ILIPOISHIA SEASON ILIYOPITA “He’s
here.Austin tayari amekuja.Ngoja nikamchukue yupo mapokezi “ akasema Linah na
kutoka .Baada ya dakika tano akarejea akiwa ameongozana na kijana mmoja
mtanashati sana mwenye sura iliyojaa tabasamu “Wow! What a handsome guy”
akawaza Monica baada ya kumuona Austin.Alikuwa ni kama mtu aliyepigwa na butwaa
kwa kitu alichokuwa anakitazama mbele yake. “Monica “ akaita Linah na kumstua
Monica “Huyu anaitwa Austin January.Ndiye mgeni Yule niliyekueleza alikuwa
anakutafuta” “Austin huyu ndiye Monica Benedict mwamsole,mkuu wa kampuni hii”
LInah akafanya utambulisho.Monica akasimama na kumpa Austin mkono. “Karibu sana
Austin.Nimefurahi kukutana nawe” “Hata mimi nimefurahi sana kuonana nawe
Monica” akasema Austin na kuketi katika sofa.Linah akatoka na kuwaacha Monica
na Austin pale ofisini. ENDELEA.................................. “ Uzuri wa
Monica si uzuri wa kawaida, naweza kumfananisha na viumbe toka sayari
nyingine.Ni uzuri usioweza kuelezeka kwa maneno.” Akawaza Austin huku
akimtazama Monica kwa jicho la wizi. “ Austin karibu sana “ Monica akaanzisha
maongezi “ Ahsante sana Monica.Pole kwa safari.Nilifika hapa jana nikataarifiwa
kwamba ulikuwa safarini nje ya nchi.” “ Ni kweli Austin nilikuwa nje ya nchi
nimerejea jana jioni na nilipofika nilitaarifiwa kwamba ulifika hapa
kunitafuta” “Natumai msaidizi wako Linah amekwisha kueleza kwa ufupi kuhusu mimi
na nini kilichonileta hapa kwako.” “ Ndiyo alinieleza” akajibu Monica “
Vizuri.Kwa ufupi naitwa Austin January,ni mtanzania lakini kwa sasa nina uraia
wa Afrika ya kusini.Kikazi mimi ni mkurugenzi wa utawala na fedha katika
kampuni ya kitalii ya A.A safari yenye makao yake makuu nchini Afrika ya
kusini.Tunawapokea watalii toka nchi mbali mbali duniani na kuwapeleka sehemu
mbali mbali za bara la Afrika.Vile vile tunazo hoteli zinaitwa AA 5 stars hotel
ambazo zimesambaa katika sehemu mbali mbali za bara la Afrika.Kwa kifupi naweza
kusema kwamba kampuni yetu ni moja kati ya kampuni kubwa na bora kabisa za
utalii hapa Afrika” akasema Austin “Nimefurahi sana kukufahamu Austin.Mimi ni
Monica Benedict ni mkurugenzi wa kampuni hii inayojishughulisha na masuala ya ubunifu
na utengenezaji wa mavazi.Tunabuni mavazi hapa na kupeleka bunifu zetu katika
viwanda vya ndani na nje ya nchi.Sidhani kama nitakuwa najisifu nikisema kwamba
kampuni yetu ni moja kati ya kampuni bora kabisa ya mavazi katika ukanda huu wa
Afrika mashariki.Mbali na mavazi ninayo pia taasisi yangu inayojisghughulisha
na kusaidia jamii yenye uhitaji na hapa tumejikita zaidi kusaidia watoto na
wazee wasiojiweza” “ Hicho ndicho haswa kilichonileta hapa kwako Monica “
akasema Austin kwa furaha “ Kampuni yetu ina kitengo kidogo cha kusaidia miradi
mbali mbali ya kijamii katika sehemu zile ambazo tuna ofisi zetu. Tumekuwa
tukichangia ujenzi wa mashule,hospitali n.k.Kwa sasa tuko katika maandalizi ya
kufungua ofisi zetu hapa Dar es salaam kwa hiyo tunataka kuanza kushiriki pia
katika miradi mbalimbali ya kijamii lakini kabla ya kufanya hivyo tumeona
tujifunze kwanza toka kwa wenzetu ili tufahamu ni sehemu gani tunaweza na sisi
kuwekeza nguvu zetu hapa Tanzania.Kwa hiyo Monica nimekuja hapa kwako kujifunza
kwani wewe na taasisi yako tayari mnao uzoefu wa kutosha na mazingira ya huku
Tanzania na kama itawezekana tunaweza kushirikiana katika baadhi ya miradi ya
kijamii” Austin akanyamaza na kurekebisha tai yake na kumtazama Monica “ Austin
nimefurahi kusikia kwamba na ninyi pia mnajishughulisha katika kusaidia jamii
masikini zenye uhitaji .Hakuna shaka sisi na ninyi tutashirikiana katika miradi
mbali mbali .Jamii masikni hapa Tanzania zina changamoto nyingi sana mfano
elimu,afya,maji safi na salama n.k.Haya ni maeneo ambayo sisi tumeyapa
kipaumbele kikubwa kwa kushjirikiana na wafadhili mbali mbali tumeweza kujenga
vituo zaidi ya kumi na sita vya afya,madarasa zaidi ya hamshini,visima vya m,ai
zaidi ya sitini katika sehemu mbalimbali nchini wanakopishi watu masikini .Tumekuwa
tukifadhili matibabu ya wazee wasiojiweza,kuwasaidia misaada mingine muhimu
kama vile chakula n.k.Tumekuwa pia tukifadhili pia elimu kwa watoto toka jamii
masikini mfano kwa sasa tuko katika hatua za mwisho za ujenzi wa shule kubwa ya
watoto wenye ulemavu wa kutokuona na kusikia.Haya ni baadhi tu ya mambo ambayo
mimi na taasisi yangu tumekuwa tukiyafanya”akasema Monica “ Hongereni sana
Monica” akasema Austin.Monica akainuka akaliendea kabati na kutoa karatasi tatu
kubwa akampatia Austin “ Hiyo ni shule ambayo tunaanza kuijenga hivi
karibuni.Pesa tayari tumeipata na kilichobaki ni kumpata mkandarasi ili ujenzi
uanze mara moja” Uso wa Austin ukapambwa na tabasamu kubwa “ Monica unastahili
pongezi kubwa sana kwa hili ulilolifanya.Jamii hii ya walemavu wana uhitaji
mkubwa na wamesahaulika sana katika jamii zetu.Shule hii itakuwa ni mkombozi
mkubwa kwao” akasema Austin “ Ahsante Austin” akasema Monica na mara mlango
ukafunguliwa akingia Linah.Akamnong’oneza kitu Monica na kutoka “Austin
nimetaarifiwa kuwa ninahitajika eneo la ujenzi kuna watu toka wizarani wamefika
na wananisubiri” akasema Monica “ Oh ! sawa Monica.Ninashukuru sana kwa
kunipokea vizuri na nina imani tutapata wasaa mzuri zaidi wa kulizungumzia
suala hili kwa upana .Nikutakie kila la heri katika kazi zako” akasema Austin
huku akiinuka “Nashukuru pia kukufahamu Austin.Nitatafuta nafasi nyingine tukae
tuzungumze kwa kirefu juu ya suala hili” akasema Monica wakaagana lakini kabla
Austin hajatoka mle ofisini Monica akasema “ Austin kama hutojali tunaweza
kuongozana kwenda eneo la ujenzi? Austin ambaye tayari alikuwa ameukaribia
mlango akageuka haraka haraka na kusema “ Hakuna tatizo Monica tunaweza kwenda
“ Good” akasema Monica na kuchukua mkoba wake wakatoka .Kila mmoja aliingia
katika gari lake wakaondoka “ Dah ! Monica ni mwanamke mwenye uzuri wa kipekee
mno.Mungu atanisamehe kwa mawazo haya lakini amempendelea mno Monica.Licha ya
kumpa uzuri usioelezeka amempa pia moyo uliojaa huruma na upendo wa kipekee
ndiyo maana amekuwa anajitoa mno kwa jamii masikini.Nimehisi kuguswa sana na
mambo haya makubwa anayoyafanya kwa jamii.Huyu ni mwanamke wa mfano na
anastahili kuwa malkia wa Afrika” akawaza Austin akiwa njiani wakielekea katika
mradi wa shule ya walemavu “ Mwanaume atakayepata nafasi ya kumpata Monica
atakuwa na bahati ya kipekee kabisa,atakuwa amepata kitu cha thamani kubwa
kuliko hata gari lililojaa madini.Wanawake wa aina hii ni wachache mno katika
dunia ya sasa.Natamani sana kumjua mpenzi wake ni nani nimpe hongera yake”
akaendelea kuwaza Austin na kutabasamu baada ya sura ya Monica kumjia kichwani
“ Nahisi kama vile sura ya Monica inaingia kwa kasi kubwa katika akili yangu
kiasi cha kumuwaza kila sekunde.Oh no ! sitakiwi kuyaruhusu mawazo haya
yatawale kichwa changu kwa sasa.Natakiwa kuelekeza akili yangu yote katika
mambo mazito yaliyoko mbele yangu” akawaza na kumkumbuka mpenzi wake Maria
“Nina hakika kwa muda huu Maria tayari atakuwa amerejea au anajiandaa kurejea
afrika kusini.Hawezi kuja Tanzania bila ya kuwasiliana nami kwanza .Nakubali sijamtendea
vizuri lakini hii ni kwa ajili ya usalama wake.Siwezi kumruhusu mwanamke
nimpendaye akaingia katika hatari .Baada ya kazi kumalizika nitamuomba msamaha
na nina imani atanielewa tu” Mawazo mengi yalikisonga kichwa cha Monica wakati
akielekea katika eneo la ujenzi wa shule.Aliwaza kuhusu ndoa yake na
David,akawaza kuhusu maisha mapya atakayoyaishi ambayo ni maisha ya kifahari
mno,na mara akamkumbuka Marcelo.Alitaka sana kufahamu mahala alipo
Marcelo.Alihitaji sana kumjulia hali na kuona namna ya kumsaidia “ Naamini hadi
jioni ya leo,David atakuwa tayari ameelekezwa mahala aliko Marcelo ili nimjulie
hali na kutafuta namna ya kumsaidia.Anahitaji sana msaada wangu na vile vile
ninataka niongee naye kuhusu ugonjwa wa Pauline ,inawezekana akawa na mchango
wowote hata wa mawazo” Kwa mbali machozi yakamlenga alipomkumbuka Pauline.
“Mungu,akuponyePauline.Nakuombe a sana upasuaji utakaofanyiwa ufanikiwe na
uendelee kuwa mzima.U mwanamke mwenye upendo wa kipekee kabisa “ akawaza Monica
Waliwasili eneo la ujenzi ,Monica akakutana na wageni wake waliokuwa
wanamsubiri,wakalizungka eneo lote na kuelekezana mambo kadhaa wakaondoka na
kuwaacha Monica na Austin “ Monica narudia tena kusema kuwa unastahili pongezi
za kipekee kwa mchango wako mkubwa kwa jamii.Jambo hili unalolifanya ni kubwa
sana.Hongera kwa mara nyingine” akasema Austin .Monica akatabasamu na kusema
“Ahsante sana Austin.Pamoja na kwamba mimi ndiye niliyebuni wazo hili la
kujenga shule hii lakini nyuma yangu kuna kundi la wadau wanaoniunga mkono na
kulifanya jambo hili liwezekane.Wamejitoa kwa hali na mali na muda wowote toka
sasa mradi utaanza.Ninafurahi sana kwa mradi huu kufikia hatua hii ya
kuanza.Ilikuwa ni ndoto yangu ya muda mrefu na sasa inakwenda kuwa kweli”
akasema Monica na ukimya mfupi ukapita “ Austin mimi ninarejea tena ofisini
kama unavyoelewa sikuwepo kwa siku kadhaa hivyo nina mzigo wa kazi.Nitatafuta
wasaa na tutakaa tutaongea .Kuna mambo mengi ambayo tunaweza tukayafanya kwa
ushirikiano.” Akasema Monica .Austin akaitazama saa yake ya dhahabu na kusema “
Sawa Monica nikutakie kazi njema lakini hata hivyo nina ombi moja kama
hutajali” “Omba Austin” “Monica una kazi nyingi zinazokukabili kwa hiyo kwa
sisi kupata wasaa wa kutosha kuzungumza kwa kina mambo tunayoweza kushirikiana
itachukua muda kidogo kwa hiyo kama hutajali naweza kukualika kwa chakula cha
usiku na tukautumia muda huo kuzungumza? Monica akatabasamu na kusema “Usemayo
ni ya kweli Austin,nina kazi nyingi lakini kuhusu ombi lako ngoja niangalie
ratiba yangu endapo itaniruhusu nitakujulisha.Nipatie namba yako ya simu”
walibadilishana namba za simu wakaagana kila mmoja akaingia katika gari lake
wakaondoka “ Imekuwa siku nzuri,nimeanza kazi yangu vizuri .Monica tayari
amenikubali na hiki ndicho nilichokuwa nakitafuta.Ninaziona kila dalili za
urafiki mkubwa kati yetu.Ombi langu la kukutana naye kwa chakula cha usiku
amelipokea na ameahidi kunijibu.Naamini atakubali na endapo atakubali
nitajitahidi kutumia vyema kila nafasi nitakayoipata ili kuipata sampuli na
hapa ninalenga zaidi nywele.Ili kuipata nywele yanipasa..oh gosh ! “ akawaza
Austin na kujikuta akistuka “Ili kuipata nywele ya Monica yanipasa nijenge
ukaribu naye mkubwa na hapa nina maanisha ni lazima kulala naye” Mwili wote
ukamsisimka alipowaza jambo hili “Nimesisimkwa mwili wote kwa hiki
ninachokiwaza.Lakini sioni njia nyingine ya kuweza kuipata nwele ya Monica bila
kufanya hivi ninavyofikiri.Kulala naye ndiyo njia pekee na rahisi.Halafu ....”
Austin akasita kidogo “ Baada ya kuonana ana kwa ana na Monica nahisi kama kuna
kitu kimeanza kujijenga taratibu kichwani kwangu.Sura ya Monica hainibanduki
kichwani.Kila dakika ninamuwaza yeye.Oh no ! sitaki kuanzisha mahusiano kwa
sasa bali ninachotakiwa ni kuikamilisha kazi yangu ya kuipata sampuli na hata
kama nikilala naye lengo litakuwa ni hilo tu na si vingine.” Akawaza na
kutabasamu halafu akamkumbuka Maria “ Hiki ninachowaza kukifanya ni kitendo cha
usaliti kwa mpenzi wangu Maria ambaye ni kwa sababu yake nimefika hapa nilipo
.What am I going to do ? Austin akajiuliza “Lakini hii ni sehemu ya kazi.Ili
kuikamilisha kazi niliyopewa lazima nifanye hivyo.Hata hivyo nitafanya mara
moja tu .Nimekuja Tanzania kufanya kazi kwa hiyo lazima nikae kikazi.Natakiwa
kumuweka pembeni Maria. Nikiendelea kumuwaza sana kila dakika nitashindwa kuifanya
kazi yangu.Kwa kuwa tayari nina uhakika hataweza tena kuja Dar es salaam
ninapaswa kumuweka pembeni muda huu hadi hapo kazi itakapokuwa imekamlika.Kazi
hii ni muhimu mno kwangu kuikamilisha” ******************* Boaz akiwa chumbani
kwake katika hoteli hii kubwa aliyofikia huku akionekana kuwa na mawazo mengi
akawasha simu yake ambayo huitumia awapo Tanzania.Akazitafuta namba fulani
akapiga “ Hallow Boaz.” Ikasema sauti nzito upande wa pili. “ Peter Chui.Habari
ya Dar es salaam? Akauliza Boaz. “ Dar es salaam naweza kusema si kwema.Bahari
imechafuka kuna upepo mbaya unavuma kwa sasa.Nimekutafuta sana jana katika simu
bila mafanikio.Nimekufurahi umenipigia.Welcome home Boaz” “ Asante sana
Peter.Ni upepo huo mbaya ndio ulionirejesha nyumbani mara moja.Msijali vijana
wangu,baba yenu nimerudi,mawimbi na dhoruba vyote vitatulia.Neno langu moja tu
linatosha kabisa kuituliza dhoruba hii.Nataka umtume kijana aje anichukue nina
maongezi nawe” “Uko wapi sasa hivi? Boaz akamuelekeza mtu aliyekuwa anaongea
naye simuni hoteli aliyofikia akakata simu na kuzitafuta namba nyingine akapiga
“ Hallow my love.Nimestuka sana baada ya kuona simu yako.Karibu sana nyumbani
mpenzi” ikasema sauti nzuri ya kike upande wa pili “ Hello Julieth.How’re you
my queen” akasema Boaz “ I’m ok.Mbona umekuja kimya kimya bila tarifa?
“Imenilazimu kuja kimya kimya kutokana na huu upepo mbaya unaoanza kuvuma hapa
nchini kwa sasa.Uko wapi mida hii? Nahitaji tuonane ili unipatie kile
kitabu.Kwa hali ya sasa ilivyo natakiwa kukihifadhi sehemu salama kwani ndilo
tumaini letu la kutuhakikishia tuko salama” “ Kwa sasa niko nyumbani” akajibu
Julieth “Sawa Julieth,naomba tukutane Mzizima City.Ninaelekea hapo muda si
mrefu” akasema Boaz na kukata simu.Hazikupita dakika thelathini kijana
aliyetumwa kuja kumchukua akawasili.Boaz akamuaga Maria na kuingia katika gari
akaondoka.Kituo cha kwanza ilikuwa ni mzizima city mahala penye majengo mengi
ya biashara ,akachukua simu na kumpigia Julieth “Tayari nimefika hapa Mzizima
.Uko sehemu gani? akasema Julieth baada ya kupokea simu. “Njoo hapa duka la
mavazi mchanganyiko utaiona gari nyeupe aina ya Jaguar na bila kuonyesha
wasiwasi wowote fungua mlango wa nyuma na uingie” akasema Boaz.Baada ya kama
dakika tatu mlango wa gari alimokuwemo Boaz ukafunguliwa akaingia Julieth kisha
gari ikaondoka.Boaz akamvuta na kumbusu “Nafurahi nimekuona Julieth” “Hata mimi
nimefurahi mno kukuona Boaz.Ila umeniudhi kwa kuja kimya kimya.Ungenitaarifu
nngekuja kukupokea uwanja wa ndege” akasema Julieth na kumbusu tena Boaz “
Haikuwa katika ratiba zangu kuja Tanzania kwa sasa lakini imenilazimu kukatisha
baadhi ya shughuli zangu na kuja kuweka sawa mambo kutokana na huu upepo mbaya
unaoanza kuvuma.Hata ndugu zangu hapa Dar hawajui kama niko hapa.By the way
kuna taarifa zozote mpya kuhusiana na Marcelo? “ Mpaka sasa hakuna taarifa
zozote na bado hatujui aliko.Jeshi la polisi mpaka sasa bado halijatoa taarifa
yoyote kuhusiana na kupotea kwake.” “ Damn ! he’s very smart lakini tutampata
tu” akasema Boaz. “Una uhakika hajahisi chochote kuhusu wewe kwamba ndiye
uliyeingia chumbani kwake na chukua kitabu ? Akauliza Boaz “Sina hakika sana
.Nahisi kuna kitu anakihisi kwani alipokuwa hospitali alionyesha utofauti
.Hakutaka maongezi na mimi kabisa.Kuna baadhi ya mambo ambayo hakutaka kabisa
sisi ndugu zake tuyafahamu.Kuna watu wawili ambao alikuwa nao karibu na
kuwasiliana nao kwa siri.” akasema Julieth “It’s ok.Where is the book? Akauliza
Boaz.Julieth akafungua mkoba wake akatoa bahasha kubwa ya khaki na kumpatia
Boaz “Did you open it? Ulisoma kilichomo ndani? Akauliza Boaz huku akimtazama
JUlieth kwa macho makali “Hapana sijafungua kama ulivyoelekeza” “ Good” akajibu
Boaz na kuifungua ile bahasha akatoa kitabu cheusi akakitazama,akamvuta Julieth
na kumbusu “ Good Job Julieth” akasema na kukifungua kile kitabu
******************** Kazi kubwa aliyopanga kuifanya Austin siku hii ni kuonana
na Monica.Akiwa njiani akirejea nyumbani baada ya kuachana na Monica Austin
akakumbuka kitu. “Job Israel..!! akasema kwa suti ndogo “ Kwa kuwa ninao muda
wa kutosha kwa nini nisimtafute huyu mtu? Ni mmoja wa watu ninaofikiria
kuwajumuisha katika kikosi cha kumlinda rais.Ninafahamu uwezo wake ,nimewahi
kufanya naye kazi kadhaa ni mtu mwenye uwezo mkubwa.Ni mtu hatari” akawaza
Austin Alibadili uelekeo na kuelekeo mahala alikokuwa akiishi Job “ Miaka
kadhaa imepita sasa Dar es salaam imebadilika mno si ile ya miaka ile.Wakati
naondoka hakukuwa na majengo mazuri hivi katika mtaa huu.” Austin alikuwa
anaendesha taratibu huku akitazama nje “Sijawasiliana na Job muda mrefu na
inawezekana akapatwa na mstuko mkubwa kwani lazima atakuwa akiamini nilikufa
Somalia.kazi ya mwisho kufanya naye ilikuwa ni ile tuliyokwenda Malawi
kuwakomboa majasusi wawili waliokamatwa nchini humo.Toka hapo sikuwahi
kuwasiliana naye tena .” akawaza Austin huku akisimamisha gari pembeni ya mti
wa mkorosho na kutazama nyumba nzuri ya ghorofa moja “Job amejenga ghorofa !
Amejitahidi sana . Lakini ni hapa nyumbani kwa Job au nimepotea? Akajiuliza
Austin. “ lakini ni hapa kwani kinachonithibitishia kuwa ni hapa ni lile duka
la Mangi pale pembeni.Duka lile,lilikuwepo hapa toka wakati ule wakati ule
ninakuja na Job...” Wakati akiendela kutafakari ghafla geti la nyumba ile
likafunguliwa na gari zuri la kifahari lenye rangi nyekundu likatoka
likiendeshwa na mwanamke mrembo .Austin akastuka “ Yule mwanamke ni nani? Mbona
si mke wa Job?Au nmekosea nyumba? Lakini hapana sijakosea ngoja nikaulize pale
dukani nipate uhakika zaidi” akawaza Austin na kuelekea dukani akanunua maji ya
kunywa na kuuliza “ Samahani ndugu yangu naomba kuuliza” “ Bila samahani kaka”
akajibu muuza duka. “ Natumai wewe ni mwenyeji sana wa eneo hili” “ Ndiyo mimi
ni mwenyeji sana wa hapa.Nina miaka zaidi ya ishirini eneo hili.Baba yangu
ndiye mwanzilishi wa kitongoji hiki cha mafarasi kwani zamani yeye alihamia
huku kukiwa pori ili apate malisho mazuri ya farasi aliokuwa anafuga.Baadae
watu wakaanza kuongezeka kwa hiyo mimi ni mkongwe eneo hili ” akajibu muuza
duka “Natumai utakuwa unamfahamu mtu mmoja anaitwa Job au baba Millen huyu
anaishi hapa jirani yako” “ Baba Millen ninamfahamu sana.Alikuwa rafiki yangu”
Akasema muuza duka na kumstua kidogo Austin. “Mimi ni rafiki yake nilikuwa nje
ya nchi kwa muda mrefu ,nimerejea na nikaona nije kumjulia hali rafiki yangu
lakini nimestuka kidogo kukuta ghorofa halafu akatoka mwanamke ambaye simfahamu
nikaona ngoja kwanza niulize wenyeji kama huyu jamaa bado yuko hapa au kuna mtu
mwingine anaishi hapa” akasema Austin “Dah ! inaonekana hukuwepo nchini kwa
muda mrefu ndugu yangu.Huyu jamaa alipatwa na matatizo ya akili.Alichanganyikiwa
baada ya kukimbiwa na mke wake.Inasemekana mke wake alimpata mwanaume mwingine
halafu akamtupia jini huyu jamaa akachanganyikiwa.Ndugu zake walikuja kumchukua
na walimpelekea kwa mganga wa kienyeji kijiji Fulani huko karibu na Kisarawe kinaitwa
Mtoka mbali.Kuna mganga anaitwa mzee Nyungu ni mganga maarufu sana kwa magonjwa
hayo.Kuna ndugu yake mmoja niliyekuwa nawasiliana naye ndiye aliyekuwa akinipa
taarifa za maendeleo ya baba Millen.Eneo hili wamekwisha liuza na mimi ndiye
niliyewasaidia kutafuta mnunuzi.Labda nikupe mawasiliano ya huyo ndugu yake
uwasiliane naye anaweza akakupa taarifa zenye uhakika zaidi kuhusu baba
Millen.” Akasema muuza duka na kumpatia Austin namba za simu za ndugu yake
Job.Austin akamshukuru Yule jamaa na kumpatia noti ya shilingi elfu tano
akapanda gari na kuondoka “Job amekuwa chizi? Ni vigumu kuamini.Nini
kimesababisha akawa chizi? Ama kweli maisha haya yana maajabu makubwa lakini
sintaamini hadi hapo nitakapomtia machoni.Kama ni kweli litakuwa ni pigo kubwa
kwangu kwani ni mtu ambaye nilimuhitaji sana katika operesheni yangu kutokana
na uhodari wake.Ngoja kwanza niwasiliane na ndugu yake niliyepewa namba zake”
Austin akasimamisha gari pembeni ya barabara akapiga zile namba alizopewa za
ndugu yake Job “Hallow ndugu habari yako.Natumai naongea na Amani” akasema
Austin baada ya simu yake kupokelewa “Ndiyo unaongea na Amani.Nani mwenzangu?
“Naitwa Austin.Mimi ni rafiki wa ndugu yako Job.Ninaishi nje ya nchi nimerejea
jana na nikataka kumjulia hali rafiki yangu ,nimefika mahala alikokuwa akiishi
nikapata taarifa kwamba amepatwa na matatizo ya akili.Ninataka kufahamu
anaendeleaje hivi sasa? “Ni kweli alipatwa na matatizo ya akili.Nilimchukua na
kumpeleka kwa wataalamu .Kwa sasa hali yake siwezi kusema ni nzuri au mbaya ila
kidogo ana unafuu” “Dah!poleni sana kwa tatizo hili.Nawezaje kuonana naye? “Kwa
sasa anaishi nyumbani kwangu mji mpya Tegeta.Unahitaji mtu wa kwenda naye kwani
kwa kukuelekeza katika simu inaweza kukupa ugumu kidogo kufika.Uko wapi mida
hii? “Niko hapa karibu na alipokuwa akiishi Job” akajibu Austin “Sawa,Mimi niko
hapa katika kiwanda cha viatu cha Ndura.Kama una usafiri njoo unichukue
nikupeleke moja kwa moja.Ukifika getini uliza Amani mjeledi utanipata haraka”
“Ahsante sana Amani nitafika hapo muda si mrefu” akasema Austin
******************** Msafara wa makamu wa rais uliwasili nyumbani kwa waziri
mkuu aliyevuliwa madaraka na kupokelewa na mwenyeji wake akakaribishwa
sebuleni. “Habari za maisha mapya? Akauliza makamu wa rais wakati wakielekea
sebuleni na wote wakaangua kicheko Sebuleni alikuwepo pia bi Agatha Mkasa mke
wa rais ambaye alisimama na kusalimiana na makamu wa rais halafu kila mmoja
akaketi.Muhudumu aliyevalia nadhifu akawahudumia vinywaji kisha wakaendelea na
maongezi. “Ndugu zangu nimewaitieni hapa kwa ajili ya kuzungumza kwa kina juu
ya hiki kilichotutokea.Sote tulikuwepo katika kikao na tuliafikiana mambo ya
kufanya.Ninayaheshimu maamuzi ya kikao kile kikubwa lakini ndugu zangu pale
katika kikao hatukupata nafasi ya kutosha kulijadili suala hili kwa undani wake
na ndiyo maana nimeona ni vyema endapo tukikutana sisi watatu kulijadili suala
hili kwa kina zaidi.Baada ya kulitafakari kwa kina nimegundua kwamba
hatukuchukua maamuzi sahihi kuhusiana na suala hili.Kwa ufupi naweza kusema
kwamba tulikurupuka sana” “Kwa nini una sehemu hivyo Jeremiah? Akauliza Makamu
wa rais “Ninasema tulikurupuka kwa sababu tulikwenda kinyume na katiba ya
Alberto’s ambayo iko wazi kwamba yeyote ambaye ataisaliti jumuiya na
ikathibitika hivyo basi adhabu yake ni kifo.Ernest Mkasa amefanya usaliti
mkubwa na wa wazi.Ameisaliti jumuiya kwa kitendo chake cha kufuta ule muswaada
na kulivunja baraza zima la mawaziri.Akaenda mbali zaidi na kumvua wadhifa mkuu
wa majeshi.Ni wazi ameanzisha vita na Alberto’s na tayari ameanza kuikata
mizizi yetu kwa kasi.Nyote mnafahamu muswada ule ulikuwa ni kila kitu
kwetu.Endapo tungefanikisha kuupitisha muswada ule basi matrilioni na
matrilioni ya fedha yangemwagika hapa Tanzania.Tungekuwa tumefanikiwa kuikomboa
nchi hii toka umasikini mkubwa lakini tumeshindwa kulifanikisha
hilo.Tumeshindwa kuikamilisha kazi tuliyopewa na Alberto mkuu wa tatu
.Tumemuangusha sana kwani Tanzania ni nchi ambayo anaitegemea mno.Hiki ni kioo
cha nchi nyingi” akanyamaza akavuta pumzi ndefu na kuendelea “ Kikao kile cha
juzi cha kujadili hili lililotokea ,kumezidi kutuzamisha na kutufanya tuonekane
hatufai na hatuna uwezo wa kuiongoza jumuiya.Tumeshindwa kuchukua hatua
zipasazo kulikabili suala hili.Toka tulipokaa kikao hakuna taarifa yoyote
iliyotolewa na wala hakuna juhudi zozote zinazoonekana za kutatua jambo
hili.Tumezidi kumpa nguvu Ernest ya kutudhoofisha na anazidi kufanikiwa na kama
hatutachukua hatua za makusudi za haraka ndani ya muda mfupi ujao hakutakuwa na
Alberto’s hapa Tanzania.Atatufagia wote na hiyo ndiyo dhamira yake.Kwa hiyo
ndugu zangu nimewaiteni hapa tulijadili kwa kina jambo hili na sisi watatu
tunaweza kufanya jambo la msingi sana la kuinusuru jumuiya yetu na tuzidi
kuaminiwa na baba Alberto mkuu” akasema Jeremiah “ Alichokiongea ndugu yangu Jeremiah
ni kitu cha msingi sana na ninaweza kukubaliana naye.Binafsi maamuzi
yaliyochukuliwa katika kikao kile sikuyafurahia.Hayakuwa maamuzi sahihi na
muafaka kwa jambo kubwa na zito kama hili.Naweza sema yalikuwa maamuzi dhaifu
mno.Sifahamu kwa nini mwenyekiti aliamua kuchukua maamuzi kama yale wakati
anafahamu hali halisi ilivyo.Mimi pia naungana nawe Jeremiah katika
hili.Japokuwa unaweza ukaonekana kama ni usaliti ndani ya jumuiya lakini
hatuwezi kukaa kimya wakati tunaona tunakoelekea si kuzuri hata kidogo_Ofisi ya
rais ilikuwa ni mhimili wetu mkuu ambao umen’goka na sasa tunayumba na
tusipokuwa makini sote tutaanguka kwa hiyo ndugu zangu nakubaliana na wazo la
Jeremiah kwamba tusikae kimya bali tuone namna ya kufanya .Agatha wewe una lipi
la kuchangia kwa upande wako? “ Kabla sijasema lolote kuna jambo nataka
kuwashirikisha.Nina chanzo changu cha taarifa ndani ya makao makuu na kwa
mujibu wa chanzo hicho ni kwamba toka lilipotokea tukio hili kumekuwa na
mfululizo wa vikao vya siri kati ya Alberto mkuu wa tatu na watendaji wa juu wa
jumuiya.Hakuna bado taarifa yoyote iliyopatikana wanajadili jambo gani” Agatha
akastuka baada ya simu yake kuita “Samahani naomba niipokee hii simu” akatoka
nje akaongea kwa takribani dakika tano kisha akarejea sebuleni “Tunaweza
kuendelea” akasema Agatha “Nimepata taarifa nyingine toka kwa chanzo changu
kuwa mwenyekiti ameitwa makao makuu haraka.Kwa mujbu wa taarifa alizozipata
huyo mpasha habari wangu ni kwamba kuna timu imeundwa ambayo itatumwa Tanzania
kuja kulikabili suala hili.Endapo timu hiyo itakuja Tanzania basi sote
tutawekwa pembeni kwani tutakuwa tumeshindwa kuifanya kazi yetu.Binafsi siko
tayari hilo litokee hasa nikikumbuka namna nilivyojitoa kwa hali na mali
kuipigania na kuipenyeza jumuiya hapa Tanzania.” Akasema Agatha “Haya yote
yamesababishwa na huyu mwenyekiti wetu kwa kushindwa kuchukua maamuzi sahihi
kwa wakati unaostahili” akasema Jeremiah “Kwa hiyo nini basi tunatakiwa kufanya
kwa sasa? Akauliza makamu wa rais “Kuna kitu kimoja tu ambacho tunapaswa kukifanya
.Tunatakiwa tumuue mwenyekiti” Ukimya mfupi ukapita halafu makamu wa rais
akauliz Una uhakika na hicho unachokisema Jeremiah? Akauliza makamu wa rais “
Ndugu zangu tukitaka tulimalize suala hili lazima tumuue Obi.Baada ya kumuondoa
tutafanya kampeni na kunichagua mimi niwe mwenyekiti wa muda na tukifanikiwa
katika hilo nitafanya maamuzi sahihi na kitu cha kwanza nitakachokifanya ni
kutoa Baraka za kumuua Ernest Mkasa.Hakuna tutakachoweza kukifanya tena bila ya
kumuondoa Ernest madarakani.Tukifanikiwa kwa hilo kwa mujibu wa katiba yetu
makamu wa rais utakaimu nafasi ya rais kwa muda na hapo utanirejesha katika
nafasi ya uwaziri mkuu ili tuweze kuikamilisha kazi tuliyokwisha ianza.Hivyo
ndivyo ilivyotakiwa kufanywa lakini tunaambiwa unatakiwa ufanyike uchunguzi
kwanza kabla ya kuchukua hatua yoyote.Huo ni upuuzi
ITAENDELEA
0 comments:
Post a Comment