MIFUPA 206 - 5

  

Simulizi : Mifupa 206

Sehemu Ya Tano (5)





“Nashukuru sana” hatimaye nikamwambia huku nikitabasamu kisha nikaitupia

macho saa yangu ya mkononi. Ilikuwa ikielekea kutimia saa nne asubuhi hali

iliyonipelekea nishtuke na kujilaumu kwa kulala muda mrefu kiasi kile.

“Ulikuwa ukiongea na nani kwenye simu?” Iko-Ojo Obaje akaniuliza huku akitoa

sigara kutoka kwenye pakiti mfukoni na kuibana mdomoni kisha kwa msaada wa

kiberiti cha gesi kutoka mfukoni mwake akajiwashia na kuanza kuvuta huku mguu

wake mmoja akiupandisha juu ya mwingine.

“Mfanyakazi mwenzangu kuna mambo machache ya kiofisi tulikuwa tukiwekana

sawa” niliongea kwa utulivu huku nikirudi pale kitandani na kujilaza.

“Huyo mfanyakazi mwenzako anafahamu kuwa wewe upo hapa?” swali la Iko-

Ojo Obaje likanipelekea nigeuke na kumtazama kwa udadisi hata hivyo sikuona

tashwishwi yoyote usoni mwake.

“Hapana” nikamjibu kivivuvivu.

“Huendi kazini leo?”

“Nitaenda hata hivyo nimechelewa sana” niliongea huku nikiamka kivivuvivu pale

kitandani na kuketi tena huku nikimzama Iko-Ojo Obaje na macho yetu yalipokutana

kila mmoja akaangua tabasamu.

“Vipi uchovu?” hatimaye nikamuuliza.

“Umepungua” Iko-Ojo Obaje akaongea huku akiangua kicheko hafifu baada ya

kuitoa sigara yake mdomoni kisha akaendelea

“Wewe ni mwanaume uliyenifanya niukumbuke ujana wangu kwa usiku mmoja

tu” akaongea huku akinikata jicho la mahaba na kutabasamu.

“Unaonekana mwanamke wa miaka thelathini na kitu lakini kitandani hautofautiani

na binti wa sekondari” nilichombeza utani na kupelekea wote tuangue kicheko

mle ndani. Hatimaye nikasimama na kuelekea bafuni kuondoa uchovu. Nilikuwa

nimekumbuka kazi iliyokuwa ikinikabili mbele yangu hivyo sikutaka kuendelea

kupoteza muda zaidi mle ndani. Iko-Ojo Obaje akanisindikiza kwa macho yake

nyuma yangu hadi pale nilipopotelea kwenye kile chumba cha bafu la mle ndani na

kufunga mlango nyuma yangu.

Muda mfupi baadaye nilitoka ndani ya kile chumba cha bafu nikiwa mwepesi

na mbali na uchovu na hapo nikamkuta Iko-Ojo Obaje akiwa tayari amekwisha

agiza kifungua kinywa chenye taftahi za kila aina. Mle ndani pale kitandani nilikuta

Iko-Ojo Obaje akiwa ameshazitoa zile nguo kwenye ule mfuko na kuzitandaza

pale kitandani nami nikajiridhisha kuwa alikuwa amefanya uchaguzi mzuri wenye

kuzingatia vigezo vyangu. Alikuwa ameninunulia suruali nyeusi ya kadeti,boksa ya

rangi ya bluu bahari,bukta safi ya rangi nyeupe,singlet nyeupe,fulana moja ya kijivu

yenye mstari mweusi kifuani na kofia nyeusi ambapo nilipomaliza kuvaa viliubadili

kabisa muonekano wangu na kunifanya nipendeze na hapo nikageuka kumshukuru

Iko-Ojo Obaje ambaye alikuwa akinitazama kwa makini pale kwenye kochi alipoketi.

Nilipomaliza kujiandaa nikasogea kwenye ile meza na kuketi tukipata kifungua kinywa

kile kwa pamoja. Asubuhi hii mbele yangu nilimuona Iko-Ojo Obaje katika uzuri

wa hali ya juu. Macho yake yaliponitazama yakapeleka hisia kali za mapenzi moyoni

mwangu na kunipelekea nijisifu moyoni mwangu kwa kustarehe na mwanamke mzuri

kama yule. Ingawa nilikuwa sijaamua kabisa kuwekeza kwenye masuala ya mahusiano

ya mapenzi lakini sasa mbele ya Iko-Ojo Obaje mpango huo taratibu ulikuwa

umeanza kuumbika kichwani mwangu. Iko-Ojo Obaje alikuwa amefanikiwa kuuteka

moyo wangu,mwanamke mwenye sifa zote za uzuri ambaye ingenichukuwa miaka

mingi sana kusahau aliyonifanyia kwenye kitanda cha mle ndani kwa muda wa usiku

mmoja tu tuliyokuwa pamoja.

Wakati nikiendelea kupata kile kifungua kinywa nikajikuta nikimtazama Iko-Ojo

Obaje kwa udadisi mbele yangu. Kwa namna moja au nyingine sikuwa nimemuelewa

vizuri mwanamke yule kuwa alikuwa ni mtu wa namna gani hasa pale nilipokumbuka

kiasi kingi cha zile pesa za kigeni,dola za kimarekani kilichokuwa chini ya nguo

kwenye lile sanduku mle ndani kabatini pamoja na zile kadi nyingi za ATM za benki

za kimataifa. Kisha nikajikuta nikiikumbuka ile pasi yake ya kusafiria yenye picha yake

na jina la Chimamanda Okechukwu. Ingawa Iko-Ojo Obaje hakuwa ameniambia

kiundani zaidi juu ya masuala yake lakini kwa tafsiri ya haraka nilianza kumfananisha

na mfanyabiashara mkubwa ingawa bado sikuweza kufahamu ni biasha gani ambayo

angekuwa akiifanya. Labda hakutaka kuniweka wazi jina lake kama walivyo wanawake

wengi wa zama hata hivyo nikajikuta nikijiuliza ni kwanini alikuwa na kadi nyingi za

ATM za benki nyingi za kimataifa tena zenye majina tofauti kiasi kile.

Hatimaye nilimaliza kupata kifungua kinywa kile na kumshukuru Iko-Ojo Obaje

kwa ukarimu wake kisha nikasimama na kuelekea dirishani ambapo nilisogeza pazia

pembeni na kutazama mandhari ya chini ya hoteli ile. Nikiwa pale dirishani mawazo

mengi yakawa yakipita kichwani mwangu nikifikiria juu ya kazi iliyokuwa ikinikabili

mbele yangu. Sikufahamu kuwa mara baada ya kutoka pale nilipaswa kuelekea wapi

na kufanya nini hata hivyo niliamini kuwa kuendelea kukaa mle ndani isingekuwa

suluhisho la kupata majibu ya maswali yangu. Nilihitaji kupiga hatua nyingine zaidi

katika harakati zangu.

Wingu zito la mvua lilikuwa limeanza kutanda angani na hivyo kuipelekea miale

ya jua lile la asubuhi kufifia hali iliyonipelekea nilikumbuka lile koti langu nyuma ya

mlango wa kile chumba kuwa lingeweza kunisaidia kufanya mizunguko yangu mitaani

bila kulowana endapo mvua ile ingeanza kunyesha. Hatimaye nikaliacha lile dirisha

na kufunga pazia kisha nikageuka na kumtazama Iko-Ojo Obaje pale kwenye kochi

alipoketi.

“Ni lini umepanga kuondoka hapa Dar es Salaam?” nikamuuliza kwa utulivu huku

nikimtazama kwa sura ya kirafiki.

“Viza yangu inaniruhusu kukaa hapa nchini kwa muda wa mwezi mmoja hata

hivyo kuwenda nikaondoka mapema zaidi kutegemeana na nitakavyoamua” Iko-Ojo

Obaje akanijibu kwa utulivu baada ya kutoa sigara mdomoni na kuupuliza moshi

pembeni huku taratibu akiutikisa mguu wake mmoja kwenye lile kochi.

“Nahitaji kuelekea kazini sasa”nikamwambia Iko-Ojo Obaje huku nikiitazama saa

yangu ya mkononi kisha nikayapeleka tena macho yangu kumtazama.

“Usiku wa leo tutaonana?” Iko-Ojo Obaje akaniuliza huku usoni akiumba

tabasamu hafifu

“Nipo tayari kuja tena kama utanikaribisha” nikaongea huku nikitabasamu.

“Nitapenda kukuona tena kama utapata nafasi” jibu la Iko-Ojo Obaje likanipelekea

niangue kicheko hafifu kwani ni dhahiri kuwa nilikuwa nipo tayari kujifungia mle

chumbani na mrembo yule hadi pale ambapo angenichoka lakini kizingiti kikubwa

sasa kilikuwa ni juu ya majukumu yaliyokuwa mbele yangu.

“Nashukuru sana” hatimaye nikamwambia kisha nikasogea kwenye ule mlango

na kulichukua lile koti langu na kulivaa halafu nikamuaga Iko-Ojo Obaje na kufungua

mlango nikitoka nje.

_____

NILIKUWA SIJAFIKA MBALI BAADA YA KUSHUKA kwenye teksi eneo

la posta nikitoka kule Hotel Agent 11 wakati simu yangu ilipoanza kuita mfukoni.

Haraka nikaingiza mkono mfukoni na kuichukua hata hivyo kabla sijaipokea simu

ile nikageuka haraka na kuyatembeza macho yangu eneo lile kuzikagua sura za watu.

Sikuona sura yoyote ya kuitilia mashaka hivyo haraka nikalitazama jina la mpigaji na

kuiweka simu sikioni kabla ya kubofya kitufe cha kupokelea. Mwasu alikuwa akinipigia

na tukio lile lilikuwa limenipelekea niingiwe na wasiwasi kwani muda mfupi tu uliyopita

nilikuwa nimetoka kuongea naye kwa simu. Sauti ya Mwasu ilikawia kunifikia sikioni

ingawaje nilipotega vizuri sikio langu kusikiliza kwenye ile simu nikagundua kuwa

Mwasu alikuwa akitembea nusu ya kukimbia huku akihema ovyo.

“Mwasu kuna nini?”

“Chaz…”

“Nakusikia Mwasu zungumza kuna nini?” nikauliza kwa mashaka.

“Upo wapi?” Mwasu akauliza huku akihema ovyo na kupitia kitetemeshi cha sauti

yake nikahisi jambo la hatari.

“Niko maeneo ya posta nje ya jengo la Benjamin William Mkapa Tower. Niambie

Mwasu kuna nini?”

“Kuna wanaume watatu wako nyuma yangu wananifuatilia. Chaz tafadhali nahitaji

msaada wako” Mwasu akaongea kwa hofu.

“Wanaume watatu?,wameanza kukufuatilia kutoka wapi na wewe upo wapi sasa

hivi?” nikamuuliza Mwasu kwa udadisi.

“Walikuja ofisini kukuulizia walipoona haupo wakataka kunikamata nikafanikiwa

kuwatoroka hata hivyo wamenishtukia na sasa wapo nyuma yangu wananifuata.

Tafadhali nahitaji msaada wako Chaz hawa watu wanaonekana kuwa si wema”

Mwasu akaendelea kunitahadharisha huku akitembea kwa kasi.

“Niambie tafadhali upo wapi?” nikamuuliza Mwasu kwa papara hata hivyo Mwasu

hakunijibu badala yake nikamsikia akianza kutimua mbio.

“Mwasu niambie tafadhali upo wapi mbona huongei?” nikamuuliza huku

nimeshikwa na taharuki. Nikiwa bado nimeishikilia simu yangu sikioni mara sauti ya

Mwasu ikarudi tena hewani.

“Nahitani msaada wako wa haraka Chaz hawa watu wanakaribia kunifikia na

wameshika bastola mikononi mwao” Mwasu akalalamika kwa hofu.

“Okay!Mwasu niambie mahali ulipo nitafika sasa hivi” nikaongea kwa msisitizo.

“Nipo kwenye barabara ya mtaa wa Jamhuri nakaribia kwenye mashine za ATM

za benki ya NMB eneo la posta” Mwasu akaongea kwa msisitizo huku sauti yake

ikitawaliwa na hofu. Maelezo ya Mwasu yakaipelekea akili yangu kuanza kufanya

kazi haraka. Kutoka pale nilipokuwa nilitambua kuwa sikuwa mbali sana na sehemu

alipokuwa Mwasu hivyo bado nilikuwa kwenye nafasi nzuri ya kuweza kumuokoa

kutoka kwa watu wale hatari. Bila kupoteza muda nikaanza kutimua mbio nikishika

ule uelekeo wa kwenda kukutana na ile barabara ya Jamhuri upande wa kulia.

“Nakuja Mwasu nipo hapa jengo la Benjamin William Mkapa Tower ondoa shaka

nafika hapo sasa hivi” nikamtoa hofu Mwasu na kuanza kutimua mbio

“Fanya haraka Chaz hawa watu ni hatari” Mwasu akasisitiza huku akiendelea

kutimua mbio

“Umebeba kitu chochote?” nikamuuliza

“Nimebeba mkoba wangu na ndani una External hard disc yenye mafaili ya kazi

zote za ofisini” Mwasu akanitanabaisha.

“Hakikisha kwa namna yoyote ile hao watu hawafanikiwi kuupata huo mkoba”

nikamsisitiza Mwasu huku nikitimua mbio kuelekea kule alipokuwa. Baadhi ya

watu waliopishana na mimi wakati nikitimua mbio kuelekea kule alipokuwa Mwasu

waligeuka na kunishangaa hata hivyo sikuwatilia maanani badala yake nikaendelea

kuchanganya miguu nikitimua mbio huku nikitazama huku na kule mbele yangu.

Nilipofika kwenye ile kona ya kuingia barabara ya mtaa wa Jamhuri nikapunguza

mwendo na kusita kidogo baada ya kuona kundi kubwa la watu wakitimua mbio

kutoka kwenye ile barabara. Haraka nikajikuta nikiingiza mkono kwenye koti langu na

kuikamata vyema bastola yangu hata hivyo nikajikuta nikiachana na mpango ule baada

ya kuhisi kuwa sikuwa na ushahidi wa kutosha juu ya nini kilichokuwa kikiendelea

eneo lile. Sikutaka kupoteza muda hivyo bila kusubiri nikaongeza tena mwendo

nikilipangua lile kundi la watu mbele yangu na wakati nikifanya vile nikasikia baadhi

ya watu wakisema kule nyuma kulikuwa na majambazi watatu waliokuwa wakitaka

kuupora mkoba wa dada mmoja wenye pesa.Tathmini yangu ya haraka ikaniambia

kuwa watu hao hawakuwa majambazi ila wangekuwa ndiyo wale watu waliokuwa

wakimfukuza Mwasu.

Mara tu nilipoingia kwenye ila barabara ya mtaa wa Jamhuri nikamuona mwanamke

mmoja aliyevaa blauzi nyeupe na suruali ya bluu ya jeans akitimua mbio usawa wa

zile mashine za ATM za benki ya NMB. Alikuwa ni Mwasu nilipomchunguza vizuri

nikamtambua na mkononi alikuwa amebeba mkoba wake wa ngozi. Mwasu hakuwa

na viatu vyake virefu vya mikanda miguuni kama nilivyozoea kumuona badala

yake alikuwa akitimua mbio pekupeku hali iliyowapelekea watu waliokuwa eneo

lile kumshangaa kwa kitendo kile. Nilipoendelea kuchunguza nyuma yake kiasi cha

umbali usiopungua hatua thelathini nikawaona wanaume watatu waliovaa suti nadhifu

nyeusi na miwani nyeusi machoni mwao wakitimua mbio kumfukuza Mwasu huku

wameshika bastola zao mikononi.

Kwa mwendo ule wa kasi ya wale watu nilifahamu fika kuwa Mwasu asingefika

mbali kabla ya wale watu hawajamfikia na kumkamata ingawa nilikuwa na hakika

kuwa hadi kufikia pale Mwasu alikuwa amejitahidi sana kukimbia katika kuhakikisha

kuwa wale watu hawamkamati. Sikutaka kusubiri hadi nione wale watu ambavyo

wangemfikia Mwasu na kumkamata hivyo haraka nikauingiza mkono wangu kwenye

mfuko wa koti na kuichomoa bastola yangu mafichoni. Muda mfupi uliofuata

nilikuwa nikikatisha kwenye ile barabara ya Jamhuri na kuelekea ule upande wa pili

wa ile barabara kumuokoa Mwasu. Hata hivyo sikufanikiwa kwani magari mengi

yaliyokuwa yakikatisha mbele yangu yakanizuia kama siyo kunichelewesha na wakati

nikisubiri yale magari yapite mbele yangu ili niweze kuvuka na kwenda upande wa pili

wa ile barabara jambo moja la kushangaza likatokea.

Ghafla nikaliona gari moja jeusi aina ya Toyota Noah likichomoza kwa kasi kutokea

barabara ya Morogoro. Haraka nikafahamu ni maana ya tukio lile hivyo nikapiga

kelele kumuita Mwasu upande wa pili wa ile barabara. Mwasu akawahi kunisikia na

kugeuka upande ule kunitazama hata hivyo hakupunguza mwendo kwani wale watu

walikuwa mbioni kumfikia. Nikiwa nimeanza kuhisi nini ambacho kingefuatia baada

ya pale sikutaka kuendelea kusubiri yale magari mbele yangu yamalize kupita ndiyo

nivuke ile barabara. Hivyo nikaongeza kasi na kujitupa kimgongomgongo juu ya

boneti ya Toyota Cresta iliyokuwa ikikatisha mbele yangu. Dereva wa lile gari kuona vile

akawahi kushika breki hata hivyo wakati akisimama mimi tayari nilikuwa nimeshatua

chini upande wa pili wa ile barabara alipokuwa Mwasu na wale watu waliokuwa

wakimkimbiza. Wale watu ni kama walikuwa hawajaniona au huwenda walikuwa

wamenipuuza badala yake waliendelea kutimua mbio na bastola zao mikononi huku

makoti yao ya suti yakipepea kama vishada kumfukuza Mwasu.http://pseudepigraphas.blogspot.com/

Mwasu alikuwa ameniona wakati nilipokuwa kwenye jitihada za kuvuka

ile barabara hivyo nilikuwa na hakika kuwa pia aliamini kuwa wakati ule tayari

ningekuwa nimeshavuka ile barabara na kuingia ule upande aliokuwa yeye na wale

watu wanaomfukuza hivyo akageuka nyuma na kunitazama. Macho yetu yalipokutana

nikaiona hofu iliyotanda usoni mwake hata hivyo Mwasu hakusimama na wakati

akiifikia ile barabara ya Morogoro ile gari Toyota Noah nyeusi nayo tayari ilikuwa usawa

wake nikakazana kutimua mbio nikikata upepo kuwakaribia wale watu kwa nyuma.

Hata hivyo kabla sijawafikia wale watu ghafla nikauona mlango wa ubavuni wa

ile Toyota Noah nyeusi ukifunguliwa kisha wakashuka watu wawili kwa haraka sana na

kumkamata Mwasu wakimbeba mzegamzega na kumtupia ndani ya lile gari. Haraka

nikapaza sauti kumuita Mwasu,Mwasu akageuka kwa taabu kunitazama katika uso wa

kukata tamaa huku amebebwa juu juu hadi alipotupiwa ndani ya lile gari.

Matumaini ya kumuokoa yakiwa yamepungua sikutaka kuendelea kusubiri zaidi

hivyo nikaikamata vyema bastola yangu mkononi. Niliwaona wale watu watatu

waliokuwa wakimfukuza Mwasu wakizidisha mbio kuukaribia mlango wa ile gari

Toyota Noah nyeusi na hapo nikajua kuwa wale watu waliokuwa wakimkimbiza

Mwasu walikuwa shirika moja na watu waliokuwa ndani ya ile gari. Nikiwa naikaribia

ile gari nikawaona wale watu nao wakiingia kwenye ile Toyota Noah nyeusi. Kuona vile

nikautupa mkono wangu wa shabaha na kuvuta kilimi cha bastola. Majibu yalikuwa

ya hakika na yaliyonifurahisha. Risasi zangu mbili nilizozifyatua zikampata vizuri yule

mtu wa nyuma kabisa kati ya wale watu watatu waliokuwa wakimfukuza Mwasu.

Risasi moja ikapenya kwenye mfupa wa paja la mguu wake wa kushoto na nyingine

ikampata begani mwake. Yule mtu akapiga yowe kali la hofu na kupiga mwereka

wa nguvu akianguka chini huku bastola yake ikimponyoka mkononi. Wale wenzake

kuona vile wakasita kidogo lakini kitendo cha kugeuka nyuma na kuniona wakawahi

kujirusha ndani ya ile Toyota Noah nyeusi na hapo ule mlango ukafungwa kwa pupa

huku ile gari ikiondoka kwa kasi eneo lile.

Sikukata tamaa nikampita yule mtu niliyemchapa risasi na kuzidi kutimua

mbio nikilifukuza lile gari kwa nyuma na wakati nikifanya vile nikawa nikiendelea

kumuita Mwasu kama mwehu. Watu waliokuwa wakifuatilia lile tukio wakasimama

na kunishangaa hata hivyo sikuwatilia maanani badala yake nikaendelea kutimua

mbio nikilifukuza lile gari. Lile gari likaendelea na safari kwa mwendo wa kasi na

lilipomaliza kuuvuka ule mzunguko wa barabara wa Askari Monument nikaona kitu

fulani kikirushwa kutoka kwenye dirisha moja la upande wa kushoto wa lile gari

na kuangukia kando ya ile barabara.Mara nikaliona lile gari likipunguza mwendo

lakini ghafla likaongeza kasi tena pale nilipoanza kulinyooshea bastola. Hata hivyo

nikaachana na mpango wa kulifyatulia risasi kwani lile gari tayari lilikuwa limeingia

kwenye eneo la msongamano ingawa dereva wa lile gari alikuwa makini na alipopata

upenyo mdogo akautumia vizuri kuniacha solemba.

Muda mfupi uliofuata nikavuka ile barabara nikienda kuokota kile kitu

kilichotupwa dirishani kutoka katika lile gari nililokuwa nikilifukuza ambalo sasa

lilikuwa limefanikiwa kunitoroka. Nilipofika lile eneo nikauona ule mkoba wa ngozi

wa Mwasu na hapo nikapata matumaini kidogo. Haraka nikauokota ule mkoba na

nilipolitazama lile gari nikaliona kuwa tayari lilikuwa limeshapita eneo la New Afrika

Hotel na lilipofika mbele likaingia upande wa kushoto kuifuata ile barabara ya Kivukoni

na baada ya muda mfupi lile gari likawa limepotea kabisa machoni mwangu. Mwasu

alikuwa ametekwa.

Niliendelea kusimama lile eneo huku mikono yangu nimejishika kiunoni katika

hali ya kukata tamaa na mawazo mengi yakipita kichwani mwangu. Watu wakawa

wakinishanga hata hivyo sikujishughulisha nao. Nilitamani kukodi bodaboda na

kuanza kulifukuza lile gari hata hivyo wazo hilo nikaliweka kando kwani eneo lile

halikuwa na huduma ya usafiri wa bodaboda kutokana na sheria za jiji la Dar es

Salaam kukataza usafiri wa bodaboda maeneo ya mijini katika namna ya kupunguza

msongamano barabarani. Labda usafiri wa teksi ungeweza kunisaidia lakini nilijua

kuwa kwa muda ule tayari nilikuwa nimechelewa kwani kutoka pale nilipokuwa

hadi kwenye eneo la maegesho ya teksi kulikuwa na umbali kiasi kwamba hadi pale

ambapo ningefanikiwa kupata usafiri lile gari lingekuwa tayari limekwisha fika mbali

hivyo nikaachana na mpango ule.

Watu walikuwa wameanza kukusanyika wakinishangaa na kwa kweli sikuipenda

kabisa hali ile hivyo haraka nikairudisha bastola yangu ndani ya koti na kuanza kurudi

haraka kule nilipotoka. Nilimkuta yule mtu niliyempiga risasi akiwa bado amelala pale

chini huku akigugumia kwa maumivu makali ya zile risasi sambamba na damu nyingi

iliyokuwa ikiendelea kutoka kwenye yale majeraha. Hata hivyo wakati huu yule mtu

alikuwa amezungukwa na kundi kubwa la mashuhuda ambao mara tu waliponiona

wakaanza kutawanyika. Sikutaka kupoteza muda eneo lile hivyo nilipomfikia yule

mtu nikaiokota ile bastola yake kisha nikamnyanyua yule mtu na kumtupia begani

kwangu halafu nikielekea kwenye maegesho ya teksi yaliyokuwa jirani na eneo lile.

Muda mfupi uliyofuata mimi na mateka wangu tulikuwa kwenye teksi tukielekea eneo

la Magomeni sehemu kulipokuwa na hospitali moja ya kichochoroni yenye huduma

nzuri ambapo niliamini kuwa yule mateka wangu angepatiwa tiba ya kuaminika kabla

ya mahojiano ya kina kufuatia.



#254

CHUMBA KILIKUWA KIKUBWA chenye umbo mraba la kuta safi

zilizonyooka vizuri. Kulikuwa na mlango mmoja tu wa chuma mkubwa na

mweusi uliokuwa kwenye kona moja ya kile chumba upande wa kushoto na

mlango ule ulikuwa umefungwa kikamilifu kwa nje. Ukutani hapakuwa na dirisha

hata moja na hivyo kupelekea giza zito kutanda mle ndani. Sakafu ya chumba kile

ilitengenezwa kwa tarazo nadhifu yenye nakshi nzuri za kila namna. Joto la chumba

lilikuwa kali ingawa hewa ya mle ndani ingeweza kumruhusu binadamu yeyote kuishi.

Katikati ya chumba kulikuwa na meza ya mbao ndefu na pana kiasi yenye umbo

mstatili chini ya balbu ya umeme yenye mwanga mkali iliyokuwa imeshikiliwa na waya

mrefu wa umeme kutoka juu ya dari ya chumba kile. Upande wa pili wa meza ile

kulikuwa na viti vitatu vya ofisini vyenye foronya laini vyeusi. Upande mwingine wa

meza ile kulikuwa na kiti kimoja cha chuma chenye mikanda maalum na nikatika kiti

kile ndipo Mwasu alipokuwa ameketi na zaidi ya pale hapakuwa na mtu mwingine mle

ndani isipokuwa ukimya wa kutisha.

Fahamu zilikuwa zimeanza kumrudia Mwasu taratibu huku kumbukumbu sahihi

zikianza kujitengeneza upya kichwani mwake. Taratibu akayafumbua macho yake kwa

shida kabla ya kuanza kuyatembeza mle ndani. Hata hivyo ubongo wake ukakawia

kumletea tafsiri ya haraka juu ya taswira zilizokuwa zikijengeka machoni mwake na

badala yake akajikuta akipambana na maumivu makali yaliyofufuka upya kutoka

sehemu ya nyuma ya kichwa chake na kusambaa mwili mzima. Kabla ya kuanza

kujiuliza pale ni wapi taratibu akajikuta akianza kukumbuka mambo yaliyomtokea

huko nyuma.

Akiwa bado ameketi kwenye kile kiti Mwasu akajikuta akiwakumbuka wanaume

watatu waliovaa suti nyeusi nadhifu wakati walipofika ofisini kwake na kumuulizia

Chaz Siga huku wakijitia kuwa walikuwa wakihitaji msaada wake wa haraka.

Akaendelea kukumbuka namna alivyowakaribisha vizuri wanaume wale ofisini kabla

ya kuanza kuingiwa na mashaka dhidi yao baada ya kumuona mmoja miongoni mwao

akiwa ameichomeka bastola yake kiunoni kwa hila huku amening’iniza pingu pindi

alipolisogeza koti la suti yake kwa bahati mbaya wakati alipokuwa akijiandaa kuketi

katika viti vya wageni vilivyokuwa mle ndani ofisini.

Mwasu akaendelea kukumbuka namna alivyowahadaa watu wale kuwa ile

haikuwa ofisi ya Chaz Siga ama mtu waliyekuwa wakihitaji kumuona kauli ambayo

wale watu hawakuwa tayari kuiamini hata kidogo kiasi cha kutoa vitambulisho

vyao vinavyowatanabaisha kuwa wao ni wanausalama na kumwonesha huku

wakimtahadharisha kuwa wangemuweka chini ya ulinzi endapo angekataa kuwapa

ushirikiano wa kutosha. Mwasu akaendelea kukumbuka namna alivyojitia kukubaliana

na hoja ya wale watu huku akijidai kuingia kwenye ofisi ya Chaz Siga na kumpigia

simu Chaz Siga ili kumfahamisha kuwa kulikuwa na watu waliokuwa wakimsubiri

pale ofisini. Mwasu akaendelea kukumbuka namna alivyoutumia mlango wa dharura

uliokuwa kwenye ofisi ya Chaz Siga kuwatoroka wale watu huku wakiwa bado

wameketi kwenye viti vya wageni vya ile ofisi wakimsubiri.

Mwasu bado akaendelea kukumbuka namna alivyogeuka nyuma wakati alipokuwa

akitembea kwenye barabara ya tatu kutoka kule ilipokuwa ile ofisi na kushtukia kuwa

wale watu aliowatoroka kule ofisini walikuwa nyuma yake hatua chache karibu

kumfikia hali iliyompelekea aanze kutimua mbio akiwakimbia wale watu kabla ya

kumpigia simu Chaz Siga na kumfahamisha juu ya tukio lile. Kumbukumbu kamili

zikiwa mbioni kujengeka kichwani mwake Mwasu akajikuta akikumbuka namna

alivyoitwa na Chaz Siga katika yale makutano ya barabara ya Jamhuri na barabara ya

Morogoro muda mfupi kabla hajatekwa na wale watu waliokuwa ndani ya gari nyeusi

aina ya Toyota Noah iliyokuja na kusimama ghafla kando yake wakati alipokuwa

akiendelea kutimua mbio kuwakimbia wale watu waliokuwa wakimfukuza nyuma

yake. Kufikia pale akajikuta akikumbuka namna alivyomuona Chaz Siga akitimua

mbio kulifukuza lile gari lililotumika kumteka muda mfupi baada ya milio miwili ya

risasi kusikika nyuma yake kabla ya wale watu wawili miongoni mwa wale watu watatu

waliokuwa wakimfukuza nao kuingia kwenye lile gari na kisha lile gari kuondoka kwa

kasi eneo lile.

Kumbukumbu zile zikapelekea tabasamu jepesi kuanza kuchomoza usoni kwa

Mwasu pale alipokumbuka namna alivyofanikiwa kuurusha mkoba wake wa ngozi

kupitia kwenye dirisha moja la lile gari wakati alipogeuka nyuma na kumuona Chaz

Siga akitimua mbio kulifukuza lile gari nyuma yao. Ni katika ule mkoba wake wa

ngozi ndiyo kulipokuwa na taarifa zote muhimu za ofisini ikiwemo ile External hard

disc yenye mafaili chungu mzima ndani yake likiwemo faili la upelelezi wa mkasa wa

Mifupa 206 ambalo upelelezi wake ulikuwa bado ukiendelea kufanyika pamoja na simu

yake ya mkononi. Hivyo alikuwa na hakika kuwa hadi kufikia wakati ule wale watekaji

walikuwa hawajafanikiwa kupata kitu chochote cha maana kutoka kwake na hivyo

kujikuta akipata faraja.

Mwasu akaendelea kukumbuka namna alivyopigwa na kitu kizito nyuma ya kichwa

chake muda mfupi mara baada ya lile gari jeusi Toyota Noah liliyotumika kumteka

lilipoingia kwenye barabara ya Kivukoni na kuanza kutimua mbio. Kufikia pale

hakufahamu tena kilichoendelea hali iliyompelekea aamini kuwa alikuwa amepoteza

fahamu baada ya shambulio lile la nyuma ya kichwa chake.

Ndani ya chumba kile kikubwa Mwasu akajikuta akiyatembeza macho yake

taratibu mle ndani huku mawazo mengi yakipita kichwani mwake. Sasa hakuwa na

shaka yoyote kuwa watekaji wale ndiyo waliokuwa wamemfikisha kwenye chumba

kile huku akiwa bado amepotewa na fahamu. Alipoanza kujichunguza akagundua

kuwa mikono na miguu yake ilikuwa imefungwa kwa mikanda maalum ya kile kiti cha

chuma alichoketi hata hivyo hali ile haikumshtua kwani alifahamu haraka ni maana

ya tukio lile.

Hivyo akaendelea kuyachunguza mandhari yale huku akili yake ikiendelea

kusumbuka katika kutaka kufahamu pale alikuwa wapi ingawaje hisia zake zilimueleza

kuwa alikuwa kwenye chumba fulani cha siri katika jengo moja la ghorofa lililoko

kando kidogo ya jiji la Dar es Salaam. Giza lililokuwa mle ndani likampelekea ashindwe

kufahamu muda ule ulikuwa ni saa ngapi na kama mchana au usiku huku akiwaza nini

ambacho kingefuatia baada ya pale.

Kelele za ghafla za kufunguliwa kwa mlango wa kile chumba zikayakatisha mawazo

ya Mwasu na hapo akageuka nyuma na kuutazama ule mlango kama bomu lililokuwa

limebakisha sekunde chache kabla ya kulipuka. Muda mfupi uliofuata ule mlango

ukafunguliwa kisha wakaingia wanaume wanne,watatu miongoni mwao wakiwa ni

wenye umri wa kati ya miaka arobaini na tano hadi hamsini na mbili. Mmoja alikuwa

kijana wa miaka thelathini na kitu huku wote wakiwa wamevaa suti nyeusi nadhifu

zilizowakaa vyema katika miili yao mikubwa na mirefu yenye afya.

Mara tu wale watu walipoingia mle ndani yule kijana akaufunga ule mlango nyuma

yao wakati wale wanaume wengine watatu walipokuwa wakielekea kwenye vile viti

vitatu vilivyokuwa upande wa pili wa ile meza katika nyuso zisizokuwa na chembe

ya mzaha. Walipofika wakavuta vile viti nyuma na kuketi huku yule kijana akienda

na kusimama kwa nyuma. Kitambo kifupi cha ukimya kikafuata mle ndani huku kila

mmoja akionekana kumtegea mwenzake kuongea. Mwasu alipoyatembeza macho

yake kuwatazama wale watu akagundua kuwa wote sura zao zilikuwa ngeni kabisa

machoni mwake isipokuwa yule kijana aliyesimama mwisho wa ile meza ambaye

haraka alimkumbuka kuwa alikuwa miongoni mwa wale watu watatu waliofika kule

ofisini kumuulizia Chaz Siga.

Mkurugenzi mkuu wa idara ya usalama wa taifa M.D. Kunzugala sasa alikuwa

ameketi katikati ya kamishina wa upelelezi wa makosa ya jinai nchini Evans Mchafu

upande wa kulia na mkuu wa intelijensia ya usalama wa taifa Sulle Kiganja upande wa

kushoto. Taarifa za kukamatwa kwa Mwasu kama mmoja wa washukiwa waliokuwa

wakitafutwa kuhusiana na mauaji ya wanausalama wake zilikuwa zimeifikia ofisi yake

mapema sana na hivyo kurejesha tumaini kubwa la kuendelea kutetea wadhifa wake.

Na sasa M.D Kunzugala na wanausalama wake waandamizi walikuwa wameingia

kwenye chumba kile cha siri kufanya mahojiano na Mwasu kufuatia matukio ya mauaji

ya maafisa usalama yaliyokuwa yakiendelea kutokea jijini Dar es Salaam.

Ukimya kidogo ulipokuwa mbioni kutawala mle ndani M.D.Kunzugala akageuka

na kuwatazama wale maafisa usalama wenzake aliyoongozana nao mle ndani kisha

akakohoa kidogo na kuyapeleka macho yake kwa Mwasu kabla ya kuvunja ukimya.

“Binti,tunachohitaji sasa kutoka kwako ni ushirikiano wako mzuri katika maswali

yetu ili kuturahisishia kumpata mhusika wetu tunayemuhitaji na baada ya hapo

tutakuachia huru ukaendelee na shughuli zako. Lakini vilevile kama utakuwa mkaidi

bado tunazo njia nyingi za kukulazimisha kuongea ambazo siyo nzuri kwa afya yako

ingawa hatutakuwa na namna ila kuzitumia pale tutakapohitajika kufanya hivyo”

M.D. Kunzugala akaweka kituo huku akimtazama Mwasu kwa makini kisha akaingiza

mkono katika mfuko wa koti lake la suti na kuchukua redio ndogo ya kijasusi yenye

uwezo wa kurekodi mazungumzo yale ambapo aliiwasha na kisha kuiweka pale juu

mezani. Kitendo ambacho kiliwapelekea na wale maafisa wengine walioketi kando

yake kuchukua vitabu vidogo na kalamu kutoka mifukoni mwao na kuviweka juu

ya ile meza tayari kuandika maelezo yote muhimu ambayo yangefanyika katika

mahojiano yam le ndani.

“Jina lako unaitwa nani?” M.D. Kunzugala akavunja tena ukimya.

“Mwasu”Mwasu akajibu kwa woga huku akitetemeka.

“Jina lako kamili” mkurugenzi wa upelelezi wa makosa ya jinai nchini Evans

Mchafu akadakia na kusisitiza .

“Mwasu Mayanja” Mwasu akaongea huku akiwatazama wale watu kwa mashaka

“Taja umri wako,kabila na dini” Sulle Kiganja akadakia na Mwasu alipomaliza

kutaja mahojiano yale yakaendelea.

“Unaishi wapi hapa Dar es Salaam?” M.D.Kunzugala akauliza.

“Eneo la Fire” Mwasu akaongea kwa utulivu.

“Namba ya nyumba unayoishi?” Evans Mchafu akauliza huku akimtazama

Mwasu kwa makini.

“Nyumba namba 27” Mwasu akafafanua.

“Unamfahamu mtu anayeitwa Chaz Siga?” M.D. Kunzugala akauliza huku

watu wote mle ndani wakimtazama Mwasu kwa uyakinifu. Mwasu akajikuta

akitaka kushawishika kukataa kuwa alikuwa hafahamu chochote kuhusu Chaz Siga

lakini alipokumbuka lile onyo alilopewa awali kabla ya kuanza kwa mahojiano yale

akanyoosha maelezo.

“Namfahamu”

“Yeye ni nani kwako?” Sulle Kiganja akadakia.

“Mwajiri wangu”

“Umeanza kufanya kazi kwake kwa muda gani?” Evans Mchafu akatumbukiza

swali.

“Zaidi ya mwaka mmoja sasa” Mwasu akajibu huku akiyatembeza macho yake

kuwatazama wale watu

“Kabla ya hapo ulikuwa ukifanya kazi wapi?” M.D Kunzugala akauliza huku

wenzake wakiinama na kuandika maelezo yale kwenye vile vitabu vyao katika kila

hatua muhimu iliyokuwa ikifikiwa katika mahojiano yale.

“Sikuwa na kazi” Mwasu akafafanua.

“Kazi gani uliyokuwa ukiifanya katika ofisi ya Chaz Siga?” M.D Kunzugala

akauliza huku akivigongesha vidole vyake juu ya ile meza.

“Katibu muhtasi” Mwasu akajibu kwa utulivu na kupelekea kitambo kifupi cha

ukimya kutokea mle ndani kabla ya Evans Mchafu kuvunja ukimya ule kwa swali.

“Ofisi yenu inashughulika na nini binti?”

“Upelelezi binafsi” jibu la Mwasu likawapelekea wale watu mle ndani wageuke na

kutazamana hata hivyo hakuna aliyemsemesha mwenzake ingawaje kupitia nyuso zao

kulikuwa na kila hakika kuwa hoja fulani zilikuwa zimeibuliwa vichwani mwao.

“Ofisi yenu ina leseni inayowaruhusu kufanya hivyo?” M.D Kunzugala akauliza

“Mimi sifahamu labda mwajiri wangu” Mwasu akajitetea

“Unatambua kuwa sheria za nchi hii zinamkataza mtu yeyote kuunda jeshi,kikundi

cha ulinzi au taasisi yoyote ya usalama inayoshabihiana na kazi zinazofanywa na ofisi

yenu?” Evans Mchafu akatumbukiza hoja.

“Hapana,sifahamu” Mwasu akajibu kwa woga kabla ya M.D Kunzugala kuendelea.

“Una hisia zozote juu ya sababu za kwa nini upo hapa?”

“Hapana” Mwasu akajibu kwa utulivu hata hivyo macho yake yalikataa kudanganya.

“Mwajiri wako Chaz Siga anahusishwa na mauaji ya watu kadhaa wakiwemo

wanausalama yanayoendelea kutokea hapa Dar es Salaam. Unafahamu chochote juu

ya hilo?” Sulle Kiganja akauliza huku akimtazama Mwasu kwa makini.

“Sifahamu” Mwasu akaitikia.

“Unaamini kuwa mwajiri wako Chaz Siga anaweza kuhusika na mauaji haya?”

M.D Kunzugala akauliza kwa utulivu baada ya kuingiza mkono mfukoni na kuchukua

picha tofauti zilizopigwa kwenye matukio ya vifo vya wanausalama wale na kuzisogeza

karibu na Mwasu.

“Siamini”

“Kwa nini huamini?” Evans Mchafu akauliza.

“Kwa kipindi chote nilichofanya kazi na Chaz Siga namtambua kama mtu

mpenda haki utu na wakala mkubwa wa amani hapa nchini kupitia tabia yake. Hivyo

sioni namna inayoweza kuniridhisha nikubaliane na nyinyi kuwa Chaz Siga ni muuaji

na ndiye aliyehusika na unyama huu” Mwasu akafafanua kiasi cha kuwapelekea wale

watu mle ndani watazamane kidogo na kisha kuyapeleka macho yao kwake.

“Ofisi yenu kwa sasa inahusika na upelelezi wa kesi ya namna gani?” Sulle Kiganja

akauliza swali lililompelekea kwa mara ya kwanza Mwasu ajikute akibabaika kabla ya

kudanganya pale alipoanza kuhisi madhara ambayo yangejitokeza baada ya kusema

ukweli.

“Upelelezi wa kesi nyingi ambazo siyo rahisi kuzikumbuka zote kwa pamoja”

Kamishna wa upelelezi wa makosa ya jinai nchini Evans Mchafu akawa wa kwanza

kugundua kuwa Mwasu alikuwa akidanganya kabla ya wenzake nao kushtukia hata

hivyo hakuna aliyetia neno.

“Taja baadhi ya kesi unazozikumbuka” M.D Kunzugala akatumbukiza hoja huku

akimkata Mwasu jicho la udadisi. Lilikuwa swali la mtego lililompelekea Mwasu aanze

kubabaika tena huku akifikiria namna ya kujieleza.

“Nyingi ni kesi za watu binafsi zinazohusiana na usaliti katika mapenzi” Mwasu

akadanganya.

“Na hizo chache zilizosalia?” Evans Mchafu akauliza huku tabasamu la kinafiki

likichomoza usoni mwake.

“Zinahusu wizi na ubadhirifu wa fedha katika taasisi binafsi” Mwasu akadanganya

hata hivyo ni kama aliyejidanganya mwenyewe kwani uongo wake ulikosa ushawishi

kabisa kwa wale magwiji wa shughuli za kiusalama nchini na kuwafanya waishie

kutabasamu huku wakifahamu fika kuwa Mwasu alikuwa akikwepa kuzungumza

ukweli juu ya jambo fulani.

“Mwajiri wako anaishi wapi?” M.D Kunzugala akauliza.

“Sijawahi kufika nyumbani kwake kama yeye ambavyo hajawahi kufika kwangu”

“Hujawahi kumsikia hata siku moja akizungumzia juu ya mahali anapoishi hapa

jijini Dar es Salaam?” Sulle Kiganja akauliza huku akiacha kuandika na kumtazama

Mwasu.

“Hapana” Mwasu akajibu huku akitikisa kichwa kuonesha kukataa hata hivyo wale

maafisa usalama wakafahamu haraka kuwa Mwasu alikuwa akiwadanganya kwani

ilikuwa ni vigumu sana kwa ofisi ndogo kama ile halafu wafanyakazi wasifahamiane

wanapoishi kwa muda wa zaidi ya mwaka mmoja.

“Kwa nini uliwatoroka watu wangu ofisini kwako wakati walipotaka kuonana na

mwajiri wako?” Sulle Kiganja akauliza.

“Nilihisi kuwa hawakuwa watu wema” Mwasu akajitetea na hapo kitambo kifupi

cha ukimya kikafuatia mle ndani kabla ya M.D Kunzugala kuibua hoja.

“Wakati watu wetu walipokuwa wakikuchukua kistaarabu kwenye gari

inasemekana kuwa uliutupa mkoba wako dirishani. Unaweza kutueleza nini maana

ya kitendo kile?”

“Ni kama nilivyosema kuwa nilihisi wale watu waliokuja ofisini na hatimaye

baadaye kuniteka hawakuwa wema ndiyo kisa nikaamua kuurusha nje mkoba wangu

kwani ndani yake kulikuwa na taarifa muhimu za ofisi na sikujua watu wenu walikuwa

na nia gani na mimi” Mwasu akajitetea.

“Mtu uliyemrushia huo mkoba ni nani?” Evans Mchafu akauliza na kumpelekea

Mwasu ashikwe tena na kigugumizi.

“Tuambie binti usitupotezee muda wetu” M.D Kunzugala akaongea

“Mwajiri wangu” Mwasu akaongea kwa woga

“Chaz Siga?” Sulle Kiganja akauliza kwa shauku

“Ndiyo”

“Alijuaje kama wewe ulikuwa pale?”

“Nilimpigia simu” Mwasu akaongea kwa utulivu na baada kitambo kifupi kingine

cha ukimya huku wale makachero wakitazamana na kunong’onezana jambo mmoja

akavunja ukimya.

“Ofisi yenu ina wafanyakazi wangapi?” M.D Kunzugala akauliza baada ya

kukumbuka kuwa taarifa za kifo cha mmoja wa maafisa wake wa juu wa usalama

aitwaye Mbingu Balimenya kilichotokea kule kwenye korido ya jengo moja la ghorofa

lililoko maeneo posta kilikuwa kimetokana na risasi iliyofyatuliwa na mtu mwingine

na siyo Chaz Siga.

“Tupo wafanyakazi wawili tu,mimi na mwajiri wangu Chaz Siga” Mwasu akajibu

kwa utulivu kitendo kilichompelekea Sulle Kiganja kutumbukiza mkono mfukoni na

kutoa karatasi ndogo yenye namba za gari alizozipata kutoka kwa vijana wake wa

kazi,Fulgency Kassy,Pweza na Kombe. Ilikuwa ni namba ya gari la Momba lililokuwa

likitumika na Koplo Tsega. Sulle Kiganja akaisogeza karatasi ile karibu na Mwasu pale

mezani kabla ya kumuuliza

“Unalifahamu gari lenye namba hizi?” Mwasu akainama na kuzitazama zile namba

za gari kwenye ile karatasi kwa makini kabla ya kutikisa kichwa chake katika namna

ya kukataa.

“Sizifahamu”

“Hujawahi kuliona popote gari lenye namba hizi?” Sulle Kiganja akauliza katika

namna ya kutaka kupata hakika huku akimtazama Mwasu kwa makini.

“Hapana” Mwasu akajibu kwa utulivu na hapo Sulle Kiganja akakichukuwa kile

kikaratasi na kukitia mfukoni huku taratibu akiegemea kiti na kuvigongesha vidole

vyake juu ya ile meza kama mtu afikiriaye jambo fulani kisha kikafuata kitambo kifupi

cha ukimya kabla ya M.D Kunzugala kukohoa kidogo na kuvunja tena ukimya.

“Unadhani ni wapi tunapoweza kumpata mwajiri wako?”

“Sehemu pekee tunayokutana mimi na yeye ni ofisini zaidi ya pale hakuna sehemu

nyingine ninayoifahamu” Mwasu akafafanua kisha kitambo kifupi cha ukimya

kikafuatia tena mle ndani huku wale makachero wakimtazama.

“Sikiliza binti pengine ukawa hufahamu kuwa sisi ni akina nani na uzito wa suala

tunalojitahidi kulitatua ili maafa yasiongezeke. Hakuna namna nyingine itakayokuweka

huru kama hutotupa ushirikiano. Tunaamini kuwa katika mazingira fulani

tusiyoyafahamu unaweza kutusaidia kumkamata mwajiri wako vinginevyo tunaweza

kutumia njia zetu nyingine lakini wewe hutokuwa salama na sidhani kama unapenda

tufike huko” Evans Mchafu akaongea kwa utulivu huku akimtazama Mwasu na

wakati akifanya vile Sulle Kiganja akawa akiandika maelezo fulani kwenye kile kitabu

chake kidogo huku akimtazama Mwasu katika uso ulioanza kupoteza uvumilivu.

“Nitajie namba za simu za mwajiri wako” Sulle Kiganja akauliza kwa makini huku

akimtazama Mwasu usoni. Lilikuwa swali la kushtukiza lililompelekea Mwasu ababaike

na kushindwa kujibu haraka. Ukimya kidogo ukapita huku Mwasu akiyatembeza

macho yake taratibu kuwatazama wale watu mbele yake kama afikiriaye jambo kisha

akaongea kwa utulivu.

“Namba za simu ya mwajiri wangu bado sijazishika kichwani” Sulle Kiganja

kuona vile akashindwa kuvumilia akainuka na kumchapa Mwasu kofi moja la nguvu

usoni kiasi cha kumpelekea Mwasu apige yowe kali la maumivu huku damu nyepesi

ikimtoka mdomoni.

“Chaz Siga mpaka sasa anamshikilia mateka mmoja wa maafisa wangu wa usalama

baada ya jaribio lake la kumuua kushindikana. Kama hutoshirikiana nasi katika

kumnasa mwajiri wako basi huyo mateka anayemshikilia huwenda naye akauwawa

kama ilivyokuwa kwa maafisa usalama wangu wengine na hatuwezi kukubali mtu wetu

apoteze maisha huku wewe ukiendelea kuishi vizuri katika chumba hiki. Nadhani

unafahamu ninachokiongea” M.D Kunzugala akafoka huku akimtazama Mwasu kwa

hasira kisha akasogeza kiti nyuma na kusimama akifuatiwa na wale wenzake kisha

pasipo kuongea neno wakaanza kuondoka mle ndani wakielekea kwenye ule mlango

wa kutokea nje ya kile chumba. Yule kijana akawahi kuwafungulia ule mlango na

walipotoka nje na yeye akafuatia nyuma yao huku ule mlango ukifungwa.

Kitambo kifupi cha ukimya kikafuata huku maswali mengi yakipita kichwani

kwa Mwasu juu ya mahojiano aliyomaliza kufanyiwa na wale watu waliyotoka mle

ndani muda mfupi uliopita. Mawazo yake hatimaye yakahamia kwa Chaz Siga na

kumpelekea kwa mara ya kwanza ajikute akijuta kuwa sehemu ya mkasa huu.

Muda mfupi mara baada ya wale watu kuondoka akiwa katikati ya mawazo mara

Mwasu akajikuta akishikwa na wasiwasi baada ya kuusikia ule mlango wa kile chumba

ukifunguliwa tena na kisha wanaume watatu wengine kuingia mle ndani. Wawili

walikuwa vijana na mmoja mzee wa makamo. Yule mzee alikuwa amevaa mavazi ya

kidaktari,koti jeupe, stetheskopu shingoni na miwani yake mikubwa machoni huku

mkononi akiwa ameshika kisanduku kidogo chenye dhana muhimu za kazi. Wale

vijana wawili mikononi walikuwa wamevaa glovu nyepesi za mpira huku kila mmoja

amebeba kiboksi kidogo. Ingawa sura za watu wale hazikuonesha tashwishi yoyote

lakini Mwasu alipowatazama akajikuta akianza kuwalaani hata kabla hawajamfikia

huku akianza kuijutia nafsi yake.

Mlango wa kile chumba ulipofungwa wale watu wakamsogelea Mwasu pale

kwenye kiti na kumtazama kana kwamba hawakuwahi kumuona kiumbe kama yule

tangu wazaliwe.

“Hujambo binti mzuri?” yule daktari mzee akamsogelea Mwasu akimuuliza kwa

utulivu na kumshika bega huku wale vijana wenye miili mikubwa wakiwa kando yake.

Hata hivyo Mwasu hakusema neno badala yake akabaki akiwatazama tu.

“Hatujawahi kumpokea mgeni wa aina yako humu ndani. Kazi yetu ni

kushughulika na wanaume hasa wale walioshindikana kutupatia taarifa tunazozihitaji.

Wewe umekuwa changamoto mpya kwetu. Hata hivyo hakuna mtu aliyewahi kuingia

humu ndani na kutoka na siri yake moyoni kwani tuna hakika na huduma hii. Kwa

muda wa miaka thelathini na mbili tangu nianze kuifanya hii kazi ni wanaume

wawili tu waliokufa humu ndani na siri zao moyoni na nikikutazama wewe huelekei

kuivunja rekodi hiyo. Msichana mrembo kama wewe ingefaa uwe nyumbani kulea

watoto badala ya kujiingiza kwenye mambo hatari kama haya” yule mzee akaongea

kwa utulivu huku akitia jitihada za kuvaa glovu mikononi mwake baada ya kuacha

kumtazama Mwasu na kufungua kile kisanduku chake chekundu chenye vifaa vingi

visivyoelezeka kikiwemo kibunda cha glovu nyingi za mpira. Yule daktari alipomaliza

akageuka tena na kumtazama Mwasu.

“Hiki ni chumba ambacho hakiruhusu sauti ya namna yoyote kupenya na kutoka

nje hivyo usipoteze muda wako kupiga kelele.

“Mnataka kunifanya nini?” Mwasu akauliza kwa hofu huku akijitahidi kufurukuta

kwenye kile kiti bila mafanikio kwani mwili wake ulikuwa umefungwa kwa mikanda.

“Tunataka utueleze kila kitu unachokifahamu kuhusu huyu mtu anayeitwa Chaz

Siga ambaye wewe umejinadi kuwa ni mwajiri wako” yule daktari akaongea kwa

utulivu huku akikisogeza kiboksi kimoja kati ya vile viboksi viwili walivyokujanavyo

wale vijana.

“Kitu gani?” Mwasu akauliza huku amejawa hofu hata hivyo hakuna aliyemjibu

badala yake kijana mmoja aliyekuwa nyuma yake akasogea na kuichana blauzi yake

kifuani na alipomaliza akafungua na sidiria yake na kuitupa kando kabla ya kuyatazama

matiti ya Mwasu kwa utulivu kama mtafiti. Yule daktari mzee alipofungua kiboksi

kimoja akatumbukiza mkono na kuchukuwa kilichokuwa ndani yake. Alipoutoa

mkono wake ulikuwa umeshika panya buku mkubwa mwenye meno makali

yaliyojitokeza nje huku akiuchezeshachezesha mkia wake kwa usongo na kupiga

kelele kali inayoumiza masikio.

“Mnataka kunifanya nini?” Mwasu akauliza huku akitetemeka kwa hofu.

“Rafiki yetu John hajakula kwa muda wa siku tatu” yule daktari akaongea huku

akimuinua juu yule panya na kumgeuzageuza katika namna ya kumchunguza.

“Naomba mniache nimeshawaambia kila kitu ninachokifahamu?” Mwasu akafoka

hata hivyo hakuna aliyemsemesha badala yake wale watu kwa pamoja wakaangua

kicheko cha dhihaka kisha yule daktari mzee akachukua mfuko mweusi wa kitambaa

kutoka kwa mmoja wa wale vijana na kumtumbukiza yule panya ndani ya ule

mfuko. Kufumba na kufumbua wale vijana wakauchukua ule mfuko na kumvalisha

Mwasu hadi sehemu za matiti yake kifuani. Kilichofuata baada ya pale ni yule panya

buku mwenye njaa kali kuanza kuzitafuna sehemu mbalimbali za mwili wa Mwasu

yakiwemo matiti yake. Kiwiliwili cha Mwasu kikiwa ndani ya ule mfuko mweusi wa

nguo wenye panya Mwasu akaanza kupiga mayowe ya hofu iliyotokana na maumivu

makali ya majeraha ya kutafunwa na yule panya huku akikukurika kwa nguvu zake

zote pale kwenye kiti. Hata hivyo Mwasu hakufanikiwa kujinasua kutoka katika kadhia

ile na hapo zoezi lile likaendelea huku yule panya akiendelea kuzitafuna sehemu za

mwili wake hadi pale yule daktari alipowaambia wale vijana wasitishe na kuuondoa

ule mfuko wenye panya.

Ule mfuko ulipoondolewa Mwasu alikuwa akilia kwa maumivu makali yaliyotokana

na majeraha ya yule panya huku macho yamemtoka na kuwa mekundu kwa hofu

Yule panya alikuwa amemtafuna na kumtia majeraha kila mahali zikiwemo sehemu

za matiti yake na kusababisha damu nyingi kumtoka. Mwasu akaendelea kulia huku

akihema ovyo.

“Tuambie binti,Chaz Siga ni nani na anapeleleza kitu gani?” yule daktari mzee

akaongea kwa utulivu huku akichukua sigara moja kutoka katika pakiti yake mfukoni

alipoiweka mdomoni akajiwashia kwa kiberiti chake cha gesi na kuvuta mapafu

kadhaa kabla ya kuupuliza moshi pembeni.

“Nimekwisha waambia kuwa mimi sifahamu chochote zaidi ya hicho nilichowaeleza

kwenye mahojiano na maafisa wenu” Mwasu akaongea huku akiendelea kulia. Yule

daktari mzee akamtazama kwa utulivu kabla ya kuvunja ukimya.

“Sikiliza binti,katika miaka yote niliyofanya hii kazi na kulipwa mshahara mzuri

wa kumudu kuilea familia yangu vizuri na kusomesha watoto wangu hadi chuo kikuu

nimekuwa nikichukia sana kitendo cha kuiona roho ya binadamu pale inapouacha

mwili. Hata hivyo nimejikuta nikifurahi sana pale ninapokutana na mtu mkaidi kama

wewe”

“Nimekwisha waeleza kuwa sifahamu chochote” Mwasu akasisitiza huku

akiendelea kulia hali iliyompelekea yule daktari mzee afungue tena kiboksi kingine

na kuingiza mkono ndani yake kumchukua panya mwingine mkubwa zaidi ya yule

wa awali mwenye meno makali zaidi na njaa kali. Yule panya akawa akipiga kelele na

kuuchezesha chezesha mkia wake huku na kule huku akijipindapinda katika namna

ya kutafuta nafasi nzuri ya kutaka kutafuna vidole vya yule daktari mzee. Yule daktari

mzee bila kupoteza muda akamtia yule panya kwenye mfuko mwingine mweusi wa

nguo na bila kuchelewa ule mfuko akavalishwa tena Mwasu,mara hii akipiga mayowe

makubwa zaidi ya hofu huku akijitahidi kujinasua kwenye kile kiti bila mafanikio. Hata

hivyo sauti yake haikwenda popote mle ndani badala yake ikamezwa na sauti nzito

ya vicheko vya wale wanaume wakati yule panya alipokuwa akianza kuzishambulia

sehemu mbalimbali za mwili wake.



KUITAFUTA BENKI YA ZANZIBAR MARINE jijini Dar es Salaam halikuwa

jambo jepesi hata kidogo kwa kuzingatia kuwa hii ilikuwa ni benki mpya kabisa kuwahi

kufanya shughuli zake jijini Dar es Salaam. Ni katika benki hii ndipo mtu mwenye jina

la Aden Mawala aliposemekana kufanya kazi kama meneja wa benki hiyo. Kupitia

barua yenye ujumbe mfupi ndani ya bahasha ndogo ya kaki ambayo Koplo Tsega

alikuwa ameiichukua kule nyumbani kwa Balimenya usiku ule baada ya kupambana

na wale wanausalama wawili na hatimaye kuwaangamiza. Maelekezo ndani ya barua

ile kutoka kwa mtu mmoja asiyefahamika jina lake yalikuwa yameweka bayana kuwa

meneja wa benki ya Zanzibar Marine tawi la jijini Dar es Salaam ndugu Aden Mawala

alikuwa amepewa maelekezo yote muhimu ya kuhakikisha kuwa kiasi fulani cha fedha

nyingi sana zilizoingizwa kwenye benki yake anazifanyia mgao sahihi kufuatana na

orodha ya majina yote ya watu waliokuwa wameorodheshwa katika barua ile kutokea

tarehe fulani. Maelezo yale yaliendelea kuelekeza kuwa watu hao wangefika kwenye

benki hiyo pamoja na vitambulisho vyao vya kazi huku wakiwa na hundi zao tayari

kulipwa mgao wao katika fedha hizo. Mtoa taarifa kupitia barua ile ambaye hakutaja

jina lake aliendelea kusisitiza kuwa shughuli yote ya mgao wa fedha hizo ilipaswa

kufanywa katika mazingira yenye usiri mkubwa sana ingawa hakueleza kuwa ni lini

mgao huo ulipaswa kufanyika.

Kupitia orodha ya majina ya watu waliokuwa katika barua ile Koplo Tsega alikuwa

ameongeza ziada nyingine katika utafiti wake. Jambo moja muhimu aliloligundua

ni kuwa majina yote yaliyokuwa katika zile hundi alizozikuta kwenye ile bahasha

nyumbani kwa Meja Khalid Makame yalikuwa pia kwenye ile barua aliyoikuta

nyumbani kwa Balimenya isipokuwa majina ya watu wanne tu ambao hakuwafahamu.

Pili, hundi zile alizozipata nyumbani kwa Meja Khalid Makame zilikuwa ni za benki

ya Zanzibar Marine. Hivyo kwa namna moja au nyingine ni kuwa meneja wa benki ya

Zanzibar Marine jijini Dar es Salaam ndugu Aden Mawala alikuwa akifahamu kila kitu

kilichokuwa kikiendelea akiwemo yule mtu aliyetoa maelekezo yale kwenye ile barua.

Zanzibar Marine Bank ilikuwa kando ya barabara kuu ya Bagamoyo upande

wa kulia umbali mfupi baada ya kuyapita makutano ya barabara ya Kawawa na ile

barabara ya Mwai Kibaki eneo la Morocco kando ya jengo refu la ghorofa la Drive

Inn Plaza. Baada ya safari ndefu ya kuzunguka katika vitongoji vingi vya jiji la Dar

es Salaam na ulizauliza ya hapa na pale hatimaye Koplo Tsega akawa ameyafumania

maficho makini ya benki hii change jijini Dar es Salaam.

Mchana huu foleni ya magari katika barabara ya Bagamoyo ilikuwa kubwa na yenye

kukera hivyo Koplo Tsega akaona kuwa lingekuwa ni jambo la usumbufu sana kusubiri

foleni ile hadi ipungue ili apate nafasi nzuri ya kuchepuka upande wa pili wa barabara

ilipokuwa ile benki hivyo badala yake akaingia upande wa kushoto na kuegesha gari

lake kwenye eneo la maegesho ya magari la mgahawa maarufu wa kichina uitwao

Seafoods kisha akafungua mlango na kushuka akiwa katika mwonekano mpya kabisa

wa kofia nyeusi ya Sombrero kichwani, miwani nyeusi ya jua machoni, blauzi nyeusi

ya pullneck aliyoitanguliza ndani ya shati zito la jeans la rangi ya bluu bahari. Chini

alikuwa amevaa suruali nyepesi ya jeans iliyolichora vyema umbo lake maridhawa la

kike na buti ngumu za rangi ya udongo aina ya Travolta. Kwa kukwepa aina yoyote ya

bahati mbaya pale ambapo rabsha zozote zingejitokeza mbele ya safari Koplo Tsega

alikuwa ameamua kushuka na begi lake la mgongoni jeusi, jembamba na refu lenye

zana zote muhimu za kazi ikiwemo Sniper Rifle 338 Lapua Magnum, bunduki maalum

kwa ajili ya kudungulia windo sumbufu la umbali wa masafa marefu.

Kulikuwa na watu wachache waliokuwa wameketi kwenye sehemu ya nje ya

mgahawa ule wakijipatia huduma. Wakati Koplo Tsega alipokuwa akishuka kwenye

gari watu wale waligeuka na kumtazama hata hivyo hakutoa nafasi yoyote ya kugeuka

kuvutia badala yake akafunga mlango haraka na kuvuka barabara akielekea upande wa

pili eneo lilipokuwa lile jengo la benki ya Zanzibar Marine huku akikatisha katikati ya

foleni ndefu ya magari katika barabara ile.

Akiwa na hakika kuwa hakuna mtu yeyote aliyekuwa akimfuatilia nyuma yake mara

tu alipomaliza kuvuka barabara ile Koplo Tsega akatembea kandokando ya barabara

ile akishika uelekeo wa upande wa kulia hadi pale alipokifikia kizuizi cha mbele cha

kuingia kwenye benki ile kando ya kibanda cha mlinzi kilichokuwa na askari polisi

wawili ambapo alipita pembeni ya kizuizi kile katika njia ya wazi ya watembea kwa

miguu iliyopakana na bustani nzuri ya nyasi za kijani kibichi na miti mirefu ya miashoki

iliyopandwa katika mstari mnyoofu wa kupendeza mbele ya jengo lile la benki.

Koplo Tsega akaendelea kutembea kwa utulivu akielekea kwenye ile benki huku

kumbukumbu zake zikimueleza kuwa kabla ya jengo lile kutumika na Zanzibar Marine

Bank hapo awali lilikuwa likitumika kama makao makuu ya shirika fulani la mtandao

wa mawasiliano ya simu. Tangu kutokea mauaji ya Sikawa kwenye kile chumba

namba 18 cha Hotel 92 Dar es Salaam eneo la Ubungo, Koplo Tsega alikuwa ameamua

kuhamishia makazi yake kwenye chumba kimoja alichokuwa akiishi Sikawa kati ya

vyumba vingi vya uani vya wapangaji katika nyumba moja iliyokuwa eneo la Mwenge

mtaa wa Mama Ngoma. Huku akirudi usiku wa manane wakati wapangaji wote

wakiwa usingizini na kuondoka mapema sana alfajiri kabla ya watu wote hawajaamka

katika kile chumba kidogo cha kijana wa mjini chenye kitanda kidogo cha futi tano

kwa sita, kabati dogo la nguo, seti moja ya runinga juu ya meza yenye deki moja ya ya

dvd, spika dhaifu za muziki wa gheto na ndoo nyingi za maji zilizokuwa kwenye kona

mojawapo ya chumba kile. Ili kumuenzi Sikawa, Koplo Tsega alikuwa amejiapiza

kulipa kisasi kwa wote walio husika na kifo chake.

Nje ya jengo lile la benki ya Zanzibar Marine kwenye eneo la maegesho ya magari

kulikuwa na magari machache yaliyokuwa yameegeshwa. Koplo Tsega alipochunguza

akajikuta akifurahi baada ya kugundua kuwa miongoni mwa magari yaliyokuwa katika

maegesho yale lilikuwepo gari moja aina ya Landcruiser jeupe lililokuwa limeegeshwa

katika sehemu maalum ya maegesho yenye utambulisho wa cheo cha meneja wa benki

ile. Uwepo wa lile gari eneo lile ikawa ni ishara tosha kuwa meneja wa benki ile ndugu

Aden Mawala alikuwepo ofisini kwake kama kawaida akiendelea na shughuli zake za

kiofisi kama ilivyo ada. Hata hivyo mandhari ya nje ya ile benki yalitosha kuthibitisha

kuwa benki ile haikuwa na msongamano mkubwa wa wateja kama zilivyokuwa benki

nyingine zenye umri mrefu jijini Dar es Salaam.

Koplo Tsega akaendelea kutembea kwa utulivu akikatisha kuelekea sehemu ya

mbele ya benki ile yenye baraza pana ya sakafu ya marumaru za kuvutia na juu yake

imefunikwa na paa zuri na imara ya zege iliyoezekwa kwa vigae na kushikiliwa na

nguzo mbili upande wa kushoto na kulia. Koplo Tsega alipozifikia ngazi za baraza ile

akazipanda kwa utulivu kisha baada ya safari ya hatua chache mbele yake akausukuma

mlango mkubwa wa kioo na kupotelea mle ndani.

Ndani ya benki ile kulikuwa na watu wachache ambao kwa idadi yao wengi wao

walikuwa ni wazanzibar kama siyo watu wenye asili ya bara la Asia. Mandhari ya benki

ile mle ndani yalikuwa tulivu na ya kisomi. Viyoyozi makini vya mle ndani vilikuwa

vikiendelea kusukuma hewa safi yenye baridi ya wastani. Mara baada ya kuingia mle

ndani upande wa kushoto kulikuwa na ngazi za kuelekea juu ghorofani kwenye ofisi

nyingine za idara tofauti za benki ile kama idara ya mikopo, idara za sera, mipango

na utawala na nyinginezo. Sehemu ya chini katikati ya jengo kulikuwa na nguzo mbili

kubwa za uviringo zilizoishikilia sehemu ya juu ya jengo lile na sakafu ya mle ndani

ilifunikwa kwa zulia zuri la rangi ya kijivu.

Mara baada ya kuingia mle ndani Koplo Tsega akasita kidogo na kusimama

akijitahidi kuyazoea mandhari ya mle ndani kwa kuyatembeza macho yake taratibu.

Upande wa kushoto kulikuwa na meza ya ukutani ambayo ilikuwa ikitumiwa na wateja

wa benki ile kwa ajili ya kuandikia au kujaza taarifa za benki kwenye slips zao. Mara

baada ya kuipita meza ile kulikuwa na viti vingi katika sehemu maalum ambapo wateja

wa benki ile wangeketi na kusubiri wakati shida zao zikishughulikiwa na maafisa wa

benki ile. Baada ya kuipita sehemu ile ya mangojeo mbele kidogo kulikuwa na dawati

kubwa lenye umbo la nusu mkate mbele ya msichana mrembo wa idara ya huduma

kwa wateja aliyevaa Hijabu.

Upande wa kulia mle ndani kulikuwa na vibanda vinne vya tellers wa benki

vilivyotengenezwa kwa mbao nyepesi ya mahogani sehemu za chini na kuta safi za

vioo vyenye matundu mbele yake. Ndani ya vile vibanda kulikuwa na wafanyakazi wa

benki ile waliokuwa wakiendelea kuwahudumia wateja wachache waliokuwa kwenye

foleni fupi kuelekea vibanda vile.

Akiwa ameridhishwa na tathmini ya mandhari yale taratibu Koplo Tsega akapiga

hatua zake kuelekea kwenye lile dawati la huduma kwa wateja ama customer care

alilokuwa ameketi yule dada mlimbwende aliyekuwa eneo lile akimuelekeza mteja

mmoja namna ya kujaza taarifa zake kwenye fomu maalum ya benki iliyokuwa juu

ya lile dawati. Wakati Koplo Tsega akifika sehemu ile yule dada mlimbwende wa

mapokezi alikuwa tayari amekwisha maliza kumuhudumia yule mteja hivyo haraka

akageuka na kumtazama Koplo Tsega katika uso wenye tabasamu la kibiashara.

“Karibu dada”

“Ahsante” Koplo Tsega akaitikia kisha kabla ya kusema neno akageuka kidogo

kuyatembeza macho yake makali yaliyojificha nyuma ya miwani kuchunguza eneo lile

na alipoona kuwa hali ilikuwa shwari akayarudisha tena macho yake kwa yule dada.

“Karibu tafadhali naomba nikusaidie dada yangu” yule mlimbwende akasisitiza

huku akimtazama Koplo Tsega katika uso wenye tabasamu jepesi. Koplo Tsega

akasogea vizuri karibu ya lile dawati na kuongea huku usoni akilazimisha tabasamu.

“Nahitaji kuonana na meneja wa benki”

“Una shida gani dada yangu labda huwenda nikakusaidia” yule dada akaongea

kiungwana

“Nahitaji mishahara yote ya wafanyakazi wa kampuni yetu ipitie kwenye benki

yenu” Koplo Tsega akaamua kudanganya kwa kutengeneza hoja yenye ushawishi

mkubwa ambayo kwa namna moja au nyingine aliamini kuwa ilikuwa nje ya uwezo

wa yule dada wa idara ya huduma kwa wateja.

“Ofisi ya meneja wa benki ipo mwisho wa hili jengo upande wa kushoto ukifika

utaona korido. Fuata korido hiyo ukifika mwisho utauona mlango”

“Ngoja nipige simu ofisini kwake kuuliza kama atakuwa na mgeni yeyote” yule

dada akaongea kwa utulivu na kabla Koplo Tsega hajatia neno kiwambo cha simu

ya mezani iliyokuwa juu ya meza fupi kando yake tayari ilikuwa sikioni. Baada ya

kubonyeza tarakimu kadhaa ile simu ikawa hewani na hapo kukafuatiwa na maongezi

mafupi baina yake na mtu wa upande wa pili wa ile simu kabla ya yule dada kukata

simu na kugeuka akimtazama Koplo Tsega katika uso wenye tabasamu la matumaini.

“Unaweza kwenda yupo ofisini kwake na hana mgeni yeyote”

“Nashukuru” Koplo Tsega akatoa shukrani zake huku tabasamu hafifu la

kutengeza likiumbika usoni mwake

“Karibu tena” yule dada akaitikia huku akijiandaa kumsikiliza mteja mwingine

aliyefika eneo lile. Bila kupoteza muda Koplo Tsega akaanza kuzitupa hatua zake

taratibu akikatisha eneo lile kuelekea mwisho wa lile jengo kama alivyoelekezwa na

wakati alipokuwa akitembea akagundua macho ya wanaume wote waliokuwa kwenye

vile vibanda vya tellers wa ile benki yalikuwa yakimtazama kwa uchu kupitia kuta safi

za vioo zilizowazunguka na hali ile ikampa faraja kidogo huku taratibu akizichezesha

malighafi muhimu za mwili wake.

Mara tu alipofika mwisho wa lile jengo upande wa kushoto akaiona korido fupi

kama alivyoelekezwa hivyo Koplo Tsega akaifuata korido ile. Ilikuwa ni korido fupi

iliyokuwa ikitazamana na milango mitatu. Mlango mmoja upande wa kushoto,mlango

mwingine upande wa kulia na mlango wa mwisho ulikuwa mwisho wa ile korido kwa

mbele. Wakati Koplo Tsega akiendelea kutembea akawa akiyatembeza macho yake

taratibu kuichunguza ile milango na kupitia vibao vidogo vyeusi vyenye maandishi

meupe akagundua kuwa mlango wa kwanza upande wa kushoto ulikuwa ni wa ofisi

ya Line manager wa kitengo cha Import and Export. Mlango uliyofuata upande wa

kulia ulikuwa ni wa ofisi inayoshughulikia miamala yenye kuhusisha kiasi kikubwa cha

fedha ama Bulk transaction na ule mlango uliyokuwa mbele mwisho wa ile korido

ndiyo uliyokuwa wa kuelekea kwenye ofisi ya meneja wa benki ile hali iliyompelekea

Koplo Tsega ajikute akitabasamu peke yake. Mandhari ya eneo lile yalikuwa tulivu

mno hata hivyo hali ile haikumaanisha kuwa ndani vyumba vile hapakuwa na shughuli

za kiofisi zilizokuwa zikiendelea.

Hatimaye Koplo Tsega akawa ameufikia ule umlango wa kuingia kwenye ile ofisi

ya meneja wa ile benki. Alipofika pale mlangoni akasimama kidogo akijipa utulivu na

kujitengeneza vizuri na baada ya kugeuka nyuma na kuhakikisha kuwa hapakuwa na

mtu yeyote mwingine eneo lile akausogelea mlango wa ile ofisi na kushika kitasa chake

huku akikisukuma taratibu. Tofauti na matarajio yake mlango ule mzito ukafunguka

taratibu na hapo Koplo Tsega akaingia mle ndani.

Kama zilivyokuwa ofisi nyingi za kisasa za zama hizi ofisi ile ilikuwa ya kisasa zaidi.

Sakafu yake ilifunikwa kwa zulia maridadi la rangi ya kijivu lenye michoro ya maua

meusi na meupe. Upande wa kushoto kulikuwa na dirisha kubwa lililofunikwa kwa

pazia jepesi. Kando ya dirisha lile kulikuwa na rafu nne kubwa ya chuma zenye droo

nyingi zilizosimama wima kama milima meza. Kabla ya kuzifikia rafu zile kulikuwa na

seti moja ya makochi laini meupe ya sofa yaliyoizunguka meza fupi ya kioo iliyokuwa

na majarida na vipeperushi vinavyohusiana na huduma zinazotolewa na ile benki.

Upande wa kulia wa yale makochi kulikuwa na jokofu kubwa la vinywaji baridi

na kupitia mlango wa kioo wa lile jokofu isingemuwia vigumu mtu yeyote kuona

kilichokuwa mle ndani. Kiyoyozi makini bado kilikuwa kazini kusambaza hewa safi

iliyokinzana na hali ya joto kali ya jiji la Dar es Salaam mle ndani.

Kama zilivyokuwa ofisi nyingi zinazotoa huduma kwa jamii na kuchangia pato la

taifa,katikati ya ofisi ile ukutani kulikuwa na picha mbili za marais zilizotundikwa. Rais

wa serikali ya jamhuri ya muungano wa Tanzania na rais wa serikali ya mapinduzi ya

Zanzibar.

Koplo Tsega akasumbuka kidogo katika kutaka kufahamu ni wapi alipokuwa

mwenyeji wa ofisi ile mle ndani na hali ile ilitokana na namna ya mpangilio wa ofisi

ile ulivyokuwa. Baada ya kuufunga ule mlango na kusogea upande wa kulia akizipita

rafu nyingine mbili ndefu za chuma zilizopakana na rafu nyingine kubwa zenye

vitabu,mafaili na nyaraka nyingine za ofisi hatimaye Koplo Tsega akamuona meneja

wa benki ile akiwa ameketi kwenye kiti chake cha utukufu nyuma ya meza kubwa

ya ofisi yenye kompyuta kubwa ya mezani,tray ndogo yenye ngazi tano kwa ajili ya

kuwekea nyaraka nyepesi za ofisi,simu ya mezani,mhuri na kidau cha wino pamoja

na mlima wa mafaili mengi mbele yake. Upande wa kushoto eneo lile kulikuwa na

meza nyingine ndogo na fupi ya mbao na juu ya meza ile kulikuwa na mashine tatu za

ofisi printer,scanner na mashine ya kudurufu. Pembeni yake upande wa kulia wa ile

meza ya ofisi kulikuwa na rafu ndogo ya chuma ambayo isingemlazimu meneja yule

wa benki kusimama hadi kuifikia. Mbele ya ile meza kulikuwa na kiti kimoja kikubwa

cha ofisi.http://pseudepigraphas.blogspot.com/

“Karibu binti” mzee mfupi mwenye kipara cha afya njema,mnene mwenye kitambi

cha ukwasi na macho makubwa ya hila yaliyojificha nyuma ya miwani kubwa alikuwa

amesita kuendelea kufanya alichokuwa akikifanya na kisha kuiegemeza mikono yake

mezani kabla ya kumkaribisha Koplo Tsega. Uso wake wa duara na ndevu zilizokatiwa

vizuri kuuzunguka mdomo wake,umri wake usingekuwa zaidi ya miaka hamsini. Uso

wake ulituama kama maji ya mtungini pasina kuonesha tashwishwi yoyote usoni.

Koti lake la suti ya kijivu alikuwa amelitundika nyuma kwenye kiti chake cha ofisi

kinachoweza kuzunguka nyuzi mia tatu sitini na hivyo kuusanifu vizuri mwonekano

wake mpya wa shati jeusi la mikono mirefu bila tai shingoni hali iliyoupelekea mkufu

wake mkubwa wa dhahabu uliotia nanga shingoni mwake kuonekana kwa usahihi

kama mng’aro wa kito cha thamani katikati ya giza.

“Ahsante” Koplo Tsega akaitikia kwa nidhamu kama iwavyo kwa mtu yeyote

mgeni aingiapo katika ofisi nyeti za mijini kisha taratibu akapiga hatua zake za woga

wa kujifanyisha akikaribia kile kiti cha ofisi kilichokuwa kikitazamana na ile meza ya

ofisini ya yule meneja na alipokaribia akasita kidogo.

“Karibu uketi binti” yule mzee akaongea kwa mamlaka huku akimtazama Koplo

Tsega kwa utulivu kabla ya kujiegemeza taratibu kwenye foronya laini ya kiti chake

cha ofisini.

“Nashukuru” Koplo Tsega akaongea kwa utulivu kisha akasogea karibu na kile kiti

kabla ya kukisogeza nyuma na kuketi. Kibao kidogo chenye utambulisho wa jina na

cheo cha mhusika wa ofisi ile kikamtanabaisha Koplo Tsega kuwa yule mtu aliyeketi

mbele yake nyuma ya ile meza ya ofisini ndiye mwenye jina la Aden Mawala,meneja

wa benki ya Zanzibar Marine jijini Dar es Salaam na hapo akajikuta akimeza funda

kubwa la mate kuzimeza hisia zake moyoni. Kitambo kifupi cha ukimya kikafuata mle

ndani huku kila mmoja akiwaza lake kichwani kabla ya yule mzee meneja wa benki

kuegemeza tena mikono yake mezani na kuvunja ukimya.

“Nipo tayari kukusikiliza shida yako binti,nimebanwa na kazi na bahati mbaya

sana leo sina muda wa kutosha”

“Nahitaji kuonana na ndugu Aden Mawala meneja wa benki hii bila shaka ndiyo

wewe” Koplo Tsega akaongea kwa utulivu katika uso wa kazi huku akimtazama yule

mzee kwa makini.

“Hujakosea” yule meneja wa benki akaitikia kwa utulivu na Koplo Tsega alipozidi

kumchunguza moyoni akahitimisha kuwa alikuwa ni mtu mgeni kabisa machoni

mwake. Yule meneja wa benki kuona vile akapeleka mkono na kuvuta mtoto wa

meza kabla ya kutoa kabrasha fulani na kuliweka pale mezani.

“Nimeambiwa kuwa unahitaji mishahara ya wafanyakazi wa kampuni yenu ipitie

kwenye benki yetu. Unatokea kampuni gani hapa Dar es Salaam?” yule meneja wa

benki akauliza huku taratibu akianza kupekua karatasi za lile kabrasha aliloliweka

mezani.

“T.P.D.F” Koplo Tsega akavunja ukimya.

“Ndiyo kampuni gani hiyo mbona sijawahi kuisikia tangu nizaliwe” yule meneja

wa benki akaongea huku akipunguza kasi ya kupekua kurasa za lile kabrasha.

“Tanzania People Defense Force”

“Kampuni ya ulinzi?” yule meneja wa benki akauliza huku akiangua kicheko

hafifu chenye dharau ndani yake.

“Jeshi la wananchi wa Tanzania” Koplo Tsega akafafanua huku akionesha kuanza

kuchoshwa na dharau za kisomi. Maelezo ya Koplo Tsega yakampelekea yule meneja

wa benki asitishe ghafla kile alichokuwa akikifanya na kuyasimamisha macho yake

akimtazama Koplo Tsega kwa mashaka.

“Jeshi la wananchi wa Tanzania siyo kampuni nadhani kuna jambo lingine

lililokuleta humu ndani” yule meneja wa benki akaongea kwa jazba kidogo huku

akiendelea kumtazama Koplo Tsega kwa udadisi. Pasipo kutia neno Koplo Tsega

akaingiza mkono mfukoni kuchukua ile bahasha aliyoipata nyumbani kwa Balimenya.

Kisha akafungua ile bahasha na kutoa ile barua fupi iliyokuwa ndani ya ile bahasha na

kuitupa pale mezani karibu na yule meneja wa benki. Kuona vile yule meneja wa benki

akaichukua ile karatasi na kuanza kusoma maelezo yaliyokuwa ndani yake. Koplo

Tsega akiwa makini kuzitazama nyendo za yule meneja wa benki akashtukia kuwa

kadiri yule meneja wa benki alivyokuwa akizidi kuyapitia maelezo kwenye ile karatasi

ndivyo mikono yake ilivyokuwa ikizidi kutetemeka. Mwishowe yule meneja wa ile

benki akamaliza kuyapitia maelezo kwenye ile karatasi na kuiweka pale juu ya meza

huku uso wake ukiwa umepoteza utulivu kabisa sambamba na vitone vya jasho jepesi

vikichomoza kwenye paji la uso wake.

“Wewe ni nani?” yule meneja wa benki akajikaza na kumuuliza Koplo Tsega kwa

sauti iliyopwaya.

“Tiglis Tsega,Koplo na Komandoo wa daraja la kwanza,askari wa jeshi la wananchi

wa Tanzania” Koplo Tsega akajitambulisha kwa kujigamba huku akimtazama meneja

wa ile benki kwa udadisi.

“Nani aliyekupa hii barua?” yule meneja wa benki akauliza kwa hofu

“Nahitaji ushirikiano wako vinginevyo nisingetumia hila kufika humu ndani”

Koplo Tsega akaongea kwa utulivu huku akimtazama yule meneja wa benki kwa

makini. Kitambo kifupi cha ukimya kikafuata huku yule meneja wa benki akiachama

mdomo wake kwa mshangao wakati mawazo mengi yakipita kichwani mwake. Sasa

mshtuko alioupata meneja yule ulikuwa dhahiri usoni mwake huku akionekana kama

mtu aliyekuwa akifikiria kukurupuka ghafla na kuanza kutimua mbio ingawa mazingira

yakufanya vile hayakuwepo.

“Ushirikiano upi unaouhitaji kutoka kwangu?’’ baada ya kubabaika kidogo yule

meneja wa benki akajikaza na kuongea kwa sauti ya kupwaya.

“Nafahamu kuwa unatumika na watu wenye mamlaka zaidi juu yako na kutokana

na mazingira uliyonayo huwezi kukataa.Hata hivyo hiyo haimaanishi kuwa hufahamu

kinachoendelea na humfahamu kabisa mtu aliyetoa maagizo haya. Niko tayari

kukulinda wewe na maslahi yako kama utakuwa muwazi na kunipa ushirikiano wa

kutosha katika kumfichua mtu au watu waliopo nyuma ya mtandao huu mchafu”

Koplo Tsega akaongea kwa msisitizo huku macho yamemtoka na mishipa ya shingo

imemtuna hata hivyo kicheko cha mahoka kilichofuata kutoka kwa yule meneja wa

benki kikampelekea ashikwe na butwaa huku akimtazama yule meneja wa benki kama

kituko.

“Binti nadhani umechanganyikiwa bila shaka nani aliyekwambia kuwa mimi

nahitaji ulinzi kutoka kwako na huo mtandao mchafu unaozungumzia mbona

sikuelewi?” yule meneja wa benki akaongea kwa dharau huku akiendelea kuangua

kicheko

“Kwa hiyo unataka niamini kuwa hilo jina la kwenye hii barua siyo lako na hii siyo

benki ya Zanzibar Marine?’’Koplo Tsega akauliza kwa jazba huku akimkata jicho la

hasira yule meneja wa benki.

“Mimi sikatai kuwa Aden Mawala ni jina langu na hii ni benki ya Zanzibar Marine

lakini huu siyo ushahidi tosha wa kunifanya nikubaliane na kile unachokiamini binti.

Jiji hili la Dar es Salaam limejaa matapeli wa kila aina. Mimi ni mtu ninayefahamiana

na watu wengi kutokana na kazi yangu hivyo mtu yeyote mwenye hila mbaya anaweza

kulitumia jina langu kujipatia fedha kwa ujanjaujanja” yule meneja wa benki akajitetea.

“Sikiliza mzee usijaribu kuiondoa hoja yangu ya msingi kwenye mstari. Mimi

sijafika hapa kufuata pesa na wala sina haja na pesa zako badala yake ninachohitaji

kufahamu ni kuwa hizi fedha zilizoandikwa kwenye hii barua ambazo hadi wakati huu

naamini kuwa tayari zimeshaingizwa kwenye benki yako zimetoka kwa nani na ninani

aliyekupa maagizo haya”

“Hakuna pesa yoyote ya kiasi hicho iliyoingia kwenye benki yangu na hata kama

pesa hiyo ingekuwa imeingia taratibu za kibenki haziniruhusu kutoa taarifa za akaunti

ya mhusika kwa mtu mwingine isipokuwa kwa idhini ya mhusika tu” yule meneja wa

benki akaweka kituo huku akiunyanyua mkono wake kuitazama saa yake ya mkononi.

Kuona vile Koplo Tsega akaingiza tena mkono wake mfukoni na kuichukua ile

bahasha ya kaki aliyoipata kule nyumbani kwa Meja Khalid Makame ambayo ndani

yake ilikuwa na hundi nyingi zenye majina ya watu tofauti. Alipoitoa ile bahasha

mfukoni Koplo Tsega akaingiza mkono ndani yake na kuzitoa zile hundi kabla ya

kuzitupia pale mezani karibu na yule mzee meneja wa benki.

“Huwenda huo ukawa ni ushahidi tosha kwako kuwa mimi sijachanganyikiwa

kama unavyodhani na badala yake ninahakika na kile ninachokizungumza.

Ukichunguza kwa utulivu utagundua kuwa majina ya watu yaliyopo kwenye hundi

hizo ndiyo yale pia yaliyopo kwenye ile barua niliyokupa awali hivyo sijakosea njia”

Koplo Tsega akaongea kwa utulivu huku akijitahidi kuidhibiti hasira yake kifuani.

Yule meneja wa benki akainama kwa makini na kuanza kuzichunguza zile hundi pale

mezani huku akionekana kuingiwa na mshtuko kadiri alivyokuwa akimalizia kupitia

hundi moja na kuichukua nyingine. Hata hivyo yule meneja wa benki alikuwa mkaidi

kwani alipomaliza kuzipitia zile hundi akazikusanya kwa pamoja na kuzisogeza karibu

na Koplo Tsega pale mezani.

“Hizi ni taarifa nyepesi sana za kufoji binti na huwezi kunifungamanisha nazo

labda kama unashida nyingine za kibenki mbali na hii nitakusaidia ila kama huna hoja

za msingi utakuwa muungwana sana ukisimama na kuondoka uniache niendelee

na kazi zangu” yule meneja wa benki akaongea kwa dharau huku akiunyanyua tena

mkono wake na kuitazama saa yake mkononi. Koplo Tigls Tsega akazichukua zile

hundi na kuzirudishia kwenye ile bahasha kabla ya kuitia ile bahasha mfukoni pasipo

kuonesha tashwishwi yoyote usoni. Hata hivyo Koplo Tsega alikuwa makini kufuatilia

kwa hila nyendo za meneja yule wa benki hivyo wakati akijitia kuzama katika kuiweka

ile bahasha ya hundi mfukoni mwake alikuwa amemuona yule meneja wa benki jinsi

alivyokuwa akiupeleka mkono wake taratibu kuuvuta mtoto mmoja wa ile meza ya

ofisini.

Akiwa ameshaanza kuhisi nini maana ya tukio lile Koplo Tigils Tsega hakutaka

kusubiri hivyo kwa kasi ya ajabu akaisukuma ile meza ya ofisini kwa miguu yake

kumbana yule meneja wa benki kwenye kiti chake ukutani huku mkono wake mmoja

ukiwa tayari umezama mafichoni kuikamata vyema bastola yake. Yule meneja wa

benki alipotaka kufurukuta mahesabu yake yakagonga mwamba kwani mdomo wa

bastola ya Koplo Tsega ulikuwa tayari ukimtazama usoni. Kisha Koplo Tseakajitetea

karibu na yule meneja wa benki na kuupenyeza mkono wake katika ule mtoto wa

meza uliofunguliwa kwa hila na yule meneja wa benki na alipopapasa papasa bastola

aina ya 22 Caliber Revolver ikaenea vyema kwenye kiganja chake tukio lililompelekea

yule meneja wa benki ashikwe na kihoro baada ya kuona hila yake imeshtukiwa na

kugonga mwamba. Koplo Tsega alipoitoa ile bastola akaichomoa magazini yake na

kuitupa kando kabla ya kugeuka na kumtazama kwa utulivu yule meneja wa benki

ambaye wakati huu alikuwa amebanwa kwenye kile kiti na ile meza yake ya ofisini

huku macho yamemtoka kwa hofu.

“Sura yako inaonekana ni mtu msomi,mkarimu,mtulivu na mzalendo lakini

matendo yako ni ya kinyama kama walivyo wanamtandao wenzako wengine. Watu

kama nyinyi hamtakiwi kuundiwa tume ya uchunguzi huku mkiendelea na kazi kama

ilivyozoeleka badala yake mnastahili kifo cha aibu tena ikiwezekana hadharani ili vizazi

vijavyo visijifunze chochote kutoka kwenu’’Koplo Tsega akaongea kwa utulivu huku

akimzunguka yule meneja wa benki pale kwenye kiti.

“Unajidanganya bure binti hata ukiniua mimi huwezi kufika popote” yule meneja

wa benki akaongea kwa msisitizo huku akihisi kuzidiwa ujanja.

“Maelezo yako yanaonesha kuwa mtandao wenu ni mpana sana na una watu

wengi sana kiasi cha kujipa hakika kuwa hata nikikuua sitofika mbali” Koplo Tsega

akaongea kwa utulivu

“Huelewi unachokizungumza’’ yule meneja wa benki akaongea kwa kujiamini

“Niambie hizi fedha zilizoingia kwenye benki yako zimetoka kwa nani na huo

mtandao wenu unaongozwa na nani?’’

“Nimekwisha kwambia kuwa sifahamu chochote kuhusu hizo hundi wala hiyo

barua uliyokuja nayo. Ndiyo kwanza nimeviona kwako na hakuna kiasi cha pesa kama

hicho kilichoingizwa kwenye benki yangu” yule meneja wa benki akafoka kwa jazba.

“Unadhani ninaweza kukuamini kupitia maneno yako?. Huo ni uongo wa

mwisho usiokuwa na ushawishi niliowahi kuusikia kwa binadamu hapa duniani.

Nahitaji kuiona Cash flow ya hii benki inayoonesha miamala ya pesa zilizoingizwa

na kutolewa” Koplo Tsega akaongea kwa utulivu huku akimtazama yule meneja wa

benki kwa makini na alichokiona mbele yake ni mshtuko mkubwa uliojengeka usoni

kwa yule meneja wa benki.

“Nimekwisha kwambia kuwa taratibu zangu za kazi haziniruhusu kutoa taarifa

za namna hiyo kwa mtu asiyehusika” yule meneja wa benki akasisitiza huku akianza

kutokwa na kijasho chepesi usoni.

“Nahitaji kuona Cash flow statement ya hii benki ndugu Aden Mawala,usinipotezee

muda wangu” Koplo Tsega akasisitiza huku taratibu akikata kipande cha waya wa

simu ya pale mezani,yule meneja wa benki akashindwa kuelewa nini maana ya tukio

lile.

“Unataka kunifanya nini?” yule meneja wa benki akauliza kwa hofu baada ya

kumuona Koplo Tsega akimsogelea pale kwenye kiti na kipande cha waya wa ile simu

mkononi

“Cash flow statement…”

“What…?” yule meneja wa benki kabla hajamaliza kuongea kile kipande cha waya

tayari kilikuwa shingoni mwake na hapo Koplo Tsega akaanza kukikaza taratibu kwa

mikono yake. Yule meneja wa benki kuona vile akaanza kufurukuta katika kutaka

kujinasua huku akitupa mikono na miguu yake huku na kule huku mishipa ya kichwa

ikimchomoza na ulimi na macho vikimtoka. Jitihada zake za kujinasua hazikufua

dafu kwani hapakuwa na nafasi ya kuchomeka mikono yake kwenye ule waya

shingoni na kuuzuia usimkabe. Koplo Tsega akaendelea kuukaza ule waya hadi pale

alipomuona yule meneja wa benki akianza kuishiwa nguvu ndiyo akalegeza taratibu

hali iliyompelekea yule meneja wa benki aanze kukohoa ovyo akiurekebisha mfumo

wa upumuaji wake.

“Fungua kompyuta yako nahitaji kuona Cash flow statement ya hii benki” Koplo

Tsega akanong’ona kwa sauti tulivu sikioni mwa yule meneja wa benki.

“Okay…!” yule meneja wa benki akaitikia kwa shida huku hofu imemshika na

muda mfupi uliyofuata akaifungua ile kompyuta yake ya ofisini pale mezani huku

Koplo Tsega akiwa makini nyuma yake. Ile kompyuta ilipofunguka yule meneja wa

benki huku mikono ikimtetemeka akafungua mafaili kadhaa mle ndani ya kompyuta

hadi alipolifikia faili lenye rekodi za miamala ya pesa zilizoingia na kutoka kwenye ile

benki kufikia mwezi ule.

Kitambo kifupi cha ukimya kikapita mle ndani huku Koplo Tsega akijaribu

kuichunguza taarifa ile kwa maikini. Aliporidhikanayo akamwambia yule meneja wa

benki aiprint.Yule meneja wa benki akasita kidogo lakini macho yake yalipokutana

na macho ya Koplo Tsega hofu ikamuingia tena na hapo akalainika na kufanya vile

alivyoagizwa. Haraka akaiamuru ile kompyuta kuprint ile taarifa ya benki kwenye

printer iliyokuwa juu ya meza ndogo kando ya eneo lile.

Mara baada ya yule meneja wa benki kuprint ile taarifa ya benki Koplo Tsega

haraka akaichukua na kuanza kuipitia katika namna ya kuichunguza kama angeweza

kupata taarifa yoyote ya kumsaidia. Kupitia taarifa ile ya benki Koplo Tsega akagundua

kuwa kulikuwa na miamala mingi iliyofanywa kwenye ile benki kwa kipindi cha miezi

kadhaa iliyopita na alipozidi kuchunguza akagundua kuwa miamala mingi ilikuwa

imefanywa na kampuni nyingi zilizokuwa jijini Dar es Salaam ambazo kwa namna

moja au nyingine hazikupaswa kutiliwa mashaka kutokana na aina ya biashara

kampuni zile zilizokuwa zikifanya. Kulikuwa pia na miamala mingine iliyofanywa na

watu binafsi ambayo fedha zao zilikuwa za kawaida kwa vile benki ile ilikuwa imejikita

kwenye biashara ya uuzaji wa bidhaa nje ya nchi na uingizaji wa bidhaa ndani nchi.

Katika kuendelea kuchunguza Koplo Tsega akajikuta akivutiwa na akaunti moja

ambayo ilikuwa imetumika kufanya muamala wa pesa nyingi sana za kigeni kwa mara

moja. Akaunti ile ilikuwa na jina moja la Zanzibar Stone City Bazaar. Koplo Tsega

alipozidi kuchunguza akagundua kuwa kupitia rekodi zilizokuwa kwenye taarifa ile

ya benki akaunti ile ilikuwa ni mpya kabisa kwani hapakuonekana rekodi nyingine

zilizoonesha kuwa akaunti ile ilikuwa ikitumika huko siku za nyuma. Lilikuwa ni

jambo la kustaajabisha lakini vilevile linaloweza kuaminika.

Koplo Tsega alipozidi kuchunguza mashaka juu ya kile alichokuwa akikihisi

yakazidi kuongezeka. Muamala wa fedha nyingi uliofanywa kupitia akaunti ile ulikuwa

umefanyika siku chache baada ya wao kuondolewa kwenye ile tume ya udhibiti na

upambanaji wa biashara ya dawa za kulevya nchini na hatimaye kuingizwa kwenye

vikosi vya kijeshi vya kuimarisha amani ya kudumu-MONUSCO nchini jamhuri ya

kidemokrasia ya nchi ya Kongo. Lakini vile vile jina la akaunti ile lilifanana na jina

la akaunti iliyokuwa kwenye zile hundi alizozipata kule nyumbani kwa Meja Khalidi

Makame. Kwa sekunde kadhaa Koplo Tsega akajikuta ameganda kama nyamafu

huku akiendelea kuikodolea macho taarifa ile ya benki kwenye ile karatasi na mkono

wake mmoja ukiwa umeikamata bastola yake vyema mkononi na kuielekezea kifuani

kwa yule meneja wa benki ambaye mashaka yalionekana dhahiri usoni mwake.

“Nahitaji bank statement ya hii akaunti” Koplo Tsega akasogea karibu na

kumwambia yule meneja wa benki huku akimuelekeza kwa kidole chake kwenye ile

akaunti ya benki ya Zanzibar Stone City Bazaar. Yule meneja wa benki akaikodolea

macho ile akaunti kabla ya kusita huku akigeuka na kumtazama Koplo Tsega kwa

mashaka.

“Print…” Koplo Tsega akaongea kwa utulivu huku akifanya ishara ya kichwa

kumaanisha kile alichokuwa akikisema kisha akaihamisha bastola yake kichwani kwa

yule meneja wa benki. Yule meneja wa benki kuona vile akainama tena kwenye ile

kompyuta yake mezani na kuanza kushughulika nayo na baada ya muda mfupi ile

kompyuta ikaanza kuprint ile Bank statement ya akaunti ya Zanzibar Stone City Bazaar

ikionyesha kiasi cha pesa,mwaka,mwezi,siku,saa na tarehe ambayo muamala ule wa

fedha nyingi kwenye ile akaunti ulikuwa umefanyika.

Jambo moja la kushangaza ni kuwa fedha zilizoingizwa kwenye akaunti ile

zilionekana kuwa zilikuwa zimetokea kwenye benki mama iliyokuwa kisiwani

Zanzibar. Koplo Tsega akaendelea kuikodolea macho akaunti ile huku akishindwa

kuamini kile kilichokuwa kwenye ile karatasi.

“Kiongozi wa mtandao wenu anaitwa nani?’’ Koplo Tsega akavunja ukimya

akimuuliza yule meneja wa benki hata hivyo yule meneja wa benki hakuzungumza

neno badala yake akatikisa kichwa chake kuonesha kuwa alikuwa hafahamu chochote.

“Kukaa kimya haitakusaidia kitu ndugu Aden Mawala kwani ni vizuri ukawa

muwazi na kunieleza ni nani anayehusika na ugawaji wa mamilioni ya fedha nyingi

kiasi hiki huku akisisitiza mambo yenu yafanyike kwa usiri mkubwa’’

“Nimekwisha kukueleza kuwa mimi sifahamu chochote” yule meneja wa benki

akasisitiza hata hivyo kabla hajamaliza risasi moja kutoka kwenye bastola ya Koplo

Tsega yenye kiwambo cha kuzuia sauti ikapenya na kuuvunja mfupa wa paja lake.

Yule meneja wa benki akapiga yowe kali la maumivu huku akigugumia kwa maumivu

makali yaliyoambatana na jeraha linalovuja damu.

“Niambie Aden ni nani anayehusika na fedha hizi?” Koplo Tsega akauliza

“White…’’

“White ndiyo nani?” Koplo Tsega akauliza kwa shauku

“White Sugar…!” yule meneja wa benki akaongea huku akilalama kwa maumivu

makali ya jeraha la risasi pajani mwake.

“Niambie,huyo White Sugar ndiyo nani?’’ Koplo Tsega akauliza kwa utulivu.

“Meneja wa Zanzibar Stone City Bazaar”

“Anaishi wapi?’’

“Sifahamu na wala sijawahi kuonana naye” yule meneja wa benki akajitetea lakini

kitendo cha kumuona Koplo Tsega akiunyoosha mkono na kuelekezea bastola yake

kwenye paja la mguu wake mwingine akaingiwa na hofu.

“Duka lake lipo ndani ya Mlimani City Shopping Mall linatazamana na duka

kubwa la vinyago la African art craft” yule meneja wa benki akafafanua hata hivyo

mduwao mwingine ukamshika wakati alipouona mdomo wa ile bastola ya Koplo

Tsega ukielekezewa kwenye kifua chake.

“Tafadhali usiniue...!”

“Sikuui Aden nakupumzisha tu!’’ kabla yule meneja wa benki hajaongea neno

risasi mbili za bastola ya Koplo Tsega zikapenya kifuani mwake na kutengeneza

matundu makubwa mawili yanayovuja damu kwenye moyo na hapo yule meneja wa

benki akatikisika kidogo kwenye kile kiti chake cha ofisini kabla ya kutulia huku roho

yake ikiwa mbali na mwili.

Koplo Tsega hakutaka kuendelea kupoteza muda hivyo akaingiza mkono

mfukoni na kuchukua pipi ya kijiti na kuimenya kabla ya kuitia mdomoni. Kisha

haraka akachukua kilicho chake mle ndani na kuelekea kwenye mlango wa ile

ofisi. Alipoufungua mlango wa ile ofisi na kutoka nje pale mlangoni akakutana na

mwanaume mmoja aliyekuwa akielekea kwenye ile ofisi ya meneja wa benki.

“Subiri kidogo kuna mtu anazungumza na meneja” Koplo Tsega akamwambia

yule mwanaume wakati akipishananaye kwenye ile korido.

“Sawa!” yule mwanaume akaitikia huku akigeuza na kurudi kule alipotoka. Muda

mfupi uliofuata Koplo Tsega alikuwa akikatisha kando ya lile dawati la idara ya

huduma kwa wateja. Yule dada mlimbwende mfanyakazi wa idara ile alipomuona

Koplo Tsega akatabasamu na kumuuliza

“Vipi amekusikiliza haja yako?”

“Ndiyo nashukuru sana dada kwani amekwisha nielekeza cha kufanya. Nitarudi

tena mapema sana baada ya kukamilisha taratibu zote” Koplo Tsega akajinadi kwa

hila huku akijifanya ni mwenye haraka.

“Karibu tena”

“Ahsante na kazi njema” Koplo Tsega akashukuru na kuaga huku akielekea

kwenye mlango mkubwa wa kioo mbele ya lile jengo la benki ya Zanzibar Marine.

Alipofika akausukuma ule mlango na kutokomea nje huku macho ya yule dada

mlimbwende wa idara ya huduma kwa mteja yakimsindikiza kwa nyuma.



SAA TISA ALASIRI KASORO dakika chache Koplo Tsega akaegesha gari

lake kwenye eneo kubwa la wazi la maegesho ya magari la Mlimani City Shopping

Mall. Kabla ya kushuka akayatembeza macho yake taratibu kuyachunguza magari

yaliyokuwa eneo lile kwa utulivu. Mvua ilikuwa imeanza kunyesha hivyo hakumuona

mtu yeyote eneo lile au kama kungekuwa na watu basi huwenda watu hao wangekuwa

wamejifungia ndani ya baadhi ya magari yaliyokuwa yameegeshwa eneo lile.

Tangu alipotoka kwenye ile benki ya Zanzibar Marine akili yake ilikuwa imejikita

katika kumtafakari yule mtu aliyekuwa akifahamika kama White Sugar meneja wa

duka la Zanzibar Stone City Bazaar kama yule meneja wa benki ya Zanzibar Marine

alivyotanabaisha. Kwa namna moja au nyingine Koplo Tsega aliamini kuwa huyo

mtu aliyekuwa akifahamika kwa jina la White Sugar ndiye ambaye angekuwa kiungo

muhiimu sana katika ule mtandao mchafu ulioshiriki kikamilifu katika kusuka

mpango wa kuwaengua yeye na Sajenti Chacha Marwa kutoka katika tume maalum

inayoshughulika na udhibiti na upambanaji wa biashara haramu ya dawa za kulevya

nchini Tanzania.

Hisia za Koplo Tsega zikamtanabaisha kuwa kumpata White Sugar lingekuwa ni

jambo muhimu sana katika kuwafahamu watu wote waliohusika na njama chafu dhidi

yao lakini vilevile kumpata White Sugar kungeweza kutatua maswali mengi yaliyokuwa

yakiisimanga vibaya nafsi yake. Maswali kama mtandao ule mchafu uliotumika

kuwahujumu ulikuwa ukimhusisha nani na nani vilevile ulikuwa ukifadhiliwa na nani.

Meja Khadid Makame,kiongozi wa kijeshi aliyekuwa akiheshimika sana kwa weledi

wake alikuwa na nafasi gani katika mpango ule mchafu na kama alihongwa fedha

basi alihongwa na nani na fedha hizo zilikuwa kiasi gani. Kufikia pale Koplo Tsega

akayahamisha mawazo yake na kuanza kumfikiria yule mwanaume aliyemuokoa

kutoka mikononi mwa wale wanausalama kule kwenye lile jengo refu la ghorofa

lililokuwa katikati ya maeneo ya posta jijini Dar es Salaam. Maswali bado yalikuwa

mengi na majibu yake yalihitaji muda na uchunguzi makini.

Hatimaye Koplo Tsega akafungua mlango na kushuka kwenye gari kisha akaanza

kuzitupa hatua zake kwa haraka akielekea kwenye mlango mkubwa wa kuingilia

kwenye lile duka kubwa la kisasa na la kimataifa-Mlimani city shopping mall. Begi lake

likiwa mgongoni,kofia ya sombrero kichwani na miwani myeusi machoni taratibu

Koplo Tsega akawa akiyatembeza macho yake kwa uficho mkubwa na kuwatazama

watu wote waliokuwa eneo lile. Hakumuona mtu yeyote wa kumtilia mashaka hivyo

akaendelea kuzitupa hatua zake kwa utulivu kuelekea kwenye lile jengo.

Kulikuwa na watu wengi ndani ya maduka yale ya kisasa waliokuwa wamefika

kupata huduma tofauti na baadhi ya watu wale walikuwa wamesimama kwenye korido

za maduka yale wengine wakinunua bidhaa na wengine wamesimama wakisubiri

mvua ile iishe ili waondoke baada ya kumaliza kununua mahitaji yao.

Koplo Tsega alipofika katikati ya korido zile akasimama kwa utulivu akiyachunguza

mazingira yale. Kulikuwa na korido mbili kubwa na pana,moja upande wa mbele na

nyingine upande wa kulia. Korido zile zilikuwa zikitazamana na maduka mbalimbali



baadhi yakiwa ni maduka ya kampuni kubwa na maarufu za jijini Dar es Salaam na

mengine maduka ya watu binafsi. Maduka yale ya kisasa yalikuwa yamezungukwa

na kuta kubwa za vioo visafi vinavyomwezesha mtu yeyote kuweza kuona bidhaa

zilizokuwa ndani ya maduka yale.

Ile korido ya mbele ilikuwa ikielekea katika Supermarket kubwa ya kisasa iliyokuwa

na bidhaa nyingi za matumizi ya kawaida ya binadamu yenye wahudumu waliovaa sare

maalum za kuwatambulisha na vitambulisho vyao vikiwa vimening’inizwa kwa kamba

maalum shingoni. Ile korido ya upande wa kulia ilikuwa ikitazamana na maduka

mengi ya bidhaa tofauti zikiwemo ofisi za kampuni za mawasiliano ya mitandao ya

simu. Koplo Tsega akajikuta akiyakumbuka vyema maelezo ya Aden Mawala yule

meneja wa benki ya Zanzibar Marine kuwa duka la Zanzibar Stone City Bazaar

lilikuwa likitazamana na duka la vinyago la Afrikan art craft mle ndani. Hivyo Koplo

Tsega akashika uelekeo wa upande wa kulia akiifuata ile korido iliyokuwa ikitazamana

na maduka mbalimbali.

Kulikuwa na watu wengi katika korido ile huku kila mmoja akionekana kuzama

katika hamsini zake. Koplo Tsega wakati akitembea akawa akiyatembeza macho

yake taratibu kuzichunguza sura za watu aliokuwa akipishana nao kwenye korido ile.

Hakumuona mtu yeyote wa kumtilia mashaka ingawa baadhi ya watu hawakujizuia

kumtazama huku dhahiri wakionekana kuvutiwa na mtindo wa uvaaji wake kama siyo

weusi wake wa asili.

Ilikuwa ni wakati Koplo Tsega alipokuwa mbioni kufika mwisho wa korido ile

pale alipoliona duka kubwa la vinyago lenye maandishi makubwa ya African art craft

upande wa kushoto. Ndani ya duka lile kulikuwa kijana mmoja aliyekuwa akiwaelekeza

jambo wazungu wawili,mwanamke na mwanaume waliokuwa wakikitazama kinyago

kimoja kikubwa cha kimakonde cha mti wa mpingo cha mwanamke wa kiafrika

aliyebeba mtoto wake mgongoni kwa mbeleko. Kinyago kizuri kilichochongwa kwa

umakini wa hali ya juu.

Koplo Tsega alipolifikia lile duka la vinyago akasimama mbele yake na

kuyatembeza macho yake taratibu upande wa kulia. Maelezo ya yule meneja wa

benki ya Zanzibar Marine yalikuwa sahihi kwani duka la Zanzibar Stone City Bazaar

lilikuwa likitazamana na duka lile la African art craft kwa upande wa kulia. Kwa dakika

kadhaa Koplo Tsega akasimama akilitazama duka lile kwa utulivu kama mtu ambaye

hayaamini vizuri macho yake.

Duka la Zanzibar Stone City Bazaar lilikuwa ni miongoni mwa maduka

yaliyokuwa na pilikapilika nyingi za wateja baadhi wakiingia mle ndani na kutazama

bidhaa zilizokuwa mle ndani huku wengine wakifanya manunuzi ya bidhaa. Lilikuwa

ni duka kubwa lenye maduka mengi madogo madogo ndani yake ya bidhaa kama

nguo,simu,vyakula,vyombo vya nyumbani,vifaa vya umeme,vitabu,vifaa vya

maofisini,viatu,mikoba na vifaa vingine muhimu vya mahitaji ya binadamu. Hata hivyo

wateja wengi waliokuwa ndani ya maduka yale walikuwa wanawake ambao wengi

wao walionekana kuvutiwa zaidi na bidhaa kama nguo,viatu,mikoba na vyombo vya

nyumbani.

Fikra za mtu aliyekuwa akifahamika kwa jina la White Sugar zikiwa zimeanza

kujengeka upya kichwani mwake Koplo Tsega akaanza taratibu kuzitupa hatua

zake akielekea kwenye lile duka la Zanzibar Stone City Bazaar huku akigeuka na

kuyatembeza macho yake huku na kule katika namna ya kuhakikisha kuwa hakuna

mtu yeyote aliyekuwa akizifuatilia nyendo zake. Wakati Koplo Tsega akiufikia mlango

wa duka lile pale mlangoni akapishana na mwanaume mmoja mrefu na mweusi akiwa

katika mavazi yake ndhifu ya suti ya kijivu ya Marks & Spenser,shati la rangi nyeusi na

tai ya rangi ya zambarau.

Mtu yule alikuwa amenyoa upara na macho yake alikuwa ameyafunika kwa miwani

kubwa nyeusi yenye kumwezesha kuiona dunia pasipo usumbufu wowote. Mkononi

alikuwa amevaa saa ya gharama sana ya dhahabu aina ya Maurice Lacroix huku akiwa

amebeba briefcase nyeusi inayotumia mfumo wa codenumber maalum katika kuifungua.

Miguuni alikuwa amevaa viatu vyeusi nadhifu vya ngozi huku marashi yake ya gharama

yenye harufu nzuri ya tafsiri ya ukwasi yakiongeza ziada nyingine katika utanashati

wake.

Akionekana ni mwenye haraka mara tu mtu yule alipopishana na Koplo Tsega pale

mlangoni akaanza kutembea kwa kuharakisha akishika uelekeo wa upande wa kushoto

wa ile korido pana mbele ya lile duka huku mara kwa mara akiunyanyua mkono

na kuitazama ile saa yake ya mkononi kama mtu aliyekuwa nyuma ya muda katika

tukio fulani. Kwa sekunde kadhaa Koplo Tsega akajikuta amesimama pale mlangoni

na kumtazama yule mtu namna alivyokuwa akitokomea kwenye ile korido kama

kimbunga kisha akageuka na kuingia mle ndani ya lile duka huku akiyapuuza macho

ya watu waliokuwa wakimtazama eneo lile kana kwamba alikuwa amebabaishwa na

kutekwa na muonekano wa yule mwanaume aliyetoka kwenye lile duka.

Jina la White Sugar likiwa limerudi tena kwenye fikra zake mara tu alipoingia

ndani ya lile duka Koplo Tsega akajisogeza upande wa kulia sehemu kulipokuwa na

duka la simu za mkononi za kisasa zilizopangwa ndani ya rafu nzuri ya vioo. Kijana

mmoja wa kiume aliyekuwa akihusika na biashara ile haraka akasimama kutoka

kwenye kiti alichoketi nyuma ya ile rafu ya vioo na kusogea karibu na Koplo Tsega

kama afanyavyo kwa wateja wengine waliokuwa wakiingia mle ndani na kuonekana

kuvutiwa na bidhaa zake.

“Mambo vipi dada?’’ yule kijana akamsalimia Koplo Tsega kwa makeke

“Poa” Koplo Tsega akaitikia huku usoni akiumba tabasamu la kirafiki

“Karibu sana”

“Ahsante” Koplo Tsega akaitikia huku akigeuka na kuyatembeza macho yake

kuzichunguza sura za watu waliokuwa mle ndani kabla ya kuyarudisha tena mbele

yake na kuanza kuzitazama simu zilizokuwa ndani ya ile rafu ya vioo ingawa dhahiri

mawazo yake hayakuwa katika zile simu. Yule kijana muuzaji wa lile duka kuona vile

akasogea karibu akijitahidi kuyapatiliza kwa ukaribu macho ya Koplo Tsega. Koplo

Tsega alipoyainua macho yake kumtazama yule kijana akavunja ukimya akiuliza swali

la hila.

“Hili ndiyo duka la Zanzibar Stone City Bazaar?”

“Maduka ya humu ndani yote ni ya Zanzibar Stone City Bazaar” yule kijana

akafafanua huku akishindwa kuelewa hoja muhimu katika swali lile.

“Ninashida na meneja wa hili duka,unaweza kunisaidia nikaonana naye?’’Koplo

Tsega akamuuliza yule kijana kwa utulivu huku akimtongoza kwa tabasamu lake

maridhawa.

“Shida gani?’’ yule kijana akauliza huku akimtazama Koplo Tsega kwa udadisi

“Shida binafsi inayohusu biashara” Koplo Tsega akadanganya huku akimtazama

yule kijana kwa makini.

“Umepishana naye sasa hivi pale mlangoni wakati ulipokuwa ukiingia humu

ndani” jibu la yule kijana likapelekea mshtuko mkubwa kwa Koplo Tsega,moyo wake

ukalipuka kabla ya baridi nyepesi kuanza kusafiri mgongoni mwake huku kijasho

chembamba kikichomoza taratibu katika sehemu mbalimbali za mwili wake na

hatimaye utulivu kupotea kabisa moyoni mwake ingawa alijitahidi kuumeza mshtuko

ule kwa kila hali.

Kwa sekunde kadhaa akili ya Koplo Tsega ilishindwa kabisa kuamini kuwa yule

mwanaume aliyepishananaye muda mfupi pale mlangoni wakati akiingia kwenye lile

duka ndiye angekuwa White Sugar,mtu aliyekuwa akimtafuta. Koplo Tsega akajikuta

akishawishika kuwa muda uleule atoke kwenye lile duka na kuanza kutimua mbio

akashika ule uelekeo wa yule mtu kule alikotokomea. Hata hivyo baada ya kufikiri kwa

kina Koplo Tsega akajikuta akiuweka kando mpango ule pale alipohisi kuwa kwa ule

muda uliopita yule mtu angeweza kuwa tayari amekwishafika mbali sana na eneo lile

kwa vile alivyoonekana kuwa na haraka ya kupita kiasi istoshe hakufahamu mtu yule

alikuwa akielekea wapi.

“Oh! masikini mimi nimekuwa mzembe kwa kuchelewa” Koplo Tsega akalaani

kitendo kile huku akishindwa kuamini.

“Kwani hamfahamiani?” yule kijana akauliza

“Hatufahamiani ila kuna mtu anayefahamiana naye ndiye aliyenielekeza kwake”

Koplo Tsega akadanganya wa hila

“Pole sana basi uache business card yako ili siku atakaporudi nimpe akutafute”

yule kijana akatoa wazo huku akimtazama Koplo Tsega katika mtazamo wa kimapenzi

hata hivyo Koplo Tsega akampuuza.

“Bahati mbaya sana leo nimesahau kutembea na business card yangu. Kwani

hatorudi tena leo?” Koplo Tsega akamuuliza yule kijana

“Hapana hatorudi tena na imekuwa ni bahati sana kumuona kirahisi namna

ile kwani mara nyingi sana huwa yupo safarini nje ya nchi” yule kijana akaendelea

kutanabaisha na Koplo Tsega alipomtazama akagundua kuwa maelezo yake yalikuwa

yamekomea pale katika kumfahamu White Sugar na ile ndiyo ilikuwa salama yake.

“Ameelekea wapi?” Koplo Tsega akauliza kwa utulivu huku akimtazama yule

kijana kwa makini.

“Anawahi boti ya kuelekea kisiwani Zanzibar”

“Kwani anaishi Zanzibar?”

“Ndiyo maskani yake yalipo’’ yule kijana akafafanua huku akionekana kuwa na

hakika na maelezo yake na hapo kitambo kifupi cha ukimya kikafuata huku Koplo

Tsega akizidi kujilaani kwa namna alivyopishana na bahati ile pasipo kujua. Mwishowe

akavunja ukimya kuuliza

“Unaweza kunisaidia namba zake za simu?’’

“Namba zake za simu nilizonazo ukimpigia huwa hapatikani” yule kijana

akaendelea kufafanua na kupitia maelezo yake Koplo Tsega akatambua kuwa

asingeweza kupata ziada nyingine kutoka kwake hivyo haraka akaunyanyua mkono

na kuitazama saa yake ya mkononi na alipomaliza na kuyahamishia macho yake kwa

yule kijana akaumba tabasamu jepesi lisilo na maana yoyote usoni mwake kabla ya

kuvunja ukimya

“Nashukuru sana wacha niende nitakuja siku nyingine”

“Pole sana dada yangu kama vipi niachie namba yako ya simu ili siku yoyote

atakaporudi nikufahamishe” yule kijana akasisitiza akijaribu bahati yake na Koplo

Tsega alipomtazama akayaona macho yake yalivyojawa na uchu wa ngono hali

iliyompelekea atabasamu kidogo na kuanza kumtajia namba ya simu ya kufikirika

kichwani isiyopatikana. Yule kijana akawahi kuinakili haraka ile namba kwenye simu

yake na wakati alipomaliza kubofya tarakimu ya mwisho na kuinua macho yake

kumtazama Koplo Tsega mbele yake,Koplo Tsega tayari alikuwa amekwisha toka nje

ya lile duka na kutokomea.





TAARIFA ZA KUUAWA KWA MENEJA wa benki ya Zanzibar Marine tawi la

jijini Dar es Salaam lilipo eneo la Morocco zilikuwa zimesambaa haraka kama ubuyu

na kuvifikia vyombo vya usalama. Ndani ya dakika chache baada ya mwili wa meneja

wa ile benki kugundulika ofisini kwake taarifa kutoka kwa mmoja wa wafanyakazi wa

benki ile haraka zilikuwa zimekifikia kituo cha polisi cha Oysterbay kilichokuwa na

dhamana ya kusimamia usalama wa eneo lile. Mkuu wa kituo kile cha polisi alipofika

eneo la tukio na kutathmini mazingira ya tukio zima akaamua kuomba nguvu ya

wataalam wa kuchukua vipimo na alama za mwalifu kutoka makao makuu ya jeshi

la polisi. Taarifa zilipoyafikia makao makuu ya jeshi la polisi juu ya ombi la wataalam

wake kutokana na unyeti wa tukio lenyewe,taarifa hizo zikawa zimevuja na kuwafikia

vijana wa Sulle Kiganja waliokuwa wamepandikizwa kila kona katika kuhakikisha

kuwa mhusika wa mauaji ya wanausalama yaliyokuwa yakiendelea jijini Dar es Salaam

anakamatwa.

Hivyo Sulle Kiganja na vijana wake wa kazi wakawa ndiyo watu wa kwanza kufika

katika eneo la tukio ndani ya ofisi ile ya meneja wa benki ya Zanzibar Marine yale

mauaji yalipotokea.

Kamera za usalama za CCTV zilizokuwa zimefungwa katika kila pembe ya lile

jengo la benki ya Zanzibar Marine ikiwemo kamera iliyokuwa ndani ya ofisi ya meneja

wa ile benki aliyouwawa zilikuwa zimehifadhi kumbukumbu ya matukio yote muhimu

ya mtu aliyesemekana kuhusika na kifo cha meneja wa benki ile. Sulle Kiganja na vijana

wake wa kazi baada ya kumaliza kupitia picha zote zilizonaswa na kamera za usalama

za jengo lile chini ya mkuu wa idara ya teknolojia ya mawasiliano (IT) akajiridhisha

na kuhitimisha kuwa muuaji alikuwa ni mwanamke mwenye umri kati ya miaka

ishirini na sita hadi thelathini ingawa sura yake haikuweza kuonekana vizuri kutokana

na miwani ya jua aliyoivaa na kofia ya Sombrero aliyojifunika kichwani. Msichana

mwembamba mwenye umbo kakamavu akiwa amevaa pullneck nyeusi,shati gumu

la jeans,suruali ya jeans iliyolichora vyema umbo lake,viatu vya rangi ya udongo aina

ya Travolta miguuni huku akiwa amebeba begi jeusi,jembamba na refu mgongoni

lisiloeleweka kuwa na kitu gani ndani yake.

Hata hivyo kulikuwa na mambo mawili matatu yaliyokuwa yamemchagiza Sulle

Kiganja wakati alipokuwa akizipitia zile picha za matukio ya muuaji zilizonaswa

na kamera za usalama za ile benki. Kwanza kabla ya kuanza kupitia picha zile za

matukio moja kwa moja alikuwa ameamini kuwa kwa vyovyote muuaji angekuwa ni

mwanaume tena kwa hakika angekuwa ni Chaz Siga mwanaume aliyewatoroka siku

ile chini ya lile jengo la ghorofa lililopo kule maeneo ya posta kwani uchunguzi wa

awali wa matukio yote ya mauaji yaliyokuwa yakiendelea kufanyika jijini Dar es Salaam

yalikuwa na viashiria vilivyokuwa vikimhusisha yeye kwa namna moja au nyingine.

Lakini kitendo cha kuziona picha zile za muuaji zilikuwa ni za msichana kilikuwa

kimeutibua vibaya ubongo wake na kutengeneza ukinzani mkubwa katika mwenendo

wa mikakati yake ya kumnasa muuaji.

Vilvile picha za matukio ya mauaji yale zilizonaswa na kamera za usalama za ile benki

zilikuwa zimeonesha kuwa kulikuwa na namna ya maongezi ya kawaida yaliyofuatiwa

na majibishano makali kati ya yule mwanamke aliyeingia ndani ya ile ofisi ya meneja

wa benki na yule meneja wa ile benki kabla ya mauaji yale kufanyika. Mabishano yale

kati ya yule muuaji na meneja wa ile benki baadaye yakawa yamepelekea yule dada

muuaji kutoa karatasi fulani kutoka kwenye bahasha iliyokuwa kwenye mfuko mmoja

wa suruali yake ya jeans na kuisogeza pale mezani katika namna ya kumtaka yule

meneja wa benki asome kile kilichokuwa kimeandikwa kwenye karatasi ile. Ingawa

kamera zilionesha kuwa mara baada ya meneja wa ile benki kumaliza kusoma kile

kilichokuwa kimeandikwa kwenye karatasi ile alionekana kukataa kukubaliana nacho

lakini tukio lile lilikuwa limeibua maswali mapya kichwani kwa Sulle Kiganja kuwa

muuaji hakuwa mwendawazimu kama walivyokuwa wauaji wengine wasio na sababu

katika kutekeleza unyama wao bali alionekana kuwa na hoja fulani ya kusimamia

ambayo bila shaka ilikuwa imejificha kwenye karatasi ile.

Zile picha za matukio bado ziliendelea kuonesha kuwa mara baada ya yule meneja

wa benki kuonekana kutokukubaliana na kile kilichokuwa kimeandikwa kwenye

ile karatasi iliyotolewa mfukoni kutoka kwenye bahasha. Yule dada muuaji alikuwa

ameichukua ile karatasi na kuitia kwenye bahasha kabla ya kuirudisha mfukoni kisha

kukafutiwa na kitambo kingine cha maongezi ya majibishano makali kabla ya yule

dada muuaji kutoa tena bahasha nyingine kutoka katika mfuko mwingine wa suruali

yake ambapo alipoifungua alitoa vipande vya karatasi vinavyolingana na kuvisogeza

karibu na meneja wa ile benki juu ya ile meza ya ofisini iliyokuwa mle ndani. Kufikia

pale Sulle Kiganja akawa amemuomba mkuu wa idara ya teknolojia ya mawasiliano

wa ile benki ambaye ndiye aliyekuwa na dhamana ya kusimamia ufanyaji wa kazi wa

zile kamera za usalama za ile benki aivute kwa karibu taswira ya vile vipande vya

karatasi vilivyokuwa vimewekwa pale mezani na yule muuaji na hatimaye kuikuza

taswira yake. Picha ya karibu iliyoonekana ikathibitisha kuwa vipande vile vya karatasi

vilivyowekwa pale mezani na yule muuaji zilikuwa ni hundi na hundi zile zilikuwa ni

za ile benki ya Zanzibar Marine. Sulle Kiganja akazidi kuingiwa na mashaka kuwa

kulikuwa na jambo la hatari zaidi lililokuwa limefichika hadi kupelekea mauaji ya

meneja wa ile benki.

Halafu taratibu Sulle Kiganja alipokuwa akiendelea kuzipitia zile picha hoja

nyingine zikawa zikiendelea kuibuka kichwani mwake. Kamera ziliendelea kuonesha

kuwa mara baada ya yule meneja wa ile benki kumaliza kuzipitia zile hundi zilizowekwa

pale mezani na yule muuaji bado meneja wa ile benki alionekana kukataa kukubaliana

na hoja ya muuaji kiasi cha kumpelekea yule muuaji kuzichukua zile hundi na

kuzirudishia kwenye bahasha yake na hatimaye kuzitia mfukoni. Yule muuaji wakati

akishughulika na kuitia ile bahasha mfukoni kamera zikaendelea kuonesha kuwa yule

meneja wa benki alikuwa akiupeleka mkono wake taratibu kwa hila kuufungua mtoto

wa meza yake ya ofisini kabla ya hila yake kushtukiwa na kusukumiwa ile meza ya

ofisini iliyombana vyema huku akiwa ameketi kwenye kile kiti chake cha ofisini.

Kitendo cha Sulle Kiganja kumuona muuaji akisimama ghafla na kuichomoa bastola

yake mafichoni akimwendea yule meneja wa benki pale kwenye kile kiti alipobanwa

na ile meza ya ofisini kikawa kimempelekea awe makini na kuzidi kusogea karibu

kulitazama tukio lile. Muuaji alikuwa ameishtukia mapema dhamira ya yule meneja

wa benki wakati alipokuwa akiuvuta ule mtoto wa meza kwa hila kwani yule muuaji

alipofika pale kwenye meza na kupenyeza haraka mkono kwenye ile droo na mkono

ule ulipotoka ulikuwa na bastola ambapo yule muuaji haraka akachomoa magazini ya

ile bastola aliyoitoa kwenye mtoto wa ile meza na kuitupa mle ndani sakafuni. Tukio

lile likamaanisha kuwa yule meneja wa benki alikuwa akitaka kuichukua ile bastola kwa

hila ili aweze kujihami dhidi ya yule muuaji. Hoja nyingine ikaibuka kichwani kwa Sulle

Kiganja akijiuliza kama meneja wa ile benki alikuwa akimiliki ile bastola kwa kufuata

misingi ya sheria au lah!.

Matukio mengine yaliyofuata kupitia zile kamera za usalama za ile benki

zilimuonesha yule muuaji namna alivyokata waya wa simu ya mezani ya mle ndani

ofisini kabla ya kuutumia waya ule kumkaba shingoni yule meneja wa benki huku

akimshinikiza kufanya jambo fulani kwenye ile kompyuta yake ya mezani. Kamera

bado ziliendelea kuonesha kuwa bado yule meneja wa benki hatimaye aliamua kukubali

na kutekeleza kile alichoshinikizwa kukifanya kabla ya kuonekana akishughulika

na kompyuta yake na baadaye kuonekana akiprint taarifa fulani. Kufikia pale Sulle

Kiganja akamuomba tena yule mtaalam wa teknolojia ya mawasiliano wa ile benki

kuvuta karibu ile picha ya ile karatasi iliyotoka kwenye ile printer ya mle ndani na

kuyakuza maandishi yake. Taswira ile ilipopatikana vizuri afisa mwingine wa ile benki

aliyekuwa nyuma yao akahitimisha kuwa taarifa ile iliyotolewa na printer ilikuwa ni

taarifa iliyofahamika kitaalam kama Bank cash flow ya ile benki ya Zanzibar Marine

na taarifa nyingine iliyofuatia kutolewa na ile printer ilikuwa ni Bank statement na

taswira yake iliposogezwa karibu jina la Zanzibar Stone City Bazaar likasomeka kwa

ufasaha kiasi cha kumpelekea Sulle Kiganja kuupindisha mdomo wake kwa dharau.

Kisha akamgeukia yule afisa wa benki aliyekuwa muda wote amesimama nyuma yao

akiufuatilia ule mchakato kwa makini ndani ya kile chumba kidogo cha mtaalam wa

teknolojia ya mawasiliano wa ile benki,kijana mdogo na mtundu wa kompyuta.

“Cash flow statement na Bank statement zina maana gani kwako?”

“Cash flow statement ni taarifa ya benki inayoonesha kiasi cha pesa kilichoingia

na kutoka kwenye benki kwa muda wa mwezi mmoja wakati Bank statement ni ripoti

inayotolewa na benki katika tarehe maalum kila mwezi ambayo ndani yake huorodhesha

matukio yote ya kuweka na kutoa pesa kwenye akaunti yaliyofanyika,hundi zilizolipwa

kama zitakuwepo,riba iliyotozwa na makato ya huduma za benki au faini zilizotozwa

kwenye akaunti husika” yule afisa wa benki akafafanua kwa ufasaha.

“Kupitia hiyo Cash flow statement na hiyo Bank statement ambazo meneja wa

benki yenu alionekana kushinikizwa kuziprint unadhani muuaji alitaka kufahamu

nini?” Sulle Kiganja akamuuliza tena yule afisa wa benki kwa utulivu huku akiendelea

kuzitazama zile picha za matukio kwa makini kwenye zile kamera.

“Sina hakika ingawa nahisi kuwa huwenda alikuwa akitaka kufahamu pesa fulani

iliyokuwa imeingia kwenye hii benki na kutoka pamoja na jina la mhusika wa akaunti

iliyotumika kufanya muamala huo” Sulle Kiganja akageuka na kumtazama kwa makini

yule afisa wa benki kama mtu afikiriaye jambo fulani kisha akawa ni kama aliyeona

kuwa hapakuwa na swali jingine la ziada la kumuuliza tena yule mtu kwa wakati ule.

“Okay! nashukuru sana kwa ushirikiano wenu” hatimaye Sulle kiganja

akawashukuru yule afisa wa benki na yule mtaalam wa teknolojia ya mawasiliano wa

ile benki kisha akasogeza kiti nyuma na kusimama.

“Ningependa kumuona huyo mfanyakazi wenu wa idara ya huduma kwa wateja

anayesemekana kuwa ndiye aliyemkaribisha huyu mtuhumiwa wa mauaji pamoja

na huyo mwanaume aliyemuona muuaji wakati alipokuwa akitoka kwenye ofisi ya

meneja wa benki” Sulle Kiganja akasisitiza akiyakumbuka maelezo ya awali aliyokuwa

amepewa na yule afisa wa benki wakati alipofika. Kisha akaanza kuondoka taratibu

kwenye ile ofisi ya idara ya teknolojia na mawasiliano huku akiwa ameongozana na

vijana wake kuelekea kwenye ile ofisi ya meneja wa ile benki yale mauaji yalipotoke.

Muda mfupi uliyofuata Sulle Kiganja na vijana wake walikuwa ndani ya ile ofisi ya

meneja wa benki. Alipofika mle ndani akawakuta vijana wake wakiendelea kuchukua

vipimo maalum vya kiuchunguzi mle ndani na kutoka katika ule mwili wa yule meneja

wa benki ukiwa bado haujaondolewa pale kwenye kile kiti chake cha ofisini huku

kifuani akiwa amelowa damu nyingi iliyokuwa ikiendelea kuvuja taratibu kutoka

kwenye yale majeraha ya risasi kifuani mwake.

Dakika chache baada ya Sulle Kiganja kuingia mle ndani ya ile ofisi ya yule meneja

wa ile benki yule dada mlimbwende mfanyakazi wa ile idara ya huduma kwa mteja

na yule mwanaume aliyepishana na Koplo Tsega mlangoni wakati ule alipokuwa

akitoka kwenye ile ofisi ya meneja wa benki nao wakaingia mle ndani. Sulle Kiganja

alipogeuka na kuwatazama wale watu sura yake ikatengeneza tabasamu jepesi kabla

ya kuwapa mkono na kusalimiana nao na baada ya pale mahojiano mafupi yakafuatia

huku akianza na yule dada mlimbwende mfanyakazi wa idara ya huduma kwa wateja

wa ile benki.

“Naitwa Sulle Kiganja mimi ni afisa usalama ningependa kusikia maelezo

machache muhimu kutoka kwako kufuatia hili tukio la mauaji ya meneja wa benki

yenu wewe ukiwa kama mtu aliyepata nafasi ya kumuona muuaji kwa ukaribu zaidi na

kuzungumza naye machache” Sulle Kiganja akafafanua.

“Naitwa Bi.Husna Mansour,afisa wa idara ya huduma kwa wateja wa benki hii”

yule dada mlimbwende akajitambulisha huku machozi yakimlengalenga.

“Ulionana na mwanamke aliyeingia humu ndani kabla ya mauaji haya kutokea?”

Sulle Kiganja akauliza huku akimtazama Bi.Husna Mansour kwa utulivu.

“Ndiyo”

“Ilikuwa saa ngapi”

“Kati ya saa saba na nusu mchana hadi saa nane” Bi.Husna Monsour akaongea

kwa utulivu huku akijifuta machozi kwa kitambaa chake mkononi.

“Umewahi kumuona popote hapo kabla?”

“Hapana” Sulle Kiganja akamtazama Bi.Husna kwa utulivu kabla ya kuendelea.

“Huyo mwanamke alikwambia shida iliyomleta hapa kukutana na meneja wenu

wa benki?”

“Ndiyo”

“Shida gani?”

“Aliniambia kuwa alikuwa amefika hapa katika kutaka kujua utaratibu ambao

ungewezesha mishahara ya wafanyakazi wa kampuni yake iwe inapitia kwenye benki

yetu”

“Alikutajia jina la hiyo kampuni au kukuonesha kitambulisho chake?” swali la

Sulle Kiganja likampelekea Bi.Husna Mansour asite kwani tayari alishagundua kosa

alilolifanya la kutokuhoji jina la yule dada muuaji kama siyo kuchukua maelezo yake.

“Hapana” hatimaye akaongea kwa sauti iliyopwaya.

“Ni kawaida yenu kufanya hivyo?” Sulle Kiganja akauliza tena

“Hapana nadhani nilifanya makosa kwa vile mtu mwenyewe alionekana kuwa na

haraka” maelezo ya Bi.Husna Mansour yakapelekea tena kitambo kifupi cha ukimya

kufuata. Sule Kiganja alipozidi kufikiria akagundua kuwa ile sababu ya kutaka kuonana

na meneja wa ile benki iliyotolewa na muuaji ilikuwa ni ya uongo wa kutengeneza

katika namna ya kuhakikisha kuwa muuaji anatimiza lengo lake.

“Wakati mwingine jitahidi kuwa makini zaidi dada dunia ya sasa imeharibika” Sulle

Kiganja akasisitiza na kisha kufuatiwa na kitambo kingine cha ukimya huku akifikiria

jambo fulani.http://pseudepigraphas.blogspot.com/

“Rekodi tuliyoipata kupitia kamera zenu inaonesha kuwa muuaji alikaa ofisini kwa

meneja wa benki yenu kwa muda usiopungua nusu saa. Hili ni jambo la kawaida

kutokea?”

“Hakuna muda rasmi wa mteja kuonana na meneja au mtu yeyote wa humu ndani

kwani hiyo hutegemeana na shida yenyewe na hali itakavyokuwa. Mfano kama meneja

hana kazi nyingi anaweza kutumia muda mwingi zaidi kuonana na wateja au mtu

yeyote yule mwingine” Bi.Husna Mansour akafafanua.

“Ukimuona muuaji unaweza ukamuelezeaje kwa muonekano wake?”

“Ni dada mrembo,mweusi,mwembamba kiasi na mrefu mwenye umbo zuri la

kike lakini kakamavu. Sura yake ni nyembamba kiasi ingawa sikuweza kumuona vizuri

kutokana na kofia aliyoivaa kichwani na miwani myeusi pana ya jua machoni mwake”

“Wakati alipokuwa akitoka humu ofisini kwa meneja wa benki yenu ulimuona?”

“Ndiyo”

“Ukiwa wapi?” Sulle kiganja akauliza kwa makini huku akimtazama Bi.Husna

Mansour machoni

“Pale kwenye sehemu yangu ya kazi”

“Alikuaga?”

“Nilimuuliza kama alihudumiwa shida yake akaniambia kuwa alishapewa

utaratibu wa kufanya hivyo angerudi hapa mapema sana baada ya kukamilisha vigezo

vinavyohitajika”

Sulle Kiganja akamtazama tena Bi.Husna Mansour kwa utulivu huku akiyatafakari

maelezo yake kabla ya kuvunja ukimya.

“Okay! nashukuru sana kwa maelezo yako nadhani sina kingine cha kuuliza

kwa sasa hata hivyo ningekuomba unipe ushirikiano wa kutosha kama nitakuhitaji

tena” Sulle Kiganja akamshukuru Bi.Husna Mansour na kumuacha akaendelee na

majukumu yake kisha akageuka na kumtazama yule mwanaume aliyesimama kando

yake kabla ya kumuuliza.

“Unaitwa nani?”

“Paul Soko” yule mwanaume akajitambulisha huku akionekana kuzama katika

kuangalia wale makachero wengine walivyokuwa wakichukua vipimo vya kitaalum

kutoka kwenye ule mwili wa yule meneja wa benki kwenye kiti chake cha ofisini mle

ndani.

“Nadhani umeyasikia vizuri maelezo ya yule dada mfanyakazi wa hii benki

aliyeondoka hapa sasa hivi!”

“Ndiyo” yule mtu akaitikia huku akitikisa kichwa.

“Maelezo yake yanaendana na huyo mwanamke uliyepishana naye wakati akitoka

kwenye hii ofisi ya meneja?” Sulle Kiganja akauliza kwa utulivu huku akimtazama kwa

makini yule mtu.

“Yupo sahihi kabisa”

“Wewe ni mfanyakazi wa hii benki?”

“Hapana! mimi ni mteja tu na nilikuwa na shida yangu binafsi ya kuonana na

meneja”

“Wakati ulipopishana na huyo mwanamke muuaji mlizungumza kitu chochote?”

“Aliniambia kuwa meneja alikuwa akizungumza na mtu mwingine humu ofisini

hivyo nisubiri kwanza”

“Ulifanya hivyo?”

“Ndiyo,sikuingia badala yake nikaendelea kusubiri pale mlangoni kwa vile namimi

nilikuwa na haraka” yule mtu akaongea huku akisikitika.

“Baadaye ikawaje?” Sulle Kiganja akauliza huku akiuvuta mkono wa shati na

kuitazama saa yake ya mkononi.

“Niliendelea kusubiri pale mlangoni kwa muda mrefu baadaye nikahisi kukata

tamaa baada ya kuona kuwa muda ulikuwa ukienda bila huyo mtu anayesemekana

kuongea na meneja kutoka. Lakini vilevile nilipokumbuka kuwa yule dada aliyeondoka

hapa alikuwa amenieleza kuwa kabla yangu kulikuwa na mtu mmoja tu aliyenitangulia

kuingia humu ofisini kwa meneja ambaye ndiye yule dada niliyepishana naye mlangoni

sikuona sababu ya kuendelea kusubiri zaidi hivyo nikausogelea mlango na kuufungua

nikiingia humu ndani pasipo kugonga hodi ndiyo nikakuta haya mauaji” yule mtu

akaweka kituo.

“Kwa hiyo wewe ndiye mtu wa kwanza humu ndani kuyashuhudia haya mauaji?”

Sulle Kiganja akamuuliza yule mtu huku akimtazama usoni.

“Ndiyo na mimi ndiye niliyewajulisha wafanyakazi wa humu ndani juu ya haya

mauaji”

“Umewahi kumuona huyo dada kabla ya hapo?”

“Sura yake ni ngeni kabisa machoni mwangu na sijawahi kumuona” yule mtu

akaongea huku akitikisa kichwa kuonesha kukataa na hapo Sulle Kiganja akamtazama

kwa makini kabla ya kumuuliza.

“Una lolote jingine la ziada la kuniambia juu ya hili tukio la mauaji lililotokea”

“Hapana”

“Okay! vizuri na mimi nadhani sina swali jingine la kukuuliza kwa sasa nipe

namba yako ya simu ili kama nitahitaji maelezo mengine ya ziada kutoka kwako

uweze kunisaidia” Sulle Kiganja akahitimisha mahojiano huku akitoa kitabu kidogo

na kalamu kutoka mfukoni na kuanza kuiandika namba ya simu aliyoanza kutajiwa na

yule mtu na alipomaliza akafunika kile kitabu na kukitia mfukoni.

“Nashukuru sana kwa ushirikiano wako nadhani unaweza kuondoka na kuendelea

na shughuli zako” Sulle Kiganja akaongea huku akimpa mkono wa shukurani yule

mtu.

“Nashukuru na wewe kazi njema kwako”

“Na wewe pia”

Mara baada ya kuagana Sulle Kiganja akaendelea kusimama akimtazama yule

mtu hadi pale alipofungua mlango wa ile ofisi na kutokomea ndipo akayarudisha

macho yake mle ndani na kuwatazama vijana wake wa kazi namna walivyokuwa

wakishughulika na majukumu yao. Wakati Sulle Kiganja akiendelea kuwasimamia

vijana wake kuchukua taarifa mbalimbali za kiuchunguzi kuhusiana na lile tukio la

mauaji ya meneja wa ile benki,vijana wake wengine wawili wa kazi Roby na Kaombwe

wao walikuwa nje ya lile jengo la benki Zanzibar Marine ng’ambo ya barabara

wakivuna taarifa zote muhimu kuhusiana na mshukiwa wa mauaji yale na waliporudi

mle ndani walikuwa na jambo la kuzungumza.

“Mmepata taarifa zozote mpya?” Sulle Kiganja akageuka na kuwauliza vijana wale

baada ya kuingia mle ndani na kumkaribia pale aliposimama.

“Mahojiano tuliyofanya na wahudumu wawili wa mgahawa wa Seafoods ng’ambo

ya barabara yanashabihiana na yule dada tuliyemuona kupitia kamera za usalama za

hili jengo” Roby akafafanua huku akimtazama Sulle Kiganja kwa utulivu.

“Wanasema walimuona dada huyo wakati alipokuwa akiegesha gari lake kwenye

sehemu ya maegesho ya mgahawa ule na kushuka akivuka barabara kuja kwenye hii

benki na namna ya uvaaji wake ni vilevile kama tulivyoona kwenye kamera za humu

ndani” Kaombwe akazidi kufafanua vizuri na Sulle Kiganja akawatazama vijana wake

na kutabasamu.

“Alikuwa akiendesha gari gani?”

“Toyota corolla nyeupe yenye mstari wa njano ubavuni na kibandiko cha teksi juu

yake” Roby akaongea huku akijaribu kukumbuka.

“Namba za gari?” Sulle Kiganja akauliza. Kaombwe akachukua kitabu kidogo

kutoka mfukoni mwake na kupekua haraka hadi kurasa fulani na kuweka kituo kisha

akaanza kuzitaja namba za gari alizoambiwa na mhudumu mmoja wa ule mgahawa

wa Seafoods ulioko ng’ambo ya barabara nje ya lile jengo la benki. Sulle Kiganja

aliposogea karibu na kuzitazama zile namba haraka akazigundua kuwa zilifanana na

zile alizopewa na Fulgency Kassy,Pweza na Kombe ikisemekana kuwa gari lenye

namba zile ndiyo lililoonekana likitoweka kwa kasi muda mfupi baada ya mauaji ya

P.J. Toddo kwenye sehemu ya maegesho ya magari ya jengo la Rupture & Capture

lililokuwa likitazamana na jengo la Vampire Casino siku ile.

Sulle Kiganja kuona vile haraka akawaita Fulgency Kassy,Pweza na Kombe

waliokuwa bado wakiendelea na uchunguzi dhidi ya yale mauaji ya meneja wa benki

mle ndani kisha haraka akawataka waingie mitaani na kuanza kulitafuta lile gari

lililokuwa likitumiwa na muuaji huku akiwataka waanzie uchunguzi wao Mlimani City

Shopping Mall kwenye duka kubwa la Zanzibar Stone City Bazaar.

Muda mfupi baada ya Fulgency Kassy,Pweza na Kombe kuondoka eneo lile zoezi

la kuchukua vipimo vya uchunguzi dhidi ya yale mauaji ya meneja wa benki likawa

limekamilika. Ule mwili ukaondolewa na kupelekwa hospitali ya taifa ya Muhimbili

kuhifadhiwa hata hivyo Sulle Kiganja kabla ya kuondoka akautahadharisha ule

uongozi wa ile benki kutokutoa taarifa zile kwa waandishi wa habari wala mtu yeyotemwingine kwa kigezo kuwa uchunguzi bado ulikuwa ukiendelea.



AKIWA KWENYE FOLENI YA MAGARI umbali mfupi kabla ya kuyafikia

makutano ya barabara eneo la Magomeni, Koplo Tsega kupitia vioo vya ubavuni vya

gari lake akajikuta akishtushwa haraka na gari aina ya Landcruiser jeupe lililokuwa

likijitahidi kupenya na kuyapita magari yaliyokuwa kwenye foleni ile nyuma yake

kumkaribia. Aliposogea karibu na kioo cha ubavu wa gari lake na kutazama vizuri

nyuma yake haraka machale yakamcheza baada ya kuliona gari lile Landcruiser jeupe

lenye vioo vyeusi tinted namna lilivyokuwa likipenya na kuyapita magari mengine

kumkaribia. Moyo ukamlipuka kwa hofu,nywele zikamcheza na jacho jembamba

likaanza kumtoka. Haraka akaingiza gia kisha akaitoa gari yake kwenye mwambata

wa foleni na kuingia kwa kazi upande wa kushoto kwenye barabara ya watembea kwa

miguu na kumkosakosa muuza machungwa kabla ya kuligonga toroli lake na kulitupia

mtaroni huku akiipuuza taharuki ya watu eneo lile.

Yule dereva wa ile Landcruiser kuona vile naye akaingia upande wa kushoto

akiifuata ile barabara ya watembea kwa miguu akilifukuza lile gari ya Koplo Tsega.

Koplo Tsega akaendelea kuendesha gari kwa kasi akiwakwepa watembea kwa

miguu kwenye barabara ile na haukupita muda mrefu mara mvua ya risasi ikaanza

kumiminika kutoka kwenye ile Landcruiser. Koplo Tsega akaingiwa na hofu na

kuanza kuliyumbisha lile gari lake huku na kule akiyakwepa mashambulizi yale.

Mashambulizi ya risasi kutoka kwenye ile Landcruiser hatimaye yakaanza kuleta

maafa. Kioo cha nyuma cha lile gari la Koplo Tsega kikachanguka na kusambaratika

vibaya,taa za nyuma nazo zikapasuka na muda uleule sauti kali ya mpasuko wa

magurudumu ikasikika. Gurudumu moja la nyuma na jingine la mbele yakapata

dhoruba na kusababisha lile gari kuanza kuyumba ovyo. Hata hivyo Koplo Tsega

alijitahidi kuudhibiti usukani wa lile gari kwa jitihada zake zote ingawa lile gari

Landcruiser nyuma yake halikumpa nafasi ya kujitetea na baada ya muda likawa tayari

limemfikia na kuanza kumgonga kwa nyuma.

Wakati ule mtafaruku ukiendelea hatimaye wakajikuta tayari wameyafikia yale

makutano ya barabara ya eneo la Magomeni. Ghafla Koplo Tsega alipotazama upande

wa kulia wa ile barabara akaliona lori kubwa la mafuta kwa kasi likitokea maeneo ya

Kigogo na kukatisha lile eneo la makutano ya barabara kuelekea eneo la Kinondoni.

Yule dereva wa lile lori hakuonekana kufanya jitihada zozote za kupunguza mwendo

kwa vile ilikuwa zamu ya foleni ya barabara ile kuruhusiwa. Kuona vile Koplo Tsega

akakanyaga mafuta na kuongeza mwendo akiwahi kuyavuka makutano yale kabla

ya lile lori halijamfikia akiifuata barabara ya Morogoro kuelekea Jangwani. Hata

hivyo mahesabu yake yaligonga mwamba kwani wakati akikaribia kulivuka lile eneo

la makutano ya barabara lile lori la mafuta tayari lilikuwa limekwishafika katikati ya

makutano ya zile barabara. Kuona vile Koplo Tsega haraka akakanyaga breki lakini

kutokana na ule mwendo kasi lile gari likaserereka na kusota huku magurudumu yake

yakiumana vibaya na lami kulifuata lile tenki la mafuta la lile lori na kusababisha harufu

kali ya mnuko wa magurudumu yale.

Hofu ikiwa imeanza kumuingia juu ya kutokea kwa ajali mbaya ya kukatisha

maisha yake Koplo Tsega haraka akafyatua kabari ya mlango na kujirusha kwa kasi

akipotelea chini ya uvungu wa lile lori huku macho yake yakiwa makini kuyakwepa

magurudumu makubwa ya lile lori. Abiria waliokuwa ndani ya daladala maeneo yale

wakapiga mayowe ya hofu baada ya kuliona tukio lile la kutisha wakati yule dereva wa

lile gari Landcruiser naye akiminya breki kwa nyuma. Lilikuwa tukio la kushangaza

sana na kuogopesha.

Wakati Koplo Tsega akitokezea upande wa pili wa uvungu wa lile lori muda uleule

sauti kubwa ya mlipuko ikasikika kabla ya moto mkubwa kuzuka eneo lile na moshi

mkubwa mweusi kutanda angani. Dereva wa lile lori la mafuta alikua amejitahidi

kulikwepa lile gari la Koplo Tsega kwa kukanyaga breki ya ghafla huku lile gari la

Koplo Tsega likiwa tayari limeshaingia kwenye uvungu wa lile lori. Tenki la mafuta la

lile lori lilikuwa limeyumba na kupoteza uelekeo hali iliyopelekea lile lori kupinduka

yale mafuta kumwagika na hatimaye kulipuka. Watu waliokuwa eneo lile ndani ya

magari wakashuka na kuanza kutimua mbio kila mtu akishika uelekeo wake huku

wakipiga mayowe na vilio vya hofu wakiukimbia ule moto.

Koplo Tsega hakutaka kusubiri huku akiwaza kuwa ile ndiyo ingekuwa nafasi yake

ya pekee ya kuwatoroka wale watu waliokuwa kwenye lile gari Landcruiser lililokuwa

nyuma yake. Hivyo haraka akasimama na kuanza kutimua mbio akikatisha katikati ya

barabara ya mabasi yaendayo mwendo kasi kuelekea posta.

Fulgency Kassy,Pweza na Kombe baada ya kupata maelezo ya kutosha kutoka

kwa yule kijana mfanyakazi wa duka la Zanzibar Stone City Bazaar kuwa yule dada

aliyehusika na mauaji ya meneja wa benki alikuwa amefika pale na kumuulizia meneja

wa duka lile wakawa wameingiwa na hisia kuwa kulikuwa na uwezekano mkubwa kuwa

mara baada ya Koplo Tsega kumkosa meneja wa lile duka kwa vyovyote asingejipa

subira badala yake angefunga safari na kuelekea kisiwani Zanzibar kumfuata yule

meneja na tukio lile lingemaanisha kifo cha mtu mwingine muhimu katika mtandao

wao. Hivyo haraka wakaondoa gari kwenye maegesho ya magari ya Mlimani City

Shopping Mall na kuivuka barabara ya Sam Nujoma wakitokomea vichochoroni.

Muda mfupi baadaye wakawa wametokezea barabara ya Shekilango ambapo mbele

yake waliingia upande wa kushoto na kuifuata barabara ya Morogoro wakielekea eneo

la forodhani bandarini kumuwahi Koplo Tsega kabla hajapanda boti na kuelekea

kisiwani Zanzibar.

Koplo Tsega aliendelea kutimua mbio akikatisha katikati ya uwazi uliofanywa

baina ya barabara ya kwenda na ile ya kurudi katikati ya barabara ya mabasi yaendayo

mwendo kasi huku watu wakiendelea kumshangaa hata hivyo hakusimama.

Kumbukumbu ya kifo na mazishi yake katika makaburi ya Mwananyamala jiji Dar

es Salaam ilikuwa ni historia inayomuwinda ambayo aliapa kuipigania hadi pale

ambapo ushindi ungepatikana. Hakutaka kamwe Fulgency Kassy,Pweza na Kombe

wafahamu kuwa bado alikuwa hai na siyo yule waliyemzika kule kwenye makaburi

ya Mwananyamala kwani endapo wangegundua wangeweza kuzipeleka taarifa zake

kwenye makao makuu ya jeshi la wananchi na hivyo kujikuta matatani zaidi kwa

kufanya udanganyifu lakini vilevile kwa kuhusika na vifo vya maafisa kadhaa wa

usalama ambao alikuwa akiendelea kuwaua jijini Dar es Salaam kama mkakati wake

wa kulipiza kisasi kwa wale wote waliopanga njama na kuhusika na mpango mchafu

wa vifo vyao nchini D.R Congo. Fulgency Kassy, Pweza na Kombe hawakuwa

wamehadaika kirahisi kuwa yule mtu waliyekuwa wakimfukuza alikuwa amekufa

kwenye lile gari Toyota corolla nyeupe baada ya lile gari kuingia chini ya uvungu wa

lile lori la mafuta na ajali kubwa kutokea na hivyo kusababisha mlipuko mkubwa wa

mafuta ya petroli kwenye makutano yale ya barabara zile. Hivyo haraka wakashuka

kwenye ile Landcruiser nyeupe na bastola zao mikononi wakianza kutimua mbio

kulizunguka lile lori na kutokea upande wa pili huku wakiamini kuwa yule mwanamke

waliyekuwa wakimfukuza angeweza kuutumia mwanya ule kuwatoroka.

Akiwa bado anatimua mbio Koplo Tsega akageuka tena na kutazama nyuma na

hapo akaliona wingu zito la moshi wa mafuta ya lile lori ukisambaa hewani kwenye

yale makutano ya zile barabara eneo la Magomeni kabla ya kuwaona wanaume watatu

waliovaa suti nadhifu nyeusi na bastola zao mikononi wakitimua mbio kumfukuza

nyuma yake. Hisia zikamueleza kuwa watu wale wangekuwa ni Fulgency Kassy,Pweza

na Kombe na kwa vile alifahamu kuwa nafasi yeyote ambayo wangeipata wasingeacha

kuitumia kumshindilia risasi haraka akaamua kuvuka ile barabara na kuhamia upande

wa kushoto kisha akavizia daladala moja lililokuwa mbioni kumpita akakimbia

na kudandia mlangoni. Utingo wa daladala lile alitaka kumzuia Koplo Tsega kwa

vile watu walishaanza kuingiwa na mashaka naye tangu walipomuona madirishani

akikimbia lakini Koplo Tsega aliwahi kuichomoa bastola yake na kuikamata mkononi

tukio lililompelekea yule utingowa lile daladala ampishe kwa woga na kumruhusu

aingie mle ndani.

Mara tu Koplo Tsega alipoingia mle ndani haraka akawatahadharisha abiria wote

waliokuwa mle ndani ya lile daladala kuwa wasithubutu kumtaja kuwa alikuwa mle

ndani huku akitoa vitisho kuwa mtu yeyote ambaye angemtaja angekiona cha mtema

kuni. Abiria wote ndani ya lile daladala wakawa wamenyamaza kimya na kumtazama

kwa mashaka kama simba aliyeko usingizini. Koplo Tsega akajichomeka katikati ya

abiria wengine waliosimama katikati ya daladala lile na kushika bomba la kuning’inizia

mikono chini ya paa la daladala lile huku akigeuka na kutazama kule nyuma alipotoka

kupitia kioo cha nyuma cha lile daladala.

Lile daladala likiwa linaendelea na safari yake taratibu haukupita muda mrefu mara

Koplo Tsega akawaona Fulgency Kassy,Pweza na Kombe wakikimbia kandokando

ya ile barabara na bastola zao mikononi huku wakichunguza kwa makini sura za

watu waliokuwa ndani ya magari yote yaliyokuwa yakiendelea na safari taratibu katika

barabara ile. Koplo Tsega alipowaona Fulgency Kassy,Pweza na Kombe wakilikaribia

lile daladala akazidi kujichomeka katikati ya kundi la abiria wale huku akiwatazama

wale watu kwa makini. Jamaa walikuwa wakihema ovyo na kutokwa na jasho jingi

huku sura zao zimefura kwa hasira kama mjeruhi wa mbogo.

Fulgency Kassy,Pweza na Kombe walipolifikia lile daladala alilokuwamo Koplo

Tsega wakasogea na kuanza kuchungulia dirishani huku lile daladala likiendelea na

safari yake taratibu kutokana na foleni kubwa iliyokuwa eneo lile. Hata hivyo kwa

kukosa umakini wakawa hawajamuona Koplo Tsega ndani ya lile daladala hivyo baada

ya kuchoka kuchungulia madirishani wakaamua kuliacha lile daladala na kukimbia

mbele zaidi kuyakagua magari mengine. Kuona vile Koplo Tsega akashusha pumzi

taratibu na kuirudisha bastola yake mafichoni.

Ile foleni ya magari ilikuwa imeanza kupungua baada ya magari ya barabara

ile kuruhusiwa kule mbele hivyo lile daladala likawa limeanza kukoleza mwendo

likimalizia kukatisha eneo lile la jangwani na wakati likiendelea na safari mbele kidogo

Koplo Tsega akawaona Fulgency Kassy,Pweza na Kombe wakiwa wamesimama kwa

uchovu,wakihema ovyo huku mikono yao viunoni wakionekana kukata tamaa na

kuanza kushauriana jambo kabla ya kugeuka na kutazama kule nyuma walipotoka.

Wakati lile daladala lililokuwa na Koplo Tsega likiwapita Koplo Tsega akageuka na

kuwatazama kwa makini huku akijitahidi kuimeza hasira yake moyoni hadi lile daladala

lilipotokomea mbali nao na ile ikawa nafuu kubwa kwa Koplo Tsega.

Lile daladala kwa kuwa lilikuwa likielekea maeneo ya Kariakoo hivyo lilipofika tu

maeneo ya Fire Koplo Tsega akasogea mlangoni na kuruka chini akiliacha lile daladala

likiendelea na safari yake kisha akavuka barabara na kuita bodaboda moja iliyokuwa

eneo lile. Ile bodaboda ilipokuja Koplo Tsega akapanda na kumtaka dereva wa

bodaboda ile ampeleke forodhani bandarini kwenye ofisi za boti za kuelekea kisiwani

Zanzibar.





SAA KUMI NA MOJA JIONI BOTI aliyoipanda Koplo Tsega ilikuwa ikitoa

nanga bandari ya Dar es Salaam na kuanza safari ya kuelekea kisiwani Zanzibar baada

ya kuchelewa kidogo na kuikosa boti iliyotangulia ambayo aliamini kuwa ndani yake

alikuwepo White Sugar. Mtu aliyekuwa akimtafuta kwa udi na uvumba. Wakati wote

kabla ya safari kuanza Koplo Tsega alikuwa na wasiwasi mwingi wa kutarajia kuwaona

Fulgency Kassy,Pweza na Kombe wakifika eneo lile lakini kitendo cha kutowaona

kikawa kimemtia faraja na kurudisha matumaini makubwa moyoni mwake.

Jua lilikuwa limeanza kuzama na hivyo ukungu mwepesi wa giza kuanza kutanda

angani. Koplo Tsega akiwa sehemu ya juu kabisa ya ile boti akaendelea kutazama

nyuma namna boti ile ilivyokuwa ikikata mawimbi taratibu kuiacha bandari salama

huku taswira ya majengo mengi marefu ya ghorofa yaliyojazana eneo la posta yakianza

taratibu kutoweka machoni mwake kadiri boti ile ilivyokuwa ikikata mawimbi na

kutokomea mbali na eneo lile.

Wakati Fulgency Kassy,Pweza na Kombe wakifika bandarini Koplo Tsega tayari

alikuwa yuko mbali na bandari ile kwa muda wa nusu saa huku wasijue la kufanya.





#321

NILIMALIZA KUVUTA SIGARA YANGU ya mwisho kisha nikakitupa

kipisi cha sigara ile kwenye kibakuli kidogo cha majivu ya sigara kilichokuwa

juu ya stuli ndefu chakavu kando yangu huku nikihisi mapafu yangu kuwaka

moto. Kwa muda wa masaa machache yaliyopita tayari nilikuwa nimeteketeza pakiti

mbili za sigara zilizonifanya nianze kujihisi mgonjwa wa maradhi nisiyoyajua huku

nikiwa nimeketi kwenye kochi moja kuukuu lililokuwa mle ndani wakati mawazo

mengi yalipokuwa yakipita kichwani mwangu.

Hiki kilikuwa chumba kidogo kati ya vyumba vingi vya jengo moja la ghorofa

lililotelekezwa pasipo kumaliziwa baada ya mmiliki wake kujikuta katikati ya mgogoro

mkubwa na maafisa wa ardhi kwa kujenga eneo lisilostahili kando ya eneo moja

la ufukwe wa bahari ya Hindi. Jengo hili sasa lilikuwa likitumika kama maskani ya

watoto machokoraa wa jiji la Dar es Salaam pamoja na vibaka na wakabaji. Nilikuwa

nimeyagundua maficho haya huko siku za nyuma hivyo nikawa nimeamua kukarabati

chumba kimoja na kukiwekea ulinzi mkali ambacho ningekitumia kama maficho

wakati wa harakati zangu au sero ndogo ya kuwasweka washukiwa wangu kabla ya

kuwatapisha taarifa muhimu ninazozihitaji.

Baada ya yule mateka wangu niliyempata kutoka katika zile figisufigisu za kutekwa

kwa Mwasu kule kwenye mnara wa Askari monument eneo la posta nilikuwa

nimempeleka kwenye hospitali moja ya kichochoroni iliyopo eneo la Magomeni ili

kupatiwa tiba dhidi ya yale majeraha yake ya risasi kabla ya kumchukua na kumfikisha

kwenye maficho haya yenye chumba kimoja kidogo kisichopigwa plasta,choo kidogo

cha ndani na dirisha dogo linalopitisha mwanga hafifu lisilomruhusu mtu kupenya.

Mle ndani kukiwa na kitanda kidogo cha chuma cha futi sita kwa nne chenye godoro

la sufi huku kando yake kukiwa na kochi moja kuukuu la sofa,stuli ndefu na kibakuli

cha majivu juu yake.

Mara baada ya kutupa kile kipisi cha sigara mkononi mwangu taratibu nikasimama

kutoka kwenye lile kochi na kuvinyoosha viungo vyangu mwilini kabla ya kupiga

mwayo hafifu wa uchovu huku nikianza kuzitupa hatua zangu tulivu na kusogea

kwenye kile kitanda cha mle ndani nilipomlaza yule mateka wangu baada ya kumuona

akijigeuzageuza pale kitandani kama aliyeshtuka kutoka usingizini. Vile vidonda vyake

vya majeraha ya risasi begani na pajani vilikuwa vimesafishwa vizuri,zile risasi kwenye

majeraha zilikuwa zimetolewa na yale majeraha kufungwa vizuri kwa pamba na

bandeji safi. Sindano mbili za kupunguza maumivu alizodungwa bila shaka zilikuwa

zimempelekea nafuu ya maumivu mwilini. Nilipotazama kando ya kile kitanda

kwenye nguzo moja ya chandarua nikagundua kuwa hata ile dripu ndogo ya damu

niliyomtundikia kwa msaada wa maelekezo ya yule daktari nayo ilikuwa mbioni kuisha

na hali ile ikanipa matumaini kuwa afya yake ilikuwa mbioni kuimarika.

Nilipofika pale kando ya kile kitanda nikasimama na kumtazama yule mateka

wangu kwa makini. Alikuwa amefumbua macho yake na kunitazama kwa utulivu kama

mtu anayenishangaa halafu akili yake ilipotulia nikamuona ameshikwa na mshtuko

akajitahidi kunyanyuka pale kitandani hata hivyo hakuwa na nguvu za kufanya vile

hivyo akarudi tena chini na kukiegemeza kichwa chake kwenye mto mmoja wa pale

kitandani kwani afya yake bado ilikuwa dhaifu.

“Unajisikiaje kwa sasa?” nikamuuliza yule mtu na hapo akasimamisha macho yake

na kunitazama kama ambaye alikuwa akiendelea kukusanya kumbukumbu za kutosha

kichwani mwake baadaye nikamuona akivunja.

“Kichwa kinaniuma”

“Chukua hivi vidonge umeze” nikamwambia yule mtu huku nikiingiza mkono

mfukoni na kuchukua vidonge vya kutuliza maumivu nilivyopewa na yule daktari

kule Magomeni kisha nikachukua chupa ndogo moja ya maji kutoka chini ya uvungu

wa kile kitanda na kumpa. Yule mtu akavichukua vile vidonge na kuvitupia kinywani

kisha akafungua ile chupa ya maji na kugida mafunda kadhaa kabla ya kuitua ile chupa

kando yake pale kitandani alipolala ambapo niliichukua na kuiweka chini ya kitanda

kisha nikasogea na kuketi kitandani karibu yake. Yule mtu akawa ni kama anayejisogeza

mbali nami pale kitandani hata hivyo niliwahi kumshika miguu na kumzuia.

“Ondoa shaka sina mpango wa kukudhuru” nikamwambia yule mtu huku

taratibu nikimshika mkono wakati bado akiendelea kunishangaa kwani ni dhahiri

hakuwa akifahamu kitu kilichokuwa kimemtokea hadi yeye kuwepo mle ndani katika

mazingira tofauti kabisa na yale aliyoyazoea.

“Wewe ni nani?” yule mtu akaniuliza kwa woga.

“Chaz Siga,mtu mliyekuwa mkimtafuta wewe na wenzako” yule mtu kusikia

vile akashtuka na kunitazama kwa mshangao sana. Hata hivyo niliupuuza mshtuko

wake na kumuuliza wakati huo vitu vyake vyote muhimu kama simu,kadi ya benki na

kitambulisho chake cha kazi kinachomtanabaisha kama afisa usalama kikiwa juu ya

stuli mle ndani.

“Unaitwa nani rafiki?”

“Dan Maro’’ yule mtu akaniambia kwa utulivu baada ya kitambo kifupi cha kusita

huku akinitazama.

“CID Dan Maro wa idara ya usalama wa taifa…sivyo?’’ nikamuuliza kwa utulivu

huku nikimtazama yule mtu. Jambo moja lililonitia matumaini ni kuwa kachero yule

alikuwa hajanidanganya kwani vitambulisho vyake vyote vilikuwa na lile jina la Dan

Maro alilojitambulisha nalo kwangu.

“Unataka nini kwangu?” yule mtu akaniuliza kwa hofu.

“Labda mimi ndiyo nikuulize swali hilo maana nilisikia kuwa wewe na wenzako

mlifika kule ofisini kwangu kunitafuta. Sasa huoni kuwa huu ndiyo wasaha mzuri

wa kuzungumza baada ya kuwa tumeonana?” nikaongea huku nikitabasamu na

nilipomtazama yule kachero usoni akayakwepesha macho yake na kutazama pembeni

na hapo nikajua ile hoja yangu ilikuwa imeziteka fikra zake.

“Wenzako wamempeleka wapi katibu muhtasi wangu?” nikamuuliza pasipo

mzaha.

“Mimi nipo humu ndani nitafahamu vipi?”

“Mbona tukio lenu la utekaji linaonekana kuwa ni jambo mlilokuwa mmelipangilia

vizuri?”

“Mimi sikuhusika kwenye utekaji” yule kachero akajitetea huku akitazama pembeni.

Nikamtazama kwa makini kabla ya kumchapa ngumi mbili za uso zilizomsababishia

maumivu makali pale kitandani.

“Nahitaji ushirikiano wako vinginevyo sitokuwa na sababu ya kuendelea

kukuuguza humu ndani” nikaongea kwa utulivu huku nikimtazama kwa makini yule

kachero.

“Ushirikiano upi ninaoweza kukupa nikiwa humu ndani tena katika hali hii?” yule

kachero akajitetea huku akiugulia maumivu pale kitandani. Hasira zikiwa zimenishika

kwa majibu yake yasiyo na tija nikamzaba kibao kimoja cha nguvu.

“Nahitaji kufahamu ni wapi mlikompeleka katibu muhtasi wangu vinginevyo

wenzako watakuokota ukiwa maiti” nikamfokea yule mtu kwa hasira huku sura yangu

ikiwa mbali na mzaha hali iliyompelekea yule kachero aanze kutoa maelezo.

“Tuna sehemu nyingi za kuwafanyia mahojiano washukiwa wetu na kwa kuwa

mimi nipo humu ndani siwezi kuwa na hakika ni wapi alipopelekwa katibu muhtasi

wako” yule kachero akaniambia na nilipomtazama usoni nikagundua hoja yake ilikuwa

na ushawishi kidogo ingawa sikumwamini.

“Katibu muhtasi wangu anashukiwa kwa kosa gani?”

“Tulikuwa tumetumwa kukukamata wewe lakini baada ya kuambiwa na katibu

muhtasi wako kuwa wewe haupo tukaona tumkamate yeye huku tukiwa na hakika

kuwa baadaye angetusaidia kukupata wewe”

“Mlitaka kunikamata kwa sababu gani?” nikamuuliza yule kachero na baada

ya kitambo kifupi cha ukimya kupita mle ndani huku akionekana kufikiria jambo

hatimaye akavunja ukimya.

“Tulipewa amri hiyo na mkuu wetu ya kukukamata”

“Bado hujajibu swali langu,nimekuuliza mlitaka kunikamata kwa sababu gani?”

nikamuuliza yule kachero huku nikimtazama usoni.

“Taarifa kutoka ofisi kuu zinakuelezea wewe kama ndiye mshukiwa namba

moja wa mauaji ya makachero wa usalama yanayoendelea kufanyika hapa jijini Dar

es Salaam” maelezo ya yule kachero yakanipelekea kwa sekunde kadhaa nibaki

nikimkodolea macho huku nikishindwa kuyaelewa vizuri maelezo yake kabla ya

kuvunja tena ukimya nikimuuliza.

“Mna ushahidi wowote wa kunitia hatiani kuwa mimi ndiye ninayehusika na hayo

mauaji ya wanausalama wenu?”

“Mimi sifahamu” yule kachero akajitetea.

“Sasa mnawezaje kutaka kunikamata wakati hamna hakika kuwa mimi ndiye

ninayehusika?”

“Sisi ni watu wa kutekeleza amri za wakubwa wetu ofini hivyo siyo jukumu letu

kufahamu sababu ya amri husika inayotolewa”

“Nani aliyewapa amri ya kunikamata?” hatimaye nikamuuliza yule kachero huku

nikianza kupata picha kuwa ni kwa namna gani nilikuwa nikisakwa kwa udi na uvumba

na makachero wale. Kisha wakati nikiendelea kufikiri fikra zangu zikahamia kwa

yule mrembo aliyeniokoa chini ya lile jengo la ghorofa kule maeneo ya posta siku ile

dhidi ya wale makachero waliotaka kunikamata. Kwa kuwa mauaji ya makachero hao

sikuwa nimeyafanya mimi basi niliamini kuwa mshukiwa namba moja wa mauaji hayo

bila shaka angeweza kuwa ni yule dada ingawa hadi wakati huu sikuweza kufahamu

ni kwanini mlimbwende yule hatari alikuwa akiendesha kampeni ya kimyakimya ya

kuwaua makachero wale. Hata hivyo kwa namna moja au nyingine nilikuwa nimeanza

kuamini kuwa yule dada huwenda angekuwa askari jeshi tena mwenye mafunzo ya

kijeshi ya hali ya juu ambayo yalikuwa yakimsaidia vyema kutekeleza mipango yake

bila ya kukamatwa. Kwani vinginevyo kama angekuwa ni mtu wa kawaida mpaka sasa

tayari angekuwa ameshakamatwa na wanausalama wale na kuswekwa ndani akisubiri

hukumu ya kifo.

“Sulle Kiganja” hatimaye yule kachero akatamka kwa kusitasita.

“Sulle Kiganja ndiyo nani?” nikamuuliza yule kachero huku nikimtazama kwa

makini.

“Sulle Kiganja ni mkuu wa intelijensia ya ujasusi ya usalama wa taifa” jibu la yule

kachero likanipelekea nishtuke kidogo na kumtazama huku kijasho chepesi kikianza

kunitoka usoni. Sasa nilifahamu kuwa idara ya taifa ya kijasusi ilikuwa na taarifa zangu

hivyo mpaka kufikia wakati ule niliamini kuwa makachero wa usalama wangekuwa

tayari wametupa nyavu zao kila kona katika kuhakikisha kuwa wananinasa kabla

sijafika mbali zaidi katika harakati zangu.

Nikiwa bado nimeketi kando ya kile kitanda mawazo mengi yakawa yakiendelea

kupita kichwani mwangu huku nikiwaza namna ya kujiepusha na hatari kubwa

iliyokuwa mbele yangu pamoja na kumnasua Mwasu kutoka katika mikono ya

makachero wale hatari. Baada ya kufikiri sana hatimaye nikawa nimepata wazo.Mara

hii nikayapeleka tena macho yangu pale kitandani kumtazama yule kachero CID Dan

Maro kabla ya kuvunja ukimya.

“Nahitaji namba ya simu ya huyo mkuu wako aliyewatuma!”

“Sulle Kiganja…?”

“Labda kama kuna mwingine” nikaongea kwa utulivu huku nikimtazama yule

kachero ambaye sasa alikuwa chini ya himaya yangu ndani ya chumba kile cha siri

chenye dirisha dogo la kupitisha mwanga hafifu. CID Dan Maro akanitazama kwa

mashaka kama niliyekuwa nikiomba namba ya simu ya mkewe na nilipomuona akizidi

kusitasita nikamzaba tena makofi mawili ya nguvu yaliyompelekea apige yowe kali la

maumivu pale kitandani nami nikavunja ukimwa huku nikimtazama.

”Mimi siyo muuaji kama mkuu wenu anavyotaka kuwaaminisha. Nimelitumikia

jeshi la wananchi wa Tanzania kwa muda wa miaka nane kama kamandoo wa daraja la

kwanza mwenye mbinu zote za kijeshi katika mapambano ya kivita huku nikitekeleza

vizuri wajibu wangu katika nchi kadhaa barani afrika zenye migogoro ya amani. Lakini

pamoja na hayo yote siku moja nikajikuta nikipoteza kazi yangu na kutumikia kifungo

cha jeshi chenye kazi ngumu na mateso makali kwa muda wa miaka minne kwa kosa

la kutoa ripoti ya siri inayoeleza ni kwa namna gani baadhi ya viongozi wangu wa jeshi

wanavyonufaika binafsi na migogoro hiyo. Ukweli wangu ukaniponza,nikadhulumiwa

kazi na mafao yangu lakini nashukuru kuwa hawakuweza kunipokonya maarifa na

ujuzi kichwani mwangu. Hivyo nikaamua kufungua ofisi inayoshughulika na upelelezi

wa kujitegemea kama sehemu ya kujipatia kipato cha kuendesha maisha na sasa sipo

tayari kuiona idara yenu ya usalama ikinitumbukiza kwenye janga lingine ambalo kwa

sasa limeanza kuutishia uhai wangu. Ninachohitaji kutoka kwako ni ushirikiano juu ya

nini kinachoendelea vinginevyo wewe utakuwa ni mtu wa kwanza kufa humu ndani

kabla ya wengine kufuatia” nikaweka kituo na kukohoa kidogo kisha nikageuka na

kumtazama yule kachero kwa makini pale kitandani.

“Nahitaji namba ya simu ya Sulle Kiganja” sauti yangu ilikuwa kavu na yenye

hakika huku macho yangu yakiwa yameanza kupoteza utulivu. Yule kachero kuona

vile taratibu akaanza kunitajia ile namba ya simu ya mkuu wa intelijensia ya ujasusi

ya usalama wa taifa,Sulle Kiganja. Alipomaliza na mimi nikawa nimemaliza kuinakili

vizuri namba ile ya simu kwenye simu yangu na muda uleule nikaipiga. Kitambo kifupi

cha ukimya kikafuata kabla ya ile simu kuanza kuita jambo ambalo liliamsha upya hisia

zangu na kunipa matumaini. Baada ya miito kadhaa hatimaye ile simu ikapokelewa

upande wa pili na hapo sauti nzito,tulivu na yenye mamlaka ikasikika.

“Haloo,nani mwenzangu?”

“Chaz Siga bila shaka wewe ni Sulle Kiganja!” nikauliza kwa utulivu hata hivyo

sikujibiwa mapema badala yake kitambo kifupi cha ukimya kikafuata huku nikisikia

kelele hafifu upande wa pili wa ile simu na kutokana na uzoefu wangu nikajua kuwa

Sulle Kiganja pamoja na watu wake walikuwa katika harakati za kuinasa sauti yangu

kwenye vifaa vyao maalumu vya kijasusi jambo ambalo halikunipa wasiwasi wowote.

Baada ya muda mfupi ile sauti ya Sulle Kiganja ikarudi tena hewani huku hisia zangu

zikinieleza kuwa kando yake kulikuwa na watu wengine tayari kusikiliza maelezo

yangu.

“Safi sana Chaz Siga!,nilijua tu kuwa hatimaye utajitokeza mwenyewe na

kunitafuta. Niambie unazungumza kutoka wapi rafiki yangu?” Sulle Kiganja akaongea

kwa dhihaka na kuangua kicheko hafifu cha dharau.

“Mwasu yuko wapi?”

“Yuko sehemu salama kabisa,ondoa shaka”

“Nahitaji kuongeanaye sasa hivi”

“Amelala sehemu tulivu na daktari amesema kuwa hatakiwi kusumbuliwa” Sulle

Kiganja akaongea kwa kujiamini.

“Anaumwa nini hadi daktari ampumzishe?” nikauliza kwa hasira baada ya kuhisi

kuwa Mwasu angekuwa ameteswa sana na kwa muda ule hali yake ilikuwa mbaya

sana.

“Uchovu wa kawaida tu” Sulle Kiganja akaongea kwa utulivu huku akiangua

kicheko cha ushindi.

“Najua kuwa umemtesa sana Mwasu hata hivyo nakushauri kuwa uachane na

mpango huo kama bado unapenda kumuona afisa wako CID Dan Maro akiwa

mzima” maelezo yangu yakapelekea kile kicheko cha Sulle Kiganja kutoweka haraka

na sauti yake kuingiwa na utulivu.

“Usijaribu kunitisha Chaz Siga badala yake nakushauri kuwa ujitokeze mwenyewe

huko ulikojificha vinginevyo watu wangu watakukamata muda siyo mrefu”

“Sikiliza vizuri na kwa makini Sulle Kiganja,pengine unaongea hivyo kwa sababu

hujui unazungumza na mtu wa namna gani. Fahamu kuwa sijakupigia simu hii

kukusalimia kama unavyoendelea kunipotezea muda wangu. Saa mbili usiku wa leo

nitakupigia simu tena kuzungumza na Mwasu na kama sitoweza kuongeenaye afisa

wako CID Dan Maro anafahamu vizuri nini nitakachomfanya na tusilaumiane”

“Okay,okey…nimekuelewa. Sasa na mimi utanihakikishia vipi kuwa afisa wangu

Dan Maro bado mzima?” Sulle Kiganja akaongea kwa utulivu huku ile hoja yangu

ikionekana kumuingia vizuri na muda uleule nikageuka na kumchapa Dan Maro kofi

moja la uso kisha nikamuwekea ile simu sikioni huku bado akilalamika kwa maumivu.

“Dan…!” Sulle Kiganja nikamsikia akiita upande wa pili wa ile simu.

“Ndiyo mimi mkuu…!” CID Dan Maro akaongea kwa taabu huku akilalama

kwa maumivu makali ya kipigo changu hata hivyo niliwahi kuiondoa ile simu sikioni

mwake na kuiweka sikioni.

“Afisa wako Dan Maro anaendelea vizuri kama ulivyomsikia,naomba tuwasiliane

saa mbili usiku bila chenga” nilimwambia Sulle Kiganja na kabla hajatia neno nikawahi

kukata ile simu kisha nikaizima na kuitia mfukoni.



#376

MARA BAADA YA CHAZ SIGA kukata simu, sulle Kiganja akaipiga simu ile

akirudiarudia mara tatu zaidi bila mafanikio mwishowe akakata tamaa kabisa baada

ya kuhisi kuwa ile simu ya Chaz Siga ingekuwa imezimwa upande wa pili. Kisha

taratibu akageuka na kuwatazama maafisa usalama wenzake waliokuwa wakiyafuatilia

maongezi yale kwa makini wakiwemo Fulgency Kassy,Pweza na Kombe waliokuwa

wamekuja kumletea ripoti juu ya kutoweka kwa yule dada aliyesemekana kuhusika na

kifo cha meneja wa benki ya Zanzibar Marine ndugu Aden Mawala.

“CID Dan Maro bado mzima na lazima tufanye namna ya kumuokoa” Sulle

Kiganja akavunja ukimya huku akivigongesha vidole vyake mezani katika namna ya

kufikiri zaidi na hatimaye akayatembeza tena macho yake kuwatazama wale maafisa

usalama wengine mle ndani.

“Ningeshauri tusubiri kwanza hadi hiyo saa mbili usiku Chaz Siga atakapokupigia

simu na kuzungumza na wewe”.Tiblus Lupogo,mwanausalama kutoka kitengo

maalum cha upelelezi cha ofisi ya mashtaka DPP akatoa ushauri.

“Tunahitaji vijana wetu wataalam wa masuala ya mawasiliano watakaoweza

kufuatilia na kujua huyu Chaz Siga alikuwa akizungumza kutoka eneo gani halafu

baada ya hapo tutaanda mtego mzuri wa kumnasa” afisa usalama na mwanakamati

ya kudumu ya ulinzi na usalama ya jijini Dar es Salaam,Siraju Chenga akashauri kwa

utulivu huku ameyatuliza macho yake kufikiria jambo.

“Mimi siamini kuwa muuaji mkubwa kama huyu Chaz Siga anaweza kukosa

umakini kiasi cha kufanya mawasiliano yatakayopelekea kukamatwa kwake kirahisi

namna hiyo. Ngoja tusubiri hadi hiyo saa mbili usiku tukiwa na vijana wetu wa

mawasiliano na kama wataweza kutambua kuwa simu hii imepigwa kutokea wapi basi

tutakuwa na nafasi nzuri ya kumnasa” mkuu wa kamati ya dharura ya usalama na itikadi

za jeshi la wananchi Luteni Kanali Davis Mwamba akafafanua kabla ya wachangiaji

wengine kuendelea huku kila mmoja akionekana kuridhishwa na mchakato mzima wa

mikakati ya kumnasa Chaz Siga.

Kwa kuwa ripoti kutoka kwa Fulgency Kassy,Pweza na Kombe ilikuwa imejaa

viashiria vyote kuwa yule dada muuaji wa meneja wa benki ya Zanzibar Marine

alikuwa ameelekea kisiwani Zanzibar hivyo Sulle Kiganja hakuona sababu ya

kuendelea kupoteza muda badala yake akawataka Fulgency Kassy,Pweza na Kombe

haraka waondoke usiku ule na kuelekea kisiwani Zanzibar na kuhakikisha yule dada

anakamatwa kabla hajafika mbali.

Mara baada ya Fulgency Kassy,Pweza na Kombe kuondoka mle ndani majadiliano

ya kina yakaendelea zaidi baina ya wale makachero wa usalama katika mkutano ule

mfupi wa dharura.

“Uchunguzi nilioufanya kupitia vijana wangu umeanza kunipa uelekeo mzuri

kuwa huyu Chaz Siga na huyu mwanamke anayesemekana kuhusika na kifo cha

meneja wa benki ya Zanzibar Marine hawana mahusiano na pengine hawajuani kabisa.

Lakini vilevile taarifa za uchaguzi kutoka kwa vijana wangu zinaonesha kuwa bastola

iliyokuwa ikimilikiwa na meneja wa benki ya Zanzibar Marine haikuwa ikimilikiwa

kihalali na mmiliki wake anaonekana kuwa ni raia wa kisiwani Zanzibar mwenye jina

la Khalid Makame ingawa uchunguzi wa zaidi bado unaendelea” Sulle Kiganja akatoa

ufafanuzi wa kina.

“Mimi nina wazo jipya kidogo” Tiblus Lupogo akavunja tena ukimya na hapo

wote wakageuka na kumtazama kwa shauku kabla ya kuendelea.

“Kwa muda mrefu tangu kutokea kwa haya mauaji ya wanausalama wenzetu

nimekuwa nikifanya uchunguzi na kugundua kuwa wanausalama wote hawa

waliouwawa walikuwa katika tume ya udhibiti na upambanaji wa biashara haramu

ya dawa za kulevya iliyoteuliwa na mheshimiwa rais hapa nchini. Sasa hamuoni kuwa

huwenda hawa wanausalama wenzetu wanaweza kuwa wanauwawa kama sehemu ya

kuwafumba midomo na kupoteza ushahidi juu ya kile wanachokifahamu kuhusiana

na uchunguzi unaofanywa na tume yao?” hoja ya Tiblus Lupogo ikaonekana

kuwaingia vizuri wale wanausalama na hivyo kuibua minong’ono mingi huku kila

mmoja akizumza kwa mtazamo wake kuhusiana na hoja ile. Hatimaye Siraju Chenga

akuvunja ukimya.

“Nadhani hata mimi nimeanza kukubaliana na hoja hii lakini swali ni kwamba

mnadhani ni nani anayeweza kuwa nyuma ya mpango huu wa kuwafumba midomo

wanausalama wenzetu?”

“Anayeweza kufanya hivyo ni dhahiri anapaswa kuwa ni mtu mwenye madaraka

ya juu zaidi kama siyo wafanyabiashara wenye nguvu kubwa ya pesa” Tiblus Lupogo

akafafanua.

“Mimi ningependekeza kuwa mmiliki wa benki ya Zanzibar Marine naye

achunguzwe” Sulle Kiganja akapendekeza huku akiwatazama wanausalama wenzake

walioketi kwenye meza ya umbo duara yenye nane vilivyokaliwa na wanausalama wa

idara tofauti.

“Hilo nadhani halina mjadala na baada ya hapa nitatoa warrant ya kufanyika kwa

uchunguzi dhidi ya benki ya Zanzibar Marine” M.D Kunzugala mkurungenzi mkuu

wa idara ya usalama taifa akatanabaisha. Majadiliano machache yakaendelea kabla

ya kikao kile cha dharura kufika ukomo na wanausalama wale kuaga na kuondoka

wakikubaliana kukutana tena.

Mara baada ya maafisa usalama wale kuondoka mle ofisini wakabaki M.D

Kunzugala na Sulle Kiganja wakifanya majadiliano mengine ya kina zaidi kabla ya

kufikia hitimisho huku wakiwa wamekubaliana kuweka mfumo wa siri wa mawasiliano

kwa maafisa wote wa usalama waliokuwa kwenye kikao kile kama mkakati wa

upelelezi katika kutaka kufahamu kama kungekuwa na kuvuja kwa taarifa. Hatimaye

Sulle Kiganja na M.D Kunzugala wakaagana kila mmoja akishika majukumu yake.

_____

BOTI ALIYOIPANDA Koplo Tsega ilitia nanga kwenye bandari ya kisiwani

Zanzibar huku tayari usiku ukiwa umeshaingia. Kama ilivyo miji mingine ya pwani hali

ya hewa ya Zanzibar ilikuwa imetawaliwa na joto lenye upepo wa wastani. Mwanga

kutoka kwenye meli kubwa za mizigo za safari za masafa marefu zilizotia nanga katika

nanga bandarini pale kwa mbali mwanga wa taa kutoka katika majumba ya kale ya

ghorofa yaliyopakana na ufukwe wa bahari ya Hindi ulipelekea ziada nyingine katika

kuongeza uzuri wa mandhari ile.

Safari haikuwa ndefu sana lakini haikuwa imemzuia Koplo Tsega kutongoa walau

lepe moja la usingizi na sasa alikuwa ameshtuka kutoka usingizini baada ya sauti kali

ya honi ya meli kusikika wakati boti ile ilipokuwa ikitia nanga bandarini. Koplo Tsega

haraka akageuka na kuyatembeza macho yake kuwatazama abiria waliokuwa eneo

lile na kitendo cha kumuona kila mtu akisimama na kuanza kuchukua mzigo wake

ikawa ni ishara tosha kuwa safari ile ilikuwa imefika tamati. Hivyo haraka na yeye

akachukua begi lake na kulivaa mgongoni kisha akasimama na kuunga msafara wa

abiria waliokuwa wameanza kushuka kwenye boti ile huku mawazo juu ya yule mtu

aliyekuwa akifahamika kama White Sugar yakianza kuumbika tena kichwani mwake.

Akiwa anaendelea kushuka kwenye ile boti Koplo Tsega akajikuta akiwakumbuka

Fulgency Kassy,Pweza na Kombe huku hisia za kuwa huwenda wangefanya maamuzi

ya kuja kisiwani Zanzibar kumtafuta zikitengeneza ushawishi katika mawazo yake.

Hata hivyo alijipa matumaini kuwa jina la Shamsa Hafidhi alilolitumia kuiabiri boti ile

lisingekuwa na maana yoyote kwao hivyo akajipa moyo kuwa bado alikuwa salama.

Mara tu Koplo Tsega alipomaliza kushuka na kutoka kwenye bandari ile ya

Zanzibar akatembea kwa utulivu kuelekea kwenye maegesho ya teksi yaliyokuwa

nje kidogo ya eneo lile. Kijana mmoja dereva wa teksi aliyekuwa amejitega kusubiri

abiria akawa wa kwanza kumuona na kumkaribisha kwenye teksi yake kwa bashasha

zote. Koplo Tsega akatabasamu kidogo na alipoifikia ile teksi kwenye maegesho yale

akafungua mlango wa nyuma na kuingia huku akigeuka nyuma na kutazama kama

kungekuwa na mtu yeyote akimfuatilia. Hakumuona mtu yeyote na hali ile ikampa

faraja kuwa bado alikuwa salama. Yule dereva wa teksi alipofungua mlango na kuingia

mle ndani akageuka na kumuuliza Koplo Tsega kwa utulivu.

“Unaelekea wapi dada?”

“Nipeleke eneo la Changa,unapajua?” Koplo Tsega akauliza huku kumbukumbu

ya kisiwa cha Zanzibar ikiwa bado imehifadhika vyema kichwani mwake.

“Ondoa shaka napafahamu vizuri sana Changa,ndiyo wewe unapoishi?” yule

dereva akauliza huku akiitoa ile teksi kwenye maegesho yale hata hivyo Koplo Tsega

hakumjibu badala yake akatumbukiza swali kwenye maongezi yale.

“Utanitoza pesa kiasi gani?”

“Utanipa elfu kumi na tano tu dada yangu,bei ya mafuta imeongezeka sana” yule

dereva wa teksi akajitetea kabla hajaombwa kupunguza hali iliyompelekea Koplo

Tsega ajikute akitabasamu.

“Endesha gari” Koplo Tsega akaongea kwa utulivu na hapo safari ikaanza huku

ile teksi ikiacha maegesho yale na kushika uelekeo wa upande wa kulia kuifuata

barabara ya lami iliyokuwa ikikatisha kandokando ya bahari ile na hapo Koplo Tsega

akajiegemeza taratibu kwenye siti ya nyuma ya ile teksi.

Tangu utawala wa kwanza wa Sultan Majid bin Said hadi utawala wa mwisho wa

Sultan Jamshid bin Abdallah kabla ya kupatikana kwa uhuru wa mtu mweusi kisiwa

cha Zanzibar kimekuwa ni mji wa kale uliozungukwa na magofu ya zamani mazuri

yaliyokuwa makazi ya watawala na walowezi kutoka uajemi.

Muda huu wa usiku kandokando ya barabara ile kuelekea mji wa Stone Town

wachuuzi wa samaki walikuwa wameweka meza zao na kuendelea kuuza bidhaa

mbalimbali pamoja na samaki. Wenyeji kwa wageni watalii kutoka mataifa mbalimbali

duniani walionekana kutembea kwa miguu na kufanya manunuzi katika mtindo wa

maisha unaowafurahisha. Hoteli mbalimbali za kitalii zilionekana kupandwa katika

baadhiya maeneo ya pwani ya bahari ya Hindi na hivyo kuongeza uzuri wa mandhari

ya usiku ya kisiwa kile.

Baada ya safari ndefu kidogo hatimaye ile teksi ikaingia barabara ya Mizingani

iliyokuwa ikipakana na ufukwe wa bahari ya Hindi upande wa kulia. Safari ikaendelea

huku teksi ile ikilipita eneo la Old Customs House halafu mbele kidogo ikalipita eneo

la Palace Museum. Hata hivyo kabla ya kulifikia eneo la Forodhani Garden dereva

wa teksi ile akakunja kona kuingia upande wa kushoto akikatisha katikati ya barabara

ya mtaa wa Nyumba ya Moto iliyokuwa ikipakana na magofu mengi ya kale. Safari

ile ikaendelea hadi pale walipoifikia barabara ya Jamatin ambapo yule dereva aliingia

upande wa kulia akiifuata barabara iliyokuwa ikitokezea kwenye Msikiti wa Jamat

Khana. Dereva wa ile teksi alipoupita ule msikiti mbele kidogo akaingia upande wa

kulia akiifuata barabara ya kuelekea Changa.

“Nishushe hapo mbele ya huo mgahawa wa Café Laaziz” Koplo Tsega

akamwambia yule dereva wa teksi baada ya kuuona mgahawa ule maarufu ambao

mbele yake kulikuwa na meza nyingi zilizokuwa na vitafunwa vya kila aina kama

chapati, vipande vya pweza, vitumbua, kalimati, kachori, kababu, kashata, maandazi,

tambi, bagia na vingine vingi vyenye majina ya asili.

Ile teksi iliposimama Koplo Tsega akafungua pochi na kumlipa yule dereva wa teksi

pesa yake kisha akafyatua kabari ya mlango na kushuka akielekea kwenye ule mgahawa

huku akifahamu fika kuwa macho ya yule dereva wa teksi yalikuwa yakimsindikiza

nyuma yake. Akiwa mle ndani yule dereva wa teksi akaendelea kumtazama Koplo

Tsega kwa utulivu hadi pale alipoingia kwenye ule mgahawa na hapo ndiyo akawasha

gari na kugeuza akirudi kule kwenye kijiwe chake alipotoka.

Lengo la Koplo Tsega likiwa ni kuondoa ushahidi juu ya wapi alipokuwa akielekea

mara tu alipohakikisha kuwa ile teksi iliyombeba ilikuwa imegeuza na kuondoka nje

ya ule mgahawa haraka na yeye akatoka nje ya ule mgahawa na kukodi bajaji moja kati

ya bajaji nyingi zilizokuwa eneo lile akimtaka dereva ampeleke eneo la soko la zamani

la watumwa ama Old Slave Market. Dereva wa bajaji ile kijana machachari akaanza

safari haraka akiifuata barabara ya Mtaa wa Kajificheni iliyokuwa ikikatisha katikati ya

makazi ya watu. Baada ya safari ndefu hatimaye dereva yule akakunja kona na kuingia

upande wa kushoto akiifuata barabara ya New Mkunazini na baada ya kitambo kifupi

cha safari ile bajaji hatimaye ikasimama eneo la Old Slave Market. Koplo Tsega

haraka akamlipa yule dereva pesa yake na ile bajaji ilipogeuza na kurudi ilipotoka

akaanza kutembea kwa miguu akielekea mbele ya ile barabara hadi pale alipoyafikia

makutano ya barabara ya Benjamin Mkapa na barabara ya Karume. Alipofika pale

akavuka makutano yale ya barabara na kukodi tena pikipiki ya Vespa akimtaka dereva

ampeleke mahali lilipokuwa duka kubwa la Zanzibar Stone City Bazaar. Dereva wa

pikipiki ile alikuwa kijana wa mjini aliyeujua vizuri mji na vichochoro vyake hivyo

haraka akashika uelekeo wa upande wa kulia akiifuata barabara ya Benjamini Mkapa

kisha akaipita shule ya Haile Selassie upande wa kulia hadi pale alipoyafikia makutano

mengine ya barabara ya Benjamini Mkapa,barabara ya Mapinduzi na barabara ya

Kawawa ambapo aliingia upande wa kulia akiifuata barabara ya Kawawa.

Safari ikaendelea huku ile pikipiki ikilipita eneo la The State University of Zanzibar

kwa upande wa kulia na mbele kidogo akilipita jumba kubwa la Majestic Cinema. Hatua

chache mara baada ya ile pikipiki kulipita lile jengo la Majestic Cinema yule dereva

akaingia upande wa kulia eneo la Kibokoni ambapo alipofika mbele akashika uelekeo

wa barabara ya Sokomuhogo na baada ya safari fupi hatimaye ile pikipiki ikaenda

kusimama nje ya duka kubwa la kisasa lenye maandishi makubwa yanayosomeka juu

yake Zanzibar Stone City Bazaar. Kuona vile Koplo Tsega akatabasamu kidogo kisha

akushuka na kufungua pochi yake akitoa pesa na kumlipa yule dereva wa pikipiki.

Yule dereva wa pikipiki akaipokea ile pesa na kuitia mfukoni kisha akawasha pikipiki

yake na kutokomea mitaani.

Kwa sekunde kadhaa Koplo Tsega akasimama ng’ambo ya barabara ile

akilichunguza kwa makini lile jengo la Zanzibar Stone City Bazaar huku akishangazwa

sana na uwekezaji mkubwa wa biashara wa namna ile. Hapakuwa na shaka yeyote

kuwa duka lile lilikuwa ndiyo duka kubwa na la kisasa katika eneo lote la Stone Town.

Kupitia kuta safi za vioo za duka lile la kisasa bidhaa za kila namna zilionekana ndani

yake.

Nje ya jengo lile kwenye eneo la maegesho kulikuwa na magari machache

yaliyoegeshwa labda kwa vile muda ulikuwa umeanza kuyoyoma kwani maduka

mengi ya kisiwani Zanzibar yalikuwa tayari yamefungwa. Kadiri Koplo Tsega

alivyokuwa akilitazama lile jengo la Zanzibar Stone City Bazaar ndivyo taswira ya

yule mtu aliyekuwa akifahamika kama White Sugar ilivyokuw a ikijengeka upya katika

fikra zake. Hatimaye akavuka barabara ile kuelekea upande wa pili na kisha kuanza

kutembea akielekea kwenye mlango mkubwa wa lile duka la Zanzibar Stone City

Bazaar na muda mfupi baadaye alikuwa mle ndani.

Kama yalivyokuwa maduka mengi makubwa ya mijini ya kisasa duka la Zanzibar

Stone City Bazaar halikuwa tofauti sana kwani mle ndani kulikuwa bidhaa za kila

namna zilizopangwa vizuri katika maeneo tofauti kutegemeana na aina ya bidhaa

yenyewe. Mle ndani kulikuwa na raia wengi wa kigeni waliofika kufanya manunuzi

huku wakizunguka korido moja ya bidhaa kwenda nyingine na vitoroli vidogo vya

kusukuma kwa mikono vyenye magurudumu madogo na vitenga cha kubebea bidhaa

nyingi kwa pamoja.

Upande wa kushoto wa lile duka kulikuwa na rafu nzuri za mbao zenye bidhaa

zilizopangwa katika mtindo unaovutia. Mara baada ya kuingia mle ndani upande wa

mbele kulikuwa na sehemu zenye mashine za kusoma thamani ya bidhaa kando yake

wakiwa wameketi wafanyakazi wa duka lile. Upande wa kulia kulikuwa na maduka ya

simu na vifaa vya umeme.

Koplo Tsega taratibu akapiga hatua zake hafifu kuelekea kwenye yale maduka

ya simu na wakati akifanya vile macho ya watu waliokuwa mle ndani yakamtazama

kwa utulivu huku yakionekana kuvutiwa na namna ya uvaaji wake. Ndani ya duka la

kwanza la simu aliketi msichana mweupe mlimbwende mwenye asili ya bara la Asia

aliyevaa Baibui.

“Habari za kazi?”

“Salama karibu sana” yule dada akaongea kwa utulivu huku akimtazama

KoploTiglis Tsega

“Ahsante” Koplo Tsega akaitikia huku akijitia kutazama simu zilizokuwa

zimepangwa katika rafu za vioo za lile duka na wakati akifanya vile pia akawa

akiyachunguza vizuri mandhari ya mle ndani. Kutoka pale kwenye lile duka la simu

za mkononi upande wa kushoto kulikuwa na ngazi za kuelekea sehemu ya juu ya

lile jengo kulipokuwa na ofisi za utawala za lile duka. Hivyo kwa namna moja au

nyingine Koplo Tsega alijikuta akiwaza kuwa White Sugar angeweza kuwa ndani ya

ofisi mojawapo kati ya zile. Baada ya muda mfupi wateja wengine wakawa wameingia

mle ndani na kufika pale kwenye duka la simu na hivyo kuongeza idadi ya watu eneo

lile hali iliyompelekea Koplo Tsega kuweza kufanya uchunguzi wake kwa uhuru zaidi.

Koplo Tsega akiwa bado anaendelea kununua muda pale kwenye lile duka la simu

ghafla mlango mmoja kati ya milango mingi ya vyumba vya utawala vilivyokuwa juu

ya lile jengo ukafunguliwa. Koplo Tsega haraka akageuka na kutazama kule juu. Mara

baada ya mlango ule kufunguliwa wakatoka wanaume watatu wote wakiwa katika

mavazi nadhifu ya suti na kuanza kutembea kwa haraka wakazifuata zile ngazi za

kushukia sehemu ya chini ya lile duka katika korido pana iliyozuiliwa na ukuta mfupi

wa mabomba ya vyuma.

Mara moja moyo wa Koplo Tsega ukapoteza utulivu,damu ikamchemka

mwilini,nywele zikamcheza na jasho jepesi likaanza kumtoka. Miongoni mwa wale

wanaume watatu mmoja wao alikuwa ni yule aliyefahamika kwa jina la White Sugar

ambaye Koplo Tsega alikuwa amemkumbuka vizuri kuwa ndiye yule aliyepishananaye

mlangoni kule kwenye lile duka jingine la Zanzibar Stone City Bazaar lilioko Mlimani

City Shopping Mall jijini Dar es Salaam. White Sugar alikuwa katika muonekano wake

uleule wa awali pasipo kubadili mavazi. Upande wake wa kushoto na kulia kulikuwa

na vijana wawili waliokuwa wakitembeanaye sambamba kama walinzi wake huku

mmoja akiwa amebeba Briefcase nyeusi ambayo Koplo Tsega aliikumbuka vyema

kuwa ilikuwa ni ileile aliyomuonanayo White Sugar kule jijini Dar es Salaam.

Wakati White Sugar akishuka ngazi na wale wapambe wake kuelekea lile eneo

la chini kwenye lile duka kubwa la Zanzibar Stone City Bazaar njiani akapishana na

wafanyakazi wawili wa lile duka wakiwa katika sare zao za kazi ambapo walimsalimia

kwa heshima zote huku yeye akiitikia salamu zao kwa kupunga mkono kivivuvivu

kama mtu asiye na muda. Koplo Tsega akaendelea kumtazama vizuri White Sugar na

wapambe wake namna alivyokuwa akizishuka ngazi zile kwa madaha kama mfalme

katika utukufu wake na kupitia mwanga mkali wa taa zilizokuwa ndani ya jengo lile

Koplo Tsega akajiridhisha vizuri kuwa White Sugar alikuwa mwanaume mweusi sana

kuwahi kuonekana duniani angawaje afya na rangi yake ya ngozi viliusanifu vizuri

mwenekano wake wa hali ya ukwasi.

Mara tu alipomaliza kushuka zile ngazi White Sugar na wapambe wake wakashika

uelekeo wa upande wa kulia wakiufuata mlango mdogo uliokuwa kwenye kona moja

ya lile jengo. Wafanyakazi wa lile duka kuona vile wakawa ni kama vile waliotekwa

umakini huku wakijisogeza karibu na kumsalimia kwa bashasha zote za kirafiki ambapo

aliwaitikia kwa kuwapungia mkono kivivuvivu kama kawaida yake kisha White Sugar

akamuita mtu mmoja aliyekuwa eneo lile amevaa suti nyeusi na kumnong’oneza

jambo. Yule mtu akawa ni kama anayepokea maelekezo fulani yaliyompelekea ageuke

na kutazama kwenye lile duka la simu jambo ambalo Koplo Tsega hakulielewa maana

yake.

White Sugar alipoufikia ule mlango uliokuwa kwenye kona ya lile duka mpambe

wake mmoja kati ya wale vijana wawili akawahi mbele na kuufungua ule mlango na

hapo White Sugar akapita kisha wale vijana wapambe wakafuatia nyuma yake kabla

ya mlango ule kufungwa. Koplo Tsega alipotazama juu ya ule mlango akaona kibao

cha rangi nyeusi chenye maandishi makubwa meupe yakisomeka EXIT DOOR-For

Administration use only.

Kuona vile Koplo Tsega hakutaka kuendelea kusubiri hivyo taratibu akalitoroka

lile kundi la watu waliokuwa wamesimama nje ya lile duka la simu na kushika uelekeo

wa upande wa kushoto ulipokuwa mlango wa kutoka nje ya lile duka la Zanzibar Stone

City Bazaar. Mara tu alipotoka kule nje akaambaa na ukuta akielekea kwenye kona lile

jengo.Hata hivyo kabla hajafika mara akajikuta akisita na kujibanza baada ya kusikia

muungurumo wa injini ya gari likiacha maegesho ya magari ya lile jengo. Haukupita

muda mrefu mara gari kubwa aina ya Ford jeusi likayaacha maegesho yale na kuingia

kwenye ile barabara ya lami iliyokuwa ikikatisha mbele ya lile jengo la Zanzibar Stone

City Bazaar likishika uelekeo wa upande wa kushoto kuifuata barabara ya mtaa wa

Sokomuhogo eneo la Kibokoni kuelekea kwenye ile kona ya Majestic Cinema.

Lilikuwa tukio la kushtukiza ambalo Koplo Tsega hakuwa amelitarajia kwani White

Sugar na wapambe wake walikuwa wakiondoka eneo lile na kuelekea kusikojulikana.

Kuona vile Koplo Tsega akaiacha ile kona na kuanza kutafuta usafiri wa haraka eneo

lile hata hivyo hakufanikiwa kwani lile eneo halikuwa na kituo cha usafiri wa namna

yoyote hivyo akajikuta akianza kutimua mbio kulifukuza lile gari kwa nyuma kama

mwehu na lile gari likaendelea kutimua mbio likitokomea. Koplo Tsega akaendea

kukimbia akilifukuza lile gari lakini mwendo wake haukufua dafu kwani baada ya

muda mfupi tu lile gari likawa limetokomea kabisa mbele yake na hivyo kwa mara

nyingine White Sugar akawa ameponea kwenye tundu la sindano kitendo ambacho

Koplo Tsega alikilaani sana.

Hapakuwa na tumaini jingine la kumfikia White Sugar usiku ule hivyo Koplo

Tsega akaamua kuchepuka na kuifuata barabara nyingine iliyokuwa upande wa kulia

wa ikikatisha katikati ya majengo marefu ya ghorofa ya kale katika mtaa uliokuwa na

utulivu na ukimya wa aina yake huku mawazo mengi yakipita kichwani mwake.

Ile barabara ilikuwa tulivu mno na isiyokuwa na pilika zozote za binadamu

huku ikiangazwa kwa taa hafifu kutoka katika nguzo za taa zilizokuwa kando yake.

Wakati Koplo Tsega akiendelea kutembea katika barabara ile akajikuta akiyakumbuka

matukio yote yaliyojili tangu siku ya kwanza alipoingia jijini Dar es Salaam akitokea

eneo la Kivu ya kaskazini,jamhuri ya kidemokrasia ya nchi ya Kongo.

Ilikuwa ni wakati alipokuwa mbioni kufika mwisho wa barabara ile ili aingie

upande wa kushoto kwenye barabara nyingine pale alipokumbuka kutazama nyuma

nyake. Kwa kufanya vile mara moja baridi nyepesi ya ghafla ikasambaa mgongoni

mwake huku moyo wake ukipiga kite kwa nguvu.

Kulikuwa na wanaume wawili waliokuwa wakija kwa haraka nyuma yake kwenye

barabara ile. Mwanaume mmoja alikuwa akitembea upande wa kushoto na mwingine

akitembea upande wa kulia na mwendo wao wa haraka ulitia mashaka. Koplo Tsega

kuona vile akaongeza mwendo huku akiendelea kugeuka nyuma na kuwatazama

wale watu mara kwa mara huku hofu ikiwa imeanza kumuingia na alipoifikia ile kona

ya barabara kuingia upande wa kushoto sehemu kulipokuwa na barabara nyingine

iliyokuwa ikikatisha katikati ya majengo ya kale ya ghorofa makazi ya watu akaanza

kutimua mbio. Koplo Tsega akaendelea kutimua mbio hadi pale alipofika mwisho wa

ile barabara ambapo haraka akachepuka upande wa kulia na kwenda kujibanza kwenye

kona moja ya jumba bovu la kale lililotelekezwa miaka mingi iliyopita ambalo sasa

lilikuwa halitumiki kama makazi ya binadamu kisha akageuka nyuma na kuchungulia

kule alipotoka.

Koplo Tsega akiwa bado amejibanza kwenye ile kona haukupita muda mrefu

mara akawaona wale wanaume wawili wakichomoza kwenye kona ya ile barabara na

kuanza kutimua mbio wakija upande ule wa ile barabara kwenye ile kona ya jumba

bovu alipokuwa bado amejibanza. Koplo Tsega alipowachunguza kwa makini wale

watu akagundua kuwa walikuwa wameshika bastola mikononi mwao hali iliyopelekea

hofu ya kukabiliana na hatari ianze kuchipua taratibu moyoni mwake. Wale watu

wakaendelea kutimua mbio na walipofika pale kwenye ile kona wakapunguza mwendo

na hatimaye kusimama huku wakishauriana kuwa washike uelekeo upi kwa vile ile

barabara ilikuwa imegawanyika katika barabara kuu mbili. Barabara moja ikinyoosha

mbele na nyingine ikiingia upande wa kulia mbele ya lile jumba bovu.

“Atakuwa ameelekea wapi?” mmoja akasikika akimuuliza mwenzake kwa sauti ya

chini.

“Nahisi ni kwenye barabara hii hii kwani kama angekuwa amenyoosha kule mbele

kwa vyovyote tungekuwa tumemuona tu” mwenzake akasikika akitengeneza hoja

kisha kitambo kifupi cha ukimya kikafuatia huku wale watu wakiwa bado wamesimama

eneo lile kabla ya kushaurina jambo na kuanza kusogea taratibu kwenye kona ya lile

jengo bovu la kale. Koplo Tsega kuona vile taratibu akaicha ile kona aliyojibanza na

kuingia ndani kabisa ya lile jumba bovu huku akienda kujibanza kwenye kona moja

iliyokuwa na giza zaidi.

Haukupita muda mrefu mara wale watu nao wakaingia mle ndani ya lile jumba

bovu huku wakinyata kwa tahadhari na bastola zao mikononi. Walipofika katikati

ya lile jumba wakashauriana kitu kisha mmoja akaanza kupanda ngazi na kuelekea

sehemu ya juu ya lile jengo kwa mwendo wa kunyata. Yule mtu mwingine aliyesalia

pale chini akaanza taratibu kuzunguka kwenye kona za vyumba vya lile jengo

lisilokuwa na madirisha wala milango. Kuona vile Koplo Tsega akaichomoa bastola

yake yenye kiwambo maalum cha kuzuia sauti kutoka mafichoni na kuikamata vyema

mkononi. Yule mtu aliyebaki chini ya lile jengo akavikagua vyumba vyote vya chini

ya lile jengo na alipoona kuwa hakuna kitu cha maana akarudi mle ndani na kuanza

kuzikagua kona za eneo lile.

Koplo Tglis Tsega akiwa bado amajibanza gizani kwenye ile kona akamsubiri yule

mtu amfikie usawa wake kisha akatupa pigo moja la kareti lililoipokonya mkononi

bastola ya yule mtu na kuitupa kando. Yule mtu alipotaka kugeuka akajikuta akikabiliana

na mapigo mengine mawili ya kareti shingoni mwake yaliyolipasua vibaya koo lake

na kabla hajapiga mayowe ya kuomba msaada Koplo Tsega akawahi kumtundika

kabari matata shingoni isiyoruhusu hewa kupenya. Yule mtu akafurukuta akitupa

miguu yake huku na kule na kujitahidi kujinasua lakini ilishindika hivyo mwishowe

akaishiwa pumzi na kutulia uhai ukiwa mbali na nafsi yake. Kuona vile Koplo Tsega

akamburuta taratibu yule mtu hadi kwenye chumba kimoja cha lile jengo na kuanza

kumpekua mifukoni. Hakupata kitu chochote na wakati akimalizia kumpekua mtu

yule mifukoni mara akamsikia yule mwenzake akishuka zile ngazi za lile jengo bovu

kuja kule chini hivyo haraka akachepuka na kwenda kujibanza nyuma ya zile ngazi.

Yule mtu akawa ni kama aliyehisi jambo fulani kwani mara tu alipomaliza kushuka zile

ngazi akasimama kwa utulivu na kuanza kumuita yule mwenzake kwa sauti ya chini

“Tino…Tino…!” na yule mtu alipoona kuwa hakuna dalili zozote za kuitikiwa

akawasha kurunzi yake na kuanza kumulikamulika mle ndani na kwa kufanya vile

akawa ni kama aliyeziona zile alama za mburuto wa yule mwenzake aliyeuwawa hivyo

haraka akaikamata vyema bastola yake mkononi na kuanza kuifuatilia ile alama ya

mburuto kwa tahadhari. Koplo Tsega kuona vile haraka akatoka kwenye yale maficho

na kumvamia yule mtu kwa nyuma hali iliyowapelekea wote kwa pamoja waanguke

na kujibwa chini kama mizigo huku bastola zao zikiwaponyoka mikononi. Hata hivyo

yule mtu aliwahi kusimama haraka na kurusha teke la nyuma lililomtandika vibaya

Koplo Tsega kifuani na kumtupa tena chini. Pigo jingine la teke lilipomfikia Koplo

Tsega akawahi kuinama kidogo na hivyo kulipelekea pigo lile likate upepo bila majibu

kisha akaikita mikono yake chini kwa nyuma akijibetua vizuri na kusimama.

Kuona vile yule mtu akaruka hewani na kutupa mapigo mawili mengine ya mateke.

Pigo moja likamzaba Koplo Tsega kichwani na lile pigo la pili Koplo Tsega akawahi

kulipangua kwa mikono yake miwili kisha akajitupa chini akijiviringisha na kumfuata

yule mtu kwa kasi ya ajabu na aliponyanyuka akamchapa yule mtu ngumi mbili kavu

za korodani,mapigo matatu makini ya kareti tumboni na kisha nyumi moja ya nguvu

ya shingoni iliyompelekea yule mtu apige yowe kali la maumivu huku akipepesuka.

Kisha Koplo Tsega akajirusha upande wa pili huku akitupa teke la nyuma lililojikita

vizuri kwenye mgongo wa yule mtu na kumfanya agune kabla ya kuanguka chini. Hata

hivyo Koplo Tsega akawahi haraka kumrudia yule mtu pale chini kabla hajasimama na

hapo akaikamata miguu yake na kuanza kumburuta kwa kasi hadi kwenye nguzo moja

iliyokuwa katikati ya lile jumba bovu ambapo aliigongesha vibaya pacha ya miguu ya

yule mtu na kumsababishia maumivu makali ya korodani hali iliyompelekea yule mtu

apige yowe kali la maumivu. Yule mtu alipotaka kufurukuta kajikuta akitazamana na

mdomo wa bastola ya Koplo Tsega mkononi.

“Wewe ni nani?”

“Go to hell…!” yule mtu akajibu kwa jeuri huku akilalama kwa maumivu makali ya

korodani zake na hapo Koplo Tsega akamshindilia ngumi moja kwenye mwamba wa

pua yake iliyomsababishia maumivu makali yule mtu.

“Nakuuliza,wewe ni nani?”

“Farouk…!” yule mtu akalalama kwa maumivu makali

“Mnataka nini kwangu?”

“Tumetumwa tukufuatilie”

“Nani aliyewatuma?” Koplo Tsega akamuuliza yule mtu huku akishtushwa na

maelezo yale

“Bosi wetu…”

“Bosi wenu nani?” Koplo Tsega akamuuliza yule mtu kwa udadisi na alipomuona

akisita kunyoosha maelezo akamzaba kofi la uso.

“White Sugar…” jibu lile likampelekea Koplo Tsega kwa sekunde kadhaa ashikwe

na mduwao huku akimtazama yule mtu kwa makini. Maelezo ya yule mtu yakawa

yamempelekea amkumbuke White Sugar wakati alipokuwa akimnong’oneza mtu

mmoja muda mfupi kabla ya kutoka na wapambe wake kwenye lile duka Zanzibar

Stone City Bazaar muda mfupi uliopita.

“White Sugar anaishi wapi hapa Zanzibar?”

“Sifahamu” yule mtu akajitetea hata hivyo Koplo Tsega hakukubaliananaye

hivyo akamzaba tena makofi mawili ya nguvu usoni yaliyompelekea yule mtu aanze

kunyoosha vizuri maelezo yake.

“Mimi sijawahi kufika nyumbani kwake ila niliwahi kusikia kuwa anaishi eneo

linaloitwa Bumbwini karibu na Slave Chambers” yule mtu akafafanua na Koplo Tsega

hakuona sababu ya kuendeleza tena mjadala ule hivyo akaielekeza bastola yake kwa

yule mtu na kufyatua risasi mbili zilizomlaza yule mtu chali.



#377

SAA MBILI KAMILI USIKU ILIPOTIMIA ilinikuta nikiwa mwisho wa korido

ya ghorofa ya nne ya jengo la Millenium Architectures eneo la Kigamboni jijini Dar es

Salaam. Kisha nikaichukua simu yangu ya mkononi kutoka mfukoni na bila kupoteza

muda nikaanza kupekuwa hadi pale nilipoifikia namba ya simu ya mkuu wa idara

ya intelijensia ya kijasusi ya usalama wa taifa,Sulle Kiganja ambapo haraka nikaipiga

namba ile na kuiweka simu sikioni.

Mojawapo ya vitu nilivyokuwa na uaminifu navyo ni katika suala zima la kuzingatia

muda. Ombi langu likionekana kuzingatiwa vizuri mwito mmoja tu simu yangu

ikapokelewa upande wa pili na sauti ya mtu aliyepokea simu ile nikaikumbuka haraka

kuwa ilikuwa ni ya Sulle Kiganja.

Nikiwa na hakika kuwa mawasiliano ya simu yangu sasa yalikuwa yakichunguzwa

na sauti yangu kunaswa na vifaa maalum vya kijasusi upande wa pili nikapanga

kutokupoteza muda katika maongezi na hivyo kukimbilia kwenye hoja yangu ya

msingi.http://pseudepigraphas.blogspot.com/

“Haloo Chaz Siga habari za usiku?”

“Mpe simu Mwasu nahitaji kuzungumzanaye sasa hivi”

“Chaz nahitaji kwanza kuonana na wewe,niambie sehemu ulipo nitakuja sasa hivi”

Sulle Kiganja akaongea kwa utulivu.

“Sitaki hadithi nimekwambia mpe simu Mwasu sasa hivi na kama haiwezekani

nakata na usije kunilaumu” nikasisitiza

“Unadhani unaweza kuikimbia serikali?” Sulle kiganja akaniuliza kwa dharau.

“Ndani ya dakika kumi kuanzia sasa maiti ya afisa wako CID Dan Maro utaikuta

kwenye buti ya gari Mark II pembeni ya njia panda ya Kawe. Usiku mwema…”

nikaongea kwa hasira na kabla sijakata ile simu nikasikia.

“Mwasu huyu hapa zungumza naye” kitambo kifupi cha ukimya kikapita baada ya

sauti ya Sulle Kiganja kutoweka na hapo nikasikia sauti nyepesi ya kike ikiita upande

wa pili wa simu ile.

“Chaz…!”

“Mwasu…!”

“Bhee…!”

“Mwasu unaendeleaje?” nikamuuliza Mwasu kwa shauku

“Naendelea vizuri” Mwasu akanijibu hata hivyo nilipoitathmini vizuri sauti yake

nikagundua kuwa ilikuwa tulivu kupita kiasi na kile alichokiongea kilipingana kabisa

na hali yake.

“Upo wapi Mwasu?”

“Sipafahamu mahali hapa”

“Kuna watu wangapi hapo ulipo?” nikamuuliza Mwasu kwa utulivu na baada ya

kitambo kifupi cha ukimya nikamsikia akinijibu.

“Tupo watu nane humu ndani”

“Wamekutesa?”

“Hapana” Mwasu akaitikia kinyonge hata hivyo niligundua haraka kuwa alikuwa

akinidanganya kutokana na kushinikizwa kusema vile na watu waliomzunguka.

“Pole sana Mwasu muda siyo mrefu tutakuwa pamoja”

“Sitaki kufa Chaz nahitaji msaada wako” Mwasu akaongea kwa huzuni.

“Ondoa shaka Mwasu muda siyo mrefu watakuachia kwani hauna makosa

yoyote” nikaongea kwa utulivu nikijitahidi kumtia Mwasu moyo ingawa hadi kufikia

muda ule sikuona dalili zozote za kuweza kumuokoa kutoka katika mikono ya watu

wale na kabla Mwasu hajasema neno ile simu ikapokonywa haraka kutoka mikononi

mwake na hapo sauti ya Sulle Kiganja ikarudi tena hewani.

“Mwasu anaendelea vizuri kama ulivyomsikia”

“Hakuna haja ya kunieleza nimekwishazungumza naye tayari” nikawahi

kumkatisha Sulle Kiganja

“Afisa wangu Dan Maro anaendeleaje?”

“Amelala kwa sasa na daktari amesema asisumbuliwe” nikaongea kwa hila

“Usithubutu kumdhuru vinginevyo urafikiwetu utakwisha” Sulle Kiganja

akaongea kwa msisitizo

“Mimi na wewe hatuna urafiki Sulle usijidanganye”

“Unaweza kusema hivyo Chaz kwa vile unanichukia lakini mimi ni rafiki mwema

kwako” Sulle Kiganja akaongea kwa utulivu akiununua muda hata hivyo nilikuwa na

kila hakika kuwa vijana wake walikuwa kazini kuhakikisha wanainasa sauti yangu na

kuchunguza kuwa nilikuwa eneo gani kwa wakati ule ili waweze kunikamata na hilo

sikuwa na mashaka nalo kabisa. Nikiwa bado naendelea kufikiria mara sauti ya Sulle

Kiganja ikarudi tena hewani.

“Chaz…”

“Zungumza”

“Nimeona kuwa sihitaji kuendelea kumshikilia Mwasu hivyo kama utakubaliana

na mimi tunaweza kubadilishana. Wewe ukamchukua Mwasu wako na mimi

ukanikabidhi afisa wangu usalama,Dan Maro” nilimsikiliza vizuri Sulle Kiganja na

kugundua kuwa lile lilikuwa ni wazo la hila lenye lengo la kuandaa mapango mzuri

wa kunikamata. Hata hivyo niliishilia kutabasamu kwani sikuwa mbumbumbu kama

vile alivyokuwa akinifikiria huku mpango mpya ukianza kujengeka kichwani mwangu.

“Lini na wapi?” nikamuuliza

“Eneo la Mnazi mmoja saa nne kesho asubuhi”

“Saa sita mchana juu ya alama eneo la makutano ya barabara Uhuru Kariakoo”

nikaongea kwa hakika

“Mnazi mmoja ni sehemu nzuri isiyokuwa na msongamano…” Sulle Kiganja

akatetea hoja yake ya hila

“Nimesema saa sita mchana eneo la makutano ya barabara Uhuru Kariakoo nje ya

duka la simu za mkononi la Al-Mustaphar bila hila yoyote” nikasisitiza

“Okay!,okay!…usijali Chaz hakuna hila yoyote” hatimaye Sulle Kiganja

akakubaliana na hoja yangu na kabla hajatia neno jingine nikawahi kuikata simu

yangu na kuizima nikiitia mfukoni. Kisha nikaelekea mwisho wa korido ile na kuanza

kushuka ngazi na muda mfupi baadaye nilikuwa mbali na jengo lile la ghorofa laMillenium Architectures Dar es Salaam.



MARA BAADA YA CHAZ SIGA kukata simu Sulle kiganja akajizungusha

taratibu kwenye kiti chake cha ofisini akibembea kwa utulivu kutoka upande mmoja

na kwenda upande mwingine huku akiwatazama vijana wake wa kazi kwenye meza

ile ya ofisini namna walivyokuwa makini kuinasa sauti ya Chaz Siga na kuchunguza

kuwa muda ule mfupi alipokuwa akizungumza kwenye simu alikuwa eneo gani jijini

Dar es Salaam.

“Mmegundua nini?” Sulle Kiganja hatimaye akawauliza wale vijana huku wakiwa

bado wameziinamia kompyuta zao maalum na vifaa vyao vya kunasa sauti vikiwa

masikioni.

“This guy is very clever” mkuu wa kitengo cha mawasiliano ya ujasusi cha usalama

wa taifa Micky Sengo akageuka taratibu kwenye kiti chake na kumtazama Sulle Kiganja

huku akionesha kukata tamaa.

“Nani?” Sulle Kiganja akauliza kwa shauku kabla ya kuwaamuru vijana wake

wengine wamchukue Mwasu na kwenda kumfungia kwenye kile chumba mle ndani.

“Chaz Siga”

“Kwa vipi?” Sulle Kiganja akauliza.

“Jana inaonekana alifanya mawasiliano na simu hii akiwa eneo fulani kando

ya ufukwe wa bahari ya hindi kati ya Osterbay,Msasani au Mbezi beach na sasa

inaonekana amepiga hii simu akiwa jengo la ghorofa la Millenium Architectures

eneo la Kigamboni. Inaovyoonekana ni kama ameshtukia kuwa tunaanda mtego wa

kumnasa hivyo anarukaruka kama ndama kutupotezea timing.

“Ondoa shaka!,bado kuna njia nyingine ya kumnasa Chaz Siga” Sulle Kiganja

akaongea kwa kujitapa.

“Njia ipi?”

“Kesho saa sita mchana makutano ya barabara ya uhuru kariakoo” maelezo ya

Sulle Kiganja yakampeleka Micky Sengo amtazame kwa utulivu bila kusema neno

kisha akawasha sigara na kuitia mdomoni.

_____

NIKIWA NDANI YA PANTONI wakati nikivuka bahari kutoka eneo la

Kigamboni na kuelekea Posta usiku huu nikajikuta nikishawishika kuwasha simu na

kutazama muda kwa vile saa yangu ya mkononi nilikuwa nimeisahau kule kwenye

chumba changu cha siri nilipokuwa na mateka wangu kachero CID Dan Maro. Hata

hivyo nikiwa katika harakati za kutazama muda baada ya ile simu yangu kuwaka mara

nikaiona namba ya simu ya mzee James Risasi ikianza kuita. Mshtuko ukanipata

kidogo kwa vile nilikuwa sijatarajia simu yoyote kutoka kwa mzee James Risasi

hususani muda ule hata hivyo baada ya kuyatembeza macho yangu na kuridhishwa na sura za watu waliokuwa eneo lile na hapo nikaipokea ile simu.



#379

“Chaz…” sauti ya mzee James Risasi ikaunguruma upande wa pili.

“Shikamoo mzee,habari za kazi?”

“Naomba tuonane saa tatu usiku huu kwenye mgahawa wa Black Coffee eneo la

Namanga”

“Kuna shida gani mzee?” nikamuuliza kwa wasiwasi

“Fanya haraka” mzee James Risasi akamaliza kuongea na kukata simu na kwa

kweli alikuwa ameniacha njia panda huku nikishindwa kuelewa nini kilichokuwa

kikiendelea nami nikaizima simu yangu na kuitia mfukoni.

Muda mfupi baadaye lile Pantoni likatia nanga ukingoni upande wa pili wa Kivuko

kile huku nikiwa wa kwanza kushuka baada ya kulipangua kundi kubwa la abiria

waliokuwa wakijitahidi kushuka kwa pupa. Nilipofika nje ya kituo kile cha usafiri wa

Pantoni kwenye barabara ya Kivukoni nikakodi teksi na kumtaka dereva anipeleke

eneo la Namanga.

Yule dereva wa teksi haraka akaingia barabarani akiifuata barabara ya Balack

Obama Drive kandokando ya ufukwe wa bahari ya Hindi. Muda wa nusu saa baadaye

teksi niliyoikodi ikasimama nje ya mgahawa wa Black Coffee eneo la Namanga kisha

nikamlipa dereva pesa yake na ile teksi ilipoondoka nikavuka barabara nikielekea

ndani ya ule mgahawa na wakati nikifanya vile nikayatembeza macho yangu eneo lile

na kuiona gari nyeusi Toyota Prado ya mzee James Risasi ikiwa imeegeshwa katika

maegesho ya magari ya mgahawa ule.

Black Coffee ulikuwa mgahawa wa kisasa na wenye ubora stahiki. Ndani yake

kukiwa na meza nzuri za umbo duara zilizozungukwa na viti imara vya mbao za mti wa

Jakaranda,kuta zake zilipakwa rangi tulivu na safi zinazovutia. Madirisha yake mapana

ya mbao na vioo yalifunikwa kwa mapazia mepesi marefu yenye rangi rafiki kwa

macho ya binadamu. Kulikuwa na runinga mbili kubwa zilizofungwa mle ndani,moja

upande wa kushoto na nyingine upande wa kulia huku harufu nzuri ya vitafunwa

ikisambaa mle ndani. Wahudumu wake wasichana warembo walikuwa katika sare zao

safi za kazi na sura za kupendeza. Sehemu ambayo mtu yeyote angeweza kukaa muda

mrefu zaidi ya malengo aliyojiwekea. Mle ndani kulikuwa na watu wachache baadhi

yao wakiwa ni wazungu waliokuwa wamezama kwenye kusoma English novels huku

taratibu wakijipatia kahawa.

Nilimkuta mzee James Risasi akiwa ameketi kwenye meza moja iliyokuwa kwenye

kona ya upande wa kulia mle ndani ya mgahawa huku akijipatia kikombe cha kahawa

chukuchuku bila kitafunwa. Uso wake haukuwa mchangamfu kama nilivyozoea

kumuona hapo siku za nyuma. Alikuwa amevaa kofia nyeusi ya Pama,koti la suti refu

jeusi la kijivu lililoishia magotini,shati jeupe na tai nyeusi huku miwani yake kubwa ya

macho ikiwa imetuama vyema machoni mwake. Nilipofika kwenye ile meza nikavuta

kiti na kukaa,mhudumu alipokuja nikaagiza kikombe cha maziwa moto.

“Pole na kazi kijana wangu”

“Ahsante!,pole na wewe mzee”

“Nimesaliwa na mwaka mmoja tu wa kustaafu na sasa naona ni mbali sana

nimechoka na hii kazi” mzee James Risasi akaongea kwa utulivu huku akivuta funda

la kahawa na sikutaka kuamini kuwa yale yangekuwa ndiyo maongezi aliyoniitia.

“Ukistaafu utaelekea wapi?” nikamuuliza baada ya yule mhudumu kuniletea

kikombe cha maziwa na kuvuta funda moja.

“Kijijini kwangu Mwisenge,Musoma”

“Umekuwa mzee sasa,unawajukuu wangapi sasa?”

“Sina mke,mtoto wala mjukuu,nitajizika mwenyewe na pesa zangu za kiinua

mgongo” mzee James Risasi akaongea kwa utulivu na nilipomtazama usoni sikuona

chembe ya mzaha na jambo lile likanisikitisha sana.

“Pole sana!”

“Nimeugua kisukari kwa muda wa miaka mingi sana tangu ujana wangu,kisukari

sugu kikanipelekea nikose uwezo wa kuzalisha,wanawake wakawa wananikimbia

baada ya kushindwa kuwatimizia mahitaji yao ya kimwili. Hivyo sikuona sababu ya

kuoa na suala la watoto na wajukuu kwangu limekuwa ni ndoto ya mchana kweupe”

mzee James Risasi akaongea kwa utulivu kisha akavuta funda moja la kahawa na

kunitazama kwa makini kabla ya kuniuliza.

“Umefikia wapi na kazi yangu?” swali la mzee James Risasi likanipelekea nianze

kueleza kwa kifupi sana juu ya nilipofikia katika upelelezi wangu huku maeneo

muhimu nikimuahidi kuwa angekutana nayo kwenye ripoti nzima baada ya kukamilika.

Nilipomaliza kusimulia mzee James Risasi akavuta tena funda la kahawa na kuvunja

ukimya.

“Nataka kufahamu kama Mwasu amekamatwa akiwa na taarifa zozote zinazohusu

huu mkasa wa Mifupa 206”

“Ondoa shaka External hard disc yenye mafaili yote ya kiofisi ninayo mimi”

“Nataka uwe makini kwani sasa hivi unatafutwa kila kona ya jiji la Dar es Salaam

kwa gharama yeyote ile” mzee James Risasi akaongea kwa utulivu huku akinitazama

kwa makini na hapo nikavuta funda moja la maziwa na kuyatuliza vizuri macho yangu

nikimtazama.

“Ondoa shaka,hawawezi kunipata mpaka nitakapoikamilisha kazi yangu”

“Utafanya nini kuhusu Mwasu?” mzee James Risasi akaniuliza kwa udadisi

“Mpaka sasa bado sijafahamu nini cha kufanya ila kwa kuwa muda upo chochote

kinaweza kutokea”

“Taarifa nilizozisikia ofisini zinakutuhumu wewe kama muuaji wa maafisa

usalama,Guzbert Kojo,Pierre Kwizera,P.J Toddo,Masam na Remmy”

“Siwafahamu hao watu”

“Una hakika?” mzee James Risasi akaniuliza akionekana kutaka kupata hakika ya

jibu langu.

“Sina sababu ya kuwaua na hadi sasa bado sijawathibitisha kuhusika na kile

ninachokipeleleza”

“Unadhani nani atakuwa anahusika na vifo vyao?” mzee James Risasi akaniuliza

huku akiiondoa miwani yake machoni na kufikicha macho kabla ya kuirudishia.

“Hiyo ni kazi nyingine yenye malipo yanayojitegemea” nikaongea kwa utulivu na

kumpelekea mzee James Risasi atabasamu kidogo huku mawazo yangu yakihamia

kwa yule mwanamke hatari aliyeniokoa mikononi mwa wale wanausalama chini ya lile

jengo la ghorofa kule Posta. Kitambo kifupi cha ukimya kikafuata huku kila mmoja

akionekana kushughulika na kinywaji chake kabla ya kukumbuka jambo na kumuuliza

mzee James Risasi.

“Sulle Kiganja anawadhifa gani katika ofisi yenu?”

“Mkuu wa idara ya intelijensia ya ujasusi ya usalama wa taifa na kabla ya kupewa

wadhifa huo cheo hicho kilikuwa chini ya Abdulkadir Badru” mzee James Risasi

akafafanua na hapo nikamtazama kwa makini huku hoja mpya zikichipuka kichwani

mwangu.

“Kwanini Abdulkadir Badru aliondolewa kwenye wadhifa wake na kupewa huyo

Sulle Kiganja?”

“Baada ya kutokea kwa mauaji ya wanausalama hao unaoshukiwa kuwauwa kamati

ikamtuhumu Abdulkadir Badru kuwa ni mzembe” mzee James Risasi akafafanua.

“Sasa hivi Abdulkadir Badru ana wadhifa gani?”

“Ni afisa usalama wa taifa wa kawaida kabisa asiyekuwa na kazi maalum”

“Anaisha wapi hapa Dar es Salaam?” nikauliza kwa shauku huku nikimtazama

mzee James Risasi kwa makini.

“Block H,jengo la ghorofa la shirika la nyumba la taifa NHC,nyumba namba

14,mtaa wa Lugalo eneo la Upanga. Abdulkadir Badru ni rafiki yangu wa siku nyingi

kama una shida naye yoyote kupitia mimi hatoshindwa kukusaidia” jibu la mzee James

Risasi likanipelekea niupishe utulivu tena kichwani mwangu.

“Ukitoka hapa unaelekea wapi?” mzee James Risasi akaniuliza kwa utulivu baada

ya kitambo kifupi cha ukimya.

“Kanisa la The Last Day Gospel Ministry,nahitaji kuonana na Pastor Romanus

ana taarifa muhimu juu ya huu upelelezi wa mkasa wa Mifupa 206”

“Kuwa mwangalifu sana na nyendo zako huku ukitambua kuwa roho yako

inawindwa”

“Ondoa shaka”

Maongezi ya hapa na pale yakafuatia hadi pale tulipoonekana kutosheka na

vinywaji na hapo tukasogeza viti nyuma na kusimama kisha nikalipia vile vinywaji na

kuongozana na mzee James Risasi tukielekea nje ya ule mgahawa. Mara tu tulipotoka

nje ya ule mgahawa tukaagana huku tukikubaliana kuwasiliana tena katika kujulishana

hali ya mambo itakavyokuwa inaendelea.

Ilikuw a ni mara tu baada ya kuachana na mzee James Risasi nje ya mgahawa

ule huku yeye akielekea sehemu alipoegesha gari lake na mimi nikitembea taratibu

kuelekea kwenye kituo cha teksi kilichokuwa jirani na eneo lile pale nilipoliona gari

moja aina ya Landcruiser jeupe likichomoza na kuja mbele yangu. Kuliona gari lile

hisia mbaya zikaniingia akilini na nilipogeuka nyuma kumtazama mzee James Risasi

nikamuona kuwa alikuwa amebakiwa na hatua chache kulifikia gari lake kwenye

yale maegesho ya magari. Nilipoyarudisha macho yangu kulitazama lile gari jeupe

Landcruiser lililokuwa likija mbele yangu likawa tayari limenifikia na hapo nikaona

kioo kimoja cha dirisha la ubavuni kikishushwa haraka kisha ukachungulia mkono

wa mtu ulioshika bastola. Sikutaka kusubiri zaidi hivyo nikawahi kujirusha na kujitupa

mtaroni huku mvua ya risasi ikifuatia nyuma yangu. Hata hivyo mlengaji yule alikuwa

amechelewa kwani mara tu nilipoingia kwenye ule mtaro wa kando ya ile barabara

nikaingia chini ya daraja dogo la mfereji ule kujikinga na risasi zile. Ile Landcruiser

haikusimama badala yake mara tu iliponipita kule mbele nikasikia milio miwili ya risasi

na kisha nikaisikia injini ya ile gari ikiyoyoma na kutokomea zake.

Niliendelea kujibanza ndani ya lile daraja dogo kwa dakika kadhaa nikijihakikishia

usalama wangu kisha nikaichomoa bastola yangu kutoka mafichoni na kutoka sehemu

ile nikielekea kwenye yale maegesho ya gari la mzee James Risasi. Wakati nikifika eneo

lile moyo wangu ukaingiwa na baridi ya ghafla kabla ya simanzi kuziteka fikra zangu.

Nilimkuta mzeeJames Risasi akiwa amelala chini kwenye maegesho yale hatua

chache kabla ya kulifikia gari lake. Kifuani alikuwa na matundu mawili ya risasi

yaliyokuwa yakivuja damu nyingi. Alikuwa ametulia kimya huku mdomo na macho

yake vikiwa wazi kama mtu anayetazama mbingu ingawa nilipomsogelea na kumshika

shingoni sikuona mjongeo wowote wa damu. Mwili wake ulikuw a ukipoa taratibu

huku uhai ukiwa mbali na nafsi yake. Mzee James Risasi tayari alikuwa amekata

roho. Niliendelea kumtazama mzee James Risasi huku machozi yakinilengalenga

hata hivyo sikuwa na namna ya kufanya. Nilipogeuka na kuyatembeza macho yangu

eneo lile nikaona kuwa watu walishaanza kukusanyika hivyo sikutaka kupoteza muda

badala yake haraka nikampekua mzee James Risasi mifukoni na kuchukua vitu vyote

alivyokuwanavyo na hatimye kutoweka haraka eneo lile.





#380

MAONGEZI YA SIMU KATI YA mzee James Risasi na Chaz Siga yalikuwa

yamenaswa vizuri na mkuu wa idara ya mawasiliano ya kijasusi ya usalama wa taifa

Micky Sengo huku akishirikiana na vijana wake wa kazi baada ya namba za simu zote

za wanausalama kuwa zimeunganishwa katika mfumo wa kitaalam unaomuwezesha

opareta kuweza kusikia kila kitu pale namba ya simu ya afisa usalama mmoja

inapopigiwa au kumpigia mtu mwingine.

Taarifa zile zilipomfikia Sulle Kiganja haraka akawatuma vijana wake kuelekea

eneo la Namanga sehemu kulipokuwa mgahawa wa Black Coffee huku kwa mara

ya kwanza akijiridhisha kuwa mwanausalama mwenzao mzee James Risasi ndiye

aliyekuwa akivujisha nje taarifa za kijasusi za idara ya usalama wa taifa. Lakini bado

akishindwa kuelewa kuwa mzee James Risasi alikuwa na mahusiano gani na Chaz

Siga,mtu hatari waliyekuwa wakimsaka kila kona kama shilingi ya mkoloni.

_____

MWILI WANGU ULIKUWA MLE NDANI lakini fikra zangu zilikuwa nje

kabisa ya eneo lile kwenye ulimwengu wa sayari nyingine kabisa ya masafa marefu.

Kifo cha mzee James Risasi kilikuwa kimenihuzunisha sana na kuacha kovu kubwa

lisilofutika kamwe moyoni mwangu. Kila nilipotulia na kuupisha utulivu nafsini

mwangu zile sauti za milio ya risasi zilizohitimisha safari ya uhai wa mzee James Risasi

hapa duniani zikaendelea kuchukua nafasi kubwa katika mawazo yangu na kunipelekea

niugue maradhi ya fedheha na unyonge kwenye mtima wangu. Ni dhahiri kuwa wauaji

wale hawakuwa na sababu za kutosha za kuukatisha uhai wa mzee James Risasi ingawa

kwa upande mwingine taratibu zake za kazi zingetosha kabisa kumshtaki kwa kitendo

cha kuvujisha siri za usalama kwa mtu asiyehusika ambaye sikuwa na shaka yoyote

kuwa mtu huyo ni mimi.

Nikiwa bado nimezama kwenye fikra zile swali moja likaibuka katikati ya

fikra zangu kuwa wale wauaji ambao sikuwa na shakanao kuwa walikuwa ni

wanausalama,waliwezaje kufahamu kuwa mimi na mzee James Risasi tulikuwa

ndani ya ule mgahawa wa Black Coffee kule Namanga?. Jibu sikulipata hata hivyo

nilipozidi kufikiri wazo fulani likachipua kichwani mwangu na kunipa faraja kiasi cha

kushawishika kuuchomoa mche mmoja wa sigara kutoka kwenye pakiti niliyoinunua

kando ya duka moja lililokuwa karibu na kituo cha teksi kule Namanga na kuibana

kwenye pembe moja ya mdomo wangu kabla ya kuilipua kwa kiberiti changu cha gesi

huku taratibu nikijiegemeza kwenye siti moja ya nyuma ya ile teksi.

Mwanga wa kile kiberiti ukawa umemshtua kidogo yule dereva wa teksi na

kumpelekea ageuke haraka na kunitazama kupitia kwenye kioo cha mbele cha mle

ndani kilichokuwa chini ya paa ya ile teksi. Hata hivyo dereva yule akaishilia kunitazama

pasipo kusema chochote huku akigeuka na kuingiza gia kabla ya kukanyaga mafuta

katika ile barabara ya Balack Obama Drive iliyokuwa ikikatisha kandokando ya

ufukwe wa bahari ya Hindi,nikielekea eneo la Posta sehemu lilipokuwa kanisa la The

Last Days Gospel Ministry. Nilikuwa nimekodi teksi ile muda mfupi baada ya lile

tukio la kuuwawa kwa mzee James Risasi kule eneo Namanga nje ya mgahawa wa

Black Coffee.

Wazo moja lilikuwa limenijia akilini. Miongoni mwa vitu nilivyokuwa nimevipata

muda ule baada ya kumaliza kuipekua maiti ya mzee James Risasi mifukoni ilikuwa ni

simu yake ya mkononi,kitambulisho cha kazi,kadi mbli za ATM za benki tofauti na

bastola moja ndogo iliyojazwa risasi. Hivyo haraka nikaichukua ile simu ya mzee James

Risasi na kuanza kuichunguza kwa makini. Sikuona chochote hadi pale nilipouondoa

mfuniko wa betri ya simu ile na kuuchunguza ndani yake.

Kidude kidogo mfano wa kifungo chembamba sana cheusi. Kinasa sauti

kinachoweza kusafirisha mawimbi ya sauti kwa umbali wa maelfu ya maili nyingi

kilikuwa kimepandikizwa kwa hila katika mfuniko wa betri wa simu ile ili kunasa

maongezi ya namna yoyote ambayo simu ile ingetumika kuyafanya. Sasa nilikuwa na

hakika kuwa wakati ule mzee James Risasi alipokuwa akinipigia simu nikiwa kwenye

Pantoni kutokea jengo la ghorofa la Millenium Architectures eneo la Kigamboni

nilipoenda kuwasiliana na Sulle Kiganja kwa simu kama mkakati wangu wa kumzuia

kutekeleza mipango yake ya kunikamata kwa urahisi basi maongezi yetu yalikuwa

yakisikika moja kwa moja na watu wale hatari. Hali iliyowapelekea waweze kufahamu

kwa urahisi mahali tulipokuwa na hatimaye kutufikia.

Bila kusita nikawa nimeiwasha ile simu na ilipowaka mara nikaiona ikianza kuita

na nilipochunguza kwa makini kuwa mpigaji wa simu ile angekuwa nani nikaliona jina

la Sulle Kiganja. Pasipo kujiuliza nikaipokea ile simu na kuiweka sikioni bila kusema

neno lolote na kwa kufanya vile nikaisikia sauti ya Sulle Kiganja ikianza kuita upande

wa pili. Sikuwa na neno lolote la kuzungumza badala yake nikajikuta nikimlaani Sulle

Kiganja moyoni mwangu kwa kufanya kitendo cha kihuni cha namna ile cha kumpigia

simu marehemu. Hatimaye nikaikata ile simu na kuizima kisha nikaitia mfukoni.

Muda mfupi baadaye ile teksi ikasimama barabara ya mtaa wa pili nyuma ya ule

mtaa wenye lile kanisa la The Last Days Gospel Ministry huku lengo langu likiwa ni

kuhakikisha hali ya usalama wangu kwanza kabla ya kulifikia kanisa lile. Nikamlipa

dereva wa ile teksi pesa yake na kushuka. Ile teksi ilipoondoka tu eneo lile nikavuka

barabara na kuanza kutembea taratibu na kwa tahadhari kuelekea nyuma ya mtaa ule

huku mkono wangu ukiwa ndani ya mfuko wa koti langu umeikamata bastola tayari

kwa kumdhibiti mtu yeyote ambaye angejitokeza mbele yangu na kuniwekea kizingiti.

Sikupata upinzani wa namna yoyote na baada ya safari ndefu kidogo ya miguu

hatimaye nikapita getini na kuufikia mlango wa mbele wa kanisa la The Last Days

Gospel Ministry na hatimaye kuusukuma. Mara tu nilipoingia mle ndani nikagundua

kuwa lile kanisa lilikuwa limemezwa na ukimya wa aina yake. Mapazia meupe marefu

na mepesi yalikuwa yakipepea taratibu kufuatia upepo mwanana wa usiku uliokuwa

ukipenya kupitia kwenye madirisha makubwa ya kanisa lile.

Mle ndani mbele ya kanisa sehemu ya madhabahu kulikuwa na mishumaa

mikubwa mitatu iliyokuwa juu ya meza moja ndefu yenye umbo mstatili iliyofunikwa

kwa kitambaa cheupe chenye msalaba mkubwa mwekundu uliyodariziwa kwa ustadi.

Mishumaa ile ikiteketea taratibu na kuangaza mle ndani. Nikapiga hatua chache

na kusimama katikati ya kanisa lile huku nikiyatembeza macho yangu mle ndani.

Sikumuona mtu yeyote na jambo lile likanipa wasiwasi na kujiuliza kama muda ule

Pastor Romanus angekuwa ndani ya lile kanisa au lah!.

Hata hivyo sikukata tamaa badala yake nikazidi kujongea taratibu nikielekea

sehemu ya mbele ya lile kanisa na kwa kufanya vile nikagundua kuwa nyuma ya

ile meza ya madhabahu mbele ya kanisa lile kulikuwa na mtu aliyeketi kwenye kiti

huku akiwa katika mavazi ya utukufu kama yale niliyokuwa nimemuona nayo Pastor

Romanus siku ile nilipofika mle ndani kwa mara ya kwanza japokuwa sikuweza kuiona

vizuri sura ya mtu yule kwa vile alivyokuwa ameketi kwa utulivu na kuiinamia meza ile

akionekana kusoma maelezo kwenye kitabu fulani. Hata hivyo kitendo cha yule mtu

kuinua macho yake na kunitazama haraka na kisha kuendelea kusoma kile kitabu pale

mezani pasipo kunikaribisha wala kutia neno lolote kikawa kimenishangaza sana huku

nikijipa moyo kuwa huenda Pastor Romanus alikuwa tayari amenisahau.

Nilitaka kusogea karibu zaidi ya ile meza ya pale madhabahuni mle ndani kanisani

ili niweze kumsalimia kwa karibu zaidi yule mtu aliyeketi kwenye kile kiti huku

nikiamini kuwa angekuwa ndiye Pastor Romanus na hivyo salamu yangu ya karibu

ingempelekea anitazame vizuri na kunikumbuka. Hata hivyo hilo halikutokea kwani

wakati nilipokuwa nikikaribia ile meza haraka nikagundua kuwa yule mtu aliyeketi

kwenye kile kiti nyuma ya meza ile hakuwa mzee kama alivyokuwa Pastor Romanus

ingawa pia alikuwa amevaa vizuri yale mavazi ya utukufu.

Kile kitabu alichokuwa akikisoma yule mtu pale mezani nikakitambua haraka

kuwa ilikuwa ni Biblia ingawa nilipoichunguza kwa makini ile Biblia haraka nikashtuka

baada ya kuuona mdomo wa bastola ukichungulia chini yake. Yule mtu hakuinua tena

macho yake kunitazama badala yake akawa amezama katika kusoma maelezo fulani

yaliyokuwa kwenye kurasa ile.

Wasiwasi ukiwa tayari umeanza kuniingia haraka nikayapeleka macho yangu na

kuyatembeza jirani na eneo lile na kwa kufanya vile mara nikaiona michirizi ya damu

nyingi ya kitu kilichoburutwa na kupelekwa kwenye uchochoro mmoja uliokuwa

upande wa kushoto wa ile madhabahu. Nywele zikanicheza,moyo wangu ukapiga kite

kwa nguvu,koo likanikauka ghafla na hapo utulivu ukahama kabisa kichwani mwangu.

Hatimaye uvumilivu ukanishinda hivyo haraka nikaupeleka mkono wangu mafichoni

kuichukua bastola. Lakini tayari nilikuwa nimechelewa kwani muda uleule nikasikia

sauti ya kiume ikinionya nyuma yangu huku mdomo baridi wa bastola ukikitekenya

kisogo changu.

“Tupa bastola yako chini Chaz Siga na usithubutu kufanya hila yoyote”

Kwa kweli nilijihisi kuchanganyikiwa nikataka kugeuka nyuma na kumtazama yule

mtu kuwa angekuwa nani. Lakini wakati nikiwa katika harakati zile mara nikajikuta

nikikatizwa na yule mtu aliyekuwa ameketi nyuma ya ile meza pale madhabahuni kwa

namna alivyoupenyeza mkono wake haraka chini ya ile Biblia na kuichomoa bastola

yake mafichoni. Kisha akaikamata vyema bastola ile mkononi kabla ya kusimama kwa

utulivu huku akiielekezea kifuani kwangu.

Muda uleule wakachomoza watu wengine wawili kutoka kwenye vichochoro

vilivyokuwa upande wa kulia na kushoto wa lile kanisa pale madhabahuni kutokea

kwenye vyumba vya maandalizi ya neno huku wakiwa na bastola zao mkononi katika

mavazi nadhifu ya suti. Nilipogeuka kutazama nyuma yangu nikamuona mwanaume

mmoja makini aliyeikamata vyema bastola yake mkononi na kuielekeza kwangu na

nilipotazama kule kwenye mlango wa kanisa nikawaona wanaume wengine wawili

wakiwa wamesimama mlangoni. Nilijua kuwa nisingeweza kufurukuta tena dhidi

ya watu wale hatari waliojidhatiti kikamilifu hivyo baridi nyepesi ya hofu ikapenya

taratibu moyoni mwangu na kunipelekea nijione mzembe kwa kutokuwa makini.

“Nahitaji kuonana na Pastor Romanus tafadhali!” nikajiongelesha kwa sauti huku

nikihisi kuchanganyikiwa.

“Nani aliyekwambia kuwa huu ni muda wa ibada?” yule mtu mbele yangu

akaniuliza swali la kipuuzi lililowapelekea wale wenzake waangue kicheko cha mahoka

mle ndani. Sikuwa na namna nyingine ya kufanya hivyo nikaitoa bastola yangu taratibu

na kuiweka chini sakafuni.

“Pastor Romanus yuko wapi?” nikauliza huku nikijidai sielewi mada

“Rafiki yako amekufa” yule mtu mbele yagu akaongea kwa utulivu kisha akasogea

pale niliposimama na kunichapa ngumi mbili za tumbo zilizonipelekea nihisi kutaka

kutapika.

“Mmemuua Pastor Romanus…?” nikauliza kwa hasira huku nikiugulia maumivu

ya tumbo.

“Haikuwa kazi rahisi hata hivyo tulilazimika kufanya hivyo” yule mtu akajitapa

“You bastard you killed God’s servant…?” nikauliza kwa mshangao na hapo nikajikuta

nikitandikwa ngumi nyingine mbili kavu za mgongoni zilizonipelekea nianze kuhisi

kichomi.

“Chaz Siga!...umetusumbua kwa muda mrefu lakini hatimaye tumekutia mikononi.

Usijaribu kuleta hila za kutoroka kwani bahati huwa haijitokezi mara mbili na mimi

nitakuwa mtu wa kwanza kukushindilia risasi za kutosha ukafie mbali” yule mtu

akajitapa huku akinizunguka taratibu na kunitazama kwa dhihaka.

“Mnashida gani na mimi?” nikawauliza wale watu na nilipowatazama vizuri

nikajiridhisha kuwa sura zao zilikuwa ngeni kabisa machoni mwangu ingawa

nilifahamu fika kuwa wale wangekuwa makachero waliotumwa na Sulle Kiganja

kunikamata.

“Hatuna muda mrefu wa majadiliano na wewe. Tuambie, CID Dan Maro yuko

wapi?” yule mtu aliyekuwa akinizunguka akaniuliza huku akinipekua mifukoni. Hata

hivyo hakuambulia kitu chochote kwa vile vitu vyagu nilikuwa nimeviweka mafichoni

kwenye mfuko wa siri wa lile koti sehemu isiyofikika kirahisi na mtu asiye makini.

“Kachero wenu CID Dan Maro yupo sehemu salama kabisa ondoeni shaka”

nikaongea kwa utulivu.

“Sehemu salama wapi?” yule mtu aliyekuwa akinipekua akaniuliza hata hivyo

nikalipuuza swali lake na kutumbukiza langu.

“Kwanini mmemuua Pastor Romanus kama kweli shida yenu hasa ilikuwa ni

mimi?”

“Alijitia mkaidi vinginevyo tusingekuwa na bahari naye” yule mtu akanijibu na

baada ya kukohoa kidogo akaendelea.

“Unaweza kujiuliza ni kwa namna gani tumeweza kuigundua sehemu yako hii

ya tambiko kirahisi namna hii. Jibu ni kuwa kazi ilikuwa rahisi tu kwani mara tu

ulipofanikiwa kututoroka siku ile kwenye lile eneo la Botanical Garden huku ukipitia

eneo la chini kwenye mifereji ya maji machafu tulianza kufanya uchunguzi wa kina

na makini tukiwauliza watu na kuchunguza maeneo tuliyoyashuku. Hatimaye turufu

yetu ikaangukia hapa na majibu ya kiongozi wako wa kiroho baada ya kumbana vizuri

akatueleza kuwa ulikuwa hapa. Siri moja tu rafiki yako aliyokufa nayo moyoni ni kuwa

hakutueleza kuwa ulifika hapa kufanya nini.

Hatutaki kuamini kabisa kuwa ulifika hapa kwa sababu za kiimani kwa vile

mikono yako imetapakaa damu za watu wasio na hatia. Hivyo tunaamini kuwa

kuna sababu nyingine zaidi ya hiyo ambayo hatuna wasiwasi wowote kuwa muda

utakapofika utazungumza kila kitu. Safari ya kwanza baada ya kutoka hapa tunaelekea

moja kwa moja sehemu ulipomficha CID Dan Maro na baada ya hapa Sulle Kiganja

atakuwa anakusubiri kwa hamu sana ofisini kwake” yule mtu aliyeonekana kuwa ndiye

kiongozi wao akajitapa kwangu na muda uleule akanisogelea mbele na kunivisha pingu

mikononi na wakati akifanya vile macho yangu yakawa yameweka kituo na kuitazama

vizuri ile michirizi ya damu iliyoelekea upande wa kushoto kwenye uchochoro hafifu.

Michirizi ile ya damu ikanifanya nianze kuvuta picha namna risasi za wauaji wale

zilivyotumika kuukatisha uhai wa Pastor Romanus. Hasira zikanipanda kichwani hata

hivyo sikuwa na namna ya kufanya badala yake nikameza funda kubwa la mate na

kupiga moyo konde. Mara tu yule mtu alipomaliza kunifunga ile pingu tukaanza safari

ya kutoka mle ndani huku mawazo mengi yakipita kichwani mwangu.

Nilifahamu fika kuwa namna yoyote ya kujiokoa kutoka mikononi mwa wale watu

nilipaswa kuwa makini kwa vile ulinzi niliyokuwa nimewekewa ulikuwa mkubwa tena

wa watu walionekana kuwa makini na nyendo zangu. Hata hivyo nilifahamu kuwa

endapo ningekubali kuchukuliwa na wale makachero basi ile ndiyo ingekuwa hatua

ya kwanza ya kuelekea kwenye kifo cha kinyama chenye mateso makali ya jasho la

damu kwani ni dhahiri kuwa ukweli wowote ambao ningejitetea nao kuwa mimi siyo

niliyehusika na mauaji ya makachero wenzao usingenisaidia kitu.

Sasa nilikuwa nikitembea kwa tahadhari ya hali ya juu katikati ya korido pana

iliyopakana na mabenchi katikati ya kanisa lile kuelekea nje huku nikiwa chini ya

ulinzi mkali. Nyuma yangu walikuwa watu watatu,mmoja akiwa ni yule kiongozi

wao,wawili wakiwa ni wale vijana waliokuwa wamejificha kule kwenye vichochoro

vya madhabahuni kuelekea kwenye vyumba vya kuandaa neno. Mbele yangu alikuwa

amenitangulia mtu mmoja tu ambaye ndiye yule aliyekuwa ameielekezea bastola yake

kisogoni kwangu. Nilipotazama kule mbele kwenye ule mlango wa kanisa nikawaona

wale wanaume wengine wawili wakinisubiri kwa protokali zote za ulinzi huku mmoja

akiwa amesimama upande wa kushto wa ule mlango wa kanisa na mwingine akiwa

amesimama upande wa kulia,wote wakiwa na bastola zao mikononi.

Tuliendelea kutembea kwa utulivu na tulipofika katikati ya lile kanisa kumbukumbu

ya lile tukio la kuuwawa kwa mzee James Risasi na taswira ya ile michirizi ya damu

isiyokuwa na hatia ya Pastor Romanus kule madhabahuni ikavuka kiwango cha

mwisho cha uvumilivu wangu. Sikuona sababu ya kuendelea kusubiri hivyo kwa

kasi ya upepo nikasafiri kwa hatua moja zaidi mbele yangu kisha nikatupa teke moja

makini nikiupiga ule mkono ulioshika bastola wa yule mtu mbele yangu. Ile bastola

ikamponyoka mkononi na kuruka hewani tukio ambalo lililowashangaza sana wale

wenzake na kuwapelekea washindwe kufanya maamuzi ya haraka.

Wale makachero wakiwa bado wanashangaa shangaa nikajitupa hewani kama

kivuli na kumtandika yule mtu mbele yangu mateke mawili matata ya mgongoni

yaliyomtupa vibaya kwenye mabenchi yaliyokuwa upande wa kushoto eneo lile.

Kisha nilipotua chini ile bastola ya yule kachero ikawa imeangukia mikononi mwangu

huku nikiserereka sakafuni na kupotelea kwenye uvungu wa mabenchi yaliyokuwa

jirani na eneo lile nyuma yangu nikikoswakoswa na risasi kadhaa za wale makachero.

Mapigano ndani ya hekalu la Mungu ilikuwa ni zaidi ya laana kwa wanadamu lakini

kwa kuwa uhai wangu ulikuwa mbioni kununuliwa kwa gharama ya risasi sikuwa na

namna nyingine ya kujihami.

Risasi nyingi zikawa zikirindima na kunifuata nyuma yangu kwenye yale mabenchi

ya kanisa hata hivyo kutokana na giza hafifu la mle ndani wale makachero wakapoteza

malengo ya shabaha na kuishia kuvunja mbao za mabenchi yale kwa risasi huku

mimi nikitambaa chini kwa chini. Wale makachero walipoona kuwa nilikuwa mbioni

kuwatoroka wale wenzao waliokuwa wamesimama kule mlangoni haraka wakawahi

kuja mle ndani kuongea nguvu. Kachero mmoja akashika uelekeo wa upande wa

kushoto kwenye uchochoro mdogo uliokuwa kati ya yale mabenchi ya kanisa na ukuta

huku yule kachero mwingine akianza kaparamia yale mabenchi moja baada ya jingine

na bastola yake mkononi akitazama chini kunitafuta. Hata hivyo hakufanikiwa kafika

mbalimbali kwani nilijibanza na kumsubiri hadi pale aliponikaribia kisha nikaikamata

vyema bastola yangu. Risasi mbili nilizozifyatua moja ikakilenga kiganja cha ule

mkono wake uliyoshika bastola na kukikata vibaya kidole chake tukio lililopelekea ile

bastola aliyoishika ianguke chini. Risasi nyingine ikapasua vibaya mifupa ya goti lake

na hapo akapiga yowe kali na kuanguka chini akiparanganya vibaya na yale mabenchi

na kulia kama mtoto.

Nikiwa chini ya yale mabenchi haraka nikayatembeza tena macho yangu na kuiona

miguu ya yule mwenzie akinikaribia kwa jazba. Tabasamu jepesi likapita usoni mwangu

na hapo nikajiviringisha vizuri na kuvuta kilimi cha bastola yangu mkononi. Risasi

moja ikapasua kifundo cha mguu wake na kumpelekea apige yowe kali la maumivu

na alipotua chini kwenye ile sakafu macho yetu yakakutana na hapo nikamuona yule

kachero akanisihi sana kwa ishara na kuniomba msamaha kuwa nisiukatishe uhai

wake na kwa kujenga uaminifu akinitupia ile bastola yake katika namna ya kunionesha

kuwa alikuwa hataki tena upinzani na mimi. Sikumuacha badala yake nikamlegeza

kwa risasi mbili za kiuno ambazo zingempelekea atembelee kiti cha walemavu kwa

sehemu yake ya maisha iliyosalia hapa duniani.

Muda uleule mvua kubwa ya risasi ikaanza tena kurindima mle ndani ya lile kanisa

huku risasi zile zikinifuata pale chini ya benchi nilipojibanza. Mbao za mabenchi ya

eneo lile zikaanza kipukutika ovyo na vibanzi vyake kuniangukia. Zile risasi sasa zikawa

zikinikosakosa na kunifanya nianze kuhisi hatari ya kifo ikinikaribia. Nilitaka kuanza

tena hila yangu ya kutambaa chini ya yale mabenchi ili kuikwepa mvua ile ya risasi

lakini mara moja nafsi yangu ilinionya kuwa mjongeo wowote ambao ningeufanya wa

kuhama eneo lile ningekuwa nimetoa mwanya mzuri wa shambulio la hakika la risasi

dhidi yangu na hali ile ingekuwa hatari zaidi. Hivyo nikiwa nimejibanza pale chini ya

benchi nikaanza kupiga akili nyingine ya haraka ya kujinasua.

Mle ndani ya kanisa sasa nilikuwa nikishambuliwa na makachero wanne baada ya

wale wawili kuwa nimefanikiwa kuwapunguza nguvu kama siyo kuwatuliza kabisa.

Nilipochungulia na kuwatazama wale makachero waliokuwa wakinishambulia

nikagundua kuwa wawili kati yao walikuwa nyuma yangu wakinishambulia kutoka

nyuma ya nguzo moja ya kanisa na makachero wengine wawili waliosalia walikuwa

kwenye korido pana ya katikati ya kanisa.

Wazo fulani likawa limenijia akilini. Kutoka pale uvunguni mwa lile benchi

nilikojificha nisingeweza kuwashambulia kwa urahisi wale makachero waliokuwa

kwenye ile korido ya katikati ya kanisa lakini juu yao kwenye dari ya lile kanisa

kulikuwa na feni nyingi kubwa za pangaboi zilizotundikwa kupunguza joto la mle

ndani wakati wa ibada. Hivyo bila kupoteza muda nikaikamata tena vyema bastola

yangu mkononi na kufanya mashambulizi matatu makini kuelekea kwenye vishikizo

vya zile feni kwenye dari ya lile kanisa.

Muda uleule nikaziona feni tatu zikianguka chini kwa kasi ya ajabu usawa wa wale

makachero wawili pale walipokuwa. Wale makachero kwenye ile korido hawakuwa

wameelewa vizuri ni maana ya shambulio lile hivyo wakawa wanashangaa shangaa

na muda uleule feni mbili kati ya zile tatu zikawaangukia vichwani na kuwaangusha

chini. Ile feni moja iliyosalia ikatua kwenye mabenchi ya jirani na eneo lile na kuanza

kurukaruka ovyo huku mapangaboi yake yakitishia usalama. Wale makachero

walioangukiwa na zile feni hawakufurukuta wala kusimama pale chini na hapo nikajua

kuwa walikuwa kwenye hali mbaya sana huku damu ikiwatoka kwenye majeraha ya

miili yao yaliyotokana na kukatwa vibaya na mapangaboi ya zile feni.

Sasa mle ndani kukawa kumesaliwa na makachero wawili tu ambao nao kwa

wakati ule walikuwa wameacha kufyatua risasi na hivyo kupelekea mle ndani ya kanisa

kutawaliwa na ukimya wa aina yake. Zile kelele za milio ya risasi zilikuwa zimewashtua

njiwa waliokuwa wamejenga viota vyao kwenye paa la lile kanisa na sasa njiwa wale

walikuwa wakipukutisha mbawa zao na kukimbia eneo lile.

Niliendelea kujibanza chini ya lile benchi huku nikiupima utulivu wa mle ndani na

nilipoona kuwa hakukuwa na rabsha nyingine taratibu nikaanza kutambaa chini ya yale

mabenchi kuelekea mbele ya lile kanisa. Baada ya muda mfupi nikawa nimefika kule

mbele hivyo nikatoka kwenye yale mabenchi na kwenda kujibanza kwenye kona moja

ya lile kanisa nikisikilizia kama kungekuwa rabsha zozote huku bastola yangu ikiwa

mkononi. Bado sikusikia kitu chochote ingawa nilikumbuka kuwa yale mashambulizi

ya risasi yaliyokuwa yakitokea nyuma yangu wakati ule yalikuwa yakitokea kwenye

nguzo moja kubwa ya kanisa lile ambayo haikuwa mbali sana kutoka pale nilipojibanza.

Mle ndani ya kanisa hali bado ilikuwa tulivu hivyo nikaanza kunyata taratibu

nikielekea kwenye ile nguzo kubwa ya kanisa na kwa kufanya vile mara nikamuona

kachero mmoja akichomoka kutoka kwenye ile nguzo na kuanza kukimbia akielekea

kule kwenye ule mlango mkubwa wa kanisa huku akigeuka na kuanza kunishambulia

kwa risasi. Kuona vile haraka nikawahi kujitupa chini na kujikinga mbele ya benchi

moja lililokuwa jirani na eneo lile na kwa kuwa sikutaka yule mtu anitoroke mle ndani

hivyo haraka nikajiviringisha sakafuni kuelekea kwenye ile korido ya katikati ya

ya kanisa

na nilipofika nikatafuta mhimili mzuri na kufyatua risasi moja kumlenga yule kachero

aliyekuwa mbioni kuufikia ule mlango wa kanisa ili atoke nje.

Muda uleule mara nikamsikia yule mtu aliyekuwa akikimbia akipiga yowe kali la

maumivu huku akisombwa na kutupwa hewani kabla ya kuanguka chini. Ile risasi yangu

moja ilikuwa imempata kwenye paja la mguu wake wa kushoto. Hata hivyo yule mtu

alikuwa na roho ngumu kama ya paka kwani haukupita muda mrefu mara nikamuona

akisimama tena na kuchechemea huku mkono wake wa kushoto ukijitahidi kuusaidia

kuukokota ule mguu wake wenye jeraha na hivyo kukaza mwendo tena akikimbia kwa

taabu kuufuata ule mlango wa kanisa ili atoke nje.

Sikutaka kumpa yule mtu nafasi ya kunitoroka hivyo nikavuta tena kilimi cha

bastola yangu kuisukuma risasi nyingine. Shabaha yangu makini ikapelekea risasi ile

nyingine kupenya kwenye paja la mguu wake mwingine wa kulia na hapo nikamsikia

yule kachero akipiga yowe jingine kali la maumivu kabla ya kutupwa mbele na kuanguka

chini kwenye ile korido katika mtindo wa kupiga magoti kama mtu anayeungama

dhambi zake kanisani. Huku akiutazama ule mlango wa kanisa hatua chache mbele

yake.

Yule kachero mmoja aliyesalia mle ndani kuona vile akawa ameshikwa na kihoro

hivyo kufumba na kufumbua akakurupuka kutoka kwenye maficho yake gizani na

kuanza kuparamia dirisha moja jembamba lililokuwa karibu na ile madhabahu ya

kanisa na hatimaye kujirusha nje kabla ya kusikia kishindo kikubwa cha mwanguko

wake chini ya lile dirisha huku risasi zangu mbili zikimkosakosa na kumpunyua begani.

Muda mfupi uliyofuata mara nikasikia sauti za vishindo vya hatua za yule kachero

akitimua mbio na kuyoyomea mbali na lile kanisa. Yule kachero akawa amefanikiwa

kunitoroka.

Bila kupoteza muda zaidi mle ndani haraka nikatafuta funguo za ile pingu

niliyofungwa mikononi kutoka katika mfuko wa koti la suti la yule kachero kiongozi

aliyeangukiwa na feni mojawapo la mle ndani kisha nikajifungua ile pingu na kuitupa

kando. Muda mfupi uliyofuata nikarudi tena kule madhabahuni na kuanza kuifuatilia

ile michirizi ya damu iliyokuwa imeelekea kwenye ule uchochoro wa upande wa

kushoto wa ile madhabahu.

Nilimkuta Pastor Romanus akiwa amaketi chini kwenye kona moja ya kichochoro

cha upande wa kushoto wa madhabahu ile huku akiwa katika mavazi yake ya kiraia

ya shati jeupe,suruali nyeusi ya kitambaa na viatu vya ngozi vya rangi ya udongo

miguuni. Nilimposogelea na kumshika shingoni sikuona dalili zozote za uhai na mwili

wake tayari ulikuwa wa baridi roho yake tayari ikiwa imefika kwenye sayari nyingine.

Nilipozidi kumchunguza vizuri Pastor Romanus nikagundua kuwa tumboni alikuwa

na majeraha mengi ya risasi yaliyokuwa ukingoni kuvuja damu. Macho yake alikuwa

ameyafumba ingawa mdomo wake ulikuwa wazi. Mikononi alikuwa ameikumbatia

Biblia ndogo iliyotapakaa damu. Huzuni ikanishika hata hivyo sikuwa na namna badala

yake nikainama pale chini na kumfumba vizuri mdomo wake kisha nikaichukua ile

Biblia ndogo kutoka mikononi mwake huku nikiwa nimekata tamaa kabisa ya kupata

taarifa zozote za kunisaidia kwenye harakati zangu

Niliendelea kumtazama mzee yule rafiki yangu mwenye ufahamu wa elimu ya juu

ya mambo mengi ya ulimwengu huu kisha nikageuka na kuanza kuondoka taratibu

eneo lile huku mkononi nikiwa nimeichukua ile Biblia yake iliyotapakaa damu.

Nilipofika katikati ya ile madhabahu ya kanisa sikuona haja tena ya kuondoka

na ile Biblia kwa kuwa ilikuwa imetapakaa damu nyingi ya Pastor Romanus. Hivyo

nikaelekea kwenye ile meza ya kanisa yenye mishumaa nikipanga kuitelekeza ile Biblia

juu yake. Lakini wakati nikiwa katika harakati zile nafsi yangu ikajikuta ikishawishika

kuifunua ile Biblia na kwa kuwa sikuona sababu yoyote ya kupingana na msukumo ule

moyoni mwangu nikaamua kusimama na kisha kuifunua ile Biblia. Hatimaye macho

yangu yakatua juu ya kurasa ya kwanza nyeupe ya kitabu kile iliyoandikwa kwa hati

inayosomeka vizuri.

Gabbi Masebo & Milliam Casian

Wishing you all the best in your wedding day

Revelation 13;17-18

Welcome to heaven night club

Dar es Salaam

Saturday 6th,July-2005

Oga & White Sugar

Nilipozidi kupekuwa kwenye kurasa za ile Biblia katikati nikakuta picha moja ya

zamani ya wanandoa wakiwa katika mavazi yao ya kupendeza ya harusi na nyuma yao

walikuwa wamesimama wasimamizi wa ndoa ile mwanamke na mwanaume. Yule

mwanamke msimamizi wa ile ndoa haraka nilimfahamu kuwa alikuwa ndiye yule

dada niliyepambana naye ndani ya lile jengo la ghorofa la waabudu shetani lililoko

maeneo ya Posta Dar es Salaam siku ile akifahamika kwa jina la Oga. Yule mwanaume

kwenye ile picha sikuwahi kumuona hata siku moja katika harakazi zangu na kutoka

pale nikiwa nimeanza kupata muunganiko mzuri wa matukio ya nyuma ingawa picha

bado ilikuwa haijakamilika.http://pseudepigraphas.blogspot.com/

Ingawa nilikuwa siifahamu vizuri Biblia na maandiko yake lakini kwa namna

moja au nyingine hisia za kuwa Pastor Romanus alikuwa ameniachia ujumbe fulani

kupitia kitabu kile zikawa zimeanza kujengeka kichwani. Hivyo bila kupoteza muda

nikaichukua ile Biblia na kuifuta ile damu iliyotapakaa nikitumia kile kitambaa

kilichokuwa juu ya ile meza ya madhabahu na kuitia mfukoni. Kisha haraka nikaanza

kuondoka eneo lile nikikatisha katikati ya lile kanisa kuelekea nje huku mawazo mengi

yakipita kichwani mwangu. Usikuwa bado ulikuwa unamengi ya kuzungumza.





MWISHO WA MSIMU WA KWANZA

ENDELEA KUFUATILIA MSIMU WA PILI



*********MWISHO******