilisimama eneo lile huku nikijaribu

kuvuta hisia juu ya kile nilichokuwa nimekikanyaga.

Hatimaye niliinama eneo lile na kuanza uchunguzi wangu. Sikuwa na nyenzo

yoyote ya kufukulia tuta lile la mchanga hivyo ilikuwa kazi ngumu. Mara kwa mara

maji yale ya bahari yalinisukasuka hata hivyo niliongeza jitihada zangu katika kulifukua

tuta lile la mchanga kwa mikono yangu na hatimaye nikafanikiwa.

Baada ya kufukua kwa muda mrefu tuta lile la mchanga hatimaye nikawa

nimefanikiwa kuushika mkono wa mtu. Kwa kweli roho iliniuma sana kila nilipojikuta

nikimfikiria Zera. Hata hivyo nikaendelea kufukua lile tuta la mchanga huku nikiuvuta

ule mkono. Baada ya kitambo kirefu cha lile zoezi likawa limekamilika.

Ulikuwa mwili wa mtu kwa namna mikono yangu ilivyohisi. Nikauvuta ule mwili

taratibu hadi kando ya ile fukwe ya bahari. Ilikuwa kazi ngumu kwa vile mwili ule

ulikuwa umeanza kuwa mzito kutokana na kukaa kwenye maji kwa muda mrefu.

Nilivyomaliza zoezi lile nikazichukua zile nguo zangu na kuzivaa kisha nikarudi pale

nilipouweka ule mwili wa yule mtu huku nikiwa na kurunzi yangu mkononi.

Nilifika pale nilipouweka ule mwili na kuanza kumulika kwa ile kurunzi yangu.

Nilichokiona pale chini kikapeleka simanzi kubwa moyoni mwangu. Mwili wa Zera

ulikuwa mbele yangu ukinitazama huku mdomo wake ukiwa wazi. Mikono na miguu

yake ilikuwa imekakamaa na nilipouchunguza uso wake nikaona kuwa ulikuwa na

majereha katika baadhi ya maeneo. Mdomo wake ulikuwa umechanika na damu

nyingi ilikuwa imevilia jichoni. Zera alikuwa amevaa mavazi yake vizuri mwilini na

hivyo nilipomchunguza nadharia ya kubakwa iliyoanza kujengeka kichwani mwangu

ikatoweka.

Niliendelea kuuchunguza vizuri ule mwili wa Zera na wakati nikifanya hivyo

nikagundua kuwa kulikuwa na matundu mawili ya risasi kifuani mwake na sumu ya

risasi hizo ilikuwa imeupelekea mwili wake kuanza kuvimba eneo lile. Kwa kweli

nilisikitika sana huku roho ikiniuma kwa kumpoteza rafiki yangu Zera. Kilichoniumiza

zaidi ni pale nilipohisi kuwa kifo chake kwa namna moja au nyingine kilikuwa

kimesababishwa na kule kuonana kwetu.

Swali likabaki kuwa ni kwa nini Zera aliuwawa kikatili namna ile?. Kipi kibaya

alichokuwa amekifanya hadi kosa lake lithaminishwe na kifo cha kikatili namna ile?.

Niliendelea kujiuliza pasipo kupata majibu na tukio lile lilikuwa limenisikitisha sana.

Sasa nilifahamu kuwa nilikuwa nikishughulika na mkasa hatari nisioufahamu

mwanzo wala mwisho wake. Sikuwa na shaka kuwa uwepo wangu sasa ulikuwa

ukifahamika na watu hao hatari na kwa maana nyingine ni kuwa watu hao walikuwa

tayari kuinunua roho yangu kwa gharama yoyote.

“Yeyote aliyehusika na kifo cha Zera alipaswa kujiandaa kulipa fidia” nilijiapia

huku nikiusogeza vizuri ule mwili wa Zera na kuulaza kwenye nyasi laini za eneo lile.

Sikutaka kuendelea kupoteza muda eneo lile hivyo niliusogeza mwili wa Zera na

kuuweka katika eneo lisiloweza kufikika na maji yale ya bahari yaliyokuwa yakiendelea

kuongezeka ili uweze kuonekana kwa urahisi. Nilipomaliza nikaanza kuondoa

viashiria vyote vya uwepo wangu eneo lile ili uchunguzi wowote ambao ungefanywa

na polisi usiweze kunihusisha. Kupitia kamera yangu ndogo ya digital iliyokuwa

mfukoni nikachukua picha chache za ile maiti ya Zera kama kielelezo makini cha

uchunguzi wangu.

Nilipomaliza nikaondoka eneo lile nikielekea kule barabarani nilipokuwa

nimeegesha gari langu. Zera alikuwa ameuwawa pamoja na taarifa muhimu ambazo

huwenda zingeweza kunisaidia katika upelelezi wangu. Sikuwa na namna ya kufanya

badala yake nilihitaji utulivu mkubwa katika kupanga juu ya hatua inayofuata.

Nilibonyeza kitufe cha mwanga na kutazama majira kwenye saa yangu ya mkononi

na hapo nikagundua kuwa dakika chache zilikuwa zimesalia kabla ya kutimia saa nne

usiku. Nilikatisha kwenye kichaka kile hafifu cha miti ya mikoko na baada ya muda

mfupi nikawa nimelifikia gari langu kando ya barabara ile ya lami pale nilipokuwa

nimeliegesha kisha nikafungua mlango na kuingia ndani. Sikuona kama lingekuwa

ni jambo la busara kuitelekeza ile maiti ya Zera katika ufukwe ule hivyo kupitia simu

yangu nikawapigia polisi na kuwafahamisha uwepo wa maiti ya Zera eneo lile huku

nikikwepa maswali mengine yasiyokuwa na msingi. Usiku bado ulikuwa na mengi ya

kusimulia.



KIJIOGRAFIA JENGO LA Vampire Casino lilikuwa kivutio kwa wateja

wastaarabu wasiopenda rabsha kwa namna lilivyokuwa kwenye mandhari

tulivu katikati ya majengo marefu ya ghorofa na majumba makubwa ya

kifahari ya watu waliowekeza vizuri duniani.

Kwa upande wa kushoto jengo laVampire Casino lilipakana na jengo refu la ghorofa

la kampuni moja maarufu ya mawasiliano. Kulia kwake jengo hilo lilipakana na hekalu

kubwa la mabaniani na baadhi ya maghorofa ya shirika la nyumba la taifa.

Nyuma yake jengo lile lilikuwa likitazamana na uwanja mkubwa wa golf,mabwawa

makubwa matatu ya kuogelea na viwanja vingine vya mazoezi ambavyo vilikiwa ndani

ya uzio mkubwa wa ukuta mrefu.

Ili kupata taswira nzuri ya kitu kilichokuwa kikiendelea upande wa mbele wa

Vampire Casino ingemlazimu mtu asimame mbele au kupanda juu ya jengo refu la

biashara la Rupture & Capture lililokuwa mbele kiasi cha umbali usiyopungua mita mia

mbili likitazamana na Vampire Casino kando ya barabara ndogo ya lami.

Uwepo wa ofisi nyingi tofauti katika jengo refu la ghorofa la biashara la Rupture

& Capture kulikuwa kumetengeneza mwanya mzuri kwa mtu yeyote kuweza kuingia

kwenye jengo lile la ghorofa la biashara bila kuulizwa wala kutiliwa mashaka na mtu

yeyote na kwa wakati wowote.

Muda wote wa mchana Koplo Tsega alikuwa ameutumia katika kufanya

uchunguzi kwenye lile jengo la Rupture & Capture akitathmini hali ya ulinzi na usalama

na miundombinu ya jengo lile kama mfumo wa lifti na ngazi zilizokuwa zikitumika

kutoka kwenye ghorofa moja kwenda kwenye ghorofa jingine. Mfumo wa nishati ya

umeme,vipenyo visivyo ramsi kama nafasi ndogo zilizokuwa baina ya bomba la maji

na kuta za jengo. Milango na madarisha ya dharura,sehemu za maliwato na eneo la

maegesho ya magari.

Ilipofika muda wa alasiri Koplo Tsega akawa amehitimisha uchunguzi wake hivyo

akashuka chini ya jengo lile la Rupture & Capture na kuliendea gari lake lililokuwa

sehemu ya maegesho ya magari ya jengo lile. Muda mfupi baadaye akaondoka eneo lile

huku kichwani akiwa na picha kamili ya mandhari yale ili wakati wa usiku atakaporudi

tena kwenye jengo lile aifanye kazi yake kwa hakika.

Kwa upande mwingine Koplo Tsega alikuwa akijivunia matunda ya utafiti wake.

Kabla ya kufika kwenye jengo lile la biashara la Rupture & Capture alikuwa amepeleleza

taarifa zote muhimu za mienendo ya mtu aliyefahamika kwa P.J.Toddo. Afisa

usalama,mwana itifaki na mkuu wa intelijensia ya tume ya upambanaji na udhibiti wa

biashara haramu ya dawa za kulevya nchini.

Miongoni mwa taarifa alizokuwa amezipata Koplo Tsega kutoka kwenye vyanzo

mbalimbali vya kuaminika ni kuwa mojawapo ya ratiba za P.J.Toddo ni kupenda

kuhudhuria Vampire Casino kila siku usiku baada ya masaa ya kazi. P.J.Toddo alikuwa

akiishi eneo la Mbezi beach na alikuwa ametengana na mkewe. Watoto wake watatu

wote walikuwa masomoni nchi za nje.

_____

SAA KUMI NA MBILI NA NUSU JIONI ILIPOTIMIA Koplo Tiglis aliegesha

gari lake kwenye viunga vya maegesho ya magari vya jengo la biashara la Rupture &

Capture. Wakati huu wa jioni magari yaliyoegeshwa kwenye yale maegesho ya magari

ya jengo lile yalikuwa yamepungua kidogo ukifananisha na ule wakati wa asubuhi na

mchana.

Baadhi ya wafanyabiashara wa jengo lile tayari walikuwa wamefunga biashara zao

na kuondoka hivyo Koplo Tsega hakusumbuka sana katika kupata sehemu nzuri ya

kuegesha gari lake. Muda mfupi uliyofuata Koplo Tsega akashuka kwenye gari lile

huku akiwa amebeba begi jeusi,refu na jembamba mgongoni mwake mithili ya begi la

kuhifadhia gitaa la mwanamuziki.

Jioni hii mwonekano wake ulikuwa tofauti na ule wa siku za nyuma tangu alipoingia

jijini Dar es Salaam. Alikuwa amevaa kofia pana na nyeusi aina ya Sombrero ivaliwayo

aghalabu na watu wa Hispania na Meksiko.

Zile Nywele zake ndefu na laini alikuwa amezinyoa katika mtindo wa kupendeza

uitwao Lowcut. Usoni alikuwa ameyaficha macho yake nyuma ya miwani myeusi

iliyoipendezesha vizuri sura yake. Mdomo wake wenye kingo nyeusi pana na laini

zilizokuwa zimekolea vizuri rangi nyekundu ya Lipstick ulikuwa umeongeza ziada

nyingine katika uzuri wake.

Koplo Tsega alikuwa amevaa Pullneck nyeusi iliyokishika vizuri kiwiliwili chake

huku chini akiwa amevaa suruali nyeusi ya jeans iliyoing’ang’ania vizuri misuli ya nyama

zake mapajani. Buti zake ngumu za ngozi miguuni aina ya Travolta zilimfanya atembee

vizuri kwa kujiamini huku akizitupa hatua zake ndefu kuelekea ndani ya lile jengo refu

la ghorofa la biashara la Rupture & Capture.

Koplo Tsega hakutaka kuyavuta macho ya watu eneo lile hivyo alizitupa hatua

zake kwa haraka akipotelea kwenye lifti ya jengo lile. Alipoingia kwenye chumba kile

cha lifti akabonyeza kitufe cha Top floor na kuiamuru lifti ile imfikishe kwenye ghorofa

ya juu kabisa ya lile jengo. Ile lifti haikuwa busy hivyo ndani ya muda mfupi akajikuta

amefika kwenye ile ghorofa ya juu ya lile jengo.

Kile chumba cha lifti kilipofika ghorofa ya juu na ule mlango wake kufunguka

Koplo Tsega akatoka na kujikuta katikati ya korido pana iliyokuwa ikitazamana na

milango ya ofisi za shirika la bima la Mwananchi Insuarance.

Kupitia milango ya vioo vya ofisi ile baadhi ya wafanyakazi walionekana wakiwa

wameinamia kompyuta zao mezani na wengine wakifanya shughuli nyingine tofauti

za kiofisi. Wafanyakazi wale wakionekana kuzama katika shughuli zao hakuna

aliyejisumbua kuinua kichwa chake na kutazama kwenye ile korido wakati Koplo

Tsega alipokuwa akipita. Milango ya ofisi zile ilikuwa imefungwa na hewa safi ya

kiyoyozi ilikuwa ikikazana kupeleka burudani ya aina yake kwa wafanyakazi wale.

Koplo Tsega aliendelea kutembea kwa haraka akiyakwepa macho ya wafanyakazi

wa ofisi zile na alipofika mwisho wa korido ile upande wa kushoto akajikuta

akitazamana na mlango mfupi mweusi ulioandikwa kwa maandishi meupe FOR

ADMINISTRATIVE USE ONLY.

Akiwa na hakika ya kule alipokuwa akielekea Koplo Tsega akafanya jitihada kidogo

za kufyatua kufuli la mlango ule mdogo. Kufuli lilipofyatuka haraka akaufungua ule

mlango na kuingia mle ndani kisha akaufunga ule mlango nyuma yake bila ya mtu

yeyote kumuona.

Kulikuwa na giza zito ndani ya chumba kile kidogo alichoingia Koplo Tsega hata

hivyo kwa msaada wa penlight ama kurunzi yake ndogo ya kijasusi na nyembamba

mithili ya kalamu ya wino aliweza kuona vizuri mbele ya chumba kile.

Upande wa kushoto wa chumba kile kidogo kulikuwa na Mainswitch iliyokuwa

ikisambaza umeme katika sehemu zote za lile jengo. Mainswitch ile ilikuwa na fyuzi

nyingi zilizopangwa kwa kufuatana na mpangilio wa ghorofa ya kwanza hadi ya

mwisho.

Mbele ya chumba kile kidogo kulikuwa na ngazi nyembamba. Ngazi hizo zilikuwa

zikielekea sehemu ya juu kabisa ya lile jengo la ghorofa la biashara la Rupture & Capture.

Koplo Tsega akazitazama kwa makini ngazi zile huku akiwa na picha kamili ya ile

sehemu ngazi zile zilipokuwa zikielekea. Aliporidhika na kumbukumbu zake akaanza

kuzikwea ngazi zile taratibu.

Alipofika mwisho wa ngazi zile akajikuta akitazamana na mfuniko mdogo wa

mlango wa chuma uliyobanwa vizuri kwa kufuli. Koplo Tsega akaifyatua kufuli ya

mfuniko ule kisha akausukuma ule mfuniko kwa juu na hapo akamalizia kuzikwea

zile ngazi. Muda mfupi baadaye akawa ametokezea sehemu ya juu kabisa ya lile jengo

la biashara la Rupture & Capture.

Mvua ilikuwa imeacha kunyesha hata hivyo manyunyu hafifu hayakukoma

kuanguka kutoka angani ingawa manyunyu hayo bado yasingeweza kumzuia mtembea

kwa miguu. Koplo Tsega mara alipofika kule juu akaurudishia vizuri ule mfuniko

mahala pake na hapo akajikuta akitazamana na mandhari ya sehemu ile ya juu kabisa

ya lile jengo la ghorofa yenye matenki makubwa ya maji. Mfumo wa mabomba mengi

ya maji yaliyotandazwa na kupishana kwenye sakafu ya juu ya jengo lile. Nyungo

nyingi za kunasa matangazo ya runinga pamoja na minara mitatu ya mawasiliano ya

kampuni za mawasiliano zilizokuwa na ofisi zao kwenye jengo lile.

Mandhari ya eneo lile yakampelekea Koplo Tsega atabasamu na kujipongeza

moyoni kwa kufanya uchaguzi makini wa jengo lile kwa kigezo kuwa lilikuwa ni

jengo refu zaidi kupita majengo mengine ya ghorofa yaliyokuwa eneo lile na hivyo

asingeweza kuonekana kirahisi na mtu yoyote wakati akiifanya kazi yake.

Akiwa sehemu ya juu kabisa ya jengo lile la ghorofa la Rupture & Capture. Koplo

Tsega akajikuta akivutiwa na muonekano mzuri wa mandhari ya jiji la Dar es Salaam

kwa baadhi ya sehemu. Mandhari hiyo ikiundwa na barabara nzuri za lami,mpangilio

mzuri wa makazi ya watu katika baadhi ya sehemu,bandari salama na majengo marefu

ya ghorofa yaliyokuwa yakiendelea kupandwa katika baadhi ya maeneo.

Koplo Tsega akayatembeza macho yake akiyatazama mandhari yale kwa utulivu

na hatimaye kuweka kituo akitazama kwenye uwazi mdogo uliofanywa baina ya tenki

moja la maji na ungo mdogo wa Dstv uliokuwa karibu na ukingo wa jengo lile na

hapo tabasamu hafifu likajivinjari usoni mwake. Muda mfupi uliofuata tayari akawa

amelifikia eneo lile na kuanza kazi yake.

Koplo Tsega akalivua begi lake kutoka mgongoni na kuliweka chini kisha

akasogea kwa tahadhari na kuchungulia chini ya jengo lile. Mahesabu yake yalikuwa ya

hakika kwani sehemu ya mbele ya lile jengo la Vampire Casino kutoka pale juu ilikuwa

ikionekana vizuri kuanzia kwenye mlango wa mbele hadi lile eneo la maegesho ya

magari.

Koplo Tsega aliyatuliza macho yake akitazama kule chini ya lile jengo huku

tabasamu jepesi likichomoza usoni mwake kisha akarudi kule alipoliacha begi lake

na kulifungua. Ndani ya begi lile kulikuwa na vifaa vingi tofauti vilivyotenganishwa ili

kurahisisha ubebaji wake. Koplo Tsega akavichukua vifaa vile na kuanza kuunganisha

kifaa kimoja akikipachika juu ya kifaa kingine kwa mikono yake imara iliyokuwa ndani

ya glovu nyeusi.

Muda mfupi uliofuata taswira kamili ya kazi ya mikono yake ikaanza kuumbika

machoni mwake. Mashine ya kutolea uhai wa binadamu kwa wepesi wa aina

yake. Bunduki ya kudungulia. Sniper rifle aina ya 338 Lapua Magnum ilikuwa mbioni

kukamilika. Koplo Tsega alipomaliza zoezi lile akaanza kuzipanga vizuri risasi kwenye

magazine ya bunduki ile na kisha kuipachika mahala pake. Mvua ilikuwa imeanza

kunyesha tena lakini hali hiyo haikuleta kikwazo chochote kwa Koplo Tsega.

Alipomaliza kuzipanga zile risasi akaingiza mkono kwenye lile begi na kuchukua

kifaa cha optic ama darubini kali ya kunasia taswira ya windo kwa wepesi wa aina yake

ambacho alikipachika juu ya ile bunduki na kulifinya jicho lake moja akirekebisha lenzi

hadi pale taswira nzuri ilipoweza kuonekana.

Muda mfupi uliyofuata kazi yote ikawa imekamilika hivyo Koplo Tsega akaichukua

ile bunduki ya kudungulia na kuisogeza kwenye upenyo mzuri uliokuwa ukitazamana

na ile sehemu ya mbele ya Vampire Casino. Alipopata pembe nzuri ya shabaha

akaifyatua Adjustable bi-pod stand ya 338 Lapua Magnum na kuitega vyema. Kilichofuata

baada ya pale ilikuwa ni kusubiri ule muda wa kufanya tukio ufike na tukio lifanyike

kama lilivyopangwa.

Koplo Tsega akajilaza kifudifudi huku kitako cha bunduki ile kikiwa kimetulia

vyema kwenye titi lake la kushoto. Mkono wake wa kushoto kwenye kilimi cha

bunduki na jicho lake moja kwenye Eyepiece lens ya darubini ya bunduki ile.

Mvua kubwa ilikuwa ikinyesha na hali ile haikumfurahisha hata kidogo Koplo

Tsega kwani mbele ya Vampire Casino kila mtu aliyefika na kushuka kwenye gari

alikimbia kwa haraka ndani ya casino ile kwa lengo la kujiepusha na mvua ile kubwa

iliyokuwa ikiendelea kunyesha na hivyo kutengeneza mazingira magumu ya kupata

shabaha nzuri kwa windo lake.

Kupitia ile darubini kali iliyokuwa juu ya bunduki yake Koplo Tsega aliweza

kuyachunguza kwa wepesi magari yote yaliyokuwa yameegeshwa kwenye eneo la

maegesho la Vampire Casino. Hakuliona gari la mtu aliyekuwa akimtafuta na hali ile

ikamtia mashaka huku akiwaza kuwa huwenda mtu huyo alikuwa amepata dharura

ambayo ilishindwa kumfikisha eneo lile kwa wakati kama siyo kutokufika kabisa. Hata

hivyo bado hakukata tamaa zaidi ya kuendelea kusubiri.

Mvua kubwa iliendelea kunyesha kisha ikaacha kabla ya kunyesha tena na hatimaye

kuacha katika vipindi tofauti.

Koplo Tsega aliendelea kujipa uvumilivu akisubiri huku mara kwa mara akiitazama

saa yake ya mkononi. Alipoitupia macho saa yake mara ya mwisho akagundua kuwa

muda wa masaa matatu tayari ulikuwa umetoweka tangu alipojibanza kwenye maficho

yale bila ya mtu aliyekuwa akimsubiri kujitokeza. Hatimaye akaanza kukata tamaa.

Koplo Tsega alipokuwa katika harakati za kutafuta mbinu nyingine mbadala ya

kutimiza lengo lake baada ya kuona masaa yanaenda bila ya mtu aliyekuwa akimsubiri

kujitokeza eneo lile mara darubini ya bunduki yake ikanasa taswira ya gari jeusi aina ya

Vw Amarok tdi likiingia na kutafuta maegesho kwenye lile eneo la maegesho ya magari

la Vampire Casino.

Tukio lile likampelekea Koplo Tsega aishike vizuri lenzi ya darubini ya bunduki

yake na kuirekebisha. Taswira nzuri ya sahani ya namba za gari lile ilipoenea vizuri

kwenye lenzi ya bunduki yake tabasamu maridhawa likajipenyeza usoni mwake na

hapo akapiga mruzi mwepesi wa kujipongeza kwa matokeo mazuri ya uvumilivu

wake.

Lile gari jeusi aina ya Vw Amarok tdi liliingia kwenye maegesho ya Vampire Casino

na kwenda kusimama umbali wa hatua chache kutoka kwenye ule mlango wa casino

kisha kikapita kitambo kifupi bila ya mtu yeyote kushuka kwenye gari lile.

Koplo Tsega alipokuwa mbioni kukata tamaa mara akauona mlango wa dereva

wa lile gari ukifunguliwa. Mwanaume mrefu mnene na mweusi mwenye kitambi

cha ukwasi aliyevaa suti nadhifu ya kodrai ya rangi ya ugoro akashuka kwenye gari

lile na kufunga mlango. Kisha akaanza kutembea taratibu kwa kujiamini akielekea

kwenye ule mlango wa mbele wa Vampire Casino. Umri wake alikuwa miaka hamsini

na ushei na alikuwa ameshika simu kubwa ya kifahari ama smart phone na funguo za

gari amening’iniza mkononi mwake.

Koplo Tsega akajisogeza vizuri kwenye ile bunduki yake huku akilifinya jicho lake

moja ili kuliruhusu jicho lake jingine kuona vizuri taswira ya kiumbe kile kilichokuwa

mbele yake kupitia ile darubini kali iliyokuwa juu ya bunduki yake ya kudungulia.

Alichokiona mbele yake kupitia darubini ile akapata hakika kuwa yule mtu

aliyekuwa akimsubiri kwa muda wa masaa matatu yaliyopita juu ya jengo lile la ghorofa

la biashara la Rupture & Capture alikuwa ndiye yule aliyekuwa akimuona mbele yake.

Mtu yule alikuwa ni P.J.Toddo.

Koplo Tsega aliendelea kumtazama P.J.Toddo kwa makini huku akiirekebisha

vizuri darubini ya bunduki yake. Taswira ya mgongo wa P.J.Toddo ilipoenea vizuri

kwenye msalaba wa shabaha Koplo Tsega akavuta pumzi nyingi na kuibana kifuani

kisha kwa utulivu wa hali ya juu akavuta kilimi cha 338 Lapua Magnum.

P.J.Toddo hakumaliza kupanda ngazi ya mwisho ya baraza ya Vampire Casino. Ile

risasi moja ya Sniper rifle yenye ukubwa sawa na ule wa kidole gumba cha mtu mzima

ikapenya mgongoni kwenye koti lake la suti upande wa kushoto na kumtupa hewani

huku ikiacha tundu kubwa kwenye moyo wake. Risasi ile ikatokezea mbele yake na

kusafiri ikienda kukichangua vibaya kioo cha mlango wa mbele wa ile casino na hapo

sauti mbaya ya mpasuko wa kioo kile ikasikika.

P.J.Toddo alipokuwa akitua chini risasi nyingine ikaichangua vibaya shingo yake

na kumtupa mbele huku funguo ya gari na ile simu yake mkononi vikimponyoka.

P.J.Toddo hakupata nafasi ya kuomba maji kwani alipotua chini ya sakafu ya

baraza ile kiwiliwili chake kilitikisika kidogo na kutulia huku majeraha yake yakivuja

damu nyingi.

Koplo Tsega akiwa ameridhika na kazi yake akachukua kitabu kidogo na kalamu

kutoka mfukoni mwake. Kitabu hicho kilikuwa na orodha ya majina ya watu aliokuwa

akiwatafuta. Akaanza kuyapitia majina yale hadi pale alipolifika jina la P.J.Toddo

ambapo aliweka kituo na kuchora alama ya X juu ya jina lile huku tabasamu jepesi

likijivinjari usoni mwake. Alipokirudisha kitabu kile mfukoni akachukua pipi ya kijiti

na kuimenya taratibu kisha akaitia mdomoni.

“Rest in fire P.J.Toddo,rafiki zako watakufuata hivi karibuni” Koplo Tsega akajikuta

akinong’ona huku akiifyatua na kuikunja vyema stendi ya Sniper rifle 338 Lapua Magnum

na kuelekea sehemu alipoliacha begi lake.

_____

NILIKUWA MIONGONI MWA WATU WACHACHE walioshuhudia kwa

ukaribu tukio lile la kupopolewa vibaya na risasi la mwanaume mmoja kwenye baraza

ya Vampire Casino. Muda mfupi uliyopita nilikuwa nimeingia na kuegesha gari langu

kwenye eneo la maegesho ya magari la Vampire Casino nikitokea kule kwenye ile fukwe

ya bahari ya Hindi alipouwawa Zera.

Akili yangu bado ilikuwa ikitafunwa na jinamizi la hisia mbaya za kifo cha Zera

hata hivyo kifo kile kilikuwa kimenijengea dhana timilifu katika fikra zangu. Dhana ya

kuwa wale watu waliomuua Zera walikuwa wakiutambua vizuri uwepo wangu. Hivyo

nilipaswa kuwa makini katika harakati zangu.

Wauaji walikuwa wakiniwinda na hali ile niliipenda sana kwani tafsiri yake ni kuwa

kadiri wauaji hao walivyokuwa wakinikaribia walikuwa wakiniweka karibu na majibu

ya maswali yangu. Niliwaona adui zangu kama watu waoga mno wasiokuwa na ujasiri

wa kunifikia na badala yake walikuwa wakijaribu kuniogopesha kwa kumuua Zera.

Mara baada ya kuegesha gari langu kwenye lile eneo la maegesho ya magari la

Vampire Casino nilikuwa nimeamua kutoshuka kwenye gari langu hasa baada ya

kukumbuka vizuri ule mtafutano niliyousababisha mara ya mwisho wakati nilipoingia

ndani ya casino ile na kuonana na Zera.

Hadi wakati huu nilikuwa na hakika kuwa taarifa zangu zilikuwa tayari zimeufikia

uongozi wa ile casino na polisi huku nikihusishwa moja kwa moja na lile tukio la kifo

cha yule mtu kwenye kile choo cha casino siku ya jana. Zera alikuwa amekufa katika

harakati za kunisaidia nionane na Milla Cash,msichana kahaba professional wa jiji la Dar

es Salaam. Lakini lengo lake lilikuwa halijatimia na hivyo nilikuwa nimeamua kuanza

kazi hii upya kabisa.

Ingawa nilikuwa sina ratiba kamili ya Milla Cash juu ya kuingia na kutoka kwake

kwenye casino ile hata hivyo nilikuwa nimeazimia kusubiri nikiwa ndani ya gari langu

hadi hapo nitakapoliona lile gari jeusi aina ya Texas Longhorn Tailgate Van linalomleta

na kumchukua Milla Cash ili nianze kazi yangu.

Nikiwa ndani ya gari langu niliendelea kuyatembeza macho yangu nikichunguza

vizuri kila mtu aliyekuwa akiingia na kutoka kwenye ule mlango wa casino. Huku

nikiamini kuwa huwenda kwa kufanya vile majibu ya maswali yangu mengi kichwani

yangeweza kupatikana kwa urahisi.

Nikiwa naendelea kusubiri ndani ya gari langu nje ya eneo lile la maegesho ya casino

mara macho yangu yakajikuta yakivutiwa na gari jeusi la kifahari aina ya Vw Amarok

tdi lililokuwa likiingia kwenye viunga vya maegesho ya magari ya casino ile na kutafuta

sehemu nzuri ya maegesho. Gari lile liliposimama mara nikauona mlango wa dereva

ukifunguliwa kisha mwanaume fulani akashuka huku mkononi akiwa ameshika simu

na amening’iniza funguo za gari.

Mwanaume yule mnene na mweusi mwenye kitambi cha ukwasi alikuwa amevaa

suti nadhifu ya kodrai ya rangi ya ugoro. Mara aliposhuka kwenye lile gari mwanaume

yule akaanza kutembea akielekea kwenye ule mlango wa casino.

Ilikuwa ni wakati mtu yule alipokuwa akimaliza kupanda ngazi ya mwisho ya baraza

ya casino pale kilipotokea kitu kilichonishtua sana. Ghafla nilimuona mwanaume yule

mrefu akisombwa hewani na kutupwa mbele ya baraza ya casino ile kama kishada.

Halafu muda uleule nikasikia sauti kali ya mpasuko wa kioo cha mlango wa ile casino

huku ile simu ya yule mtu ikiangukia kwenye sakafu ya baraza ile na kuchanguka ovyo

Watu wachache walioliona tukio lile wakashikwa na taharuki hata hivyo mimi

sikuwa miongoni mwao na badala yake fikra zangu zilijikita katika kutaka kujua nini

kilichokuwa kimemsibu mtu yule.

Nilifungua mlango wa gari langu haraka na kushuka huku uzoefu wangu ukinieleza

kuwa ile ilikuwa ni kazi ya kitaalam sana na ya aina yake kuwahi kutokea jijini Dar es

salaam. Wakati nikimkaribia yule mtu aliyeangushwa kwa risasi ambaye wakati huu

alikuwa amelala chali kwenye ile baraza ya casino huku akiwa hajitambui,fikra zangu

zikahamia kwa mdunguaji.

Yoyote aliyefanya tukio lile alipaswa kuitwa mdunguaji hatari wa daraja la kwanza

kabisa kwa ubora wa kazi yake na asiyekubali risasi yake ipotee bila majibu. Wazo hilo

likanifanya nigeuke haraka na kuanza kuyachunguza majengo ya ghorofa yaliyokuwa

jirani na eneo lile.

Nilikuwa sahihi kabisa na kama ningechelewa huwenda nisingefahamu haraka

kilichokuwa kikiendelea eneo lile. Juu ya jengo lile la ghorofa la biashara la Rupture &

Capture lililokuwa likitazamana na ile casino nilimuona mtu fulani aliyevaa kofia nyeusi

ya Sombrero na mavazi meusi akitokomea kwenye ukingo wa jengo lile. Hisia zangu

zikaniamba kuwa mtu yule alikuwa mwanamke kutokana na mwonekano wa umbo

lake na hapo maswali mengi yakaanza kupita kichwani mwangu huku nikishindwa

kuelewa kilichokuwa kikiendelea eneo lile. Hata hivyo wazo fulani likanijia kichwani

kuwa endapo ningeweza kucheza vizuri na muda ningeweza kulifikia lile jengo la

Rupture & Capture na kumtia mikononi yule muuaji ambaye nilikuwa na kila hakika

kuwa wakati ule bado alikuwa katika harakati za kulitoroka jengo lile.

Sikutaka kupoteza muda hivyo nilimsogelea yule mtu aliyedunguliwa vibaya kwa

risasi ambaye wakati huu alikuwa amelala chali kwenye ile balaza ya casino huku damu

nyingi kutoka kwenye majeraha yake ikiendelea kusambaa pale chini sakafuni.

Nilitaka kufahamu kuwa mtu yule alikuwa nani kabla ya mashuhuda wengine

hawajafika eneo lile. Hivyo haraka niliinama na kumchunguza vizuri yule mtu kwa

makini. Hata hivyo sikufanikiwa chochote kwani sura ya yule mtu ilikuwa ngeni kabisa

machoni mwangu. Bila kupoteza muda mikono yangu ikaanza kufanya ziara fupi

kwenye mifuko ya suti ya mtu yule.

Nilipomaliza upekuzi wangu nikawa nimefanikiwa kupata kadi ndogo ya

kitambulisho cha kazi cha yule mtu,leseni yake ya udereva na kadi ndogo ya mwanachama

wa Vampire Casino. Niliposoma maelezo yaliyokuwa kwenye kitambulisho cha kazi

cha yule mtu nikagundua kuwa yule mtu alikuwa ni mwanausalama mwenye cheo cha

juu sana na jina lake aliitwa P.J.Toddo.

Nilivirudisha vitambulisho vile mfukoni mwake na hapo nikaendelea kufanya

upekuzi kwenye sehemu nyingine za mwili wake. Bastola yake 38 Police automatic ilikuwa

kwenye mfuko wa koti lake la suti. Niliichukua haraka bastola ile na kuichunguza

na hapo nikagundua kuwa ilikuwa imejaa risasi. Hata hivyo sikuichukua badala yake

nikairudisha kwenye ule mfuko huku nikimwacha yule mtu na kusogea jirani kidogo

na eneo lile sehemu ilipoangukia ile simu yake ya mkononi.

Ile simu ilikuwa imechanguka na kila kitu kilikuwa kimesambaratikia sehemu yake.

Niliyatembeza macho yangu haraka eneo lile na hapo nikaiona Simcard ya ile simu ya

yule mtu iliyochanguka pale chini sakafuni. Nikaichukua ile Simcard haraka na kuitia

mfukoni.

Watu wachache waliokuwa wameanza kusogea eneo lile sikuwapa nafasi ya

kunishangaa na badala yake haraka nikajichanganya kati yao na kuwatoroka. Nilipofika

nje ya lile eneo la Vampire Casino nikaanza kutimua mbio nikielekea kwenye lile jengo

la ghorofa la biashara la Rupture & Capture lililokuwa likitazamana na lile jengo la

Vampire Casino.

Nilifika kwenye lile jengo la ghorofa la biashara la Rupture & Capture ndani ya muda

mfupi sana huku mawazo yangu yakanituma nielekee sehemu ilipokuwa lifti ya jengo

lile. Lakini kitendo cha kuiona lifti ile ikifika chini kwenye Ground floor kikanipelekea

nisite kukikaribia kile chumba cha lifti na hivyo kujibanza pembeni nyuma ya nguzo

moja ya jengo lile.

Mlango wa kile chumba cha lifti ulipofunguka mtoto mdogo wa kike aliyevaa sare

ya shule ya msingi akatoka huku akionekana kufurahia safari yake kwenye ile lifti na

mbali na pale hakukuwa na mtu mwengine yeyote ndani ya chumba kile. Kwa kweli

nilishangazwa sana na tukio lile.

Machale yakanicheza pale nilipowaza kuwa yule mdunguaji bado alikuwa ndani ya

lile jengo na huwenda alikuwa ameachana na wazo la kushuka chini ya lile jengo kwa

kutumia lifti baada ya kuhisi hatari ya kushindwa kulitoroka jengo lile.

Hisia zile zikanipelekea niharakishe haraka kuelekea upande wa kushoto mwisho

wa lile jengo sehemu kulipokuwa na ngazi za kuelekea ghorofa za juu za lile jengo.

Nilipozifikia zile ngazi nikaanza kuziparamia haraka nikizikwea huku nikiwa

nimechukua tahadhari za aina zote. Nilipofika ghorofa ya pili ya lile jengo sikumwona

yule mtu hivyo nikaendelea kuzikwea tena zile ngazi nikielekea ghorofa ya tatu.

Katika korido ya ghorofa ya tatu nilipofika nikakutana na kijana mmoja wa kiume

mfanyakazi wa ofisi za mawasiliano zilizokuwa eneo lile. Nikamuuliza kijana yule

kama alikuwa amemuona mtu aliyekuwa akifanana na maelezo yangu. Yule kijana

hakuonekana kuelewa chochote kilichokuwa kinaendelea kwenye jengo lile hivyo

nikaachana naye na kuzidi kukwea ngazi za kueleka ghorofa ya nne ya lile jengo.

Mara tu nilipoingia kwenye korido ya ghorofa ya nne ya lile jengo ghafla nikakutana

na yule mtu ambaye nilikuwa nimemuona kule sehemu ya juu ya lile jengo muda

mfupi baada ya yule mtu kupopolewa vibaya na risasi kwenye ile baraza ya Vampire

Casino. Nilikutana na mtu yule katikati ya korido pana ya ile ghorofa.

Alikuwa msichana wa makamo aliyevaa mavazi meusi na kofia ya Sombrero

kichwani. Mgongoni alikuwa amebeba begi jeusi,jembamba na refu la ngozi huku

macho yake akiwa ameyafunika kwa vioo vyeusi vya miwani yake. Sikupata nafasi ya

kumtathmini vizuri msichana yule usoni ingawa niliweza kuukadiria umri wake kuwa

ulikuwa ni kati ya miaka ishirini na tano hadi ishirini na saba.

Ingawa msichana yule alikuwa amevaa viatu virefu vya ngozi aina ya Travolta lakini

alikuwa akitembea haraka na kwa kujiamini huku mjongeo wake ukitengeneza starehe

ya kipekee iliyotokana na mtikisiko wa umbo lake la kike lakini kakamavu.

Mara tu nilipoingia kwenye korido ile yule msichana alikuwa akija mbele yangu

hivyo tulipishana huku akili yangu ikianza kufanya kazi haraka katika kutaka kuamua

nifanye nini. Hata hivyo sikuendelea mbele na safari yangu hivyo mara tu tulipopishana

na msichana yule nikageuka haraka na kumtazama. Bahati mbaya au nzuri ni kuwa

na yeye alikuwa na lengo kama langu la kugeuka na kunitazama. Hivyo macho yetu

yakakutana.

Nilichoweza kukiona katika uso wa msichana yule ni hasira na chuki mbaya

iliyoshindwa kujificha. Hisia zilikuwa ni jambo muhimu sana katika kazi yangu na

kamwe sikutaka kuzipuuza. Macho ya dada yule yaliyojificha nyuma ya miwani myeusi

yalipokutana na macho yangu yule dada aligeuka na kuendelea tena na safari yake

mara hii kwa haraka zaidi.

“Hey…!” nilimuita yule dada.

“Haloo...!” nilimwita tena yule dada lakini ilikuwa kazi bure kwani yule dada

hakuniitikia wala kusimama badala yake aliendelea kuharakisha akielekea mwisho wa

ile korido na hapo fikra fulani zikanijia akilini kuwa alikuwa akiiwahi lifti ya lile jengo.

Sikutaka kuendelea kumsubiri yule dada ageuke tena na kuniitikia hivyo nikageuka

na kuanza kutimua mbio nikimfukuza. Hata hivyo nilikuwa nimechelewa kwani

kile chumba cha lifti tayari kilikuwa kimefika kwenye ile ghorofa na mlango wake

ulipofunguka mwanaume mmoja alitoka. Tukio lile likampa fursa nzuri yule dada

niliyekuwa nikimfukuza aingie ndani ya chumba kile cha lifti huku akigeuka na

kunitazama kwa uso wa tabasamu jepesi lenye kunicheka.

Nilikuwa nimechelewa kwani wakati nilipokuwa nikikikaribia kile chumba cha lifti

mlango wake ukawahi kujifunga nikiwa nimesaliwa na hatua chache tu kukifikia kile

chumba.

Nikasimama ghafla huku nikiilaumu akili yangu kwa kuchelewa kung’amua

haraka hila ile. Hata hivyo sikukubali kushindwa hivyo haraka nikaanza kutimua mbio

kuzirudia tena zile ngazi za kushukia ghorofa ya chini ya jengo lile zilizokuwa mwisho

wa ile korido. Nilipofika nikaanza kushuka chini haraka.

Nilipofika chini kwenye ghorofa ya tatu ya jengo lile nikakiona kile chumba cha

lifti kikiendelea kushuka ghorofa ya chini bila kusimama. Hivyo nikaendelea kushuka

zile ngazi nikielekea ghorofa ya pili huku hasira ikizidi kuchemka mwilini mwangu

kwa kile kitendo cha kupigwa chenga kama mtoto.

Kile chumba cha lifti kilipofika ghorofa ya pili kikasimama na mlango wake

ukafunguka. Nikiwa katika hali ya kusubiri mara nikamuona yule dada akitoka kwenye

kile chumba cha lifti lakini kutokana na msongamano mkubwa uliyosababishwa na

wafanyakazi wengi waliokuwa wakitoka kwenye ofisini za jengo lile sikupata nafasi ya

kumfikia yule dada kwa urahisi.

Hivyo nikaanza kulipangua lile kundi la wafanyakazi waliokuwa wakitoka kwenye

zile ofisi nikimfuata tena yule dada. Kitendo kile kikawa kimemshtua yule dada

niliyekuwa nikimfukuza. Yule dada alikuwa tayari ameshajichanganya kwenye lile

kundi la wafanyakazi waliokuwa wakitoka maofisini na aliponiona nikilipangua lile

kundi la wafanyakazi kumfuata akawahi kuichomoa bastola yake mafichoni.

Muda uleule nikasikia milio mitatu ya risasi kwenye ile korido na ghafla kukawa

na giza zito mle ndani. Kilichofuata baada ya pale zilikuwa ni sauti za vilio na mayowe

zikihanikiza kila pembe kwenye korido ile. Moyo wangu ukapiga kite kwa nguvu

baada ya kuhisi kuwa kwa mara nyingine nilikuwa nimezidiwa ujanja na na yule dada.

Kuzidiwa ujanja kwa mara ya pili,hali ile iliusononesha sana moyo wangu. Hata

hivyo sikuwa na namna ya kuusuluhisha mgogoro ule mkubwa uliokuwa ukiendelea

kwenye nafsi yangu. Hivyo nikapiga moyo konde na kuitupa karata yangu ya mwisho

iliyosalia mkononi.http://pseudepigraphas.blogspot.com/

Ramani ya jengo lile hadi kwenye ghorofa ya nne sasa nilikuwa nikiifahamu vizuri

kwa muda mfupi niliyofanikiwa kuwa mwenyeji wa jengo lile. Kutoka pale nilipokuwa

nilikuwa nimebakisha ngazi chache tu kufika ghorofa ya chini kabisa ya lile jengo.

Kutoka pale nilipokuwa sikuwa mbali sana na zile ngazi za kushukia ghorofa

ya chini kabisa ya lile jengo. Hivyo nilianza kutimua mbio nikilipangua lile kundi la

wafanyakazi waliokuwa wakihaha huku na kule baada ya ile milio ya risasi kusikika.

Nilizifikia zile ngazi na kuanza kushuka chini haraka huku nikiwapita wale

wafanyakazi ambao nao walikuwa wakitimua mbio kushuka kwenye ile ghorofa

ya chini. Nilipofika kwenye ghorofa ya chini ya lile jengo nikashika uelekeo wa

kilipokuwa kile chumba cha lifti lakini safari hii nikiwa nimeikamata vyema bastola

yangu mkononi tayari kujibu shambulizi lolote ambalo lingejitokeza mbele yangu.

Wakati nikikifikia kile chumba cha lifti mara nikauona mlango wake ukianza

kujifunga na nilipochungulia mle ndani hapakuwa na mtu yoyote. Nikasimama huku

nimeshikwa na mshangao usioelezeka.

“Yule dada alikuwa ameshatoka kwenye kile chumba cha lifti na kutokomea?”

nilijiuliza pasipo kupata majibu na nikiwa katika hali ile mara wazo fulani likanijia

akilini. Nikageuka haraka kutazama eneo la maegesho ya magari ya lile jengo na hapo

nikaliona gari dogo jeupe,teksi ya abiria aina ya Corolla limited likiacha maegesho ya

jengo lile na kuingia barabarani. Machale yakanicheza tena hivyo nikaanza kutimua

mbio nikiifukuza ile teksi. Sikufanikiwa kwani huwenda kila kitu kilikuwa kimepangwa.

Gari lile Corolla limited nyeupe yenye kibandiko cha teksi juu yake na ufito wa njano

ubavuni likaondoka kwa kasi eneo lile na kuingia barabarani huku mimi nikiwa umbali

usiopungua mita hamsini kutoka pale nilipokuwa.

Nikaendelea kutimua mbio nikilifukuza lile gari lakini nilikuwa ni kama mtu

niliyekuwa nikiendeshwa na nguvu za mwili na siyo utashi wangu kwani hapakuwa na

uwiano wowote kati ya mbio zangu za miguuni na magurudumu ya gari lile yaliyokuwa

yakizunguka kwa kasi ya ajabu. Hatimaye mdunguaji akawa ameniacha huku nikiwa

siamini macho yangu.

Nilisimama nikilitazama gari lile namna lilivyokuwa likitokomea mbele yangu

huku donge la hasira likiwa limenikaba kooni. Kwani kwa maana nyingine ni kama

niliyekuwa nimepoteza pointi zote muhimu za ushindi katika pambano langu.

Mwishowe nilikata tamaa kabisa na kuanza kutembea kivivuvivu nikirudi kule kwenye

eneo la maegesho ya magari la Vempire casino huku mawazo mengi yakipita kichwani

mwangu.

Kitu kingine cha kushangaza ni kuwa wakati nikilifikia lile eneo la maegesho la

Vampire Casino ule mwili wa yule mtu aliyedunguliwa vibaya kwa risasi kwenye baraza

ya casino ile muda mfupi uliyopita ulikuwa tayari umeondolewa na ile sehemu ya

baraza ilikuwa imesafishwa vizuri kiasi kwamba mtu yeyote ambaye angefika eneo lile

asingeweza kufahamu kitu kilichokuwa kimetokea muda mfupi uliopita.

Hali ile ikanishangaza sana huku nikijiuliza kama kulikuwa na ulazima wowote wa

polisi kufanya uchunguzi wao na kuuondoa haraka mwili wa yule mtu. Niliendelea

kulichunguza eneo lile na hapo nikagundua kuwa hata kile kioo cha mlangoni

kilichokuwa kimechanguliwa kwa risasi za mdunguaji nacho kilikuwa kimerudishiwa

kipya. Yaani mambo yalikuwa yameenda haraka mno kiasi cha kuzishangaza sana

fikra zangu huku nikishindwa kuelewa kilichokuwa kikiendelea kwenye casino ile.

Wakati huu yalikuwa yamesalia magari machache kwenye lile eneo la maegesho

la Vampire Casino. Hisia za kutopiga hatua yoyote katika harakati zangu bado zilikuwa

zikiisimanga nafsi yangu na kwa kweli hali ile iliidhoofisha sana akili yangu.

Nilimfikiria Milla Cash na kuanza kuhisi kuwa huwenda angekuwa chanzo

muhimu cha kusonga katika harakati zangu. Hata hivyo nilitambua kuwa suala lile

kwa sasa lisingewezekana kwa urahisi. Hivyo nikaingia kwenye gari langu na kuyaacha

maegesho yale.

_____

“NYINYI MNADHANI NI KITU GANI KINACHOENDELEA?” Fulgency

Kassy akawauliza wenzake ikiwa ni muda mfupi mara baada ya mwili wa P.J.Toddo

kuondolewa na kupelekwa kwenye chumba cha kuhifidhia maiti katika hospitali ya

taifa ya Muhimbili.

“Mimi ninahisi kuwa huwenda kuna mtu au watu fulani waliopo nyuma ya mpango

huu” Pweza akaongea kwa tafakuri na hapo Fulgency Kassy akageuka na kumtazama.

“Sitaki kukubali akilini mwangu kuwa vifo vya Guzbert Kojo na huyu P.J.Toddo ni

vya bahati mbaya kwani mkitafakari vizuri mtagundua kuwa watu hawa wameuwawa

nyuma ya mipango timamu” Pweza akaongea kwa msititizo.

”Taratibu hata mimi naanza kukubaliana na hoja yako lakini swali la msingi

linaendelea kubaki palepale kuwa ni nani aliyeko nyuma ya mpango huu?” Fulgency

Kassy akaongea huku akiendelea kufikiri.

“Hilo ndiyo suala tunalotakiwa kushughulikanalo kuanzia sasa vinginevyo kama

wangekuwa hai tungeweza kusema moja kwa moja kuwa ni wale Tumbili” Pweza

akaongea kwa utulivu

“Tumbili gani?” Kombe akauliza

“Koplo Tsega na Sajenti Chacha Marwa” Pweza akafafanua

“Mimi nina wazo moja” Kombe akaingilia kati na kuwapeleka wenzake wageuke

na kumtazama kwa shauku.

Wote walikuwa wamesimama nje ya jengo la Vampire Casino. Taarifa za kuuwawa

kwa P.J.Toddo zilikuwa zimewafikia muda mfupi uliyopita wakati walipokuwa

wakitoka kwenye ule ufukwe wa bahari walipomzika Zera. Walichokifanya mara

baada ya kufika pale casino ilikuwa ni kufanya taratibu za haraka za kuuondoa mwili

wa P.J.Toddo pasipo kuwashirikisha polisi kwa sababu walizokuwa wakizijua wao.

“Wazo gani?” Pweza akamuuliza Kombe kwa shauku. Kombe alikuwa

amechuchumaa nje ya baraza ya casino huku macho yake yakiendelea na uchunguzi.

“Risasi zilizomzimisha P.J.Toddo huwenda zikawa zimetokea pale juu” Kombe

akaongea kwa utulivu.

“Wapi?” wote wakauliza kwa shauku.

“Juu kabisa ya lile jengo la biashara la Rupture & Capture” Kombe akaongea na

hapo wote wakageuka na kutazama sehemu aliyokuwa akitazama.

“Kwanini unadhani hivyo?” Fulgency Kassy akauliza huku akiendelea kutazama

kule juu ya lile jengo.

“Ukitazama vizuri kule juu utagundua kuwa kuna pembe nzuri sana ya shabaha

inayoweza kutumiwa na mdunguaji” Kombe akaendelea kufafanua.

“Mdunguaji katika jiji la Dar es Salaam?” Pweza akauliza kwa mshangao

“Dar es Salaam bado haijafikia kuwa na matukio ya uhalifu wa namna hiyo”

Fulgency Kassy akaongea akionekana kupingana na wazo la Kombe.

“Nimelitumikia jeshi kwa zaidi ya miaka nane kwa hivyo ninauzoefu mzuri na

hiki ninachokizungumza. Mtu wa kawaida hawezi kuwa na ufundi wa kumdungua

mtu katika umbali huu tena bila kupoteza risasi hata moja” Kombe akaongea kwa

msisitizo huku akiendelea kutazama kule juu.

“Kwa hiyo unataka kutuambia kuwa P.J.Toddo ameuwawa kwa risasi za

mdunguaji?” Fulgency Kassy akauliza tena huku akimtazama Kombe kwa uyakinifu.

“Sina hakika lakini hilo linawezekana kufanyika” Kombe akaongea huku

akiendelea kufikiri.

Maelezo ya Kombe yakawapelekea Fulgency Kassy na Pweza wageuke na

kutazamana kisha ukimya ukafuatia baina yao huku kila mmoja akizishirikisha vizuri

hisia zake.

“Yeyote aliyemdungua P.J.Toddo anapaswa kuwa askari mzoefu na mdunguaji

makini” Kombe akaendelea kufafanua.

“Askari jeshi au polisi?” Fulgency Kassy akauliza kwa makini.

“Anaweza kuwa ni yeyote kati yao” Kombe akafafanua.

“Kwanini unadhani hivyo?” Pweza akauliza.

“Mara nyingi protokali za kijeshi hufuatwa pale siasa inapoonekena kushindwa

kufanya kazi” maneno ya Kombe yakawapelekea wenzake wageuke kumtazama kwa

shauku.

“Una maana gani kusema hivyo?” Fulgency Kassy akauliza kwa shauku.

“Huelewi nini hapo mbona kila kitu kipo wazi na kinajieleza. Nyinyi wote si

mnajua kuwa kazi tunayoifanya hapa kwa kiasi kikubwa ni kwa minajili ya kulinda

maslahi ya wanasiasa. Kumbukeni kuwa katika hii tume kulikuwa na wanajeshi ambao

kwa sasa tumewazika. Lakini hatuwezi kujua kuwa hao wanajeshi waliokuwa kwenye

hii tume kama walikuwa wao peke yao au lah!”

Maelezo ya Kombe yakawapelekea Fulgency Kassy na Pweza waupishe utulivu

vichwani mwao huku kila mmoja akionekana kuzama kwenye tafakuri nzito. Kitambo

cha Ukimya kikapita kabla ya Pweza kukohoa kidogo na kuvunja ukimya.

“Jambo la kwanza muhimu ni kuhakikisha kuwa polisi hawajitumbukizi katika

suala hili” Fulgency Kassy akaongea kwa utulivu.

“Mimi naona sasa ipo haja ya kumshirikisha mkuu” Pweza akaongea huku akifikiri

“Hilo ni wazo zuri lakini kwa sasa nafikiri bado tunayo nafasi ya kulimaliza suala

hili sisi wenyewe” Fulgency Kassy akadakia.

“Mimi nadhani suala hapa siyo nafasi ila ni kukaa chini mapema na kulipima

jambo lenyewe kama litaweza kutatulika kwa kigezo cha muda. Wakati fulani

unaweza kupewa muda mrefu wa kufanya mtihani uleule na kujikuta ukifeli. Hivyo

mimi nadhani tulitafakari hili suala kwa mapana yake kwani sote tuliamini kuwa

kwa kuwafumba mdomo Koplo Tsega na Sajenti Chacha Marwa ndiyo lingekuwa

suluhisho. Lakini sasa nafikiri kuwa huwenda hatukuwa sahihi. Guzbert Kojo na

P.J.Toddo wameuwawa na huwezi kujua nani atakayefuatia baada ya hapa. Hivyo

tusipokuwa makini kadhia hii itahamia kwetu” Kombe alimaliza kuongea huku

akisimama pale chini.

“Huwenda ukawa upo sahihi ingawa mimi nayaona mawazo yako ni kama

yanayoegemea upande mmoja. Sote tunajua kuwa P.J.Toddo alikuwa ni mkuu wa

kurugenzi ya mawasiliano ya rais Ikulu. Kama ni hivyo kwanini tusilichukulie hili suala

katika mtazamo wa kisiasa?. Mfano labda kifo chake kimetokana na yeye kuvujisha

siri za serikali kwa vyama vya upinzani baada ya kupewa pesa nzuri na vyama hivyo

vyenye nia ya kushika dola” Fulgency Kassy akaunda hoja nzuri iliyompelekea Pweza

atabasamu lakini uso wa Kombe haukuonesha tashwishwi yoyote.

“Huwenda ukawa upo sahihi” hatimaye Kombe akaongea kwa utulivu.

“Hatuna haja ya kuwa na wasiwasi. Mimi nafikiri ngoja kwanza tuone mambo

yatakavyokuwa halafu tutajua cha kufanya” Fulgency Kassy akahitimisha kwa

kuyaweka kando mawazo ya Kombe.

“Twendeni kule juu ghorofani tukachunguze huwenda tukapata chochote”

Kombe akavunja ukimya na wote wakakubaliana na wazo lake.

Muda mfupi baadaye walikuwa juu ya lile jengo la biashara la Rupture & Capture

na baada ya uchunguzi wa hapa na pale wakajikuta wakikubaliana na hisia za Kombe.

Pweza,yeye aliokota maganda mawili ya risasi za mdunguaji zilizotumika katika

kuupokonya uhai wa P.J.Toddo kwenye ile baraza ya casino. Huku Fulgency Kassy

akiokota ganda la pipi ya kijiti sawa na lile aliloliokota kule nyumbani kwa Guzbertkojo usiku ule alipouwawa

“Maganda haya ni ya risasi za bunduki nzito ya kivita na hakuna raia anayeruhusiwa

kumiliki silaha ya namna hii” Kombe akaongea kwa hakika huku akiendelea

kuyachanguza kwa ukaribu yale maganda ya risasi baada ya kuyachukua kutoka

mkononi mwa Pweza.

“Sasa naanza kupata picha kamili kuwa mtu aliyehusika na kifo cha Guzbert Kojo

ndiyo huyu pia aliyehusika na kifo cha P.J.Toddo” Fulgency Kassy akaongea kwa

utulivu huku akilifikicha lile ganda la pipi ya kijiti mkononi.

“Kwa vipi?” Kombe akauliza.

“Angalieni hili ganda la pipi” Fulgency Kassy akawaambia wenzake na kuwapelekea

wote wasogee karibu na kulitazama ganda lile la pipi mkononi mwake.

“Ganda la pipi lina shida gani?” Pweza akauliza huku akishindwa kuelewa.

“Niliokota ganda la pipi kama hili nyumbani kwa Guzbert Kojo usiku ule

alipouwawa na sasa nimeokota ganda la pipi kama lile hapa” Fulgency Kassy akaongea

huku akionesha mshango.

“Kwa hiyo unataka kusema kuwa muuaji ni mtu anayemumunya pipi ya kijiti

kila anapokamilisha dhamira yake?. Mh! hii ni ajabu sana na hainiingii kabisa akilini”

Pweza aliongea kwa mshangao huku akiendelea kulitazama lile ganda la pipi.

“Mauaji haya yanafanywa na mtu mmoja” Fulgency Kassy hatimaye akavunja

ukimya na kuongea kama mtu aliyezama kwenye tafakuri nzito.

“Unadhani mtu huyo anaweza kuwa ni yule Stephen Masika?” Kombe akauliza.

“Hakuna mwenye hakika ingawa miongoni mwetu tunaweza kuwaza hivyo.

Tunachotakiwa kufanya sasa ni kutafuta ukweli wa hisia zetu kwani hiyo ndiyo kazi

iliyoko mbele yetu kwa sasa. Tumtafute huyu muuaji na kumalizana naye mapema

kabla hajaendelea kutabaruku na roho zetu” Fulgency Kassy akaongea kwa hakika.

“Sasa tunaanzia wapi?” Pweza akauliza.

“Tunaanzia kwenye hili jengo kutafuta taarifa zitakazoweza kutusaidia kumnasa

huyu Tumbili mwingine”



“

HUYU MTU ANAYEFAHAMIKA KWA JINA LA STEPHEN MASIKA

amekuwa kama saratani mbaya inayohatarisha biashara yetu” Fred Bagunda

akaongea kwa utulivu huku mwili wake ukiwa umestarehe vizuri kwenye kiti

chake cha ofisini chenye foronya laini. Njama alikuwa mbele yake akimtazama kwa

makini.

“Umejuaje kuwa huyo mtu anaitwa Stephen Masika?” Njama akauliza kwa

mshango huku akiyatathmini kwa ukaribu maneno ya Fred Bagunda.

“Nilipigiwa simu na kuelezwa juu hali ya mambo ilivyo. Inavyoonekana sasa ni

kuwa huyu mtu anayefahamika kwa jina la Stephen Masika huwenda ndiye aliyehusika

na vifo vya Alba Gamo,Guzbert Kojo na P.J.Toddo. Nafikiri sasa unaweza kuvuta

picha kuwa huyu Stephen Masika ni mtu wa namna gani”

“Sasa unadhani jambo la busara litakuwa ni kuendelea kumuogopa na kumuacha

akiendelea kutamba mitaani?” Njama akauliza kwa utulivu.

“Nataka kwanza upate picha kuwa tunashughulika na mtu wa aina gani. Taarifa

nilizozipata ni kuwa kuna vijana watatu waliokabidhiwa kazi ya kumtafuta huyu

Tumbili” Fred Bagunda akafafanua.

“Unadhani huyu mtu ambaye sasa tunamfahamu kwa jina la Stephen Masika

anapata wapi nguvu za kupambana na huu mtandao?” Njama akauliza.

“Swali hilo ndiyo lililotufanya tukatoka kwenye kikao saa kumi usiku pasipo kupata

majibu ya kuridhisha. Hisia zetu zilikuwa zimejikita zaidi kwenye vyama pinzani

ambavyo hutafuta taarifa za udhaifu wa serikali kwa gharama zozote ili waweze

kuzitumia kama mtaji wa kisiasa kuombea kura kwa wananchi. Baadhi yetu walienda

mbele zaidi wakidai kuwa huwenda kuna watu fulani waliokuwa wakipanga kuipindua

serikali iliyoko madarakani”

“Kwanini mkafikiria hivyo?” Njama akauliza.

“Ni kutokana na tukio la kuuwawa kwa mkuu wa kurugenzi ya mawasiliano ya

rais Ikulu. P.J.Toddo ni mtu muhimu sana kiutawala na anayefahamu karibu kila kitu

kinachoendelea katika hii serikali”

“P.J.Toddo anaingiaje katika huu mkasa?” Njama akauliza.

“Hii kazi tunayoifanya ni kwa ajili ya maslahi ya baadhi ya wanasiasa na wanasiasa

hao ndiyo serikali yenyewe. Huwenda P.J.Toddo alikuwa akivujisha siri za mambo

yetu na hapo protokali ndiyo zikafuatwa”

“Kwa maana nyingine unataka kuniambia kuwa kifo cha P.J.Toddo kinatokana na

kuvujisha siri?” Njama akauliza.

“Huo ni mtazamo tu wa baadhi ya watu wakati tulipokuwa tukijadiliana”

“Mwisho wa mkutano wenu mkaazimia nini?”

“Ulinzi na umakini uongezwe na tahadhari zichukuliwe. Stephen Masika atafutwe

popote alipo na atakapopatikana azungumze yeye ni nani na anafanya kazi kwa

maslahi ya nani”

“Baada ya hapo?”

“Baada ya hapo protokari zitafuatwa”

“Vipi kuhusu mzigo wa yule mama?” Njama akauliza akihamisha mada.

“Nimeshafanya mawasiliano na White Sugar na hivi tunavyozungumza ameniambia

kuwa mzigo upo njiani” Fred Bagunda akaongea kwa hakika.

“Sasa yule mama amefikia wapi hapa jijini Dar es Salaam?”

“Yupo kwenye chumba kimoja cha Hotel Agent 11 hapa jijini Dar es Salaam

anaendelea kusubiri”

Maongezi baina ya Fred Bagunda na Njama yalikuwa yakiendelea katika chumba

kile cha ofisi za kampuni usafirishaji wa vifurishi vya kimataifa ya Intercontinental &

Overseas Parcels (I.O.P) iliyokuwa ikisemekana kumilikwa na wawekezaji wawili wa

ndani ya nchi.

___________

ILIKUWA IKIELEKEA KUTIMIA SAA MBILI ASUBUHI wakati

nilipoegesha gari langu kando ya kituo cha kujazia mafuta kinachotazamana na

barabara kuu ya Bagamoyo eneo la Mwenge jijini Dar es Salaam.

Usiku mzima uliopita nilikuwa nimelala usingizi wa mang’amung’amu huku akili

yangu akisumbuka kwa kila namna katika kutengeneza mtiririko mzuri wa matukio

yote ili yaweze kuleta maana. Lakini suala hilo lilikuwa limeshindikana kwani matukio

mawili au matatu niliyoyachukua na kuyaunganisha yalikataa kuunganika na hivyo

nikaendelea kuteseka kitandani.

Hata hivyo baada ya kuwaza sana hisia fulani zilikuwa zimeanza kujengeka

kichwani mwangu kuwa yule mndunguaji aliyenitoroka usiku wa jana alielekea

kufanana na yule msichana niliyemfuatilia kutoka kule Vampire Casino hadi mtaa wa

Nkuruham siku chache zilizopita.

Foleni za magari zikiwa zimeanza kushamiri katika baadhi ya barabara za jiji

la Dar es Salaam hivyo mara tu nilipofika kwenye kituo kile cha kujazia mafuta

nikashuka kwenye gari langu kisha nikavuka barabara nikielekea kwenye kituo cha

teksi kilichokuwa karibu na eneo lile.

Kumbukumbu nzuri juu ya lile gari lililotumika jana na mdunguaji ilikuwa bado

timilifu kichwani mwangu. Nililikumbuka vizuri gari lile aina ya Corolla limited yenye

kibandiko cha teksi juu yake na ufito wa njano ubavuni kuwa lilikuwa likisaka mkate

wake wa kila siku katika kituo cha teksi cha pale Mwenge kutokano na utambulisho

wake ubavuni.

Madereva wa teksi wa kituoni pale walinikaribisha kwa bahasha zote huku

wakiniweka kwenye kundi la mteja lakini waliposikiliza shida yangu baadhi yao

wakanipa mgongo na kuendelea na hamsini zao. Mzee mmoja mkongwe dereva

wa teksi mwenye busara akabaki akinikata jicho la kunisahili. Hali ile ikanipa ujasili

wa kutumbukiza mkono wangu mfukoni na kuchukua karatasi ndogo niliyokuwa

nimeiandika namba za ile teksi ya mdunguaji kisha nikampa yule mzee.

“Nimesahau mzingo wangu kwenye teksi yenye hizi namba” nilimwambia yule

mzee huku nikiupima uzito wa maneno yangu.

“Mzingo gani?” yule mzee akaniuliza huku akiitazama ile namba ya teksi kwenye

ile karatasi bila kuishika.

“Begi langu dogo jeusi lenye vitu vyangu muhimu vya kusafiria ikiwemo pasipoti”

“Wewe ni mgeni hapa jijini Dar es Salaam?” mzee yule akaniuliza na kupitia

matamshi yake nikafahamu kuwa alikuwa Mngoni wa Ruvuma.

“Mimi ni mkazi wa Songea mkoani Ruvuma” nikamwambia yule mzee huku

nikinuia kununua urafiki.

“Oh! kumbe wewe ni mkazi wa Songea hata mimi natokea Songea. Mke wangu na

watoto wanakaa eneo la Mfaranyaki. Mimi nimewatoroka kidogo na kuja hapa Dar es

Salaam kuangalia upepo wa maisha” mzee yule mwanalizombe akaongea kwa furaha

sana huku akijihisi kuwa amekutana na ndugu yake wa karibu.

“Sasa nyinyi wazee mkikimbia miji yenu na sisi vijana wenu tufanyeje?”

nikachombeza utani kidogo.

“Hapana! mimi sijakimbia nyumbani. Unajua hii nchi yetu ni huru na kuna amani

ya kutosha. Ukikaa sehemu moja na kuona mambo yako hayakuendei vizuri upo

huru kujaribu kwingine kwani hakuna mtu aliyekushika miguu,alimradi tu usisahau

nyumbani” mzee yule akaweka kituo na kunitazama kabla ya kuniuliza

“Songea unaishi sehemu gani?” mzee yule akaendelea kurefusha maongezi huku

akionekana kufurahi na kwa kweli sikutaka kupoteza muda hivyo nilichukua noti

moja ya shilingi elfu kumi kutoka mfukoni mwangu na kumshikisha mkononi.

“Tafadhali! naomba unisaidie” nilimwambia yule mzee na nilichokiona usoni

mwake ni furaha ya kushtukiza iliyochanganyika na mipango ya kifungua kinywa

kizito katika fikra zake.

“Namba hii ni ya teksi ya Momba hata hivyo sijamuona kwa hizi siku mbili tatu”

“Anaishi wapi?” nilimuuliza yule mzee.

“Nyumbani kwake siyo sehemu ya kupotea. Shukia kituo cha ITV halafu

mkono wako wa kushoto utaona barabara. Shuka na barabara hiyo na mwisho wake

utakutana na barabara nyingine inayokatisha kwa mbele. Sasa wewe ukifika hapo

ingia upande wa kulia halafu hesabu hadi nyumba ya nne upande wa kushoto kwako

utaona nyumba yenye uzio wa michongoma. Hapo ndiyo nyumbani kwa Momba.

Ukimkosa rudi hapa ndugu yangu nitakusaidia” mzee yule akanielekeza kwa furaha

huku akiushikashika mfuko wa shati lake alipoitumbukiza ile noti ya shilingi elfu kumi

niliyompa.

“Ahsante!” nikamwambia mzee yule na kumuaga nikirudi kule nilipoegesha gari

langu.

Muda mfupi baadaye nilikuwa nimefika kwenye kituo cha daladala cha ITV.

Maelezo ya yule mzee yalikuwa sahihi kwani nilipofika tu kwenye kituo kile upande

wa kushoto kwangu nikaiona barabara ya gari inayokatisha mitaani. Nikakunja

kona kuifuata barabara ile na baada ya muda mfupi nikawa nimeifikia ile barabara

inayokatisha kwa mbele. Hivyo nilipofika pale nikaingia upande wa kulia na kwenda

kuegesha gari langu nje ya nyumba ya nne iliyozungushiwa uzio wa michongoma

upande wa kushoto wa barabara ile.

Kama zilivyokuwa nyumba nyingi za jijini Dar es Salaam nyumba ya Momba

ilikuwa imekula chumvi nyingi kwa mwonekano. Mabati ya paa lake yalikuwa

yameshika kutu kila mahali na hata aina ya ujenzi wa nyumba ile ulikuwa ni wa mtindo

wa zamani wa Mgongo wa Tembo.

Nilishuka kwenye gari langu na kuelekea kwenye ile nyumba huku nikitarajia

kuiona ile teksi Corolla limited nyeupe ikiwa imeegeshwa pale nje. Sikuiona na hapo

hisia za wasiwasi kuwa huwenda Momba alikuwa ametoka zikanijia huku nikijiuliza

kuwa Momba alikuwa na uhusiano gani na yule mdunguaji hatari. Niliufikia mlango

wa mbele wa ile nyumba na kuanza kugonga hodi. Hakuna mtu aliyeniitikia na ule

mlango ukanitazama kama uliokufa.

Baada ya kugonga sana bila kujibiwa nikaamua kuzunguka na kuchungulia

kwenye dirisha moja la ile nyumba. Hata hivyo ilikuwa kazi bure kwani mle ndani

hapakuonesha dalili za uwepo wowote wa kiumbe hai.

Muda mfupi uliofuata nilikuwa ndani ya ile nyumba kwa msaada wa funguo zangu

malaya. Sebule ya nyumba ile ilikuwa na samani chakavu zisizokuwa na mpangilio

unaoeleweka na hali ile ikanitanabaisha kuwa huwenda Momba alikuwa akiishi maisha

ya ukapera.

Upande wa kushoto na sebule ile kwenye kona kulikuwa na chupa nyingi za

bia zilizotumika. Nilipotazama juu ya meza ndogo chakavu iliyokuwa pale sebuleni

nikaiona simu ndogo ya mkononi. Moyo wangu ukapiga kite kwa nguvu. Fikra zangu

zikanieleza kuwa simu ile haikuwa imesahaulika kwa namna ilivyokuwa imetelekezwa

pale juu ya meza.

”Kitu gani kinachoendelea?” nilijiuliza huku akili yangu ikishikwa na mduwao.

Wakati nikiendelea kuwaza mara ile simu pale juu ya meza ikaanza kuita. Nilisimama

nikiitazama ile simu kwa mshangao huku shughuli za mwili wangu zikiwa zimesimama

kwa sekunde kadhaa. Hisia zangu zikaniambia kuwa lile lilikuwa ni tukio la hila hata

hivyo sikuweza kufahamu kuwa ile ilikuwa ni hila ya namna gani.

Namba iliyokuwa ikiita kwenye simu ile ilikuwa ngeni na yenye tarakimu tano tu

na haikuelekea kufanana na namba za simu zitumikazo nchini Tanzania. Niliendelea

kuipuuza ile simu na kuiacha iendelee kuita huku nikiyatembeza macho yangu mle

ndani kuchunguza.

Kwa kuwa nilikuwa nguli wa shughuli za kijasusi ndani ya muda mfupi chini ya ule

mlango wa sebuleni kwenye kitasa nikaona kidude kidogo mfano wa kifungo cheusi

cha nguo kilichokuwa kimebandikwa. Niliukaribia vizuri ule mlango na kuinama

nikikichunguza kwa ukaribu kidude kile na hapo nikajikuta nikitabasamu.

Kile kidude kidogo mfano wa kifungo cheusi cha nguo kilikuwa ni kifaa kidogo

chenye nguvu kubwa ya kunasa mawimbi ya sauti na kuyasafirisha maelfu ya maili.

Kifaa kile kilikuwa kimepandikizwa pale mlangoni ili mtu yoyote akiingia mle ndani

kifaa kile cha mawasiliano kiweze kunasa mawimbi ya sauti na kuyapeleka kwa

mhusika aliyekiweka pale kifaa kile kwa hila.

”Blood fool!” nilijisemea na mara hii ile simu pale juu ya meza ilikata na kuanza

kuita tena. Safari hii nilisogea pale mezani nikaichukua ile simu na kubofya kitufe cha

kupokelea pasipo kuongea neno lolote.

“Rafiki yako yupo nyuma ya jengo la BML Contractors,Tabata relini” sauti tulivu ya

kiume ikaongea kutoka upande wa pili wa ile simu.

“Wewe mwoga ni nani?” nilimuuliza yule mtu kwa shauku huku nikiinakili vizuri

sauti yake kichwani. Hata hivyo yule mtu hakunijibu na badala yake ile simu ikakatwa.

Nikiwa bado nimeishikilia ile simu sikioni nikajikuta nimeshikwa na mduwao

huku fikra zangu zikienda mbali zaidi kutafuta majibu ya maswali chungu mzima

yaliyokuwa yakipita kichwani mwangu. Nilihisi kuwa kwa vyovyote mtu yule aliyepiga

ile simu alikuwa akitaka kucheza na akili yangu na kunitia woga usiokuwa na maana.

Lakini hadi kufikia pale nilikuwa nimechoshwa na michezo ya namna ile.

Nilimkumbuka yule mdunguaji na kumeza funda kubwa la mate. Ghadhabu

zilinipanda hivyo nikaichomoa bastola yangu kutoka mafichoni na kuitazama kwa

makini kisha nikairudisha mahala pake.

Ile simu ya mkononi nikaipigiza ukutani huku roho ya utulivu ikiwa imenitoweka

kabisa. Niliufikia ule mlango na kukinyofoa kile kifaa cha kunasia mawimbi ya sauti

kisha nikakitupa chini sakafuni na kukisaga kwa soli ngumu ya kiatu changu.

Mche wa sigara ukiwa unateketea taratibu kwenye pembe ya mdomo wangu

nilitoka nje ya nyumba ile na kuelekea sehemu nilipokuwa nimeegesha gari langu.

Muda mfupi uliyofuata nilikuwa njiani nikielekea eneo la Tabata relini.

_____

BAADA YA FOLENI KUBWA YA MAGARI kupungua kwenye barabara ya

Sam Nujoma na ile barabara ya Nelson Mandela hatimaye nikafika eneo la Tabata relini.

Sikuwa mwenyeji sana wa eneo lile hivyo ikabidi niulize kwa watu mahali lilipokuwa

jengo la BML Contractors.

Watanzania ni watu wakarimu sana. Maelekezo ya wapita njia yakiniridhisha kuwa

jengo lile lilikuwa umbali mfupi baada ya kuupita uzio wa ukuta wa ofisi za Mwananchi

Communication. Hivyo niliingia upande wa kulia nikiambaa na barabara ya vumbi

iliyokuwa ikipakana na ukuta wa ofisi za Mwananchi Communication huku macho yangu

mara kwa mara yakitazama vioo vya gari vya ubavuni katika kutaka kujiridhisha kuwa

hakukuwa na mtu yeyote aliyekuwa amenifungia mkia.

Nyuma ya lile jengo la Mwananchi Communication umbali mfupi kutoka pale kulikuwa

na gereji bubu na katika gereji ile kulikuwa na magari mengi yaliyoegeshwa. Magari

yale mengi yalikuwa ni malori makubwa ya kubebea mizigo ya kwenda mikoani na

nchi za jirani yenye matela makubwa.

Niliingia kwenye gereji ile na kuegesha gari langu. Kijana mmoja fundi wa gereji ile

aliyevaa mavazi ya kazi yenye madoa makubwa ya mafuta machafu ya gari akanikaribia

huku akionekana kuchangamkia fursa.

“Ongeza upepo wa kutosha kwenye magurudumu yote” nilimwambia yule kijana.

“Ondoa shaka!” kijana yule akaongea kwa furaha na wakati alipokuwa akitathmini

ujazo wa upepo kwenye yale magurudumu ya gari langu nikamtumbukizia swali.

“Jengo la BML Contractors liko wapi?”

“Endelea mbele na hii barabara uliyokujanayo na ukifika mbele kidogo utaona

mteremko na upande wa kushoto kuna godauni la wachina. Mwisho wa godauni hilo

kuna kichochoro upande wa kushoto. Fuata kichochoro hicho mwisho utatokezea

kwenye reli. Ukivuka hiyo reli mbele yako utaliona hilo jengo la BML Contractors”

“Ahsante! sana fanya kazi yako. Wacha mimi ninyooshe miguu kidogo nitarudi

muda siyo mrefu” nilimwambia yule kijana.

“Usihofu tajiri wangu” yule kijana akaitika huku akielekea kuchukua pampu ya

upepo.

Nililiacha gari langu kwenye gereji ile kisha nikashika uelekeo wa ile barabara ya

vumbi inayoelekea kule mbele kama alivyonielekeza yule kijana wa gereji. Niliendelea

kutembea na baada ya safari fupi nikaanza kushuka mteremko hafifu. Nilipokuwa

nikishuka mteremko ule upande wa kushoto nikaliona jengo refu la godauni ya

wachina. Mwisho wa goduani ile nikakiona kichochoro upande wa kushoto.

Bila kupoteza muda nikaingia kwenye kichochoro kile kilichofanywa baina ya

kuta mbili ndefu. Mwisho wa kichochoro kile kirefu chenye giza hafifu nikaiona reli

ikikatisha mbele yangu. Maelekezo ya yule kijana yalikuwa sahihi hivyo nikakatisha

kwenye reli ile na nilipokuwa nikikatisha kwenye ile reli mbele yangu nikaliona jengo

kubwa la BML Contractors.

Kuliona jengo lile kukanipelekea niipapase vyema bastola yangu mafichoni.

Niliifuata ile reli huku hatua zangu zikipungua na nilipofika mbele nikachepuka upande

wa kushoto na hapo nikawa nimetokezea nyuma ya lile jengo la BML Contractors.

Kama yalivyokuwa maeneo mengi ya kampuni za ujenzi jengo lile la BML

Contractors lilikuwa limezungushiwa uzio wa mabati yaliyoandikwa jina la kampuni

ile ya ujenzi. Uzio ule hafifu kwenye baadhi ya vipenyo vyake viliniwezesha kuona

ndani. Baadhi ya wafanyakazi wa kampuni ile walikuwa wakiendelea na shughuli zao.

Malori makubwa ya kokoto yalikuwa yameegeshwa huku winchi ndefu na mashine za

kuchanganyia zege zikiwa zinaendelea na kazi. Hali ile ikanitanabaisha kuwa nilikuwa

kwenye eneo sahihi.

Sasa fikra zangu zikaanza kufanya kazi huku nikiyatembeza macho yangu

kupeleleza eneo lile. Lilikuwa ni eneo lenye magari mabovu na mabaki ya mashine

mbovu za ujenzi. Nikasimama nikiendelea kulipeleleza eneo lile huku macho

yangu yakitarajia kumuona yule mtu niliyezungumza naye kwenye simu. Lakini hilo

halikutokea badala yake moshi wa takataka chache ulikuwa ukifukiza eneo lile.

Kabla ya kuendelea mbele zaidi nililichunguza jengo la ghorofa lililokuwa

limepakana na eneo lile. Lilikuwa jengo fupi chakavu la ghorofa sita na hapo wazo

fulani likachipuka akilini. Jengo lile lingeweza kumhifadhi mtu yeyote ambaye kwa

wakatu huu huwenda angeitumia nafasi ile kuzichunguza nyendo zangu. Hisia

zile zikaniongezea umakini zaidi na hapo nikaanza kuzitupa hatua zangu taratibu

nikilikagua eneo lile.

Nilizipita mashine mbovu za ujenzi zilizotelekezwa eneo lile nikiruka baadhi ya

vifusi vya mabaki ya ujenzi huku nikiyatembeza macho yangu huku na kule. Sikutaka

kuishika bastola yangu mkononi kwani kwa kufanya vile ningeweza kumjengea hoja

mtu yoyote ambaye angekuwa eneo lile akinitazama. Niliyapita magari mabovu mawili

yaliyokuwa eneo lile na wakati nikilikaribia gari jingine bovu nikasikia kelele hafifu za

mnyama akichakura nyuma ya gari lile bovu. Nikapiga moyo konde na kulisogelea lile

gari kwa nyuma.

Nilichokiona nyuma ya gari lile kikapelekea kwa sekunde kadhaa shughuli za mwili

wangu zisimame. Mwili wa mwanaume mmoja ulikuwa umekaa chini huku mgongo

wake ukiwa umeegemea lile gari bovu kwa nyuma. Ingawa sura ya yule mtu ilikuwa na

majeraha mengi usoni na damu nyingi iliyoganda katika majeraha yake lakini niliweza

kuukadiria umri wake kuwa ulikuwa ni kati ya miaka thelathini na nane na arobaini

na mbili.

Mwanaume yule mwenye afya njema alikuwa amenyongwa kwani nilipomchunguza

vizuri nikagundua kuwa mikono na miguu yake ilikuwa imefungwa na kukazwa kwa

waya mwembamba lakini imara kiasi cha kuzipelekea sehemu zile kwenye mwili

wake zivimbe na kuwamba. Mdomo na macho yake vilikuwa wazi na inzi wakubwa

walikuwa wakitabaruku.

Nikaokota jiwe na kuwafurusha mbwa koko wawili waliokuwa wakiitafuna miguu

yake iliyokuwa wazi. Yule mtu kifuani alikuwa wazi huku chini akiwa amevaa suruali

nyeusi.

Alikuwa mwanaume mwenye afya na nilipoichunguza shingo yake iliyovimba

nikauona waya mwembamba kama ule uliokuwa umefungwa kwenye miguu na

mikono yake ukiwa umeizingira shingo yake. Hali ile ikanifanya nihitimishe kuwa mtu

yule alikuwa amenyongwa hadi kufa.

Ingawa nilikuwa simfahamu yule mtu lakini hisia zangu zikanitanabaisha kuwa

macho yangu yalikuwa yakimtazama Momba. Hasira zikanipanda hata hivyo sikuwa

na namna ya kufanya huku roho ikiniuma sana.

Pembeni ya mwili ule niliiona simu ya mkononi kama ile niliyoiona juu ya meza

kule sebuleni kwa Momba na sasa simu ile ilikuwa imeanza kuita tena. Niliitazama

simu ile kwa hasira nikishawishika kutaka kuichukua lakini roho yangu ilinikataza

huku hisia zangu zikiniambia kuwa nigeuke nyuma na kutazama kule juu ya lile jengo

la ghorofa lililokuwa jirani na eneo lile.

Nilikuwa sahihi kwani ilianza risasi moja iliyoniparaza bega langu la kushoto huku

nikiitumia bahati ile kujitupa chini kisha nikajiviringisha na kujibanza kwenye kona ya

lile gari bovu nikiwa nimeshikwa na taharuki ya aina yake.

Mvua ya risasi ikaanza kurindima upande ule huku risasi hizo zikitoba bodi la lile

gari bovu nililokuwa nimejibanza. Nikajitahidi kuzikwepa risasi zile kwa kuhama hapa

na pale nikienda upande wenye afadhali.

Kutoka pale nilipokuwa hadi lilipokuwa gari bovu jingine hapakuwa na umbali

mrefu hata hivyo nilijionya kuwa endapo ningeendelea kujibanza eneo lile hatimaye

zile risasi zingenifikia. Zile risasi ziliendelea kurindima na wakati huo niliendelea

kujibanza huku nikitafuta upenyo mzuri wa kumchunguza adui yangu.

Mara nikawa nimepata uwazi mdogo ulioniwezesha kuona kule juu ya lile jengo

la ghorofa. Wanaume watatu walikuwa wemejibanza kwenye ukingo wa ghorofa

lile wakiendelea kufyatua risasi pale nilipokuwa. Angalau nikaridhika kuwa yule

mdunguaji hakuwa miongoni mwao. Nikaendelea kuwatazama wale watu huku akili

yangu ikisumbuka katika kutafuta namna ya kujinasua.

Umbali uliokuwa baina yangu na wale watu ulikuwa mrefu hivyo sikupata nafasi

nzuri ya kuziona sura zao. Kwa kweli sikupenda kuendelea kuwepo eneo lile kwani

zile risasi zingeweza kuwavuta watu na dhana ya kuwa mimi nilikuwa jambazi

ingeweza kuibuliwa hasa baada ya kukutwa pale na ule mwili wa Momba. Baada ya

hapo nilifahamu kuwa raia wasingekubali kuniachia hivyo sikutaka kusubiri.

Haraka nikajilaza pale chini kisha nikaanza kutambaa nikilitoroka eneo lile

kuelekea kwenye kifusi cha mabaki ya ujenzi kilichokuwa jirani na eneo lile. Kwa

kuwa nilikuwa nikitambaa kwa kuufuata ule usawa wa lile gari bovu wale watu juu ya

lile jengo la ghorofa walikuwa hawajaniona hivyo wakawa wakiendelea kufyatua risasi

zao ovyo bila malengo.

Nilikifikia kile kifusi na kujibanza nyuma yake huku nikipata nafasi nzuri ya

kulichunguza tena eneo lile. Kutoka pale kwenye kile kifusi na lilipokuwa gari jingine

bovu kulikuwa na umbali mfupi hivyo nikapiga tena mahesabu ya kulifikia lile gari.

Nikakusanya nguvu kisha kwa kasi ya ajabu nikakimbia na kwenda kujibanza nyuma

ya lile gari bovu.

Nikiwa nyuma ya lile gari bovu nikahisi kuwa angalau nilikuwa sehemu salama

kidogo kwani kutoka kwenye lile gari bovu nililojibanza eneo lililofuatia lilikuwa na

vichaka hafifu cha miti midogo na baada ya kulivuka eneo lile ningekuja kutokezea

kwenye ile reli.

Mahesabu yangu yalipokamilika nikaliacha lile gari bovu na kuanza kukimbia

nikitokomea kwenye kile kichaka na nilipokuja kuibuka upande wa pili nikawa

nimetokezea kwenye ile reli.

Baadhi ya wapita njia kwenye ile reli walinishangaa wakati nikijitokeza kutoka

kwenye kile kichaka hata hivyo sikuwatilia maanani badala yake nikawa natembea

kuelekea mbele nikiifuata ile reli. Wakati nikiendelea kutembea kwa mbali niliendelea

kuisikia ile milio ya risasi kule nyuma yangu. Mara nikajikuta nimechanganya miguu

na kuanza kukimbia nikielekea kwenye lile jengo la ghorofa walipokuwa wale watu

wakinifyatulia risasi.

Niliendelea kukimbia na ndani ya muda mfupi tu nikawa nimelifika lile jengo la

ghorofa na nilipolichunguza vizuri nikagundua kuwa jengo lile lilikuwa halitumiki

kutokana na taratibu ujenzi wake kuwa zimekiukwa. Sasa nilikuwa na hakika kuwa

tukio lile lote lilikuwa limepangwa.

Nilichokuwa nimepanga sasa ilikuwa ni kuingia ndani ya lile jengo la ghorofa na

kupanda kule juu walipokuwa wamejibanza wale watu ili nikawafanyie shambulizi

la kushtukiza. Lakini nilipokuwa katika harakati za kufanya vile mara nikajikuta

nikishtushwa na muungurumo wa gari lililokuwa likija kwa kasi kwenye lile jengo.

Tukio lile likanipelekea haraka niirudishe mafichoni bastola yangu niliyokuwa

nimeishika mkononi nikilikaribia lile jengo. Muungurumo ule wa gari ulizidi kusikika

ukija upande ule wa ghorofa na tukio lile likanipelekea nijibanze kwenye ukuta wa

jengo lile.

Nikiwa naendelea kuchungulia kule mbele mara nikaliona gari la polisi aina ya

Landcruiser likichomoza kwa kasi na kushika breki kali mbele ya lile jengo la ghorofa.

Askari wanne wenye bunduki mikononi mwao wakawahi kuruka chini katika mtindo

wa aina yake hata kabla ya gari lile halijasimama vizuri.

Haikunichukua muda mrefu kufahamu kuwa mara ile tena nilikuwa nimezidiwa

ujanja kwani uwezekano wa kutekeleza adhama yangu usingewezekana tena baada ya

wale polisi kufika eneo lile. Niliendelea kuwatazama wale polisi ambao sasa nilihisi

kuwa huwenda walikuwa wamepigiwa simu na msamaria mwema baada ya kusikika

kwa ile milio ya zile risasi zilizokuwa zikifyatuliwa na wale watu waliokuwa kule juu ya

lile jengo ghorofa.

Kitendo cha kumuona polisi mmoja akija kwenye ule ukuta niliojibanza

kikanipelekea niyaache taratibu maficho yale na kupotelea vichakani nikilikimbia

eneo lile huku jinamizi la kuzidiwa ujanja kwa mara nyingine likiendelea kuniandama.

Nilipenda nibaki eneo lile ile niweze kuona mwisho wa tukio lile lakini fikra zangu

zikanionya kuwa ile haikuwa sehemu salama tena kwangu.

Nilirudi kwenye ile gereji huku nikiwa nimekata tamaa sana na mwenendo

wa harakati zangu kwani tangu nianze kazi yangu sikuwahi kukutana na vizingiti

vya sampuli ile vinavyonifanya nikose hata sehemu ya kuanzia yenye chanzo cha

kuaminika.

Wakati nikimpa yule kijana malipo yake aliduwaa akishangazwa na kuchafuka

kwangu kuliko sababishwa na zile rabsha za kule nilipotoka. Hata hivyo sikushtushwa

na hali ile badala yake nilimuacha yule kijana akiendelea kunishangaa huku nikifungua

mlango wa gari langu na kuingia ndani. Muda mfupi uliyofuata nikageuza gari langu

na kushika uelekeo wa barabara ya Mandela.

MVUA KUBWA ILIYOKUWA IMEANZA KUNYESHA tena ilikuwa

imefanikiwa kuwafukuza watu katika barabara za mitaa ya jiji la Dar es

Salaam na hivyo kupelekea idadi ya magari barabarani iongezeke maradufu

kiasi cha kusababisha kero kubwa ya foleni.

Taarifa kupitia vituo mbalimbali vya redio zilikuwa zimejikita zaidi katika maafa

ya mvua ile kama;mafuriko katika baadhi ya maeneo,uharibifu wa miundombinu ya

barabara,mali na vifo vya watu. Wananchi waliojenga mabondeni waliendelea kuitupia

lawama serikali huku wajibu wao wa kuhama mabondeni wakiufumbia macho.

Labda serikali ilikuwa na sehemu yake ya kulaumiwa kwa uwepo wa miundombinu

mibovu ya maji taka na barabara kama siyo kuufumbia macho ujenzi wa makazi holela

ya watu katika baadhi ya maeneo. Kila mmoja alistahili lawama kwa upande wake.

Taarifa juu ya athari za mvua ile ziliendelea kumfikia Koplo Tsega kupitia redio ya

gari. Alikuwa ameegesha gari lake mkabala na ofisi za wizara ya ulinzi na mambo ya

ndani nyuma kidogo ya makutano ya barabara za mtaa wa Ghana na ule mtaa wa Ohio

eneo la posta jijini Dar es Salaam.

Mvua kubwa iliyokuwa ikinyesha ilikuwa imepelekea maji mengi kutuama

barabarani. Maji ambayo kwa hakika hayakustahili kutuama endapo miundombinu

mizuri ya majitaka ingekuwepo kuyatapisha maji yale kwenye bahari ya Hindi ilikuwa

umbali mfupi kutoka pale.

Kitendo cha Koplo Tsega kuegesha gari lake Corolla limited nyeupe yenye kibandiko

cha teksi juu yake na ufito wa njano ubavuni sambamba na mvua kubwa iliyokuwa

ikiendelea kunyesha kilikuwa kimepelekea usumbufu mkubwa wa mara kwa mara

kugongewa vioo madirishani na watu waliokuwa wakihitaji huduma ya usafiri. Kazi

yake ikawa ni kuwajibu watu wale kuwa kuna mtu aliyekuwa akimsubiri.

Kero hiyo ilipozidi Koplo Tsega hakujishughulisha kuwajibu watu hao badala yake

akapandisha na kufunga vioo vya gari. Hivyo mtu yeyote aliyegonga alimpuuza huku

macho yake yakiendelea kutazama kwenye mlango wa mbele wa kutokea kwenye lile

jengo la wizara ya ulinzi na mambo ya ndani.

Tangu ilipotimia saa tisa alasiri Koplo Tsega alikuwa ameegesha gari lake eneo lile

huku macho yake yakiendelea kutazama mbele ya ule mlango wa lile jengo. Tangu

saa tisa alasiri na sasa ilikuwa imetimia saa tatu usiku akiendelea kusubiri ndani ya gari

lile lakini bado alikuwa hajakata tamaa. Alikuwa akimsubiri mtu mmoja aliyefahamika

kwa jina la Pierre Kwizera.

Kama Koplo Tsega asingekuwa ameliona gari la Pierre Kwizera Landcruiser V8

likiwa limeegeshwa kwenye eneo la maegesho la ofisi zile basi huwenda angekuwa

tayari amekata tamaa na kuondoka zake. Lakini kwa sasa uwepo wa gari lile ulikuwa

umemfanya aendelee kuwa mvumilivu akisubiri. Mara kwa mara akajikuta akitazama

kwenye mlango ule kila alipomuona mtu fulani akitoka kwenye lile jengo. Pierre

Kwizera bado hakuonekana.

Usiku huu wa saa tatmwinginea magari yalikuwa yamepungua sana kwenye

maegesho ya ofisi zile. Masaa ya kazi yalikuwa yamefika ukomo kwa siku ile hivyo

kila mfanyakazi aliyetoka kwenye lile jengo alielekea sehemu alipoegesha gari lake na

kuondoka. Pierre Kwizera hakuwa miongoni mwao.

Katika magari machache yaliyokuwa yameegeshwa kwenye eneo la maegesho

ya magari la ofisi zile gari la Pierre Kwizera lilikuwepo. Hivyo uwepo wa gari lile

ukampelekea Koplo Tsega aamini kuwa kulikuwa na wafanyakazi wengine wachache

waliokuwa wamesalia ndani ya lile jengo huku Pierre Kwizera akiwa miongoni mwao.

Koplo Tsega akaendelea kujipa moyo wa uvumilivu na wenye subira.

Haikuwa mpaka ilipofika saa nne usiku pale mwanaume mrefu na mwenye mwili

mpana alipojitokeza kwenye mlango ule wa kutokea nje ya ofisi za wizara ya ulinzi

na mambo ya ndani huku akiwa amevaa suti nadhifu nyeusi na begi dogo la ngozi

mkononi.

Macho ya Koplo Tsega yakarejewa na uhai wakati yalipomtazama mtu yule

akitoka kwenye ule mlango. Mara yule mtu alipotoka akasimama kidogo kwenye

baraza ya jengo lile huku akiitazama saa yake ya mkononi. Kisha akaanza kutembea

akishuka ngazi kueleka kwenye sehemu ya maegesho ya magari ya jengo lile huku

akiwa ameufyatua mwamvuli kujikinga na mvua iliyokuwa ikiendelea kunyesha.

Koplo Tsega alipomchunguza vizuri yule mtu haraka akagundua kuwa alikuwa ni

Pierre Kwizera na hapo tabasamu jepesi likajipenyeza usoni mwake. Pierre Kwizera

alitembea kwa kujiamini akielekea sehemu alipokuwa ameegesha gari lake.

Koplo Tsega hakutaka kuendelea kusubiri hivyo akashusha kioo cha mlango

wa gari hadi pale alipopata upenyo mzuri wa kuupitisha mdomo wa sniper rifle-338

Lapua Magnum. Kisha haraka akairekebisha lensi ya darubini ya bunduki yake huku

akiwa amelifinya jicho lake moja. Taswira ya kichwa cha Pierre Kwizera ilipoenea

vizuri kwenye msalaba wa shabaha wa darubini yake akavuta pumzi nyingi na kuibana

kifuani.

Koplo Tsega alipokuwa akijiandaa kuvuta kilimi cha bunduki ili ahitimishe safari

ya Pierre Kwizera akajikuta akisita kufanya hivyo baada ya mtu fulani kuanza kugonga

kioo cha dirishani cha gari lake. Tukio lile likamshtua na kumpelekea amlaani sana

mtu yule. Hivyo akaiondoa haraka bunduki yake na kuificha nyuma ya kiti chake cha

dereva.

Mwanaume mmoja aliyekuwa akigonga upande wa pili kwenye kioo cha gari lile

alikuwa akiulizia usafiri wa teksi kuelekea eneo la Magomeni Mikumi. Koplo Tsega

akashusha kioo cha gari akimtazama mwanaume yule na bila kuzungumza neno

akapandisha kioo kile cha gari na kukomelea kabari ya mlango.

Wakati Koplo Tsega akiyapeleka tena macho yake kumtazama Pierre Kwizera

kwenye yale maegesho ya magari hakumuona na badala yake akaliona lile gari la Pierre

Kwizera likaacha maegesho ya magari ya eneo lile na kuingia barabarani.

Koplo Tsega hakuwa na namna ya kufanya kwani alikuwa na kila hakika kuwa

jaribio lake la kwanza lilikuwa limeshindikana hivyo akajipa subira kidogo huku

akiliacha gari lile Landcruiser V8 liache maegesho yale na kuingia barabarani. Muda

mfupi uliyofuata Koplo Tsega akawasha gari lake na kuingia barabarani akilifungia

mkia lile gari kwa nyuma.

Uelekeo wa ile Landcruiser V8 ukamtanabaisha Koplo Tsega kuwa Pierre Kwizera

alikuwa akielekea nyumbani kwake eneo la Upanga. Foleni ya magari ilikuwa imepungua

kwenye barabara nyingi za jiji la Dar es Salaam hivyo lile gari Landcruiser V8 lilikuwa

likikata upepo barabarani pasipo pingamizi lolote. Koplo Tsega akajitahidi kwa kila

hali akihakikisha gari lile halimpotei.

Koplo Tsega akaendelea kulifuatilia gari lile kwa nyuma wakati lilipokuwa likiingia

barabara ya mtaa mmoja na kutokezea kwenye barabara ya mtaa mwingine huku

safari ikiendelea.

Mvua kubwa ilikuwa ikiendelea kunyesha sambamba na giza zito lililokuwa

limetanda angani hata hivyo macho ya Koplo Tsega hayakuacha kulitazama lile gari

la Pierre Kwizera mbele yake wakati lilipokuwa likiacha barabara ya mtaa mmoja na

kuingia barabara ya mtaa mwingine. Baada ya safari ndefu hatimaye wakafika eneo la

Upanga.

Baada ya kuzipita nyumba kadhaa za ghorofa za shirika la nyumba la taifa mara lile

gari Landcruiser V8 likabadili uelekeo na kuingia wa upande wa kulia lilikatisha katika

barabara pana ya lami. Barabara ile ilikuwa ikikatisha katikati ya majumba makubwa ya

kifahari yenye kuta ndefu zenye sistimu maalum ya umeme wa kuzuia wezi. Ndani ya

uzio wa nyumba zile sauti ya mbwa wakali wakibweka zilikuwa zikisika.

Mara kwa mara Koplo Tsega alilazimika kupunguza mwendo baada ya kuliona

gari lile Landcruiser V8 likipunguza mwendo katika nyakati tofauti. Hatimaye lile gari

likakata kona na kuelekea upande wa kushoto likikatisha katika mtaa tulivu wenye

barabara pana ya lami inayotazamana na mageti makubwa ya majumba ya kifahari.

Lile gari Landcruiser V8 hatimaye likaenda kusimamia mbele ya geti la nyumba ya

tano ya mtaa ule. Huwenda mwanga wa taa za gari lile ulikuwa umemshutua mlinzi

wa ile nyumba hata kabla honi ya gari haijapigwa. Kwani haukupita muda mrefu

lile geti likafunguliwa na mlinzi na lile gari taratibu likaingia mle ndani. Koplo Tsega

akapunguza mwendo wa gari lake huku akilitazama lile gari Landcruiser V8 wakati

likiingia kwenye ile nyumba. Wakati akipita mbele ya lile geti mlinzi wa ile nyumba

ndiyo alikuwa anamalizia kufunga lile geti hivyo Koplo Tsega akafanikiwa kuona

kwa sehemu tu ya mandhari ya mle ndani. Mara lile geti lilipofungwa Koplo Tsega

akakanyaga mafuta na kuendelea na safari na kwenda kuegesha gari lake mwisho wa

barabara ile sehemu yenye kona ya kuingia barabara ya mtaa unaofuata.http://pseudepigraphas.blogspot.com/

Mlinzi akakisogeza kifuniko kidogo cha getini na kuchungulia nje kupitia tundu

dogo huku akishangazwa kidogo na utaratibu uliotumika na mgeni yule wa kugonga

geti badala ya kubofya kitufe cha kengele kilichokuwa pembeni ya geti lile ukutani.

Kitendo cha kumuona msichana mrembo akiwa amesimama nje ya geti lile

kikamtoa wasiwasi hivyo akaufunga ule mfuniko wa lile tundu kisha akasogea pembeni

na kufyatua komeo la mlango mdogo wa geti lile kumruhusu mgeni yule kuingia.

Mara tu mlango ule mdogo wa geti ulipofunguliwa Koplo Tsega akaitumia nafasi ile

kujikaribisha mle ndani. Mlinzi wa nyumba ile hakupata muda wa kufanya mahojiano

na Koplo Tsega kwani kufumba na kufumbua akapigwa mapigo matatu Smart ya

chapuchapu ya Karate. Mapigo mawili kifuani na pigo moja funga kazi la shingoni na

hapo shughuli za mwili za mlinzi yule zikasimama huku uzito ukimuelemea. Mlinzi

yule akafumba macho yake taratibu na kuanguka chini mzima mzima hata hivyo

Koplo Tsega akawahi kumdaka kabla hajafika chini kisha akamburuta hadi nyumba

ya kibanda chake cha kazi kilichokuwa kando ya lile geti.

Sauti za mbwa waliokuwa wakibweka zilisikika mle ndani hata hivyo Koplo Tsega

alipochunguza vizuri akagundua kuwa mbwa wale walikuwa ndani ya banda lililokuwa

nyuma ya kile kibanda cha mlinzi.

Jumba kubwa la kifahari lilikuwa limepandwa katikati ya uzio ule huku likiwa

limezungukwa na bustani ya maua mazuri na miti ya kuvutia. Lile gari Landcruiser V8

halikuonekana nje ya lile jumba lakini uwepo wa banda la kuegeshea gari lililokuwa

kando ya lile jumba ukaashiria kuwa lile gari lilikuwa limeingizwa ndani ya lile banda

muda mfupi uliyopita.

Taa ya sebuleni kwenye lile jumba ilikuwa ikiwaka ingawa mapazia mazito

yaliyokuwa madirishani hayakuruhusu mtu yoyote kuona kwa urahisi mle ndani.

Koplo Tsega akapanda ngazi za barazani na kuusogelea mlango wa mbele wa lile

jumba huku akizitupa hatua zake kwa utulivu. Hali ilikuwa shwari na dalili zikaonesha

kuwa ndani ya ile sebule hakukuwa na mtu yoyote hivyo Koplo Tsega akakishika

kitasa cha mlango ule wa mbele na kuusukuma ndani taratibu. Ule mlango ulikuwa

wazi hivyo hapakuwa na upinzani wowote.

Koplo Tsega alipoingia ndani akajikuta akitazamana na sebule kubwa yenye

samani za kisasa kama seti mbili za makochi makubwa ya sofa juu ya zulia la manyoya

laini la rangi ya kijivu. Katikati ya sebule ile kulikuwa na meza fupi lakini pana ya mti

wa mpingo. Upande wa kushoto kulikuwa na rafu kubwa ukutani iliyopangwa aina

tofauti za vitabu. Ukutani kulitundikwa picha nzuri za kuchorwa zinazovutia. Upande

wa mbele wa ile sebule kulikuwa na runinga pana juu ya meza fupi ya kioo iliyopakana

na kabati dogo lenye droo nne.

Pierre Kwizera hakuwepo pale sebuleni wala lile begi lake alilotokanalo ofisini na

badala yake jumba yote lilikuwa kimya hali ile ikiashiria kuwa Pierre Kwizera alikuwa

akiishi peke yake mle ndani.

Akiwa amejiridhisha kuwa Pierre Kwizera hakuwepo pale sebuleni Koplo Tsega

akaurudishia mlango wa pale sebuleni nyuma yake kisha akaichomoa bastola yake

kutoka mafichoni na kuikamata vyema mkononi. Ukimya wa mle ndani ukampelekea

ayasikilizie mapigo hafifu ya moyo wake yalivyokuwa yakihangaika ovyo kifuani

mwake.

Sehemu fulani ndani ya nyumba ile mlango ukasikika ukifunguliwa na kisha

kufungwa halafu baada ya hapo zikasikika hatua tulivu za mtu akitembea kuja pale

sebuleni. Mtu yule alikuwa ni Pierre Kwizera na wakati huu alikuwa amebadili mavazi

yake. Pierre Kwizera alikuwa amevaa suruali ya pajama na fulana ya mchinjo na

miguuni alikuwa amevaa viatu laini vya manyoya.

Pierre Kwizera akaendelea kutembea kwa kujiamini na alipofika pale sebuleni

akaelekea mlangoni ambapo aliufunga mlango ule kwa funguo. Alipomaliza akaelekea

kwenye madirisha ya pale sebuleni na kusogeza vizuri mapazia katika namna ya

kufunika sehemu zote zilizokuwa wazi. Hatimaye akaelekea kwenye makochi

yaliyokuwa pale sebuleni na kuwasha runinga huku akiketi kwenye kochi moja kati ya

makochi mengi yaliyokuwa eneo lile. Pierre Kwizera akiwa ameketi kwenye kochi lile

ghafla akahisi kuwa chuma cha baridi kilikuwa kikikigusa kisogo chake kwa nyuma.

Hali ile ikampelekea Pierre Kwizera ageuke kwa ghafla na kutazama nyuma yake.

Koplo Tsega ambaye alikuwa amejibanza nyuma ya ile rafu ya vitabu pale sebuleni

alikuwa amejitokeza tayari kumkabili Pierre Kwizera pale kwenye kochi. Pierre

Kwizera akageuka kwa ghafla kutazama nyuma yake na mshtuko alioupata baada ya

kumuona Koplo Tsega ukampelekea aduwae kwa muda na kuganda kama sanamu.

Alichokihisi baada ya pale ni kuwa sehemu fulani mwilini mwake jasho jepesi

lilikuwa likianza kutoka. Mapigo ya moyo wake yakasimama kwa sekunde kadhaa

kabla ya kuanza kwenda mbio kama mtu aliyekuwa akifukuzwa na mnyama mkali.

Macho ya mshangao yakamtoka huku koo lake likikauka taratibu na kwa mbali nyuma

ya masikio yake mishipa yake ya damu ilianza kutuna na kusukuma damu kwa kasi hali

iliyompelekea jasho jepesi lianze kushuka kwenye paji lake.

Pierre Kwizera hisia zake zikamueleza kuwa alichokuwa akikiona mbele yake

ulikuwa ni mzimu wa Koplo Tsega na hapo akili yake ikaanza kufanya kazi haraka.

Bastola yake ilikuwa kwenye droo ya tatu ya kabati dogo lililokuwa pembeni ya

runinga pale sebuleni. Kufumba na kufumbua Pierre Kwizera akafanya hila kwa

kulisukuma lile kochi kwa nyuma na hapo bastola ya Koplo Tsega ikamponyoka huku

yeye akijitupa upande ule uliokuwa na lile kabati dogo pale sebuleni kisha akavuta

droo ya tatu na kuichukua bastola yake

Makadirio ya Pierre Kwizera yalikuwa sawia kwani ndani ya muda mfupi akawa

amefanikiwa kulifungua lile kabati na kuichuka ile bastola yake. Lakini Koplo Tsega

hakumpa nafasi Pierre Kwizera ya kutimiza adhma yake kwani bastola ile aliipangusa

na kuitupilia mbali kwa teke lake. Hata hivyo Pierre Kwizera hakuwa mtu rahisi kwani

pigo la pili la teke la Koplo Tsega lilipokuja akawahi kuinama chini akilikwepa kisha

akamchota Koplo Tsega kwa mtama wa aina yake uliomrusha hewani na alipokuwa

mbioni kutua chini akamuwahi na kumtandika pigo la teke la tumbo lililomtupa

ukutani. Kisha Pierre Kwizera akajibetua na kusimama huku amepandwa na ghadhabu.

Koplo Tsega akaugulia maumivu makali ya kipigo kile huku akijilaumu kwa kufanya

makadirio ya chini dhidi ya adui yake. Pierre Kwizera hakumpa nafasi Koplo Tsega

hivyo kabla Koplo Tsega hajasimama pale chini akatupa pigo jingine la teke usawa wa

kichwa chake. Mara hii Koplo Tsega alikuwa mwepesi kujihami akijiviringisha haraka

mara mbili pale sakafuni kulikwepa pigo lile huku damu nyepesi ikimtoka puani.

Pigo jingine la teke la Pierre Kwizera lilipokuja Koplo Tsega akaliona na kulidaka

kwa nguvu zake zote kisha akauzungusha ule mguu na hapo Pierre Kwizera akarushwa

hewani. Lakini Pierre Kwizera hakwenda mbali kwani Koplo Tsega aliwahi kuivuta

fulana yake mchinjo kwa nyuma na kumshindilia mgumi mbili kavu za mgongoni

zilizompelekea abweke kama mbwa huku maumivu makali yakisambaa mwilini

mwake. Pierre Kwizera akayumbayumba akitafuta mhimili hata hivyo alichelewa

kwani teke jingine la Koplo Tsega likamtandika shingoni na kumtupia ukutani.

Pigo jingine la ngumi ya uso lilipomfikia Pierre Kwizera ambaye alishaanza kuona

dalili za kuzidiwa maarifa akawahi kulipangua kisha kwa nguvu zake zote akamsukuma

Koplo Tsega kwenye ile rafu ya vitabu iliyokuwa pale sebuleni. Ile rafu ikaanguka chini

huku vioo vyake vikipasuka na vile vitabu vikitawanyika ovyo pale chini sakafuni.

Koplo Tsega akapiga yowe la hofu kwani vile vioo vilikuwa vimemchana

mikononi. Pierre Kwizera aliwahi kumfikia Koplo Tsega pale chini akamvuta na

kumkaba kabari matata shingoni. Koplo Tsega akajaribu kufurukuta bila mafanikio

kwani Pierre Kwizera alikuwa mtu mwenye nguvu sana. Hata hivyo Koplo Tsega

hakukata tamaa badala yake aliendelea kurusha miguu yake huku na kule akitafuta

namna ya kujinasua. Pierre Kwizera akiwa amelitambua hilo hakumpa nafasi Koplo

Tsega ya kujinasua badala yake akaendelea kuikaza ile kabari na kumbeba juu juu.

“Si unajidai mzimu basi tulia nikuoneshe,ngedere mkubwa we!” Pierre Kwizera

akafoka huku akiendelea kumkaba Koplo Tsega shingoni kiasi cha kumnyima nafasi

nzuri ya kuhema. Koplo Tsega akaanza kupoteza matumaini huku akihema kwa taabu.

Huku akiwa ametoa macho Koplo Tsega akaanza kuhisi wingu jepesi la giza

likitanda mbele yake hata hivyo hakukata tamaa badala yake akaendelea kurusha

miguu yake huku na kule katika namna ya kutaka kujinasua.

Shughuli ilikuwa pevu hata hivyo mikikimikiki ile ikawapelekea taratibu wasogee

karibu na ukuta wa pale sebuleni. Walipoufikia ule ukuta Koplo Tsega akaitumia fursa

ile kuikita miguu yake ukutani kisha akakusanya nguvu za kutosha na kuusukuma

ule ukuta kwa miguu yake. Tukio lile likawarusha wote na kuwabwaga pale sakafuni

kwa kishindo. Pierre Kwizera akapiga yowe kali na hapo akaifungua ile kabari bila

kupenda. Alipotaka kusimama Koplo Tsega akamuwahi kwa kumtandika kiwiko

cha nguvu kilichoupasua mwamba wa pua yake na kumpelekea apige yowe kali la

maumivu kama aliyekalia msumari. Pigo la pili la ngumi lilipomfikia akawahi kuliona

hivyo akalikwepa kwa kujirusha pembeni hivyo pigo la Koplo Tsega likakata hewa

bila majibu.

Pierre Kwizera akiwa bado anaugulia maumivu ya pua huku kamasi za damu

zikimtoka akakusanya nguvu na kusimama hata hivyo akashangaa kujikuta akirudi

tena pale chini bila kupenda.

Koplo Tsega alikuwa ameishtukia haraka dhamira ya Pierre Kwizera hivyo akawa

amemuwahi kwa kumchota mtama wa chini uliompaisha hewani mzobemzobe.

Pierre Kwizera alipokuwa akitua chini akatua juu ya ile meza fupi ya mbao ya mpingo

iliyokuwa pale sebuleni huku mkono wake ukivunjika na hapo akapiga yowe kali la

maumivu.

Koplo Tsega hakumpa Pierre Kwizera nafsi ya kutafakari pale chini kwani

akamuwahi haraka kwa pigo moja madhubuti la judo kichwani. Pierre Kwizera

akatulia kimya akining’inia juu ya meza ile kama mbuzi kwenye kiti cha baiskeli huku

fahamu zikiwa mbali naye.

_____

FAHAMU ZILIPOMRUDIA Pierre Kwizera akajikuta amefungwa kwenye

kiti kikamilifu huku kamba iliyotumika kumfunga ikiwa ni pazia mojawapo la pale

sebuleni. Jicho lake moja lilikuwa limevimba na kuvilia damu. Sehemu ya juu upande

wa kushoto usoni alikuwa amechanika na damu ilikuwa ikiendelea kutoka kwenye

jeraha. Mdomo wake ulikuwa umechanika na jino lake moja lilikuwa limevunjika. Ile

fulana yake mchinjo ilikuwa imeraruka vibaya na kuning’inia kama mikia ya Pweza.

Maumivu ya ule mkono wake uliovunjika yakampelekea ayafumbe macho yake

taratibu huku akizipa uhai fikra zake. Koplo Tsega alikuwa ameketi kwenye kiti mbele

yake akimtazama.

“Unajisikiaje?” Koplo Tsega akamuuliza Pierre Kwizera kwa utulivu huku

akimtazama

“Wewe ni nani?” Pierre Kwizera akauliza kivivuvivu huku bado akiona

maruweruwe.

“Koplo Tsega mdunguaji na askari komandoo wa jeshi la wananchi Tanzania.

Usiniambie kuwa mara hii umenisahau” Koplo Tsega akacheka kwa kicheko hafifu

lakini kilichohifadhi chuki ndani yake.

“Koplo Tsega au mzimu wa Koplo Tsega?” Pierre Kwizera akauliza kwa taabu

huku akipambana na maumivu makali mwilini mwake.

“Koplo Tsega na siyo mzimu wa Koplo Tsega” maelezo ya Koplo Tsega

yakampelekea Pierre Kwizera afungue macho yake vizuri na kumtazama Koplo Tsega

mbele yake. Taswira ya Koplo Tsega ilipojengeka vizuri machoni mwake akashikwa

na mshangao.

“Koplo!...ni wewe?” Pierre Kwizera akauliza kwa mshangao.

“Ndiyo mimi hebu nitazame vizuri” Koplo Tsega akaongea huku akitabasamu

na hapo macho ya Pierre Kwizera yakaweka kituo yakimtazama Koplo Tsega mbele

yake.

“Sasa yule aliyezikwa ni nani?” Pierre Kwizera akauliza kwa mshangao.

“Rafiki yangu”

“Mbona sikuelewi?”

“Ni hadithi ndefu na hicho siyo kilichonileta hapa” maelezo ya Koplo Tsega

yakampelekea Pierre Kwizera azidi kushikwa na mshangao. Kitambo kifupi cha

ukimya kikapita kisha Pierre Kwizera akavunja tena ukimya.

“Sasa una shida gani na mimi hadi univamie usiku huu?” swali la Pierre Kwizera

likampelekea Koplo Tsega atabasamu tena kisha akaingiza mkono mfukoni kuichukua

ile bahasha yenye zile hundi. Koplo Tsega alipoifungua bahasha ile akapekuwa hadi

pale alipoifikia hundi yenye jina la Pierre Kwizera na kuichomoa.

“Nani anayewapa hizi fedha?” Koplo Tsega akavunja ukimya akimuuliza Pierre

Kwizera huku akimuonesha ile hundi yenye jina lake. Pierre Kwizera akaitazama ile

hundi kwa makini na hapo mshangao ukazidi kumshika.

“Nani aliyekupa hundi yangu?” Pierre Kwizera akauliza kwa hamaki.

“Bado hujanijibu swali langu komredi!” Koplo Tsega akaongea kwa msisitizo.

Pierre Kwizera akashikwa na kugugumizi huku akiendelea kuitazama ile hundi kwa

mshangao.

“Sifahamu chochote!” hatimaye akaongea kwa utulivu baada ya kukohoa kidogo.

“Ulikuwa ukitarajia hundi ya namna hii kukufikia?” Koplo Tsega akauliza huku

akiipigapiga ile hundi kwa kidole chake na wakati huo akimtazama Pierre Kwizera

mbele yake. Pierre Kwizera akaitazama tena ile hundi kwa utulivu huku akioneka

kama aliyekuwa njia panda katika kutoa jibu dhidi ya lile swali.

“Ndiyo!..ha..hapana!”

“Mbona hueleweki?”

“Jibu ni ndiyo” hatimaye Pierre Kwizera akaongea kwa kujiamini.

“Okay! tia sahihi yako hapa” Koplo Tsega akamwambia Pierre Kwizera huku

akimpa ile hundi na kalamu ya wino. Pierre Kwizera akaipokea ile hundi kwa taabu

kwani sehemu za mikono yake zilikuwa zimefungwa huku akiwa ameshikwa na

mshangao. Akamtazama Koplo Tsega kwa mashaka kisha akatia sahihi kwenye ile

hundi. Alipomaliza Koplo Tsega akaichukua ile hundi na kuitia kwenye bahasha

kisha ile bahasha akaitika mfukoni huku akimuacha Pierre Kwizera katika mshangao

usioelezeka. Hata hivyo hakuzungumza neno.

“Unaweza kuniambia ulikuwa ukitarajia kupokea hundi hii kutoka kwa nani?”

Koplo Tsega akauliza kwa utulivu baada ya kuiweka ila bahasha mfukoni. Pierre

Kwizera akamtazama Koplo Tsega kwa makini kama ambaye anajutia jibu lake

lililotangulia. Kisha kwa sauti ya uchovu akajitahidi kuzungumza

“Sifahamu chochote kuhusu hiyo hundi!”

“Nilitarajia jibu la namna hiyo kwako hata hivyo natambua kuwa unanidanganya.

Wewe na wenzako mmepewa pesa kwa ajili ya kuniua mimi na Sajenti Chacha Marwa.

Nafahamu kuwa yupo mtu anayewapa hizi fedha na ni afadhali ukamtaja kwani jaribio

lenu limeshindikana” Koplo Tsega akaongea huku uso wake ukiwa mbali na mzaha.

“Mbona sielewi unachosema?” Pierre Kwizera akaongea kwa utulivu huku

mshangao ukishindwa kujificha machoni mwake.

“Utaendelea kujidanganya kuwa huelewi hadi lini komredi wakati ukweli

unaufahamu vizuri?” Koplo Tsega akamuuliza Pierre Kwizera kwa utulivu.

“Koplo mbona unanichanganya kwa habari ambazo sizielewi?” Pierre Kwizera

akauliza huku akionesha kukata tamaa.

“Mtu wenu mliyemtuma hakuwa makini sana” Koplo Tsega akaendelea kuongea

kwa utulivu.

“Mtu gani unayemzungumzia?” Pierre Kwizera akauliza kwa shauku

“Meja Khalid Makame!”

“Nani aliyekwambia?” Pierre Kwizera akauliza kwa mshangao hali iliyompelekea

Koplo Tsega atabasamu kidogo.

“Hakuna mtu aliyeniambia komredi nimejionea mwenyewe kwa macho yangu.

Mtu wenu Meja Khalid Makame hakuwa makini katika kukamilisha mpango wenu na

mimi sikufanya makosa kumchakaza vibaya kwa risasi”

“Mungu wangu! kwa hiyo wewe ndiye uliyemuua Meja Khalid Makame?” Pierre

Kwizera akauliza kwa mshangao.

“Ndiyo! tena nimemuua kwa risasi zangu mwenyewe” Koplo Tsega akajigamba

kwa ghadhabu. Pierre Kwizera akamtazama Koplo Tsega kama ambaye hakumsikia

vizuri lakini ukweli ni kuwa alikuwa amemsikia vizuri Koplo Tsega na jasho jepesi

lilikuwa likianza kumtoka mwilini.

“Oh! my God umefanya nini Koplo?. Kwanini umuue Meja Khalid Makame?”

Pierre Kwizera akauliza kwa hamaki.

“Acha kuigiza komredi. Unadhani mazingira ya kifo cha Meja Khalid Makame

yametawaliwa na hisia?. Sijamuua kwa bahati mbaya na wala sijuti kwa nilichokifanya

kwani ningezembea kidogo angenimaliza na mipango yenu ingeenda sawa. Huwenda

muda huu mngekuwa mkifanya tafrija ya kujipongeza kwenye hoteli moja kubwa ya

kifahari hapa jijini Dar es Salaam” Koplo Tsega akaongea huku akiangua kicheko

hafifu cha dhihaka kisha akaendelea

“Sasa tafrija yenu imeanza kugeuka msiba mzito sana kwani nitawawinda mmoja

baada ya mwingine ili mfidie hasara ya maisha ya watu mliyowaua bila hatia. Kweli

hamna haya na ufedhuli wenu yaani kumbe shughuli zote zile tulizokuwa tukizifanya

kwenye hii tume ni kiini macho tu!. Kama hamkutuhitaji kwanini mlituita?” Koplo

Tsega akacheka tena kwa dhihaka kabla ya kuendelea

“Sasa kaeni chonjo kwani yule msiyemtaka amekuja” Koplo Tsega akaendelea

kuongea huku akicheka kwa dhihaka na hasira.

“Kuwa makini Koplo kwani sasa naanza kuhisi kuwa mapigano ya msituni

yamekuchanganya akili yako vibaya” Pierre Kwizera akaongea kwa hasira huku

akijitahidi kujinanusua kwenye kile kifungo bila mafanikio. Koplo Tsega akaendelea

kucheka na kicheko chake kilipofika ukomo akamkata jicho la hasira Pierre Kwizera

mbele yake.

“Kama isingekuwa bahati mbaya basi muda huu ungekuwa unatafutiwa sanduku

zuri la mzishi yako huku wataalam wakikuandalia wasifu mzuri wenye mbwembe na

heshima nyingi kwa wale wasiokujua”

“Una maanisha nini?” Pierre Kwizera akuliza kwa hasira.

“Risasi zangu mbili makini zingekuwa zimekufumania vizuri na kukifumua vibaya

kichwa chako wakati ulipokuwa ukitoka nje ya lile jengo la ofisi za wizara ya ulinzi na

mambo ya ndani muda mfupi uliyopita” Koplo Tsega akaongea huku akitabasamu.

Pierre Kwizera akashikwa na mshangao wa aina yake huku akilikumbuka gari dogo

jeupe aina ya Corolla limited aliloliona mara mbili na zaidi nyuma yake na kulipuuza

wakati alipokuwa akitoka ofisini kwenye lile jengo la wizara ya ulinzi na mambo ya

ndani.

“Koplo!...so you wanted to kill me?” Pierre Kwizera akauliza kwa mshangao.

“Definitely!...” Koplo Tsega akaongea kwa utulivu huku uso wake ukishindwa

kuonesha tashwishwi yote.

“Why…?” Pierre Kwizera akauliza hata hivyo Koplo Tsega akalipuuza swali lile na

badala yake akatumbukiza swali lake.

“Nani anayewapa hizi fedha?”

“Sifahamu chochote Koplo” Pierre Kwizera akajitetea

“Huwezi kufa na siri hiyo moyoni komredi kwani haupo peke yako. Ukifa wewe

wenzako wataniambia tu!” Koplo Tsega akaongea kwa utulivu

“Hufahamu unachokizungumza Koplo!” Pierre Kwizera akaongea kwa kulalama

huku akionekana kuzama kwenye tafakuri.

“Nafahamu kuwa kuna maslahi makubwa mliyoyapata au mliyoahidiwa kuyapata

mara baada ya vifo vyetu. Hizi hundi nimezikuta nyumbani kwa Meja Khalid Makame

mtu mliyemtuma D.R Congo kuja kutimiza mpango wenu mchafu. Bahati mbaya

sana mpango wenu umeharibika hivyo hamuwezi kupiga hatua nyingine mbele zaidi

bila ya kuniua mimi. Lakini mimi nimekufa na kila mtu ana amini hivyo na hali hiyo

ndiyo inayonipa nafasi nzuri ya kupambana na nyinyi huku nikiwa sipo katika fikra

zenu kabisa just because i am dead,burried and forgotten” Koplo Tsega akaongea huku

akiangua kicheko hafifu cha hasira na dhihaka.

“Nakushauri urudi nyumbani ukapumzike kwanza kwani akili yako inaonekana

imeathirika vibaya na milio ya mabomu na risasi msituni” Pierre Kwizera akaongea

kwa dharau huku tabasamu hafifu likipita usoni mwake. Koplo Tsega akamtazama

Pierre Kwizera kwa hasira bila kusema neno lolote badala yake akasimama na kuelekea

kwenye kochi lililokuwa jirani na eneo lile.

Aliporudi alikuwa ameshika kompyuta mpakato aliyoichukua kwenye begi la

ofisini la Pierre Kwizera kule chumbani kwake muda ule Pierre Kwizera alipokuwa

amepoteza fahamu baada yay ale mapambano makali.

Baada ya kuketi Koplo Tsega akaifungua ile kompyuta mpakato na alipoiwasha

akamtazama Pierre Kwizera kwa uyakinifu kabla ya kuvunja ukimya.

“Nahitaji password yako” Koplo Tsega akaongea kwa utulivu huku akimsogezea

karibu Pierre Kwizera ile kompyuta. Pierre Kwizera akaitazama kompyuta yake kwa

makini hata hivyo hakuingiza password yake kama alivyoambiwa na badala yake akainua

macho yake akimtazama Koplo Tsega huku akitabasamu.

“Unadhani mimi ni mjinga kiasi hicho?” Pierre Kwizera akaongea huku akiendelea

kutabasamu. Koplo Tsega akamtazama Pierre Kwizera kwa kitambo huku akiyapima

maneno yake na hapo akagundua kuwa Pierre Kwizera alikuwa akimaanisha kile

alichokuwa akikisema. Hasira zikampanda Koplo Tsega huku akianza kupoteza moyo

wa uvumilivu.

“Nimewaua Meja Khalid Makame,Guzbert Kojo na P.J.Toddo hivyo kama

utaendelea kushikilia msimamo wako sioni sababu ya kukuvumilia komrade” Koplo

Tsega akaongea huku akimtazama Pierre Kwizera mbele yake. Pierre Kwizera

akashikwa na taharuki baada ya kuyasikia maelezo yale.

“My God! kumbe ni wewe…?”

“Don’t west my time comrade,I need your password please…!” Koplo Tsega akasisitiza

“Kwa hiyo umekuja kuniua na mimi?. Utaua watu wangapi Koplo?. Kwanini

ufanye makosa yasiyo na ulazima?. Serikali hii ina mtandao mkubwa itakufikia popote

utakapojificha. Utakamatwa na kufunguliwa mashtaka ya mauaji ya kukusudia na

mwisho wako ni kunyongwa tu”

”Unanitisha?. Unadhani utafanikiwa kunitisha?. Mimi siyo mwoga kama nyinyi.

hebu niambie komredi feki ni pesa kiasi gani mliyolipwa kuuondoa uhai wetu?.

Kwa miaka mingi mmekuwa mkifanya kiini macho kama Paka mwenye njaa kali

anayesalisha kundi kubwa la Panya huku akiwa amevaa rozari ya dagaa.

Nguvu kazi kubwa ya taifa hili imeharibika kwa ajili yenu. Pesa nyingi ya wazalendo

walipakodi wa taifa hili mnazitafuna na kujineemesha na familia zenu. Watoto wenu

wanasoma kwenye shule na vyuo vikubwa vikubwa nje ya nchi ili baadaye waje

kushika madaraka hata kama ni bongo lala. Wakati watoto wa masikini wanataabika

mitaani na ndiyo mnazidi kuwamaliza kwa biashara zenu chafu.

Kila kunapokucha tume zisizo na vichwa wala mikia zinaundwa kutatua

matatizo yasiyo ya lazima na matokeo yake ni utafunwaji wa mabilioni ye fedha kwa

wapumbavu wachache wanaojiita wajanja waliobarikiwa. Hii nchi mnataka kuipeleka

wapi nyinyi wapumbavu?” Koplo Tsega akaweka kituo akimtazama Pierre Kwizera

huku amepandwa na hasira.

“Huelewi unachokizungumza Koplo. Mimi nakuona kama unayepiga kampeni za

kisiasa” Pierre Kwizera akaongea huku usoni akiumba tabasamu la dharau.

“Mlidhani kuwa mambo yangekuwa rahisi komredi lakini mlikosea sana kwani

nimerudi nikiwa na nguvu za kutosha za kuwashughulikia mmoja baada ya mwingine.

Tafadhali! ingiza password yako kwenye hii kompyuta kwani muda wa nasaha

umekwisha” Koplo Tsega akaongea huku uso wake umejawa na chuki.

“Kwanini uning’ang’anize kuweka password kwenye kompyuta yangu?”

“Nahitaji faili langu” Koplo Tsega akaongea huku uso wake umetulia kama jiwe.

“Faili lipi?” Pierre Kwizera akauliza huku akimtazama Koplo Tsega kwa makini.

“Faili lenye taarifa zangu zote nilizozifanyia kazi wakati nikiwa kwenye hii tume”

Koplo Tsega akaongea kwa utulivu huku uvumilivu ukipungua. Pierre Kwizera

akamtazama kabla ya kuangua kicheko cha dhihaka.

“Hii ni serikali Koplo siyo Project ya mtu binafsi au Ngo’s. Unapoteuliwa kwenye

tume yoyote huwa kuna taratibu zake za kufuata na unapotolewa huwa ni vilevile. Hii

siyo miradi kama Mkukuta au Mkulabita. Unapoondolewa kwenye tume taarifa zako

huwa ni confidencial hivyo huna haki ya kuzidai tena.

Wewe,Sajenti Chacha Marwa na Meja Khalid Makame mlishaondolewa kwenye

hii tume hivyo huwezi kurudi kienyeji na istoshe kazi zenu walishateuliwa watu

wengine kuzifanya” Pierre Kwizera wakati akimaliza kuongea akajikuta akiambulia

kichapo cha nguvu kutoka kwa Koplo Tsega kilichomsababishia maumivu makali

mwilini.

“Ingiza password yako komredi ukaidi hautokusaidia kitu” Koplo Tsega akaongea

kwa hasira.

“Go on you bastad kwani najua kuwa huwezi kuniua” Pierre Kwizera akaongea huku

tabasamu lake likiwa limechanganyika na maumivu makali. Koplo Tsega kuona vile

akabadili mtindo wa mateso akimtimba Pierre Kwizera miguuni kwa kisigino cha

viatu vyake. Pierre Kwizera akaendelea kulalama pasipo kuweka password kwenye ile

kompyuta yake.

“Utaniua lakini hautafanikiwa kufika mbali Koplo”

“Subiri uone” Koplo Tsega akaongea huku akiikamata vyema bastola yake kisha

akaielekeza bastola ile kwenye paja la Pierre Kwizera na kuisukuma risasi moja. Pierre

Kwizera akapiga yowe kali huku akiwa haamini macho yake. Maumivu aliyoyapata

kutokana na lile jeraha la ile risasi yakamchanganya kabisa. Jasho likaanza kumtoka

huku akihema ovyo wakati alipoitazama damu yake kwenye lile jeraha.

“Nilikwambia kuwa ukaidi hautakusaidia kitu komredi. Tafadhali! ingiza password

yako kwenye hii kompyuta” Koplo Tsega akaongea kwa ghadhabu huku akiilekeza

bastola yake tena kwenye paja jingine la Pierre Kwizera. Pierre Kwizera kuona vile

akahamaki na kushikwa na hofu huku mdomo ukimchezacheza na mikono yake

ikitetemeka ovyo. Mara hii akaupeleka mkono wake taratibu na kuanza kubofya vitufe

vya keyboard ya kompyuta yake akiingiza password. Muda mfupi uliyofuata ile kompyuta

ikafunguka.

“Good boy!” Koplo Tsega akaongea huku akitabasamu kisha tabasamu lake

lilipofifia na kukoma sura yake ikavaa uso wa kazi na hapo akaikamata vizuri bastola

yake mkononi. Tukio lile likampelekea Pierre Kwizera aingiwe na hofu.

“Ukifika mwambie P.J.Toddo kuwa mimi ndiye niliyemuua”

“Nikifika wapi?’’ Pierre Kwizera akauliza kwa shauku lakini hakujibiwa na badala

yake risasi mbili za bastola ya Fort 12 iliyofungwa kiwambo maalum cha kuzuia

sauti zikapenya kwenye pafu lake la kulia na kutengeneza matundu mawili madogo

yanayovuja damu. Pierre Kwizera akapiga yowe kidogo na kutulia huku umauti ukiwa

tayari umemchukua.

Koplo Tsega akamtazama Pierre Kwizera kwa utulivu huku akitabasamu kisha

akachukua kitabu chake kidogo na kalamu kutoka mfukoni. Kupitia kitabu kile

akafunua kurasa hadi pale alipolifikia jina la Pierre Kwizera ambapo aliweka kituo na

kuweka alama ya X kisha akakirudisha kile kitabu mfukoni. Koplo Tsega hatimaye

akachukua pipi ya kijiti kutoka mfukoni kisha akaimenya taratibu na kuitia mdomoni.

Muda mfupi baadaye msako aliomaliza kuupitisha ndani ya nyumba ya Pierre

Kwizera ukawa umempatia vitu fulani muhimu alivyovihitaji. Koplo Tsega hakuwa

na muda wa kupoteza hivyo akafungua mlango wa ile nyumba na kutoka nje.

Mvua kubwa iliyokuwa ikiendelea kunyesha haikumzuia kuendelea na safari yake

wakati alipoitoroka nyumba ile na kupotelea mitaani.



KIKAO KILICHOFANYIKA MAPEMA SANA alfajiri juu ya jengo moja

la ghorofa lililokuwa kando ya jiji la Dar es Salaam kikiwashirikisha watu

wachache waliopigiwa simu usiku wa manane kilikuwa kimehitimika kwa

kufanyika maazimio kadhaa makubwa na muhimu katika namna ya kukabiliana na

mauaji ya maafisa wa vitengo nyeti vya usalama yaliyokuwa yakiendelea kutokea jijini

Dar es Salaam.

“Hatuwezi kusema nchi yetu ni kisiwa cha amani wakati mauaji ya viongozi

wa vitengo nyeti vya usalama vya nchi hii yanaendelea kutokea“ M.D.Kunzugala

mwanaume mrefu na mweusi mwenye mwili imara uliyojengeka vizuri kwa shibe isiyo

ya wasiwasi na mazoezi ya kutosha akaongea kwa hasira huku akiyatembeza macho

yake taratibu kuzitazama kwa makini sura za wajumbe waliofika kwenye mkutano ule.

Tangu pale alipogiwa simu kujulishwa juu ya taarifa za kifo cha Pierre Kwizera

usiku wa manane M.D.Kunzugala alikuwa hajatulia hata kidogo. Usingizi alioanza

kuutongoa kitandani ukawa umeyeyuka na baada ya hapo akawa akipokea na kupiga

simu kwa viongozi mbalimbali wakiwemo wakuu wa nchi. Maswali yalipokuwa mengi

M.D.Kunzugala akatoka nje ya nyumba na kuwasha gari lake akielekea eneo la tukio.

Kwa mara ya kwanza akajikuta akianza kuichukia kazi yake na kuzitamani kazi

nyingine tofauti zisizokuwa na majukumu kama yake. Kwa muda wa miaka sita tangu

alipoteuliwa kushika kitengo hiki alikuwa hajakutana na misukosuko na changamoto

ambazo kwa sasa alianza kuzihisi kuwa zilikuwa mbioni kukitilia mchanga kitumbua

chake.

“Mauaji yameanza kwa Guzbert Kojo yakahamia kwa P.J.Toddo na sasa ni kwa

Pierre Kwizera. Hivi bado mnataka niamini kuwa mauaji haya yanatekelezwa na

wahalifu wa kawaida kama panya road?. Hilo mimi siliamini na sitaki katu kuliamini.

Binafsi nahisi kuna kitu fulani kinachoendelea na kilichojificha nyuma ya mauaji

haya. Hata hivyo sitaki tuamini sana katika hisia zangu ndiyo maana nikawaita hapa

ili tujadiliane nini cha kufanya kuikomesha hali hii” M.D.Kunzugala akaweka kituo

akikohoa kidogo kusafisha koo lake huku akionekana kufikiria jambo. Wakati akifanya

vile macho yake yakawa yakiendelea kufanya ziara kuzitazama sura za wajumbe

waliohudhuria mkutano ule mfupi wa dharura.

“Mimi naungana na wewe mkuu kwani tangu mauaji haya yameanza kutokea

mimi nimekuwa karibu sana na vyombo vya habari katika kutaka kujua vyombo vya

habari vinaongeleaje matukio haya.

Nataka nikwambie kuwa mtazamo uliopo kwa jamii kubwa ni kuwa serikali hii

ni dhaifu na imeshindwa kusimamia vizuri suala la usalama wa watu wake. Hivyo

nionavyo mimi ili kupambana na matukio haya ni lazima kufanyike mabadiliko

makubwa ya mfumo wa utendaji katika idara husika” Ghalib Chakwe,mwanaume

mfupi mnene mwenye macho makali na pia mkuu wa kurugenzi ya usalama ikulu

alimaliza kuongea huku akijiegemeza vizuri kwenye kiti na hivyo kuufanya mgongo

wake ustarehe lakini macho yake yakitulia kutazama juu ya meza kama anayefikiri

jambo.

“Yeyote anayefanya hivi ana malengo ya kuitia dosari serikali,kufanya hujuma

kama siyo njama za kudhoofisha utendaji wa serikali na hatimaye kuipindua. Mifano ya

namna hiyo tumeiona Bamako nchini Mali wakati Kepteni Amadou Sanogo alipoipindua

serikali ya rais Amadou Touman Touré tarehe 22 mwezi Machi mwaka 2012. Hujuma

za namna hiyo pia zimefanyika mjini Bangui kwenye nchi ya jamhuri ya Afrika ya

kati wakati waasi walipoipindua serikali ya rais Francois Bozize tarehe 24 mwezi Machi

mwaka 2013. Hivyo suala hili ni lazima lipewe uzito wa aina yake mkuu” Tiblus

Lapogo,mwanaume mrefu na mwanausalama mahiri kutoka kitengo maalum cha

upelelezi cha ofisi ya mashtaka ya DPP akaongea kwa msisitizo huku hoja yake ikielea

hewani.

“Mimi nafikiri hili suala ni muhimu tukavishirikisha na vyombo vingine vya

usalama likiwemo jeshi la polisi. Upelelezi wa kina ufanyike wahusika wakamatwe

na kuhojiwa ili tujue mauaji haya yanafanywa na nani na kwa sababu gani” Siraju

Chenga,afisa usalama na mwanakamati ya kudumu ya ulinzi na usalama wa jiji la Dar

es salaam alimaliza kuongea huku akiwatazama wenzake.

“Mimi naona tutoe matangazo kwenye vyombo vya habari kuwatahadharisha

wananchi juu ya matukio haya” Manyama Sululu akatumbukiza hoja yake baada ya

kuhisi kuwa huwenda wazo lake pia lingekuwa na msaada.

“Nionavyo mimi tusitoe matangazo hayo mapema kwani tutasababisha hofu

kwa wananchi na vilevile tutaonekana tumeshindwa kazi. Matangazo pia yatawafanya

wanaofanya mauaji haya wapate nafasi nzuri ya kujificha huko waliko. Katika mazingira

kama haya biashara ya kimyakimya ndiyo inayolipa. Tuvishirikisheni vyombo vyetu

vya usalama ambavyo vina weledi wa hali ya juu na uzoefu wa kutosha” Luteni Kanali

Davis Mwamba mkuu wa kamati ya dharura ya usalama wa nchi na itifaki za jeshi la

wananchi akapendekeza huku akiyatembeza macho yake kuzitazama sura za wajumbe

waliokuwa mle ndani.

“Mimi naona kabla ya kwenda mbele zaidi upelelezi ungefanyika kwanza katika

kuzifahamu nyendo za maafisa wote waliouwawa. Kuanzia hapo huwenda tukapata

sababu za vifo vyao na hiyo itatusaidia kwa hatua inayofuata” James Risasi akaongea

kwa utulivu huku akiupima uzito wa hoja yake.

Baada ya pale kikafuatiwa na wachangiaji wengine kutoka idara tofauti za usalama

wa taifa huku M.D.Kunzugala mkurugenzi mkuu wa usalama wa taifa akiwa ndiye

msemaji mkuu wa mkutano ule.

Hatimaye mkutano ule ukafika tamati huku maazimio yakiwa ni kuongeza ufanisi

katika utendaji na kumvua madaraka Abdulkadir Badru. Mkuu wa intelijensia ya

usalama wa taifa kwa kile kinachosemekana kuwa eti ofisi yake ilikuwa imeshindwa

kutoa taarifa za kueleweka juu ya matukio ya mauaji ya wanausalama yaliyokuwa

yakiendelea jijini Dar es Salaam.

Nafasi ya Abdulkadir Badru akawa amepewa Sulle Kiganja. Mtu mkorofi na mtata

katika kushughulika na wahalifu. Ile nafasi ya marehemu P.J.Toddo akawa amepewa

ndugu Miraji Kasena na zile nafasi zilizoachwa wazi za Guzbert Kojo na Pierre

Kwizera zikaazimiwa kuwa zingetolewa hoja na rais na ndiye ambaye angeamua nani

wa kumteua kwani tofauti na hapo ilikuwa ni sawa na kuingilia madaraka ya rais.

Hatimaye mkutano ule ukafika tamati na wajumbe wakaagana na kuondoka huku kila

mmoja akiwa amechiwa majukumu yake ya kufanya.

Kitendo cha Abdulkadir Badru ama Badru kama wengi walivyozoea kumuita

kuvuliwa madaraka pasipo kupewa ofisi nyingine kilikuwa kimemuacha njia panda

huku akijihisi kuwa ni kama waziri asiyekuwa na wizara maalum.

Mara baada ya wajumbe wale kuondoka Badru akabaki mle ukumbini huku

aliendelea kuwaza namna maisha yatakavyomwia vugumu baada ya kuvuliwa wadhifa

wake. Ikulu alikuwa akiingia na kutoka kama nyumbani kwake mara kwa mara kuonana

na viongozi wakubwa wa serikali. Safari zake nje ya nchi zilikuwa zikigharimiwa na

serikali huku akiendeshwa kwenye gari la kifahari na kupewa ulinzi wa kutosha.

Badru akaendelea kukumbuka hoteli za kifahari alizokuwa akifikia mara apatapo

safari za kikazi nje ya nchi huku akisindikizwa na posho za kila namna. Mawazo ya

kupoteza vitu hivyo vyote kwa wakati mmoja yakampelekea ajihisi mnyonge sana.

Siyo kweli kwamba Badru alikuwa hajafanya kitu chochote tangu mauaji ya

Guzbert Kojo yalipotokea. La hasha! hali haikuwa hivyo kwani tangu mauaji yale

yalipotokea Badru alikuwa hajalala usiku na mchana akiipanga vizuri safu yake

ya kiutendaji katika kuhakikisha kuwa muuaji anakamatwa. Safu yake ikiundwa na

Fulgency Kassy,Pweza,Kombe na watu wengine kutoka katika idara tofauti.

Hata hivyo kwa upande mwingine Badru alikuwa akiufahamu ukweli wa mambo

ingawa alikuwa ameshindwa kuushughulikia kikamilifu kutokana na hofu ya kugusa

maslahi ya wakubwa.

“Potelea mbali watajua wenyewe!” hatimaye Badru akajiambia huku akisogeza kiti

chake nyuma na kusimama baada ya wajumbe wote kutoka mle ukumbini. Mawazo

ya hisia za unyonge yakiendelea kumkabili Badru akapiga hatua zake hafifu akielekea

kwenye dirisha moja kubwa la kioo la mle ukumbini ili kujifariji na mandhari ya nje

ya lile jengo la ghorofa. Mara wakati Badru akilikaribia lile dirisha akasikia mkono

ukimshika begani na alipogeuka nyuma akajikuta akitazamana na Sulle Kiganja,mtu

aliyekabidhiwa kitengo chake.

“Pole sana Badru ila tambua kuwa cheo ni dhamana” Sulle Kiganja akaongea huku

akilazimisha tabasamu ingawa ile haikuwa hulka yake. Kwa muda mrefu Abdulkadir

Badru na Sulle Kiganja walikuwa kama Paka na Panya huku wakitiliana fitina za hapa

na pale kila nafasi ya kufanya hivyo ilipokuwa ikipatikana.

“Nishapoa!” Badru akaongea kinyonge huku akigeuka na kutazama dirishani.

“Hupaswi kumlaumu M.D.Kunzugala kwani hata yeye amepewa shinikizo kutoka

juu” Sulle Kiganja akaendelea kuongea huku akitabasamu.

“Simlaumu mtu yoyote kwani nadhani mchango wa kazi yangu haujaonekana

hivyo ofisi ipo huru kufanya vile inavyoona kuwa ni sawa” Badru akaongea bila

kumtazama Sulle Kiganja huku mikono yake akiwa ameiegemeza dirishani na macho

yake yakitazama nje kupitia kwenye kile kioo.

“M.D.Kunzugala anasema eti inawezekana kuwa mauaji haya yapo nyuma ya

mpango fulani hatari. Vipi wewe ulimuelewa wakati alivyosema vile?” Sulle Kiganja

akauliza baada ya kusimama pembeni ya Badru huku akitazama nje kupitia kile kioo

cha dirishani.

“Mimi sitafahamu kitu chochote ndiyo maana nimeondolewa kitengoni. Kwanini

hukumuuliza mwenyewe wakati alipoongea?” Badru akajibu kwa hasira huku

akimuona Sulle Kiganja kama aliyekuwa akichokonoa vitu ambavyo havikuwa na

maana tena kwake.

“Hapaswi kukasirika Badru kwani bado mchango wako unahitajika. Haya yote

yanafanyika ili kuimarisha usalama wa nchi. Hata rais hulazimika kubadili baraza lake

la mawaziri kila anapohisi kuwa ipo haja ya kufanya hivyo” Sulle Kiganja akaongea

huku akiendelea kutabasamu

“Naomba uniache kwanza kwani nahitaji faragha!” Badru akaongea kwa utulivu.

“Utakuwa na muda mrefu wa faragha baada ya kunikabidhi ofisi”

“Nitakukabidhi ofisi kesho asubuhi!”

“Kwanini isiwe leo Badru?. Huoni kuwa muuaji anaendelea kutabaruku?”

Maelezo ya Sulle Kiganja yakampelekea Badru ageuke kumtazama huku donge la

hasira limemkaba kooni.

“Tafadhali! naomba uniache nahitaji faragha” Badru akaongea kwa hasira.

“Okay! na vipi kuhusu wale vijana wako?” Sulle Kiganja akauliza kwa tahadhari

“Vijana gani?” Badru akauliza huku akigeuka na kumkata jicho la hasira Sulle

Kiganja pembeni yake.

“Fugnecy Kassy,Pweza na Kombe!”

“Wamefanya nini?”

“Kesho utakaponikabidhi ofisi utawaambia waripoti kwangu kwani nahitaji

kufahamu wamefikia wapi kabla sijaanza kazi yangu” Sulle Kiganja akaongea huku

akitabasamu hata hivyo Badru hakumjibu kitu badala yake akageuka na kutazama nje

ya lile jengo kupitia kwenye kile kioo cha dirishani huku mawazo yake yakiwa mbali

na eneo lile.



#111

SAA YA GARI LANGU KWENYE DASHIBODI ilionesha kuwa ilikwisha

timia saa tatu na robo asubuhi wakati nilipoegesha gari langu kando ya kituo cha

kujazia mafuta eneo la Mwenge jijini Dar es Salaam. Asubuhi hii mvua ilikuwa

imeacha kunyesha na anga lote la jiji la Dar es Salaam lilikuwa tulivu.

Fikra zangu bado zilikuwa zimetawaliwa na lile tukio la jana la kule Tabata relini.

Kifo cha Momba kilikuwa kimeniweka katika wakati mgumu sana na sikutaka

kujilaumu kuwa mimi ndiye niliyesababisha kifo kile kwani nilikuwa na hakika kuwa

kifo chake kilikuwa kimetokana na kitendo cha kutumika kwa gari lake na yule

mdunguaji hatari.Hivyo hisia zangu zikanieleza kuwa watu wale waliomuua Momba

huwenda walimpata kwa urahisi baada ya kupeleleza gari lake katika vijiwe vya teksi

vya jijini Dar es Salaam.

Nikiwa naendelea kufikiri mara hoja nyingine ikachipuka taratibu kichwani

mwangu pale nilipowaza kuwa kitendo cha mdunguaji kutafutwa na wale watu kwa

maana nyingine ni kuwa watu wale hawakuwa na unasaba wowote na yule mdunguaji.

Hivyo baada ya mimi mdunguaji alikuwa ni adui namba mbili. Swali likabaki kuwa

yule mdunguaji alikuwa nani na kwanini alimdungua yule mwanaume nje ya Vampire

Casino usiku ule?. Majibu sikuyapata hivyo asubuhi hii nilikuwa nimeamua kurudi tena

kwenye kituo kile cha teksi ambacho Momba alikuwa akiegesha teksi yake ili nidadisi

kama ningeweza kupata chochote cha kunisaidia katika upelelezi wangu.

Nilisubiri magari yasimame kwenye foleni kisha nikatumia mwanya ule kuvuka

barabara nikikatisha kwenye uwazi mdogo uliofanywa baina ya gari moja na lingine.

Muda mfupi baadaye nikawa nimetokezea upande wa pili wa ile barabara.

Kituo cha teksi cha eneo la Mwenge hakikuwa mbali na pale hivyo nikakatisha

katikati ya vibanda vya wamachinga na ndani ya muda mfupi nikawa nimefika kwenye

kituo kile.

Wakati nikifika nikaanza kuyatembeza macho yangu nikiwatazama madereva

wa teski waliokuwa eneo lile huku moyoni nikiomba nimkute tena yule mzee wa

kingoni niliyeonana naye siku ya jana. Hata hivyo madereva wale hawakuonesha

kunichangamkia kama ilivyokuwa siku ya jana na sikutaka kukata tamaa.

Kijana mmoja dereva wa teksi mwenye umri unaolekeana na wangu alinikaribisha

kwa bashasha zote akidhani kuwa nilikuwa mteja na nilipomchunguza haraka

nikatambua kuwa hakuwepo jana wakati nilipofika.

“Karibu bosi wangu usafiri wa kuaminika huu hapa” kijana yule akanikaribisha

huku akitaka kufungua mlango wa teksi yake lakini nikamuwahi kwa kumshika begani

huku nikimpa ishara kuwa nilikuwa sihitaji huduma ya usafiri. Yule kijana kuona vile

akasimama na kunikodolea macho ya mshangao.

“Unashida gani?”

“Namuulizia dereva mmoja wa teksi mzee wa kingoni” nilimwambia yule kijana

na hapo akageuka na kunitazama kwa udadisi kisha akaniuliza kwa sauti tulivu ya

kukata tamaa.

“Mzee Ngonyani?”

“Ndiyo!” nilimjibu huku nikijiuliza kama mzee yule niliyeonana naye jana alikuwa

akiitwa Ngonyani au lah!

“Yuko upande ule pembeni ya fundi viatu” yule kijana akanielekeza upande

mwingine wa kile kituo cha teksi.

“Ahsante!” nikamshukuru yule kijana kisha nikaanza kukatisha katikati ya teksi

zilizokuwa eneo lile nikielekea kule nilipoelekezwa.

Mzee Ngonyani alikuwa amefungua mlango wa mbele wa teksi huku akiwa

amelala kwenye kiti cha dereva kifua wazi baada ya kufungua vifungo vya shati lake.

Mguu wake mmoja ulikuwa chini huku ule mwingine akiwa ameutundika mlangoni.

Bila shaka hakutarajia kuniona pale kwani niliubaini haraka mshtuko wake wakati

alipogeuka kunitazama. Hakunichangamkia kama jana na badala yake taratibu

akauondoa mguu wake pale juu ya mlango kisha akakaa vizuri akinitazama pasipo

kusema neno huku uso wake ukionekana kulemewa na lindi la mawazo.

“Shikamoo mzee!”

“Marahaba” yule mzee akanijibu kwa mkato huku akinitazama kwa utulivu.

“Unanikumbuka?” nikamuuliza yule mzee na huwenda swali langu lilimtatiza

kidogo kwani alikawia kunijibu huku akinitazama.

“Nakukumbuka vizuri. Wewe si yule kijana aliyefika hapa siku ya jana kumuulizia

Momba?”

“Ndiyo mimi” nikamwambia yule mzee na hapo akageuka na kunitazama kwa

utulivu bila kusema neno lolote.

“Nimekuja kukupa taarifa mbaya” nikavunja ukimya

“Nafahamu!” yule mzee akaniambia kwa mkato.

“Unafahamu kuwa Momba ameuwawa!”

“Ndiyo”

“Nani aliyekwambia?” nikamuuliza yule mzee kwa udadisi huku nikimtazama

usoni.

“Kila mtu anafahamu hivyo na habari za kifo chake zipo magazetini” mzee yule

akaniambia kwa huzuni na hapo nikakumbuka kuwa nilikuwa sijapitia vichwa vya

magazeti asubuhi ya leo.

“Hicho ndiyo kilichonileta hapa. Nilitaka nikupashe habari kwani hata mimi

nimeshtushwa sana na habari za kifo chake” niliongea kwa utulivu lakini mzee yule

hakuchangia mada na badala yake aliendelea kunitazama.

“Taarifa zinasema kifo chake kimetokana na nini?” nilimuuliza yule mzee kwa

utulivu.

“Amenyongwa na mwili wake umeokotwa nyuma ya jengo la BML eneo la Tabata

relini”

“Kuna mtu yeyote anayetuhumiwa kuhusika na kifo chake?”

“Hapana! hakuna mtu yeyote aliyekamatwa na polisi bado wanaendelea

na uchunguzi” yule mzee akanijibu huku akipunguza sauti ya redio ya gari na

nilipomtazama nikatambua kuwa bado alikuwa kwenye simanzi kubwa ya kifo cha

Momba. Kitambo kifupi cha ukimya kikapita huku nikifikiria juu ya hali ile kisha

nikavunja ukimya.

“Nani aliyekueleza kuwa polisi wanaendelea na uchunguzi wa kifo chake?”

nikamuuliza yule mzee na swali langu bila shaka lilimshangaza sana kwani nilimuona

akigeuka na kunitazama vizuri usoni.

“Uhalifu wowote unapotokea ni lazima polisi wafanye uchunguzi kutaka kujua

nani aliyehusika ili sheria ichukue mkondo wake”

“Yaani ninachotaka kufahamu ni kuwa taarifa hizo za polisi kuendelea na

uchunguzi wa kifo cha Momba ni za kutoka magazetini au unauthibitisho nazo!”

nilimuuliza yule mzee huku nikitaka ufafanuzi wa maelezo yake.

“Ndiyo!” yule mzee akasisitiza.

“Unathibitishaje?” nilimuuliza yule mzee kwa upole na nilichokiona usoni mwake

ni kuwa maswali yangu yalikuwa mbioni kumchosha. Hata hivyo sikuwa na namna

ya kufanya.http://pseudepigraphas.blogspot.com/

“Hivi ninavyokueleza madereva wote wa teksi wa kijiwe hiki muda mfupi

uliyopita tumetoka mochwari ya hospitali ya Amana kuutambua mwili wa Momba”

yule mzee akanieleza na kabla hajamaliza kunieleza nikamuona kijana mmoja akija

pale tulipokuwa kisha akapenyeza noti ya shilingi elfu tano dirishani ambapo yule

mzee aliipokea.

“Niandike jina langu kabisa mzee Ngonyani” yule kijana akaongea huku akiondoka

na hapo nikajua kuwa alikua ameleta rambirambi na mzee Ngonyani ndiye aliyekuwa

mkusanyaji wa rambirambi kwa ajili ya msiba wa Momba kutoka kwa madereva

wenzake wa teksi wa kituo kile.

“Usijali Mashaka nakuandika sasa hivi kijana wangu” mzee Ngonyani akaongea

huku akifunua daftari lililokuwa kando yake na kuanza kuandika jina la Mashaka na

kiasi cha pesa alichotoa. Alipomaliza akaichomeka ile noti ya shilingi elfu tano katikati

ya lile daftari na kugeuka akinitazama.

“Mimi ni mwenyekiti wa madereva wa teksi wa kituo hiki hivyo nakusanya

mchango wa rambirambi kwa ajili ya marehemu Momba” mzee Ngonyani akaongea

katika namna ya kutaka nikitambue vizuri cheo chake. Nilimtazama mzee yule kwa

makini kisha nikatia hisani kwa kutumbukiza mkono wangu mfukoni na kutoa noti ya

shilingi elfu kumi ambapo nilimpa.

“Ongezea na hii” nilimwambia yule mzee na wakati akiipokea ile pesa uso wake

ukaonesha matumaini.

“Ahsante! sana kijana. Waswahili wanasema shida haina mwenyewe” mzee

Ngonyani akaongea wakati akifunua lile daftari la mchango wa rambirambi.

“Jina lako nani?” akaniuliza huku akigeuka na kunitazama

“Oh! haina haja ya kuniandika jina” nikamwambia na kwa kutaka kuondoa ubishi

nikamtumbukizia swali jingine.

“Mazishi ya Momba yatafanyikia wapi?”

“Tutamsafirisha baada ya uchunguzi wa polisi kukamilika kwenda huko kijijini

kwao Tanangozi mkoani Iringa”

“Loh! ni safari ndefu sana hiyo” niliongea huku nikifikiri kisha nikayarudisha

maongezi yetu kwenye mstari.

“Kuna askari yeyote aliyefika hapa kuwahoji?” nilimuuliza mzee Ngonyani huku

nikimtazama usoni.

“Hapana! ila kule hospitali tulipofika tulikutana na polisi watatu waliovaa kiraia

na ndiyo wao waliotueleza kuwa tusiwe na wasiwasi kwani wao walikuwa wameanza

kufanya uchunguzi juu ya kifo cha Momba”

Maelezo ya mzee Ngonyani yakaupelekea moyo wangu upige kite kwa nguvu na

hapo nikaanza kuhisi baridi nyepesi ikisafiri mgongoni mwangu. Fikra zangu zikawa

zimewakumbuka wale watu watatu walionishambulia kutoka juu ya ghorofa kule

Tabata relini.

“Wapoje hao askari?” hatimaye nikamuuliza mzee Ngonyani kwa utulivu.

Mzee Ngonyani akaanza kunipa maelezo juu ya mwonekano wa hao askari kanzu

aliyeonananao hospitali ya Amana wakati walipoenda kuutambua mwili wa Momba.

Mzee Ngonyani alipomaliza kunielezea nikawa nimepata picha kamili juu ya nini

kilichokuwa kikiendelea. Maelezo yake juu ya mwonekano wa hao askari yalikuwa

yamefanana kwa asilimia kubwa na wale watu walionishambulia kule Tabata relini

ingawa sikuwa nimewaona kwa ukaribu siku ile ambao sasa nilifahamu kuwa ndiyo

waliyomuua Momba.

“Waliwaonesha vitambulisho vyao?” nikamuuliza mzee Ngonyani

“Ndiyo!” jibu lile likanipelekea nimtazame mzee Ngonyani kwa tafakuri

“Hao polisi waliwahoji kitu chochote baada ya hapo?”

“Ndiyo”

“Waliwahoji nini?”

“Kama ni kweli tulikuwa tukimfahamu Momba,mwenendo wa maisha yake na

marafiki zake”

“Ulizungumza chochote kuhusu mimi?” nikamuuliza yule mzee na hapo

akashikwa na kigugumizi. Hata hivyo sikutaka kuendeleza mjadala ule kwani ukweli

nilishaufahamu na kwa kutaka kuyaweka sawa maongezi yetu nikaingiza mkono

mfukoni na kuchukua kitambulisho changu bandia kisha nikampa mzee Ngonyani.

Mzee Ngonyani akakipokea kile kitambulisho na kuanza kupitia maelezo yake.

“Wewe ni askari?” wakati mzee Ngonyani akiniuliza kwa mshangao mimi

nilikuwa tayari nimeshazunguka upande wa pili na kuingia ndani ya teksi. Mzee

Ngonyani akaendelea kunitazama kwa mshangao kama kipofu aliyeona mwezi. Pasipo

kumtazama mzee Ngonyani nikachukua sigara moja kutoka mfukoni na kuibana kwa

kingo za mdomo wangu kisha kwa msaada wa kiberiti changu cha gesi nikajiwashia

sigara ile na kuvuta mapafu kadhaa.

Nilipoupuliza moshi wa sigara yangu nje nikageuka na kumtazama mzee Ngonyani

pembeni yangu. Mzee Ngonyani hakuzungumza kitu chochote kwani bado alikuwa

kwenye mduwao nami nikaitumia nafasi ile kujieleza kuwa mimi ni nani. Maelezo

yangu yakianzia tangu siku ile ya jana nilipo onana naye.

“Nilikuwa kwenye harakati za kuyaokoa maisha ya Momba lakini sasa nakiri kuwa

nimechelewa” hatimaye nikahitimisha maelezo yangu.

“Ulijuaje kuwa Momba yuko hatarini?” mzee Ngonyani akaniuliza.

“Ni mkasa mrefu nadhani nitakusimulia pale utakapokuwa umekamilika”

“Kwa hiyo unataka kuniambia kuwa wale watu waliojitambulisha kwetu kuwa ni

askari polisi ndiyo waliyomuua Momba?”

“Ukirejea maelezo yangu ya awali utagundua kuwa swali lako limekwishajibiwa”

nilimwamba mzee Ngonyani huku bado akiendelea kunishangaa.

“Duh! kweli nyinyi wapelelezi ni watu wa ajabu sana” mzee Ngonyani

akazungumza na mimi sikumfuatiliza maneno yake badala yake fikra zangu zilikuwa

zimezama katika tafakari nyingine.

“Nahitaji maelezo machache kutoka kwako kabla sijaondoka kwenda kuwatafuta

wauaji wa Momba”

“Maelezo gani?” mzee Ngonyani akashtuka na kuniuliza huku akinitazama.

“Nataka kufahamu Momba alikutana na nani kabla yangu” swali langu

likampelekea mzee Ngonyani azidi kunitazama kwa mshangao kisha akayahamisha

macho yake kutazama mbele. Nilipomchunguza vizuri nikagundua kuwa alikuwa

akijaribu kukusanya kumbukumbu za matukio ya nyuma katika fikra zake.

“Ni watu wengi ambao bila shaka ni abiria wake” hatimaye mzee Ngonyani

akaongea kwa utulivu.

“Siku za mwisho kabla ya kifo chake!” nikafafanua na hapo nikamuona mzee

Ngonyani akiupisha utulivu kichwani kwa kitambo kabla ya kuvunja ukimya

“Kulikuwa na mwanamke aliyekuwa akimzungumzia kuwa angelikodi gari lake

kwa siku kadhaa” maelezo ya mzee Ngonyani yakanipelekea nigeuke vizuri na

kumtazama kwa shauku.

“Mwanamke gani?”

“Hawakuwahi kuniambia kinagaubaga kuwa huyo mwanamke ni nani nami

sikutaka kumdadisi zaidi kwani huwenda hakupenda nifahamu. Si unajua hapa mjini

kila mtu na pilika zake” mzee Ngonyani akaongea kwa utulivu huku akionekana

kufikiri.

“Maelezo yake yalisemaje?” nikauliza kwa udadisi

“Kama nilivyokueleza kuwa kulikuwa na mwanamke fulani aliyedai kuwa

angelikodi gari lake kwa siku kadhaa. Hivyo alikuwa akinitahadharisha kuwa nisiwe na

wasiwasi pale ambapo ningekuwa simuoni hapa kijiweni”

“Hakukueleza kuwa huyo mwanamke ni nani na anaishi wapi?”

“Hapana!,hakuniambia jina lake ila alinigusia tu juu ya hoteli fulani ya hapa jijini

Dar es salaam” mzee Ngonyani aliongea huku akionekana kuzidi kufikiria.

“Alisemaje kuhusu hiyo hoteli?” nilimuuliza mzee Ngonyani huku nikimtazama

kwa makini.

“Aliniambia kuwa kuna mtu fulani alimpigia simu akimtaka aende kwenye hiyo

hoteli asubuhi ile na ninavyodhani huwenda mtu huyo ndiye alikuwa huyo mwanamke

aliyetaka kukodi gari lake”

“Kwanini unadhani hivyo?”

“Momba ni rafiki yangu hivyo namfahamu vizuri pale linapokuja suala la

wanawake” nilimtazama mzee Ngonyani kwa utulivu na hapo nikagundua kuwa

kulikuwa na hikika katika maneno yake.

“Hiyo hoteli inaitwaje?” nilimuuliza mzee Ngonyani hata hivyo hakunijibu kwa

haraka badala yake akaendelea kutazama mbele ya gari kama anayefikiri jambo kisha

akavunja ukimya

“Hotel 92 Dar es Salaam ipo nyuma ya stendi ya mabasi yaendayo kasi eneo la

Ubungo kama sijakosea” mzee Ngonyani akaongea kwa utulivu huku akiendelea

kutazama mbele ya ile teksi yake.

Maelezo yale yakanipeleka nimtazame mzee Ngonyani kwa utulivu moyoni

nikimsifu kwa kuweka kumbukumbu zile vyema kichwani mwake.

“Hotel 92 Dar es Salaam…” mara nikajikuta nikiongea kwa utulivu jina lile la hoteli

huku nikijaribu kuvuta picha kichwani mwangu.

“Baada ya hapo nini kilifuatia?”

“Hakuna kwani asubuhi ile ndiyo ilikuwa mara yangu ya mwisho kuonana na

Momba” mzee Ngonyani akaongea huku akitikisa kichwa chake kwa masikitiko.

Hatimaye nikavuta sigara yangu kwa utulivu huku nikiyahurumia mapafu yangu

kisha nikautoa mkono wangu dirishani na kukung’uta majivu ya sigara.

Mpaka kufikia pale akili yangu ilikuwa imeanza kupata afya njema katika ufikirivu.

Kwa tafsiri yangu ya wali kichwani ni kuwa mwanamke aliyampigia Momba simu

na kutaka waonane Hotel 92 Dar es Salaam alikuwa ndiye yule mdunguaji hatari

niliyemuona juu ya lile jengo la biashara la Rupture & Capture wakati nilipokuwa

nimeegesha gari langu nje ya Vampire Casino.

Nikaendelea kukumbuka namna mdunguaji yule alivyonitoroka kwenye yale

maegesho ya magari ya jengo la biashara la Rupture & Capture na ile teksi ya Momba

usiku ule. Bila shaka Momba alikuwa akifahamiana vizuri na mdunguaji yule hatari.

Nikahitimisha huku nikimalizia kuvuta sigara yangu kisha nikakitupa kipisi cha

sigara ile dirishani huku nikiupuliza moshi wake nje taratibu. Hatimaye nikageuka na

kumtazama mzee Ngonyani huku uso wangu ukiwa na matumaini.

“Nashukuru sana kwa maelezo yako kwani huwenda yakanisaidia katika kuwanasa

wauaji wa Momba” nikamwambia mzee Ngonyani kisha nikampa namba zangu za

simu.

“Naomba unipigie simu pale utakapowaona tena wale watu waliojitambulisha

kwenu kuwa ni askari”

“Bila shaka!” mzee Ngonyani akaongea kwa utulivu.

“Nakutakia kazi njema”

“Kazi njema na wewe pia” mzee Ngonyani akaniaga wakati nilipokuwa nikifungua

mlango wa teksi yake na kutoka nje huku macho yake yakinisindikiza kwa nyuma.

_____

WAKATI NILIPOKUWA NIKIENDESHA gari langu kuelekea Hotel 92

Dar es Salaam fikra zangu zilikuwa zimejikita kwenye mjadala mwingine. Mawazo

yangu yalikuwa yamehamia kwa yule mdunguaji huku nikiisumbua akili yangu katika

kutaka kufahamu mdunguaji yule hatari alikuwa nani na aliingiaje katika mkasa huu.

Halafu nikakumbuka siku ile mdunguaji yule hatari namna alivyompopoa vibaya yule

mwanaume kwenye ile baraza Vampire Casino.

Nikiwa naendelea kuvuta kumbukumbu zangu vizuri taswira ya mdunguaji yule

hatari ikaanza kujengeka vizuri kichwani mwangu huku nikikumbuka siku ile ya

kwanza nilipomuona na kuanza kumfuatilia kutoka kwenye maegesho ya magari ya

Vampire Casino hadi kule mtaa wa Nkurumah. Halafu nikaendelea kukumbuka namna

mdunguaji yule alivyonizidi kete na kunitoroka usiku ule kwenye lile jengo la biashara

la Rupture & Capture.

Nikaendelea kuwaza kuwa mtu yoyote ambaye angeweza kumdungua yule mtu

kwenye ile baraza ya Vampire Casino kutoka kule juu ya lile jengo la biashara la Rupture

& Capture alifaa kuitwa mdunguaji makini wa daraja la kwanza mwenye uzoefu

mkubwa wa kazi yake.

Swali likabaki kuwa ni idara gani ambayo ingeweza kumpata mtu wa taaluma ya

udunguaji makini namna ile kama siyo kwenye jeshi la polisi au jeshi la wananchi?. Na

kama mdunguaji yule alikuwa mwanajeshi sasa alikuwa amejiingiza vipi katika mkasa

huu?. Na kwanini wale watu walionishambulia kule Tabata relini walikuwa wakimtafuta

yule mdunguaji?. Maswali bado yalikuwa mengi na sikupata majibu. Kwa vile akili

yangu ilikuwa ikitaabika sana kutafuta majibu nikajitia utulivu wa fikra zangu kwa

mche mwingine wa sigara

Dondoo za mzee Ngonyani zilikuwa zimenipa wepesi kidogo katika harakati

zangu. Hata hivyo nilishindwa kuelewa kama nilikuwa nimepiga hatua yoyote katika

kile nilichokuwa nikikipeleleza ingawa sikutaka kukata tamaa.

_____

HOTEL 92 DAR ES SALAAM ilikuwa miongoni mwa hoteli nyingi za daraja

la kati zilizopandwa kwa fujo karibu kila kona ya jiji la Dar es Salaam. Hoteli hiyo

yenye ghorofa nane ilikuwa imepandwa nyuma ya stendi ya mabasi yaendeyo kasi

eneo la Ubongo huku ikizungukwa na makazi ya watu na majengo mengine marefu

ya ghorofa ambayo sikuweza kuyatambua kwa haraka kuwa yalikuwa yakitumika kwa

shughuli gani. Hoteli hiyo ilikuwa imezungukwa na ukuta mzuri na miti mirefu ya

miashoki iliyopandwa katika namna ya kuvutia.

Baada ya safari ya kitambo nikawa nimeifikia hoteli ile. Ile Hoteli ilikuwa kwenye

mtaa tulivu usiyokuwa na pilika nyingi za kibinadamu. Nilipofika nikapita getini kisha

nikasumbuka kidogo kutafuta maegesho ya gari langu kwani kulikuwa na magari mengi

yaliyokuwa yameegeshwa kwenye eneo la maegesho la hoteli ile. Hata hivyo nikajikuta

nikikata tamaa kidogo kwa kutoiona ile teksi ya Momba iliyokuwa ikitumiwa na yule

mdunguaji katika maegesho yale.

Niliegesha gari langu kisha nikafungua mlango na kushuka nikitembea taratibu

kuelekea kwenye mlango wa mbele wa hoteli ile na wakati nikifanya vile nikawa

nikiyatembeza macho yangu kutazama huku na kule katika namna ya kuyachunguza

magari mengine yaliyokuwa yameegeshwa eneo lile. Ile teksi ya

Momba bado sikuiona. Nilimaliza kupanda ngazi kisha nikapotelea kwenye

mlango wa mbele wa Hotel 92 Dar es Salaam.

Katika seti tatu za makochi ya sofa yaliyokuwa kwenye ukumbi wa chini wa

hoteli ile seti moja ilikuwa imekaliwa na wanaume wanne huku meza fupi ya vioo

iliyokuwa katikati yao ikiwa imebeba aina tofauti za vinywaji. Seti nyingine ya pili

ilikuwa imekaliwa na mwanamke na mwanaume ambao walionekana kwa kila hali

kuwa ni wapenzi. Seti ya mwisho ya makochi ilikuwa tupu. Runinga mbili kubwa

zilizokuwa zimetundikwa kwenye kuta za ukumbi ule zilikuwa zikionesha muziki hata

hivyo hakuna mtu aliyeonekana kuzitazama.

Kipande mstatili cha sakafu nzuri ya tarazo kikanichukia hadi eneo la mapokezi

la hoteli ile ambapo niliwakuta wasichana wawili wahudumu waliovaa sare za kazi.

Nyuso zao zenye furaha zikanieleza kuwa walikuwa wakiyazingatia vizuri maadili ya

kazi yao. Sikujishughulisha na macho ya watu wachache waliokuwa upande wa kulia

kwenye ukumbi ule wakijipatia mlo.

“Hamjambo warembo?” niliwasalimia wale wasichana wa mapokezi huku

nikiigemeza mikono yangu kwenye ukuta mfupi wa mbao uliyopakana na nondo za

eneo lile.

“Hatujambo!”

“Karibu kaka” msichana mmoja wa pale mapokezi akanikaribisha huku akijisogeza

karibu yangu.

“Ahsante!” nikamuitikia yule msichana huku nikayatembeza macho yangu

kuwatazama watu waliokuwa mle ndani. Sura zote mle ndani zilikuwa za kawaida

hivyo nikayarudisha macho yangu kuwatazama wale wasichana.

“Naomba maji baridi” nikamwambia yule dada aliyesogea karibu yangu huku

nikimroga kwa tabasamu langu maridhawa.

“Maji makubwa au madogo?” yule msichana akaniuliza.

“Makubwa tafadhali! niupoze mtima wangu kabla ya hili joto la jiji la Dar es

Salaam halijanitoa roho” nilimwambia yule mhudumu na maji yale yalipoletwa

nikafungua kizibo na kugida mafunda kadhaa kisha nikaitua ile chupa juu ya kaunta

na kuwatazama wale wasichana huku nikipumbazwa kidogo na uzuri wao.

“Mbona asubuhi yote hii inakunywa maji kaka?” yule msichana akaniuliza huku

akielekea kununua maongezi yangu.

“Afya yangu si mnaiona wenyewe kuwa siyo ya kubabaisha” nikawaambia wale

wasichana wa mapokezi huku nikiangua kicheko hafifu na kicheko hicho kilipokuwa

ukingoni nikavunja ukimya.

“Nimemfuata mgeni wangu ila huwenda msinielewe!” nikaongea kwa utulivu na

nilichokiona kwenye nyuso zao ni mshangao usioleweka.

“Kwanini tusikuelewe?” wote wakaniuliza kwa shauku.

“Jina lake silijui” nikawaambia wale wahudumu huku nikitengeneza tabasamu la

kirafiki usoni mwangu.

“Mh! sasa tutakusaidiaje kaka wakati wewe mwenyewe jina la mgeni wako hulijui”

“Mwanamke au mwanaume?” mwenzake akaniuliza.

“Mwanamke na pengine niseme kuwa ni wifi yenu ila msimuonee wivu”

nikawahadaa wale wasichana na hapo wakaangua kicheko cha kimbea.

“Mh! kaka yangu huo siyo mchepuko kweli?”

“Au umempata mitandaoni maana mapenzi ya siku hizi mh!” mwenzake akadakia

“Si bora ingekuwa mitandaoni jina lake ningelijua. Mimi nimeungwa nami

nikaunganika”

“Mh! wanaume nyinyi kwa michepuko” yule msichana aliyeniletea maji akaongea

huku akianguka kicheko hafifu na hapo mwenzake akaungana naye huku wote

wakionekana kufurahishwa na mkasa wangu na kutunga.

“Mh! mnatuonea tu wanaume kwani sisi tunachepuka na nani kama siyo nyinyi”

niliwaambia wale wasichana huku nikitoa noti ya shilingi elfu moja kuyalipia yale maji.

“Sasa huyo wifi yetu ina maana hata namba yake ya simu huna?”

“Ningekuwa na namba yake na jina lake pia ningelijua. Hilo ndiyo kosa nililofanya

tatizo ni kuwa mawasiliano yetu tumeyafanya kwenye simu ya rafiki yake na huyo

rafiki yake sasa hivi hapatikani kwenye simu ingawa alinihakikishia kuwa nikifika hapa

na kumuulizia nitampata”

Wale wahudumu wa mapokezi wakaniangalia kwa utulivu na nilichoweza

kukisoma katika macho yao ni kuwa walikuwa wamenijumuisha kwenye kundi la

wanaume mabingwa wa michepuka jijini Dar es Salaam.

“Sasa tutakusaidiaje kaka?” hatimaye wakaniuliza na swali lao likanipelekea nianze

kuelezea sifa za nje za mwanamke yule mdunguaji hatari. Nilipomaliza kutoa maelezo

yangu nikawaona wale wahudumu wakitazamana kisha mmoja akachukua kitabu

chenye orodha ya majina ya wageni waliofika pale hotelini na kupewa huduma ya

malazi kwa nyakati tofauti.

Halafu nikamuona yule mhudumu akipekua karatasi za kile kitabu kwa haraka

hadi pale alipokaribia ukurasa fulani na hapo akapunguza kasi na kuanza kupekua

kurasa taratibu. Yule mhudumu alipofika kwenye ukurasa fulani akaweka kituo na

kuanza kusoma maelezo yaliyokuwa kwenye ile kurasa halafu akayahamisha macho

yake kunitazama kisha akauliza.

“Mgeni wako ameingia hapa hotelini ndani ya wiki hii?”

“Ndiyo!” nikamwitikia kwa utulivu.

“Wateja wote walioingia hapa hotelini wiki hii wamelala siku moja na wote

wanaonekana kuwa walikuwa wakitoka mikoani” yule mhudumu akaniambia na

hapo nikamuona akinitazama tena. Tukio lile likanipelekea nitambue kuwa fikra zake

zilikuwa zimesimamishwa na jambo fulani.

“Vipi?” nikamuuliza kwa shauku.

“Wifi yetu bila shaka anaitwa Mona kwani hapa anaonekana kuwa ndiye mteja

wetu pekee aliyekaa kwa muda mrefu. Yupo chumba namba 33” yule mhudumu

akaniambia huku akianguka kicheko cha kimbea hata hivyo mimi nilifurahi tu kwani

nilikuwa nimerejewa na matumaini.

“Chumba namba 33 ghorofa ya ngapi?”

“Kipo ghorofa ya nne na ukimpata wifi yetu tupigie simu kaunta tuwaletee

maji baridi makubwa” yule mhudumu akaniambia huku akiangua kicheko hafifu.

Nikaungana naye nikicheka kidogo na kumkonyeza huku nikitabasamu kisha

nikashika uelekeo wa upande wa kulia na nilipozifikia ngazi nikaanza kuzipanda

nikielekea ghorofa za juu za ile hoteli huku ile taswira ya mdunguaji ikianza kujengeka

upya katika fikra zangu. Sikutaka kupanda juu ya lile jengo kwa kutumia lifti kwani

kwa kufanya hivyo ningejinyima fursa nzuri ya kuweza kuitalii Hotel 92 Dar es Salaam.

Nilipomaliza kuzipanda zile ngazi nikawa nimetokezea kwenye korido ya ghorofa

ya pili. Mwisho wa ngazi zile upande wa kulia kulikuwa na dirisha la kioo. Kupitia

dirisha lile niliweza kuliona jengo la stendi ya mabasi yaendayo kasi Ubongo jijini

Dar es Salaam lakini kwa sehemu tu ambayo ilitawaliwa na mapaa ya mabasi na kituo

cha kujazia mafuta. Pilikapilika za kibinadamu zilikuwa zikiendelea kama kawaida.

Nilisimama kidogo nikiitazama korido ile tulivu iliyokuwa ikitazamana na milango ya

vyumba kwa upande wa kushoto na kulia.

Mwisho wa korido ile kulikuwa na dirisha lingine lililofunikwa na pazia refu jeupe.

Nilitulia nikilitazama pazia lile namna lilivyokuwa likipepea taratibu na kwa mbali

niliweza kusikia sauti kutoka kwenye runinga zilizokuwa kwenye vile vyumba. Utafiti

wangu ukanitanabaisha kuwa muonekano wa korido ile usingetofautiana na korido

nyingine zilizokuwa kwenye jengo lile.

Nilikuwa sahihi kwani nilipofika kwenye ghorofa ya nne ya lile jengo la hoteli

nikatambua kuwa mandhari yale hayakutofautiana na yale mandhari ya ghorofa ya pili.

Kitu pekee nilichogundua kuwa kilikuwa kimeongezeka kwenye korido ya ghorofa

ile ilikuwa ni kengele ya tahadhari kwa ajili ya matukio ya moto na hatari nyinginezo.

Nilisimama kwenye korido ile nikiupisha utulivu kichwani mwangu na mara hii

nilijiona kuwa ni mpelelezi mwenye mafanikio niliyekuwa mbioni kuhitimisha mkasa

huu wenye mzongezonge ya aina yake. Taswira ya mdunguaji ikiwa imetafsirika

vizuri kichwani mwangu nikaanza kuvuta picha namna ambavyo fumanizi langu

litakavyomuacha mdomo wazi kama mnzinzi aliyedondosha pakiti ya kondomu

karibu na kapu la sadaka kanisani.

Tofauti na zile korido za chini za lile jengo la hoteli korido ile ilikuwa tulivu sana

na kama ningekuwa sikuhakikishwa uwepo wa mwenyeji wangu ndani ya chumba

33 kwenye korido ile basi huwenda ningeridhisha kuwa katika vyumba vya korido ile

hapakuwa na watu.

Hatimaye nikaupeleka mkono wangu mafichoni kuikagua bastola yangu na

uwepo wake ukaniongezea imani ya kumkabili adui wangu bila wasiwasi wowote.

Bila kupoteza muda nikaanza kuzitupa hatua zangu kwa utulivu kwenye korido ile

huku macho yangu yakitazama upande wa kushoto na kulia nikiikagua milango ya

mle ndani.

Baada ya hatua kadhaa hatimaye nikauona ule mlango wa chumba namba 33

huku namba zake zikiwa zimechongwa vizuri kwenye vibao vyeupe. Mlango wa kile

chumba namba 33 ulikuwa ni wa tano kutoka mwisho wa ile korido na juu ya mlango

ule kulikuwa na kioo kipana chenye mawimbi ya kumzuia mtu kuona ndani ya kile

chumba. Hata hivyo kupitia kioo kile nikagundua kuwa taa ya ndani ya chumba kile

ilikuwa ikiwaka na tofauti na pale chumba kile kilikuwa tulivu na chenye ukimya wa

aina yake.

Nikausogelea ule mlango huku nikitengeneza picha fulani kichwani ya mdunguaji

yule hatari labda akiwa maliwatoni,ameketi kwenye kochi au amelala kitandani

akiendelea kuuchapa usingizi.

Nikaupeleka mkono wangu kwenye mlango ule kisha nikaanza kugonga kwa

utulivu huku mkono wangu mwingine ukiwa tayari umezama mafichoni kuikamata

bastola yangu. Nikaendelea kugonga ule mlango hata hivyo sikupata mwitikio

wowote wala kufunguliwa mlango. Labda huwenda mdunguaji alikuwa akitafakari

kuwa mngongaji wa mlango ule angekuwa nani kama siyo kujadiliana na fikra zake

zilizompelekea ajihisi kuwa alikuwa ndotoni au pengine kilichokuwa kikifanyika

kilikuwa kweli.

Nilirudia kugonga mlango ule tena kwa kishindo zaidi cha kuweza kumwamsha

mwenyeji wa chumba kile kutoka katika usingizini mzito lakini ule mlango

haukufunguliwa wala sauti ya mtu yeyote kusikika.

Hatimaye nikakisogelea kitasa cha ule mlango na kutega vizuri sikio langu nikisikiliza

utulivu wa chumba kile. Mle ndani ya kile chumba kulikuwa kimya na hakuna sauti

yoyote iliyosikika. Nikageuka tena kutazama kwenye ile korido nikichunguza kama

kungekuwa na kamera za usalama. Sikuziona na huwenda hazikuwekwa kwa makusudi

katika namna ya kutunza siri za wateja waliokuwa wakiingia na kutoka kwenye vile

vyumba. Hali ile ikanifurahisha hivyo nikaichomoa bastalo yangu kutoka mafichoni

na kuikamata vema mkononi.

Kisha nikajipapasa mifukoni kuzichukua funguo zangu malaya hata hivyo

nilisitisha zoezi lile pale nilipokumbuka kuwa nilikuwa sijajaribu kufungua kitasa cha ule

mlango. Hivyo katika hali ya kutaka kutafuta hakika nikakishika kitasa cha ule mlango

na kukizungusha taratibu huku bastola yangu ikiwa mkononi. Kile kitasa kikafunguka

na hapo nikafanya jitihada kidogo za kuusukuma ule mlango. Kitu kilichonishangaza

ni kuwa mlango ule ulikuwa wazi na hapo mshangao ukazichukua fikra zangu huku

maswali mengi yakianza kupita kichwani mwangu. Niliusukuma mlango ule taratibu

huku nikiwa nimejidhatiti kikamilifu kukabiliana na masaibu ya namna yoyote mle

ndani. Muda mfupi uliofuata nikawa nimeingia ndani ya chumba kile.

Mara tu nilipoingia ndani ya kile chumba nikayatembeza haraka macho yangu

kukagua mandhari ya mle ndani. Upande wa kushoto wa kile chumba kulikuwa na

kabati la mbao lililojengewa ukutani. Kabati lile sasa lilikuwa wazi bila ya kitu chochote

ndani yake. Pembeni ya lile kabati niliuona mlango lakini mlango ule ulikuwa wazi.

Nikazitupa hatua zangu taratibu nikisogea na kutazama ndani ya ule mlango. Mandhari

ya mle ndani yakanijulisha kuwa kile kilikuwa chumba cha maliwato lakini mle ndani

hapokuwa na kitu chochote hivyo nikarudi kule chumbani.

Kilikuwa chumba kikubwa chenye dirisha pana lililofunikwa kwa pazia refu

jeupe lenye maua mekundu yaliyodariziwa vizuri. Katikati ya chumba kile kulikuwa

kitanda kikubwa kilichokuwa kimefunikwa kwa shuka safi za rangi ya kijivu huku

zikiwa zimeandikwa kwa maandishi makubwa Hotel 92 Dar es Salaam. Tafsiri ya haraka

niliyoipata ni kuwa hakukuwa na mtu mle ndani kwani kiyoyozi na runinga pana

vilivyokuwa ukutani mle chumbani vilikuwa vimezimwa.

Hatimaye nikasimama nikiyatembeza macho yangu mle ndani kwa utulivu na kabla

sijafanya uchunguzi wangu taswira niliyoiona kwenye kochi moja la sofa lililokuwa

kwenye pembe ya chumba kile ikaamsha hisia zangu upya. Kijana mzuri wa kiume

mwenye umri wa kati ya miaka ishirini na nne na ishirini na saba alikuwa ameketi

kwenye kochi lile huku akiwa kifua wazi baada ya shati lake kuraruliwa vifungo.

Ingawa macho ya kijana yule yalikuwa yamesimama yakinitazama lakini haraka

nilipoyachunguza nikagundua kuwa hayakuwa na uhai. Nikapiga hatua zangu taratibu

nikimsogolea pale alipoketi na hapo nikagundua kuwa uso wake ulikuwa umetaabika

kwa kuvumilia mateso makali kabla ya kifo chake. Mdomo wake ulikuwa wazi huku

damu nzito ikiwa imeganda na kuacha michirizi puani mwake. Nikasimama kwa

utulivu nikimtazama kijana yule na kwa kweli nilishikwa na hasira.

Risasi za muuaji zilikuwa zimeacha matundu mawili makubwa kwenye mbavu za

kijana yule na damu iliyotoka kwenye matundu yale ya risasi ilikuwa imetengeneza

michirizi mizito juu ya marumaru nyeupe zilizokuwa chini sakafuni kwenye

chumba kile. Alikuwa kijana mzuri na mtanashati ambaye uwepo wake tu ungeweza

kuwababaisha wasichana warembo wasiokuwa na uvumilivu. Pembeni ya kochi la

sofa aliloketi yule kijana kulikuwa na stuli ndogo yenye miguu mitatu na juu ya stuli ile

kulikuwa na chupa ya pombe kali aina Screw driver yenye kinywaji nusu huku pembeni

yake kukiwa na bilauri ya kioo.

Kwa kweli akili yangu ilikataa kabisa kufanya kazi kwani tangu kuanza kwa mkasa

huu mkusanyiko wa matukio ya namna ile ulikuwa bado haujanifungulia njia ya

kunifikisha kule ninapotaka.

Nilikumbuka kifo cha Zera kisha nikamkumbuka yule mtu aliyedunguliwa nje ya

Vampire Casino usiku ule halafu fikra zangu zikahamia kwa kifo cha Momba kabla ya

kumtazama kijana yule mzuri ambaye mwonekano wake ulitosha kunithibitishia kuwa

starehe zilikuwa kipaumbele namba moja cha maisha yake hapa duniani.

Kwa kweli nilisikitika sana nikijiegemea ukutani huku hisia zangu zikitafunwa na

jinamizi baya la muendelezo wa matukio ya mauaji yasiyokuwa na sababu za msingi.

Nilipokuwa katika hali ile fikra zangu zikahamia tena kwa mdunguaji na kabla sijaanza

kutengeneza hoja mara nikasikia mtu akigonga ule mlango wa kile chumba. Tukio

lile likapelekea moyo wangu upige kite kwa nguvu na hapo kijasho chepesi kikaanza

kupenya mgongoni.

Sikutaka kusubiri nini ambacho kingetokea mle ndani hivyo kufumba na kufumbua

nilikuwa chini ya kitanda cha mle ndani huku uwazi mdogo ulioachwa baina ya shuka

la kitanda kile lililokuwa likining’inia na ile sakafu ya marumaru ukiniwezesha kuiona

miguu ya mtu aliyeingia mle ndani baada ya kuchoka kugonga mlango bila kujibiwa.

Hatimaye mtima wangu ukatulia tuli baada ya kumuona mhudumu wa hoteli ile

akiingia mle ndani ambaye nilimtambua haraka kutokana na sare zake. Mwanamke

yule mnene mwenye umri sawa na wa mama yangu mzazi mkononi alikuwa amebeba

ndoo ndogo maalum kwa ajili ya kupigia deki na beseni lenye mashuka masafi ya

hoteli ile.

Mara baada ya kuingia mle ndani yule mama akasimama kidogo akionekana

kustaajabishwa kwa kuukuta mlango wa chumba kile ukiwa haujafungwa au pengine

kwa kukiona kitanda cha mle ndani kikiwa kimetandikwa vizuri.

Yule mwanamke alipogeuka akaiona maiti ya yule kijana kwenye lile kochi

lililokuwa kwenye kona ya kile chumba. Taharuki aliyomfika mama yule ikampelekea

atupe vifaa vyake vya kazi na kuanza kutimua mbio akitoka nje huku akipiga mayowe

ya hofu.

Nilifahamu kipi ambacho kingefuatia baada ya pale hivyo nikajiviringisha na

kutoka chini ya uvungu wa kile kitanda kisha nikaelekea kwenye ule mlango wa kile

chumba. Muda mfupi uliofuata nilikuwa nje ya kile chumba nikilitoroka eneo lile.

Wakati nikishuka ngazi kuelekea chini ya lile jengo nikakutana na mashuhuda

wengine waliokuwa wakizipanda zile ngazi kwa pupa kuelekea kwenye kile chumba

nilichotoka. Nilichokihitaji ilikuwa ni kuondoka haraka eneo lile kabla polisi

hawajaanza kunusa pua zao kwani hadi wakati ule nilikuwa nikiamini kuwa taarifa

zangu zilikuwa tayari zimewafikia polisi na kwa maana nyingine polisi hao walikuwa

mitaani wakinisaka.

Nilifika sehemu ya mapokezi chini ya ile hoteli na hapo nikagundua taarifa za kifo

cha yule kijana kule chumbani zilikuwa zimesambaa kwenye ile hoteli na kusababisha

taharuki ya aina yake. Hivyo wakati nikikatisha kwenye ukumbi ule kuelekea nje

hakuna mtu yoyote aliyeonekana kunitilia mashaka na hali ile ikanifurahisha.

Bastola yangu nikiwa tayari nimeichimbia mafichoni nikamaliza kushuka ngazi zile

za ukumbini nikiharakisha kuelekea nje ya ile hoteli sehemu nilipokuwa nimeegesha

gari langu. Nilipolifikia gari langu nikafungua mlango na kuingia ndani huku akili

yangu ikiwa hoi kwa kulemewa na mtiririko wa matukio yasiyoeleweka huku hisia

mbaya za kushindwa zikiendelea kuutafuna mtima wangu. Hata hivyo sikutaka kukata

tamaa.

Sikutaka kuendelea kuzubaa eneo lile hivyo nikawasha gari langu na kulitoa kwenye

maegesho yale na wakati nikifanya vile nikagundua kuwa kulikuwa na gari jingine

lililokuwa limeongezeka kwenye maegesho yale. Gari hilo jeusi aina ya Landcruiser

lilikuwa limeegeshwa baada ya kuyapita magari mawili upande ule nilioegesha gari

langu.

Kitendo cha kuliona lile gari kikanipelekea nipunguze mwendo na kugeuka

nikilitazama vizuri gari lile. Hata hivyo tinted nyeusi iliyokuwa kwenye vioo vya lile gari

haikuniwezesha kuona mle ndani ya gari ingawa hisia zangu zilinitanabaisha kuwa mle

ndani ya lile gari kulikuwa na watu waliokuwa wakinitazama.

Hisia hizo zikanishawishi nitake kulirudisha gari langu tena kwenye yale maegesho

ili nipate nafasi nzuri ya kuendelea kulichunguza vizuri lile gari. Lakini baada ya

tafakari fupi nikawa nimesita kufanya vile pale nilipohisi kuwa kitendo cha kulirudisha

gari langu kwenye yale maegesho kingepelekea mtu yeyote ambaye angekuwa ndani ya

lile gari Landcruiser ashikwe na mashaka na hivyo kujijengea hadhari.

Hivyo sikusimama badala yake nikaingiza gia na kukanyaga mafuta na kuendelea

mbele nikielekea kwenye geti la ile hoteli. Hata hivyo macho yangu yalijikuta yakivutwa

na namba za lile gari.

Namba za lile gari zilikuwa ngeni machoni mwangu na zisizofanana kabisa na

namba za magari yaliyosajiliwa nchini Tanzania. Kumbukumbu ya kifo cha yule kijana

niliyemuona kule chumbani muda mfupi uliyopita ikaninyima uhuru wa kuendelea

kufanya utafiti wangu hasa pale nilipohisi kuwa polisi wangekuwa mbioni kufika pale

hotelini.

Hivyo nikakanyaga mafuta na kutoka nje ya geti la hoteli ile na kuingia barabara

inayokatisha mbele ya ile hoteli nikishika uelekeo wa upande wa kulia. Kwa kweli

sikufahamu wapi nilipaswa kuelekea kwa wakati ule hata hivyo nilijitahidi kwa kila hali

kuupisha utulivu akilini mwangu.

Nikaendesha gari langu nikiifuata barabara ile na nilipofika mbele kulikuwa na

barabara nyingine iliyokatisha. Hivyo nilipofika kwenye barabara ile nikakunja kona

na kushika uelekeo wa upande wa kushoto nikitokomea katika vitongoji vya eneo la

Sinza.

Wakati nikiendelea na safari yangu kupitia vioo vya ubavuni vya gari langu mara

nikaliona lile gari jeusi Landcruiser lililokuwa limeegesha nje ya Hotel 92 Dar es Salaam

likiwa nyuma yangu. Tukio lile likanishtua hivyo nikapunguza mwendo kidogo ili

niweze kuliona vizuri lile gari nyuma yangu na mara hii nikapata hakika kuwa gari lile

lililokuwa nyuma yangu lilikuwa ndiyo lile lililokuwa kwenye maegesho ya Hotel 92 Dar

es Salaam muda mfupi uliyopita.

Kwa kweli nilishangazwa sana na tukio lile huku nikijiuliza maswali mengi

kichwani. Niliendelea kulitazama lile gari kupitia vioo vya ubavuni vya gari langu huku

nikiupisha utulivu kichwani mwangu. Kabla ya kufanya maamuzi yoyote nilitaka

kwanza kupata hakika kama nilikuwa nikifuatiliwa au lile gari lilikuwa kwenye ratiba

ya safari zake.

Hivyo nikaongeza mwendo na kwa kuwa nilikuwa fundi mzuri wa vichochoro vya

jiji la Dar es Salaam nikapanga kujizungusha zungusha kwenye mitaa kadhaa ya eneo

lile huku macho yangu yakiendelea kulitazama lile gari nyuma yangu kupitia vioo vya

ubavuni vya gari langu. Kwa kufanya vile ningegundua kuwa nilikuwa nikifuatiliwa na

lile gari au lah! na baada ya hapo ningejua nini cha kufanya.

Niliendelea kuendesha gari langu na nilipofika mbele kwenye makutano mengine

ya barabara nikapunguza mwendo na kuingia upande wa kushoto nikiifuata barabara

nyingine ya lami inayokatisha mitaani. Nikiwa kwenye barabara ile nikaongeza

mwendo kidogo huku macho yangu yakiendelea kutazama kwenye vioo vya ubavuni

vya gari langu. Sikuliona lile gari na hali ile ikanipa matumaini kuwa mambo yalikuwa

shwari na hapo nikaanza kuhisi kuwa nilikuwa nikipoteza muda wangu kwa kufanya

uchunguzi usio na tija.

Hata hivyo muda mfupi baadaye niligundua kuwa sikuwa sahihi kwani sikufika

mbali sana katika safari yangu pale nilipoliona tena lile gari Landcruiser jeusi likiingia

kwenye ile barabara na kunifuata kwa nyuma.

Kwa kutaka kujiridhisha zaidi nilipofika mbele kidogo nikaingia barabara nyingine

inayochepuka kuingia upande wa kulia huku nikiendesha gari langu kwa mwendo

wa wastani. Mara tu nilipoingia kwenye barabara ile haukupita muda mrefu mara

nikaliona tena ile gari Landcruiser nyuma yangu likikunja kona na kuanza kunifuata

tena. Tukio lile likanipelekea nishikwe na hasira hivyo nikaichomoa bastola yangu

kutoka mafichoni na kuiweka kando yangu tayari kukabiliana na rabsha za namna

yoyote.http://pseudepigraphas.blogspot.com/

Kilichofuata baada ya pale ikawa ni kuingia barabara ya mtaa mmoja na kutokezea

kwenye barabara ya mtaa mwingine huku macho yangu yakiendelea kutazama kwenye

vioo vya ubavuni vya gari langu. Yeyote ambaye alikuwa akinifuatilia kwenye lile gari

nyuma yangu nilitaka nimfanye ajutie kwa kitendo kile na hatimaye nimtie hasira ili

aweze kuonesha vizuri hisia zake nami niitumie fursa hiyo vizuri kumshikisha adabu.

Baadaya kulichezesha shere za kutosha lile gari nyuma yangu sasa nilikuwa

nimeamua kugeuza gari langu na kuanza kurudi kule nilipotoka huku nikipunguza na

kuongeza mwendo hapo na pale katika nyakati tofuati. Lengo langu likiwa ni kutaka

kuliweka karibu zaidi lile gari nyuma yangu kwani kufikia pale nilikuwa na hakika

kuwa nilikuwa nimefungiwa mkia. Jambo lililonifurahisha ni kuwa lile gari Landcruiser

nyuma yangu halikutaka kuniacha hivyo nikawa nacheza na uwanja mpana nitakavyo.

Nikaendelea kuendesha gari langu kwenye barabara ile na nilipofika mbele

nikaingia kwenye kituo kimoja cha kujazia mafuta huku nikiwa tayari nimeshaiona

orodha ya mafuta yaliyokuwa yakiuzwa katika kituo kile kupitia bango kubwa

lililokuwa barabarani.

Mara tu nilipoingia kwenye kituo kile cha kujazia mafuta nikasimama na kuulizia

mafuta ambayo hayakuwepo kwenye ile orodha iliyokuwa kwenye lile bango la

barabarani. Lengo langu likiwa siyo kutaka kuongeza mafuta bali kuitumia nafasi ile

kuchunguza mtu au watu waliokuwa ndani ya lile gari nyuma yangu.

Nikiwa bado nimesimama kwenye kile kituo cha kujazia mafuta haukupita muda

mrefu mara nikaliona lile gari jeusi Landcruiser nalo likipunguza mwendo na kuingia

kwenye kile kituo cha kujazia mafuta. Nikiwa natarajia tukio lile macho yangu yalikuwa

makini kutazama mbele ya lile gari na hapo nikawaona wanaume wawili yaani dereva

wa lile gari na mtu mwingine aliyekuwa kando kwenye kiti cha abiria. Wale watu

walikuwa makini wakilitazama gari langu.

Nikiwa nimejiandaa vizuri kwa tukio lile mara tu lile gari jeusi Landcruiser

liliposimama mimi nikakanyaga mafuta na kuondoka eneo lile. Kwa kufanya vile mara

nikaliona tena lile gari jeusi Landcruiser nalo likiacha kile kituo cha mafuta na kuanza

kunifuata. Kwa kweli sikutaka kuendelea kufuatiliwa kama mtoto mdogo hivyo

nikaanza kufikiria namna ya kukabiliana na hali ile.

Nilitaka nipate hakika ya mambo machache kuhusiana na wale watu kwenye

lile gari nyuma yangu kabla ya kupiga hatua nyingine zaidi hivyo nikakanyaga vizuri

pedeli ya mafuta ya gari langu na hapo injini ya gari ikaniletea mrejesho maridhawa.

Sauti ya muungurumo wa injini ikabadilika kadiri nilivyokanyaga klachi na kutupia gia

nyingine. Mwishowe gari langu likawa jepesi huku usukani ukiwa laini hivyo nikawa

nauzungusha kwa mkono wangu imara nikishika uelekeo ninaoutaka. Watembea kwa

miguu kando ya barabara ile wakawa wamestaajabishwa sana na mwendo wangu wa

kasi hata hivyo dereva wa ile Landcruiser nyuma yangu alikuwa mwerevu kuishtukia

dhamira yangu hivyo naye akaongeza mwendo akinifuata.

Muda mfupi uliyofuata lile gari jeusi Landcruiser likawa limenifikia na hapo nikasikia

sauti kali ya dafrao nyuma yangu. Lile gari lilikuwa limenigonga kwa nyuma kiasi cha

kufanikiwa kuyumbisha kidogo uelekeo wangu. Nikayumba kidogo kwenye barabara

ile kabla ya kukaa sawa huku watembea kwa miguu kando ya barabara ile wakiogopa

na kurukia kwenye mitaro iliyokuwa kando ya barabara ile.

Gari langu lilipokaa sawa nikakanyaga klachi na kutupia gia nyingine huku

nikikanyaga vizuri pedeli ya mafuta. Injini ya gari ikalalamika kidogo na ilipotulia gari

likawa jepesi na hapo nikaushika vizuri usukani wa gari kwa mkono mmoja huku

mkono mwingine ukiichukua ile bastola yangu pembeni.

Hatimaye nikayapeleka macho yangu kwenye kioo cha ubavu cha gari langu

kulitazama lile gari jeusi Landcruiser lililokuwa nyuma yangu. Hata hivyo sikufanikiwa

kwani kile kioo cha ubavuni cha gari langu kiliondoshwa haraka kwa kuchanguliwa

vibaya na risasi iliyotoka nyuma yangu. Baada ya pale mirindimo ya risasi ikafuatia

huku baadhi ya risasi hizo zikitoboa vibaya bodi la gari langu. Nikiwa nimeanza

kuhisi hatari nikaongeza mwendo huku nikiliyumbisha gari langu upande huu na ule

ili kuzikwepa zile risasi lakini bado zile risasi ziliendelea kuniandama huku zikitoboa

vibaya kioo cha nyuma cha gari langu na kunikosakosa.

Hali ile ya hatari ilipozidi kuongezeka nikaikamata vyema bastola yangu mkononi

kisha nikashusha kioo cha dirishani. Hata hivyo nilipokuwa mbioni kufanya shambulizi

mara ile Landcruiser ikawa tayari imenifikia tena na kunigonga kwa nyuma. Tukio lile

likanipotezea umakini hivyo nikavuta kilimi cha bastola yangu pasipo kutaka na hapo

risasi moja ikachomoka kwa kasi na kuchana anga huku mlio mkali wa risasi ukisikika.

Sikutaka kuendelea kuiruhusu hali ile hivyo nikaukamata vizuri usukani wangu

kisha nikakunja kona ya ghafla mbele yangu nikiufuata uelekeo wa upande wa kulia.

Hata hivyo lile gari Landcruiser halikuniacha kwani muda mfupi uliyofuata likanifikia

na kuanza kunigongagonga ubavuni na kwa kuwa gari langu lilikuwa dogo kwa kweli

lilizidiwa nguvu na kupondekapondeka ubavuni huku likiminywa kwenye ukuta

wa pembeni wa kiwanda cha maji kilichopakana na barabara ile. Zile risasi zikawa

zikiendelea kuniandama na muda mfupi uliyofuata kile kioo cha nyuma cha gari langu

kikachanguka vibaya na kutawanyika. Hali ilikuwa mbaya na endapo ningeendelea

kuiruhusu hali ile wale watu wangeyakatisha maisha yangu kiulaini.

Gari langu lilikuwa limebanwa mno na kwa upande wa kushoto wa barabara ile

kulikuwa na mtaro mkubwa wa majitaka hivyo endapo ningeendelea kuiruhusu hali

ile basi huwenda ningesukumiwa mtaroni na hapo gari langu lingepinduka. Hivyo

nikaanza kufikiria njia mbadala ya kujinasua.

Nikapangua gia zote hadi kufikia gia namba moja kisha nikakaza mguu wangu na

kukanyaga pedeli ya mafuta. Kwa kufanya vile gari langu likapaa hewani na lilipotua

chini magurudumu yake ya upande wa kushoto yakahamia upande wa pili wa ule

mtaro. Hivyo ule mtaro wa majitaka ukawa katikati ya difu.

Lilikuwa tukio la hatari lakini salama. Lile gari Landcruiser kwa kuwa lilikuwa

limezoea kuniegemea hapo awali likapoteza mhimili na kuanza kuserereka likiyumba

ovyo barabarani. Hata hivyo yule dereva alikuwa mtundu wa kucheza na gari hivyo

hatimaye akafanikiwa kulituliza vizuri gari lake barabarani kisha akaanza kunifuata na

safari hii lile gari lilikuja kwa kasi zaidi.

Niliweza kuinusa hatari iliyokuwa mbioni kunikabili na sikutaka kuisubiri hivyo

nikaikamata vizuri bastola yangu na kuvuta kilimi chake nikiiruhusu risasi moja

kusafiri. Risasi ile ikasafiri na kuchana kioo cha mlango wa mbele wa ile Landcruiser

ikitokezea upande wa pili wa dereva. Wale watu ni kama walikuwa wameishtukia

mapema dhamira yangu hivyo wakawahi kulala chini na kuiacha risasi ile ikiparaza juu

ya vichwa vyao na hivyo kupunguza kasi ya lile gari kunifikia. Sikupunguza mwendo

hivyo baada ya muda mfupi nikawa nimeliacha lile gari nyuma yangu. Hatimaye

nikalirudisha tena gari langu barabarani huku kioo cha nyuma kikiwa kimeondoshwa

kwa risasi. Baadhi ya taa za nyuma za gari langu zilikuwa zimepasuka na matundu ya

risasi za wale watu yalikuwa yamelipelekea gari langu kwa baadhi ya maeneo lifanane

na chujio.

Zile risasi ziliendelea kuniandama na kweli nilijitahidi kuzikwepa kwa kila hali

nikiliyumbisha gari langu upande huu na ule barabarani. Watu waliokuwa wakitembea

kando ya barabara ile walipoona vile wakaruka kando huku wakipiga mayowe ya hofu.

Wakati nikifikiria namna ya kujinasua mara nikapata wazo na bila kupoteza muda

nikaubana usukani wa gari langu vizuri kwa mkono mmoja kisha nikakusanya nguvu

za kutosha. Nilipochungulia dirishani kutazama kule nyuma nikajua nini cha kufanya.

Risasi tatu makini nilizozifyatua moja ikachana kioo cha mbele na kutengeneza tundu

dogo lenye nyufa za mipasuko. Sikujua kama risasi ile ilikuwa imempata mtu au lah!

lakini risasi zile mbili zilizosalia angalau zilifanya kazi niliyoitaka. Risasi zile zikaiharibu

na kuitawanya vibaya kabari ya boneti ya ile Landcruiser kwa mbele na kwa kuwa lile

gari lilikuwa kwenye kasi sana hivyo upepo mwingi ukaingia kwenye lile boneti na

hapo lile boneti likafunguka vibaya kama soli ya kiatu iliyotatuka.

Lilikuwa pigo safi la kiufundi lenye matokeo mazuri ya kuridhisha kwani boneti

lile lilifumuka vibaya na kufunika kile kioo cha mbele cha ile Landcruiser. Tukio lile

likampelekea yule dereva wa ile Landcruiser apoteze ueleko kama kipofu. Lile gari

Landcruiser likaanza kuyumba ovyo likipoteza uelekeo. Watu waliokuwa eneo lile

kuona vile wakaanza kupiga mayowe ya hofu.

Dereva wa lile gari akajitahidi kwa kila hali kuuthibiti usukani wake hata hivyo

hakufanikiwa kwani hatimaye lile gari Landcruiser likagonga ukingo wa daraja dogo

la mfereji wa majitaka uliokuwa kando ya barabara ile. Tukio lile likayapelekea

magurudumu ya mbele ya lile gari yapande juu ya ukingo wa daraja lile dogo na hapo

nikaona tukio la kushangaza.

Katika hali ya kushangaza mara nikaliona lile gari Landcruiser likipaa hewani kama

mwanasesere na lilipotua chini likapinduka mara mbili kisha likaserereka na kwenda

kujikita mtaroni kando ya barabara ile na hivyo kulipelekea eneo lile lote ligubikwe na

wingu zito la vumbi na mnuko wa mafuta ya gari yaliyokuwa yakivuja kutoka kwenye

tenki.

Kwa kweli lilikuwa ni tukio la aina yake na muda mfupi uliyofuata mashuhuda

wakaanza kukusanyika eneo lile wakitaka kufahamu vizuri nini kilichokuwa kimetokea.

Niliegesha gari langu kando ya barabara kisha nikafungua mlango na kushuka

nikielekea kule lile gari Landcruiser lilipopinduka huku nikiwa nimeikamata vyema

bastola yangu mkononi pasipo kuitilia maanani halaiki ya watu iliyokuwa ikizidi

kuongezeka eneo lile.

Bastola yangu ikiwa mkononi muda mfupi tu mara nikawa nimelifikia lile gari

Landcruiser pale mtaroni. Lile gari Lilikuwa limepinduka vibaya na magurudumu yake

ambayo sasa yalikuwa yakitazama juu yalikuwa yakiendelea kuzunguka kwa kasi.

Kifuniko cha tenki la mafuta la lile gari kilikuwa kimezibuka na hivyo kupelekea

mafuta mengi kuvuja na kusambaa eneo lile. Kitu pekee kilichonishangaza ni kuwa

pamoja na hali ile lakini injini ya lile gari bado ilikuwa ikiendelea kuunguruma.

Nikasogea karibu na nilipochungulia ndani ya lile gari nikawaona wanaume wanne.

Watatu miongoni mwao walikuwa hawajitambui kutokana na mshtuko mkubwa wa

ajali ile kama siyo majeraha makubwa katika baadhi ya sehemu za miili yao. Mwenzao

mmoja alikuwa na nafuu kidogo kwani aligeuka taratibu kunitazama hata hivyo

hakuweza kufanya chochote kwani mguu wake ulikuwa umeminywa vibaya na kunasa

kwenye chesesi ya lile gari.

Nikafungua mlango wa dereva na kuwatazama wale watu kwa makini huku

nikijaribu kuzinakili vizuri sura zao akilini mwangu. Hata hivyo sura za watu wale

zilikuwa ngeni kabisa machoni mwangu. Nikamtazama yule mtu mwenye fahamu

mara mbilimbili kwa udadisi zaidi na hapo nikamuona namna alivyojawa na hofu.

Hofu iliyomfanya ayakwepeshe macho yake na kutazama pembeni.

“Mna shida gani na mimi?” nikamuuliza yule mtu ambaye ndiye pekee aliyekuwa

na fahamu mle ndani. Yule mtu hakunijibu badala yake aliendelea kunitazama huku

akilalamika maumivu ya mguu wake.

“Nakuuliza wewe mna shida gani na mimi?”

“Hakuna mwenye shida na wewe” yule mtu akanijibu huku akiuma meno yake

na kukunja sura katika namna ya kukabiliana na maumivu makali ya majeraha yake.

“Sasa kwa nini mnanifuatafuata kila mahali ninapokwenda?” nikamuuliza yule

mtu na nilipomuona akiendelea kunitazama bila kuongea chochote nikamzaba

makofi mawili ya nguvu kumuweka sawa. Wenzake bado walikuwa wakining’inia

kwenye mikanda ya viti za gari huku fahamu zao zikiwa zimewatoka.

“Nyinyi ni akina nani?” nikamuuliza yule mtu huku nikianza kuwapekua mifukoni.

Vitambulisho vyao vikanitanabaisha kuwa wale watu walikuwa ni askari wa vitengo

nyeti vya usalama wa taifa ingawa sura zao bado zilikuwa ngeni kabisa machoni

mwangu.

“Askari” yule mtu akaongea kwa taabu hata hivyo sikushtushwa na hali ya afya

yake badala yake nikamchapa tena makofi matatu mazito usoni mwake na hapo

kamasi nyepesi za damu zikaanza kumtoka puani.

“Nani aliyewatuma mnifuatilie?” nikamuuliza yule mtu huku akigugumia

maumivu.

“Hatujatumwa na mtu” yule mtu akaongea huku akilalama.

“Kama nyinyi ni wanausalama kweli kwanini msishughulike na mafisadi

wanaofahamika hadi magazetini kwa kuzitafuna pesa za walipakodi kama mchwa na

badala yake mnatumika kuwaonea wanyonge?” nikamuuliza tena yule mtu na mara

hii nikajihisi kama niliyekuwa nikijiongelesha mwenyewe kwani yule mtu hakunijibu

na nilipomchunguza vizuri nikagundua kuwa alikwisha poteza fahamu huku akiwa

ananing’inia kwenye mkanda wa kiti cha gari. Huwenda hali ile ilitokana na maumivu

makali ya majeraha aliyokuwanayo mwilini mtu yule.

Nikatulia kidogo nikiyatembeza macho yangu kuwatazama wale watu mle ndani

na hapo nikagundua kuwa wote walikuwa na bastola mikononi. Nilitaka kuendelea na

uchunguzi wangu lakini mazingira ya eneo lile hayakuniruhusu kufanya hivyo kwani

mashuhuda walikuwa wengi sana.

Sikutaka kupoteza muda hivyo nikaanza kupitisha msako makini mle ndani.

Kitu cha ajabu ni kuwa wale watu mle ndani ya lile gari hawakuwa na simu kama

nilivyodhani badala yake simu pekee iliyokuwa mle ndani ilikuwa ni simu ya

upepo kama zile zinazotumiwa na askari wa usalama barabarani ambayo ilikuwa

imechomekwa sehemu fulani kwenye dashibodi ya lile gari.

Mwishowe nikapata kadi ndogo ya biashara ama business card yenye anwani fulani.

Nikaichukua kadi ile na kuitia mfukoni na wakati nikijishauri nini cha kufanya mara

nikaliona lile kundi la mashuhuda likisogea kando taratibu na kutengeneza nafasi nzuri

ya kupita na hapo nikajua kuwa polisi wa usalama barabara walikuwa wamefika eneo

lile.

Sikutaka polisi wale wanikute hivyo nikatoka kwenye lile gari haraka na

kujichanganya kwenye kundi la wale mashuhuda huku bastola yangu nikiwa tayari

nimeichimbia mafichoni. Baadhi ya mashuhuda walinishangaa hata hivyo sikuwatilia

maanani.

Askari watembeao kwa pikipiki maarufu kwa jina la Vodafaster tayari walikuwa

wamefika eneo lile na kuanza kuwasogeza watu pembeni ili wapate nafasi nzuri ya

kufanya kazi yao.

Muda mfupi uliofuata nikawa nimelifikia gari langu kule nilipokuwa nimeliegesha

ambapo nilifungua mlango na kuingia ndani. Sikutaka kuendelea kuwepo eneo lile

hivyo nikawasha gari langu nikiliacha eneo lile.

_____

DAMU ILIKUWA IKINICHEMKA vibaya mwilini na mzuka wa kazi ulikuwa

umenipanda kichwani na moyo wangu nao haukupingana katu na hisia zangu. Wakati

nikiendelea na safari mawazo mengi yalikuwa yakipita kichwani mwangu. Nilikuwa

nikimtafuta mdunguaji kwa udi na uvumba lakini hadi wakati huu nilikuwa sijamtia

machoni.

Yule kijana aliyeuwawa kwenye kile chumba cha mdunguaji cha Hotel 92 Dar es

Salaam nao ulikuwa ni mkasa unaojitegemea. Niliwakumbuka wale askari wa usalama

wa taifa waliopata ajali wakinifukuza na hapo maswali mengi yakaibuka kwenye fikra

zangu. Askari wale wenye vitengo nyeti vya usalama wa taifa walikuwa wameingiaje

kwenye mkasa huu?. Nikajiuliza bila kupata majibu hata hivyo hisia zangu zikanieleza

kuwa huwenda kulikuwa na jambo kubwa lililokuwa limefichika katika mkasa huu na

huwenda jambo hilo lilikuwa na mtazamo wa kimaslahi kwa baadhi ya viongozi wa

serikali kama siyo serikali yenyewe.

Nilikuwa na hakika kuwa watu wale ndiyo waliohusika na kifo cha Zera na

Momba kwa nyakati tofauti na hapo nikajiuliza kuwa watu wale walikuwa wakitaka

kuzuia kitu gani hadi nguvu yao igharimu uhai wa watu. Jibu sikulipata hivyo fikra

zangu zikahamia kwa mdunguaji. Kwa namna nyingine sikuona sababu kubwa ya

kumchukia mdunguaji kwani mdunguaji yule alikuwa akisakwa kama mimi na hapo

ule msemo wa “Adui wa adui yako ni rafiki yako” ukajengeka kichwani mwangu.

Sikufahamu mdunguaji yule hatari alikuwa ameingiaje kwenye mkasa huu hata hivyo

moyoni niliomba nikutane naye kwa mara nyingine.

Saa saba kasoro mchana ilipotimia niliegesha gari langu lililopata misukosuko ya

kutosha nje ya jengo moja refu la ghorofa eneo la posta jijini Dar es Salaam. Bila

shaka gari langu lilikuwa kivutio kwa watu waliokuwa eneo lile kutokana na yale

matundu ya risasi,michubuko ya rangi ubavuni,kupasuka kwa taa za nyuma pamoja

na kutokuwepo kwa kioo cha nyuma cha gari langu.

Sikujali kitu badala yake mara tu niliposhuka kwenye gari langu nikaharakisha

nikielekea sehemu ilipokuwa lifti ya ghorofa lile na kwa bahati wakati nikifika eneo lile

na kile chumba cha lifti nacho ndiyo kilikuwa kinafika nchini ya lile jengo.

Mara tu kile chumba cha lifti kilipofika chini na mlango wake kufunguka msichana

mmoja mrembo akatoka na kupishana na mimi wakati nikipotelea ndani ya chumba

kile cha lifti. Nilipoingia kwenye kile chumba cha lifti nikabonyeza kitufe cha ghorofa

namba sita ya lile jengo. Muda mfupi baadaye kile chumba cha lifti kikatia nanga

kwenye ghorofa ya sita ya lile jengo na mlango ulipofunguka nikatoka na kujikuta

kwenye korido pana iliyokuwa ikitazamana na milango upande wa kushoto na kulia.

Kabla ya kuendelea mbele na harakati zangu nikaichukua ile business card

niliyoichukua kutoka kwa mmoja wa wale majeruhi kwenye ile Landcruiser na kuyapitia

maelezo yake. Kwa mujibu wa maelezo yaliyokuwa kwenye ile business card bado

nilikuwa sehemu hii. Hivyo nikaanza kutembea taratibu huku nikiitafuta namba ya

mlango iliyokuwa kwenye ile business card.

Kulikuwa na utulivu mkubwa katika eneo lile la ghorofa na kitu pekee nilichoweza

kukisikia eneo lile ni mashine za viyoyozi zilizokuwa zikiunguruma mle ndani. Sakafu

ya korido ile ilitengenezwa kwa marumaru safi zinazovutia na kulifanya eneo lile

lipendeze sana.

Niliitazama milango iliyokuwa kwenye korido ile huku nikijaribu kutengeneza picha

fulani akilini mwangu juu ya kitu ambacho kingekuwa kikiendelea mle ndani na kwa

kweli sikuwa na hisia ya kitu chochote. Hivyo hatimaye nikaanza kutembea taratibu

kwenye korido ile huku nikiyatembeza macho yangu huku na kule nikiichunguza

milango iliyokuwa ikitazamana na ile korido.

Maelezo yaliyokuwa kwenye ile kadi bado nilikuwa nikiyakumbuka vizuri hivyo

macho yangu yakaendelea kusumbuka huku nikiutafuta mlango niliokuwa nikiuhitaji.

Nikiwa mbioni kukata tamaa hatimaye nikauona ule mlango. Mlango huo ulikuwa

katikati ya milango miwili iliyoachana kwa umbali mrefu upande wa kushoto wa korido

ile. Niliyatembeza macho yangu upande wa kulia na nilipoihesabu milango iliyokuwa

upande ule nikagundua kuwa jumla yake ilikuwa ni milango kumi na mbili. Aina ile

ya ujenzi ilinishangaza sana kwani sikuwahi kuiona katika mejengo yote niliyobahatika

kuyafikia katika jiji la Dar es Salaam.

Kilichonishangaza zaidi ni kuwa milango yote iliyokuwa ikitazamana na ile korido

ilikuwa imetengenezwa kwa fomeka isipokuwa mlango mmoja mweusi uliokuwa

katikati ya ile korido upande wa kushoto ambao hata hivyo ulikuwa mkubwa zaidi ya

ile mingine.

Nikausogelea ule mlango na kusimama mbele yake huku maswali mengi yakipita

kichwani mwangu. Niliutazama ule mlango kwa makini huku nikijiuliza kwanini

mlango ule ulikuwa ukitofautiana na milango mingine ya mle ndani. Juu ya ule mlango

kulikuwa na namba na mara hii nilishtushwa sana na namba iliyokuwa juu ya mlango

ule.

Ilikuwa ni namba 666 iliyochongwa kwa ustadi kwa madini ya shaba. Chini ya

namba ile kulikuwa na maneno mengine yaliyoandikwa kwa hati nzuri ya kupendeza

kwa madini yaleyale ya shaba. Maneno hayo yakisomeka Restricted Members Only na

chini ya maandishi yale kulikuwa na mstari mnyoofu uliyoyakinga yale maneno kwa

chini na kufuatiwa na alama sita za nyota za shaba.

Niliutazama mlango ule kwa makini huku nikiupisha utulivu kichwani mwangu

kisha nikaanza kugonga na wakati nikifanya vile nafsi yangu ikaanza kusumbuka katika

kuwaza juu ya kitu gani ambacho kingetokea mbele ya safari. Baada ya kugonga kwa

muda mrefu hatimaye nikapumzika kidogo na wakati nilipokuwa nikijiandaa kugonga

kwa mara ya pili ghafla nikasita baada ya kuuona ule mlango ukifunguliwa.

Ule mlango ulipofunguka mbele yangu nikajikuta nikitazamana na msichana mzuri

sana ambaye kwa kumbukumbu zangu za haraka sikuwahi kumuona msichana mzuri

kiasi kile tangu nizaliwe. Yule msichana alikuwa mrefu zaidi yangu na mwembamba

kiasi. Manukato yake ya gharama yakaziroga pua zangu wakati nilipoyatembeza

macho yangu taratibu kumtazama. Msichana yule mrembo alikuwa amevaa gauni

jepesi la hariri ya rangi nyekundu lakini hata hivyo gauni lile halikuwa na maana

yoyote machoni mwangu kwani wepesi wake ulilichora bila kificho umbo lake refu

la ulimbwende na kuziacha chuchu zake zilizotuna na kusimama wima kuzivuruga

kabisa hisia zangu.

Uso wangu ukiwa tayari umetengeneza tabasamu la kirafiki taratibu nikaanza

kuyatembeza macho yangu nikimtazama mrembo yule kuanzia juu mpaka chini na

mara hii nikagundua kuwa mrembo yule hakuwa amevaa nguo ya ndani. Nikalitazama

gauni lake na hapo nikagundua kuwa lilikuwa limeishia kwenye mapaja yake marefu

yaliyohifadhi misuli laini.

Mikono yake ilikuwa mirefu na inayopendeza yenye kucha ndefu sana zilizopakwa

rangi nzuri inayoendana na vazi lake. Nikayahamisha macho yangu tena kumtazama

kichwani. Nywele zake ndefu,nyeusi na laini zilining’inia hadi mabegani mwake na

kuifanya sura yake nyembamba kiasi ipendeze. Pua yake nyembamba ya kisomali

ilitengeneza kionjo kingine cha uzuri juu ya mdomo wake wa kike wenye kingo pana

na laini zilizokolezwa lipstick nyekundu. Shingoni alining’iniza mkufu mwembama

sana unaometameta wa madini ya almasi nyeupe. Nilipomchunguza masikioni

nikagundua kuwa sikio lake la upande wa kulia halikuwa na kitu lakini lile la kushoto

lilikuwa limetogwa herini nne tofauti ambazo zilikuwa zikimetameta ingawa sikuweza

kufahamu kuwa herini zile nzuri zilitokana na madini gani.

Hata hivyo pamoja na uzuri wa kustaajabisha wa yule msichana lakini bado moyo

wangu ulishtuka sana na kuingiwa na hofu pale nilipoyatazama macho yake. Niseme

kuwa sikuwahi kumuona shetani kwa haya macho yangu ya nyama zaidi ya kuona

matokeo ya kazi zake hapa duniani. Lakini kwa muonekano wa macho ya msichana

yule sikuwa na shaka kusema kuwa huwenda yule alikuwa ndiye shetani mwenyewe

aliyekuwa akizungumziwa na waumini wa dini mbalimbali kama siyo dada yake,wifi

au ndugu yake wa karibu sana. Kwani macho yake yalikuwa yakimetameta sana katika

namna ya kuniogopesha mno. Yale macho yake yaliyokuwa yakimetameta yalifunikwa

kwa kope zake nyeusi na ndefu sana na kumfanya azidi kuonekana msichana wa ajabu.

Nilikuwa mbioni kujishauri kuwa nimtake radhi msichana yule kwa usumbufu

uliojitokeza huku nikidanganya kuwa nilikuwa nimekosea mlango kisha niondoke

eneo lile. Hata hivyo sikufanikiwa kwani yule msichana akawahi kuvunja ukimya huku

akitabasamu.

“Karibu ndani” akaongea kwa sauti ya kubembeleza iliyotuama vyema kwenye

sakafu ya mtima wangu. Moyo wangu ukapiga kite kwa nguvu na kusababisha

usumbufu mdogo wa nafsi na hapo ujasili wangu wote ukatokomea kusikojulikana.

Hivyo nikabaki nikitabasamu tu mbele yake.

“Pita ndani kaka” yule mrembo akanikaribisha na sikutaka kujiuliza mara mbili

badala yake nikapiga hatua zangu taratibu kuingia mle ndani na wakati nikimaliza

kuingia nyuma yangu nikausikia ule mlango ukifungwa. Mara tu nilipoingia mle ndani

haikunichukua muda mrefu kutambua kuwa nilikuwa nimeingia kwenye mazingira

tofauti yenye hisia za hofu.

Harufu ya mle ndani ilikuwa tofauti kabisa na sehemu nyingine zote nilizowahi

kufika hapa duniani. Kwa kweli sikuipenda kabisa harufu ile na hewa ya mle ndani

haikuwa nyepesi wala nzito.

Mara tu tulipoingia mle ndani yule dada akageuka kidogo kunitazama huku

akitabasamu na wakati akifanya hivyo nikaiona tatoo iliyokuwa shingoni mwake.

Ilikuwa ni tatoo ya namba 666 iliyochorwa kwa ustadi sana na ufundi wa hali ya juu

na chini yake kulikuwa na tatoo nyingine ya nyoka aliyeachama mdomo na kutoa nje

pacha ya ulimi wake. Nikaitazama tatoo ile na kweli hofu ikazidi kuniingia hata hivyo

sikusema neno.

Mwanga hafifu wa mle ndani ukaniwezesha kuona mle ndani kwa sehemu

tu. Tulikuwa kwenye chumba kipana lakini kisichokuwa na kitu chochote.

Nilipoyatembeza macho yangu haraka mle ndani mara ukutani nikaiona michoro

mbalimbali ambayo katu haikunivutia kabisa kuitazama ingawa nilihisi kuwa huwenda

ilikuwa imechorwa kwa sanaa ya hali ya juu.

Mchoro mmoja ulionesha kichwa cha mwanamke mzuri lakini mwenye kiwiliwili

cha nyoka. Mchoro mwingine uliwaonesha wanaume wakilawitiana. Mchoro

mwingine uliyofuata ulikuwa na umbo la dunia lililozungukwa na moto mkali. Kisha

kukafuatiwa na michoro mingine kama ya;pete,mnyama fulani asiyeeleweka mwenye

miguu ya binadamu. Mchoro mwingine ulikuwa ni wa mwanamke aliyekuwa uchi wa

mnyama huku amempanda farasi mwenye kichwa cha binadamu. Kwa kweli michoro

ile sikuipenda.

Hatimaye nikayapeleka macho yangu kutazama kwenye sakafu ya kile chumba.

Kwa kufanya vile nikauona mchoro mkubwa wa popo aliyetanua mbwawa zake.

Miguu ya popo yule ilikuwa na misuli imara kama ya simba na mwili wa yule popo

ulikuwa wa binadamu mwanamke mwenye matiti. Nilikuwa nimesimama juu ya

mchoro ule bila kujua na yule msichana akanisukuma kando kwa nguvu za ajabu

zilizonishangaza huku macho yake makali yakinionya kuwa nisilete upinzani wa

namna yoyote.

“Usirudie tena kukanyaga hapa!” yule msichana akanifokea kwa hasira na wakati

nikitafakari yale maneno yake mara nikamuona akitabasamu tena na kwa kweli kitendo

kile kilinichanganya sana na kuniongezea mshaka.

“Wewe ni mwanachama wa humu ndani?” yule msichana mrembo akaniuliza kwa

utulivu huku akiwa amesimama kando yangu.

“Hapana!” nikamjibu huku nikitafakari matokeo ya jibu langu

“Hukusoma maelekezo yaliyokuwa mlangoni kabla kuingia humu ndani?”

“Kuhusu nini?” nikamuuliza kwa shauku

“Aina ya watu wanaotakiwa kuingia humu ndani” yule msichana akaniambia na

hapo nikakumbuka yale maelezo yaliyokuwa juu ya ule mlango wa kuingia mle ndani

yakisomeka Restricted Members Only na hapo jasho jepesi likaanza kunitoka. Hata hivyo

nilipomtazama yule msichana nikamuoana akizidi kutabasamu.

“Basi naomba uniruhusu nitoke nje” nikamwambia yule msichana huku nikianza

kupiga hatua zangu kuuendea ule mlango wa kuingilia mle ndani. Hata hivyo yule

msichana aliwahi kunizuia huku akiniambia

“Usijali kaka,nifuate!” yule msichana akaniambia na hapo tukuanza safari huku

yeye akiwa ametangulia mbele. Sehemu fulani katika ukuta wa kile chumba upande wa

kushoto nikamuona yule msichana akibonyeza tarakimu fulani katika vutufe vyenye

namba vilivyokuwa ukutani katika mlango uliokuwa eneo lile. Kwa kufanya vile mara

nikauona ule mlango ukifunguka. Mlango ule ulipofunguka tukaingia mle ndani kisha

ukajifunga nyuma yetu.

Mara baada ya mlango ule kujifunga tukawa tumetokezea kwenye eneo jembamba

lenye ngazi za kushuka chini. Tukasimama kidogo tukilitazama eneo lile na hapo yule

msichana akageuka na kunitazama huku akitabasamu. Kisha tukaanza kwenda chini

kwa kushuka zile ngazi taratibu na wakati tukishuka yule mrembo akawa akigeuka tena

mara kwa mara kunitazama huku akitabasamu nami nikafanya hisani kwa kutabasamu

kidogo ingawa kwa wakati ule tabasamu halikuwa nafsini mwangu. Hivyo nikapiga

moyo konde na kuendelea na ile safari.

Mwanga hafifu wa taa zilizokuwa ukutani kwenye zile ngazi ukaniwezesha kuona

maandishi yaliyokuwa ukutani eneo lile yakisomeka Vampire Casino-Our place in Dar

es Salaam. Nikayatazama maandishi yale huku nikishtuka sana hata hivyo sikutaka

mshtuko wangu uonekane kwa yule msichana wakati alipogeuka na kunitazama.

“Tunaelekea wapi?” hatimaye nikamuuliza yule msichana.

“Hutaki kuwaona wenzangu?” yule msichana akanijibu huku akitabasamu.

“Ni wazuri na warembo kama wewe?” nikatumbukiza utani kuzipeleleza hisia

zake.

“Nilipokutazama tu nikajua haraka kuwa unapenda wasichana wazuri ndiyo

maana nikakukaribisha humu ndani” yule msichana akaongea huku akiangua kicheko

hafifu. Nilicheka kidogo nikikubaliana naye ingawa ile haikuwa dhamira yangu.

Hatimaye tukawa tumefika kule chini mwisho wa zile ngazi na hapo tukawa

tumetokezea kwenye ukumbi mdogo wenye watu wasiopungua hamsini. Mara hii

nikashtuka sana nilipowatazama wale watu. Ulikuwa mchanganyiko wa wanaume kwa

wanawake vijana kwa wazee. Kitu kilichonishtua zaidi ni kuwa baadhi ya watu wale

nilikuwa nikiwafahamu. Kulikuwa na wanasiasa maarufu,wanamuziki,wanamichezo

na hata viongozi wa dini wakubwa niliokuwa nikiwafahamu.

Watu wale walikuwa wameketi wakimsikiliza kwa makini mtoa mada aliyekuwa

ameketi mbele yao kwenye kiti kama mfalme huku amevaa majoho mekundu. Kitu

kilichonishangaza ni kuwa wakati tukipita eneo lile wale watu hawakujishughulisha

kututazama badala yake waliendelea kumsikiliza mtoa mada mbele yao.

“Wale watu wanafanya nini?” nilimuuliza yule msichana huku nikishangazwa sana

na hali ile.

“Siwezi kukuleza mpaka uwe miongoni mwetu” yule msichana akaniambia huku

tukiendelea na safari.

“Kwani nyinyi ni akina nani?” nikamuuliza yule msichana na wakati huo tulikuwa

tumefika kwenye korido nyingine nyembamba tofauti na ile ya awali. Wakati

tukiendelea na safari nikayatega masikio yangu vizuri mle ndani na kwa mbali niliweza

kuzisikia kelele za vitoto vichanga vikilia kwa sauti kubwa mle ndani. Hali ile ikazidi

kunichanganya kwani mandhari ya mle ndani hayakufaa kufananishwa na wodi ya

wazazi. Kitu kilichonishangaza zaidi ni kuwa kelele zile zilikuwa zimeambatana na

sauti ya vicheko vya wanawake.

Nikiwa nyuma ya yule msichana nikachungulia kwa jicho la pembe ndani ya

vyumba tulivyopishanavyo. Kwa kufanya vile mle ndani nikawaona wanaume kwa

wanawake wakiwa wamevaa makoti marefu kama yale yanayovaliwa na madaktari

na glovu nyeupe mikononi. Wale watu walikuwa wakiweka vitu fulani vyeupe

kwenye mifuko ya nailoni ingawa sikuweza kuona vizuri. Mara hii tena nafsi yangu

ikanitahadharisha kuwa nilikuwa nimejitumbukiza kwenye hatari nisiyoifahamu.

Tulimaliza kuivuka korido ile kisha tukaingia upande wa kulia na hapo nikasikia ile

sauti ya vicheko ikiongezeka. Sikutaka kumuuliza yule msichana kwani niliamini kuwa

majibu ya maswali yangu yalikuwa mbioni kupatikana



#121

Katika upande ule wa kulia tulioingia kulikuwa na milango mingine. Tulipoifikia

ile milango yule msichana mbele yangu akasimama kisha akageuka na kunitazama.

Nikatabasamu kidogo katika hali ya kuonesha kuwa sikuwa na wasiwasi wowote

ingawa hali iliyokuwa ikiendelea moyoni mwangu nilikuwa nikiifahamu mwenyewe.

Yule msichana alipoacha kunitazama akageuka na kufungua ule mlango kisha

akaniashiria nisogee karibu na kuchungulia mle ndani. Nikasogea na kuchungulia mle

ndani na kwa kufanya vile nikawaona wasichana wadogo vigoli. Uzuri wa wasichana

wale kwa kweli ulinibabaisha na kuziamsha hisia zangu.

Wale wasichana wakageuka mara tu mlango ule ulipofunguliwa wakitutazama

ingawaje nilikuwa na kila hakika kuwa walikuwa wakinitazama mimi zaidi kuliko yule

mwenyeji wangu. Labda kwa sababu nilikuwa mwanaume peke yangu eneo lile. Mara

wale wasichana vigoli wakaacha walichokuwa wakikifanya na kuanza kunifuata pale

mlangoni lakini yule mwenyeji wangu aliwahi kuwakemea hivyo wakarudi.

Yule dada akanisukuma pembeni na kufunga ule mlango na hapo safari yetu

ikaendelea huku yule mwenyeji wangu akiendelea kufungua milango ya vyumba

vingine vilivyokuwa vikifuatia ambapo mle ndani kulikuwa na wasichana wengine

wazuri sana wa rika tofauti. Niliwatazama wasichana wale na kwa kweli niseme kuwa

mwanaume yeyote mkware asingekubali hazina ile impite hivihivi.

Hatimaye safari yetu ikaishia ndani ya chumba kipana chenye kitanda kikubwa

cha futi sita kwa sita kilichofunikwa kwa shuka safi zenye rangi ya kupendeza na mito

miwili ya kuegemea. Pembeni ya kitanda kile kulikuwa makochi mawili makubwa ya

sofa na meza fupi ya kioo katikati yenye kibeseni kidogo cha majivu ya sigara mfano

wa fuvu la mtu.

Nikayatembeza macho yangu na kwenye pembe ya chumba kile kulikuwa na

jokofu dogo la vinywaji lililopakana na kabati lililofungwa ambalo sikuweza kufahamu

haraka kuwa mle ndani yake kulikuwa na nini. Kiyoyozi murua kilichokuwa mle ndani

kililifukuza joto kali la jiji la Dar es Salam na kunipelekea niyafurahie sana mandhari

yale tulivu.

“Karibu uketi” yule msichana akanikaribisha na nilipomchunguza niliweza

kuukadiria umri wake kuwa ulikuwa ni kati ya miaka ishirini na mbili na ishirini nne

huku akionekana kujiamini sana. Hatimaye nikaenda na kuketi kwenye kochi moja

miongoni mwa yale makochi mawili yaliyokuwa mle ndani. Mara tu nilipoketi mbele

yangu nikajikuta nikitazamana na runinga pana iliyokuwa kwenye kona ya kile chumba.

“Ahsante!” nikaongea na kuketi.

“Utatumia kinywaji gani?” yule mrembo akaniuliza na hadi kufikia pale niliweza

kuhisi kuwa alikuwa na wadhifa wa juu mle ndani.

“Maji baridi tu tafadhali!” nikamwambia yule mrembo na hapo nikamuona

akienda kufungua lile jokofu la mle ndani kisha akachukua chupa kubwa ya maji baridi

na bilauri ya kioo halafu na yeye akajichukulia kinywaji baridi cha Malta na kuja na

kuketi mbele yangu kwenye lile kochi jingine ambalo lilitupelekea tuketi katika mtindo wa kutizamana

Kwa vile nilikuwa nikihisi kiu nikaichukua ile chupa ya maji na kuifungua kisha

nikaanza kugida mafunda kadhaa ya maji pasipo kuitumia ile bilauri. Nilipoiweka ile

chupa juu ya meza ilikuwa imebaki nusu hivyo nikachukua pakiti ya sigara kutoka

mfukoni na kutoa sigara mbili ambapo moja nilimpa yule mrembo na nyingine

nikaitia mdomoni na kuilipua kwa kiberiti changu cha gesi. Ile sigara ilipowaka na

kukolea vizuri nikamrushia kile kiberiti yule mrembo ambapo alikidaka kwa ustadi na

kujiwashia sigara yake.

“Jina lako unaitwa nani?” nikamuuliza yule mrembo baada ya kuitoa sigara yangu

mdomoni na kuupuliza moshi pembeni

“Oga” yule mrembo akanijibu kwa utulivu huku akiendelea kuvuta sigara yake

“Jina zuri”

“Na wewe je?”

“Remy” nikamdanganya

“Siyo Stephen Masika tena?” yule mrembo akaniuliza na hapo moyo wangu

ukalipuka kwani Stephen Masika lilikuwa jina langu la bandia ambalo nilikuwa

nimelitumia kujiandikisha uanachama kule Vampire Casino. Nikaumeza mshtuko

wangu kwa kuivuta sigara yangu taratibu na nilipoitoa nikamuuliza yule mrembo kwa

shauku

“Umenijuaje?”

“Ulinidanyanga ikidhani sikufahamu?” yule mrembo akaniuliza huku akivuta pafu

jingine la sigara na alipoitoa ile sigara mdomoni akaendelea huku akiupandisha mguu

wake mmoja juu ya mwingine na hivyo kulipelekea gauni lake fupi lipande juu na

hapo nikayaona mapaja yake yaliyonona. Ili kuurudisha vizuri mhimili wa nafsi yangu

nikaanza kumkemea pepo mchafu ingawa sidhani kama maombi yangu yalikubalika

kwani nafsi yangu bado iliendelea kusukwasukwa ovyo na jinamizi la ngono.

“Huwenda ukawa unajua kila kitu kuhusu mimi Oga hebu niambie” nikamwambia

yule mrembo huku nikitengeneza uso wa tabasamu.

“Kwa sehemu tu ndiyo maana nikakuleta humu ndani” Oga akaniambia kwa

utulivu kisha akaivuta sigara yake na alipoitoa na kupuliza moshi pembeni akaniuliza

“Tafadhali! niambie wewe ni nani hasa na umefika hapa kufanya nini?”

“Nahitaji kufahamu nyinyi ni akina nani na mnashughulika na mambo gani humu

ndani” nikamuuliza yule mrembo huku nikimtazama kwa makini.

“Nani aliyekuelekeza humu ndani?” yule mrembo akaniuliza na kabla sijamjibu

nikamuona akisimama na kuanza kunifuata pale nilipoketi. Kufumba na kufumbua

akaitoa bastola yangu kutoka nyuma kiunoni nilipokuwa nimeibana kwa mkanda

kisha akaifyatua magazine yake na kuitupia pale kitandani. Tukio lile likanipelekea jasho

jepesi lianze kufanya ziara kwenye sehemu mbalimbali za mwili wangu. Kitendo kile

kikanifanya nijihisi kuwa nilikuwa nimemkadiria vibaya yule mrembo. Hata hivyo

sikutia shaka yoyote.

“Nimeokota business card yenu hivyo nikaona si vibaya kuja kuwatembelea”

nikamwambia yule mrembo huku nikiendelea kuivuta sigara yangu taratibu.

“Na hiyo bastola ni ya nini humu ndani?” yule mrembo akaniuliza huku

akinitazama kwa makini.

“Kujilinda pale inapobidi”

“Nani aliyekwambia kuwa humu ndani kuna hatari?” swali la Oga likanipelekea

nimtazame mrembo yule kwa makini. Nilikuwa na uzoefu mkubwa kwa wasichana

wenye tabia kama za Oga. Hivyo nilifahamu kuwa ili kupata matokeo mazuri ya kazi

yangu nilihitajika kuwa mtulivu na mwenye moyo wa subira. Hatimaye nikaitia sigara

yangu mdomoni na kuivuta taratibu. Nilipoitoa sigara yangu mdomoni nikayakung’uta

majibu kwenye kile kibeseni cha majivu pale mezani kisha nikavunja ukimya

“Jina langu naitwa Chaz Siga” nikamwambia yule mrembo huku nikiiacha sigara

yangu ikiteketea katika pacha ya vidole vyangu.

“Vizuri!,endelea nakusikiliza” Oga akaongea huku akitabasamu.

“Mimi ni mpelelezi wa kujitegemea” nilikatisha maongezi kisha nikaipeleka sigara

yangu mdomoni na kuivuta taratibu. Nilipoitoa sigara mdomoni nikaupuliza moshi

pembeni na kuendelea

“Sikuwahi kufika humu ndani pamoja na kuzaliwa na kukulia hapa jijini Dar es

Salaam kwa muda mrefu. Lakini sasa nafurahi kupafahamu mahali hapa na huwenda

majibu ya maswali yangu yakaanza kujibiwa”

Oga alikuwa ameketi kwenye kochi mbele yangu huku mguu wake mmoja

ameupandisha juu ya mwingine na sigara yake ikiendelea kuteketea taratibu mkononi.

Ingawa Oga alikuwa akitazama dirishani lakini nilikuwa na kila hakika kuwa masikio

yake alikuwa ameyatega vizuri kunasa kile nilichokuwa nikikizungumza.

“Unapeleleza nini?” Oga akaniuliza

“Kifo cha rafiki yangu” nikaongea kwa utulivu

“Jina lake?”

“Gabbi Masebo” nilimwambia Oga na hapo nikamuona akitabasamu kidogo

kisha tabasamu lake lilipokoma akaniambia

“Okay! endelea”

“Rafiki yangu ametoweka miaka kumi iliyopita katika mazingira ambayo siyaelewi”

“Nini kinachokusukuma uje kufanya upelelezi wako humu ndani?” Oga akaniuliza

huku akiyakung’uta majivu ya sigara yake kwenye kile kibeseni pale mezani.

“Mpaka sasa bado sijafahamu kama nimefika hapa kupeleleza ua lah!” niliongea

huku nikimtazama Oga na safari hii uzuri wake ulizidi kunichanganya. Umbo lake

maridhwawa lilikuwa limechoreka vyema ndani ya gauni lake jepesi na laini alilolivaa.

Mikono yake mirefu na imara pamoja na vishimo vyake vidogo mashavuni vikaongeza

ziada nyingine katika uzuri wake.

“Hicho ndiyo kilichokupelekea kumuua mlinzi wetu?” swali la Oga likanipelekea

nigeuke na kumtazama kwa shauku.

“Wapi?”

“Vampire Casino”

“Umejuaje?” nikamuuliza Oga huku nikimkazia macho.

“Walinzi wawili uliopambana nao wakati ukijaribu kutoroka walitueleza habari

zako na kamera za usalama za casino zikatuhakikishia” Oga akaongea kwa utulivu.

“Hao walinzi wamewaeleza wewe na nani?” nikamuuliza Oga huku nikitabasamu

“That’s non of your business!” Oga akafoka kwa hasira huku akinitazama kwa makini.

“So what kind of business is yours?” nikamuuliza Oga kwa utulivu huku nikiyakung’uta

majivu ya sigara yangu kwenye kile kibeseni cha majibu pale mezani kisha nikaendelea

“Unaweza kuniambia kuwa mnawapata wapi wale mabinti wadogo kule

vyumbani?” nikamuuliza Oga na hapo akaangua kicheko kilichonishangaza.

“Nilidhani umesahau. Vipi unataka mmoja?” Oga akaniuliza huku ekiendelea

kucheka lakini ghafla kicheko chake kikakoma huku sura yake ikiwa mbali na mzaha

na tabia yake ile ya kubadilikabadilika ikazidi kunichanganya.

“Bado hujanijibu swali langu mrembo” Oga akanitazama kwa utulivu na uso wake

haukuonesha tashwishwi yoyote’’

“Tayari umechelewa kwani hata nikikupa hizo taarifa hutofanikiwa kufikanazo

kokote”http://pseudepigraphas.blogspot.com/

“Una maanisha nini?” nikamuuliza Oga kwa utulivu.

“Umefanya makosa sana kuingia humu ndani”

“Mbona unanitisha mrembo”

“Unadhani kuwa nakutisha basi umekosea sana kwani huu ndiyo mwisho wako

na habari zako zitaishia humu ndani’’

“Una maanisha nini?’’

“Subiri na utanielewa muda siyo mrefu. Najua umekuja humu ndani kupeleleza

kinachoendelea lakini nataka nikufahamishe kuwa hilo ni kosa kubwa sana ulilowahi

kulifanya siku za uhai wako hapa duniani. Baada ya kumtafuta Milla Cash kwa muda

mrefu na kumkosa naona sasa umeamua kufanya uamuzi wa busara kwa kujileta

mwenyewe’’

Nikamtazama Oga kwa shauku kwani kitendo cha kumtaja Milla Cash bila

shaka kilikuwa kimeanza kutanzua wingu zito lililotanda kichwani mwangu. Kwa

kweli nilianza kuhisi wepesi fulani katika fikra zangu na hapo nikaupachika mche wa

sigara yangu mdomoni na kuvuta mapafu kadhaa huku nikiupisha utulivu kichwani.

Nilipoitoa sigara mdomoni nikaupuliza moshi pembeni huku nikimtazama Oga kwa

utulivu.



ITAENDELEA