MIMI NA RAIS : THE PRESIDENT AND I - 5

 

Simulizi : Mimi Na Rais (The President And I)

Sehemu Ya Tano (5)





“Haya majibu umeyapanga vyema Gideon” Jabir alimalizia na kumrudishia ile karatasi Gideon. Gideon alitoka na kuendelea na safari yake kuelekea ofisini kwa Rais.



Alifika ofisi ya Rais na kuambiwa yupo kwenye mkutano wa yaliyojiri (media briefing) na kuwa wamechelewa kumaliza. Alijua fika suala la yeye kumiliki kisiwa cha kitalii huko Ufilipino limemvuruga na sasa anataka kujua maendeleo ya habari hiyo na hatua gani vijana wake wamezichukua. Alitaka kugeuza ili arudi baadae lakini vile anataka tu kuondoka alimuona Rais Costa akija akisindikizwa na walinzi wake wawili.



“Gideon, what’s new?”, Rais Costa aliongea kwa sauti akitokea mbali alipomuona Gideon nje ya chumba cha ofisi yake.



“Mh. Rais”, Gideon alijibu kwa kuinamisha kichwa kidogo ishara ya utii kwa mkuu wa nchi.



Rais Costa alimfikia Gideon na kumshika begani na kuingia nae ofisini kwake. Akiwa ameingia tu aliichukua ile karatasi aliyokuwa ameishika Gideon na kuanza kuisoma.



Karatasi ile ilikuwa ni yale majibu ya Rais Costa kwa Rais Chriss wa Marekani juu ya shutuma dhidi ya Stanza kutokufuata misingi ya Kidemokrasia, Haki na Utawala Bora pamoja na uvunjwaji wa Katiba na Sheria.Rais Costa ndiye aliyemuomba Gideon aandae majibu yale.



Rais Costa aliipitia kwa umakini na kutabasamu kidogo. “Briliant reply, Gideon! Umeandika vizuri na kwa ustadi isipokuwa hapa ulipoandika ‘we kindly ask you to not intervene in our internal affairs as we are a sovereign country. You are not the police of the world, deal with your internal matters without jeopardizing peace and security of other countries’, mimi nadhani ni ‘understatement’ ya msimamo wetu kama nchi. Kwanini umeandika kama vile unamuomba?



Badilisha hiyo statement, mkumbushe kuwa according to the United Nations’ Charter, Chapter 1, Article 2, Section 4 inasema wazi ‘’all members shall refrain in their international relations from the threat or use of force against the ‘territorial integrity or political independence of any state, or in any other manner inconsistent with the purposes of the United Nations. Stanza ni taifa huru and so shall it remain.



Sasa sisi na wao wote ni wanachama wa Umoja huu, yeye anachofanya ni kukiuka kifungu hicho na kutumia mabavu dhidi ya nchi nyingine Gidi. Badilisha hapo halafu niletee nisome tena”, Rais Costa alimalizia kujibu kwa mchanganyiko wa Kingereza na Kiswahili na kumrudishia Gideon karatasi ile.



“Sawa Mheshimiwa! Halafu nimeona ni kama Katibu Mkuu Kiongozi anapitisha tangazo la uteuzi wako wa Ketina kuwa Mbunge, ndio ule mwendo wa kutaka kumteua kuwa Waziri nini?”. Gideon alipokea ile karatasi na kumuuliza Costa juu ya uteuzi wa Ketina.



“Oh! Yah yah Gideon! Nitafanya mabadiliko madogo ya Baraza la Mawaziri, Kinyamagoha atapisha wanaoweza kwendana na kasi yangu. Kama ulivyonishauri, Ketina nitampa hiyo Wizara nihakikishe muswada tunaokusudia kuufikisha bungeni unakwenda kwa kasi ninayoitaka”, Rais Costa alimjibu Gideon huku akianza kusoma kalabrasha pale mezani kwake.



“Ketina atalifanikisha. Nitamsaidia”, Gideon alijibu.



“Yes, infact utakuwa nae karibu maana ninakutegemea unisaidie kulifanikisha hili. Nitaongea na Spika wa Bunge na uongozi mzima wa Bunge wahakikishe muswada huu hauwekewi vikwazo hata kidogo. Ikiwezekana wale wabunge wote wenye kelele awapangie ziara nje ya nchi. Anyway, nitaona itakavyokuwa”, Rais Costa alionekana kuwa na mipango kichwani.



“Na vipi kuhusu suala la Julius kupeleka taarifa kwenye vyombo vya habari kuwa unamiliki kisiwa cha kitalii Ufilipino mkuu?” Gideon alidodosa.



“Ndio kitu kilichonipotezea muda huko kwenye kikao. Hawa vijana ni wazembe, waliwezaje kuacha kitu kama kile kichapishwe? Angalau wamenihakikishia yule Muhariri wameshaelewana nae ile habari haitaendelea tena na Julius tutamshughulika tu. Mwanajeshi akisaliti, wenzake wanajua cha kumfanya. Hawezi kuendelea kuwepo, ipo siku”, Rais Costa alionekana kujibu kwa hasira.



Gideon hakutaka kuongeza neno, alimuaga Costa ili toke lakini ghafla mlango ulifunguliwa na aliingia Sabinas mkuu wa Idara ya Usalama wa Taifa la Stanza akiwa anaonekana kutokuwa sawa. Ni kama alikuwa amekuja kutoa habari fulani mpasuko.



“Mkuu nimepata taarifa kutoka kwa Sylvanus kuwa Meshack alikuwa amepanga kumuua. Jana usiku walikutana Casino na baadae aligundua kuwa Meshack alikwenda pale kumuua Sylvanus. Uthibitisho ni jinsi alivyovaa amenitumia na hizi picha. Na ninaamini ni kweli kwa sababu hakuna mwenye taarifa za Meshack kuwa hapa mjini kuanzia mimi wala kiongozi wake wa Kanda”.



Taarifa zile zilimshtua sana Gideon kiasi kwamba ilibaki kidogo ashindwe kujizuia kuonyesha hisia zake.



“Kwa hiyo nini kimetokea”, Rais Costa aliuliza huku akiangalia ile picha aliyoonyeshwa na Sabinas kwenye simu janja.



“Hii ina maana kuwa bado kuna mpango wa kukupindua unaendelea Mh. Rais na Joe bado ana watu wake ndani ya serikali anaowatumia kufanikisha mpango huo. Ni wazi huyu Meshack alitumwa kummaliza Sylvanus ili asiende China kummaliza Joe”, Sabinus aliongea kwa msisitizo.



“Ndio maana mimi nilishauri Mh. Rais ni vyema ukaongea na Macha yamkini akatufumbulia fumbo hili”, Gideon alidakia kwa kujikaza.



Machozi ya huzuni dhidi ya Meshack yalikuwa yakimlengalenga Gideon. Hakuamini kama ule ulikuwa ndiyo mwisho wa maisha ya kijana Meshack, alihuzunika sana lakini alijisemea kichwani kuwa ili mabadiliko ya kweli yatokee ni lazima baadhi ya wapambanaji wajitoe muhanga.



“Sabinas mwandae Macha, nitaonana nae leo jioni”. Rais Costa alionekana kuanza kupandisha munkari upya.



“Kwa hiyo Meshack ameuawa?”, Gideon alishindwa kuvumilia, alimuuliza Sabinas huku akiitazama ile picha iliyomwonyesha Meshack amelala pale chini.



“Swali la kujiuliza ni taarifa zilimfikiaje Meshack mpaka kuamua kumvizia Sylvanus. Alijuaje? Kwani wewe Sabinas yale majina uliyapanga na mtu? Ulimwonyesha mtu?”. Rais Costa aliuliza na kukatiza jibu alilotakiwa kupewa Gideon juu ya kifo cha Meshack.



“Hapana mkuu niliiandaa mwenyewe labda yule binti alieichapa pekee ndiye aliyeiona lakini tofauti na hapo hakuna”, Sabinas alijibu huku akiwaza sana kuwa kweli ni nani atakuwa amepenyeza zile taarifa.



“Yule binti asingeweza kuelewa Sylvanus anatumwa wapi maana tunamtuma kwingi. Hawezi akawa ni yule binti. This is serious”, Rais Costa alipata woga wa ukweli.



“Nitatazama kwenye kamera wakati yule binti anachapa orodha ile ni nani alikuwa karibu naye. Wanaweza wakawa hata wale walioko kwenye ‘control room’ za kamera wanatumiwa na Joe Mh. Rais”, Sabinas alijibu.



Wakati wote huo Gideon alikuwa kimya akiwa amejikaza maana aliona hakika muda wowote kibao kinaweza kumwangukia yeye. Lakini alijipa moyo kuwa siku ile alipoona lile jina alilitazama kwa ujanja na sio kuwa alishirikishwa kwa hiyo alikuwa na cha kujitetea.



“Sabinas haraka fanya uchunguzi taarifa hizi zimemfikiaje Meshack nataka nijue mzunguko mzima. Pia, kama nilivyokwambia, muandae Macha, nitazungumza nae leo jioni hukohuko idarani. Thank you, gentlemen”. Rais Costa alimwagiza Sabinas na kisha kuwaruhusu watoke.



Sabinas na Gideon wote walitoka kwa pamoja na haraka Gideon alimkimbilia Sabinas na kumuuliza kama Meshack alikufa ama la.



“Gideon does this have anything to do with you, kaka?”. Sabinas alimjibu Gideon. Kwa Kiswahili tungesema alimshushua.



‘’Ofcourse yes, Sabinas! I am a senior adviser to the president. I am also acting as his Special Councillor, do you truly believe that I should not be aware of anything that is going on, whatsoever?’’. Gideon alijibu kwa kuonekana na hasira kidogo kwa swali aliloulizwa na Sabinas.



Sabinas hakuwahi kuelewana na Gideon wala yeyote ndani ya Ikulu ya Stanza. Uhasama huo ulijengeka kutokana na ukweli kwamba Macha alikuwa mtu mzima kiumri na alipaswa kustaafu muda mrefu lakini hakuna mtu aliyewahi kumshauri Rais Costa amtoe Macha kwenye nafasi ile. Aliona ni kama wanamuwekea kile watoto wa mjini wanaita kauzibe. Hata nafasi ya Ukaimu wa Idara aliesababisha na kuweka msukumo sana yeye kuteuliwa alikuwa ni Katibu Mkuu Kiongozi aliyestaafu, ndugu Njano Manara.



Alijiona ni kama mtu anayejipambania mwenyewe mbele ya Rais Costa hivyo hakutaka kushiriki na mtu yeyote kwenye utawala wa wakati ule.



Gideon alipoona hakujibiwa aliachana nae na kuelekea ofisini kwake. Alikuwa akitembea huku akiwa na huzuni nyingi sana. Alijua tu kuwa kama Meshack atakuwaa amefikwa na umauti basi ni kwa sababu ya misheni yao. Alijua fika ni Joe ndiyo atakuwa amemtuma Meshack kumdhibiti Sylvanus.



Aliingia ofisini kwake na kujifungia. Aliingia kwenye game ya Clash Royale na kumtaarifu Joe kila alilosikia. Alimaliza na kuanza kulia.

****************************************



Meja Byabato aliingia ofisini kwake na kukaa huku akijishikashika Sehemu alizopigwa na wale vijana wake. Wale vijana nao walikaa kila mtu akigugumia kwa upande wake.



“What is the meaning of all this, young men?” (Maana ya haya yote ni nini nyie vijana?), Byabato aliwauliza wale vijana wake kwa kimombo.



“Hamna kitu mkuu tumeona tujipime tu ubavu na wewe. Unatunyanyasaga sana kwenye mazoezi tukasema leo tusherehekee siku yako ya kuzaliwa kwa kukupa kichapo. Ha ha ha!” Mmoja wapo alijibu.



“Kwa hiyo yale mazoezi mliyokuwa mnafanya wiki hii nzima ni kwa ajili mje mnipe kichapo?” Byabato aliuliza huku akitabasamu.



“Ndio, ila dah umetuweza, tutajipanga tena” Kijana mwingine alidakia.



“Mmejitahidi sana lakini. Ilikuwa nusura mniweke chini”. Byabato alikiri uwezo wa wale vijana wake.



Byabato alikuwa askari shupavu, mkomavu wa mbinu na mkorofi lakini alikuwa mtu wa utani na wale walio karibu nae. Aliwapenda na kuwajali, hivyo hata kuvamiwa kwake alishtuka ni kwanini. Alipogundua kuwa walimshughulikia kwasababu ya siku yake ya kuzaliwa, hata hakuwachukulia hatua za kinidhamu. Hii ilimsaidia kujenga ukaribu na upendo na wanajeshi wengi katika kikosi cha jeshi la anga la Stanza.



“Funga huo mlango vizuri”, Meja Byabato alimwambia mmoja wa wale vijana.



“Sasa sikieni mmetokea wakati mzuri sana. Actually, mliniona nilikuwa nakuja mbiombio kuna kazi inatakiwa kufanyika lakini nikawa nawaza sana nitampa nani au kwa maneno mengine nimuamini nani”, Meja Byabato alianza mazungumzo.



“Kivipi mkuu maana wewe ukitoa kazi kwetu ni amri, si ndo ujeda unavyosema mkuu?”, Mmoja wa wale vijana alijibu kihuni hivi.



Wao na Meja Byabato walikuwa na uhusiano zaidi ya kikazi kwani mbali ya kazi walikutana kila jioni kwenye sehemu yao wanapofanyia mazoezi hivyo walizoeana kutaniana japo waliheshimiana kama kaka na wadogo zake. Meja Byabato akiwa ni mkubwa kwao wote.



“Sio issue ya kazi Majengo, achana na kazi kabisa nataka tuongee kama watoto wa kiume hapa na kama kuna ambalo mtu hatakubaliana nalo basi liishie humu humu. Sawa?” Byabato aliongea.



Waliokuwa wamekaa ni vijana wawili na wawili walikuwa wamesimama upande wa mlangoni. Meja Byabato na yeye alisimama na kukunja mikono na kuzungukazunguka kama mtu aliyekuwa akiwaza jambo. Wale vijana walibaki kimya wakiwa wanamtazama wasijue mkuu wao anataka kuwaambia kitu gani.



Hakika Meja Byabato alijawa na mwazo mengi sana. Alikuwa akiwaza ikiwa awaamini hawa vijana ama la. Je, nini itakuwa madhara kama ikitokea mmoja wapo akakataa kukubaliana na akaenda kuropokwa nje. Alijilaumu ni kwanini hakuwa ameandaa vijana mapema kwa ajili ya jukumu lililo mbele yake mpaka umefika wakati anatakiwa kufanya na hajui nani wa kumsaidia.

Alifikiri mambo mengi kwa haraka na mwisho alijua nini cha kuwaambia na nini asiwaambie kwanza. Alijua awatume nini na nini atakifanya mwenyewe.



“Juma, Shafii sogeeni hapa mezani”, Byabato aliwaita wale waliokuwa wamesimama upande wa mlango wasogee karibu na meza waliyokuwa wamekaa wenzao. Alikuwa tayari kuwaambia kile alichofikiria kuwaambia.

************************************************



Gideon alikuwa katika majonzi makubwa pale aliposhtuliwa na simu yake ikiwa imeingia mlio wa game ya Clash Royale. Alijua lazima atakuwa ni Joe amesoma jumbe zake na kumjibu.



“Sadam, umeniumiza sana na taarifa hizo. Sina cha kusema zaidi ya kumsikitikia Meshack”, but sometimes sacrifices must be made. He did well’’, Joe aliandika.



“Nimeumia sana na hata nimeanza kuogopa. Woga wangu unazidishwa na huu utafutaji waliouanza wa nani kamtuma Meshack. Wataninasa tu!” Gideon aliandika.



“Ni ngumu. Hawakukushirikisha, huo ndio mlango wako wa kutokea. Sasa fuatilia Meshack issue yake imefikia wapi, mipango ya mazishi na kila kitu. He deserves our great respect. He lost his life in the line of duty for our great nation. History will honor him correctly”, Joe aliandika.



“Ni kweli maana watu wengi hujitoa sadaka na kupoteza hata maisha yao kwa ajili ya mambo makubwa ya Taifa lao lakini mwisho wa siku husahaulika na kutukuzwa wale wanaokuja kulifanikisha mwishoni. Lazima tulibadilishe hili…. kama tukifanikiwa lakini”, Gideon aliandika kwa majonzi makubwa.



“Tuyaache hayo, kwasasa fuatilia kwanza ujue kama ni kweli alikufa na mwili wake upo wapi. Lakini kuhusu suala la Ketina mtafute Sara, ukachochee kuni. Chochea kwa akili lakini. Kuhusu Costa kuonana na Macha hilo nalo ni la msingi sana”, Joe aliandika



“Sawa Che. Ila sasa kuwa makini Sylvanus atawasili huko usiku wa leo. He is a monster”. Gideon aliandika.



“Incase I don’t survive, you will tell the tale that I did this for the great good of our nation. If I die, please do pause the mission for now and find another way of starting afresh. But never abort. You can only retreat, but never surrender.” Joe aliandika. Gideon alisoma ujumbe wa Joe na kuona hali ya huzuni na uchungu. Aliendelea kuamini kuwa mtu huyu alitamani kuona mabadiliko ya kweli katika nchi yake.http://pseudepigraphas.blogspot.com/



“Sasa hivi mpo wapi kwani? Habibu anasemaje?”, Gideon aliandika.



“Habibu yupo kamili”, Joe alijibu swali la pili na kuacha la kwanza. Alitoka hewani.



Haraka Gideon alitoka ofisini kwake na kuanza kuelekea ofisi ya Sara, mke wa Rais Costa. Ofisi zake zilikuwa hatua chache kutoka kwenye jengo kuu la Ikulu ya Stanza na ndipo zilipokuwa ofisi za Shirika lisilo la kiserikali linalojihusisha na vijana walioathirika na dawa za kulevya. Shirika linalosimamiwa na Sara.



Alifika kwenye ofisi zile na hakumkuta Sara. Aliuliza yupo wapi na walijibiwa kuwa ametoka ameelekea ofisini kwa Gideon. Gideon aligundua yeye alipitia njia ya nyuma hivyo Sara anaweza akawa alipita njia ya mbele. Alianza tena kurudi ofisini kwake.

*******************************************



Ilikuwa ni jioni iliyokuwa na joto kali siku ile. Rais Costa akiwa anasindikizwa na walinzi wake saba alikuwa akitoka nje ya Ikulu ya Stanza kuelekea ofisi za Idara ya Usalama wa Taifa Stanza.



Nje zilitangulia pikipiki mbili za ving’ora kisha likafuata gari la jeshi kisha likafuata gari la Usalama wa Taifa nyuma yake kulifuata gari la Rais na kisha yalifuata magari mawili ya Usalama wa Taifa na mwisho lilikaa gari la jeshi.



Kwake yeye hali hiyo ilikuwa ni kile wanausalama wa Stanza wanakiita Minor Presidential Convoy, yaani kamsafara kadogo tu kwa Rais kwasababu hakuwa anaenda mbali na eneo Ikulu ilipo.



Kwa kawaida misafara ya Rais Stanza imegawanywa katika makundi makuu matatu. Kundi la kwanza ndilo hilo Minor Presidential Convoy (MiPC), halafu wana Major Presidential Convoy (MaPC) ambapo hapa mbali ya magari mengine mengi ya usalama, polisi na jeshi ni lazima kuwe na magari matatu ya Rais yenye kufanana kabisa ambayo yatakuwa yakikimbia kwa kupishana.



Kundi la mwisho ni lile wanaliita Full Presidential Convoy (FPC). Katika msafara huu, huchukua kila kilichopo kwenye MaPC na kuongezea ulinzi wa anga kama ndege za kivita na Helikopta pamoja na vituo vya wanausalama kila baada ya kilometa 50 katika njia nzima ambayo Rais atakatiza katika safari yake.



Rais Costa aliwasili ofisi za Idara ya Usalama wa Taifa Stanza na kupokelewa kwa heshima kubwa na Sabinasi Paulo pamoja na viongozi wengine wa Idara ile. Bila kupoteza muda, Sabinas alimwelekeza Rais kwenye chumba walichokuwa wamekiandaa kwa ajili ya mazungumzo kati ya Rais Costa na Stanley Macha.



Mlango ulifunguliwa na Rais Costa aliingia.



“Mh. Rais”, Stanley Macha alinyanyuka kwa taabu na kunyoosha mkono ili kumsalimia Rais Costa. Jicho moja la Macha lilikuwa limevimba sana kwa sababu ya mateso aliyokuwa ameyapata kutoka kwa Inspekta Majita.



Rais Costa alimwangalia Macha kwa dakika kama moja hivi bila kupokea salamu wala mkono wa Macha.



“Keti”, Rais Costa alimwambia Macha na wote waliketi.



“Gentlemen, thank you.”, Rais Costa alisema kwa kifupi akiwa na maana ya kutoa amri watu wote waliopo pale waondoke na kuwapisha. Alimtoa nje kila mtu hadi Mkurugenzi wa Usalama wa Taifa, Sabinasi.



“Thank you, Mr. President, for accepting my request to meet me”, Macha alianza kuongea.



“Macha, uniambie yote leo”, Rais Costa aliacha kumjibu Macha na kumtaka amwambie kila kitu.



Macha alivuta pumzi kwa nguvu na kusafisha koo lake, ishara ya kuwa tayari kuzungumza.



‘’Mh Rais, unachoona kuwa ni mpango wa mapinduzi, walioupanga ndo walitaka utokee kama ulivyotokea. Na uliowaweka karibu yako ndiyo watakaokuondoa madarakani’’, Macha alianza kwa kauli iliyomshtua Rais Costa.

**************************************





'Confusion'



“Sikiliza mtangazaji, sisi kama taifa na ninarudia tena, sisi kama taifa hatuwezi na hatutakubali kuhadaika na utawala huu wa Rais Costa. Ajira zinazidi kuwa ngumu kwa vijana wetu, demokrasia inaminywa, magereza yameshajaa watu kwa makossa yasiyo na msingi, chaguzi zetu sasa hivi ni geresha tu kila kitu kinakuwa kimeshaamuliwa na Rais Costa. Katiba yetu sasa hivi inachezewa na kubadilishwa kadiri Rais Costa anavyojisikia achilia mbali hali mbaya ya madawa hospitalini na walimu mashuleni.



Hali ni tete, serikali hii imeharibu uchumi, sekta ya uwekezaji ipo hoi bin taabani. Wawekezaji wa nje na ndani wanakimbia. Wafanyabiashara wanahamisha mitaji na kwenda nchi jirani. Lakini akisimama majukwaani atakwambia uchumi unakua.



Wanapika takwimu hawa, uchumi wa Stanza ukiwa unakuwa kwa kasi sana ni asilimia 3-4 lakini kwenye vyombo vya Habari vya ndani na nje wanaripoti asilimia 9 hadi 10. Costa ameharibu uchumi wa nchi hii na itachukua miaka mingine ishirini kuja kuweka mambo sawa.



Mpaka leo mama zetu wanatembea umbali mrefu kutafuta maji halafu tunagereshwa kwa kujengewa vitu badala ya kustawisha watu na Jamii. Madai ya kujengewa na kununuliwa vitu ni eti ndio matumizi ya kodi zetu, ndugu zangu wanastanza hizo ni laghai tu za Rais Costa kujipenyezea hela za kujinunulia visiwa vya kitalii huko ughaibuni”. Alikuwa ni ndugu Julius Kibwe, kiongozi mkuu wa chama kikuu cha upinzani nchini Stanza akizungumza wakati wa mahojiano katika kipindi cha Tarumbeta la Alasiri, kipindi cha Luninga kinachorushwa na stesheni ya MULIKA.



“Kibwe hilo la Rais kumiliki visiwa vya kitalii tuliache kwanza Mheshimiwa. Ha ha ha!” Mtangazaji alimkatisha Kibwe asiendelee kulitaja suala la Rais Costa kumiliki visiwa vya kitalii ughaibuni.



Alifanya hivyo kwa sababu ya maelekezo kutoka juu kwa wahariri wote wa vyombo vya habari. Maelekezo yale yaliyotolewa katika njia isiyo rasmi yaliwatisha wahariri wa vyombo vya habari karibu vyote vilivyopendelea kuandika habari za Julius Kibwe.



Wahariri wanne wa kampuni ya YETU SOTE inayochapa magazeti matatu yanayoongoza kwa kusomwa zaidi nchini Stanza ikiwamo ‘Stanza Today’ walisimamishwa kazi kwa muda na menejimenti ya Kampuni yao kwa madai kuwa wapishe uchunguzi wa tuhuma dhidi yao kuwa wanakula njama ili kuandika masuala yakayoidhalilisha serikali ya Rais Costa.



Pamoja na amri hiyo kutoka kwa Menejimenti ya kampuni hiyo, kiuhalisia ilitoka Ikulu ya Stanza ambapo maafisa wa usalama waliagizwa kuutishia uongozi wa kampuni hiyo kuwa ikiwa ungeendelea kuchapisha Habari dhidi ya Costa, basi kampuni hiyo ingefungiwa na magazeti yasingeendelea kuchapishwa tena.



Ili kukubaliana na matakwa hayo ya Costa, maafisa waliagiza kuwa menejimenti iwasimamishe wahariri walioonekana kuruhusu kuchapishwa kwa Habari zinazomdhalilisha Rais na kazi zake.



“Kwanini tusiliongelee. Kama ni pesa zetu zinatumika kwa manufaa binafsi ya Rais kwanini tusiliongelee?”, Julius Kibwe alisisitiza wakati kipindi kikiwa hewani



Wakati Kibwe akiwa anasisitiza kipindi kilitoka hewani na kuwekwa matangazo na wakati matangazo yale yakiendelea kulipita tangazo kwa chini kuwa kwa sababu zilizo nje ya uwezo wao kipindi kile kisingeweza tena kuendelea kuruka hewani.



Umma wa wafuatiliaji wa kipindi kile kinachopendwa sana kwa kurusha na kuchambua habari nzito za kitaifa walilalamika na kuanza kupata hamasa ya kwanini Kibwe amezuiwa kuelezea kashfa ile. Wengi walianza kuamini kuwa vyombo vya Habari vinaminywa ili kuficha uchafu na uovu unaofanywa na serikali ya Rais Costa.



Huku nyuma ya kamera katika studio za MULIKA kuliibuka mjadala mzito kati ya Julius Kibwe na wahariri kwanini wameamua kusitisha mahojiano yale. Walimweleza wazi kuwa tuhuma anazozitoa zinamuhusu kiongozi mkuu wa nchi na kuwa haiwezekani wamuache aendelee kumtuhumu bila kuwa na vielelezo pasi shaka.



Mkurugenzi wa Mulika alitoka ofisini kwake haraka na kuelekea studio ambapo Kibwe alikuwa akifanya mahojiano na mtangazaji. Kibwe alipomuona Mkurugenzi alimgeuzia kibao.



“Sasa ndugu Machege Marwa afadhali umekuja. Anayemtuhumu Rais ni mimi ama ninyi? Hapa ni sawa na kuninukuu tu kwani kuna kosa ninyi kuninukuu? Ninyi niachieni mimi hili suala kama ni kukamatwa nitakamatwa mimi na kuhojiwa nitoe ushahidi sio ninyi” Kibwe alikazia.



“Kibwe tunaelewa yote hayo lakini tunakuomba utumie majukwaa yako ya mitandao ya kijamii na mikutano ya hadhara kulisema hilo sisi hatutaweza kukuruhusu. Katika hili hapana” Mkurugenzi Mtendaji alimsisitiza.



“Mnaogopa.Amewafanya nini Costa?” Kibwe aliuliza kwa hasira huku akinyanyuka kwenye kiti tayari kuondoka. Wote walibaki kimya.



“I will take this matter to the parliament”, Kibwe alimalizia na kuanza kuagana na wenyeji wake ili aondoke.



Julius Kibwe alilidhamiria suala hili.

******************************************



“Shemeji yani huwezi amini nimetoka ofisini kwako tumepishana tu njia”, Gideon alikuwa akiongea na Sara alipokutana nae kwenye korido.



Sara alikuwa akiondoka baada ya kugusa mlango wa Gideon na kukuta umefungwa. Wakati yeye akiwa anamtafuta Gideon ofisini kwake na yeye Gideon alikuwa akimtafuta kwenye ofisi zake.



“Haya, ulikuwa unanitafuta kwa lipi shemeji yangu?”, Sara mke wa Rais Costa alimuuliza Gideon.



“Nina mambo mengi Sara, embu tuingie ofisini”, Gideon alimjibu Sara huku akifungua mlango na kuingia na Sara ofisini kwake.



“Kama nilivyokwambia shemeji kuwa nitatafuta ukweli wa suala la Costa kutaka kutalikiana na wewe na kumuoa Ketina. Sasa leo nimepata ‘shocking’ story kuwa anampa ubunge kwa kutumia zile nafasi zake tano za bure na labda atampa uwaziri”, Gideon alimwambia Sara huku akiwasha luninga iliyokuwa imetundikwa pale ofisini kwake.



“Kwa hiyo anamsogeza karibu? Hivi Costa ananijua ananisikia? Sara aliuliza kwa kebehi na ghadhabu.



Kabla Gideon hajajibu luninga iliwaka na habari ya Rais Costa kumteua Ketina kuwa mbunge ndiyo ilikuwa ikimaliziwa kusomwa na Mkurugenzi wa Mawasiliano Ikulu ya Stanza ndugu Alpha Wauwau.

http://pseudepigraphas.blogspot.com/

“Hivi shemeji kumbe unayosema ni kweli?”, Sara alionekana kutoamini kilichokuwa mbele ya macho yake.



“Kwa hiyo shemeji mimi huwa unaona nakudanganya?”, Gideon alimjibu Sara katika muktadha wa kutaka aendelee kumuamini zaidi na zaidi.



“Ule mpango wa kumpindua alionituhumu kuhusika uliufuatilia? Ni wa kweli au ilikuwa tu namna ya kutaka kunipa tuhuma ili aniache? Kina nani wanahusika?”. Sara aliuliza maswali mfululizo. Na hapo alikuwa amekuja kwenye mtego Gideon aliotaka aingie.



“Sasa shemeji suala hili ni nyeti kidogo. Nimelifuatilia na nimeujua ukweli, ndiyo maana hata mimi nakusudia kujivua nafasi yangu kama mshauri wa Rais nirudi zangu Ulaya nikaendelee na mambo yangu maana nisingependa kugeuka kuwa adui wa ‘regime’ mpya”, Gideon alianza kidogo kidogo.



“Regime mpya? What do you mean? Kwani ni kina nani?”, Sara alihoji kwa shauku.



“Ni watu wengi kumbe wapo kwenye mpango huu, lakini kwa nilivyosikia taarifa zilizo chini ya kapeti ni kuwa wanakwama kwasababu hawajapata mtu ambaye yupo karibu Zaidi na Rais, hasa wewe. Inawezekana pia ndiyo sababu Costa anahofia kuwa wewe unahusika. Madai yapo kuwa wangependa uwasaidie na walipanga kwa kusaidia kumuondoa Costa wangekupa nafasi ya kugombea kama Makamu wa Rais katika Uchaguzi mkuu ujao.



Walipanga kuongea na wewe muda mrefu lakini waliingiwa hofu kuwa ingewezekana ukafikisha kwa Rais. Hapo ndo walipokwama. Taarifa hizi nimefikishiwa na watu ninaowaamini, na nimeanza kuziamini.



But anyway, I do not want to be at the middle of all this chaos, so whatever it is, it is nothing of my business, I am going to be abroad anyway.” Gideon alichombeza huku akijitoa kiaina katika mpango ule ili asije kufahamika na Sara moja kwa moja kabla ya kuthibitisha nia yake ya kutaka kushiriki mpango ule.



“Shemeji sikiliza, kuliko mimi kushuhudia Costa ananitaliki na kumuoa Ketina bora aondoke madarakani. Haya madaraka ndiyo yameanza kumpa kiburi. Kitu ambacho sitaweza kufanya ni kusaidia kumuua Costa, kwa sababu ni baba wa watoto wangu, lakini kama ni kuondoka madarakani tu na aondoke.



Siwezi kuvumilia fedheha ya kuachwa na kudhalilika. Unawafahamu wahusika? Nataka kuzungumza nao”, Sara alionekana kukerwa na kwenda moja kwa moja kwenye nia yake.



“Sasa mimi sifahamu kiongozi wao ni nani, lakini pia Sara huu ni mpango hatari. Nisingependa kuwa sehemu ya wanaotekeleza mapinduzi haya. Lakini nikimjua tu basi nitajenga nae mazoea na kukusemea wewe. Lakini shemeji nikuombe kitu kimoja suala hili ni nyeti na ni uhaini kwa mujibu wa katiba ya Stanza ya mwaka 1965, kwa hiyo isije ukajikoroga ukaropoka mbele ya Costa, itakuwa mwisho wa maisha yako, pengine hata na mimi’’ Gideon alijihami.



“Siwezi shemeji, hili ni suala lenye maslahi kwangu, kwako na hata kwa taifa letu. Kwanza nakushangaa unapojitoa na kutotaka kujiunga nao, kwanza usikute Costa amekutuma uniingize mtegoni”, Sara alimjibu Gideon.



‘’Hapana Sara, unafahamu uadilifu na utiifu wangu kwako kwa miaka mingi sasa. Nikutege ili ninufaike nini? Au nitaolewa na Costa baada ya wewe kuachana nae?’’



‘’Mmmh, sawa shemeji. Endelea kunihabarisha’’. Baada ya hapo Sara aliaga ili aondoke.



“Sasa ulikuwa unanitafuta kwa ajili ya nini shemeji?”, Gideon alimuuliza Sara baada ya kuona anaondoka bila kumwambia alikuwa anamtafuta kwa ajili gani.



“Shemeji nishasahau nikikumbuka nitakupigia simu”, Sara alimjibu Gideon akiwa mlangoni akiendelea kuondoka.

*****************************************



“Guys kuna jambo nitataka mnisaidie. Jambo hili niseme wazi sitawaambia lote lakini nitataka kila mtu anisaidie kile tu nitakachokuwa nimempangia na kumuomba. Kitu chenyewe kitakuwa ni nje ya kazi na kitakuwa kinakiuka miiko na maadili ya kijeshi hivyo nataka kusikia kauli kutoka kwenu kama mpo tayari kunisaidia au vinginevyo kabla sijasema lolote”, Meja Byabato aliuliza.



Kulipita ukimya wa kama dakika mbili hivi kila mmoja akishangazwa na kutafakari ni jambo gani Byabato alitaka kuwaagiza na kama wangekuwa tayari kutekeleza watakachoagizwa. Suala kuu lililowaumiza kichwa ni kauli kuwa jambo hilo linakwenda kinyume na miiko na viapo vya kazi zao.



“Niambie”, mmoja alijibu



“Kama na wewe mkuu upo kwenye hilo jambo mi sina shida”, Mwingine alidakia



“Linaweka maisha yetu rehani?”, Kingasi, mmoja wa wale vijana alihoji kwa tahadhari.



“Kazi yako tu yenyewe tayari ishaweka maisha yako rehani. Kinachokutisha ni nini?” Kijana Gwakata Msingazi, aliyekuwa wa kwanza kuitikia alimjibu Kingasi.



“Aaaah sijakusemesha wewe bwana mbona unazingua?”, Walianza kukoromeana.



“We kama unaona noma kumsaidia kufanya kazi na Meja toka nje. Sisi wengine huyu alituokota tukiwa kama Watoto wa mbwa yatima huko mtaani, alituleta jeshini, ametulea na kutufunza hadi tulipofikia hapa leo hii”, Walianza kulumbana.



“Guys, tulieni. Nataka jibu moja”, Byabato aliwatuliza. Walinyamaza



“Nipo tayari mkuu”, mmoja alijibu



“Fresh”, wa mwisho alimalizia.



“Ok. Najua ninyi ni wapiganaji na sio warushaji wa ndege hapa kwenye tawi letu hili la anga. Na nadhani mnajua yapo matawi mawili ya namna hii. Sasa basi, kuna jambo linaweza kutokea siku za usoni na nitataka ninyi mliopo hapa mnisaidie kulizima na kulizuia”, Meja aliongea kwa sauti ya chini lakini ya kuunguruma.



Alikuwa akiongea huku akiwatoea macho wale vijana wake wanne waliokiri utii kwake wa kumsaidia. Alikuwa akiwaambia huku akiwasoma saikolojia yao kama wanakubaliana nae kweli ama anaona woga kwenye macho yao. Kadiri alivyokuwa akiongea alikuwa akiona hawana shaka na hilo hivyo aliendelea.



“Nitaongea na mkuu wa kamandi nzima ya anga kuwa mgawanywe, wawili waende kambi ya milima ya Sempamba na wawili wabaki hapa. Kazi kubwa mtakayofanya ni kujenga urafiki na marubani wa ndege za first responders, hao ndio hasa nataka wakawe ‘target’ yenu. Kwa hiyo mkiwa kule marubani hawa ni lazima wawe marafiki zenu sana, huwa hawazidi watatu kwenye kila kambi kwa hiyo tunao kama sita hivi na ninyi mpo wanne.



Mtakachofanya kutokea leo na kuendelea bila mwisho mpaka hapo nitakapowaambia ni kufatilia nyendo zao. Siku yoyote kuanzia sasa kunaweza kutokea lolote na hivyo first responders wakahitajika kuzuia kwa amri kutoka juu. Mimi nitawapa taarifa na ninyi mtakuwa na kazi ya kuwadhibiti wasirushe hizo ndege. “Meja aliwaambia.



Jeshi la Stanza, kikosi cha anga (Air Wing) kina kambi mbili kubwa, moja ipo jiji kuu la Stanza Peron na nyingine ipo milima ya Sempamba. Kutokana na utaratibu wao wa kijeshi wa kuingia kwenye mapigano ambao wao huuita kwa kimombo ‘Atacking Protocal’, huwa wamegawanyika katika makundi matatu.



Kundi la kwanza huitwa first responders, hizi ni ndege za kivita zinazotumwa eneo la tukio kwa sababu kuu mbili, moja yaweza kuwa kuweka hali ya usalama ama kumpa onyo adui kuwa amezungukwa na hivyo ajisalimishe au aache anachotaka kukifanya. Sababu ya pili yaweza kuwa jeshi la nchi kavu limeelemewa na hivyo linahitaji msaada wa jeshi la anga hivyo ndege hizi huja kwa ajili ya kusaidia wale walio chini.



Kundi la pili ni lile waliloliita ‘second deployment’, hizi ni ndege kubwa kidogo na huja na wanajeshi wengi zaidi na silaha zake pia ni nzito kiasi. Ndege hizi haziwezi kupelekwa mahala bila kujiridhisha kuwa zile za first responders zimeshindwa kurudisha hali ya usalama eneo la tukio.



Kundi la tatu na la mwisho waliliita ‘total destruction’, hizi ni ndege kubwa zaidi ya kundi la kwanza na la pili na mara nyingi hazipelekwi eneo la tukio kama bado askari wao wapo hapo, kwa hivyo askari wote huambiwa wakimbie ama kutoka eneo hilo halafu ndio hizi ndege zinaingia.



Sababu ni moja tu, kama lilivyo jina lake zikifika eneo la tukio zinakuwa na lengo moja tu, kuangamiza kila kilichopo ikiwamo maadui, yaani ‘non-discriminatory bombings. Adui ni ngumu kukwepa pigo la hizi ndege. Hubeba silaha nzito sana za maangamizi.



“Boss, kwani ni issue gani hiyo mbona kama unaonekana ni mpango muovu sana. Kuzuia first responders kurusha ndege katika hali wanayotakiwa kurusha unajua ni hatari sana”, Kabasa alihoji.



“Hakutakuwa na hatari na ndiyo maana nimesema hutakiwi kuzuia tu ni mpaka niwe nimewaambieni maana kutakuwa na sababu maalumu”, Meja alijibu



“Ni issue gani?”, mmoja alikazania aambiwe.



“Siwezi kuwaambia kwasasa nitakapofanikisha suala la kuwahamisha wawili waende kambi ya pili nitakuwa nikiwasiliana nanyi kwa utaratibu maalumu. Ila niseme mpaka kufikia hapa mmeshakula yamini. Yeyote atakayetoa siri hii basi amejiapiza kufa. Tunakubaliana hilo?” Meja aliongea kwa msisitizo.



“Yes Kamanda” wote walijibu kikakamavu ishara ya kukubali amri na kiapo cha utiifu.



“Vipi hiyo misheni ikifeli si ndo tunauawa sasa mkuu?”, Gwakata alichombeza akiwa ameshafikiria mwisho kutokana na njia watakayopita.



“Kwanza ikifanikiwa muwe na uhakika wa kupanda vyeo kwa kasi ya ajabu, nawahakikishia. Ila ikishindikana kama ulivyosema ni mawili ni aidha utokomee kusikojulikana ama utauawa. Lakini nitashangaa sana kama mtafanya misheni hii kijinga namna hiyo mpaka mjulikane. Kama mtu ataona hajui namna gani afanye bila kugundulika basi tutawasiliana”, Meja aliamua kusema ukweli



Meja aliwashukuru na walikumbatiana na kuagana. Kila mmoja alitoka kimya bila kuongea na mwenzake. Maswali yalikuwa mengi yaliyokosa majibu. Mambo yalikuwa mengi muda ni mchache.

***********************************



Mara baada ya Sara kuondoka, Gideon alipumua kwa pumzi nzito. Aliona ni kama ametekeleza sehemu kubwa ya mtihani aliokuwa nao wa kuhakikisha Sara anaigia kwenye mstari.



Haraka aliingia kwenye game na kumpa taarifa zote Joe ili asikie ni hatua gani anatakiwa kuendelea nayo. Ilikuwa ni muhimu sana kwa Gideon kusikiliza ushauri wa Joe kwa sababu ramani nzima alikuwa nayo Joe na Macha na kuwa yeye alikuwa kati kama kiungo mchezaji.



Alihakikisha jumbe zile zimemfikia Joe na yeye alianza kurekebisha ile barua ya majibu ya Rais Costa kwa Rais Chriss wa Marekani.

****************************************



“Mh. Rais nilitaka nikufikishie taarifa hizo. Watu uliowaweka karibu yako, ndiyo watu watakaokufitini na kukuangusha. Inavyoonekana mpango huu ulisukwa kwa umaridadi ili kukugombanisha na watu wako wa karibu uliowaamini na kuchomeka watu wengine ili watengeneze mazingira ya kukupindua Mh Rais, Stanley Macha aliendelea kuongea kwa taabu.



“Umenitesa, umeniumiza pasi kutaka kunisikiliza lakini kwasababu mimi bado nina mapenzi ya kweli kwa taifa langu na utiifu kwako Mh Rais, nimeona bado ninalo jukumu la kukusaidia” Aliendelea kuongea kwa kuanza kumtengeneza Rais Costa kisaikolojia.



Maongezi ya Macha yalianza kuteka hisia za Rais Costa. Alianza kujiona mkosaji kwa kumtesa Macha bila hata kutaka kumsikiliza.



“Mpango wa kukupindua ni ukweli upo wahusika uliowasikia ni hakika tena wapo na wengine ambao nimeona leo nikutajie maana wapo karibu na wewe na kamwe bila kuwadhibiti mapema hutaweza kuwashinda. Mimi niliamua kuwaaminisha kuwa ni sehemu yao ili kuwadhibiti. Kwa bahati mbaya, walio na nia mbaya wamekufanya uamini kuwa mimi ndiye adui, lakini hukusikiliza upande wangu wa hadithi.



Costa, unakumbuka ni mimi niliyezuia jaribio la kwanza la jeshi kutaka kukupindua? Kwanini unahisi kuwa sikushiriki kukamilisha mapinduzi wakati ule ambao nafasi ilikuwa wazi kukuondoa? Macha alisema maneno yaliyomuacha Costa njiapanda.



Lakiki pia maneno yake yalizidi kumtia simanzi Rais Costa, alianza kufikiri pengine Macha hahusiki na hakupaswa kupitia mateso yote yale bila kuwa na hatia. Wanaomfahamu Costa wanajua kuwa ni Rais anayeendeshwa kwa kila aina ya hisia; hasira, furaha, huruma na ukatili.



Na kwa wakati wote, maamuzi yake mengi yalifanyika kwa hisia kuliko mantiki au hata sheria. Alikuwa ni kiongozi aliyejawa na hisia kuliko ufikiri, na watu waliomzunguka na kumfahamu kwa muda mrefu kama Macha walikuwa wanajua jinsi ya kumuingia kwa kucheza na hisia zake.



Ni kitu kibaya sana watu wanaokuzunguka wakikujua unaendeshwa na hisia badala ya kufikiri na mantiki. Hisia ni rahisi kuchezewa lakini ni ngumu kuchezea ufikiri wa mtu.



“Nitajie ni nani anahusika Macha, nitajie ikiwa unataka niamini kuwa wewe huhusiki na mpango huu.’’, Rais Costa wakati huu alionekana kuanza kumuamini Macha na kutaka kumsikiliza.



Macha alikaa kimya kwa muda kidogo kisha akamjibu Rais Costa kwa ufupi, “Gideon…Gideon anahusika na anawafahamu wahusika wengine wote”, Macha alitamka.



Rais Costa alisimama kutoka katika kiti alichokaa kwa mshtuko na kusogea nyuma hatua mbili kutoka kiti kilipo.



Maafisa usalama waliokuwa wanafuatilia muenendo wa kimatendo ndani ya chumba kile, ingawa hawakusikia kilichoongelewa walifungua mlango kwa haraka wakifikiri kuwa Macha amemdhuru Rais Costa.



Walipomkaribia Rais Costa alinyoosha mkono wake juu kidogo kuwataarifu kwa ishara kuwa hakuna lililoharibika na mambo yalikuwa shwari. Costa aliendelea kumuangalia Macha bila kuamini kile alichosikia masikioni mwake.



‘’Gideon!!!!……son of a bitch. I had my reservations about him’’, Costa aliongea kwa sauti ya chini lakini iliyojaa ghadhabu kuu na kuanza kuondoka mule chumbani bila hata kumuaga Macha.

*********************************************







Misheni Imevurugika





Gideon alikuwa kwenye ofisi yake akiendelea kuandaa ile barua ya majibu ya Rais Costa kwa Rais Chriss wa Marekani. Alikuwa akiweka sawa yale marekebisho aliyopewa na Rais Costa ili ikae kama Rais Costa anavyotaka. Hakuwa na wasiwasi wala kuelewa kinachoendelea. Hakujua kama Macha anaweza kumtaja moja kwa moja kwa Rais Costa.

http://pseudepigraphas.blogspot.com/

Gideon alikuwa kama kiungo aliyewekwa kati na Joe na Macha, yeye alikuwa akitumika tu na wala hakuwa akiujua mpango kamili umekaaje na unaendaje. Joe na Macha pia waliaminiana tu hakuna aliekuwa akijua nia au dhumuni la dhati la mwenzake kushiriki mpango ule. Walikuwa wakijua dhumuni la pamoja tu kuwa wanaitaka Stanza mpya lakini nini kimewasukuma haswa waitake Stanza mpya hilo kila mmoja alibaki nalo moyoni mwake.



Ukweli ni kwamba mbali ya Joe kuitaka Stanza mpya kilichomsukuma zaidi ni hasira na kisasi kwa mambo aliyotendewa na Rais Costa. Hivyo kwake yeye hata kama Stanza mpya isipopatikana ilikuwa ni lazima Rais Costa ang’oke kwa njia yoyote ile, japo kama mwanadiplomasia mbobezi alitamani itokee bila umwagaji damu.



Yeye Macha alibaki kuwa fumbo, mbali ya nia ya pamoja hakuna aliejua kinachomsukuma kwa hakika na kama kweli alikuwa na nia ya dhati ya kumng’oa Rais Costa ama alikuwa kazini. Watu wa usalama wa Stanza ni hatari sana.



Gideon akiwa amekaa anamalizia kuandaa yale majibu ya Rais Costa akili ilimtuma kuwasiliana na Meja Byabato. Aligundua kuwa tangu alipofanikiwa kumpa ile ‘code’ ya Sienta-Go hajawahi kumrudia kumuuliza nini kinaendelea. Alishika simu yake ya mkononi na kumpigia.



“Meja, salama mkuu?”, Gideon alimsalimia meja Byabato



“Gideon, salama hapa kweli? Meja alimjibu Gideon akionyesha wasiwasi wake wa njia aliyotumia Gideon kuwasiliana nae.



“It’s a secure line Meja” Gideon alimtoa wasiwasi



“It all depends it is secure to whom’’. Please, let us meet in person as we did last time” (Inategemea ni salama kwa nani. Tafadhali tuonane uso kwa uso kama tulivyofanya mara ya mwisho). Meja alimjibu Gideon na kukata ile simu.



Gideon aliingia kwenye mtandao wa WhatsApp na kumuuliza Meja waonane wapi. Meja Byabato alimtajia eneo na walikubalina wakutane usiku wa saa mbili eneo hilo wapate kinywaji na kujadili mawili matatu.

****************************************



Joe na Habibu walikuwa bado nchini China katika jiji la Beijing. Waliishi eneo la Beixinqiao. Eneo hili lipo katikati ya mtaa wa Yonghegong na Dongzhimen. Ni eneo liliojaa migahawa mingi, baa na viwanda vya bia lakini pia ni eneo linalokaliwa na wageni wengi kutoka mataifa mbalimbali waliopo China kikazi.



Habibu alijitahidi sana kumdodosa Joe ni kwa namna gani alipata chumba kile walichokuwa wakikaa kwasababu hata hati zao za kusafiria zilishaisha muda wa wao kuwa nchini China. Isitoshe wao walikuwa wakitumia hati za kusafiria za kidiplomasia na ukweli walipo hata ubalozi wa Stanza nchini China haufahamu.



Habibu alijitahidi kumwelewesha Joe kuwa kwa wakati huo kama ubalozi wa Stanza utakuwa umetoa taarifa kwa serikali ya China basi watakuwa wapo hatarini lakini pia alitaka aambiwe nini kinaendelea na wataishi maisha hayo kama ya digidigi mpaka lini. Maisha ya kujifungia ndani muda wote bila uhuru yalianza kumchosha Balozi Habibu.



Muda mwingi Joe alionekana akiwa ‘busy’ na simu akifanya mawasiliano ya hapa na pale akipata taarifa na mirejesho kutoka kwa Gideon lakini pia akiwasiliana na mkewe Elizabeth huku akifuatilia kwa ukaribu taarifa za habari za ulimwengu.



“Habibu mdogo wangu, nimeanza kuwa balozi kwa kuiwakilisha Stanza miaka kumi kabla ya wewe kupewa ubalozi. Najua taratibu za kidiplomasia, nyumba hizi tunazokaa si vyema sana nikakwambia ninazipataje kwasasa lakini fahamu kuwa kabla ya mimi kuhamishwa ubalozi na kwenda kuiwakilisha Stanza nchini Urusi, nilishakaa hapa China kwa miaka saba.



Hiyo itoshe kukuonyesha kuwa hapa tulipo, kwangu ni sawa na Stanza. Nina marafiki, nina ‘connections’ hivyo toa mashaka. Jambo la pili mdogo wangu ni kuwa nimefuatilia kutoka kwa watu wangu wa karibu hapa China wamenihakikishia kuwa Stanza wala Balozi Kimweri hajapeleka shauri lolote kwa serikali ya China ya sisi kutafutwa la sivyo tungeshakuwa tumekamatwa. Unadhani jambo hilo linaashiria nini?”, Joe alimalizia kwa kumuuliza Habibu.



“Maana yake Rais Costa anataka kutumaliza kimya kimya”, Habibu alijibu.



“Exactly, na ndio maana nataka uwe na moyo wa ushujaa. Tumekaribia kuimaliza safari japo bado siuoni mwanga. Nilikuuliza kama unataka tukusalimishe kwa Rais Costa kama mwenzako Pius ukakataa sasa, hang in there. We will be fine’’. Joe alimalizia kumpa risala fupi Habibu.



Walimalizia kuzungumza na walikubaliana watoke waelekee kwenye baa ya jirani ili kwenda kupata bia mbili tatu.

*****************************************



Bwana Zhang Wei na Bibi Whang Xiu Ying ni raia wa China. Ni moja ya wafanyabishara wakubwa wa China wenye kampuni zao na biashara zao nyingi barani Africa. Kuanzia miaka ya 2000 wakati China alipoamua kwa dhamira moja kuingia kwa nguvu na kuwekeza kwenye bara la Africa, Zhang na Whang walikuwa ni wafanyabiashara wa awali kabisa kuanza kuwekeza sana nchini Stanza.



Zhang aliwekeza zaidi kwenye viwanda vya kusindika matunda ili kutengeneza juisi, viwanda vya nyuzi na mbolea. Bi Whang yeye aliwekeza zaidi kwenye teknolojia na miundombinu na kwa hakika walitajirika vilivyo kutokana na uwekezaji huo kwenye nchi nyingi za Afrika hasa Stanza.



Wakati maazimio ya China kuingia Africa chini ya utawala wa Rais wa China Kamaradi Hu Jintao yakiafikiwa miaka ya 2003, Joe alikuwa ni Afisa wa ubalozi wa Stanza nchini China. Stanza ikiwa chini ya utawala wa Rais Jonathan Edward ilikuwa na hofu ya kuwakubali Wachina sawa na nchi nyingi za Afrika.



Japo ni ukweli kwamba mahusiano ya China na nchi za kiafrika yana mizizi mirefu ya enzi lakini propaganda za nchi za kimagharibi zikiongozwa na Marekani ambayo kwa wakati huo ndiye alikuwa mshirika mkubwa wa kibiashara na Afrika zilisababisha viongozi wengi wa nchi za Afrika kuingiwa na hofu na ujio wa China kwa kuhofia kupoteza urafiki na Marekani.



Joe akiwa afisa mdogo wa ubalozi wa Stanza huko China alichangia pakubwa kufanikisha Zhang na Whang wanapata fursa ya kuwekeza nchini Stanza. Ni Joe pia alishiriki kama kiungo muhimu wa kumsaidia aliyekuwa balozi wa Stanza nchini China wakati ule ndugu Benson Rwengereza kutengeneza daraja zuri la kuhakikisha China inaingia Stanza na kuwekeza na hivyo kuleta manufaa kwa Wanastanza.



Ni katika mahusiano hayo ya Zhang na Whang waliendelea kuwa marafiki wakubwa wa Joe kiasi kwamba ilifikia hatua hawakuwa tayari kumuona Joe akipata shida kwani alikuwa na mchango mkubwa katika mafanikio yao.



Baada ya sakata la Pius kusaliti kambi ya Joe, ilibidi awasiliane na marafiki zake hawa. Aliwaeleza kuwa yupo nchini China kwa muda kidogo kwa mambo ya kidiplomasia na masomo hivyo aliwaomba wamsaidie nyumba ya kuishi kwa mwezi mmoja mpaka mitatu.



Wafanyabiashara hawa walikuwa na nyumba nyingi katika miji tofauti tofauti. Nyumba hizi zilikuwa za kibiashara hivyo ombi la Joe lilikuwa ni dogo sana kwao. Walimruhusu kukaa na kumwambia popote watakapokuwa wanakwenda kama kuna nyumba zao basi watakuwa tayari kumpa makazi Joe.



Isitoshe, walikuwa wakigharamia chakula na huduma zote ambazo Joe alikuwa akihitaji. Joe alishawasababishia utajiri mkubwa na wao walikuwa wakimwambia kwa kichina Women méiyou shé me keyi huíbào ni de yaani hawana cha kumlipa Joe.

*********************************************



Rais Costa alisikia kuchanganyikiwa alipotajiwa kuwa Gideon anahusika kwenye mpango wa kumpindua. Alishindwa kuelewa inakuwaje mtu anaemwamini kiasi kile anaweza kuwa anapanga njama kama zile. Lakini alianza kuunganisha nukta baada ya kukumbuka suala la Meshack kumvamia Sylvanus. Akipata jibu ni nani atakuwa amewasiliana na Meshack, alimwamini Macha. Rais Costa alitaka kutoka kwa hasira.



“Costa unakwenda wapi”, Macha alimwita Rais Costa kwa jina lake bila kutanguliza heshima yoyote.



“Huyu mshenzi Gideon hawezi kunichezea namna hii”, Costa alijibu huku akibonyesha kitufe kinachowapa ishara vijana kuwa wafungue mlango anataka kutoka.



“Sylvester, unarudia kosa lilelile ulilonitendea mimi, kutaka kuchukua maamuzi bila kutafakari”, Macha alimwambia Rais Costa.



“Macha usinitukane, I am your president! Ina maana Stanza inaongozwa na kichaa? Unaniambiaje nafanya maamuzi bila kutafakari?”, Rais Costa alimfokea Macha.



“Samahani Mheshimiwa Rais lakini nakuomba uketi sijamaliza kukwambia ninayotaka kukwambia”, Macha aliomba radhi. Alikumbuka kuwa anaongea na mkuu wa nchi hivyo alipaswa kuongea nae kwa nidhamu.



“Mh. Rais, Gideon ni kiungo tu wa mpango huu ambaye nilikwishamng’amua lakini wapo wengine, nina uhakika na kama nilivyoshughulikia suala la jeshi kutaka kukupindua na kuhakikisha ninang’oa mpaka mizizi suala hili pia latakiwa kushughulikiwa hivyo kwasababu bado wewe na mimi hatujui limejichimbia mizizi kiasi gani.



Masuala haya kwa sisi watu wa usalama tunashauri usiyapeleke kwa pupa, ni mambo nyeti na pengine yamepangwa kiustadi na labda hata kuna mkono wa nje. Gideon si mtu wa kumchukulia hatua bali ni mtu anayepaswa kutufanya tuwajue wengine kwenye mpango huu’’, Macha alipumzika na kumeza mate.



Wakai Macha akiongea Rais Costa alikuwa akimkodolea macho kwa umakini huku akitafakari mambo mengi. Alikuwa akiunganisha nukta kichwani lakini ni kama muunganiko ulikuja na kukata, yaani tungeseama alikuwa akiwaza maruweruwe kwasababu ya taarifa nyingi na mchanganyiko anazoendelea kupokea kuhusu jaribio la mapinduzi.



Hoja ya Macha kutaka kujua mzizi wote wa wanaotaka kumpindua ilimwingia, hoja ya kutomgusa Gideon alisita kidogo. Hoja ya Gideon kuhusika nayo ilikuwa ikisumbua kukubalika kweye ubongo wake lakini akikumbuka suala la Meshack ni kama anaielewa hoja ile. Hakika alianza kutoka jasho pasi kujijua.



“Umejuaje kama Gideon anahusika, mbona ni yeye aliyeomba mimi kuonana na wewe?” Rais Costa alihoji.



“Hajui kama mimi najua na imekuwa vyema kuwa hivi, lakini hivi karibuni utafahamu kwanini anahusika”, Macha alijibu.



“Siyo kwamba siamini, naamini sana kwa sababu hivi ninavyoongea na wewe yule kijana wako Meshack amemvamia Sylvanus tuliyemtuma kwenda kumdhibiti Joe na hakuna aliyekuwa anajua mwingine zaidi yangu na Sabinas isipokuwa siku nilipokuwa ninasaini ile ruhusa ya Joe kuuawa Gideon alikuwepo ingawa sina hakika kama aliona, hivyo bado napata shaka sana”, Rais Costa alifunguka mazima kwa Macha.



“Meshack alifanikiwa kumdhibiti Sylvanus?”, Macha alihoji ili apate kujua nini kiliendelea kwa kuwa habari hiyo hakuwa ameipata.



“Nadhani Sylvanus alimuua Meshack japo bado sijapata taarifa sawasawa”, Costa alijibu.



Macha aliposikia juu ya uwezekano wa Meshack kuwa ameuawa alishtuka kwa ndani ndani. Aliumia sana. Meshack alikuwa ni kijana mwaminifu na kipenzi wa Macha, na ikiwa ni kweli ameuawa basi ni wazi ni pigo kwa kambi yao ya mapinduzi.



“Ndiyo maana nakushauri Mh. Rais utulie nilishughulikie hili suala mpaka mwishowe. Ni wazi basi hata Meshack alikuwa akihusika na sasa nadhani unanielewa ninavyosema mpango huu ni mkubwa. Sabinasi peke yake kamwe hawezi kuujua kwa undani na kwa haraka kama mimi niliyekwishaanza kuufatilia”, Macha aliongea kwa shida maana mdomo wake ulikuwa umevimba.



“Macha sitaweza kukaa na kutazamana na Gideon. Sitaweza”, Rais Costa alijibu kwa hasira.



“Hata mimi sikutaka nikushauri hivyo. Ipo Sehemu nzuri ya kumuweka Gideon ambayo nitapata nafasi ya kufuatilia nyendo zake kwa ukaribu”, Macha alimwambia Rais Costa.



“Wapi Macha? Wapi nimuweke ambapo sitapata hasira kila nimwonapo na uniambie ni baada ya muda gani utakuwa umeweza kugundua wahusika wote ili niwachukulie hatua” Rais alihoji kwa hasira.



“Gideon ni mbobevu wa masuala ya Sayansi ya Siasa ni mtu mwenye weledi sana wa uongozi, mimi nilikuwa nadhani mteue awe Katibu Mkuu wa Chama chetu cha Ukombozi Stanza. Kwa uchapakazi wake huko atakusaidia sana kuleta mapinduzi na wanachama wa kutosha nadhani unajua mipango mikakati yake kisiasa Mh. Rais”, Macha alishauri.



“Unasema nini wewe? Yani mtu anaepanga kunipindua nikampe utendaji mkuu wa chama?”, Rais Costa aling’aka.



“Mh. Rais kwenye chama kuna viongozi wengi na hawezi kufanya lolote la ajabu. Lengo langu la kukwambia umpeleke kule ni mawili. Mosi, nataka umtoe karibu na serikali ili kama kuna watu huku anaoshirikiana nao akose muunganiko nao, lakini pia kama wataendelea kuwasiliana basi watakuwa wakitumia simu ambazo mimi nitaanza mchakato wa kuzifuatilia. Sababu ya pili ni kutaka asione ametupwa nje na hivyo kukatisha mpango ama kumwachia mtu mwingine ambaye itanichukua muda kumtambua hivyo nataka ajione ni sehemu ya utawala wako mpaka pale tutakapomaliza kuwajua washiriki wote.



"Wewe una uwezo wa kuteua leo na kutengua kesho, una wasiwasi gani?”. Macha alisisitiza



Rais Costa alibaki kama dakika mbili akimtazama tu usoni Macha. Hesabu zilikuwa zikikataa kubalansi lakini alikuwa hana namna. Kwake Macha alikuwa ni mkweli kwa wakati huo.



Walizungumza na kukubaliana mengi na Macha. Macha alimwambia Rais Costa hataki kurudia nafasi yake ya Ukurugenzi wa Idara na hivyo amruhusu Sabinasi aendelee ila yeye ataimaliza hiyo kazi maalumu ya kuhakikisha anawaweka hatiani wote wanaoshiri kwenye mpango wa kumpindua Rais Costa kisha atastaafu. Aliomba kijana wake Daudi wa mambo ya mawasiliano nae aachiwe huru na kutaka wapewe ruhusa ya kufikia baadhi ya vitu ili vimrahisishie kazi.



Rais Costa alikuwa ni mtu rahisi kujazwa upepo na kujaa, alitawaliwa na hisia kuliko mantiki na hivyo alikubaliana na Macha kwa yote. Alisikitika sana kwa kitendo chake cha kumtesa bila kumsikiliza. Alimbembeleza pia kama akitaka aendelee na Ukurugenzi wa Idara aseme lakini Macha alishauri kuwa wakati wake wa kutumikia nafasi hiyo umefikia kikomo.



Alimwambia kwa yaliyotokea anawachia tu wadogo waendeleze gurudumu na kuwa kazi hiyo ya kumuweka Joe, Gideon na wengine wote wanaohusika na mpango ule haramu itakuwa kazi yake ya mwisho, ama kwenye lugha ya kigeni wanasema ‘Last assignment’.



Rais Costa alitoa ishara kuwa mlango ufunguliwe na alitoka akiambatana na Macha wakitembea taratibu kuelekea nje. Kagiza kalikuwa kameanza kuingia kwa mbali.



“Pius anaendeleaje? Amesharejea?”. Macha alimuuliza Rais Costa.



“Yes, infact we had a discussion with him and General Ndutta that shortly, he will succeed Ndutta as our new CDF” (Ndio tena nilikuwa na mazungumzo nae yeye na Jenerali Ndutta kuwa wiki chache zijazo nitamteua Pius kama mkuu wetu wa majeshi ya ulinzi na usalama kurithi mikoba ya Ndutta) Rais Costa alimjibu Macha.



“Ni jambo sahihi. Pius ameonyesha uaminifu mkubwa. Angeweza kukubaliana na Joe na kazi ingekuwa kubwa zaidi. Kwa hivyo ni lini utamtangaza”, Macha alihoji.



“Well, I told General Ndutta when he is comfortable, and transition plan is in place they will let me know. I did not want him to feel that this is a forced retirement. He served this country with honor and loyalty and he deserve to be treated as such”



(Nilimwambia Jenerali Ndutta siku akiwa tayari ataniambia. Unajua sikutaka aone kana kwamba ninamlazimisha astaafu. Ameitumikia nchi hii kwa mapenzi na uaminifu mkubwa na anapaswa kufanyiwa hivyo), Rais Costa alimjibu Macha huku wakiwa wamefika mlango wa kutokea nje.



Wakiwa wanasindikizwa na Sabinasi pamoja na walinzi wa Rais walikuta tayari msafara wa Rais umeshajipanga tayari kwa kuondoka.



“Sabinas, Macha amerudi kwa kazi maalumu. Tafadhali mpe ushirikiano wowote atakaohitaji”, Rais Costa alikuwa akimpa maelezo Sabinas Paulo anayekaimu nafasi ya Macha kwa wakati huo katika Idara ya Usalama wa Taifa Stanza.



“Sawa mkuu. Ni bosi wangu bado huyu. Ha ha ha!” Sabinas aliitikia kwa kujichekesha kinafiki.

Macha alimkata jicho la chini chini kwani alijua fika kicheko kile ni cha kinafiki mbele ya Rais.

Rais Costa aliagana na wote na kuingia kwenye gari na kuondoka kurudi Ikulu ya Stanza pale jiji la Peron

*****************************************



Jioni ya siku hiyo kama walivyokubaliana Gideon na Meja Byabato walitafutana ili waonane na kuongea.



“Meja hebu niambie kinachoendelea kwa upande wako maana mimi nipo tu kati kati natoa taarifa huku napeleka huku sasa hali hii siipendelei sana. Nataka kujua kinachoendelea kila upande”



“Gidi mbona mimi sikuwa najua kama wewe ndio utaniletea ile code? Mambo haya huenda kwa namna hii, unachotakiwa kufanya ni kutimiza wajibu wako na kumwachia mwingine atimize wake. Wewe hujasomea masuala haya ya usalama lakini ni kitu cha kawaida kabisa hiki”



“Sawa Meja naelewa lakini sasa nisichoelewa ni kama tunakaribia mwisho, tupo katikati ama tumeshashindwa kwa sababu unakuwa huelewi nini kinaendelea wapi”



“Hilo lisikusumbue kichwa Gidi. We fahamu kuwa nilichotumwa nimeanza kukitekeleza. Mambo haya hufanyika hivi ili kuzuia kama kuna anaetaka kuharibu ama kuwachomea wenzake asipate ushahidi ama kuzuia mpango mzima. Mfano mimi nilikuwa namjua Macha tu na nimekujua na wewe kwa sababu umeniletea lile neno la siri. Hivi ndivyo hutakiwa mambo kuwa tunakwenda kwa alama, ishara na maneno ya siri”



“Sasa kwa mtindo huu nitashindwa kukuuliza nilichotaka kukuuliza Meja”



“Jambo gani Gidi? Niulize”



“Yule kijana aliekuwa akimlinda ‘Eagle’ inasemakana ameuawa, sasa natafuta wa kunihakikishia taarifa hizo nakosa”



“Vijana wengi wanamlinda ‘Eagle’, nawajua baadhi maana sipo sana huko kwenye mambo ya Idara ya Usalama sasa sijajua unamwongelea nani”



“Kuna yule alikuwa mrefu hivi kama wewe mweusi karibu mfanane weusi. Ha ha ha”



“Unamaanisha Meshack?” Meja Byabato alihoji.



“Huyo huyo. Nimesikia ameuawa sasa sijaelewa kwenye mazingira gani na sijui nimuulize nani, mimi na Sabinasi hatuelewani kabisa hivyo siwezi kumuuliza suala lolote”, Gidieon alimwambia Meja Byabato.



“Ameuawa? Kauawaje tena…ngoja nimuulize huyu…” Meja Byabato alihoji kwa kushangaa huku akitoa simu yake ya mkononi na kuanza kumpigia mtu ambae Gideon hakumfahamu.



Eagle ni neno wanalotumia watu wa usalama kumuita Rais Costa. Meja Byabato japo hakuwa akijua mengi ama kujuana na wengi katika idara ya usalama wa Taifa Stanza lakini kutokana na urafiki wake na Stanley Macha aliweza kujuana na wachache, Meshack akiwa mmojawapo.



“Kwa hiyo unasema mwili wake haukuonekana pale Casino? Sasa hapakuwa na Camera kule vyooni?..........Aisee basi sasa endelea kufatilia, utanijuza kamanda huyu kijana wetu bwana si unajua tena sisi watu wa mazoezi vijana kama hawa ndio wetu hawa” Meja Byabato alimaliza kuongea na ile simu.



“Ni kuwa ninasikia Meshack alipambana na kijana anaitwa Sylvanus huko Casino sasa inavyoonekana alishindwa nguvu na Sylvanus alitoa taarifa kuwa amemuaa lakini sasa wao walipofika pale hawakuukuta mwili wa Meshack hivi wanafatilia upo wapi na wameshikilia uongozi wa ile Casino”, Meja Byabato alikuwa akimpa mrejesho Gideon.



Gideon alianza kupatwa mashaka sana juu ya nini kimempata Meshack. Je yupo hai, amekufa ama nani aliuwahi mwili wake na kuupeleka wapi. Hakutaka kuuliza mengi waliongea na Meja kwa muda mchache kisha waliagana.

****************************************



Rais Costa aliingia Ikulu ya Peron akiwa na mawazo mengi sana. Alikuwa kwa hakika haelewi nini kinaendelea kwenye utawala wake, alikuwa hana hakika amuamini nani. Alikuwa akitembea kwenye korido za Ikulu akielekea kwenye makazi yake huku akisindikizwa na walinzi wawili.



Akiwa anapiga hatua simu yake ya mkononi iliita na alikuwa ni Sabinas Paulo akipiga.



“Mh. Rais nimejikaza lakini nimeshindwa nimeona nami niwahi kukupa tahadhari kabla hujatekeleza jambo lolote”, Sabinas alianza maongezi.



“Unasema nini Sabinas?”, Rais Costa aliuliza kwa wasiwasi.



“Kwanza unisamehe kwa kukiuka utaratibu na kuwa nasikiliza maongezi yako na Macha ya faragha. Ila nimeona uongo mkubwa wa Macha ulioniachia mashaka makubwa juu ya alichokuambia. Macha anakuchezea akili Mh. Rais”, Sabinas alikazia.



“Kwanini unasema hivyo? Wakati mpaka sasa hujajua ni nani alimtuma Meshack kumvamia Sylvanus na alijuaje. Kwanini nisimuamini Macha?”, Rais Costa alihoji mfululizo.

http://pseudepigraphas.blogspot.com/

“Mh. Rais sijakataa kuwa labda Gideon hayupo kwenye mpango huu lakini nashawishika kabisa kuwa hata Macha yupo na wote wanakuchezea akili. Inakuwaje Gideon alikuwa akikubembeleza sana uonane na Macha? Huoni kama ni mpango huu Rais wangu?”



“Na kama wote wapo kwenye mpango, kwa nini Macha amtaje mwenzake?” Rais Costa alihoji.



“Kwanini akuzuie kumuwajibisha? Kwanini akusihi umpange utendaji mkuu wa Chama? Mh. Rais think deeply”, Sabinas alimsihi Rais Costa.



Rais Costa alibaki kimya kwa dakika kadhaa akitafakari sentensi zote za Sabinas. Alijitahidi kuchekesha akili ikae sawa.



“You are probably right Sabi, Macha is fooling around, bastard! Do not provide him with any access till tomorrow”, Rais Costa alimpa maelekezo Sabinas na kukata simu.



Rais Costa aliendelea kuchanganyikiwa kwa mawazo mgongano kila baada ya muda mchache.

**************************************



Wakati Stanza ikiwa ni jioni ya saa mbili usiku katika jiji la Beijing China ilikuwa ni alasiri ya saa tisa. Joe na Habibu wakiwa amekaa kwenye moja ya baa umbali mchache tu kutoka kwenye nyumba wanayoishi aliwaona watu wenye asili ya Afrika wengi wakiwa nao wanapata kinywaji maeneo yale.



Habibu akiwa hana lile wala hili mwenzake Joe alikuwa akipepesa macho sana kama mlinzi. Ilikuwa ni kawaida yake pindi anapokuwa nje ya nyumba kukaa kwa tahadhari kubwa. Akiwa anapepesa macho ghafla alimwona kijana kwa mbali akikatiza huku akimtupia jicho.



Joe, alikazana kumwangalia vizuri lakini kijana yule alijichanganya na watu wengine hivyo hakuweza kumwona vizuri. Akili ya Joe ilianza kwenda kwa kasi sana katika eneo lake la ubongo kitengo cha kumbukumbu ili kung’amua mtu yule amewahi kukutana nae wapi, kwa kingereza tungesema ni ‘memory searching’.



Haraka Joe alishtuka baada ya kukumbuka kuwa amefanana na picha moja wapo aliyowahi kutumiwa na Gideon. Haraka alichukua simu yake na kuanza kupekua kwenye picha alizokuwa nazo. Hakuamini alipokuta sura ile inafanana na sura ya picha aliyotumwa na Gideon na kuambiwa huyo ndiyo Sylvanus.



“Habibu be prepared. Tunaondoka”, Joe alimwambia Habibu kwa haraka.



“Kuna nini?”, Habibu alihoji kwa hofu akijua labda wanakuja kukamatwa.



“Ni kama nimemuona Sylvanus”, Joe alimwambia Habibu huku akimpa ile simu ili aangalie ile picha.



“Haiwezekani, amejuaje kama tupo hapa Joe. Ngoja na mimi apite nimuone”. Habibu alimjibu Joe baada ya kuangalia ile picha na kuanza kupepesa macho taratibu kuzunguka lile eneo.



Wakati akizungusha kichwa huku na kule kwa kasi ya ajabu yule kijana alikatiza tena kurudi eneo alilotokea huku akiwakata jicho kina Joe.



“Holy shit, he is the one. Sylvanus is here. Tunafanyaje Joe?”, Habibu alishtuka na kuongea kwa kutetemeka.



“I honestly do not know. Tayari tumeshaingia kwenye ‘target’ yake na nina hakika tumezungukwa na wenzake. My God!” Joe kwa mara ya kwanza alionyesha woga wa Dhahiri.





Simanzi



Usiku ule haukuwa mzuri kwa Rais Costa, alilala usingizi wa mang’amung’amu. Mawazo yalijaa akili yake na kila alipopata usingizi kidogo basi aliota kuwa anapinduliwa. Hofu ilizizima moyoni, hakuwa akijua amwamini nani, na nani ni adui yake. Akiwaza maneno aliyoambiwa na Sabinas anaona yana mantiki lakini pia alichoambiwa na Macha aliona kina mantiki vilevile.



Hakupata suluhu au kuelewa afanye nini kuzuia hali ile ambayo alianza kuona ipo nje ya uwezo wake. Mtu pekee wa karibu yake ambaye angeweza kumshauri na aliyemuamini ni Gideon na sasa anahusishwa na mpango huo muovu dhidi yake na serikali ya Stanza.



Mke wake, Bi Sara alikuwa ni mfariji mkuu kwa miaka mingi, lakini uwepo wa Ketina na mkewe kuhusishwa na mpango wa mapinduzi uliwaweka mbali kwa kiasi fulani. Walipofika chumbani, kila mtu hakumsemesha mwenzake ingawa wakitoka nje mbele za watu wanaonekana kutabasamu na kucheka pamoja. Ndoa zina siri nyingi.



Rais Costa alijilaza kitandani usiku kucha akisubiri kesho yake atakapouona uso wa Gideon, angemuangalia kwa namna gani. Lakini je, ataweza kustahimili kuficha hisia zake Gideon asijue kama anamshuku kwa lolote kama alivyoambiwa na Macha?



Wakati huo huo alifikiri angemrudiaje Macha kumkatalia mapendekezo aliyotoa wakati alishayakubali na, ni vipi ikiwa Sabinas anampotosha na akapinduliwa, atajutia kutosikiliza ushauri aliopewa na Macha? Hakika Rais Costa alipoteza uwezo wake wa kufikiri na kuchanganua masuala baada ya wiki chache tu za misukosuko ya mapinduzi.

*********************************



Kama Sabinasi alivyoelekezwa na Rais Costa kuwa asimuwezeshe Macha kufikia taarifa na vifaa vyovyote hadi hapo atakapoongea nae tena kesho yake, alifanya hivyo. Hata hivyo Macha hakuomba kupewa ushirikiano wa suala lolote zaidi ya kuomba simu yake ya mkononi ili awasiliane na mkewe.



Macha hakutaka kurudi nyumbani kusalimia familia japo aliikumbuka sana maana likuwa bado na uvimbe usoni kutokana na mateso. Hakutaka kuishtua familia yake kwa kumuona katika hali ile hivyo alitaka tu awasiliane na watoto na mkewe na kuwataarifu kuwa yupo salama na ana kazi itakayomchukua muda kidogo hivyo wamvumilie.



Familia za watu wa usalama huelewa mambo kama haya. Mzazi aweza kutoweka nyumbani hata kwa miezi mitatu kwa kazi maalumu hivyo kwa Macha alitaka asirudi mpaka ahakikishe amepona vidonda na uvimbe wake wote. Aliwasiliana na mkewe kwa njia ya simu ya kawaida. Alifanya hivyo kusudi akijua fika simu zake zitakuwa zikifuatiliwa na alitaka atengeneze mazingira ya yeye kuonekana kile wazungu wanakiita ‘free soul’.



Baada ya hapo alipakua ‘game’ ya clash royale haraka na kuingiza nywila (passwords) zake ili kuweza kujiunga na Gideon na Joe.



“Che, Saddam, Tiger hapa najua tuna mengi ya ku ‘catchup’, lakini la muhimu nijue yafuatayo. Che upo wapi na kama upo salama. Sadam uliweza kuwasiliana na Meja?” Macha aliandika na kusubiria jibu.



Macha akiwa kwenye nyumba moja wapo ya Usalama wa Taifa Stanza alikuwa amepelekwa huko kupumzika. Alisubiri kama dakika kumi na tano na hakuna aliemjibu.



“Tiger, nilifikisha ujumbe na kanihakikishia anaufanyia kazi. Mambo yaliyotokea ni mengi. Kijana alizidiwa nguvu na mpaka sasa yamkini ameshafariki. Umeongea nini na Eagle?”. Alikuwa ni Gideon akijibu kwa shauku ujumbe ule kutoka kwa Macha huku akiwa nyumbani kwake.



“Nimesikia taarifa za kijana nitazifanyia kazi. Nimeumizwa sana. Che ni lazima aseme kama yupo salama kwasababu jamaa wakishafika China na wakifahamu Che alipo, tutampoteza tusipokuwa makini. Kuhusu nilichoongea na Eagle, Saddam uwe na moyo mgumu na lazima ujionyeshe kuwa hujui kinachoendelea.



Nimemwambia mpango huu ni hakika na kweli na kuwa wewe unahusika kwa namna moja ama nyingine. Ni ukweli kuwa atakuwa anakuchukia sana na ni lazima uwe katika hali ambayo hutamfanya ajue kama nimekwambia haya. Nimemwambia akuache nitadili na wewe ila akupange nafasi ya Katibu Mkuu wa Chama”, Macha aliandika.



“Tiger unaongea nini? Umenitaja kuwa Nashiri katika jaribio hili? This is insane! Nitawezaje kufanya asinitambue? Tunapambana kumnasua Che wakati huku unafanya mambo ya ajabu? What is in your mind Tiger?”, Gideon alionekana kushindwa kuvumilia, aliandika mfululizo.



Alisahau kabisa kama sehemu ile haitakiwi uandike kwa uwazi namna ile. Alitamani Macha atokee mbele yake ampige hata ngumi. Suala la Macha kumtaja Gideon kwa Rais Costa kuwa anahusika katika mpango wa kumpindua ulimvuruga akili kabisa. Ni jambo aliloshindwa kufikiria na kung’amua ni nini matokeo yake.



“Come down kid. Kwa hali ilivyo Eagle hawezi kukufanya chochote, ananisikiliza mimi. Utapelekwa kuwa Katibu Mkuu wa Chama na ukifika kule Che atakuelekeza cha kufanya lakini kikubwa ni kuandaa namna ya kumpokea Habibu huko. Ikumbukwe misheni hii ni kufanya mapinduzi yasiyotoa mlio hata kwa Raia. Eagle tunamtoa katika hali ambayo tutaingia kwenye vitabu vya historia, yeye atakuja kugundua tulimtoa labda baada ya miaka mitatu. Itakuwa imebaki historia.



Mpango huu umewekwa kwa namna ambayo raia hawatoshiriki na wala hakutakuwa na umwagaji damu kama ukienda kama ulivyopangwa. Dunia na wanastanza wanapaswa kuamini na kuona kuwa utaratibu huu ni wa kawaida tu kwani hakutakuwa na fujo wala matumizi ya silaha yasiyo na ulazima. Mchakato huu unahitaji umakini na kujitoa. Usihofu”, Kwa mara ya kwanza Macha aliandika kwa urefu sana ndani ya game ile.



“Ninakuheshimu, lakini niseme katika hili mmenikosea sana. Hauwezi kufanya mambo ya hatari kama haya bila kumshirikisha mlengwa kabla ya utekelezaji” Aliandika Gideon.



“Tiger pole sana. Umetenda yote kwa umaridadi mkubwa lakini niseme jamaa wameshafika hapa Beijing na wametuona kwenye mgahawa. Tumeondoka kwa haraka maeneo ya nje na sasa tumekuja ndani kuwapoteza. Ukweli ni kuwa tupo katika hali ya hatari lakini tutajua cha kufanya tu, hatuwezi kukata tamaa. Alikuwa ni Joe amejibu kiufupi.



“Che, naelewa hali mliyo nayo hapo, lakini kuna machaguo mawili tu. Moja muwasiliane na Korea au usubiri na kukabiliana na jamaa wakifika kukudhuru. Chaguo la kwanza litaokoa maisha yako lakini litasimamisha hii misheni kwa muda mrefu kwasababu nyingi ambazo sitaweza kuzitaja hapa. Chaguo la pili litaweka Maisha yenu hatarini na mnaweza kupoteza maisha, kwani nimefanya kazi na jamaa na ninafahamu uwezo wao katika mauaji ya siri. Njia zote zina hasara na faida zake. Uchaguzi ni wako katika hali hii”, Macha aliandika.



Gideon alibaki kimya akitafakari kitendo cha Macha kumtaja kuhusika na jaribio la mapinduzi ya Rais Costa, akili yake ilisimama kufikiri kitu chochote isipokuwa aliwaza ataangaliana vipi na Rais kesho yake asubuhi.



Joe aliwaza sana kisha, “Tiger, nipo tayari kwa lolote ili misheni iendelee. Nitajaribu kupambana, aidha wao ama mimi. Mashushushu wa Korea walinipa silaha baada ya tukio la uwanja wa ndege ingawa uwezo wangu wa kutumia silaha kitaalamu ni mdogo. Najua wanaamini nimemshikilia Habibu na hatakuwa na mengi ya kujibu wala hataguswa na hawa jamaa waliotumwa huku. Nipo tayari kufa”, Joe aliandika.



Kulitokea ukimya wa muda. Hakuna aliyekuwa akiandika chochote. Ilikuwa ni simanzi kubwa kwani kumkosa Joe kwenye misheni hii ingewaweka katika wakati mgumu. Joe alikuwa ni mtu muhimu katika kupanga na kutekeleza misheni ya mabadiliko ya uongozi wa Stanza.



Kitendo cha Joe kukubali kuwa Maisha yake hayana thamani Zaidi ya misheni na kukubali lolote litokee kwake ili misheni iendelee kilimfanya kila mmoja asikitike kwa namna yake. Japo walikuwa hawaonani lakini hakika Gideon na Macha waliiona dhamira ya dhati ya Joe kutaka Rais Costa ang’oke na kuleta pumzi mpya katika kusogeza maendeleo ya Stanza mbele.



“Che, if you will not survive, we shall always honor your commitment in this great mission, forever and for always.” Aliandika Macha na alitoka hewani.



Hakutoka hewani kwasababu aliamua bali betri ya simu yake ilizima chaji na ilimbidi kutafuta chaji aweze kumalizia maongezi yake. Alikumbuka kuwa aliporudishiwa simu hakurudishiwa na chaja. Aliomba muhudumu mmoja wa nyumba ile amtafutie chaja lakini badala yake muhudumu yule alimwambia anaihitaji simu yake.



Wahudumu wote katika nyumba ile ni vijana wa Idara ya Usalama wa Taifa Stanza. Macha alipitiwa na kushindwa kutambua kuwa ule ulikuwa ni mtego aliotegewa na Sabinasi. Alifanya kusudi kumrudishia simu iliyo na chaji kidogo ili aanze kufanya ayafanyayo kwa simu izime na kisha kijana mmoja aichukue hata ikibidi kwa kutumia nguvu na kwenda kunyonya data kujua alikuwa akifanya nini au kuwasiliana na nani.



Kwasababu Macha mara ya kwanza alipokamatwa alifuta taarifa zote kwenye simu yake na walishindwa kupata taarifa hata moja, wakati huu walikuwa na hakika hatakuwa na wazo hilo wala muda wa kufanya hivyo.



Walijua kwa vyovyote vile angekuwa ameweka nywila kwenye simu yake hivyo kwa kutumia utaalam waliouita ‘Phone excavation’ waliamini kuwa watakuwa na uwezo wa kuona kila alichokuwa ukifanya kwenye simu yake kwa kuchukua ‘operating system’ ya simu yake na kuiweka kwenye kadi ndogo na kuiunganisha na mfumo wao ya ‘Phone excavation’. Kwa sababu hajafuta kitu chochote wakati huu wangeweza kupata taarifa zote.



“Abdul, kwa nini unaninyang’anya simu yangu badala ya kunipa chaja?”. Macha alimuuliza yule kijana aliyekuja kuichukua ile simu yake kwa sauti ya upole. Hakuwa anaamini kinachotokea.



“Nimepewa maagizo tu mkuu”, alijibu kwa ufupi.



“Maagizo kutoka kwa nani? Nimepewa kazi na Rais, ni nani mkubwa kuliko Rais?”, Macha alihoji tena.



“Sijui Chief, ila Mkurugenzi ameniambia niichukue. Samahani sana Mkuu”, yule kijana alimjibu Macha na kutoka.



Macha alipata mshtuko mkubwa kwa kujua kuwa kulikuwa na lengo la kufuatilia mawasiliano yake. Alijilaumu sana ni kwa nini amekuwa mjinga namna ile kwa kutong’amua mapema. Alikuwa amekwepa mishale mingi kwa umahiri aliwaza imekuwaje huu umemchoma. Aliumia sana. Alikuwa akijihisi apige kelele kwa nguvu lakini aligundua haitosaidia, macho yalianza kubadili rangi kwa kasi na kuwa mekundu.



“My God, my God, My God….”. Macha kwa mara ya kwanza baada ya miaka mingi aliita jina la Mungu na kuvuta pumzi ya kina.



Ni mara chache hofu ya kifo ilimwingia na uchungu wa dhahiri ulimfika, hii ikiwa mojawapo, Uchungu ulizidi kwa kufikiria ikiwa simu yake ingeweza kudukuliwa na Usalama wa Taifa basi angeiachaje familia yake kwasababu ni Dhahiri kuwa Costa angehakikisha anauawa kwa kosa la uhaini. Alijilaumu sana kwa uzembe huo.

********************************************



Kitendo cha Macha kutoka kwenye maongezi bila kuaga kiliwaacha na maswali mengi Gideon na Joe. Hawakujua nini kimemkuta japo walihisi atakuwa yupo na mtu maana ni kawaida mtu kutoka hewani ghafla kama ameona hali isiyomruhusu kuwa hewani kwenye mawasiliano yale.



“Che, stay safe my brother it was an honor working together and you have been my good friend all long”, Gideon aliandika ili na yeye atoke hewani. Hakuwa na msaada kwa wakati huo.



“You too, kama jamaa wakifika hapa nitakuageni kwa mara ya mwisho. Nikifa, utamwambia Eliza na Derick kuwa nawapenda sana”, Joe aliandika kwa huzuni. Walitoka hewani.

**********************************



Fredrick Nyari alikuwa ni mwenzake na Sylvanus, wote walikuwa Idara ya usalama wa Taifa Stanza kitengo cha Mauaji na Uhujumu. Siku ile mara baada ya Sylvanus kumpigia simu Nyari kumweleza uwepo wa Meshack pale Casino, Nyari alihisi hali ya hatari baina ya watu wawili.



Nyari na Meshack ni watu walioingia pamoja katika Idara ya Usalama wa Taifa. Japo waligawanywa wakati Meshack akipangwa kitengo cha ‘Executive Protection Section’ yaani ulinzi wa watu muhimu Nyari alipangwa ‘Assasination and Sabotage Section’, yaani kitengo cha Mauaji na Uhujumu.



Kugawanywa huku hakukuzuia urafiki wao ulioshibana kuendelea. Ukweli ni kuwa aliewaingiza kwenye Idara ya Usalama wa Taifa alikuwa ni babaye Meshack. Meshack alipopata nafasi alimuombea sana Nyari nae apate nafasi kwani hakuwa amefanya vizuri kwenye matokeo yake ya kidato cha nne wakati ule.



Nyari akiwa mtoto wa kwanza na pekee wa kiume kutoka kwa baba yake ndiye aliyekuwa akitegemewa kuikomboa familia yake kutoka kwenye dimbwi kubwa la umaskini waliokuwa nao.



Meshack ndiye aliekuwa akimsaidia Nyari baadhi ya fedha ili aiwezeshe familia yake pindi ilipokuwa ikimuomba msaada, hivyo deni alilokuwa nalo Nyari kwa Meshack lilikuwa halilipiki.



Simu ya Sylvanus ya kuulizia uwepo wa Meshack pale Casino na jinsi Sylvanus alivyokuwa anaongea vilimtia mashaka Nyari. Alipomaliza tu kuongea na Sylvanus haraka sana aliwasha gari lake na kuelekea Casino muda ule ule. Aliingia na hakuwaona lakini pia alipojitahidi kupiga simu hakuna aliyepokea kati ya Meshack wala Sylvanus. Alipata hofu kuwa suala linaweza kuwa limeshatokea.



Kama zilivyo hulka za wanausalama wengi, hufanya uchunguzi wa haraka katika eneo husika ili kutambua hali ya kiusalama. Nyari hisia zake zilimwelekeza akawaangalie kule vyooni. Aliamini kuna jambo halipo sawa. Nyari akiwa anatembea kuelekea vyooni alimwona Sylvanus akitoka. Nyari alijibanza nyuma ya mtu na kujaribu kumpigia Sylvanus simu aone kama angeipokea.



Huku akiwa anamwangalia akiwa anakatiza kati kati ya watu akielekea nje Sylvanus hakupokea ile simu. Hapo alijua fika kuwa Sylvanus atakuwa amekabiliana na Meshack. Alikimbia haraka vyooni na kuanza kufungua mlango mmoja mmoja kuangalia kama atamuona Meshack. Hakumuona.



Haraka alielekea sehemu maalumu ya kuvutia na sigara na baada ya kuangaza macho huku na kule alimuona Meshack amelala chini akionekana kutokujitambua au kufanya mjongeo wa aina yoyote wa kimwili. Moyo wa Nyari ulilipuka kwa majonzi makubwa. Alimsogelea haraka na kumgusa sehemu muhimu za mwili ili kumkagua dalili yoyote ya uhai. Huu ni utaratibu wa wanausalama na au hata madaktari na watoa huduma ya kwanza sehemu zote duniani.



Kabla ya kuchukua hatua yoyote hupaswa kukagua mazingira ikiwa yanaruhusu kutoa msaada kwa kuangalia pande zote, kisha husogea kwa uangalifu kuelekea alipo muathirika na kufuata taratibu fulanifulani ili kuangalia ikiwa kuna dalili zozote za uhai ili kufahamu ni aina gani ya huduma ya kuifanya kwa haraka ili kuokoa uhai wa muhusika.



Alimgusa kila mahali walipofundishwa kugusa kuangalia kama mtu ana uhai au amepoteza Maisha. Alipogusa eneo la shingo alishtuka baada ya kusikia kwa mbali mapigo ya moyo, lakini Meshack hakuwa akijigusa wala kujibu komandi yoyote aliyofanyiwa ikiwemo kufinywa na kutikiswa.



Nyari alianza kumpulizia mdomoni kuona kama ataweza kushtuka. Alikuwa akifanya yote hayo huku machozi yakimlenga kwani ana historia ndefu na Meshack tangu katika ngazi ya familia zao. Hakuamini anachokishuhudia.



“Aaanghh”, Meshack alishtuka lakini akiwa ameishiwa nguvu.



“It’s fine Shack, mimi Nyari. Twende”. Nyari alimwambia Meshack kwa kumuita jina lake kwa kifupi, jina alilozoea kumuita tangu walipokuwa wadogo.



Meshack hakuwa anajitambua hivyo Nyari alimvua ile kofia ya kininja aliyokuwa amevaa pamoja na ‘gloves’ kisha alimnyanyua na kumsimamisha na kumuegamisha kwenye mabega yake na kuanza kutoka nae nje. Alitembea nae akimkokota kama vile mtu anaemsaidia mwenzake aliyelewa chakari. Walitoka na kuelekea nae anapoishi Nyari.



Kutokea siku ile hakuna aliyejua Meshack yupo wapi. Taarifa za Sylvanus kwa Sabinas juu ya kifo cha Meshack hakuna aliekuwa amezithibitisha kwasababu hakuna aliyeona mwili wake. Meshack alipozinduka alimsihi Nyari asiseme lolote.

**************************************



Gideon alikuwa amelala lakini mwenye mawazo mengi. Alifumba tu macho lakini hakika hakuwa na usingizi. Akiwa amelala alisikia mlio wa ujumbe wa WhatsApp kutoka kwenye simu yake. Aliichukua na kufungua, alikuta ni namba mpya imemtumia ujumbe kwa kuandika jina lake yaani “Gideon”



“We ni nani?”, Gideon aliandika.



“Tafadhali naomba ukae mahali ambapo nitaweza kukupigia simu ya video’’



Gideon alitoka chumbani kwake na kuelekea chumba wanachokitumia watoto wake kama maktaba na alipofika yeye ndiye alipiga ile simu ya video.



“Naitwa Fredrick Nyari”, Kijana yule alijitambulisha huku macho yake yakionekana kulengwa na machozi na akiongea kwa sauti yenye masikitiko makubwa.



“Sikufahamu, na kuna nini basi mbona unanipigia siku usiku wote huu? Na kwanini unalia?” Gideon aliuliza maswali mfululizo kwa hofu.



“Ni Rafiki yake na Meshack na nipo Idara ya Usalama wa Taifa. Kaka Meshack amefariki muda huu” Nyari alimwambia Gideon na kuielekezea kamera kwenye mwili wa Meshack aliokuwa ameulaza kitandani.



“Nyari, please….pl….pleas…Oh God” Gideon alishindwa kuuangalia mwili wa Meshack.



Nyari alimwelezea kila kitu Gideon kuanzia historia ya udugu wao hadi mwisho Meshack alipofariki. Alimwelezea jinsi alivyojitahidi kuokoa maisha ya Meshack lakini ameshindwa kwani anahisi mapafu yalishindwa kufanya kazi na alikuwa akipumua kwa shida huku akikohoa damu mfululizo toka siku ya tukio.



Alishindwa kumpeleka hospitali kubwa kwasababu ya ombi la Meshack na alichokuwa akifanya ni kumpa matibabu yeye kwa kuuliza madaktari. Nyari alimwambia Gideon uhusiano wake na Meshack na kuwa ni Meshack aliempa maagizo yale kuwa siku akifa basi amtafute Gideon na kumpa taarifa hizo. Wote walihuzunika sana.



“Nyari, naomba unipigie picha mwili wa Meshack. Na utauhifadhi vipi? Gideon alihoji.



“Ninajua cha kufanya, mimi ni mwanausalama. Nitauharibu mwili kwa namna ambayo hata vipimo havitoonesha kuwa alishawahi kukutana na mtu mwingine yeyote zaidi ya Sylvanus. Kisha nitakwenda kuutupa kandokando ya barabara ili upatikane na familia yake iweze kumpa heshima za mwisho. Inaniuma sana lakini lazima nifanye hivi ili familia yake ipate mwili huu na wauzike na kubaki na kumbukumbu”, Nyari aliongea kwa huzuni kuu.

http://pseudepigraphas.blogspot.com/

“I can’t say a lot. Utakuwa ukinipa taarifa watakapouokota ili niangalie namna ya kushiriki kwenye mazishi yake. Thank you Nyari” Gideon alimalizia na kuagana na Nyari.



Baada ya hapo, Gideon nae alianza kutokwa machozi. Meshack alikuwa na kumbukumbu kubwa kwa kila mmoja na waliumia kumpoteza kwa namna ile. Hakuna aliyeamini kama Meshack amefariki na ule ndio ulikuwa mwisho wake. Meshack aliondoka duniani kwa kuuawa katika kutelekeza majukumu yake ya kimisheni.



Haraka Gideon alichukua simu na kumpigia Joe simu kwa njia ya WhatsApp. Alimweleza kila kitu kama alivyoelezwa na Nyari na alimtumia picha ya mwili wa Meshack.



Ilikuwa ni siku ambayo simanzi ilitawala miongoni mwa wanamisheni. Gideon alishindwa kujizuia na kuanza kulia kwa sauti hali iliyosababisha mkewe Lucia kuamka na kuja kwa haraka kumuuliza mumewe kulikoni. Alimweleza mmoja wa wafanyakazi wa ikulu aliyekuwa rafiki yake mkubwa amefariki.



Lucia mkewe na Gideon alimbembeleza na kumtia moyo lakini haikusaidia sana kwa wakati ule. Ulihitajika muda ili huzuni ile ipungue na hatimaye kwisha. Siku moja haikutosha. Lucia aliondoka na kumwacha Gideon aendelee kuongea na Joe.



“I wasn’t trained to handle the pain for loosing someone close to me. I am breaking. I may as well loose you anytime. Be sure to be safe mate’’, Gideon alilalamika.



“Stop crying Gidi. Some sacrifices must happen in the process. I am as well very low for his ultimate demise”, Joe alimjibu Gideon kwa kujikaza sana. Joe alishakubali kuwa lolote linaweza kutokea na alipunguza hofu ya masuala yaliyo nje ya uwezo wake kuyatawala.



Wote walisikitika kwa namna yao. Habibu alikuwa kimya ila mishipa ya kichwa ikiwa imevimba huku akihuzunika na kutafakari kwa kina. Hakumfahamu marehemu moja kwa moja lakini alijua wazi kuwa alikuwa ni mtu muhimu katika misheni ile.

********************************************



Usiku ulikuwa mrefu, lakini kila liwialo ni lazima lichwee, na kila lichwalo lazima liwie. Hatimaye asubuhi ilifika. Ingawa wakati Stanza kukiwa kunapambazuka, nchini China alipo Joe na Habibu bado ilikuwa usiku wa manane.



Gideon akiwa amejikaza kana kwamba hakuna ajuacho japo alikuwa akijua mengi na akiwa amegubikwa na uchungu mkubwa aliwasili Ikulu za Peron zilipo ofisi zake.



Alipofika tu lango kuu alikutana na Katibu Mkuu Kiongozi Bwana Jabir Salehe.



“Rais anakuulizia sana toka alfajiri. Yaani leo amewahi sana kufika ofisini kunani mdogo wangu?”, Jabir alimuuliza Gideon.



“Sijui kaka mbona hajanipigia simu? Lakini leo ndio aliniambia nirudi na yale marekebisho ya ile barua yake labda ndo hayo anayasubiri”, Gideon alijibu lakini akiwa amejawa hofu. Sauti yake ilitoka kwa kutetemeka.



“Mbona sauti yako inatetemeka leo Gidi. Unaumwa?”. Jabiri aligundua Gideon hayupo sawa. Gideon alikuwa anaona anaongea kawaida kumbe mtu wa pili alimwona kabisa hayupo sawa.



“Najihisi Malaria kaka”, Gideon alijibu kwa kudanganya.



“Sasa mdogo wangu wewe wa Ikulu ukiumwa Malaria yule wa kijijini aumwe nini? Ha ha ha. Haya kaonane na Mkuu”, Jabir alimalizia na kuacha na Gideon.



Gideon aliingia ndani na kuanza kushika korido iliyoelekea ofisini kwake. Alifika ofisini na kujiangalia kwenye kioo. Alijiongelesha mwenyewe kuwa ajikaze. Aliichukua ile karatasi iliyokuwa na marekebisho ya majibu ya Costa kwa Rais wa Marekani na kuanza kutembea kuelekea chumba cha ofisi ya Rais.



Alifika na kufunguliwa mlango na walinzi na kuingia. Alikutana uso kwa uso na Rais. Costa alimwangalia Gideon machoni kama dakika mbili hivi mfululizo bila kumsemesha. Hata Gideon alipojaribu kumsalimia hakumjibu. Kadiri Gideon alivyotazamwa na Rais Costa ndivyo alivyozidi kutetemeka na kupata hofu ya suala aliloambiwa na Macha. Alitetemeka mpaka viliota vile vipele vya mtu anaesikia baridi kali.



“Gideon, nataka nikupangie kazi kubwa kidogo. Nimekuamini sana na sasa nataka ukaninyooshee Chama. Nataka nikupe Ukatibu Mkuu wa Chama Chetu Cha Ukombozi Stanza, kama kumbukumbu zangu zipo sawa nadhani hata shahada yako ya Uzamili ulisomea Sayansi ya Siasa sasa umepata pa kuifanyia kazi. Niambie unataka nini chochote nitakupatia ili ukafanye kazi kwa uhuru na ufanisi”, Rais Costa alimwambia Gideon kwa sauti kubwa baada ya kimya kirefu.



“Mh. Rais hapana. Nashukuru kwa uaminifu wako lakini sitaweza. Najua ni heshima kubwa na ninajua ni nafasi kubwa kuliko hii niliyo nayo sasa lakini kwa nidhamu kubwa naomba umpe nafasi hiyo mtu mwingine mwenye uzoefu na siasa zetu za Stanza”, Gideon alijibu kwa nidhamu kubwa.



“Gidi, unanishangaza. Wewe ndiye umekuwa ukinishauri yote ninayokwenda kuyaelekeza kwenye chama sasa inakuwaje useme huwezi? Lazima uende kule bwana”, Rais Costa alionekana kusisitiza.



“Mh. Rais, unajua sijawahi kuweka pingamizi ya jambo ulilowahi kushauri na unajua utii wangu kwako. Ninakuomba sana kama sikufai hapa, basi Mtukufu Rais naomba unipe ruhusa nikapumzike na kufanya majukumu mengine kwa amani kabisa. Kazi yangu hapa ninaifurahia na inanipa nafasi ya kujifunza mengi zaidi.



Pia ninakusudia kufanya Shahada ya Uzamivu ya Mahusiano ya Kimataifa na ninaamini katika nafasi yangu ya sasa ninajifunza mengi zaidi hasa kupitia wewe unavyoendesha mahusiano na mataifa mengine”, Gideon alijibu kwa heshima kubwa.



Rais Costa alimtazama tena usoni Gideon kwa sekunde kadhaa bila kumwambia neno. Kisha alimruhusu aketi.



Ule ulikuwa ni mtego. Rais Costa aliamua kumpa zile taarifa Gideon ali amuone angezipokea kwa namna gani. Nafasi ya Ukatibu Mkuu wa Chama ilikuwa na maslahi makubwa kuliko nafasi aliyokuwa nayo Gideon kwa wakati huo. Isingewezekana mtu yeyote akatae nafasi ile.



Lakini jambo la pili kabla ya kwenda kuonana na Macha alitaka ajaribu kuona kama Gideon angekubali. Kwa kufanya hivyo basi ingeleta kiashirio kuwa ni mpango wamepanga Macha na Gideon kama alivyoambiwa na Sabinasi. Kitendo cha Gideon kukataa na kuwa tayari kuacha hata kazi na kurudi nyumbani kilimpa uhakika kuwa Gideon hana ajualo na kuwa Sabinas ana wasiwasi wa bure.



Rais Costa alianza kuona pengine utendaji wa Sabinasi unasukumwa na hisia za wivu kuwa ikiwa angeruhusu yeye Rais amuamini Macha tena, basi angeweza kurudishiwa Ukurugenzi wa Usalama wa taifa na yeye kuondolewa



“Nipe hiyo barua. Halafu unaumwa? mbona umenyong’onyea namna hiyo Gidi?”, Rais Costa alimuuliza Gideon huku akichukua ile barua na kuisoma.



“Ndiyo mkuu, nahisi nina malaria”, Gideon alijibu.



Rais Costa alikaa kimya akiwa anasoma na kuhakikisha kama yale marekebisho aliyoagiza yamewekwa sawa na Gideon.



“This is now perfect. Mpe Jabir aitengeneze kwenye muundo maalum kisha nipatiwe niweke sahihi aitume. Pole sana Gidi. You need to consult a doctor if the situation persists. Ukiona umezidiwa ukapumzike”, Rais Costa alimwambia Gideon.



“Asante Mheshimiwa”, Gideon alijibu huku akiichukua ile barua.



Akiwa anajikusanya pale ili atoke simu ya Rais Costa iliita na Rais aliipokea.



“Mh. Rais you need to come and see this”, Alimsikia Sabinas kwa mbali akimwambia Rais Costa.



“Nini Sabinas, nije wapi? Huwezi kuniita mimi kiholela hivyo unajua sitembei tu kiholela kama wewe there is a process comeon” Rais Costa alionekana kufoka.



“Msafara nimeshauweka tayari unakusubiri nje mkuu, nakuomba sana hapa kwenye nyumba yetu anayoishi Macha”. Sabinas alisikika.



“Gideon twende”, Rais Costa alikata simu kwa hasira na kumuamuru Gideon aongozane nae.



Baada ya dakika kama kumi na tano walifika kwenye nyumba aliyokuwa amelala Macha na walipokelewa na Sabinas pamoja na maafisa wengine waandamizi wa Idara ya Usalama wa Taifa Stanza na kutembea moja kwa moja kuelekea kwenye chumba alichokuwa amelala Stanley Macha.



Sabinasi alifika na kuusukuma mlango.



“Holy shit” Rais Costa alipata mshtuko mkubwa mara baada ya kuuona mwili Stanley Macha ukiwa umelala pale sakafuni huku povu jingi likiwa limemtoka mdomoni.



Gideon alisogea kwa kupiga hatua kama mtu anaenyata asitake kushuhudia anachotaka kukitazama. Alijihisi kama anaota lakini ulikuwa ni ukweli Stanley Macha, aliyekuwa amelala pale chini alikuwa AMEFARIKI.



Chumba kizima kilizizima kwa ukimya. Rais Costa alipiga magoti chini na kumshika shavu Macha huku akitokwa na machozi pasi kusema neno lolote. Aligugumia kwa uchungu lakini hakutaka kuachia kilio.



Gideon alipatwa na huzuni kuu na alitaka kuuliza sababu za kifo cha Macha lakini akasita. Alitoa simu yake akapiga picha mwili wa Macha kwa siri kisha akamtumia Joe bila kumwambia neno lolote. Aliogopa sana. Kifo cha Meshack na sasa Macha kilizidi uwezo wa Gideon wa kuhimili huzuni.



Mwili ulishindwa kuhimili simanzi iliyojaa moyo wake. Aliifanyia simu yake ‘Hard reset’ ili kufuta kila taarifa kwenye simu yake maana alijiona anaanza kupoteza nguvu, na haikuchukua dakika hata tatu Gideon alidondoka na kupoteza fahamu.

************************************



Huko Beijing China ilikuwa ni usiku wa manane. Joe hakuwa amelala, alijawa huzuni kwa kifo cha Meshack lakini pia hofu ya uwepo wa Sylvanus ilimtanda pasi kawaida. Akiwa amekaa anatazama luninga alisikia mlio wa simu wa WhatsApp. Aliinyanyua simu yake haraka na kufungua kuangalia ni taarifa gani imeingia.



“Jesus Christ”, Joe aling’aka kwa nguvu kitendo kilichomfanya Habibu aliyekuwa amejilaza kwenye kochi pembeni ya Joe kushtuka.



Joe alikuwa ameipokea ile picha ya mwili wa Macha aliyotumiwa na Gideon.



“Nini?”, Habibu alishtuka kwa hofu.



Joe bila kusema neno huku akitoa machozi mengi kabisa alimpa Habibu ile simu ili aitazame.



“Ya Allah!” Kwa mara ya kwanza Habibu alianza kutokwa na machozi.



Joe aliinamisha kichwa juu ya meza huku akiwa ameuficha uso wake kwa viganja vya mikono lakini machozi yalipenya kwenye vidole vyake kwa jinsi yalivyokuwa mengi. Kila mmoja alikuwa kimya.



Baada ya dakika kama tatu hivi Joe aliichukua simu yake na kuanza kumpigia Gideon kwa kutumia WhatsApp lakini siku haikuweza kuunganishwa. Alijaribu mara nyingi bila mafanikio. Wakati akiendelea kujaribu mlango wao uligongwa.



“Habibu nasikia mlango umegongwa”, Joe alishtuka na kumwambia Habibu kwa sauti ya chini kabisa.



“Hata mimi nimesikia”, Habibu nae alikata kilio na kumjibu Joe.



Waliangalia saa ya ukutani na waliona ilikuwa ni saa tisa usiku kwa saa za China.



“Nenda kwenye dirisha lile utaweza kuchungulia nani amesimama mlangoni. Hakikisha unachungulia kwa kujificha. Tumia upande ule ambao hatujawasha taa” Joe alimwelekeza Habibu.



Haraka Habibu alinyanyuka na kufuata maelekezo ya Joe. Joe alibaki amekaa pale chini asijue afanye nini.



Habibu alifika na kuchungulia kisha akiwa pale dirishani alimgeukia Joe na kumtazama kwa jicho la kukata tamaa. Alirudi na kumsogelea Joe karibu.



“Joe, ni Sylvanus anagonga. Na kwa mbali nimewaona watu kama watatu hivi, nadhani wapo pamoja. Tunafanyaje”. Habibu alionekana kumwambia Joe kwa sauti ya chini sana na ya mtu aliekosa Tumaini.



Joe, hakumjibu neno lolote Habibu. Alinyanyuka na kumkumbatia kwa nguvu na kwa ufupi na kuchukua bastola yake aliyopewa na mashushushu wa Korea kwa ajili ya ulinzi wake binafsi. Alisogea na kukaa kwenye moja kati ya kona za chumba kile na kumuelekeza Habibu akae kwenye moja ya kona akiwa amenyoosha mikono yake juu ili wakiingia basi wasimpige risasi kwa kuona kuwa hakuwa na madhara kwao. Yeye aliamua kuwa ni bora afe kuliko arudi Stanza na kuangukia mikononi mwa Rais Costa.



“I pray that you stand your ground and you shall become a great leader one day. Do not forget us in your story. Joe alikuwa akimwambia Habibu kutokea kwenye kona aliyokuwepo.



Mlango ulizidi kugongwa. “Nenda kamfungulie”, Joe alimwachia Habibu na kumwagiza.



“Joe siwezi. Siwezi kuhalalisha kifo chako. Tuombe msaada Ubalozi wa Korea tafadhali.” Habibu alishindwa kustahimili.



“Hapana. Hata hivyo tumechelewa sasa natamani tufanye hivyo baada ya kuona kifo kimenifikia na kifo cha Macha na sintofahamu ya Gideon lakini hapana. Kafungue mlango”, Joe alisisitiza huku mlango ukigongwa tena kwa fujo.



“Hapana sitafungua Joe. Hapana” Habibu aligoma.



Joe alimtazama Habibu machoni kwa sekunde kadhaa na kuuelekea mlango ili akaufungue mwenyewe.



Wakati akielekea kwenye mlango, alisikia milio isiyo ya kawaida masikioni mwake ingawa alifahamu ni nini hasa. Alisikia risasi zikifyatuliwa lakini mlio wake haukwenda mbali kwasababu silaha zilizotumika zilifungwa kiwambo maalumu cha kuondoa sauti au kwa Kingereza wangeita ‘bullet silencer’. Joe aliondoka kwa haraka eneo la mlango na kurudi kwenye kona aliyokuwapo huku akiishikilia bastola yake kwa makini. Mikono ilikuwa ikimtetemeka.



Habibu aliendelea kuwa na hofu kuwa huu ndiyo mwisho wa Maisha yao. Aliamini kuwa wahudumu wa eneo lile walipigwa risasi na kina Sylvanus ili waweze kuingia kwa uhuru zaidi kutekeleza majukumu yao.

http://pseudepigraphas.blogspot.com/

Wakiwa bado hawajui wafanye nini mlango ulizidi kugongwa Zaidi na wakati huu uligongwa kwa fujo. Kwa sababu walisikia ile milio ya risasi wakati huu hata ujasiri mdogo aliokuwa nao Joe wa kutaka kupambana na Sylvanus uliondoka. Alikiona kifo hiki hapa kunamwita hadharani. Alishindwa hata kuishikilia vizuri bastola aliyokuwa nayo.



Wakiwa kila mmoja amesimama kwenye kona yake wakitazamana kwa macho ya kupeana buriani Joe alisikia mlango ukifunguliwa kwa nguvu kwa kitu kuingizwa kwenye kitasa cha mlango na loki ikafyatuka.

****************************************



MWISHO WA MSIMU WA KWANZA

ENDELEA KUFUATILI MSIMU WA PILI



MWISHO